Zəbur

Ⱪisⱪiqə qüxəndürüx

PDF quxurung

1-bɵlək

¹Nəⱪədər bəhtlik ⱨə!

Yamanlarning salasiƣa kirmigüqi,

gunaⱨkarlarning yolida mangmiƣuqi,

məshiriqilər^* arisida yürmigüqi.

²Pərwərdigarning təlimliridin sɵyünq tapidu ular,

keqə-kündüz xu təlimlər ⱨəⱪⱪidə pikir ⱪilar.

³U goya dərəhtur tikilgən eriⱪ boyiƣa,

ɵz pəslidə mewilərni berip turar.

Solaxmas əsla yopurmaⱪliri,

ⱨəmmə ixliri onguxluⱪ bolar.

⁴Biraⱪ yamanlar ohximas ularƣa,

ular ohxar xamalda sorulƣan topanƣa.^*

⁵Bax kɵtürəlməs yamanlar Hudaning soriⱪida,

gunaⱨkarlar turalmas ⱨəⱪⱪaniylar ⱪatarida.

⁶Pərwərdigar yorutar ⱨəⱪⱪaniylar yolini,

yamanlar yoli baxlar ⱨalakətkə ularni.

¹Neqün ⱪuturar həlⱪlər?

Neqün ixⱪa axmaydiƣan suyiⱪəst oylar adəmlər?

²Səp tüzüxüp jaⱨandiki padixaⱨlar,

ora kolixip birliktə ⱨɵkümdarlar,

Pərwərdigar wə u talliƣan padixaⱨⱪa ⱪarxi turar.

³Dəydu ular: “Üzüp taxlap ular salƣan kixənlərni,

qɵrüwetəyli boynimizdiki sirtmaⱪlarni.”

⁴Mana külməktə, olturƣuqi ərx təhtidə,

Pərwərdigar ⱪilmaⱪta ularni məshirə.

⁵Əyiblər ularni ƣəzəp bilən,

wəⱨimigə salar ⱪəⱨri bilən.

⁶Dəydu u: “Ɵz muⱪəddəs teƣimda –

təhtkə olturƣuzdum padixaⱨimni Si’onda.”

⁷Elan ⱪilay Pərwərdigarning pərmanini,^*

dedi u manga: “Sən mening oƣlumsən,^*

jakarlidim bügün sening atang ikənlikimni.

⁸Sora məndin, berimən ilkinggə barqə həlⱪni,

tə’əlluⱪ ⱪilimən sanga pütün zeminni.

⁹Tɵmür kaltək bilən wəyran ⱪilisən ⱪarxilaxⱪanlarni,

sapal ⱪaqini qaⱪⱪandək parə-parə ⱪilisən ularni.”

¹⁰Əⱪlinglarni tepinglar əmdi, əy padixaⱨlar,

agaⱨ bolunglar jaⱨandiki ⱨɵkümranlar.

¹¹Pərwərdigarƣa əyminip ita’ət ⱪilinglar,

xadlininglar ⱨəm Hudadin ⱪorⱪunglar.

¹²Aqqiⱪlanmisun, bax eginglar oƣliƣa,

tutsa uning ƣəzipi birdinla,

ⱨalak bolisilər mangƣan yolunglarda.

Nəⱪədər bəhtliktur panaⱨ tapⱪanlar uningda.

Bu munajatni Dawut ɵz oƣli Absalomdin ⱪeqip yürgəndə yazƣan.

¹Nəⱪədər kɵptur rəⱪiblirim, i Pərwərdigar,

xunqə jiⱪtur manga ⱪarxi qiⱪⱪanlar.

²Deyixər nurƣun kixilər üstümdin:

“Yoⱪtur uningƣa nijatliⱪ Hudadin.” Selaⱨ^*

³Əmma, i Pərwərdigar ⱪalⱪinimdursən,

xan-xɵⱨritim, ⱪəddimni kɵtürgüqisən.

⁴Pəryad ⱪilƣanidim yuⱪiri awazda Pərwərdigarƣa,

u jawab bərdi muⱪəddəs Si’on teƣidin manga. Selaⱨ

⁵Saⱪliƣaq meni Huda ɵz panaⱨida,

yatsam ketimən bəhiraman uyⱪuƣa,

tinq-aman oyƣinimən yənə tangda.

⁶Ⱪorⱪmasmən mingliƣan kixilərdin,

ularning ⱨər tərəptin ⱪilƣan ⱨujumidin.

⁷I Pərwərdigar, yardəmgə kəlgin,

i Ilaⱨim, meni ⱪutⱪuzƣin.

Təstikigə salisən rəⱪiblirimning,

qixlirini sundurisən rəzillərning.

⁸I Pərwərdigar, səndin kelər nijatliⱪ,

ɵz həlⱪingni ⱪilƣaysən bərikətlik. Selaⱨ

Dawut yazƣan munajat bolup, tarliⱪ sazlar təngkixidə eytilsun dəp, nəƣmiqilər bexiƣa tapxurulƣan.

¹Jawab bərgin, nida ⱪilsam sanga,

eⱨ meni ⱨimayə ⱪilƣuqi Huda.

Meni azad ⱪilƣaniding külpəttə ⱪalƣinimda,

angliƣin du’ayimni yənə rəⱨim ⱪilip manga.

²Əy insan baliliri,

ⱪaqanƣiqə dəpsəndə ⱪilisilər mening izzət-ⱨɵrmitimni,

ⱪaqanƣiqə ⱪədirləysilər asassiz xikayətlərni,

ⱪaqanƣiqə toⱪup qiⱪisilər manga ⱪarxi yalƣanqiliⱪlarni? Selaⱨ

³Bilip ⱪoyunglar xuni,

Pərwərdigar tallaydu təⱪwadarlarni,

anglaydu mening nidayimni.

⁴Hudadin ⱪorⱪunglar, gunaⱨ ⱪilmanglar!^*

jimjit yetip ornunglarda,

buni qongⱪur oylininglar! Selaⱨ

⁵Qin dil bilən ⱪilinglar ⱪurbanliⱪlarni,

Pərwərdigarƣa baƣlanglar ixənqinglarni.

⁶Soraydu nurƣun kixilər:

Yahxiliⱪ ⱪilar kim bizgə?

Eⱨ Pərwərdigar, qüxürgin

jamalingning nurini üstimizgə.

⁷Ziyadə huxal ⱪilding kɵnglümni,

xunqə mol bolƣanlardinmu axliⱪ wə xarabliri.

⁸Yatsamla uyⱪum kelər bəhiraman,

qünki meni aman-esən saⱪliƣuqi

pəⱪət sən – Pərwərdigar ɵzüngdursən.

Dawut yazƣan munajat bolup, nəygə təngkəx ⱪilinip eytilsun dəp, nəƣmiqilər bexiƣa tapxurulƣan.

¹Eⱨ Pərwərdigar, ⱪulaⱪ salƣin du’ayimƣa,

kɵngül bɵlgin aⱨuzarimƣa.

²Eⱨ ilaⱨim, padixaⱨim, yətkin mening ⱨalimƣa,

du’a ⱪilmaⱪtimən qünki sanga.

³Eⱨ Pərwərdigar, anglaysən səⱨərdə awazimni,

tang bilən təng iltija ⱪilip kütimən jawabingni.

⁴Hudadursən yaⱪturmaydiƣan yamanliⱪni,

ɵzünggə ⱨəmraⱨ ⱪilmaysən rəzillikni.

⁵Nəprətlinisən əskilik ⱪilƣuqilarƣa,

tik turalmas ⱨakawurlar aldingda.

⁶Ⱨalak ⱪilisən yalƣanqilarni,

ɵq kɵrisən ⱪanhor, ⱨiyligərlərni.

⁷Xundaⱪ, mən kirimən sening ɵyünggə,

qəksiz, mənggülük muⱨəbbiting bolƣaq manga.

Səjdə ⱪilimən muⱪəddəs ibadəthanangda,

ihlasim bardur sanga.

⁸I Pərwərdigar, baxliƣin meni ⱨəⱪⱪaniyliⱪingda,

qünki paylap yürər düxmənlirim ətrapimda.

Roxən ⱪilƣin ɵz yolungni aldimda.

⁹Səmimiylik yoⱪtur ularning eƣizlirida,

rəzillik qirmiwalƣandur dillirini,

oquⱪ ⱪəbrə kəbidur galliri,

huxamətkə tolƣandur tilliri.

¹⁰I Huda, bekitkəysən ularning gunaⱨlirini,

ɵzi koliƣan orida kɵrsun ular ɵzlirini.

Ita’ətsizlik ⱪilƣaqⱪa ular sanga,

kɵp gunaⱨⱪa patti ular, ⱪoƣliwətkin ularni.

¹¹Əmma səndin hursən bolsun panaⱨingƣa erixkənlər,

ular da’im xadlinip, yangratsun nahxa-küylər.

Sən alƣaysən ularni ⱪanitingning astiƣa,

xu waⱪitta seningdin xadlinidu seni sɵygənlər.

¹²I Pərwərdigar, bəht ata ⱪilisən ⱨəⱪⱪaniylarƣa,

sahawitingni ⱪalⱪan ⱪilip, baxpanaⱨ bolisən ularƣa.

Dawut yazƣan munajat bolup, səkkiz tarliⱪ sazlar təngkixidə eytilsun dəp, nəƣmiqilər bexiƣa tapxurulƣan.

¹I Pərwərdigar,

meni ⱪəⱨring bilən əyiblimə,

manga ƣəzipingdə tərbiyə bərmə.

²I Pərwərdigar, rəⱨim ⱪil manga,

zə’iplixip kəttim ⱪəwətla.

I Pərwərdigar, xipaliⱪ bərgin manga,

boxixip kətti ustihanlirim biraⱪla.

³I Pərwərdigar, ⱨəsrət toldi ⱪəlbimgə,

yürərmən bu əⱨwalda ⱪaqanƣiqə?

⁴Ɵtünəy Pərwərdigar, saⱪlap ⱪalƣin jenimni,

mənggülük muⱨəbbitingdə ⱪutⱪuz meni.

⁵Qünki ⱨeqkim seni əsliməs ɵlsə,

kim sanga rəⱨmət eytar gɵr iqidə.

⁶Ⱨeq madarim ⱪalmidi nalə-pəryad ⱪilip sanga,

kɵz yexim dərya bolur ⱨər keqisi ornumda.

⁷Kɵzlirimning nuri kətti dərd-ələmdin,

ajizlaxti kɵzlirim düxmənlirim dəstidin.

⁸Bərⱨəⱪ, ⱪulaⱪ saldi zarimƣa Pərwərdigar,

yoⱪilinglar yenimdin əy yamanliⱪ ⱪilƣuqilar.

⁹Pərwərdigar anglap iltijayimni,

ⱪobul ⱪildi du’ayimni.

¹⁰Ⱪalar ⱨəmmə düxmənlirim nomus wə wəⱨimidə,

tuyuⱪsizla qekinər, bolup xərməndə.

Binyamin ⱪəbilisidin bolƣan Kux isimlik bir adəmning ⱪilƣan sɵzigə ⱪarita Dawutning Pərwərdigarƣa iltija ⱪilip eytⱪan munajiti.

¹I igəm Pərwərdigar, tapimən panaⱨ səndin,

halas ⱪilip barliⱪ düxmənlirimdin,

ⱪutⱪuzƣaysən meni ⱪoƣlap yürgənlərdin.

²Bolmisa, ular xirdək titip taxlar meni,

ⱨeqkimim yoⱪtur ⱪutⱪuzidiƣanƣa jenimni.

³I Pərwərdigarim, ⱪilƣan bolsam birər yamanliⱪni,

bulƣiƣan bolsam naⱨəⱪ ixlar bilən ⱪollirimni,

⁴ⱪilƣan bolsam dostumƣa yamanliⱪni,

səwəbsiz buliƣan bolsam düxminimni,

⁵düxminim tutuwalsun ⱪoƣlap meni,

jenimni alsun ular qəyləp tenimni,

yər bilən yəksan ⱪilsun izzitimni. Selaⱨ

⁶I Pərwərdigar, ƣəzəpləngin, süküt ⱪilma,

ⱪarxi qiⱪⱪin ⱪəⱨrlik düxmənlirimgə i Huda,

mən üqün oyƣanƣin, ularni tartⱪin sotⱪa,

sən bekitkən ⱨɵkümni ada ⱪilƣin ularƣa.

⁷Sot aqmaⱪ üqün olturƣin büyük ornungda,

ⱨəmmə həlⱪlər toplaxsun ətrapingƣa.

⁸Pərwərdigar sot aqar həlⱪlərgə,

i Pərwərdigar ⱪilƣaysən ⱨɵküm

layiⱪ ⱨalda ⱨəⱪⱪaniy, diyanitimgə.

⁹Ahirlaxturƣin rəzillərning yamanliⱪini,

təwrənməs ⱪilƣin ⱨəⱪⱪaniylarni,

i ⱨəⱪⱪaniy Huda, siniƣuqisən ⱪəlblərni.

¹⁰Ⱪalⱪinimdur Huda,

nijatkar bolur ⱪəlbi paklarƣa.

¹¹Adil sotqidur Huda,

nəprətlinər rəzillərdin da’ima.

¹²Əgər taxlimisa insan yaman yolini,

biləp u ⱪiliqini,

bətləp ⱪuyar ya oⱪini.

¹³U təyyarlap ⱪoyƣandur əjəllik ⱪorallarni,

bətləp ⱪoyƣandur yayining otluⱪ oⱪini.

¹⁴Rəzil kixi gunaⱨⱪa ⱨamildar bolar,

ⱪorsiⱪi aqqiⱪ zəⱨərgə tolar,

tuƣⱪan balisi yalƣanqi bolar.

¹⁵Kim kolisa baxⱪilar üqün ora,

yiⱪilip qüxər ɵzi uningƣa.

¹⁶Kim yamanliⱪ ⱪilsa baxⱪilarƣa,

yenip kelər ɵz bexiƣa.

Kim zulum salsa baxⱪilarƣa,

yenip kelər ɵz bexiƣa.

¹⁷Təxəkkür eytimən ⱨəⱪⱪaniy Pərwərdigarƣa,

mədⱨiyə oⱪuymən uluƣ Hudaning namiƣa.

Dawut yazƣan munajat bolup, “gittif”ta^* orunlansun dəp, nəƣmiqilər bexiƣa tapxurulƣan.

¹I Rəbbimiz Pərwərdigar,

xunqə ⱨəywət naming bar yər yüzidə,

xəripingni namayan ⱪilding asman-pələktə.

²Balilar wə bowaⱪlarning tillirida mədⱨiyələtting ɵzüngni,

yumux üqün düxmən wə ⱪisasqilarning eƣizlirini.

³Ⱪarisam mən barmaⱪliring ijad ⱪilƣan asmanƣa –

kɵkkə orunlaxturup ⱪoyƣan yultuzlarƣa wə ayƣa,

⁴dəymən: insan nemə idi, sən uni yad ətküdək?

Adəm nəsli nemə idi, xunqə kɵngül bɵlgüdək?

⁵Pərixtilərdin azraⱪla tɵwən ⱪilding ornini,

kiydürdüng sən uningƣa xan-xɵⱨrətning tajini.

⁶Baxⱪurƣuzdung uningƣa külli jaⱨanni,

tiz püktürdüng uningƣa ⱨəmmini.

⁷Tiz pükər ⱪoy, kala, yawayi ⱨaywanlar,

⁸asmandiki uqarⱪanat, dengizdiki beliⱪlar,

xundaⱪla dengizda yaxiƣuqi ⱨəmmə janliⱪlar.

⁹I Rəbbimiz Pərwərdigar,

yər yüzidə xunqə ⱨəywət naming bar.

Dawut yazƣan munajat bolup, “mut-labbən”də^* eytilsun dəp, nəƣmiqilər bexiƣa tapxurulƣan.

¹I Huda, qin dilimdin eytimən təxəkkürümni,

bayan əyləp sening pütkül karamətliringni.

²Səndin aldim huxalliⱪ, xadliⱪimni,

i uluƣ Huda, küyləymən namingni.

³Düxmənlirim məƣlup bolup ⱪaqⱪinida,

ⱨalak ⱪilisən ularni aldimda.

⁴Qünki, meni aⱪliding sən ⱨəⱪ dəwayimda,

adalətlik sotqi bolup səltənətlik ornungda.

⁵Soraⱪ ⱪilip yat əllərni,

ⱨalak ⱪilding rəzil həlⱪlərni,

ɵqürüwətting mənggügə namlirini.

⁶Düxmənlər wəyran boldi əbədkə,

aylinip xəⱨərliri harabilikkə.

Ⱪalmidi u jaylarning namliri tarih betidə.

⁷Pərwərdigar olturar mənggü xaⱨliⱪ təhtidə,

ⱨɵküm üqün ⱪurƣandur u təhtini əslidə.

⁸Dunyani u soraⱪ ⱪilar adaləttə,

adil ⱨɵküm qiⱪirar həlⱪlərgə.

⁹Pərwərdigar ⱪorƣandur ezilgənlərgə,

panaⱨ bolar u da’im azabliⱪ künlərdə.

¹⁰Sening pəzilətliringni bilgənlər

ixənqisini baƣlar sanga,

qünki, tərk ətməysən

sanga təlpüngənlərni, i Huda.

¹¹Küylənglar Si’onda^* ⱨɵküm sürgən Pərwərdigarni,

bayan əyləp əllər ara uning büyük əjrini.

¹²Qünki, u alƣuqidur tɵkülgən ⱪanning ⱨesabini,

yad etip biqarilərni, untumas ularning pəryadini.

¹³I Pərwərdigar, xəpⱪitingni kɵrsitip manga,

ⱪutⱪuz meni ɵlümning girdabidin.

Ⱪariƣin, ɵqmənlərning manga salƣan azabiƣa.

¹⁴Bayan əyləy ⱪudritingni həlⱪning aldida,

Si’on xəⱨirining dərwazilirida.

Nijatliⱪingdin qɵmüləy xadliⱪⱪa.

¹⁵Yat əllər qüxti ɵzliri koliƣan oriƣa,

putliri ilinip ⱪaldi yoxurup ⱪoyƣan tuzaⱪⱪa.

¹⁶Ⱨɵkümi bilən tonutti ɵzini Pərwərdigar,

yamanliⱪliri bilən qüxilip ⱪaldi yamanlar. higga’on^* Selaⱨ

¹⁷Ⱪəbrilərgə kirip ketər yamanlar,

Hudani untuƣan barliⱪ ⱪowmlar.

¹⁸Mənggülük untulup kətməs bu dunyaning yoⱪsulliri,

əməlgə axmay ⱪalmas ezilgənlərning arzuliri.

¹⁹I Pərwərdigar, yardəm ⱪil, ƣalib kəlmisun rəzillər,

aldingda soraⱪ ⱪilinsun yat əllər.

²⁰I Pərwərdigar, ⱪorⱪunqⱪa salƣin ularni,

bilip yətsun ular pəⱪətla bəndə ikənlikini. Selaⱨ

¹I Pərwərdigar, neqün məndin ⱪeqip turisən yiraⱪta,

neqün məndin yoxurisən ɵzüngni kün qüxkəndə beximƣa?

²Yamanlar təkəbburluⱪta salmaⱪta zulum ajizlarƣa,

ajizlar qüxüp ⱪalmaⱪta ularning tuzaⱪliriƣa.

³Yamanlar kɵzgə ilmas Pərwərdigarni,

pəhirlinip ular ⱨəwəsliridin,

mahtap uqurar aq kɵzlərni.

⁴Yamanlar izdiməs Hudani ⱨakawurliⱪida,

Huda yoⱪtur ularning oy-hiyallirida.

⁵Onguxluⱪ bolar ularning yolliri ⱨəmixə,

Huda ⱨɵkümining bexiƣa kelixini almay nəzərgə,

məƣrur ⱨalda dimaⱪ ⱪaⱪar düxmənlirigə.

⁶Ular dər kɵngülliridə: “Təwrənməsmiz,

ⱨeqⱪaqan külpətlərgə uqrimasmiz.”

⁷Ⱨiylə, lənət wə zorluⱪ tolƣandur eƣizliriƣa,

yamanliⱪ wə zəⱨər qaqar tillirida.

⁸Mɵküp turup məⱨəllilərning pinⱨanlirida,

gunaⱨsizlarni ⱪətl ⱪilar tuyuⱪsizla,

tikilgəndur kɵzliri panaⱨsizlarƣa.

⁹Qatⱪalliⱪta mɵküp turƣan xir kəbi ular,

paylap turar tutuxⱪa ajizlarni,

qüxürüp ⱪiltaⱪliriƣa, tutuwalar ularni.

¹⁰Pursət kütər mɵküp turup yamanlar,

qanggiliƣa qüxər ularning panaⱨsizlar.

¹¹Dər yamanlar kɵngülliridə: “Untup ⱪaldi Huda bizni,

nəzər salmaydu ⱨərgiz bizgə, yumuwalƣandur kɵzlirini.”

¹²Ɵtünəy i Huda, jazaliƣaysən yamanlarni,

i Pərwərdigar, untumiƣaysən biqarilərni.

¹³Neqün yamanlar kɵzgə ilmas i Huda seni,

neqün kɵngülliridə dər: “Jazalimaydu Huda meni.”

¹⁴Bilimiz, kɵrüp turisən bularni,

ularning zəⱨərhəndə, zulumliriƣa

taxlap turuwatisən nəziringni,

alisən yamanlarni ⱨaman aliⱪiningƣa.

Panaⱨsizlar ɵzlirini tapxurar sanga,

yardəm ⱪilƣuqisən yetim-yesirlarƣa.

¹⁵Sundurƣaysən rəzil wə yamanlarning biləklirini,

rəzillikliri yoⱪalƣuqə jazaliƣaysən ularni.

¹⁶Mənggülük padixaⱨtur Pərwərdigar,

yoⱪilar zeminidin uningƣa etiⱪad ⱪilmiƣanlar.

¹⁷I Pərwərdigar, ⱪulaⱪ salisən ezilgənlərning istəklirigə,

ⱪuwwət berisən ularning yürəklirigə.

Kɵngül bɵlüp turisən du’a-tilawətlirigə.

¹⁸Ⱪoƣdaysən yetim-yesir, ezilgənlərning ⱨəⱪⱪini,

paniy aləmdə ⱨeqkim ⱪorⱪutalmas ularni.

Dawut yazƣan munajat bolup, nahxa ⱪilip eytilsun dəp, nəƣmiqilər bexiƣa tapxurulƣan.

¹Panaⱨliⱪ tapⱪan tursam Pərwərdigarda,

“ⱪuxⱪaq kəbi uqup kət ɵz teƣingƣa”

degininglar nemisi manga?!

²Mana yamanlar tartip yayini,

təⱪ ⱪildi selip oⱪini,

yoxurun atmaⱪqi bolup yahxini.

³Nemimu ⱪilalar ⱨəⱪⱪaniy kixi,

buzulsa ⱨəⱪⱪaniyliⱪning ulliri?

⁴Pərwərdigarning təhti ərxtidur,

u turar muⱪəddəs dərgaⱨida.

Kɵzitip turar u ⱨəmmə insanlarni,

diⱪⱪət bilən tikilgəndur kɵzliri insanlarƣa.

⁵Pərwərdigar kɵzitər ⱨəⱪⱪaniy wə rəzillərni,

ɵq kɵrər zorawanliⱪⱪa məptunlarni.

⁶Ⱪiziⱪ xamal, ot, günggürt, qoƣlar,

yamanlarning ⱨayatiƣa nesiwə bolar.

⁷Ⱨəⱪⱪaniydur Pərwərdigar, sɵyər ⱨəⱪⱪaniyliⱪni,

pəⱪət kɵngli duruslar kɵrər uning qeⱨrini.

Dawut yazƣan munajat bolup, “xeminit”ta^* eytilsun dəp, nəƣmiqilər bexiƣa tapxurulƣan.

¹Ⱪutuldurƣin, i Pərwərdigar,

tügəp kətti təⱪwadarlar,

ⱪalmidi sanga sadiⱪ insanlar.

²Yalƣan sɵzlər adəmlər bir-birigə,

aƣzi siliⱪ bolsimu rastqilliⱪ yoⱪ ⱪəlbidə.

^3-4Dəydu ular: “Tilimiz bilən ƣalib kelimiz,

ɵzimizningkidur aƣzimiz,

kimmu bolalaytti hojimiz?!”

Pərwərdigar etiwətkəy huxamətqilərning eƣizlirini,

kesiwətkəy ⱨəm poqilarning tillirini.

⁵“Mən baray” dəydu Huda:

“zulum tartⱪaq ezilgənlər,

nalə ⱪilƣaq miskinlər,

yətküzəy ularni

təxna bolƣan amanliⱪiƣa.”

⁶Tonurda yəttə ⱪetim tawlanƣan sap kümüx kəbi,

qin sɵzlərdur Pərwərdigarning sɵzliri.

⁷I Pərwərdigar, ⱪoƣdiƣaysən miskinlərni,

mənggü ⱪoƣdiƣaysən bu dəwrdikilərdin bizni.

⁸Təriplixip pəs ixlarni insanlar,

ƣadiyip yürüxidu ətrapimizda yamanlar.

Dawut yazƣan munajat bolup, nahxa ⱪilip eytilsun dəp, nəƣmiqilər bexiƣa tapxurulƣan.

¹I Pərwərdigar, untarsənmu mənggü meni?

Yoxurarsən ⱪaqanƣiqə məndin yüzüngni?

²Ⱨəsrət yutup ɵtərmən, ⱪaqanƣiqə əndixidə,

düxminim dəssəp turar ⱪaqanƣiqə yəlkəmgə?

³I Igəm Pərwərdigar, jawab bərgin nəziringni selip manga,

nurlandurƣin kɵzlirimni, bolmisa ketərmən mənggülük uyⱪuƣa.

⁴Əgər kɵzlirim yumulsa hux bolar rəⱪiblirim,

“mən uningdin ƣalib kəldim” deyixər düxmənlirim.

⁵Tayinip kəldim mən mənggülük muⱨəbbitinggə,

nijatingdin tolup taxsun xadliⱪ ⱪəlbimgə.

⁶Iltipat əyligəq sən manga,

i Pərwərdigar, munajat oⱪuymən sanga.

Dawut yazƣan munajat bolup, nahxa ⱪilip eytilsun dəp, nəƣmiqilər bexiƣa tapxurulƣan.

¹Əhməⱪlər kɵngülliridə deyixər “yoⱪtur Huda”.

Yirginqlik, rəzil bolup ⱪilmixliri,

mangmiƣandur ularning birsimu toƣra yolda.

²Pərwərdigar ərxtin insanƣa selip nəzər,

Hudani izdigüqi aⱪil adəm izdər.

³Azƣundur ⱨəmmisi, birdək buzulƣan,

birimu yoⱪtur ⱨətta toƣra yolda mangƣan.

⁴Qüxənməsmu əjəba ⱪilmixlirini pasiⱪlar?!

Ular mening həlⱪimni nan yigəndək yəp yutar,

Pərwərdigarƣa ibadət ⱪilmas əsla ular.

⁵Ⱨəⱪⱪaniylar bilən birgə bolƣaq Huda,

əhməⱪlərni wəⱨimə basmaⱪta mana.

⁶Yoⱪatmaⱪqimusilər arzulirini ezilgənlərning?!

Əmma Pərwərdigar panaⱨidur ularning.

⁷Isra’illarƣa nijatliⱪ Si’ondin qiⱪip kəlsə idi!

Pərwərdigar ⱨɵrlükkə qiⱪarƣinida zulumdiki həlⱪini,

xadlinar Isra’illar – sɵyünər Yaⱪup əwladi.

Dawut yazƣan munajat

¹I Pərwərdigar, kim kirələr muⱪəddəs qediringƣa,

kim sanga ibadət ⱪilalar muⱪəddəs Si’on teƣingda?

²Ibadət ⱪilalar u yərdə:

toƣra yolda mangidiƣanlar,

ⱨəⱪⱪaniy ix ⱪilidiƣanlar,

ⱨəⱪiⱪətni qin dilidin sɵzləydiƣanlar,

³baxⱪilarƣa ⱪara qaplimaydiƣanlar,

dostiƣa yamanliⱪ ⱪilmaydiƣanlar,

ⱪoxnisiƣa ⱨaⱪarət ⱪilmaydiƣanlar.

⁴Pəskəxlərdin yirginidiƣanlar,

təⱪwadarlarni ⱨɵrmətləydiƣanlar,

ziyan tartsimu wədisidə turidiƣanlar.

⁵Jazaniƣa pul ⱪərz bərməydiƣanlar,

para yəp bigunaⱨⱪa ziyan salmaydiƣanlar,

mənggü təwrənməstur mana bular.

Dawut yazƣan miⱪtam^*

¹Ɵzüng meni saⱪliƣin Huda,

qünki səndin taparmən panaⱨ.

²Dedim mən Pərwərdigarƣa:

“Igəmdursən, bəhtim yoⱪtur səndin baxⱪa.”

³Aliyjanabtur zemindiki təⱪwadar həlⱪing,

barliⱪ huxalliⱪimdur ular mening.

⁴Kimki qoⱪunmaⱪ bolsa ƣəyriy ilaⱨlarƣa,

axar uning dərdliri ⱪəwətla.

Ⱪurbanliⱪ ⱪilmasmən atap ularƣa,

almasmən namlirini ⱨətta tilimƣa.

⁵Pərwərdigar istiⱪbalim, nesiwəmdur,^*

i Pərwərdigar, keləqikim ⱪolungdidur.

⁶Esil riziⱪliring manga təⱪdim ⱪilinƣandur,

sən ata ⱪilƣan güzəl bəhtim bayliⱪimdur.

⁷Ⱨəmdusana eytimən nəsiⱨətqim Pərwərdigarƣa,

keqidimu toƣra yolni kɵrsitər ⱪəlbim manga.

⁸Pərwərdigarni tutarmən ⱨər da’im yadimda,

ong yenimda bolƣaq u təwrənməsmən pəⱪətla.

⁹Xunga roⱨim xadliⱪta, huxalliⱪ bar ⱪəlbimdə,

bihətərlik-amanliⱪ bərding mening tenimgə.

¹⁰Bilimən, taxlap ⱪoymaysən meni gɵr iqigə,

yol ⱪoymaysən təⱪwadaringning tenining qirixigə.

¹¹Kɵrsitip berisən ⱨayatliⱪ yolini manga,

huxalliⱪ tolup taxⱪandur ⱨuzurungƣa,

mənggülük xadliⱪ bardur ong ⱪolungda.

Dawutning du’asi

¹I Pərwərdigar,

ⱪulaⱪ salƣin sanga ⱪilƣan dəwayimƣa,

etibar ⱪilƣin mening nalə-pəryadimƣa,

kɵngül ⱪoyƣin qin, səmimiy du’ayimƣa.

²“Gunaⱨsiz” dəp aⱪliƣin meni,

qünki, kɵzüng kɵrər adilliⱪni.

³Sinap mening ⱪəlbimni,

kɵzitip keqidə hiyalimni,

təkxürüp baⱪⱪan bolsangmu meni,

tapalmiding ⱨeqbir nuⱪsanni.

Qing yumay, dəp oylidim aƣzimni.

⁴Əla bilip sening təlimliringni,

zorawanlarning yolidin tarttim ɵzümni,

yuⱪturmidim yamanlarning ⱪilmixlirini.

⁵Izingdin mangdim mən ⱪədəm elip,

xunga kətmidi putlirim teyilip.

⁶I Igəm, iltija ⱪildim sanga,

jawab bərgəqkə sən manga.

Berip manga diⱪⱪitingni,

tingxiƣin sɵzlirimni.

⁷Manga bəhx ətkin mənggülük muⱨəbbitingni,

i ɵzünggə tayanƣanlarning nijatkari,

ⱨujumƣa ⱪalƣanlarning ⱪudrətlik ⱪutⱪuzƣuqisi.

^8-9Kɵz ⱪariquⱪungdək asriƣin meni,

meni ⱨalak ⱪilmaⱪqi bolƣan rəzillərdin.

Ⱪanatliring astiƣa yoxurƣin meni,

ⱪorxiwalƣan əxəddiy düxmənlirimdin.

¹⁰Taxtək ⱪattiⱪtur ularning baƣirliri,

qong sɵzləydu ⱨəm eƣizliri.

¹¹Peyimƣa qüxüp ⱪorxawƣa aldi meni,

almaⱪ bolup ular mening jenimni.

¹²Ular ohxar bɵktürmidə turƣan yax xirlarƣa,

owƣa ⱨerismən xir kəbi oljisini talaxⱪa.

¹³Ɵtünəy Huda, aldini tosup ularning,

ⱪiliqing bilən tiz püktürüp ularni,

ⱪutⱪuzƣin rəzillərdin jenimni.

¹⁴I Pərwərdigar, ⱪutⱪuz meni ɵz ⱪolung bilən

bu paniy dunyadiki rəzillərdin.

Pəⱪət muxu dunyadidur ularning nesiwisi,

nemətliring bilən toyar ularning ⱪorsiⱪi.

Pərzəntliri bilən ⱪana’ət tapar kɵngülliri,

baliliriƣa ⱪaldurar ular mal-mülkini.

¹⁵Ⱨəⱪⱪaniyliⱪim bilən yüzüngni kɵrərmən,

oyƣanƣinimda didaringƣa ⱪanarmən.

Bu Pərwərdigarning ⱪuli Dawut yazƣan munajat bolup, nahxa ⱪilip eytilsun dəp, nəƣmiqilər bexiƣa tapxurulƣan. Pərwərdigar Dawutni barliⱪ düxmənliri wə padixaⱨ Sa’ulning ⱪolidin ⱪutⱪuzƣan küni Dawut bu munajatni Pərwərdigarƣa oⱪuƣan.

¹Küq-madarim Pərwərdigar sɵyimən seni.

²Ⱪoram texim, ⱪorƣinim, nijatkarim Pərwərdigardur,

manga panaⱨ bolidiƣan gigant teƣim, baxpanaⱨim,

ⱪalⱪinim, yengilməs ⱪutⱪuzƣuqim Hudayimdur.

³Iltija ⱪilsam mədⱨiyələr igisi Pərwərdigarƣa,

düxmənlirim ⱪolliridin ⱪutⱪuzilarmən xundila.

⁴Ɵlüm asarətliri qirmidi meni,

ⱨalakət dolⱪunliri qümkidi meni.

⁵Gɵristan tanilirida baƣlandim,

ɵlüm tuzaⱪliriƣa duq kəldim.

⁶Eƣir külpət ara iltija ⱪildim Pərwərdigarƣa,

yardəm tələp ⱪildim pəryad kɵtürüp Hudayimƣa.

Awazimni anglidi Pərwərdigar dərgaⱨida,

aⱨuzarim yetip bardi uning ⱪuliⱪiƣa.

⁷Xu qaƣ zemin silkinip, yər təwridi,

taƣlarning uli titrəp, midirlidi,

qünki Huda dərƣəzəpkə kəlgənidi.

⁸Qiⱪti Hudaning burnidin is-tütəklər,

etildi Hudaning aƣzidin ot-lawilar,

lawuldap küyətti ⱨətta ⱪipⱪizil qoƣlar.

⁹Kɵkni yerip yər taman qüxkəndə Huda,

turatti ⱪara bulutlar ayiƣining astida.

¹⁰U minip uqti bir “kerub”ⱪa,^*

pərwaz ⱪildi xamalning ⱪanatlirida.

¹¹Yepinqa ⱪilƣanidi u ⱪarangƣuluⱪni,

ⱪoyuⱪ, ⱪara bulutlar ⱪorxap turatti uni.

¹²Yorutⱪanidi aldini parlaⱪ nuri,

yaƣdurup mɵldür wə ⱪipⱪizil qoƣlarni,

parqilidi ⱪapⱪara bulutlarni.

¹³Pərwərdigarning awazi güldürləp asmanda

yangritip awazini uluƣ Huda,

yaƣdurdi mɵldür wə ⱪipⱪizil qoƣlar.

¹⁴Tarⱪitiwətti Huda düxmənlirini, yaƣdurup oⱪlirini,

qaⱪmaⱪlar qaⱪturup tiripirən ⱪilip ularni.

¹⁵I Pərwərdigar, tənbiⱨingdin,

ⱪəⱨrlik tiniⱪingning zərbisidin,

kɵrünüp ⱪaldi dengizning tegi,

eqilip ⱪaldi zeminning uli.

¹⁶Pərwərdigar kɵktin sunup ⱪolini,

qongⱪur sulardin tartip aldi meni.

¹⁷Ⱪutⱪuzdi meni wəⱨxiy düxminimdin,

manga ɵq bolƣanlardin,

qünki ular küqlük idi məndin.

¹⁸Apətlik künlirimdə ⱨujum ⱪildi ular manga,

Pərwərdigar yar-yɵlikim boldi əmma.

¹⁹U məndin hursən bolƣaq nijatliⱪ bərdi manga,

elip qiⱪti meni ⱨəm bihətər jayƣa.

²⁰Ⱨəⱪⱪaniyliⱪim üqün yahxiliⱪ ⱪildi Huda,

ⱪolumning pakliⱪidin in’am bərdi manga.

²¹Qünki mengip kəldim Pərwərdigarning yolida,

rəzillik ⱪilip, asiyliⱪ ⱪilmidim Hudayimƣa.

²²Kɵz aldimda boldi da’im uning barliⱪ ⱨɵkümliri,

bir yaⱪⱪa ⱪayrip ⱪoymidim ⱨəm uning pərmanlirini.

²³Uning aldida ƣubarsiz boldum,

ɵzümni gunaⱨ ⱪilixtin saⱪlidim.

²⁴Ⱪolum pak, ɵzüm ⱨəⱪⱪaniy bolƣaqⱪa,

Pərwərdigar in’am bərdi manga.

²⁵Wapadarlarƣa kɵrsitisən wapadarliⱪingni,

ⱨəⱪⱪaniy adəmlərgə ⱨəⱪⱪaniyliⱪingni.

²⁶Pakliⱪingni kɵrsitisən pak adəmlərgə,

layiⱪida jawab ⱪayturisən niyiti əgrilərgə.

²⁷Ⱪutⱪuzisən qarisizlarni,

yərgə urisən ⱨakawurlarni.

²⁸Pərwərdigar, ⱨayatliⱪ qiriƣimni yaⱪⱪuqisən,

Ilaⱨim, zulmitimni yoruⱪluⱪⱪa aylandurisən.

²⁹Sanga tayinip, düxmən ⱪoxuniƣa ⱨujum ⱪilalaymən,

i Igəm, yardimingdə sepillardin bɵsüp ɵtələymən.

³⁰Hudaning yoli mukəmməl yoldur,

uning eytⱪan sɵzliri ⱨəⱪiⱪəttur.

Panaⱨ izdigüqilərgə Huda bir ⱪalⱪandur.

³¹“Mənggü bar bolƣuqi”din baxⱪa kimdur Huda?!

Igimizdin baxⱪa kim bolar ⱪoram taxtək baxpanaⱨ?

³²Hudadur belimni ⱪudritidə baƣliƣuqi,

yolumni əyib-nuⱪsansiz ⱪilƣuqi.

³³Keyikningkidək yügürük ⱪilip u putlirimni,

egiz taƣlarda ⱨəm məzmut turƣuzdi meni.

³⁴Ⱪollirimni ɵgətti u jəng ⱪilixⱪa,

biləklirimni tuq oⱪyani tartixⱪa.

³⁵I Igəm, bərding manga nijatliⱪ ⱪalⱪiningni,

ong ⱪolung yɵləp, mulayimliⱪing yüksək ⱪildi meni.

³⁶Bihətər ⱪilƣaq sən basⱪan ⱨərbir ⱪədimimni,

teyilmastin mengip yürimən yollirimni.

³⁷Ⱪoƣlap yürüp tutuwaldim düxmənlirimni,

ⱪaytmidim kəynimgə yoⱪatmastin ularni.

³⁸Mən ularni yanjiwəttim, turalmas ⱪayta,

yiⱪildi ular putlirimning astiƣa.

³⁹Jənggə baƣliding küq-ⱪudrət bilən belimni,

bax əgdürdüng putlirimƣa manga ⱨujum ⱪilƣanlarni.

⁴⁰Qekinixkə məjbur ⱪilding rəⱪiblirimni,

yoⱪattim manga ɵq bolƣanlarni.

⁴¹Ular pəryad kɵtərsimu qiⱪmidi ⱪutⱪuzidiƣanlar,

nalə ⱪilip yalwursimu jawab bərmidi Pərwərdigar.

⁴²Eziwəttim ularni xamalda uqⱪan tozandək,

qəyliwəttim ularni koqidiki patⱪaⱪtək.

⁴³Həlⱪ bilən ⱪarxilixxtin mustəsna ⱪilding meni.

Bax ⱪilƣaniding meni yat əllərgə,

ⱪilmaⱪta ular mening hizmitimni.

⁴⁴Awazimni anglax bilən boysunar ular manga,

təslim bolidu yat əllər xümxiyip aldimda.

⁴⁵Jasaritini yoⱪatⱪan yat əllər,

titrigən ⱨalda ⱪorƣanliridin qiⱪixar.

⁴⁶Ⱨayattur Pərwərdigar!

U ⱪoram teximƣa eytilsun ⱨəmdusana,

uluƣlansun nijatkarim bolƣan Huda!

⁴⁷Hudadur ⱪisas elip bərgüqi manga,

boysundurƣuqidur həlⱪlərni ⱪol astimƣa.

⁴⁸Ⱪutⱪuzdung meni düxmənlirimdin,

üstün ⱪilding manga ⱨujum ⱪilƣanlardin,

ⱪutuldurdung ⱨəm zorawanlardin.

⁴⁹I Pərwərdigar, sanga rəⱨmət eytimən yatlar aldida,

mədⱨiyə küyi oⱪuymən namingƣa.

⁵⁰Pərwərdigar erixtürər ɵzi tikligən padixaⱨni uluƣ ƣəlibigə,

u beƣixlar mənggülük muⱨəbbitini ɵzi talliƣan padixaⱨⱪa –

ta əbəd Dawut wə uning əwladliriƣa.

Dawut yazƣan munajat bolup, nahxa ⱪilip eytilsun dəp, nəƣmiqilər bexiƣa tapxurulƣan.

¹Ərx jakarlar Hudaning xan-xəripini,

asman namayan ⱪilar uning ijadini.

²Tohtimastin sɵzlixər ular ⱨər kün,

təriplixər Hudani keqə wə tün.

³Ixlətmigən bolsimu gərqə ular tillirini,

qiⱪarmiƣan bolsimu gərqə ular ünlirini.

⁴Tiwixliri yeyilip kətkən tamam yər yüzigə,

həwiri yetip barƣandur jaⱨanning qətlirigə.

ⱪuyax üqün bir qedir tikkəndur Huda asmanƣa,

⁵qiⱪar undin ⱪuyax ohxap toyi bolƣan oƣulƣa.

Xadlinar u ohxap goya yügürüxkə qiⱪⱪan palwanƣa.

⁶Ɵrlisə u asmanning bir qetidin,

barar qɵrgüləp yənə bir qetigiqə,

ⱪaqalmas ⱨeq nərsə uning ⱨararitidin.

⁷Mukəmməldur Pərwərdigarning təlimliri,

yengilar u insan wujudini,

ixənqliktur Pərwərdigarning pərzliri,

dana ⱪilar nadanlarni.

⁸Toƣridur Pərwərdigarning kɵrsətmiliri,

xadlandurar ⱪəlblərni.

Oquⱪtur Pərwərdigarning əmrliri,

roxən ⱪilar kɵzlərni.

⁹Pakliⱪtur ihlas ⱪilix Pərwərdigarƣa,

ihlasmənlik dawamlixar əbədiygə.

Bərⱨəⱪtur Pərwərdigarning ⱨɵkümliri,

adilliⱪ singgəndur ularning ⱨərbirigə.

¹⁰Ⱪimməttur ular altundin, ⱨətta barqə sap altundin,

xerindur ⱨəsəldin, ⱨətta ⱨərə kɵnikidin tamqiƣan ⱨəsəldin.

¹¹Xundaⱪla agaⱨlandurar mən bəndəngni,

qing turƣuqi bularda alar katta in’amini.

¹²Kim bilip yetəlisun ɵzi ⱪilƣan hataliⱪlirini,

bilməy ⱪilƣan gunaⱨlirimdin pakliƣin meni.

¹³Saⱪliƣaysən bəndəngni bilip gunaⱨ ⱪilixtin,

ⱨɵkümranliⱪ ⱪilmiƣay gunaⱨ mening üstümdin.

Əyibsiz bolurmən mən xundila,

saⱪlinimən ⱪilixtin eƣir gunaⱨ.

¹⁴I Pərwərdigar, ⱪoram texim wə nijatkarim,

hux ⱪilƣay seni sɵzlirim wə hiyallirim.

Dawut yazƣan munajat bolup, nahxa ⱪilip eytilsun dəp, nəƣmiqilər bexiƣa tapxurulƣan.

¹Külpəttə ⱪalƣiningda Pərwərdigar jawab bərgəy nidayingƣa,

yaⱪupni yetəkligən Huda saⱪliƣay seni ɵz panaⱨida.

²Yardəm bərgəy muⱪəddəs ibadəthanidin,

yɵligəy seni Si’ondin.

³Hudaning yadida bolƣay atiƣan ⱨədiyəliring,

ⱪobul ⱪilinƣay ⱨuzurida kɵydürmə ⱪurbanliⱪliring. Selaⱨ

⁴Əməlgə axurƣay armanliringni,

ijabət ⱪilƣay kɵnglünggə pükkənliringni.

⁵Erixtürgən ƣəlibəng üqün quⱪan salimiz xadliⱪta,

tikləp ƣəlibə tuƣimizni igimizning namida.

U barliⱪ iltijaliringni kəltürgəy bəja.

⁶Bildimki, ɵzi talliƣan padixaⱨni ⱪutⱪuzar Huda,

muⱪəddəs ərx’əladin jawab berip uningƣa,

zor ƣəlibə ata ⱪilar ⱪudrətlik ong ⱪolida.

⁷Bəzilər ixinər jəng ⱨarwiliriƣa, bəziliri atliriƣa,

əmma biz ixinimiz Pərwərdigarimizƣa.

⁸Yiⱪildi ular ⱨalak bolup,

ⱪəddimizni rusliduⱪ biz tik turup.

⁹I Pərwərdigar, ƣəlibə ata ⱪilƣin padixaⱨⱪa,

jawab bərgəysən iltija ⱪilƣinimizda.

Dawut yazƣan munajat bolup, nahxa ⱪilip eytilsun dəp, nəƣmiqilər bexiƣa tapxurulƣan.

¹I Pərwərdigar, xadlinar padixaⱨ^* ⱪudritingdin,

huxaldur u erixtürgən ƣəlibəngdin.

²Sən əməlgə axurdung istəklirini,

rət ⱪilmiding soriƣan tiləklirini. Selaⱨ

³Mol bərikətlər ata ⱪilding uningƣa,

sap altundin taj kiydürdüng bexiƣa.

⁴Ɵmür bərding ɵmür tilisə,

ⱨayatini uzartting mənggügə.

⁵Zor xɵⱨrətkə erixtürdi sən in’am ⱪilƣan ƣəlibə,

bəⱨəywət xərəp ⱪuqti u sening ⱨimmitingdə.

⁶Mənggülük bərikət ata ⱪilip uningƣa,

ⱨuzurungda qɵmdürisən uni xadliⱪⱪa.

⁷Bərⱨəⱪ, padixaⱨ ixənq baƣlar Pərwərdigarƣa,

uluƣ Hudaning muⱨəbbitidə təwrənməs əsla.

⁸Əsir elip barliⱪ düxmənliringni,

ong ⱪolungda tutarsən sanga ɵq bolƣanlarni.

⁹Tonurdiki qoƣlar kəbi kɵyər ular,

namayan ⱪilƣiningda ⱪəⱨringni,

yalmap ketər ot yalⱪuni –

ƣəzəpliring yutar ularni.

¹⁰Yoⱪitarsən yər yüzidin ularning əwladlirini,

ⱪurutarsən insaniyət dunyasidin nəslini.

¹¹Yamanliⱪ ⱪilixⱪa urunsimu ular sanga,

oylap qiⱪsimu ⱨəm ⱨiylə-mikir,

əmma əməlgə axuralmas pəⱪətla.

¹²Qekindürisən ularni,

yüzlirigə bətligəndə oⱪyayingni.

¹³I Pərwərdigar kɵrsətkəysən ⱪudritingni,

nahxa eytip mədⱨiyələyli ƣəlibiliringni.

Dawut yazƣan munajat bolup, “tang səⱨərdiki qixi jərən” degən aⱨangda eytilsun dəp, nəƣmiqilər bexiƣa tapxurulƣan.

¹Aⱨ Hudayim, Hudayim taxliwətting neqün meni?

Ⱪutⱪuzmastin, neqün yiraⱪ taxlap kətting meni?

Anglimaysən neqün mening nalə-pəryadimni.

²I Rəbbim, bərmiding ⱨeqbir jawab nalə ⱪilsam künboyi,

aⱨ urup, yardəm sorap tapmasmən ⱨeqbir aram keqiliri.

³Lekin sən xübⱨisizki, muⱪəddəstursən,

Isra’illarning mədⱨiyəsini təht ⱪilip olturƣuqisən.

⁴Əjdadlirimiz baƣliƣandur sanga ixənqisini,

baƣlidi sanga ixənqisini, ⱪutuldurdung ularni.

⁵Nalə-zar ⱪilip Rəbbim sanga aman ⱪaldi ular,

sanga ixənq ⱪilƣanliⱪtin uyatta ⱪalmidi ular.

⁶Əmma, mən insan əməs bəlki ⱪurt kəbi,

insanlar arisida har wə zəbundurmən,

awam həlⱪ arisida kəmsitilgəndurmən.

⁷Kɵrgənlərning ⱨəmmisi mazaⱪ ⱪilar meni.

Deyixər pürüxtürüp eƣizlirini, qayⱪixip baxlirini:

⁸“Pərwərdigarƣa tapxurƣan əməsmidi u ɵzini,

ⱪutⱪuzsun Pərwərdigar əmdi uni.

Əgər Pərwərdigar xadlanƣan bolsa uningdin,

ⱪeni, ⱪutuldurup baⱪsun uni!”

⁹Lekin, sən anamning ⱪarnidin tuƣdurdung meni,

əmqəktiki qeƣimdila tayanqim ⱪilƣanidim seni.

¹⁰Mening Hudayim iding mən apiridə bolƣandila,

sanga tapxurulƣanidim ⱪorsaⱪtiki qeƣimdila.

¹¹Kətmigin taxlap meni yiraⱪⱪa,

kəlməktə külpətlər ⱪistap meni,

yardəm ⱪilmas ⱨeqkim manga.

¹²Nurƣun buⱪilar ⱪorxawƣa aldi meni,^*

baxanning küqlük buⱪiliri oriwaldi ətrapimni.

¹³Olja talixip ⱨɵrkiriwatⱪan xirdək ular goya,

eƣizlirini yoƣan aqti hiris ⱪilixip manga.

¹⁴Goya sudək tɵkülüp məndin kətti ⱪudritim,

ügüliridin ajrap kətti ustihanlirim,

goya xam bolup iqimdə eridi yürikim,

ümidsizliktin yoⱪaldi jasaritim.

¹⁵Ⱪuridi küq-madarim ohxap sapal parqisiƣa,

qaplixip ⱪaldi tilim tangliyimƣa,

ⱪoydung meni ɵlüm topisiƣa.

¹⁶Ⱪorxawƣa aldi meni bir top rəzillər,

ətrapimni oriwaldi axu itlar,

put-ⱪollirimni təxti ular.

¹⁷Kɵrünüp ⱪaldi sɵngəklirim mana,

ⱨomiyip turmaⱪta u rəzillər manga.

¹⁸Bɵlüxmək üqün ular kiyimlirimni,

qək tartixⱪa taxlidi kɵnglikimni.

¹⁹I Pərwərdigar, meni taxlap kətmə yiraⱪⱪa,

mədətkarim Huda tezdin yardəm ⱪilƣin manga.

²⁰Ⱪiliqtin ⱪutⱪuz mening jenimni,

itlarning qanggilidin ⱪimmətlik ⱨayatimni.

²¹Tartiwal meni xirning aƣzidin,

tenimni yawa buⱪilarning münggüzidin.

²²Jakarlaymən namingni ⱪerindaxlirimƣa,

mədⱨiyələymən seni etiⱪadqiliring arisida.

²³Əy ihlasmənlər Pərwərdigarƣa, uni mədⱨiyələnglar,

əy Yaⱪupning əwladliri, uningƣa xan-xərəp kəltürünglar,

əy Isra’il əwladliri, uningdin əymininglar.

²⁴Qünki, u untup ⱪalmidi horlanƣanlarni,

ulardin yirgənmidi ⱨəm yoxurmidi ɵzini,

bəlki, anglidi ularning nidalirini.

²⁵Mədⱨiyəlirimning ilⱨamidursən büyük jama’ət arisida i Huda,

ada ⱪilay ⱪəsəmlirimni sanga ihlasmənlərning aldida.

²⁶Ezilgənlər ⱪana’ətlinər nemətlərdin,

Pərwərdigarƣa təlpüngənlər mədⱨiyələr uni,

Huda mənggü yaxnatⱪay silərning ⱪəlbinglarni.

²⁷Yüzlinər Pərwərdigarƣa, yad etip uni barqə həlⱪlər,

i Pərwərdigar, səjdə ⱪilar aldingda barliⱪ ⱪəbililər.

²⁸Bərⱨəⱪ, aləmning padixaⱨliⱪi təwədur Pərwərdigarƣa,

u səltənət yürgüzər barliⱪ millət, əllər ara.

²⁹Səjdə ⱪilar Pərwərdigarƣa dunyadiki gülləngən baylar,

tiz pükər uning aldida ⱨətta gɵr aƣziƣa berip ⱪalƣanlar.

³⁰Bolur bir əwlad Pərwərdigarning hizmitidə,

igə bolar uqurƣa əwladlar Igəm ⱨəⱪⱪidə.

³¹Jakarlinar keyinki əwladlarƣa Hudaning ⱨəⱪⱪaniyliⱪi,

bayan ⱪilinar uning ⱨəⱪⱪaniyliⱪni əməlgə axurƣanliⱪi.

Dawut yazƣan munajat

¹Ⱪoyqimdur Pərwərdigar, baⱪar u meni,

kɵrməsmən xunga mən ⱨeq moⱨtajliⱪni.

²Yaylitar u meni yapyexil yaylaⱪlarda,

baxlap barar xildirliƣan sular boyiƣa.

³Urƣutar roⱨimni küq-ⱪuwwət berip manga,

xəripi üqün baxlar meni ⱨəⱪⱪaniyət yolida.

⁴Ɵtsəmmu gər ɵlüm sayə taxlap turƣan jilƣilardin,

ɵzüng manga yar bolƣaq ⱪorⱪmasmən hətərlərdin,

ⱨasang bilən tayiⱪing halas ⱪilar təxwixlərdin.

⁵Düxmənlirim aldida dastihan selip manga,

əzizləp meni yaƣ sürkərsən beximƣa,^*

bəht xarabim tolup taxar ⱨayat jamimƣa.

⁶Bərⱨəⱪ, xapa’ət wə mənggülük muⱨəbbiting,

ⱨəmraⱨ bolar ɵmürwayət yandixip manga,

mənggü yaxaymən Pərwərdigar ⱨuzurungda.

Dawut yazƣan munajat

¹Pərwərdigarƣa təwədur dunya, uningdiki barliⱪ məwjudat,

yər yüzi ⱨəm uningda yaxiƣuqi ⱨəmmə məhluⱪat.

²Qünki u dengizlar üstigə ⱪurƣandur jaⱨanni,

qongⱪur sular üstidə mustəⱨkəm ⱪilƣandur uni.

³Pərwərdigarning Si’on teƣiƣa kimmu qiⱪalar?

Muⱪəddəs ibadəthanisida kimmu ibadət ⱪilalar?

⁴Ibadət ⱪilalar ⱪoli pak, ⱪəlbi sap bolƣan,

sahtiƣa kɵngül bərmigən,

yalƣandin ⱪəsəm iqmigən insan.

⁵Undaⱪ adəmlər Hudadin bəht tapar,

nijatkari Huda təripidin aⱪlinar.

⁶Muxundaⱪ adəmlər təlpünər Hudaƣa,

i Yaⱪup etiⱪad ⱪilƣan Huda,

təlpüngüqilərdur ular jamalingƣa. Selaⱨ

⁷Eqilinglar əy dərwazilar,

eqilinglar əy əbədiylik ⱪowuⱪlar!

Xəwkətlik padixaⱨ kirip kəlsun.

⁸Bu xanuxəwkətlik padixaⱨ kimdur?

U küqlük, ⱪudrətlik Pərwərdigardur,

u jəng məydanidiki ⱪadir Pərwərdigardur.

⁹Eqilinglar əy dərwazilar,

eqilinglar əy əbədiylik ⱪowuⱪlar!

Xəwkətlik padixaⱨ kirip kəlsun.

¹⁰Bu xanuxəwkətlik padixaⱨ kimdur?

U Ⱪudrətlik Sərdar Pərwərdigardur,^*

u birdinbir xəwkətlik padixaⱨtur. Selaⱨ

Dawut yazƣan munajat

¹I Pərwərdigar, sanga seƣinip oⱪuymən du’a.

²I Ilaⱨim, tayinip kəldim ixinimən sanga,

yərgə ⱪaritip xərməndə ⱪilma meni,

ƣəlibə ⱪilƣuzup üstümdin düxmənlirimni.

³Xərməndə bolmas sanga ümid baƣliƣanlar,

xərməndə bolar ha’inliⱪ ⱪilixⱪa urunƣanlar.

⁴I Pərwərdigar, kɵrsətkin manga yolungni,

ɵgətkin manga uningda ⱪandaⱪ mengixni.

⁵Təlim bər manga, ⱨəⱪiⱪiting baxlisun meni,

qünki sən ⱪutⱪuzƣuqi Ilaⱨimsən,

künboyi sanga ümid baƣliƣanmən.

⁶I Pərwərdigar, yadingƣa alƣaysən rəⱨimingni,

əzəldin kɵrsətkən mənggülük muⱨəbbitingni.

⁷I Pərwərdigar, esingdə tutmiƣin

ɵsmürlüktə ɵtküzgən gunaⱨ wə əyiblirimni,

mənggülük muⱨəbbitingdə yad ətkin meni,

kɵrsitip manga meⱨribanliⱪingni.

⁸Xapa’ətlik, adildur Pərwərdigar,

xunga toƣra yolƣa baxlinar gunaⱨkarlar.

⁹Kəmtərlərni yetəklər durus yolƣa,

ɵz yolini ɵgitər kiqik pe’illarƣa.

¹⁰Toƣra yolƣa muⱨəbbiti wə sadaⱪiti bilən baxlar,

əⱨdisi wə əmrlirigə ri’ayə ⱪilƣuqilarni Pərwərdigar.

¹¹I Pərwərdigar, ⱪilip ɵz namingning ⱨɵrmitini,

gunaⱨlirim kɵp bolsimu kəqürüm ⱪilƣin meni.

¹²Əgər kimki ihlas ⱪilsa Pərwərdigarƣa,

durus yolni ɵgitər uningƣa Huda.

¹³Bəht-sa’adət iqidə yaxar u kixi,

zeminiƣa warisliⱪ ⱪilar uning əwladliri.

¹⁴Huda ɵzigə ihlas ⱪilƣanlarni dost tutar,

ularƣa ɵz əⱨdisini eniⱪ tonutar.

¹⁵Tikimən da’im Pərwərdigarƣa kɵzlirimni,

tuzaⱪtin u tartip alar putlirimni.

¹⁶Ⱨalimƣa baⱪ i Igəm ⱨimmitingni kɵrsət manga,

yalƣuzdurmən, ⱪaldim azab, külpət ara.

¹⁷Dərd-ələmlər basmaⱪta yürikimni,

xu dərdlərdin ⱪutⱪuzƣin ɵzüng meni.

¹⁸Nəziringdin ɵtküzgin azab wə dərdlirimni,

kəqürgin ɵzüng barliⱪ gunaⱨlirimni.

¹⁹Düxmənlirim nəⱪədər kɵptur, ⱪara,

wəⱨxiylərqə ɵq bolmaⱪta ular manga.

²⁰Ⱪutⱪuz ⱨəm ⱪoƣdiƣin ⱨayatimni,

xərməndə ⱪilma meni,

baxpanaⱨim bilimən pəⱪət seni.

²¹Diyanətlik, durusluⱪ ⱪoƣdiƣay meni,

qünki, sanga baƣlidim ümidimni.

²²I Huda, barliⱪ külpətlərdin ⱪutⱪuzƣin Isra’illarni.

Dawut yazƣan munajat

¹I Pərwərdigar, aⱪliƣin meni,

saⱪlap kəldim diyanitimni,

tayanqim ⱪildim pəⱪət seni.

²I Pərwərdigar, sinap kɵr, kɵzət meni,

pakliƣin mening niyət, ⱪəlbimni.

³Ayan bolƣaq mənggülük muⱨəbbiting kɵz aldimda,

mengip kəldim sən kɵrsətkən ⱨəⱪiⱪət yolungda.

⁴Xerik əməsmən yalƣanqilarƣa,

arilaxmaymən sahtipəzlərgə.

⁵Yirginimən pasiⱪlardin,

rəzillər bilən bolmaymən birgə.

⁶I Pərwərdigar, pak ⱪəlbtə yuyarmən ⱪollirimni,

aylinarmən andin sening ⱪurbanliⱪ supangni.

⁷Xükür eytay kɵtürüp awazimni,

bayan əyləp sening barliⱪ karamətliringni.

⁸I Pərwərdigar, sɵyimən sən turƣan ibadəthanini,

xəwkiting namayan bolƣan jayni.

⁹Gunaⱨkarlar ⱪatari almiƣin jenimni,

ⱪanhorlar ⱪatari ⱨayatimni.

¹⁰Pariƣa tolup ularning ong ⱪolliri,

suyiⱪəst bilən bulƣanƣandur ⱪolliri.

¹¹Mən bolsam yoⱪatmidim diyanitimni,

iltipat ⱪilip, ⱪutⱪuz meni.

¹²Putlirim turar mening bihətər yərdə,

təripləymən Pərwərdigarni təⱪwadarlar jama’itidə.

Dawut yazƣan munajat

¹Nijatliⱪim wə nurum tursa Pərwərdigar,

mən yənə kimlərdin ⱪorⱪup yaxay?

Ⱨayatimning ⱪorƣini tursa Pərwərdigar,

yənə kimlər aldida titrəp turay?

²Rəⱪiblirim, düxmənlirim putlixip qüxti düm,

gɵxümni yemək bolup manga ⱪilƣanda ⱨujum.

³Yaw ləxkərliri alsimu meni ⱪorxawƣa,

ⱪorⱪunq bolmas ⱪəlbimdə əsla.

Atlansimu ular manga ⱪarxi jənggə,

təwrənməs ixənqim bardur yənila.

⁴Ɵtünimən Pərwərdigardin bir ixni,

eytay yəni istigimni:

“Yaxap bir ɵmür Pərwərdigarning ɵyidə,

ⱪansam uning güzəl ⱨɵsnigə,

təpəkkur ⱪilalisam Igəm ⱨəⱪⱪidə.”

⁵Eƣir künlər kəlginidə beximƣa,

alar u meni sayiwini astiƣa.

Qiⱪirip meni panaⱨlinidiƣan egiz jayƣa,

yoxurup ⱪuyar muⱪəddəs qediriƣa.

⁶Əmdi ⱪəddim kɵtürüldi rəⱪiblirim aldida.

Xadliⱪ bilən alⱪixlap Pərwərdigarni,

ⱪilarmən ⱪurbanliⱪ Hudaning qedirida,

uni küyləymən yangritip nəƣmə-nawa.

⁷I Pərwərdigar, angliƣaysən awazimni ⱪilsam nida,

kɵrsətkəysən iltipat jawab berip manga.

⁸“I Pərwərdigar, təlpünimən pəⱪət sanga”

dedim mən, deginingdə “təlpüngin manga”.

⁹Ⱪaqurmiƣin meningdin didaringni,

taxlimiƣin ƣəzipingdə mən ⱪulungni.

Bolup kəlding i Huda, mədətkarim,

tərk ətmə, taxlima meni, nijatkarim.

¹⁰Waz kəqsimu meningdin ata-anam,

ɵz ⱪoyniƣa alar meni Pərwərdigarim.

¹¹I Pərwərdigar, ⱨəⱪ yolungni ɵgət manga,

baxla meni ⱨəⱪⱪaniyət yolungƣa,

qünki bardur düxmənlirim ətrapimda.

¹²Taxlap ⱪoyma rəⱪiblirimning məyligə meni,

baxlidi bu sahta guwaⱨqilar manga ⱪarxi ⱨujumni,

xunqə yawuz, zəⱨərdur ularning tilliri.

¹³Yoⱪitar idim ɵzümni əgər ixənqim bolmisa

kɵrüxkə Pərwərdigarning meⱨribanliⱪini bu dunyada.

¹⁴Təlmürüp kütkin Pərwərdigarni,

dadil bol, jur’ətlik ⱪil yürikingni,

xundaⱪ, təlmürüp kütkin Pərwərdigarni.

Dawut yazƣan munajat

¹I Pərwərdigar, iltija ⱪilimən sanga,

i ⱪoram texim, ⱪulaⱪ salmay ⱪoymiƣin manga.

Əgər jim turuwelip bərmisəng jawab,

ⱪalarmən goya gɵrdiki murdiƣa ohxap.

²Muⱪəddəs jaying tərəpkə ⱪilip yüzümni,

kɵtürüp turup ⱪolumni, bayan ⱪilsam dərdimni,

angliƣin, sanga ⱪilƣan ɵtünüxümni.

³Yamanliⱪ ⱪilƣuqilar, rəzillər ⱪatariƣa,

qüxürüp ⱪoymiƣin meni əsla,

dostanə bolsimu ular ⱪoxniliriƣa,

yamanliⱪ oylar dillirida.

⁴Jazaliƣaysən ularni ⱪilmixliriƣa ⱪarap,

ⱪilƣan yamanliⱪlirini ⱨesablap.

Ⱪayturup bərgin əməllirigə layiⱪ jaza,

ⱪollirining ⱪilƣanlirini sanap.

⁵Pərwərdigar wəyran ⱪilar rəzillərni,

əsligə kəltürməs ⱪaytidin ularni.

Qünki ular kɵzgə ilmas Hudaning əjrini,

pisəntigə almas uning yaratⱪanlirini.

⁶Ⱨəmdusana oⱪulsun Pərwərdigarƣa,

ⱪulaⱪ saldi u mening iltijayimƣa.

⁷Ⱪudritim wə ⱪalⱪinimdur Pərwərdigar,

yardimigə erixtim ixənq baƣlap uningƣa.

Xunga mən xadlinip ⱪəlbimdin,

xükür eytarmən uningƣa munajitimda.

⁸Küq-ⱪudritidur Pərwərdigar ɵz həlⱪining,

nijatliⱪ ⱪorƣinidur ɵzi talliƣan padixaⱨning.

⁹I Pərwərdigar, ⱪutⱪuzƣaysən ɵz həlⱪingni,

bərikətlik ⱪilƣaysən ɵzünggə təwə bolƣanlarni,

qopani bolup baⱪⱪaysən mənggü ularni.

Dawut yazƣan munajat

¹Əy pərixtilər, təriplənglar Pərwərdigarni,

təriplənglar uning xan-xəripi wə ⱪudritini.

²Təriplənglar Pərwərdigarni munasip uning namiƣa,

səjdə ⱪilinglar parlaⱪ, muⱪəddəs Pərwərdigarƣa.

³Pərwərdigarning awazi anglinar dengiz-okiyanlarda,

güldürmama güldürlitər xanuxəwkətlik Huda,

uning awazi bipayan sular üstidə yangritip sada.

⁴Pərwərdigarning awazi ⱪudrətliktur,

Pərwərdigarning awazi ⱨəywətliktur.

⁵Jaranglisa Pərwərdigarning awazi sunup ketər kedir dərəhliri,

xundaⱪ, Pərwərdigarning awazida parə-parə bolup ketər Liwan^* kedirliri.

⁶Jaranglisa Pərwərdigarning awazi mozaydək səkrəp ketər Liwan taƣliri,

kɵndürülmigən buⱪidək taⱪlap ketər Siryon^* teƣi.

⁷Pərwərdigarning awazi qaⱪturar qaⱪmaⱪlarni.

⁸Pərwərdigarning awazi titritər qɵl-jəzirini,

Pərwərdigar zilziligə salar Kadex qɵllükini.

⁹Yangrisa Pərwərdigarning awazi tolƣinar dup dərəhliri,^*

yalingaqlinar ormanlar jaranglisa Pərwərdigarning awazi.

“Ajayip uluƣdur Huda” dəp warⱪirixar,

Pərwərdigarning ibadəthanisida turƣanlar.

¹⁰Topan balasi bolƣanda Pərwərdigar idi ɵz təhtidə,

padixaⱨtur Pərwərdigar, u ⱨɵküm sürər mənggügə.

¹¹Pərwərdigar küq-ⱪudrət berər ɵz həlⱪigə,

toldurar ularni tinq-amanliⱪ bəhtigə.

Muⱪəddəs ibadəthanini Hudaƣa atax murasimida eytix üqün Dawut yazƣan munajat

¹I Pərwərdigar, uluƣlaymən seni,

ɵlüm girdabidin ⱪutⱪuzdung meni.

Meni zangliⱪ ⱪilip külüxkə

ⱪoymiding düxmənlirimni.

²I Pərwərdigar, i Ilaⱨim,

nalə ⱪilsam sanga,

xipaliⱪ bərding manga.

³Ɵlüklər makanidin neri ⱪilding jenimni,

gɵrgə kirip ketixtin saⱪliding meni.

⁴Əy təⱪwadarlar, ⱨəmdusana oⱪunglar Pərwərdigarƣa,

xükür eytinglar uning muⱪəddəs namiƣa.

⁵Ɵtüp ketər ƣəzipi kɵzni yumup aqⱪuqə,

əmma uning xapa’iti ⱨəmraⱨdur adaⱪⱪiqə.

Keqiqə dawam ətsimu gər yiƣa-zarə,

xad-huramliⱪ yetip kelər səⱨərdə.

⁶Məƣrurlinip dedim mən ronaⱪ tapⱪan qeƣimda:

“Təwrənməsmən əsla.”

⁷I Pərwərdigar, kɵrsitip manga xapa’itingni,

taƣdək büyük ⱪilding meni.

Əmma boldum alaⱪzadə,

ⱪaqurƣiningda didaringni.

⁸I Pərwərdigar, iltija ⱪilip sanga,

rəⱨim tiləp dedimki Igəm sanga:

⁹Ɵmrüm tügəp, kətsəm ɵlüklər makaniƣa,

nemə paydam tigər sanga?

Jəsitim jakarlap sening wapadarliⱪingni,

oⱪuyalarmu mədⱨiyə sanga?

¹⁰I Pərwərdigar,

kɵrsətkin xəpⱪitingni ⱪulaⱪ selip aⱨimƣa,

i Pərwərdigar, mədətkar bolƣin manga.

¹¹Ussulƣa aylandurup matimimni,

saldurup üstümdin ⱨaza kiyimimni,

baƣliding xadliⱪ kəməri bilən belimni.

¹²Xunglaxⱪa wujudum süküt ⱪilmay oⱪusun ⱨəmdusana,

i Pərwərdigar, i Ilaⱨim, xükür eytay mənggü sanga.

Dawut yazƣan munajat bolup, nahxa ⱪilip eytilsun dəp, nəƣmiqilər bexiƣa tapxurulƣan.

¹I Pərwərdigar, taparmən səndin panaⱨ,

meni ⱨərgiz xərməndə ⱪilma,

ⱪutⱪuz meni, ⱨəⱪⱪaniysən da’ima.

²Ⱪutⱪuz tezdin meni, ⱪulaⱪ selip aⱨimƣa,

panaⱨlinay mən səndə, ⱪoram tax bolƣin manga,

ⱪutⱪuzuxⱪa jenimni ⱪorƣan bolup bərgin manga.

³Bərⱨəⱪ, ⱪoram texim, ⱪorƣinimdursən mening,

yetəklə meni ɵzüng, ⱨɵrmiti üqün namingning.

⁴Düxmənlərning tuzaⱪliridin saⱪliƣaysən,

qünki, sən mening baxpanaⱨimdursən.

⁵I Pərwərdigar – wapadar Huda,

tapxurdum roⱨimni ⱪolungƣa,

təyyarsən ɵzüng meni ⱪutⱪuzuxⱪa.

⁶Ɵq kɵrimən butlarƣa qoⱪunidiƣanlarni,

baƣliƣanmən Pərwərdigarƣa ixənqimni.

⁷Mənggülük muⱨəbbiting xad-huram ⱪilar meni,

bərⱨəⱪ, kɵrdüng japalirimni,

bilip yətting azablirimni.

⁸Meni taxlap bərmiding düxmən ⱪoliƣa,

orunlaxturup ⱪoydung bihətər jayƣa.

⁹I Pərwərdigar, ⱪilƣaysən manga rəⱨim,

qünki, mən külpəttə ⱪaldim,

dərd-ələmdin hirələxti kɵzlirim,

ajizlap kətti ⱨəm roⱨim, tenim.

¹⁰Uprimaⱪta ⱨəsrət bilən ⱨayatim,

ƣəm-ⱪayƣuda tügiməktə yillirim,

maƣdurum kətməktə gunaⱨlirim dəstidin,

ⱪurup, ⱪaⱪxal bolmaⱪta ustihan, yiliklirim.

¹¹Ⱪaldim düxmənlirimning ⱨaⱪaritigə,

ⱨətta ⱪoxnilirimning aⱨanitigə.

Boldum mən tonuxlirimƣa bir wəⱨimə,

ⱪaqar ular koqida meni kɵrsə.

¹²Untuldum mən huddi ɵlgən adəmlərdək,

taxlandim bə’əyni sunƣan sapal ⱪaqilardək.

¹³Anglidim manga ⱪilƣan tɵⱨmətlərni,

wəⱨimə orap turar ətrapimni.

Məsliⱨətlixər manga ⱪarxi ular,

pilan tüzər almaⱪ bolup jenimni.

¹⁴I Pərwərdigar, tayanqim pəⱪət sən,

dəymən xunga: “Sən mening Hudayimsən.”

¹⁵Ⱨayatim ilkingdidur pəⱪət sening,

qanggilidin ⱪutⱪuz meni düxmənlirimning –

manga ziyankəxlik ⱪilƣuqilarning.

¹⁶Qüxürgin ⱪulungƣa didaringning nurini,

mənggülük muⱨəbbitingdə ⱪutⱪuzƣin meni.

¹⁷I Pərwərdigar, meni ⱨərgiz xərməndə ⱪilma,

qünki mən iltija ⱪildim sanga.

Rəzillər bolƣay xərməndə,

zuwani tutulup barƣay gɵrgə.

¹⁸Ⱨəⱪⱪaniylarƣa kibir kɵrsitip, mazaⱪ ⱪilƣuqilarning,

qaplixip ⱪalƣay yalƣan sɵzligən ləwliri ularning.

¹⁹I Pərwərdigar, sanga ihlas ⱪilƣanlarƣa,

iltipatliring nəⱪədər moldur ularƣa.

Ata ⱪilisən nemətliringni seni panaⱨ tartⱪanlarƣa,

jaⱨan əⱨli – həlⱪi’aləm aldida.

²⁰Seni panaⱨ ⱪilƣanlarni saⱪlap ⱨuzurungda,

ⱪoƣdaysən insanlarning suyiⱪəstliridin,

elip ularni ɵz panaⱨingƣa,

saⱪlaysən qeⱪimqilarning tilliridin.

²¹Ⱨəmdusanalar bolsun Pərwərdigarƣa,

qünki u kɵrsətti manga

ɵzining qəksiz meⱨir-muⱨəbbitini,

xəⱨər ⱪorxawda ⱪalƣanda.

²²Dəkkə-dükkidə degənidim:

“Nəziringdin məⱨrum boldum.”

Lekin sanga nalə ⱪilip yiƣliƣinimda,

ⱪulaⱪ salding pəryadimƣa.

²³Əy Pərwərdigarning təⱪwadarliri, sɵyünglar uni,

Pərwərdigar ⱪoƣdar ɵzigə sadiⱪlarni,

əmma ⱪattiⱪ jazalar ⱨakawurlarni.

²⁴Əy ümidini Pərwərdigarƣa baƣliƣanlar,

ƣəyrətlik bolunglar, jasarətkə tolsun ⱪəlbinglar.

Dawut yazƣan tərbiyəwi munajat

¹Nəⱪədər bəhtlik insanlar-ⱨə,

gunaⱨliri kəqürüm ⱪilinƣanlar,

ita’ətsizliki əpu ⱪilinƣanlar.

²Nəⱪədər bəhtlik insanlar-ⱨə,

Huda gunaⱨlirini saⱪit ⱪilƣanlar,

kɵngülliridə ⱨiylə-mikir bolmiƣanlar.

³Iⱪrar bolmay gunaⱨlirimƣa,

yürdüm künboyi aⱨ urup,

qiridi ustihanlirim azabta.

⁴I Pərwərdigar, keqə-kündüz jazalixing eƣir kəldi manga,

iliklirim ⱪurup kətti, ⱪurup kətkən su kəbi tomuzda. Selaⱨ

⁵Əmdi iⱪrar ⱪildim gunaⱨlirimni,

tonudum aldingda əskilikimni.

Deginimdə: “Pərwərdigar, iⱪrarmən gunaⱨimƣa”,

halas ⱪilding azabtin meni, kəqürüp gunaⱨlirimni. Selaⱨ

⁶Xunga du’a ⱪilsun sanga,

təⱪwadarlar pursitining barida.

Dengiz-okyan taxⱪin bolup taxsimu nawada,

xübⱨisizki, taxⱪinliri yetip baralmas ularƣa.

⁷I Pərwərdigar, sən mening panaⱨgaⱨimdursən,

saⱪlaysən külpəttin meni,

yangrar ətrapimda nijatliⱪ nahxiliri. Selaⱨ

⁸Əⱪil-idrak berip sanga kɵrsitimən yolungni,^*

ⱨalingdin həwər elip ɵgitimən yolumda mengixni.

⁹At yaki ⱪeqirdək angsiz bolma,

ⱪamqa, yügən bolmisa boysunmas ular sanga.

¹⁰Dərd-ələmlər kelər yamanlarning bexiƣa,

Pərwərdigarning mənggülük muⱨəbbiti ⱪuqaⱪ aqar uningƣa tayanƣanlarƣa.

¹¹Əy ⱨəⱪⱪaniylar, Pərwərdigardin hursən bolup xadlininglar,

əy ⱪəlbi paklar, xadliⱪtin alⱪix yangritinglar.

¹Əy ⱨəⱪⱪaniylar, Pərwərdigarni küylənglar xadliⱪta,

uni mədⱨiyələx yarixar durus yolda mangƣanlarƣa.

²Lira^* qelip minnətdarliⱪ bildürünglar Pərwərdigarƣa,

küy qelinglar on tarliⱪ qiltarda atap uningƣa.

³Yengi nahxa eytinglar beƣixlap Hudaƣa,

xadliⱪ bilən yangrisun awazinglar,

qekinglar tarini yətküzüp wayiƣa.

⁴Qünki, ⱨəⱪiⱪəttur Pərwərdigarning sɵzliri,

sadaⱪətliktur uning barliⱪ ixliri.

⁵U sɵyər ⱨəⱪⱪaniyət wə adalətni,

toldurƣandur zeminƣa mənggülük muⱨəbbitini.

⁶Yaraldi asman Pərwərdigarning buyruⱪida,

yultuzlar uning nəpəs tiniⱪida.

⁷Qək-qegra bekitti u okyanlarƣa,

saⱪliƣandur u sularni ambarlirida.

⁸Əymənsun Pərwərdigardin jimi məhluⱪatlar,

ⱪorⱪsun uningdin dunyadiki barliⱪ insanlar.

⁹Qünki Huda “bar bolsun” desə bar boldi,

əmridin yoⱪ nərsilər apiridə boldi.

¹⁰Bikar ⱪilar Pərwərdigar hudasizlarning ⱪararlirini,

yoⱪ ⱪilar ularning kɵngligə pükkən məⱪsətlirini.

¹¹Əmma mənggülüktur Pərwərdigarning ⱪararliri,

əwladtin-əwladⱪiqə əməlgə axar məⱪsətliri.

¹²Pərwərdigarni^* Hudayimiz dəp tonuƣanlar bəhtliktur,

Pərwərdigar ɵzigə təwə ⱪilip talliƣan həlⱪ bəhtliktur.

¹³Ərxtin nəzər selip Pərwərdigar,

jimiki insanlarni kɵrüp turar.

¹⁴Təhtidə olturup Huda,

nəzər salar insanlarƣa.

¹⁵Huda yaratⱪaq insanlarning yürikini,

bilip turar ularning jimi ixlirini.

¹⁶Padixaⱨ ƣalib bolalmas ⱪoxunining büyükliki bilən,

palwan ⱪutⱪuzalmas ɵzini küqtünggürlüki bilən.

¹⁷Əhməⱪliⱪtur ⱪutulimən deyix məƣlubiyəttin at bilən,

ⱪutⱪuzalmas ⱨeqkimni at ⱪara küqi bilən.

¹⁸Bərⱨəⱪ, Hudaning nəziri uningƣa ihlas ⱪilƣanlarda,

uning mənggülük muⱨəbbitigə ümid baƣliƣanlarda.

¹⁹Ⱪutⱪuzidu ularni ɵlümdin,

saⱪlaydu aqarqiliⱪtin.

²⁰Pərwərdigarni təlmürüp kütimiz,

udur bizning mədətkar, ⱪalⱪinimiz.

²¹Xadlinar uningdin ⱪəlbimiz,

qünki, muⱪəddəs Hudaƣa ixənq baƣliduⱪ biz.

²²I Pərwərdigar, ümidimiz səndə,

mənggülük muⱨəbbiting yar bolƣay bizgə.

Dawut sarang boluwalƣaqⱪa, Abimələk padixaⱨ təripidin ⱪoƣliwetilgən. Dawut uxbu munajatni xu wəⱪələrni əsləp yazƣan.

¹Təripləymən ⱨər da’im Pərwərdigarni,

qüxürməsmən aƣzimdin mədⱨiyələxni.

²Qin dilimdin apirin oⱪuymən Pərwərdigarƣa,

anglap buni ajizlar qɵmülər huxalliⱪⱪa.

³Mədⱨiyələyli birliktə Pərwərdigarning büyüklükini,

uluƣlayli ⱨəmmimiz uning namini.

⁴Ijabət ⱪilip Pərwərdigar du’ayimni,

ⱨəmmə wəⱨimilərdin halas ⱪildi meni.

⁵Nurlinar qeⱨri baⱪsa kim seƣinip Hudaƣa,

yərgə ⱪarap ⱪalmas ularning yüzliri əsla.

⁶Pərwərdigar anglap peⱪirning nidayini,

ⱨəmmə külpətlərdin ⱪutⱪuzdi meni.

⁷Ⱨər tərəptin ⱪoƣdap Hudaning pərixtisi,

ⱪutⱪuzar həwptin Pərwərdigarƣa ihlasmənlərni.

⁸Ⱨes ⱪilƣin wə bilgin Hudaning meⱨribanliⱪini,

xunqilik bəhtlik bolar baxpanaⱨ ⱪilƣanlar uni.

⁹Pərwərdigarƣa ihlas ⱪilinglar, əy uning təⱪwadarliri,

uningƣa ihlas ⱪilƣanlarning kəm bolmas ⱨeq nərsisi.

¹⁰Ussuz wə aq ⱪelixi mumkin küqlük arslanlar,

əmma ⱪalmas ⱨeq moⱨtajliⱪta Pərwərdigarƣa ümid baƣliƣanlar.

¹¹Kelinglar əy balilirim, ⱪulaⱪ selinglar sɵzümgə,

Pərwərdigarƣa ihlas ⱪilixni ɵgitəy silərgə.

¹²Kimki istisə ⱨayattin zoⱪlinixni,

bəhtlik yaxap, uzun ɵmür kɵrüxni,

¹³tartsun tilini yaman sɵzdin,

qiⱪmisun yalƣan sɵzlər ləwliridin.

¹⁴Yamanliⱪtin bax tartip, ⱪilsun yahxiliⱪ,

izdisun tinq-amanliⱪ.

¹⁵Pərwərdigar nəzər salar ⱨəⱪⱪaniylarƣa,

jawab berər ularning nidaliriƣa.

¹⁶Yüz ɵrər Pərwərdigar rəzillərdin,

yoⱪ ⱪilar namlirini yər yüzidin.

¹⁷Ⱪulaⱪ salar Pərwərdigar nalə ⱪilsa ⱨəⱪⱪaniylar,

ularni barliⱪ külpətlərdin ⱪutuldurar.

¹⁸Miskinlərgə yeⱪindur Pərwərdigar,

roⱨi azab qəkkənlərni ⱪutⱪuzar.

¹⁹Kɵp bolar ⱨəⱪⱪaniy adəm duq kəlgən ⱪiyinqiliⱪlar,

əmma ulardin halas ⱪilar Pərwərdigar.

²⁰Aman saⱪlar Huda uning barliⱪ sɵngəklirini,

ⱨətta sunuⱪ ⱪilmas bir tal ustihinini.

²¹Ɵlüm elip kelər ɵzlirigə rəzillərning ⱪilmixliri,

jazalinar ɵq kɵrgənlər ⱨəⱪⱪaniylarni.

²²Ⱪutⱪuzar təⱪwadarlirining ⱨayatini Pərwərdigar,

kimki uni panaⱨ ⱪilsa jazadin haliy bolar.

Dawut yazƣan munajat

¹I Pərwərdigar, ⱪarxi qiⱪⱪin manga ⱪarxi qiⱪⱪanlarƣa,

urux ⱪilƣin manga ⱪarxi urux ⱪilƣanlarƣa.

²Ⱪalⱪanliringni elip ⱪolungƣa,

yardəm ⱪilƣin kelip yenimƣa.

³Aypalta wə nəyzəng bilən tosuwalƣin meni ⱪoƣlap kəlgənlərni,

“Mən sening ⱪutⱪuzƣuqing” dəp manga, riƣbətləndür roⱨimni.

⁴Jenimni almaⱪ bolƣanlar,

xərməndə bolƣay, rəswa bolup.

Manga suyiⱪəst ⱪiliwatⱪanlar,

yansun kəynigə, ⱪara yüz bolup.

⁵Pərwərdigarning pərixtisi ularni yiraⱪ ⱪoƣliwətkəy,

ular goya xamalda uqⱪan samandək tozup kətkəy.

⁶Ⱪoƣliwətkəy ularni Pərwərdigarning pərixtisi,

ⱪarangƣu ⱨəm teyilƣaⱪ bolƣay ularning mangƣan yolliri.

⁷Ular manga tuzaⱪ ⱪurup səwəbsizla,

almaⱪ boldi jenimni kolap ora.

⁸Tuyuⱪsiz bala kəlgəy ularning baxliriƣa,

yɵgixip ⱪalsun ɵzliri ⱪurƣan toriƣa,

ⱨalak bolsun qüxüp ɵzliri koliƣan oriƣa.

⁹Xadlinarmən xunda mən Pərwərdigardin,

bolarmən huxal manga bərgən nijatliⱪidin.

¹⁰Dəymən qin ⱪəlbimdin:

“I Pərwərdigar, təng kelər kimmu sanga?

Ajizlarni küqlüklərdin ⱪutⱪuzƣuqi pəⱪət sənla,

ezilgən, moⱨtajlarni zalimlardin ⱪoƣdaydiƣan yənə sənla.”

¹¹Otturiƣa qiⱪip niyiti yaman guwaⱨqilar,

həwirim yoⱪ ixlarni sorap soraⱪ ⱪilar.

¹²Yahxiliⱪimƣa yamanliⱪ ⱪayturup ular,

iq-iqimdin meni azabta ⱪaldurar.

¹³Mata kiydim ⱪayƣurup, ular kesəl bolƣanda,

kəmtər bolup roza tuttum, ular üqün ⱪildim du’a,

jawabsiz ⱪaldi lekin du’alirim ⱨər zaman.

¹⁴Ⱪayƣurdum ⱪerindixim yaki dostum üqün azablanƣandək,

məyüsləndim huddi anisi üqün matəm tutⱪan adəmdək.

¹⁵Putlixip ketiwedim huxal bolup olaxti ətrapimƣa,

jəm boluxti ⱨəm manga ⱪarxi qiⱪixⱪa.

Natonux pəs adəmlərmu ⱪoxulup ularƣa,

mazaⱪ ⱪilip, tohtimay zərbə bərdi manga.

¹⁶Nomussizlarqə məshirə ⱪilixip meni,

hiris ⱪilixip, ƣuqurlatti qixlirini.

¹⁷I Pərwərdigar, ⱪarap turarsən ⱪaqanƣiqə?

Ⱪutⱪuz meni yawuzlarning zərbisidin,

əziz jenimni ⱪanhor xirning eƣizidin.

¹⁸Təxəkkür eytimən sanga jama’ət aldida,

mədⱨiyələymən seni təⱪwadarlar arisida.

¹⁹Zangliⱪ ⱪilip külmisun manga səwəbsizla rəⱪib bolƣanlar,

kɵzlirini alaytmisun manga səwəbsiz ɵq bolup ⱪalƣanlar.

²⁰Xübⱨisizki, elip ⱪoymas ular inaⱪliⱪni eƣizliriƣa,

bəlki tüzər xum pilanlar tinq-hatirjəm yaxaydiƣanlarƣa.

²¹Warⱪirixar ular manga qong eqip eƣizlirini:

“Way, kɵrduⱪ ɵz kɵzimiz bilən ⱪilmixliringni.”

²²I Igəm, kɵrdüng ularni, süküt ⱪilmiƣin,

i Pərwərdigar, məndin yiraⱪlaxmiƣin.

²³Ɵtünəy, qiⱪarƣin manga adil ⱨɵkümüngni,

i Huda, i Igəm ⱪolliƣaysən dəwayimni.

²⁴I Pərwərdigar, Ilaⱨim adalitingdə aⱪliƣin meni,

məshirə ⱪilip külüxkə yol ⱪoymiƣin düxmənlirimni.

²⁵Yol ⱪoymiƣin, “arzuyimiz əməlgə axti” deyixkə ularni,

yol ⱪoymiƣin, “biz ahir yutuwalduⱪ uni” dəp mahtinixⱪa ularni.

²⁶Külpitimdin huxal bolƣanlar,

ƣəplət besip xərməndə bolƣay.

Məndin ɵzini üstün tutⱪanlar,

rəswa bolup nomusta ⱪalƣay.

²⁷Gunaⱨsizliⱪimdin hux bolidiƣanlar,

quⱪan salsun qɵmüp xadliⱪⱪa.

“Ⱪulining amanliⱪidin sɵyüngən Pərwərdigar

uluƣdur” desun ular ⱨər qaƣda.

²⁸Bayan əylər tilim adalitingni,

künboyi mədⱨiyələymən seni.

Pərwərdigarning bəndisi Dawut yazƣan munajat bolup, nahxa ⱪilip eytilsun dəp, nəƣmiqilər bexiƣa tapxurulƣan.

¹Bir qüxənqə ayan boldi ⱪəlbimgə,

rəzillərning ita’ətsizliki ⱨəⱪⱪidə.

Hudadin ⱪorⱪux yoⱪtur ularning nəziridə.

²Ɵzlirini qong tutar ular məƣrurluⱪta,

tonumas gunaⱨlirini ⱨətta,

nəprətlənməs ulardin əsla.

³Ⱨiylə-mikir, zəⱨər qiⱪar eƣizliridin,

bax tartidu aⱪilanə, yahxi ixlardin.

⁴Rəzil pilan tüzüxər yatⱪandimu keqiliri,

atⱪandur gunaⱨ yoliƣa ɵzlirini,

ⱨeqⱪaqan rət ⱪilmas yamanliⱪni.

⁵I Pərwərdigar, muⱨəbbiting ərx kəbi büyüklüktə,

wapadarliⱪing asman-pələk qəksizlikidə.

⁶I Pərwərdigar,

ⱨəⱪⱪaniyliⱪing ohxar büyük taƣlarƣa,

ⱨɵkümliring dengiz-okyan qongⱪurluⱪiƣa,

ƣəmhorluⱪ ⱪilisən insan ⱨəm ⱨaywanƣa.

⁷Bibaⱨadur mənggülük muⱨəbbiting, i Huda,

panaⱨ tapar insanlar ⱪanatliring sayisida.

⁸Ⱪana’ətlinər ular ɵyüngdiki mol nemətlərdin,

bəⱨrə alar sening ⱨuzurluⱪ dəryaliringdin.

⁹Qünki ɵzüng ⱨayatliⱪ buliⱪisən,

kɵrimiz ⱨəⱪiⱪətni nurung bilən.

¹⁰Ayrilmiƣay mənggülük muⱨəbbiting seni tonuƣanlardin,

ayrilmiƣay adaliting ⱪəlbi paklardin.

¹¹Dəssimisun meni təkəbburlar,

ⱪoƣlimisun meni rəzillər.

¹²Ⱪara mana, ƣulap qüxti yamanliⱪ ⱪilƣuqilar,

yiⱪitildi, əmdi turalmas ular.

Dawut yazƣan munajat

¹Rəzillərdin kɵnglüngni bi’aram ⱪilma,

yamanlarƣa iqingdin ⱨəsət ⱪilma.

²Qɵptək ⱪurup ketər ular xunqə tizla,

mamkaptək tozup ketər birdəmdila.

³Yahxiliⱪ ⱪil, ixənq baƣla Pərwərdigarƣa,

tinq-aman yaxaysən Huda bərgən zeminda.

⁴Xadliⱪim dəp bilsəng əgər Pərwərdigarni,

u əməlgə axurar ⱪəlbingdiki arzularni.

⁵Amanət ⱪil ixliringni Pərwərdigarƣa,

u yetəkqi bolar sanga, ixən uningƣa.

⁶Tang səⱨərdək yorutar u ⱨəⱪⱪaniyliⱪingni,

qüxtiki ⱪuyax kəbi qaⱪnitar gunaⱨsizliⱪingni.

⁷Səwr bilən süküt ⱪilip kütkin Pərwərdigarni,

bi’aram bolmiƣin ronaⱪ tapⱪan rəzillərdin,

ⱨaram pilani əməlgə axⱪanlardin.

⁸Yanƣin aqqiⱪingdin, basⱪin ƣəzipingni,

bisərəmjan bolma, bi’aramliⱪ elip kelər pəⱪət yamanliⱪni.

⁹Zeminidin ⱪoƣlap qiⱪirilidu rəzillik ⱪilƣuqilar,

əmma zeminƣa igə bolidu ümidini Pərwərdigarƣa baƣliƣanlar.

¹⁰Pat yeⱪinda tügəydu rəzillərning künliri,

yoⱪilar makanliridin, izdəpmu tapalmaysən ularni.

¹¹Lekin kəmtərlik bilən Hudaƣa tayinidiƣanlar,

zeminƣa igə bolup, mol bərikəttin ⱨuzurlinar.

¹²Rəzillər ⱪəst ⱪilidu ⱨəⱪⱪaniylarƣa,

qixlirini ƣuqurlitidu, ɵq bolup ularƣa.

¹³Əmma Igimiz məshirə ⱪilar rəzillərni,

qünki, u bilər ularning jazalinidiƣanliⱪini.

¹⁴Yiⱪitix üqün biqarə, moⱨtajlarni,

rəzillər tartti oⱪyasining kiriqini.

Ⱪirix üqün durus yolda mangƣanlarni,

ƣilipidin suƣardi ⱪiliqini.

¹⁵Ahiri ularning sundurulup yaliri,

ɵz yürəklirigə sanjilidu ⱪiliqliri.

¹⁶Ⱪolidiki az dunyamu ⱨəⱪⱪaniy adəmlərning,

əwzəldur nurƣun bayliⱪliridin rəzillərning.

¹⁷Sundurulidu rəzillərning biləkliri,

Pərwərdigar yɵləp turar ⱨəⱪⱪaniylarni.

¹⁸Pərwərdigar kɵngül bɵlər pak insanlarƣa,

berilgən zemini mənggü ⱪalar ularƣa.

¹⁹Yərgə ⱪarap ⱪalmas ular eƣir künlərdə,

toⱪ yürüydu ⱪəⱨətqiliktə.

²⁰Biraⱪ ⱨalak bolar rəzillər,

Pərwərdigarning düxmənliri yawa güldək tozup tügər,

is-tütəktək ƣayib bolup, yoⱪap ketər.

²¹Ⱪərz elip ⱪayturmaydu rəzillər,

ⱨəⱪⱪaniylar xəpⱪət bilən sahawət ⱪilar.

²²Zeminƣa igə bolar Pərwərdigarning bərikitigə erixkənlər,

zeminidin ⱪoƣlap qiⱪirilar uning lənitigə uqurƣanlar.

²³Hursən bolsa bir adəmdin Pərwərdigar,

u uning ⱪədəmlirini məzmut ⱪilar.

²⁴Yɵləp turƣaqⱪa uni Pərwərdigar,

putlaxsimu yiⱪilmay məzmut turar.

²⁵Yax idim mən, ⱪeridim əmdi,

kɵrmidim ⱨeq Hudaning ⱨəⱪⱪaniy adəmni taxliwətkənlikini,

uning pərzəntlirining nan tiligənlikini.

²⁶Xəpⱪətlik bolup u adəm ɵtnə berər,

pərzəntlirimu bərikət elip kelər.

²⁷Yahxiliⱪ ⱪilƣin, taxla yamanliⱪni,

makan ⱪilisən mənggügə Huda bərgən zeminni.

²⁸Qünki Pərwərdigar sɵyər adalətni,

taxlimas ɵzining təⱪwadar həlⱪini.

Ta’əbəd ⱪoƣdaydu, saⱪlaydu ularni,

biraⱪ ⱪurutidu rəzillərning nəslini.

²⁹Ⱨəⱪⱪaniylar igə bolar zeminƣa,

makan tutup mənggü yaxar uningda.

³⁰Ⱨəⱪⱪaniylarning sɵzliri dana bolur,

ularning ⱨəmmisi adil bolur.

³¹Ⱪəlbidin orun alƣaq Hudaning təlimliri,

xunga hata besilmas ⱪədəmliri.

³²Ⱨəⱪⱪaniylarni paylap yürər rəzillər,

ularni ɵltürüxning pəytini izdəp yürər.

³³Pərwərdigar ⱪaldurmas ularni rəzillərning ⱪoliƣa,

ⱨəm ⱪarxi ⱨɵkümmu qiⱪarƣuzmaydu ularƣa.

³⁴Təlmürüp kütkin Pərwərdigarni.

Qing tutⱪin uning yolini,

igə ⱪilar zeminƣa seni.

Kɵrisən rəzillərning zemindin ⱪoƣlap qiⱪirilixini.

³⁵Kɵrgənmən rəzil, zorawanning ronaⱪ tapⱪinini,

qongⱪur yiltiz tartⱪan bük-baraⱪsan dərəhtək bolƣinini.

³⁶Əmma ɵtüp kətti u, yoⱪ boldi ⱪara,

uni izdisəmmu tapalmaymən ⱪayta.

³⁷Pak adəmlərgə baⱪ, küzət duruslarni,

tinqliⱪni sɵygənlərning bolidu istiⱪbali.

³⁸Biraⱪ, ita’ətsizlər ⱪirilip tügər,

rəzillərning nəsli ⱪurup ketər.

³⁹Pərwərdigar nijatliⱪ berər ⱨəⱪⱪaniylarƣa,

baxpanaⱨ bolar eƣir künlərdə ularƣa.

⁴⁰Ⱪutⱪuzar ularni yardəm ⱪilip Pərwərdigar,

rəzillərdin ⱪutuldurup aman saⱪlar,

qünki ular Pərwərdigardin panaⱨ tapar.

Dawut yazƣan hatirə munajiti

¹I Pərwərdigar,

meni ⱪəⱨring bilən əyiblimə,

manga ƣəzipingdə tərbiyə bərmə.

²Kirdi tenimgə oⱪliring,

basti meni ⱪolliring.

³Ƣəzipingdin yürək-baƣrim yara boldi,

gunaⱨimdin tenim mening parə boldi.

⁴Ƣərⱪ boldum gunaⱨlirim kəlkünigə,

salmiⱪidin gunaⱨimning pattim yərgə.

⁵Yiringlap sesip kətti jaraⱨitim,

səwəb boldi buningƣa nadanliⱪim.

⁶Bəllirim püküldi ⱪəddim mükqiyip,

künboyi yürimən ⱪayƣuƣa petip.

⁷Aƣrimaⱪta kɵyüp pütün bədinim,

tenimdə ⱪalmidi ⱨeqbir saⱪ yerim.

⁸Tumxuⱪumƣa kelip ⱪaldi jenim mening,

ⱨəsrəttin pəryad ⱪilar ⱪəlbim mening.

⁹I Rəbbim, arzulirim ayandur sanga,

aⱨ uruxum yoxurun əməstur sanga.

¹⁰Yürikim jiƣildap ⱨali kətti,

ⱨətta kɵzlirimning nuri kətti.

¹¹Yar-buradər, tuƣⱪanlirim kesilim səwəbidin,

yiraⱪ ⱪaqti ɵzlirini elip məndin.

¹²Tuzaⱪ ⱪurar jenimƣa ⱪəst ⱪilmaⱪqi bolƣanlar,

ular manga ziyankəxlik ⱪilmaⱪ üqün məsliⱨət ⱪurar.

Ⱨiylə-mikir, suyiⱪəst oylar künboyi ular.

¹³Ⱨeqnemini anglimaymən gas adəmdək,

ⱨeqbirigə sɵz ⱪilmaymən gaqilardək.

¹⁴Xundaⱪ, ⱪuliⱪi pang adəmdəkmən,

rədiyəgə tili yoⱪ gaqidəkmən.

¹⁵I Pərwərdigar, ümidimni baƣlidim sanga,

i Igəm, Ilaⱨim jawab berisən manga.

¹⁶Tiləymən, üstümdin külmisun birawlar,

teyilƣinimda ⱨakawurluⱪ ⱪilƣanlar.

¹⁷Yiⱪilay dəp ⱪaldim i Huda,

azab ⱨəmraⱨdur da’im manga.

¹⁸Iⱪrar ⱪilip gunaⱨimƣa,

puxayman ⱪildim hataliⱪimƣa.

¹⁹Düxmənlirim səgək ⱨəm küqlüktur,

səwəbsizla manga ɵqlər xunqə kɵptur.

²⁰Yahxiliⱪimⱪa yamanliⱪ ⱪayturƣanlar,

toƣra yolda mangding dəp ⱪarxi qiⱪar.

²¹I Pərwərdigar, ɵtünəy meni taxlima,

i Ilaⱨim, meni taxlap kətmə yiraⱪⱪa.

²²I Igəm, nijatkarim,

ⱪilƣin manga tezdin yardəm.

Dawut yazƣan munajat bolup, nahxa ⱪilip eytilsun dəp, nəƣmiqilərning bexi Yidutunƣa tapxurulƣan.

¹Ɵz-ɵzümgə dedim mən mundaⱪ:

“Ⱪalmasliⱪim üqün bolup gunaⱨkar, tartay tilimni,

rəzillərning aldida tikip ⱪoyay eƣizimni.”

²Gərqə kerək bolsimu sɵzlixim,

süküt ⱪilip, zuwan sürmidim,

əmma mening exiwərdi azabim.

³Zərdab bolup ⱪaynidi baƣrim,

oyliƣanqə kɵydi yürikim.

Ahir bolmay mundaⱪ dedim:

⁴“I Pərwərdigar, qüxinəy ⱨayatning ⱪisⱪiliⱪini,

künlirimning sanaⱪliⱪ ⱪalƣanliⱪini.

Bilip ⱪalay ɵmürning ɵtkünqi ikənlikini.”

⁵Bilimən, ⱪilƣansən ɵmrümni nəqqə ƣeriqla,

uzun əməstur ⱨayat yolum sening aldingda,

birla tiniⱪtur insanlarning ɵmri pəⱪətla. Selaⱨ

⁶Sayidək yoⱪilidu insanlarning əjirliri,

biⱨudidur ularning aldirap-tenəxliri.

Bayliⱪ yiƣar, lekin bilməs ular

bayliⱪlirining kimlərgə ⱪalidiƣanliⱪini.

⁷I Pərwərdigar, nemini kütəy əmdi?

Ümidim pəⱪət səndila ⱪaldi.

⁸Saⱪit ⱪilƣin gunaⱨlirimni,

ⱨamaⱪətlərning məshirisigə ⱪoyma meni.

⁹Süküt ⱪilip aqmaymən aƣzimni,

qünki, adildur jazalixing meni.

¹⁰Tohtatⱪaysən əmdi jazalixingni,

kɵtürəlməs tenim ⱪolungning zərbisini.

¹¹Gunaⱨlirini əyibləp, jazaliƣanda sən insanni,

küyə qüxkəndək yoⱪ ⱪilisən ⱪədirligənlirini.

Bir tiniⱪtur halas insanning ɵmri. Selaⱨ

¹²I Pərwərdigar, ⱪulaⱪ salƣin du’ayimƣa,

kɵngül ⱪoyƣin mening nalə-pəryadimƣa,

süküt ⱪilip turmiƣin kɵz yaxlirimƣa,

qünki bir musapirmən sening aldingda,

ata-bowilirimdək ƣeribmən bu paniy dunyada.

¹³Ƣəzəp bilən ⱪarimiƣin manga,

ɵlümdin burun qɵmiləy xadliⱪⱪa.

¹Səwr-taⱪət ⱪilip küttüm Pərwərdigarni,

ⱪulaⱪ selip anglidi u pəryadimni.

²Tartiwaldi u meni ⱨalakət girdabidin,

qiⱪiriwaldi qongⱪur patⱪaⱪ-sazliⱪtin.

Ⱪoram tax üstigə turƣuzup putlirimni,

mustəⱨkəm ⱪildi mening ⱪədəmlirimni.

³Pərwərdigar ata ⱪildi manga yengi bir küyni,

Igimizni mədⱨiyələydiƣan munajatni.

Nurƣun adəm kɵrüp uning ⱪudritini,

Pərwərdigarƣa ixənq baƣlap ⱨɵrmətlər uni.

⁴Bəhtliktur ixənq baƣliƣanlar Pərwərdigarƣa,

qoⱪunmiƣanlar sahta ilaⱨlarƣa,

yürmigənlər butpərəslər arisida.

⁵I Igimiz Pərwərdigar, xunqə kɵptur mɵjiziliring,

biz üqün ⱪilƣan katta iltipat wə pilanliring.

Sansizdur bayan ⱪilsam əjir wə meⱨnətliring,

yoⱪtur sening ⱨeqbir təngdixing.

⁶Istiməysən ⱪurbanliⱪ yaki ⱨədiyələrni,

istiməysən nə kɵydürmə, nə gunaⱨ ⱪurbanliⱪini.

Anglisun dəp buni aqting ⱪulaⱪlirimni.

⁷Xunga dedim: “Mən kəldim mana,

pütülgəndur mən ⱨəⱪⱪidə muⱪəddəs yazmilarda.

⁸I Ilaⱨim, iradəngni əməlgə axurux huxalliⱪimdur,

təlimliring ⱪəlbimgə qing pütülgəndur.”

⁹Zor jama’ət arisida jakarlidim adalitingni,

i Pərwərdigar, bilisən, yumuwalmaymən aƣzimni.

¹⁰Yoxurup yürmidim ⱪəlbimdə adalitingni,

bayan əylidim wapadarliⱪing ⱨəm nijatliⱪingni.

Pinⱨan tutmidim büyük jama’əttin,

mənggülük muⱨəbbiting wə ⱨəⱪiⱪitingni.

¹¹I Pərwərdigar, ayimiƣin məndin xəpⱪitingni,

mənggülük muⱨəbbiting, ⱨəⱪiⱪiting saⱪliƣay meni.

¹²Qirmiwaldi ⱨəddi-ⱨesabsiz külpətlər meni,

kor boldum, gunaⱨlirim tosuwalƣaq kɵz nurumni.

Beximdiki qeqimdin kɵp bolƣaqⱪa gunaⱨlirim,

tərk ətti jismimdin jasaritimni.

¹³I Pərwərdigar, ⱪutⱪuz meni yətküzüp iltipatingni,

i Pərwərdigar, tezdin manga bərgin yardimingni.

¹⁴Jenimni almaⱪqi bolƣanlar,

xərməndə bolsun yüzi tɵkülüp.

Japayimdin huxal bolƣanlar,

qekinsun rəswa bolup.

¹⁵Miyiⱪida külgənlər ⱪilip meni məshirə,

əndixə iqidə bolsun xərməndə.

¹⁶Sanga təlpüngüqi barliⱪ kixilər,

səndin huxal bolup xadlansun.

Nijatliⱪingni sɵygənlər ⱨər da’im:

“Pərwərdigar uluƣdur” desun!

¹⁷Bir biqarə, ⱨajətmən ɵzüm,

biraⱪ, meni yad etər igəm.

Mədətkarimsən ⱨəm nijatkarim,

ⱨayal bolma, i Ilaⱨim.

Dawut yazƣan munajat bolup, nahxa ⱪilip eytilsun dəp, nəƣmiqilər bexiƣa tapxurulƣan.

¹Bəhtliktur ƣeriblarning ⱨalidin həwər alƣuqi,

bexiƣa kün qüxkəndə Pərwərdigar ⱪutⱪuzar uni.

²Ⱨayatini saⱪlaydu, ⱪoƣdap uni Pərwərdigar,

Huda ata ⱪilƣan zeminda yaxaydu u bəhtiyar,

rəⱪiblirining məyligə taxlimas uni zinⱨar.

³Saⱪsiz bolup, orun tutup yetip ⱪalƣinida,

Pərwərdigar yɵlək bolup, ⱪuwwət berər uningƣa,

xipaliⱪ berər kesəl bolƣan qaƣlirida.

⁴Iltija ⱪildim Hudaƣa:

I Pərwərdigar, xəpⱪət ⱪilip manga,

saⱪaytⱪin meni,

gunaⱨ ⱪilip, ⱪarxi qiⱪⱪan bolsammu sanga.

⁵Rəⱨimsiz düxmənlirim ⱪarƣar meni:

“Tezraⱪ ɵlüp u, ɵqsun nami.”

⁶Ulardin birərsi kelip yenimƣa,

yalƣan sɵzlərni eytar manga.

Kɵnglidə toplap mən ⱨəⱪⱪidə ƣəywətni,

yenimdin qiⱪipla yayar ularni halayiⱪⱪa.

⁷Mən ⱨəⱪⱪidə piqirlixar manga ɵqlər,

ziyankəxlik ⱪəstidə mundaⱪ deyixər:

⁸“Yaman kesəl qaplixiptu uningƣa,

yatⱪan ornidin turalmas u əmdi əsla.”

⁹Ⱨətta ɵzüm ixəngən ⱪədinas dostummu

setiwətti meni, ax-tuzumni yəp turupmu.

¹⁰I Pərwərdigar, ⱪilip manga xəpⱪitingni,

turƣuzƣaysən ornumdin meni,

xunda ulardin alalaymən əntimni.

¹¹Ƣəlibə ⱪilƣuzmiding üstümdin düxmənlirimni,

bildim xuningdin, məndin hux ikənlikingni.

¹²Diyanətlik bolƣinim üqün yɵlək bolisən manga,

mənggü turƣuzisən meni ⱨuzurungda.

¹³Mədⱨiyələr bolƣay Pərwərdigarƣa,

isra’illarni talliƣan Hudaƣa,

mənggüdin-mənggügə! Amin, amin!

2-bɵlək

Koraⱨning əwladliri yazƣan tərbiyəwi munajat bolup, nahxa ⱪilip eytilsun dəp, nəƣmiqilər bexiƣa tapxurulƣan.

¹Qangⱪiƣan keyik təxna bolƣandək eⱪinlarƣa,

təxna boldum sanga, i Huda!

²Intizarmən sanga – ⱨayatliⱪ buliⱪi bolƣan birdinbir Huda,^*

ⱪaqanmu kɵrərmən sening qeⱨringni, kirip ⱨuzurungƣa?

³Kɵz yaxlirim mən üqün keqə-kündüz boldi ƣiza,

“Ⱪeni Hudaying” deyixər rəⱪiblirim da’im manga.

⁴Kɵnglüm buzulidu ɵtkən künlərni əsliginimdə:

Barattim jama’ət bilən ⱨeyt ɵtküzüxkə,

kixilərni baxlayttim Pərwərdigarning ɵyigə,

mədⱨiyə eytip towlixattuⱪ huxal bolup xu dəmdə.

⁵Əy ⱪəlbim, nemixⱪa xunqə qüxkünsən?!

Əy kɵnglüm, nemixⱪa aram tapmaysən?!

Ümid küt Hudadin, mədⱨiyələymən yənila uni,

Hudayim saⱪliƣuqidur xərməndə boluxtin yüzümni.^*

⁶I Ilaⱨim, ƣəm basti kɵnglümni,

xunga əsləymən seni,

I’ordan zeminida,

Hərmon wə Mizar taƣlirida.

⁷Güldürləp eⱪip qüxkən xarⱪiratmiliringdək,

tohtimay kəlməktə beximƣa külpətliring,

besip ɵtməktə mana üstümdin dolⱪunliring, ɵrkəxliring.

⁸Kündüzi kɵrsitər Pərwərdigar mənggülük muⱨəbbitini,

keqisi ata ⱪilar u manga mən eytidiƣan nahxamni,

ⱨayatimning igisi Hudaƣa beƣixliƣan munajatlirimni.

⁹Eytarmən ⱪoram texim Hudaƣa:

Untup ⱪalding neqün meni?

Neqün matəm tutup yürimən,

düxmənlirimning zulumi astida?

¹⁰Ɵtti jenimdin düxmənlirimning tapa-təniliri,

da’im manga: “Ⱪeni Hudaying” deyixliri.

¹¹Əy ⱪəlbim, nemixⱪa xunqə qüxkünsən?!

Əy kɵnglüm, nemixⱪa aram tapmaysən?!

Ümid küt Hudadin, mədⱨiyələymən yənila uni,

Hudayim saⱪliƣuqidur xərməndə boluxtin yüzümni.^*

¹I Huda, “gunaⱨsiz” dəp aⱪliƣin meni,

ⱪolliƣin sadaⱪətsiz həlⱪⱪə ⱪarxi dəwayimni,

adalətsiz, ⱨiyligərlərdin ⱪutⱪuz meni.

²Baxpanaⱨim turup i Huda,

tərk etisən meni nemixⱪa?

Neqün matəm tutup yürimən,

düxmənlirimning zulumi astida?

³Qaqⱪin nurungni, kɵrsət ⱨəⱪiⱪitingni,

yetəklisun ular meni muⱪəddəs teƣingƣa,

elip barsun uqrixix jayimizƣa.

⁴Ⱪurbanliⱪ supangƣa barimən xunda,

birdinbir xadliⱪim bolƣan Huda aldiƣa.

Qelip lira ⱨəmdusana eytimən sanga,

mening Ilaⱨim bolƣan i Huda.

⁵Əy ⱪəlbim, nemixⱪa xunqə qüxkünsən?!

Əy kɵnglüm, nemixⱪa aram tapmaysən?!

Ümid küt Hudadin, mədⱨiyələymən yənila uni,

Hudayim saⱪliƣuqidur xərməndə boluxtin yüzümni.^*

Koraⱨning əwladliri yazƣan tərbiyəwi munajat bolup, nahxa ⱪilip eytilsun dəp, nəƣmiqilər bexiƣa tapxurulƣan.

¹I Huda, ⱪədimki zamanda əjdadlirimizning arisida,

sən kɵrsətkən mɵjizilik ixliringni

angliƣaniduⱪ biz ɵz ⱪuliⱪimizda,

ata-bowilirimiz eytip bərgənidi buni.

²Ɵz ⱪolung bilən zeminidin ⱪoƣliwetip yat həlⱪlərni,

ularning yurtiƣa orunlaxturƣaniding ata-bowilirimizni.

Ⱪattiⱪ azablap yat həlⱪlərni,

ronaⱪ tapⱪuzdung əjdadlirimizni.

³Alƣan əməs ular zeminini xəmxiri bilən,

ƣəlibigə erixkini yoⱪ ɵz biliki bilən.

Bəlki ularning ƣalib kelixi sən Hudadin,

ong ⱪolung, ⱪudriting, qeⱨringning nuridin,

qünki sɵyündüng sən ulardin.

⁴I Huda mening padixaⱨimsən,

Yaⱪup nəsligə ƣəlibə ata ⱪilƣuqisən.

⁵Yardimingdə ⱪoƣliwetimiz düxmənlirimizni,

ⱪudriting bilən qəyliwetimiz bizgə ⱪarxilarni.

⁶Ixənqim yoⱪtur ɵz oⱪyayimƣa,

xəmxirim erixtürəlməs meni utuⱪⱪa.

⁷Ƣəlibə ⱪilƣuzdung rəⱪiblirimiz üstidin bizni,

xərməndə ⱪilding bizdin nəprətləngənlərni.

⁸Ⱨər da’im pəhirlinip təripləymiz seni,

i Huda əbədiy mədⱨiyələymiz namingni. Selaⱨ

⁹Biraⱪ sən ⱨazir bizni tərk etip, ⱪaldurdung aⱨanətkə,

qiⱪmaysən ⱨətta ⱪoxunlirimiz bilən birgə jənggə.

¹⁰Məƣlup ⱪilding bizni rəⱪiblirimiz aldida,

bizdin nəprətləngənlər bulidi bizni xu ⱨalda.

¹¹Bizni ⱪoy kəbi tutup bərding boƣuzlaxⱪa ularƣa,

qeqiwətting bizni ⱨəm yat həlⱪlər arisiƣa.

¹²Ərzan satting ⱪul ⱪilip ɵz həlⱪingni,

ⱪədir-ⱪimmitimiz payhan boldi setip bizni.

¹³Ⱪaldurdung bizni yat əllərning ⱨaⱪaritigə,

ətrapimizdikilərning nəpiriti wə məshirisigə.

¹⁴Yat əllər arisida mazaⱪⱪa ⱪaldurdung bizni,

məshirə ⱪilidu ular qayⱪixip baxlirini.

^15-16Nomusⱪa ⱪalƣanliⱪim turar kɵz aldimda,

xərməndiqilik bardur mening boynumda.

Qünki rəⱪiblər wə ⱪarxi turƣuqilarning

til-aⱨanətliri da’im yetər ⱪuliⱪimƣa.

¹⁷Beximizƣa qüxti bularning ⱨəmmisi,

untumiƣan bolsaⱪmu gərqə seni,

yaki buzmiƣan bolsaⱪmu əⱨdəngni.

^18-19Sən nusrət ata ⱪilmay əzding bizni,

harabidə yardəmqisiz ⱪaldurdung həlⱪingni.

Gərqə ⱪaytmiƣan bolsimu səndin kɵnglimiz,

qətnimigən bolsimu yolungdin ⱪədəmlirimiz.

²⁰Əgər biz Igimizning namini untuƣan bolsaⱪ,

ⱪol kɵtürüp yat ilaⱨⱪa du’a ⱪilƣan bolsaⱪ,

²¹Igimiz Pərwərdigar bayⱪimay ⱪalarmidi?

U bilər insan ⱪəlbidiki barliⱪ sirlarni.

²²Sanga bolƣan sadaⱪitimizdin künboyi ⱪirilmaⱪtimiz,

soyulidiƣan ⱪoylarning ⱪatarida bolmaⱪtimiz.

²³Oyƣanƣin i Pərwərdigar, uhlap yatisən nemixⱪa?

Taxliwətmigin bizni mənggügə, kəlgin yenimizƣa!

²⁴Nemixⱪa yoxurisən ɵzüngni,

nemixⱪa kɵrməysən ezilix, külpətlirimizni?

²⁵Payhan boldi ar-nomusimiz,

miləndi qang-tupraⱪⱪa tenimiz.

²⁶Kəlgin Huda, bərgin bizgə yardimingni,

mənggülük muⱨəbbitingdə azad ⱪilƣin bizni.

Koraⱨning əwladliri yazƣan muⱨəbbət ⱨəⱪⱪidiki tərbiyəwi munajat bolup, “nelupərlər” degən aⱨangda eytilsun dəp, nəƣmiqilər bexiƣa tapxurulƣan.

¹Güzəl bir ix ⱨayajanƣa salƣaq mening ⱪəlbimni,

oⱪumaⱪtimən padixaⱨⱪa atap yazƣan xe’irimni,

tilim sɵzgə maⱨirdur goya bir xa’ir kəbi.

²Əng kelixkən adəmsən insanlar arisida,

ləwliringdin tɵkülər xəpⱪətlik sɵzlər,

mənggülük bəht ata ⱪilƣandur Huda sanga.

³I baⱨadir padixaⱨ, asⱪin yeningƣa ⱪiliqingni,

ayan ⱪilƣin xəwkiting wə ⱨəywitingni.

⁴Zəpər ⱪuqⱪin ⱨəywət bilən at üstidə,

ⱪoƣdiƣin kəmtərlik, ⱨəⱪiⱪət wə adalətni,

ƣayət zor ixlarni ⱪil ⱪudritingdə.

⁵Ɵtkür oⱪliring sanjilar yürikigə rəⱪibliringning,

düxmənliring yiⱪilar astiƣa ayaƣliringning.

⁶I Huda, sening təhting mənggülüktur,

səltənət ⱨasang, adalət ⱨasisidur.

⁷Ɵq kɵrisən naⱨəⱪqilikni, sɵyisən ⱨəⱪⱪaniyətni,

xunga seni talliƣan Huda yaƣdurdi sanga xadliⱪini.

Ⱨəmraⱨliringdin bəkrək xadlandurdi seni.

⁸Ⱨidi kelər kiyimliringdin murməkkining,

xundaⱪla mu’əttər wə darqinning.

Pil qixida bezəlgən saraylardiki tarliⱪ sazlarning sadasi,

yeⱪimliⱪ anglinip hursən ⱪilar seni.

⁹Xaⱨ ⱪizliri bardur izzətligənliringning arisida,

Ofir altunida bezəlgən məⱨbubung turar ong yeningda.

¹⁰Tingxiƣin əy ⱪiz, ⱪulaⱪ salƣin sɵzümgə,

untuƣin həlⱪingni, atangning ɵyi bolmisun esingdə.

¹¹Padixaⱨ məptundur güzəl turⱪungƣa,

hojayiningdur u, ita’ət ⱪil uningƣa.

¹²Tir həlⱪi elip kelər sanga ⱨədiyələr,

iltipat istər səndin u puldarlar.

¹³Nəⱪədər jilwə ⱪilar məlikə ⱨujrisida,

kəxtiləngəndur kiyimliri zər altunda.

¹⁴Padixaⱨ aldiƣa kəltürilər u kəxtilik kiyimliridə,

aldiƣa elip kelinər kenizəklirimu uning bilən birgə.

¹⁵Baxlap kelinidu ⱨəmmisi huxal ⱨalda,

kirixidu ular padixaⱨ sariyiƣa.

¹⁶Izini basar oƣulliring ata-bowiliringning,

xaⱨzadiliri ⱪilisən ularni pütkül jaⱨanning.

¹⁷Əwladtin-əwladⱪiqə əstə saⱪlatⱪuzimən namingni,

əbədil’əbəd mahtixar həlⱪlər seni.

Koraⱨning əwladliri yazƣan munajat bolup, “alamot” aⱨangida eytilsun dəp, nəƣmiqilər bexiƣa tapxurulƣan.

¹Küq-ⱪudrət, baxpanaⱨ bolƣuqimiz Rəbbimizdur,

külpəttə ⱪalsaⱪ əgər ⱨər zaman yardəmdidur.

^2-3Astin-üstün bolup kətsimu zemin nawada,

taƣlar ƣulap qüxsimu dengizlarning astiƣa.

Dolⱪunlinip dengizlar, ɵrkəx yasap taxsimu,

taxⱪinidin dengizning, taƣlar təwrəp kətsimu,

bizdə ⱪorⱪunux yoⱪtur əsla. Selaⱨ

⁴Bardur eⱪinliri xadliⱪ elip kelidiƣan bir dərya,

Hudaning xəⱨiri – uluƣ Hudaning muⱪəddəs makaniƣa.

⁵Xu xəⱨərdə bolƣaq Huda, təwrənməs u makan əsla,

tang etixi bilən təng yardəmgə kelər Huda.

⁶Gumran boldi xaⱨliⱪlar,

ƣowƣa kɵtürüp həlⱪlər.

Jaranglisa Rəbbimizning awazi

yər-zemin erip ketər.

⁷Ⱪudrətlik Sərdar Pərwərdigar^* biz bilən birgidur,

Yaⱪup etiⱪad ⱪilƣan Huda ⱪorƣinimizdur. Selaⱨ

⁸Kɵrünglar Pərwərdigarning ⱪudritini,

zeminda kɵrsətkən wəyranqiliⱪlirini.

⁹Tohtatⱪuqidur u ⱨəmmə uruxlarni,

sundurup oⱪya, nəyzilərni.

Kɵydürüp jəng ⱨarwilirini.

¹⁰Dəydu u: “Tohtitinglar uruxunglarni,

bilip ⱪoyunglar mening hudaliⱪimni!

Uluƣlinimən pütün aləmdə,

barqə həlⱪlər uluƣlar meni.”

¹¹Ⱪudrətlik Sərdar Pərwərdigar biz bilən birgidur,

Yaⱪup etiⱪad ⱪilƣan Huda ⱪorƣinimizdur. Selaⱨ

Koraⱨning əwladliri yazƣan munajat bolup, nahxa ⱪilip eytilsun dəp, nəƣmiqilər bexiƣa tapxurulƣan.

¹Əy barqə həlⱪlər, qelip qawaklar,

Hudaƣa atap yangritinglar alⱪixlar.

²Qünki büyük Pərwərdigar ⱨəywətliktur,

u jaⱨanƣa ⱨɵkümdar uluƣ padixaⱨtur.

³Bax əgdürüp bərdi u bizgə düxminimizni,

ayiƣimiz astiƣa yiⱪildurdi yat həlⱪlərni.

⁴Nesiwə ⱪilip bizgə tallap bərdi bu yərni,

ɵzi sɵygən Yaⱪupning^* pəhri bolƣan zeminni. Selaⱨ

⁵Ⱨɵküm sürmək bolup Huda təhtkə qiⱪti quⱪan ara,

qiⱪti Pərwərdigar burƣa^* sadasida ɵz orniƣa.

⁶Küylənglar Pərwərdigarni yangritip nəƣmə-nawa,

küylənglar padixaⱨimizni yangritip saz bilən nahxa.

⁷Qünki pütkül jaⱨanƣa padixaⱨtur Pərwərdigar,

munajatlar eytip uni küylənglar.

⁸Ⱨɵküm sürməktə Huda barqə həlⱪ üstidə,

olturup u ɵzining muⱪəddəs təhtidə.

⁹Yiƣilip jaⱨandiki əllərning ⱨɵkümdarliri,

ⱪoxulidu Ibraⱨim etiⱪad ⱪilƣan Hudaning həlⱪigə,

bərⱨəⱪ, Hudaƣa təwədur pütkül jaⱨanning padixaⱨliri,

əng aliy ⱨɵkümrandur Pərwərdigar, jaⱨan əⱨli uluƣlar uni.

Koraⱨning əwladliri yazƣan munajat

¹Uluƣdur Pərwərdigar!

Uning muⱪəddəs teƣida,

Hudayimizning xəⱨiridə,

layiⱪtur u kɵptin-kɵp mədⱨiyəlinixkə.

²Büyük wə kɵrkəm Si’on teƣi,

xadliⱪidur pütkül jaⱨanning.

Ⱨəywətliktur Zafon teƣining qoⱪⱪiliridək,

turar u xəⱨiridə uluƣ padixaⱨning.

³Huda turup ⱪəl’əliridə Yerusalemning,

ⱪoƣdiƣuqiliⱪini namayan ⱪilar ɵzining.

⁴Bir yərgə yiƣip ⱪoxunlirini padixaⱨlar,

mangƣanidi jəng ⱪilmaⱪ bolup ular.

⁵Lekin, ular kɵrüpla xəⱨərni boldi alaⱪzadə,

arⱪisiƣa bədər ⱪeqixti qüxüp wəⱨimigə.

⁶Titrək besip ularning ⱨəmmisini,

ⱪiynaldi tolƣaⱪ yigən ayal kəbi.

⁷I Huda, qiⱪirip xərⱪ xamilingni,

wəyran ⱪilding “Tarxixning^* kemiliri”ni.

⁸Ⱪudrətlik Sərdar Pərwərdigarning xəⱨiri –

Hudayimizning xəⱨiridə,

kɵrginimiz boldi huddi angliƣinimizdəkla.

Huda mustəⱨkəm ⱪilar bu xəⱨərni mənggügə. Selaⱨ

⁹I Huda, muⱪəddəs ibadəthanang iqidə,

qongⱪur oylanduⱪ mənggülük muⱨəbbiting ⱨəⱪⱪidə.

¹⁰Sanga beƣixlanƣan mədⱨiyələr, i Huda,

huddi namingdəkla taraldi kəng jaⱨanƣa.

¹¹Ⱨəⱪⱪaniy ⱨɵkümliringdin,

hux bolsun Si’on teƣi,

xadlansun Yəⱨudiyə xəⱨərliri.

¹²Əy Hudaning həlⱪliri,

ziyarət ⱪilinglar Yerusalemni.^*

aylinip kɵrüp uni,

sanap qiⱪinglar munarlirini.

¹³Kɵzitip qiⱪinglar sepillirini,

kɵzdin kəqürünglar ⱪəl’əlirini,

bayan ⱪilix üqün keyinki əwladlarƣa ularni.

¹⁴Bərⱨəⱪ, Huda bizning Hudayimizdur əbədkə,

u bizni yetəklər mənggügə.

Koraⱨning əwladliri yazƣan munajat bolup, nahxa ⱪilip eytilsun dəp, nəƣmiqilər bexiƣa tapxurulƣan.

¹Əy jaⱨan əⱨli ⱪulaⱪ selinglar,

əy həlⱪlər yahxi anglanglar.

²Esilzadə yaki addiy adəm bolsun,

bay wə namrat ⱨəmmisi ⱪulaⱪ salsun.

³Bayan əyləy ⱨekmətkə tolƣan durdanilarni,

qüxəndürəy ⱪəlbimdiki qongⱪur oylarni.

⁴Diⱪⱪitimni berip mən ⱨekmətlik sɵzlərgə,

lira^* qelip xərⱨi berəy uning sirliⱪ mənilirigə.

⁵Mən nemixⱪa ⱪorⱪup yürəy külpət kəlsə beximƣa,

rəⱪiblirimning yawuzluⱪliri ətrapimni ⱪaplap tursa?!

⁶Mal-mülkigə ixinər ular,

bayliⱪining kɵplükidin mahtinar.

^7-9Ⱪerindixi üqün ⱨeqkim Hudaƣa bədəl tɵliyəlməs,

ⱪerindixi üqün bədəl tɵləx mumkin əməs,

baⱨasizdur insan ⱨayati, setip alƣili bolmas.

Ⱪutⱪuzalmas ⱨeqkim ɵlümdin ⱪerindixini,

mənggü yaxap, gɵr azabini kɵrməslikini.

¹⁰Bilimiz danixmənlərning ɵlüm xərbiti iqidiƣanliⱪini,

nadan wə əhməⱪlərningmu ohxaxla ɵlidiƣanliⱪini.

Ular ⱨaman ⱪaldurup ketər baxⱪilarƣa mal-mülkini.

¹¹Gər nam ⱪilip bərsimu isimlirini yərlirigə,

ularning ⱪəbriliri ɵyliri bolup ⱪalar mənggügə.

Turalƣusidur xu ⱪəbrilər dəwrdin-dəwrgiqə.

¹²Bayliⱪi bolsimu mənggü yaxawərməs insan,

ⱨaywanƣa ohxax bir küni ɵlüp tügəydu ⱨaman.

¹³Muxundaⱪ bolar aⱪiwiti ɵzigə ixəngən əhməⱪlərning,

ularƣa əgixip sɵzlirigə ⱪayil bolƣanlarning. Selaⱨ

¹⁴Padiqi bolup ɵlüm ularƣa,

ⱨəydər ularni ⱪoy kəbi ɵlüklər makaniƣa.

Jəsətliri qirip ketər gɵr iqidə,

ⱨəxəmətlik ɵylirimu ⱪalar yiraⱪta.

Ⱨəⱪⱪaniylar ƣəlibə küni kəlgəndə

ⱨɵküm sürər ularning üstidə.

¹⁵Lekin Huda ɵz yeniƣa tartar meni,

gɵr azabidin halas ⱪilip jenimni. Selaⱨ

¹⁶Bisərəmjan bolma birərsi beyip kətsə,

a’ilisining mal wə mülki kɵpəysə.

¹⁷Ⱨeqnemisini elip ketəlməs u ɵlgəndə,

billə bolmas mal wə mülki ⱪəbrisidə.

¹⁸Bəhtlik ⱨes ⱪilsimu u ɵzini ⱨayat qeƣida,

kixilər mahtisimu u ronaⱪ tapⱪinida,

¹⁹ketər u yənila ata-bowilirining yeniƣa,

qiⱪalmas mənggü ular yoruⱪluⱪⱪa.

²⁰Qüxənməs bayliⱪi bar insanlar buni,

ⱨaywanƣa ohxax ɵlidiƣanliⱪini bir küni.

Asaf yazƣan munajat

¹Ⱪadir Huda – Pərwərdigar hitab ⱪildi jaⱨan əⱨligə,

məxriⱪtin-məƣribⱪiqə bolƣan pütkül yər yüzidikilərgə.

²Hudaning parlaⱪ nuri julalidi Si’ondin,

güzəllikning kamaliti bolƣan axu makandin.

³Rəbbimiz süküt ⱪilip turmas zinⱨar, kəlməktə u,

aldida ot yalⱪuni yalmap kelər,

ətrapida boran-qapⱪun ⱨuwlap kelər.

⁴U qaⱪirip asman bilən zeminni guwaⱨliⱪⱪa,

dəydu mundaⱪ, ɵz həlⱪini tartix üqün soraⱪⱪa:

⁵“Ⱨuzurumƣa yiƣinglar manga sadiⱪ həlⱪimni,

ⱪurbanliⱪ ⱪilip mən bilən əⱨdə tüzgənlərni.”

⁶Ərxtə namayan bolar Hudaning ⱨəⱪⱪaniyliⱪi,

bərⱨəⱪ, aləmning soraⱪqisidur Huda ɵzi. Selaⱨ

⁷“Mən Hudadurmən, silərni yaratⱪan Huda,

əy həlⱪim, ⱪulaⱪ selinglar manga,

əy Isra’il, xikayitim bar sanga.

⁸Ⱪurbanliⱪing üqün əyibliməymən seni,

əyibliməymən da’im atiƣan kɵydürmə ⱪurbanliⱪingni.

⁹Lazim əməstur manga eƣilingdiki buⱪiliring,

yaki ⱪotiningdiki ɵqkiliring.

¹⁰Qünki, meningkidur ormanlardiki barliⱪ ⱨaywanlar,

mingliƣan yaylaⱪlardiki mal-waranlar.

¹¹Manga təwədur taƣlardiki uqar ⱪanatlar,

daladiki jimi janiwarlar.

¹²Sorimasmən səndin ⱪorsiⱪim aqsa nawada,

qünki bu dunya, uningdiki mə’ixətlər təwədur manga.

¹³Əjəba, mən yərmənmu buⱪa gɵxini,

iqərmənmu ɵqkə ⱪenini?!

¹⁴Ⱪurbanliⱪ süpitidə xükürlərni eyt manga,

wapa ⱪil bərgən wədənggə mən uluƣ Hudaƣa.

¹⁵Qaⱪir meni ⱨər waⱪit kün qüxsə bexingƣa,

ⱪutⱪuzimən seni, uluƣlaysən meni xunda.”

¹⁶Əmma Huda dəyduki rəzillərgə:

“Nemə ⱨəⱪⱪing bar ⱪira’ət ⱪilixⱪa nizamlirimni?

Nemə ⱨəⱪⱪing bar tilƣa elixⱪa əⱨdəmni?

¹⁷Ɵq kɵridiƣan tursang təlimlirimni,

rət ⱪilidiƣan tursang sɵzlirimni.

¹⁸Dostlixisən oƣri bilən,

arilixisən zinahor bilən.

¹⁹Pasiⱪ sɵzlərdin tartmaysən tilingni,

tiling toⱪup qiⱪar yalƣanqiliⱪlarni.

²⁰Olturuwelip ⱪara qaplaysən tuƣⱪiningƣa,

tɵⱨmət ⱪilisən bir ⱪorsaⱪ ⱪerindixingƣa.

²¹Süküt ⱪildim ⱪilƣiningda bu ixlarni,

ɵzünggə ohxax, dəp oyliding xunga meni.

Biraⱪ, mən əyibləymən qoⱪum seni,

aldingƣa ⱪoyimən ⱪilmixliringni.

²²Əy meni untuƣanlar, yahxi oylanglar ⱪilmixinglarni,

bolmisa bitqit ⱪiliwetimən ⱨəmminglarni.

U qaƣda ⱨeqkim ⱪutⱪuzalmas silərni.

²³Ⱪurbanliⱪ süpitidə manga xükür eytⱪanlar meni uluƣlar,

xundaⱪ ⱪilip nijatliⱪimƣa erixmək üqün yol ⱨazirlar.”

Dawut yazƣan munajat bolup, nahxa ⱪilip eytilsun dəp, nəƣmiqilər bexiƣa tapxurulƣan. Padixaⱨ Dawut Batxəba^* degən ayal bilən bir orunda yatⱪandin keyin, Dawutning aldiƣa Natan pəyƣəmbər kelip Hudaning sɵzini yətküzgənidi. Xuning bilən padixaⱨ Dawut bu munajatni yazƣan.

¹Rəⱨimingni iltipat əyligəysən, i Huda,

qünki mənggülük muⱨəbbət bar səndə.

Kəqürgəysən mening ⱪilƣan gunaⱨimni,

qəksiz rəⱨimdillik hislitingdə.

²Pakliƣaysən ətmiximdin Igəm meni,

yuyup pakiz mening barliⱪ gunaⱨimni.

³Bərⱨəⱪ, mening iⱪrarim bar ⱪilmiximƣa,

gunaⱨlirim turar da’im kɵz aldimda.

⁴Gunaⱨ ⱪildim aldi bilən sening aldingda,

nəziringdə rəzil ixlar igisimən i Huda.

Adalətning igisisən pəⱪət ɵzüng,

ⱨəⱪtursən manga ⱨɵküm qiⱪarmaⱪⱪa.

⁵Gunaⱨkarmən xübⱨisizki tuƣulƣinimdila,

ⱨətta anamning ⱪarnida pəyda bolƣinimdila.

⁶Sən istəysən ⱪəlbimning pakliⱪini,

salƣin yürikimning qongⱪur ⱪatlimiƣa danaliⱪingni.

⁷Tazila meni lipəkgüldə^* paklinay,

yuyƣin meni ⱪardin aⱪⱪa aylinay.

⁸Kəqürginingni anglap, xad-huram bolay,

sən yanjiƣan ustihanlirim ⱨəm xadlanƣay.

⁹Nəziringdin saⱪit ⱪilip gunaⱨlirimni,

ɵqürüwətkin sanga ⱪilƣan ita’ətsizlikimni.

¹⁰Bir pak yürək ata ⱪilƣin manga Rəbbim,

ihlasmən ⱪəlbni ⱪayta ⱪilip təⱪdim.

¹¹Ⱪoƣlimiƣin ⱨuzurungdin zinⱨar meni,

tartiwalma məndin Muⱪəddəs Roⱨingni.

¹²Ⱨes ⱪildurƣaysən yengibaxtin nijatliⱪning xadliⱪini,

ata ⱪilƣaysən manga bir ita’ətmən ⱪəlbni.

¹³Xundila mən azƣunlarƣa ɵgitəy qin yolungni,

gunaⱨkarlar towa ⱪilip, makan ⱪilsun yeningni.

¹⁴Eⱨ Huda, nijatkarim Huda!

Ⱪan tɵküx jinayitidin ⱪutⱪuzƣin meni,

xunda xadlinip, küyləy nijatliⱪingni.

¹⁵I Igəm, sɵzlət mening tilimni,

eytsun aƣzim sanga bolƣan mədⱨiyəmni.

¹⁶Istiməysən ⱪurbanliⱪ ⱪilixni, bolmisa ⱪilar idim uni,

kɵydürmə ⱪurbanliⱪ ⱪilsammu hursən ⱪilmas kɵnglüngni.

¹⁷Hudani hursən ⱪilidiƣan ⱪurbanliⱪ – dəl ⱪəlbning puxaymini,

i Huda, tərk ətməysən puxayman ⱪilip towa ⱪilƣan kɵngülni.

¹⁸Xapa’iting bilən yaxnatⱪaysən Si’on^* xəⱨirini,

yengibaxtin ⱪurƣaysən Yerusalemning sepillirini.

¹⁹Məmnun bolisən bekitilgən ⱪurbanliⱪlardin xundila,

ⱪobul ⱪilisən kɵydürmə wə pütün ⱪurbanliⱪlarni,

awam ⱪurbanliⱪ ⱪilar torpaⱪlarni ⱪurbanliⱪ supangda.

Bu munajat, Do’eg isimlik bir Idomluⱪ, Sa’ul padixaⱨning aldiƣa berip, Dawutning roⱨaniy Ahimələkning ɵyidə ikənlikini həwər ⱪilip ⱪoyƣandin keyin Dawut təripidin yezilƣan tərbiyəwi munajat bolup, nahxa ⱪilip eytilsun dəp, nəƣmiqilərning bexiƣa tapxurulƣan.

¹Neqün mahtinisən rəzillikingdin əy noqi?

Mənggülüktur Hudaning manga bolƣan muⱨəbbiti.

²Tiling ittik, ohxar ɵtkür ustiriƣa,

u istər wəyran ⱪilixni, maⱨirdur yalƣanqiliⱪⱪa.

³Əwzəl kɵrisən yahxiliⱪtin yamanliⱪni,

ⱨəⱪ sɵzləxtin yalƣanqiliⱪni. Selaⱨ

^4-5Amraⱪsən adəmni tügəxtüridiƣan yalƣan sɵzlərgə,

xuning üqün Huda seni yoⱪitidu mənggügə.

Tutuwelip u seni tartip qiⱪar ɵyüngdin,

yiltizingni yulup taxlar bu paniy aləmdin. Selaⱨ

⁶Buni kɵrüp ⱨəⱪⱪaniylar ⱨang-tang ⱪalar,

u noqini mundaⱪ dəp zangliⱪ ⱪilar:

⁷“Ⱪaranglar, bu Hudaƣa tayanmiƣan küqlük adəm idi,

u pəⱪət ɵz bayliⱪiƣa tayanƣanidi,

baxⱪilarni wəyran ⱪilix bədiligə küqləngənidi.”

⁸Mən huddi baraⱪsan ɵskən zəytun dərihimən,

Hudaning ɵyidə mustəⱨkəm güllinip ɵsimən,

uning meⱨir-muⱨəbbitigə mənggü ixinimən.

⁹Xapa’ətlik bolƣaq Huda, ümid baƣlaymən sanga,

təⱪwadar həlⱪing arisida

mənggü xükür eytimən ⱪilƣan yahxi ixliringƣa.

Dawut yazƣan tərbiyəwi munajat bolup, “mahalat”ta^* eytilsun dəp, nəƣmiqilər bexiƣa tapxurulƣan.

¹Əhməⱪlər ɵz kɵnglidə “Huda yoⱪ” dər,

əslidə ular rəzil, buzuⱪlardur.

Ulardin birmu toƣra yolda mangƣuqi yoⱪtur.

²Insanƣa nəzər salar Pərwərdigar ərx’əladin,

barmidu dəp, manga təlpüngən birər aⱪil ulardin.

³Əmma ular buzulƣan bolup pasiⱪ, azƣuqi,

ⱨətta ularning birimu əməs toƣra yolda mangƣuqi.

⁴Bilməsmu əjəba Hudaning barliⱪini pasiⱪlar?!

Ular bulap həlⱪimni, nandək ezip yəp-yutar,

əsla du’a-tilawət ⱪilmas Hudaƣa ular.

⁵Basar ularni xunqə küqlük wəⱨimə,

ⱨətta ⱨeqbir ⱪorⱪunq yoⱪ yərdə.

Qünki əy Isra’il, yanqiwetər^* Huda

seni ⱪorxawƣa alƣanlarning ustihanlirini.

Sən dərwəⱪə uyatta ⱪaldurisən ularni,

qünki Huda rət ⱪilƣandur yamanliⱪ ⱪilƣuqilarni.

⁶Eⱨ, Si’ondin qiⱪip kəlsə idi nijatliⱪ Isra’illarƣa!

Yaⱪup əwladliri xadlinar, Isra’illar qɵmər huxalliⱪⱪa,

Huda asarəttiki həlⱪini ⱨɵrlükkə qiⱪarƣanda.

Bu Zifliⱪlar Sa’ul padixaⱨning yeniƣa berip “dawut bizning arimizda yoxurunup yüridu” dəp qeⱪimqiliⱪ ⱪilƣandin keyin^* Dawut yazƣan tərbiyəwi munajat bolup, tarliⱪ sazlar bilən orunlansun dəp, nəƣmiqilər bexiƣa tapxurulƣan.

¹I Huda, ⱪutⱪuzƣin ɵzüng meni,

ⱪudritingdə ⱪoƣdiƣin meni.

²I Huda, angliƣin du’alirimni,

tingxiƣin munajat-nidalirimni.

³Zorawan düxmənlər ⱪarxi qiⱪmaⱪta manga,

ular ⱪəst ⱪilmaⱪqi əziz jenimƣa.

Etibar bərməs ular əsla Hudaƣa.

⁴Ixənqim kamilki mədətkar Huda,

Igimiz yar-yɵlək bolidu manga.

⁵Bərgəy u yamanƣa yamanqə jaza,

ⱨalak ⱪilip düxmənni wapadar Huda.

⁶I Pərwərdigar, sunay sanga halis ⱪurbanliⱪimni,

bolƣaqⱪa sən xapa’ətlik, mədⱨiyələymən namingni.

⁷Xundaⱪ Huda, barliⱪ külpətlərdin halas ⱪilding meni,

ɵz kɵzüm bilən kɵrdüm düxmənlirimning məƣlubiyitini.

Dawut yazƣan tərbiyəwi munajat bolup, tarliⱪ sazda təngkəx ⱪilinip eytilsun dəp, nəƣmiqilər bexiƣa tapxurulƣan.

¹Ⱪulaⱪ salƣin du’ayimƣa i Huda,

bipərwa bolmiƣin iltijayimƣa.

²Jawab bərgin nəzər selip bu ⱨalimƣa,

yürimən ⱪaⱪxap, pərixanmən da’ima.

³Saldi düxmənlər təⱨdit manga,

rəzillər salmaⱪta jəbir-japa.

Xikayət ⱪilar ular manga,

ⱪəⱨridin bala yaƣar beximƣa.

⁴Yürikim siⱪilar ⱪəpisidə,

wujudum besilar ɵlüm təxwixidə.

⁵Ənsizlik qirmap aldi jismimni,

wəⱨimə, titrəklər ⱪaplimaⱪta meni.

⁶Bolsa idi ⱪanitim kəptərlər kəbi,

pərwaz ⱪilip tapar idim aramgaⱨni.

⁷Dər ⱨəⱪiⱪət ⱪeqip berip yiraⱪlarƣa,

ⱪonar idim qɵl-jəzirə, bayawanƣa. Selaⱨ

⁸U yərlərdin bir panaⱨ jay tapar idim,

boran-qapⱪun, ⱪuyunlardin ⱪutular idim.

⁹I Igəm, bisərəmjan ⱪilip yawlirimni,

bɵliwətkin birⱪanqiƣa tillirini.

Qünki kɵrdümmən xəⱨirimizdə

zorawanning ⱨərikiti wə jedilini.

^10-11Ⱪarawulluⱪ ⱪilar ular keqə-kündüz,

aylinip yürüp xəⱨər sepilini.

Waⱨalənki, ⱪapliƣan xəⱨərni jinayət wə xumluⱪ,

ɵz ilkigə alƣan zulum, ⱨiylə wə buzuⱪqiliⱪ.

¹²Düxmənlirim əməs manga ⱨaⱪarət ⱪilƣanlar,

bolmisa səwr-taⱪət ⱪilar idim.

Ɵqmənlirim əməs meni kəmsitkənlər,

bolmisa ulardin ɵzümni ⱪaqurar idim.

¹³Əmma buni ⱪilƣuqi dəl sən – mening yeⱪinim,

janjigər dostum wə yahxi ⱨəmraⱨim.

¹⁴Biz sirdax dostlar iduⱪ,

muⱪəddəs ibadəthana ⱨoylisida

jama’ət arisida billə yürgəniduⱪ.

¹⁵Ɵlüm düxmənlirimni ⱪoyniƣa alsun tuyuⱪsizla,

tirik kətsun ular ɵlüklər makaniƣa,

qünki rəzillik makan tutar ularning dillirida.

¹⁶Iltija ⱪilarmən yalwurup Hudaƣa,

Pərwərdigarim nijatliⱪ berər manga.

¹⁷Pəryad ⱪilsam tɵküp dərdimni,

Huda anglar awazimni,

ətigən, qüx wə ahximi.

¹⁸Gərqə xunqə kɵp bolsimu,

ⱪarxi qiⱪⱪanlar manga.

U ⱪutⱪuzar jənglərdə meni,

zərər yətküzməy jenimƣa.

¹⁹Əzəldin ⱨɵküm sürüp kəlgüqi,

anglap mening du’alirimni, Selaⱨ

mat ⱪilar düxmənlirimni.

Qünki ular yanmas yolidin,

ⱪorⱪmas ⱨəm Hudayimdin.

²⁰U ⱨəmraⱨim muxt kɵtürdi,

ɵzini dost bilgənlərgə.

Hilapliⱪ ⱪildi u ⱨəm

dostiƣa bərgən wədisigə.

²¹Seriⱪ maydin siliⱪtur aƣzi,

biraⱪ xumluⱪⱪa tolƣandur dili.

Xikər-xərbəttək sɵzlər tili,

lekin ittik xəmxərdək hətərliktur eytⱪanliri.

²²Pərwərdigarƣa tapxur ƣəm-ⱪayƣungni,

u ⱪollap-ⱪuwwətlər seni.

Pərwərdigar yiⱪitmas ⱨərgiz,

toƣra yolda mangƣan adəmni.

²³Eⱨ Huda,

sən taxlaysən ⱨalakət ⱨangliriƣa düxmənlirimni,

ⱪanhor, ⱨiyligərlər yaxiyalmas ɵmrining yerimini,

əmma mən yoⱪatmasmən sanga bolƣan ixənqimni.

U Dawut yazƣan miⱪtam^* bolup, “yiraⱪtiki ünsiz kəptər” degən aⱨangda eytilsun dəp, nəƣmiqilər bexiƣa tapxurulƣan. Dawut bu munajatni Filistiyəliklər uni Gat degən xəⱨərdə tutuwalƣanda yazƣan.

¹Xəpⱪət ⱪilƣin manga, i Huda.

Kixilər ⱪilip meni dəpsəndə,

künboyi ⱪiynap, bəkla əzməktə.

²Rəⱪiblirim ziyankəxlik ⱪilixⱪa urunmaⱪta.

Təkəbburlixip ularning nurƣunliri,

manga ⱪarxi jənggi-jedəl qiⱪarmaⱪta.

^3-4Ixənq ⱪildim sanga Huda ⱪorⱪⱪan qeƣimda,

wədiliring bolƣaq mening yürikimning qongⱪur ⱪetida.

Ixənqim bolƣaq Huda sanga əzəldinla,

ⱪorⱪmidim, nemimu ⱪilalar dəp insan manga.

⁵Burmilar ular mening sɵzlirimni da’ima,

hiyalliri ularning ziyankəxlik ⱪilixtur manga.

⁶Ular manga yoxurun ⱨalda ⱨujumƣa qiⱪmaⱪta,

qüxüp mening peyimgə ⱨayatimƣa ⱪəst ⱪilmaⱪta.

⁷Jazasiz ⱪalarmu ular gunaⱨi turupmu xunqə?!

I Huda, ularni gumran ⱪilƣaysən ⱪəⱨringdə.

⁸Hatiriləp ⱪoyƣansən bu sərsanqiliⱪlirimni,

tulumƣa ⱪaqilap ⱪoyƣansən kɵz yaxlirimni,

yezip ⱪoyƣansən dəptiringgə bularni.

⁹Düxmənlirim qekinər iltija ⱪilsam sanga,

xübⱨisizki, mən tərəptidursən, i Huda.

¹⁰Uluƣlarmən Hudani wə uning manga bərgən wədilirini,

uluƣlarmən Igəmni wə uning manga eytⱪan sɵzlirini.

¹¹Ixənqim bolƣaq Huda sanga əzəldinla,

ⱪorⱪmidim, nemimu ⱪilalar dəp insan manga.

¹²Turmisam bolmas wədilirimdə, i Huda,

sunimən xunga xükür ⱪurbanliⱪlirimni sanga.

¹³Qünki meni ⱪutⱪuzup ⱪalding ɵlümdin,

saⱪliding ⱨəm putlirimni putlixip ketixtin.

Məⱪsiting meni aman yürsun dəp aldingda,

mangsun dəp ⱨəm ⱨayatliⱪ nurungda.

Dawut yazƣan miⱪtam bolup, “ⱨalak ⱪilmiƣin” degən aⱨangda eytilsun dəp, nəƣmiqilər bexiƣa tapxurulƣan. Dawut bu munajatni Sa’ul padixaⱨtin ⱪeqip, bir ɵngkürgə yoxurunuwalƣan qeƣida yazƣan.

¹Xəpⱪət kɵrsətkin i Huda,

xəpⱪət kɵrsətkin manga.

Qünki mən panaⱨ taparmən səndə,

ⱪanatliringning astida,

taki hətər ɵtüp kətküqə.

²Nida ⱪilarmən Hudaƣa – uluƣ bolƣuqiƣa,

mən ⱨəⱪⱪidiki iradisini ijra ⱪilƣuqiƣa.

³U ərxtin əwətər nijatliⱪini,

xərməndə ⱪilar meni harliƣanlarni, Selaⱨ

kɵrsitər manga muⱨəbbiti wə sadaⱪitini.

⁴Mən yatarmən arisida xirlarning,

adəm gɵxi yəydiƣan aq kɵzlərning.

Tilliri huddi ɵtkür ⱪiliq bolsa,

nəyzə wə oⱪlar kəbi qixliri ularning.

⁵I Huda, uluƣluⱪing kɵrsitilgəy asman-pələktə,

xan-xəriping namayan bolƣay pütkül yər yüzidə.

⁶Tuzaⱪ ⱪurar yollirimƣa rəⱪiblirim,

ələmlərdin ezildi bu yürəklirim.

Ular ora koliwidi yollirimƣa,

ɵzliri qüxti ⱪazƣan oriliriƣa. Selaⱨ

⁷Ixənqim kamil Huda, ixənqim kamil sanga,

xunga mədⱨiyə oⱪup eytimən sanga nahxa.

⁸Oyƣan əy roⱨim!

Sayra lira, qiltarim!

Oyƣitayli tangni nəƣmə-saz bilən,

oyƣitayli tangni mədⱨiyə bilən.

⁹Ⱨəmdusana eytimən sanga, i Igəm Huda,

seni küyləymən barqə əl, həlⱪi’aləm ara.

¹⁰Qünki mənggülük muⱨəbbiting asman kəbi bipayan,

sadaⱪiting xunqə moldur bulutlarƣa taⱪaxⱪan.

¹¹I Huda, uluƣluⱪing kɵrsitilgəy asman-pələktə,

xan-xəriping namayan bolƣay pütkül yər yüzidə.

Dawut yazƣan miⱪtam bolup, “ⱨalak ⱪilmiƣin” degən aⱨangda eytilsun dəp, nəƣmiqilər bexiƣa tapxurulƣan.

¹Qiⱪiramsilər ⱨəⱪ ⱪarar ⱨɵkümdarlar rasttinla?

Adilmidu həlⱪning üstidiki ⱨɵkümingla?

²Yaⱪ, kɵnglünglarda yamanliⱪ oylap ⱪarar qiⱪirisilər,

yər yüzidə ɵzünglar zorawanliⱪ ⱪilisilər.

³Rəzillər adaxⱪandur baliyatⱪudin qiⱪⱪandila,

yalƣanqilar yoldin azar anisidin tuƣulupla.

^4-5Zəⱨərhəndidur ular zəⱨərlik yilan kəbi,

jaⱨilliⱪi ularning nəy awazini anglimaydiƣan kobra bə’əyni,

yilan oynatⱪuqining mungluⱪ küyini anglimas ular ⱪət’iy.

⁶I Huda, urup sunduruwətkin ularning qixlirini,

i Igəm, yuluwətkin u xirlarning tongkay qixlirini.

⁷Ular huddi eⱪip kətkən sular kəbi yoⱪalsun,

oⱪyalirini bətlisə, oⱪi xu’an sunup kətsun.

⁸Arimizdin yoⱪalsun ular huddi ⱪululilər mangƣanseri erip yoⱪalƣandək,^*

kün kɵrmisun ular ayalning boyidin qüxüp kətkən bowaⱪtək.

⁹Tikən yeⱪilip oqaⱪta ⱪazan səzgüqə issiⱪini,

i Huda, yoⱪutiwətkin ularni – yax-ⱪerilarning ⱨəmmisini.

¹⁰Yamanlarni jazalisa Hudayim ⱨəⱪⱪaniylar hux bolar,

yamanlarning ⱪenida putlirini yuyidu ular.

¹¹Xunga dərki insanlar: “Ⱨəⱪⱪaniylar in’am alur,

xübⱨisizki, yər yüzidə soraⱪ ⱪilƣuqi Huda bardur.”

Dawut bu miⱪtamni padixaⱨ Sa’ul paylaⱪqilarni əwətip uni kɵzitip turuxⱪa wə pursiti kəlgəndə ɵltürüwetixkə buyruⱪ ⱪilƣanda yazƣan.

¹Ⱪutⱪuz Igəm meni rəⱪiblirimdin,

ⱪoƣda meni manga ⱪarxi turƣanlardin.

²Ⱪutⱪuzƣaysən yamanlarning ⱪolidin,

azad ⱪilƣin ⱪanhorlarning ⱪoynidin.

^3-4Jenimni almaⱪ üqün ular paylap yürməktə,

nə jinayət, nə gunaⱨlar bolsun meningdə.

Wəⱨxiylər birlixip manga suyiⱪəst ⱪilmaⱪta,

ⱨeq yamanliⱪ ⱪilmisammu ularƣa.

Ular təyyar bolmaⱪta manga ⱨujum ⱪilixⱪa,

kəlgin manga yardəm berixkə,

nəzər selip mening uxbu ⱨalimƣa.

⁵I Pərwərdigar – ⱪudrətlik sərdar Huda,^*

i Isra’illarni talliƣan Huda,

kəlgin barliⱪ Hudasizlarni jazalaxⱪa,

xəpⱪət ⱪilmiƣin rəzil satⱪunlarƣa. Selaⱨ

⁶Ⱨər ahximi kelər ular,

lalma ittək xəⱨərdə ⱨawxip yürər,

⁷tohtimastin eƣizliridin yamanliⱪ qiⱪar,

tilliri ularning hənjərgə ohxar,

iqidə “ⱪilƣanlirimizni kimmu bilər” dəp oylar.

⁸Lekin Huda sən ular üstidin külisən,

barliⱪ hudasiz əllərni mazaⱪ ⱪilisən.

⁹Sanga təlmürimən i küq-ⱪudritim Huda,

qünki baxpanaⱨimdursən manga da’ima.

¹⁰Wapadar Pərwərdigar manga kelip yardəm berər,

düxmənlirimning məƣlubiyitini kɵrsitər.

¹¹I ⱪalⱪinimiz bolƣan Igəm,

ⱨalak ⱪilma ularni,

untumisun həlⱪim ularning ⱨalini,

ⱪudriting bilən sərsan ⱪilƣin ularni,

yərgə ⱪaratⱪin ularning yüzlirini.

¹²Eƣizliri tolƣandur yamanliⱪⱪa,

zəⱨər tamar tilliridin ularning,

yaman sɵz wə yalƣanqiliⱪliri,

tumxuⱪidin ilgəy təkəbburluⱪining.

¹³Ƣəzipingdə yoⱪ ⱪil ularni,

ⱪirip taxla ⱪaldurmay birini.

Ayan bolsun pütün dunyaƣa,

Yaⱪup əwladliriƣa Hudaning ⱨɵkümran ikənliki. Selaⱨ

¹⁴Ⱨər ahximi kelər ular,

lalma ittək xəⱨərdə ⱨawxip yürər.

¹⁵Ozuⱪ izdəp ⱨəryanƣa ⱪatrar,

tapalmisa əgər aq ⱪelip ⱨuwlar.

¹⁶Waⱨalənki, mən küyləymən ⱪudritingni,

ⱨər səⱨərdə, mənggülük muⱨəbbitingni.

Qünki sən mening ⱪorƣinimsən,

eƣir künlərdə panaⱨgaⱨimsən.

¹⁷I manga küq-ⱪuwwət bolƣan Igəm,

bardur sanga mening mədⱨiyəm.

Sən mening mustəⱨkəm ⱪorƣinimdursən,

manga muⱨəbbət kɵrsətküqi Hudadursən.

Dawut yazƣan tərbiyəwi ⱪimmətkə igə bir miⱪtam bolup, “guwaⱨliⱪ nelupəri” degən aⱨangda eytilsun dəp, nəƣmiqilərning bexiƣa tapxurulƣan. Uxbu miⱪtam Dawut Arram-Naharayim wə Arram-Zobaⱨliⱪlar bilən jəng ⱪilƣandin keyin, ⱨəmdə ləxkər bexi Yo’ab Tuz jilƣisida Idomluⱪlardin on ikki ming adəmni ɵltürgəndin keyin yezilƣan.

¹I Huda, yər bilən yəksan ⱪilding rət ⱪilip bizni,

ƣəzəplənding, əmdi ⱪaytur yeningƣa ⱨəmmimizni.

²Sən təwritip eqiwətting yər-zeminni,

mana silkinməktə yər, ongxa uni.

³I Huda, azab salding ɵz həlⱪinggə,

jaza xarabini iqküzding bizgə.

⁴Əmma tikliding bəlgə tuƣi sanga ihlasi barlarƣa,

panaⱨlanƣay dəp yaw oⱪyaliridin ⱪeqip uningƣa. Selaⱨ

⁵Ong ⱪolungda ⱪutⱪuz bizni ⱪilip bizgə ijabət,

ɵzüng sɵygən bəndiliring tapsun xunda nijat.

⁶Huda xundaⱪ dəydu ɵz muⱪəddəsliki bilən:

“Xadliⱪta həlⱪimgə bɵlüp berimən Xəkəm diyarini,

təⱪsim ⱪilip berimən Sukkot wadisini.

⁷Gil’ad rayoni mənsuptur manga,

Manassəmu ⱨəm tə’əlluⱪ manga.

Əfrayim – beximdiki dubulƣamdur,

Yəⱨuda mening səltənət ⱨasamdur.

⁸Put yuyidiƣan ⱪaqidur Mo’ab manga,

qoruⱪumni taxlaymən Idomƣa.

Quⱪan salimən,

Filistiyə üstidin ƣəlibə ⱪilƣinimƣa.”^*

⁹Kim meni idomƣa zəpər bilən baxlap kirər,

kim meni u mustəⱨkəm xəⱨərgə baxlap barar?

¹⁰I Huda, bizdin waz kəqtingmu?

Biz bilən birgə bolmiding jəngdimu.

¹¹Düxməngə ⱪarxi bizgə bol yardəmdə,

biⱨudidur zəpər ⱪazinix insanning yardimidə.

¹²Hudaning ⱪudriti bilən kürəx ⱪilimiz baturlarqə,

Igəm ɵzi məƣlup ⱪilar düxminimiz tügigüqə.

Dawut yazƣan munajat bolup, tarliⱪ sazlar təngkixidə eytilsun dəp, nəƣmiqilər bexiƣa tapxurulƣan.

¹I Huda, angliƣaysən pəryadimni,

ⱪobul ⱪilƣin sanga ⱪilƣan du’ayimni.

²Qüxkünlük basⱪanda ⱪəlbimni, iltija ⱪilimən yiraⱪtin sanga,

yetəkligin meni panaⱨlinidiƣan egiz ⱪoram taxⱪa.

³Xübⱨisizki, sən mening baxpanaⱨim,

düxminimdin ⱪoƣdaydiƣan mustəⱨkəm ⱪorƣinim.^*

⁴Qediringni mənggülük makan ⱪilay,

ⱪanatliringning sayisida panaⱨ tapay. Selaⱨ

⁵I Huda, anglap sən ⱪəsəmlirimni,

bərding manga, sanga ihlas ⱪilƣanlarƣa atiƣan bəhtni.

⁶Uzartip padixaⱨning ɵmrini,

əwladtin-əwladⱪiqə dawam ətkin təhtini.

⁷I Huda, u mənggü ⱨɵküm sürsun kɵz aldingda,

ⱪoƣdiƣay uni muⱨəbbiting wə sadaⱪiting da’ima.

⁸Nəƣmə-nawa ⱪilay mənggü atap sening namingƣa,

sanga bərgən ⱪəsəmlirimni ⱨər küni ⱪilip ada.

Dawut yazƣan munajat bolup, “yidutun” aⱨangida eytilsun dəp, nəƣmiqilər bexiƣa tapxurulƣan.

¹Aram tapar jenim pəⱪət Hudadin,

nijatliⱪmu manga pəⱪət kelər uningdin.

²Ⱪoram texim, nijatkarim pəⱪət Hudadur,

təwrənməsmən qünki u ⱪorƣinimdur.

^3-4Əy rəzillər ⱪaqanƣiqə manga ⱨujum ⱪilisilər?

Ⱪaqanƣiqə ⱨəmminglar meni ɵltürməkqi bolisilər?

Huddi yiⱪitⱪandək ⱪiysiyip ⱪalƣan tam, lingxip ⱪalƣan ⱪaxani,

silərning ⱪəstinglar ⱨəywətlik ornumdin yiⱪitixtur meni.

Xunqə amraⱪ silər yalƣanqiliⱪⱪa,

bəht tiligininglar bilən eƣizinglarda,

ⱪarƣaysilər iqinglarda. Selaⱨ

⁵Pəⱪət Hudadinla aram tap əy jenim,

qünki uningdidur mening barliⱪ ümidim.

⁶Ⱪoram texim, nijatkarim pəⱪət Hudadur,

təwrənməsmən qünki u ⱪorƣinimdur.

⁷Nijatliⱪim, xan-xɵⱨritim Hudadin kelur,

Huda mening baxpanaⱨim, ⱪoram teximdur.

⁸Əy halayiⱪ ⱨər da’im ixininglar Hudaƣa,

iⱬar əyləp kɵngül wə dərdinglarni uningƣa.

Qünki Pərwərdigar bizgə bolidu bir panaⱨgaⱨ. Selaⱨ

⁹Insan pəⱪət birla tiniⱪtur,

xɵⱨritimu uning ⱪuruⱪtur.

Kɵtürülüp ketər selinsa taraziƣa ular,

qünki ular bir tiniⱪtinmu yeniktur.

¹⁰Tayanma zomigərlikkə,

ümid baƣlima bulangqiliⱪⱪa.

Əgərdə bayliⱪing awusa,

kɵngül bərmə uningƣa.

^11-12Huda deding: “Küq-ⱪudrət mənsuptur manga.”

Təkitliding: “Mənggülük muⱨəbbət təwədur manga.”

Bərⱨəⱪ, sən ⱪayturisən ⱨərbir insanƣa,

ⱪilƣan əməllirigə yarixa.

Dawut Yəⱨuda qɵlidə sərsan bolup yürgən waⱪtida yazƣan munajat

¹Pərwərdigarim etiⱪad ⱪilimən sanga,

izdəymən seni intizar bolup i Huda.

Suƣa təxna bolƣan ⱪurƣaⱪ, ⱪaⱪas yər kəbi,

təxna boldum ɵzünggə, wujudum intilər sanga.

²Muⱪəddəs jayda turup nəzər salsam,

küq-ⱪudrət, xan-xəripingni kɵrüwalsam.

³Ⱨayattinmu ⱪimməttur mənggülük muⱨəbbiting,

xunga seni mədⱨiyələr tilim mening.

⁴Təripləymən Igəm seni jenim təndə bolsila,

ⱪollirimni kɵtürüp du’a ⱪilimən sangila.

^5-6Ornumda yetip Huda seni oylisam,

keqiliri sən ⱨəⱪⱪidə hiyal ⱪilsam,

xadliⱪⱪa qɵmüp mədⱨiyələr tɵkülər aƣzimdin,

ⱪorsiⱪim toyƣandək mol dastihandin,

roⱨim toydi sening mol iltipatingdin.

⁷Sən mədətkar bolup kəlding manga i Huda,

küyləymən seni ⱪanatliring sayisida.

⁸Birdinbir tayanqim bildim seni,

ong ⱪolung yɵlər meni.

⁹Əmma tegi yoⱪ gɵrgə qüxər,

jenimning peyigə qüxkənlər.

¹⁰Ⱪiliqta elinar ularning janliri,

qilbɵrigə yəm bolar ⱨəm ularning tənliri.

¹¹Ixinimənki padixaⱨ Hudadin hursən bolar,

“Huda guwaⱨ” dəp ⱪəsəm iqkənlər Hudani uluƣlar,

bərⱨəⱪ, yalƣan sɵzligənlərning zuwani tutular.

Dawut yazƣan munajat bolup, nahxa ⱪilip eytilsun dəp, nəƣmiqilər bexiƣa tapxurulƣan.

¹Ⱪulaⱪ salƣin i Huda, angla mening aⱨimni,

düxmənlərning ⱪəstidin ⱪoƣdiƣin ⱨayatimni.

²Saⱪliƣin meni ɵzüng rəzillərning suyiⱪəstidin,

aman ⱪil ⱨayatimni yamanlarning ⱪəstidin.

³Bə’əyni xəmxər kəbi ɵtkür ularning tilliri,

huddi oⱪyadək bətləklik ularning zəⱨər sɵzliri.

⁴Yoxurun atar ular gunaⱨsiz kixilərni,

tuyuⱪsiz oⱪⱪa tutar təp tartmastin ularni.

⁵Bətniyətlik ⱪilixⱪa ilⱨamlandurup bir-birini,

məsliⱨətlixər ɵz’ara yoxurun tuzaⱪ ⱪuruxni,

oylaydu ular: “Kim bilip ⱪalatti bu ixlarni.”

⁶Dəydu ular ⱨərhil suyiⱪəst oylap qiⱪip:

“Mukəmməl pilan tüzduⱪ birlixip.”

Nemidegən sirliⱪ ⱨə, insanning iqki dunyasi.

⁷Əmma Huda ularƣa oⱪ atar,

ular tuyuⱪsiz yaridar bolar.

⁸Tilliridin ilinip gumran bular,

ularni kɵrgənlər məshirə ⱪilar.

⁹Ⱪorⱪunq basar ⱨəmmə insanlarni,

oyliƣanda Hudaning ⱪudritini,

bayan ⱪilar uning karamətlirini.

¹⁰Ⱨəⱪⱪaniylar xadlansun Pərwərdigardin da’ima,

panaⱨ tapsun ⱨəm ular Pərwərdigarning ⱪoynida,

ⱪəlbi paklar ⱨəmdusana eytsun uningƣa.

Dawut yazƣan munajat bolup, nahxa ⱪilip eytilsun dəp, nəƣmiqilər bexiƣa tapxurulƣan.

¹Ⱨəmdusana oⱪumaⱪ bolup sanga i Huda,

kixilər kütməktə seni Si’onda.^*

wədilirini əməlgə axurar ular xu jayda.

²Du’alarni angliƣuqi i Huda,

ⱨəmmə insan kelidu sening aldingƣa.

³Gunaⱨlar besiwalƣan bolsimu bizni,

kəqürüm ⱪilisən gunaⱨlirimizni.

⁴Nəⱪədər bəhtliktur

sən ɵzünggə yeⱪin ⱪilip talliƣan kixilər,

yaxar ular muⱪəddəs ⱨoyliliringda,

bolimiz məmnun ɵyüngning bərikitidin,

ibadəthanangning muⱪəddəslikidin.

⁵Uluƣ ƣəlibəng bilən

jawab berisən bizgə,

i ⱪutⱪuzƣuqimiz Huda.

Ümidisən barqə insanning,

taki qetidikilərgiqə zeminning.

⁶Ⱪudrət bilən baƣlap belingni,

küqüng bilən tikliding taƣlarni.

⁷Tinqitisən dengizlarning xawⱪunlirini,

ⱨəm yat əllərning topilanglirini.

⁸Əyminər karamətliringdin yiraⱪtiki əllər,

xərⱪtin-ƣərbkiqə küy yangritar həlⱪlər.

⁹Sən yərgə kɵngül bɵlüp,

su bilən suƣirip uni

bəkmu munbətləxtürdüng zeminingni.

Suƣa toldurdung eriⱪ, ɵstəng, dəryaliringni,

axliⱪ bilən təminləxkə bəndiliringni.

Sən nesip ⱪilding xundaⱪ boluxni.

¹⁰Toldurup suƣa qɵnəklərni,

taraxlaysən ⱪirlirini.

Yamƣur bilən yumxitip yərni,

ündürisən unda mol zira’ətlərni.

¹¹Mol ⱨosulni bexiƣa taj ⱪilip taⱪaysən yillarning,

bay-bayaxat, toⱪ bolar yətkənla jaylar ⱪədiming.

¹²Ⱪoyuⱪ wə əlwək bolar daladiki otlaⱪlar,

taƣ-dawanlarmu belini xadliⱪ kəmiridə baƣlar.

¹³Ekin kəbi yaraxⱪan ⱪoylar topi otlaⱪⱪa,

zira’ət wə maysilar tolup kətkən jilƣiƣa.

Xunga ular nahxa eytar yangritip xadliⱪta.

Dawut yazƣan munajat bolup, nahxa ⱪilip eytilsun dəp, nəƣmiqilər bexiƣa tapxurulƣan.

^1-2Əy jaⱨan əⱨli Hudaƣa yangritinglar alⱪixlar,

hislətlirini təripləp küy-nahxiƣa ⱪetinglar,

ⱨayajanda uningƣa mədⱨiyələr oⱪunglar.

³Xundaⱪ dənglar əy halayiⱪ Hudaƣa:

“Nəⱪədər ⱨəywətlik-ⱨə ⱪudriting!

Kɵrsitilgəndə karamiting i Huda,

düxmənliring tügülüp ⱪalar aldingda.

⁴Pütkül yər-jaⱨan səjdə ⱪilmaⱪta sanga,

küyləp ⱨəmdusana oⱪumaⱪta namingƣa.” Selaⱨ

⁵Kɵrünglar Hudaning büyük ⱪudritini,

uning kɵrsətkən karamətlirini.

⁶U yol aqti dengizni yerip,

mengip ɵtti həlⱪlər ⱪurƣaⱪ yoldin.

Təntənə ⱪilduⱪ minnətdar bolup Hudadin.

⁷Ɵz ⱪudriti bilən mənggü ⱨɵküm süridu Huda,

pütkül insan ixliri ayandur kɵz aldida.

Ita’ətsizlər ⱪarxi qiⱪmisun uningƣa. Selaⱨ

⁸Əy yat həlⱪlər mədⱨiyələnglar Hudayimizni,

yangritinglar uningƣa atap ⱨəmdusana, alⱪixlarni.

⁹U saⱪlap kəldi ⱨayatimizni,

teyilip ketixtin putlirimizni.

¹⁰I Huda, sən bizni siniding,

kümüxni otta tawliƣandək tawliding.

¹¹Sən tuzaⱪⱪa qüxürdüng bizni,

yəlkimizgə ⱨəm artting eƣir yükni.

¹²Ƣəlibə ⱪildurƣaniding üstimizdin düxminimizni.^*

sən ɵzüng sudinmu, ottinmu ɵtküzüp bizni,

ahiri molqiliⱪⱪa elip kəlding həlⱪimizni.

^13-14I Huda, sanga wədə bərgənidim külpəttə ⱪalƣinimda,

ⱪəsəm ⱪilƣanidim yəlkəmni eƣir kün basⱪinida.

Elip kirip ibadəthanangƣa kɵydürmə ⱪurbanliⱪlarni,

ada ⱪilimən dəp, sanga bərgən ⱪəsəmlirimni.

¹⁵I Huda sanga atap bordaⱪ mallarni,

kɵydürmə ⱪurbanliⱪⱪa beƣixlaymən.

Ⱪoqⱪar yeƣini kɵydürüp, puritimən,

buⱪa wə ɵqkilərnimu ɵzünggə sunimən. Selaⱨ

¹⁶Əy Hudaƣa ihlasi barlar, tingxanglar sɵzümni,

sɵzləp berəy Hudaning manga kɵrsətkən karamətlirini.

¹⁷Awazimni kɵtürüp Hudaƣa ⱪildim nida,

oⱪudum uningƣa mədⱨiyə, ⱨəmdusana.

¹⁸Pərwərdigar ⱪulaⱪ salmas idi du’ayimƣa,

mayil bolsa nawada ⱪəlbim mening gunaⱨⱪa.

¹⁹Xübⱨisizki, du’ayimni anglidi Huda,

du’a ⱪilƣinimda ⱪulaⱪ selip turdi manga.

²⁰Təripləyli ⱨəmmimiz Hudayimizni,

u rət ⱪilmidi du’ayimni,

məndin haliy ⱪilmidi mənggülük muⱨəbbitini.

Bu munajat tarliⱪ sazlarda təngkəx ⱪilinip, nahxa ⱪilip eytilsun dəp, nəƣmiqilər bexiƣa tapxurulƣan.

¹Bizni bəhtlik ⱪilƣaysən Huda,

xəpⱪitingni kɵrsitip bizgə,

didaringning jilwilirini,

qeqip bizning üstimizgə. Selaⱨ

²Aləm ara məlum bolƣay sening yolung,

barqə əllər arisida nijatliⱪing.

³Mədⱨiyəligəy seni Huda ⱨəmmə həlⱪlər,

ⱨəmdusana oⱪuƣay sanga jimi millətlər.

⁴Barqə əlni bir ɵzüng yetəkləysən i Huda,

ⱨəm ularning üstidin adil ⱨɵküm qiⱪirisən i Huda,

xunga barliⱪ insanlar xadlinip alⱪix yangratⱪay sanga. Selaⱨ

⁵Mədⱨiyəligəy seni Huda ⱨəmmə həlⱪlər,

ⱨəmdusana oⱪuƣay sanga jimi millətlər.

⁶Yər-zemindin alduⱪ ⱨosulni,

Hudayimiz bəhtiyar ⱪildi bizni.

⁷Huda bizgə bəht ata ⱪilƣay,

barqə insan uningƣa ihlas ⱪilƣay.

Dawut yazƣan munajat bolup, nahxa ⱪilip eytilsun dəp, nəƣmiqilər bexiƣa tapxurulƣan.

¹Ⱨərikət ⱪilƣan bolsa idi Pərwərdigar,

düxmənliri tiripirən bolar idi.

Ɵqmənliri ⱨər tərəpkə ⱪaqar idi.

²Xamal uqurup kətkəndək is-tütəkni,

Huda jəzmən yoⱪ ⱪilidu rəzillərni.

Ⱨalak bolar rəzillər Huda aldida,

huddi momdək erigən otta.

³Ⱨəⱪⱪaniylar təntənə ⱪilip, huxal bolar,

Huda ⱨuzurida roⱨi urƣup, xadlinar.

⁴Hudaƣa ⱨəmdusana eytinglar,

namini küy-nahxiƣa ⱪetinglar.

U bulutlar üstididur, uluƣlanglar,^*

“Mənggü bar bolƣuqi – yaⱨ”dur uning nami.

Ⱨuzurida huxalliⱪⱪa qɵmünglar.

⁵Ata bolƣan yetimlarƣa,

igə qiⱪⱪan tul hotunlarƣa,

u Hudadur, makani muⱪəddəstur.

⁶Ɵy-uqaⱪliⱪ ⱪilar Huda ƣeriblarni,

azad ⱪilip, munbət yərgə baxlar sürgünlərni,

lekin, ⱪaƣjiraⱪ yərgə ⱪaldurar boysunmiƣanlarni.

^7-8I Sinay teƣida sɵzligən Huda,

i Isra’illarni talliƣan Huda,

zemin titrəp, yamƣur tɵkti asman baƣridin,

ɵz ⱪowmingni qɵllər ara baxlap mangƣiningda.

⁹I Huda, zemin wə bəndiliring üstigə,

hasiyətlik yamƣurungni yaƣdurdung.

Ⱨalsiriƣanda ularƣa ⱪuwwət bərding.

¹⁰Xəpⱪitinggə na’il bolƣan bəndiliring makan tutti,

ezilgən ⱪowming sening bərikitinggə erixti.

¹¹Pərwərdigar ƣəlibisini jakarlidi,

ⱪiz-ayallar top bolup, hux həwərni tarⱪatti:

¹²“Padixaⱨlar wə ularning ⱪoxunliri ⱪeqixti.”

Ɵydə olturƣan ⱪiz-ayallar oljilarni bɵlüxti.

¹³Bayliⱪ boldi ⱨəmmisigə bu oljilar,

bay boldi ⱨətta ɵy-makansiz padiqilar,

igə boldi yənə kümüx ⱪanatliⱪ,

altun pəylik kəptərlərgə ular.

¹⁴Ⱪadir Huda yat xaⱨlarni tiripirən ⱪilƣinida,

ⱪar yaƣⱪandək ⱨalət pəyda boldi Zalmon^* teƣida.

¹⁵Əy ⱨəywətlik Baxan teƣi,

qoⱪⱪiliring xunqə kɵp tehi,

¹⁶əy ⱨakawur Baxan teƣi,

neqün xunqə ⱨəsət bilən ⱪaraysən,

Huda makan ⱪilip talliƣan Si’on teƣiƣa –

Huda mənggü makan tutⱪan tursa uningda?

¹⁷Hudaning jəng ⱨarwiliri nurƣun, san-sanaⱪsiz,

Sinay teƣidin muⱪəddəs ibadəthaniƣa kirər Igimiz.

¹⁸Rəbbimiz sən yuⱪiriƣa qiⱪⱪiningda,

elip ketisən nurƣunliƣan əsirlərni.

Seliⱪ ⱪobul ⱪilisən insanlardin,

ⱨətta sanga ita’ətsizlik ⱪilƣanlardin,

Igəm Huda orun alisən Si’ondin.

¹⁹Mədⱨiyələr bolsun Igimizgə,

u ⱨər küni eƣirqiliⱪimizni kɵtürməktə,

Pərwərdigar nijatkardur bizgə. Selaⱨ

²⁰Pəⱪət bizning Rəbbimiz nijatkar Huda,

ɵlümdin ⱪutⱪuzux ⱪadir Igəmning ⱪolida.

²¹Bərⱨəⱪ, Huda kukum-talⱪan ⱪiliwetər düxmənlirining bexini,

qaⱪar yaman yolda mengiwərgənlərning uzun qaqliⱪ bexini.^*

²²Pərwərdigar mundaⱪ dedi:

“Düxmənlirimni ⱪayturup kelimən Baxan diyaridin,

elip qiⱪimən ularni dengizning qongⱪur yeridin.

²³Xuning bilən milinidu putliring ⱪanƣa –

düxmənliringning ⱪeniƣa,

ulardin alalaydu nesiwisini itliringmu.”

²⁴I Huda, sening zəpər ⱪədəmliring kɵrünməktə,

i Huda, mening padixaⱨim bolƣan Pərwərdigarim –

muⱪəddəs ibadəthaniƣa ketiwatⱪining kɵrünməktə.

²⁵Mangmaⱪta aldingda munajatqilar,

kəyningdə sazqilar.

Otturisida dapqi ⱪizlar.

²⁶Jama’ətlər ara alⱪix-sada yangritinglar Hudaƣa,

əy Isra’illar,^* mədⱨiyə oⱪunglar Pərwərdigarƣa.

²⁷Ənə u yərdə kiqik Binyamin ⱪəbilisi

ularƣa baxlamqi bolup mangmaⱪta.

Bardur ularning kəynidə səp tüzgən Yəⱨuda əmirliri,

xundaⱪla Zəbulunning ⱨəm Naftalining əmirliri.

²⁸I Huda, namayan ⱪilip ⱪudritingni,

ilgiri kɵrsətkəndək kɵrsətkin küqüngni.

²⁹Kelip Yerusalemdiki ibadəthanangƣa,

padixaⱨlar atar ⱨədiyələr sanga.

³⁰Tənbiⱨ bərgin ⱪomuxluⱪtiki axu yirtⱪuq ⱨaywanlarƣa,

buⱪilar baxlap mangidiƣan mozaylar kəbi yat əllərgə.

Yərgə urƣin bizdin kümüx-tənggə təmə ⱪilƣanlarni,

tarmar ⱪilƣin ⱨəm yat əllərdiki uruxhumarlarni.

³¹Misirdin mɵtiwər əlqilər kelər,

Üfiyopiyə Hudaƣa halis ⱨədiyə təⱪdim ⱪilar.

³²I jaⱨandiki padixaⱨliⱪlar,

Igimizgə mədⱨiyə nahxa eytinglar,

Rəbbimizni küyinglərgə ⱪetinglar. Selaⱨ

³³Ⱪədimdin bar bolƣan, asmanlarda yüridiƣan,

ⱪudrətlik awazida asman baƣrini yarƣan,

Igimizning xənigə küy-nahxilar eytinglar.

³⁴Jakarlanglar Pərwərdigarning ⱪudritini,

u yürgüzər Isra’il üstidin səltənətlik ⱨoⱪuⱪini,

namayan ⱪilar u ⱨəm samada küq-ⱪudritini.

³⁵Xəwkətliktur Huda muⱪəddəs ibadəthanisida.

Isra’illarni talliƣan Pərwərdigar,

ɵz ⱪowmiƣa küq-ⱪudrət ata ⱪilar.

Mədⱨiyələr oⱪulƣay Hudaƣa!

Dawut yazƣan munajat bolup, “nelupər” aⱨangida eytilsun dəp, nəƣmiqilər bexiƣa tapxurulƣan.

¹I Huda ⱪutⱪuzƣin meni,

su tumxuⱪumƣa yətti!^*

²Tegi yoⱪ patⱪaⱪⱪa petip kəttim,

kəlkündə ƣərⱪ bolup,

qongⱪurƣa qɵküp kəttim.

³Pəryad qekip ⱨalim kətti,

gallirim ⱪurup kətti,

təlmürüp Hudayimƣa

kɵzümning nuri kətti.

⁴Qeqimdin kɵptur mening,

səwəbsiz manga ɵqlər.

Ⱪara qaplar manga ular,

meni yoⱪatmaⱪqi bolƣanlar –

məndin küqlük düxmənlər.

Mən bulimiƣan nərsini,

ⱪayturup bər, dəydu ular.

⁵I Huda, nadanliⱪim sanga ayan,

mening yənə ⱪəbiⱨliklirim –

yoxurun əməs, sanga ayan.

⁶I Pərwərdigar –

ⱪudrətlik sərdar Huda,

mening səwəbimdin

ümidini sanga baƣlap kütkənlər

yərgə ⱪarap ⱪalmiƣay.

I Isra’illarni talliƣan Huda,

sanga təlpüngənlər,

mening səwəbimdin

xərməndə bolmiƣay.

⁷Ⱨaⱪarətləndim sən üqün Huda,

yüzüm qüxüp, ⱪaldim nomusta.

⁸Yat boldum tuƣⱪanlirimƣa,

yaⱪⱪa yurtluⱪ ataldim ⱪerindaxlirimƣa.

⁹Qünki muⱪəddəs ɵyünggə bolƣan muⱨəbbitim

urƣutidu huddi ottək mening ⱪəlbimni.

Sanga ⱨaⱪarət ⱪilƣanlarning ⱨaⱪarətlirimu,

basti ⱨəm mening üstümni.

¹⁰Mən roza tutup yiƣlisam

tɵwən tutup ɵzümni,

məshirə ⱪildi ular meni.

¹¹Matəm tutup, məyüslinip yürsəmmu ɵzüm,

mən ularning sɵz-qɵqikigə yənə ⱪaldim.

¹²Tənə ⱪildi xəⱨər ⱪowuⱪida olturƣanlar,

məyhorlarning nahxisiƣa tema boldum.

¹³Xundaⱪtimu du’a ⱪilimən tohtimay sanga,

mənggülük muⱨəbbət bolƣaq səndə,

haliƣan waⱪtingda, ixənqlik nijatliⱪingni

du’alirimƣa jawab ⱪilip, bərgin manga.

¹⁴Ⱪutⱪuz meni manga ɵq bolƣanlardin,

ⱪutⱪuz meni petip ⱪalƣan patⱪaⱪliⱪtin,

ⱪutⱪuz meni suning qongⱪur ⱪaynimidin.

¹⁵Ƣərⱪ ⱪilma meni kəlkün suliriƣa,

yutⱪuzmiƣin meni dengiz dolⱪuniƣa,

yəm ⱪilmiƣin meni təgsiz ⱨangƣa.

¹⁶I Pərwərdigar, manga ɵzüng jawab bərgin,

qünki mənggülük muⱨəbbiting əwzəl manga,

meⱨri qəksiz jamalingni kɵrsət Huda.

¹⁷Jamalingni mən ⱪulungdin yoxurmiƣin,

qünki eƣir kün qüxti mening beximƣa.

I Ilaⱨim, manga tezdin jawab bərgin.

¹⁸I Pərwərdigar, yeⱪinlaxⱪin manga,

halas ⱪilip düxmənlirimdin,

ⱪutⱪuzƣuqi bolƣin jenimƣa.

¹⁹Bilisən mening ⱪandaⱪ ⱨaⱪarətləngənlikimni,

rəswa bolup biⱨɵrmət ⱪalƣanliⱪimni,

sən bilisən mening barliⱪ rəⱪiblirimni.

²⁰Ⱪəlbimni zidə ⱪildi ⱨaⱪarətlər,

ⱪayƣu wə ⱨəsrətlərgə qɵmüldim.

Təlmürsəmmu ⱨesdaxliⱪ ⱪilarmu dəp birəri,

yaki təsəlli birərmu dəp birərsi,

birərsimu qiⱪmidi, yoⱪtur ⱨeqkim.

²¹Ular bərdi ozuⱪluⱪumƣa zəⱨərni,

ussuzluⱪumƣa buzulƣan xarabni.

²²Ziyapiti ɵzlirigə ⱪiltaⱪ bolƣay,

meⱨmanliri üqün ⱪapⱪan bolƣay.

²³Bəl-putliri madarsiz titrəp turƣay,

kɵzliri torlixip kor bolƣay.

²⁴Ƣəzipingni ularƣa qüxürgəysən,

ⱪəⱨringning otida kɵydürgəysən.

²⁵Makanliri ularning harab bolsun,

qedirliri qɵldərəp ⱪalsun.

²⁶Qünki ular tehimu ziyankəxlik ⱪilmaⱪta sən jazaliƣanlarƣa,

azab ⱪoxmaⱪta sən zəhimləndürgənlərning azabiƣa.

²⁷I Pərwərdigar, jaza ⱪoxⱪin ularning jazasiƣa,

ⱨəm adalətning nesiwisini bərmigin ularƣa.

²⁸Ɵqürüwətkin ⱨayatliⱪning dəptiridin ularni,

ⱨəm ⱨəⱪⱪaniylar ⱪatariƣa pütmigin ularni.

²⁹Biraⱪ ɵzüm dərd tarttim wə ezildim,

ⱪutⱪuz meni, panaⱨingƣa al Igəm.

³⁰Mədⱨiyələymən munajatta namingni,

uluƣlaymən xükür eytip seni.

³¹Bundaⱪ ⱪilix seni hursən ⱪilar,

bu sanga ɵküz təⱪdim ⱪilƣandin əwzəldur,

münggüzlük wə tuyaⱪliⱪ buⱪilardinmu əladur.

³²Ezilgənlər buni kɵrüp hux bolar,

Hudaƣa təlpüngənlər roⱨlinip ilⱨamlinar.

³³Qünki Huda ⱪulaⱪ salar moⱨtajlarning dərdlirigə,

etibarsiz ⱪarimas azab tartⱪan bəndilirigə.

³⁴Mədⱨiyəlisun asman-zemin Hudani,

mədⱨiyəlisun dengiz-okyan, janiwarlar ⱨəm uni.

³⁵Qünki Huda ⱪutⱪuzar Si’onni,

ⱪayta bina ⱪilar Yəⱨudiyə xəⱨərlirini.

U yər Hudaning həlⱪigə mənsup bolar,

ular xu zeminda ⱨəm makanlixar.

³⁶Huda ⱪullirining əwladliriƣa bu zeminni ata ⱪilar.

Hudani sɵygənlər bu yərlərdə makanlixar.

Dawut yazƣan hatirə munajiti bolup, nahxa ⱪilip eytilsun dəp, nəƣmiqilər bexiƣa tapxurulƣan.

¹I Pərwərdigar,

tezrək yardəm ⱪilip manga,

ⱪutⱪuz meni i Huda.

²Yüzi qüxüp xərməndə bolsun,

ⱨayatimƣa ⱪəst ⱪilƣanlar.

Rəswa bolup arⱪida ⱪalsun,

japayimdin xadlanƣanlar.

³Məshirə ⱪilip, külgənlər manga,

xərməndə bolup ⱪaytsun arⱪiƣa.

⁴Səndin huxal bolup, xadlansun,

ⱨəmmə təlpüngənlər sanga.

Nijatliⱪingni sɵygənlər,

desun da’im “uluƣdur Huda”.

⁵Mən bir biqarə, ⱨajətmən,

i Huda, tez kəlgəysən yenimƣa.

Sən mening mədətkarim, ⱪutⱪuzƣuqim,

i Pərwərdigar, ɵtünəy, ⱨayal bolma.

¹Pərwərdigar, sənla baxpanaⱨdursən manga,

meni yərgə ⱪaratmiƣin ⱪilip rəswa.

²Ⱪutⱪuzƣin meni ɵz ⱨəⱪⱪaniyliⱪingda,

ⱪutuldur meni ⱪulaⱪ selip aⱨlirimƣa.

³Ⱪoram taxtək panaⱨ bolƣin da’im manga,

sən mening teƣimdursən ⱪorƣan kəbi,

iradə ⱪilding meni ɵzüng ⱪutⱪuzmaⱪⱪa.

⁴Igəm meni azad ⱪilƣin rəzillərning ⱪolidin,

adalətsiz, rəⱨimi yoⱪ adəmlərning aliⱪinidin.

⁵Ɵzüng ümidimsən, i Pərwərdigar Hudayim,

yaxliⱪimdin tartip sən boldung tayanqim.

⁶Ⱨamilə waⱪtimdin baxlap sanga tayandim,

anamning ⱪorsiⱪidin sən ɵzüng qiⱪarding,

xundin buyan mədⱨiyəmni sanga atap kəldim.

⁷Kɵp adəmlər üqün nəmunə mən,

qünki sən ⱪudrətlik panaⱨimdursən.

⁸Aƣzimdin əsla qüxməs sanga ⱨəmdusanalar,

qüxməs xan-xəripingni alⱪixliƣan sadalar.

⁹Taxlap kətmigin meni ⱪerip ⱨalim ⱪalmiƣanda,

tərk ətmigin meni ⱪuwwitimdin ayrilƣanda.

¹⁰Qünki düxmənlirim meni ⱪəstlixip,

jenimni almaⱪ bolƣanlar birlixip,

¹¹deyixər: “Huda uni tərk ətti,

uni ⱪoƣlap tutayli,

ⱪutulduridiƣanlar yoⱪtur əmdi.”

¹²Məndin yiraⱪ kətmigin i Huda,

yardəmgə tezraⱪ kəlgin yenimƣa.

¹³Meni ⱪariliƣuqilar xərməndə bolup yoⱪ bolsun,

manga ⱪəst oyliƣanlar rəswa bolup jaⱪ toysun.

¹⁴Biraⱪ ɵzüm ümidsiz bolmaymən zinⱨar,

sanga bolƣan alⱪixlirim barƣanqə axar.

¹⁵Aƣzimdin qüxməs adaliting wə nijating,

əⱪlim yətməydiƣan axu ajayip ixliring.

¹⁶Ləbbəy bolup aldingda,

mədⱨiyələymən büyük ixliringni Rəbbim Huda,

jakarlaymən ⱨəⱪⱪaniy dəp pəⱪət senila.

¹⁷I Hudayim, bilmigənni sən bildürdüng yaxliⱪimdin,

karamətliringning jakarqisi bolup kəldim xu qaƣdin.

¹⁸Ⱪerip aⱪarƣanda ⱪara qaqlirim,

taxlap kətmə meni Ilaⱨim.

Bayan ⱪilay əwladlarƣa ⱪudritingni,

sɵzləp berəy məndin keyin kəlgənlərgə,

sening kɵrsətkən uluƣ mɵjiziliringni.

¹⁹Uluƣ karamətlərni ⱪilƣan təngdaxsiz Huda,

taⱪixar adaliting asman-pələkkə,

kimmu ⱪilalar bundaⱪ ixni ohxax sanga.

²⁰Manga azab-külpətlərni kɵrsətkining,

dəl gɵr aƣzidin meni tartip elip,

janlandurup yengi ⱨayatⱪa baxliƣining.

²¹Tehimu bək üstün ⱪilisən ⱨɵrmitimni,

yenimƣa kelip manga berisən təsəlli.

²²Ilaⱨim küyləymən seni qelip lira,

sadaⱪitinggə eytimən ⱨəmdusana,

sanga mənsup küylirim bar qiltarimda,

Isra’illarni talliƣan muⱪəddəs Huda.

²³Seni küylisəm təntənə ⱪilar ləwlirim,

xadlinar, sən ⱨɵr ⱪilƣan ⱪəlbim.

²⁴Tilim ⱨəmixə bayan əylər sening adalitingni,

qünki rəswa ⱪilip yiⱪitting xum niyəttə bolƣanlarni.

Sulayman yazƣan munajat

¹I Huda, padixaⱨⱪa^* ata ⱪilƣin adalitingni,

bərgin xaⱨning oƣliƣa^* ⱨəⱪⱪaniyitingni.

²U həlⱪing üstidin ⱨɵkümlərni adil qiⱪarƣay,

ajiz, yoⱪsul bəndilərgə ⱨəⱪⱪaniy bolƣay.

³Taƣlar elip kəlgəy həlⱪlərgə məmurqiliⱪ,

adaləttin edirlarmu bərgəy bayaxatliⱪ.

⁴Aⱪliƣuqi bolup padixaⱨ ezilgən mɵminlərgə,

ⱪutuldurƣay namratlarning balilirini

ⱨəm bitqit ⱪilƣay zalimlarni.

⁵I Huda, bəndiliring əwladtin-əwladⱪiqə ihlas ⱪilƣay sanga,

taki kün wə ay parlap turƣuqə asmanda.

⁶Yamƣur kəbi padixaⱨning ⱨɵkümrani,

yaxartⱪay yengidin orulƣan otlaⱪlarni,

yeƣin bolup suƣarƣay yər-zeminni.

⁷Ronaⱪ tapⱪay ⱨəⱪⱪaniylar uning zamanida,

tinqliⱪ bolƣay zeminda

taki ay nur berixtin tohtiƣiqə asmanƣa.

⁸U ⱨɵkümranliⱪ ⱪilƣay dengizdin okyanƣiqə,

Firat dəryasidin zeminning qetigiqə.

⁹Qɵl-bayawanda yaxawatⱪanlar tiz pükər uningƣa,

rəⱪibliri məƣlup bolar milinip topa-qangƣa.

¹⁰Uningƣa baj tapxurar Tarxix^* wə arallarning padixaⱨliri,

sowƣa təⱪdim ⱪilixar Xiba^* wə Sibaning^* xaⱨliri.

¹¹Barliⱪ padixaⱨlar uningƣa bax egər,

hizmitidə bolar barqə həlⱪlər.

¹²U ⱪutⱪuzar nalə ⱪilƣanlarni,

baxpanaⱨsiz ajizlarni,

mədətkari yoⱪ yoⱪsullarni.

¹³Iq aƣritar u ajiz, yoⱪsullarƣa,

panaⱨ bolar u ƣerib panaⱨsizlarƣa.

¹⁴U halas ⱪilar zulum wə zorawanliⱪtin ularni,

uning nəziridə ⱪimməttur ularning jeni.

¹⁵Yaxisun padixaⱨ!

Uningƣa Xibaning altunliri sowƣa bolƣay,

da’im du’alar ⱪilinip, künboyi bəht tiləngəy.

¹⁶Etizlarda zira’ətlər mol bolƣay,

edirlarda ⱨətta baxaⱪ ohxiƣay.

Ⱨosullar Liwan taƣliridiki ormanlardək ziyadə bolƣay,

xəⱨər aⱨaliliri yaylaⱪtiki qɵptək ronaⱪ tapⱪay.

¹⁷Nami uning mənggü ɵqmigəy,

ⱨər qaƣ ⱪuyax kəbi parliƣay,

bəht tapⱪay barliⱪ ⱪowmlar uningdin,

ⱨəmmə həlⱪlər uni bəhtlik dəp atiƣay.

¹⁸Təripləngəy Isra’illarni talliƣan Pərwərdigar,

barqə mɵjizə wə karamətlər igisi pəⱪət udur.

¹⁹Mənggügə təripləngəy uning nam-xəripi,

pütkül yər yüzini ⱪapliƣay xan-xəripi.

Amin, amin!

²⁰(Xuning bilən Yixayning oƣli Dawutning du’aliri tamam boldi.)

3-bɵlək

Asaf yazƣan munajat

¹Bərⱨəⱪ!

Meⱨribandur Huda Isra’illarƣa,

meⱨribandur Huda ⱪəlbi paklarƣa.

^2-3Rəzil wə ⱨakawurlarning

ronaⱪ tapⱪinini kɵrginimdə,

ⱨəsət ⱪildim ularƣa.

Kalwalixip putlirim,

putlixip yiⱪilay dedim xunga.

⁴Taki ɵlgüqə

yaxaydu ƣurbətsiz ular,

teni salamət, bədini məzmut bolar.

⁵Ular baxⱪilardək dərd tartmas,

ⱨəm balayi’apətkə ⱪalmas.

⁶Kibirlik boynidiki marjinidur,

zorawanliⱪ orunuwalƣan tonliridur.

⁷Kɵzliri semizliktin tompiyip qiⱪⱪan,

ⱪəlbigə əhmiⱪanə niyətliri tolup taxⱪan.

⁸Məshirə ⱪilar,

zəⱨərdək tilliri bilən sɵzləydu ular.

Məƣrurlinip,

“Zulum salimiz silərgə” dəp təⱨdit salar.

⁹Ərxkə ⱪarxidur ularning eƣizliri,

ⱪuruⱪ sɵzlər ⱨəmmə yərdə tilliri.

¹⁰Xunga həlⱪ ularƣa bək yüzlinər,

sudək iqip sɵzlirini yamanliⱪⱪa kirixər.

¹¹Dər rəzillər:

“Uluƣ Huda ⱨəmmini bilərmu?

Bilsə u ⱪandaⱪ bilər?”

¹²Yamanlar mana xundaⱪ rəzil bolar,

ular da’im raⱨəttə, bayliⱪ toplar.

¹³Ⱪəlbimni pak tutⱪinim biⱨudimu?

Gunaⱨsiz yaxax ⱨayatta bikarmidu?

¹⁴Nemə üqün künboyi azabtimən,

nemə üqün ⱨər səⱨərdə jazadimən.

¹⁵Əgər mən xundaⱪ oyda bolsam idim,

həlⱪinggə^* asiyliⱪ ⱪilƣan bolar idim.

¹⁶Mən bularni qüxinixkə tirixⱪanda

bular xunqə eƣir bilindi manga.

¹⁷Hudaning ibadəthanisiƣa kirximgə

qüxəndim,

nemilərning barliⱪini ularning təⱪdiridə.

¹⁸I Huda, dərwəⱪə,

teyilƣaⱪ yərlərgə ⱪoyisən ularni,

teyilip parə-parə bolar ular ahiri.

¹⁹Wəⱨimə iqidə yoⱪilar ular,

ⱨəm bir dəⱪiⱪidila parqə-parqə bolar.

²⁰Ularning ⱨayati qüxkə ohxar,

oyƣansila ⱨəmmisi yoⱪilar.

Ularni kɵzgə ilmaysən əsla,

i Rəbbim ornungdin ⱪozƣalƣanda.

²¹Iqim eqixar,

yürikim sanjilip aƣrar.

²²Qünki mən ⱨamaⱪət, nadan ikənmən,

aldingda goya angsiz ⱨaywan ikənmən.

²³Əmma mən ⱨəmixə seƣinimən seni,

i Huda ong ⱪolumdin tuttung meni.

²⁴Bilimən, nəsiⱨəting meni yetəklər,

ahiri xan-xərəpmu ⱪolumƣa kelər.

²⁵Səndin baxⱪa mədətkarim yoⱪtur ərxtə,

səndin baxⱪini istiməsmən ⱨəm yər yüzidə.

²⁶Tenim, ⱪəlbim zə’ipləxsə əgərdə,

ⱪuwwitidur Huda ⱪəlb, tenimning,

mənggülükkə nesiwəmdur u mening.

²⁷Xübⱨisizki,

ⱨalak bolar səndin yiraⱪ turƣanlar,

yoⱪ ⱪilisən ularni,

yoⱪilidu sanga wapasiz bolƣanlar.

²⁸Xunga dəymən əwzəldur yeⱪin turux Hudaƣa,

panaⱨ ⱪildim ⱨər zaman Pərwərdigarni ɵzümgə,

bayan ⱪilip Hudaning ⱪudritini ⱨəmmigə.

Asaf yazƣan tərbiyəwi munajat^*

¹Tərk ətting bizni neqün i Huda,

bizni xundaⱪ mənggü untup ⱪalamsən?

Sening ilkingdiki bizdək ⱪoyliringƣa

neqün ƣəzəp otliringni qaqisən?

²Bədəl tɵləp azad ⱪilƣan ⱪowmingni əskə alƣin,

mülküm bolsun dəp ⱪutⱪuzƣan ⱪəbiləngni əskə alƣin,

ɵzüng makan ⱪilƣan Si’on teƣini əskə alƣin.

³Kelip kɵrgin harab bolƣan muⱪəddəs jayingni,

düxmənlər urup-qeⱪip wəyran ⱪilƣan uningdiki nərsilərni.

⁴Rəⱪibliring dawrang selixti muⱪəddəs jayingda,

ƣəlibisigə təntənə ⱪilixti tuƣlirini ⱪadap unda.

⁵Ɵzlirini kɵz-kɵz ⱪilixti bu ⱨujumqilardək,

paltilirini oynitixti huddi orman kəsküqidək.

⁶Andin ular muⱪəddəs jayingƣa kirdi,

palta wə bolⱪa bilən nəⱪixlərni qeⱪixti.

⁷I Huda, ular muⱪəddəs jayingƣa ot ⱪoyuxti,

sanga ibadət ⱪilidiƣan jayni dəpsəndə ⱪilixti.

⁸Kɵngülliridə oylap ular “boysundurayli biz ularning ⱨəmmisini”,

kɵydürüwətti Hudaning zemindiki muⱪəddəs jaylirini.

⁹Karamətliring ƣayib boldi arimizdin,

pəyƣəmbərmu kətti yiraⱪ yenimizdin.

Ⱪaqanƣiqə dawam ⱪilar bu ixlar-ⱨə,

ⱨeqkim bilməs buni əgər sorap baⱪsang ⱨəmmisidin.

¹⁰Rəⱪibliring məshirə ⱪilar seni Huda ⱪaqanƣiqə?

Ⱨaⱪarətkə ⱪalarmu naming sening əbədkiqə?

¹¹Nemixⱪa tartiwalding ⱪolungni, eⱨ Huda ong ⱪolungni?

Ⱪolungni ⱪoyningdin elip Huda yoⱪatⱪaysən ularni!

¹²Əzəldin bizgə xaⱨ bolup kəlgəniding Huda,

ⱪazanƣanting ƣəlibilərni biz üqün zeminimizda.

¹³Küqüng bilən ikkigə bɵlgəniding dengiz süyini,

yarƣaniding uningdiki əjdiⱨalarning baxlirini.

¹⁴Qaⱪⱪaniding dengizdiki liwyatanning^* baxlirini,

bərgəniding qɵldiki ⱨaywanlarƣa ozuⱪ ⱪilip gɵxlirini.

¹⁵Bulaⱪ kɵzini eqip yərdin ⱨasil ⱪilƣanting eriⱪlarni,

ⱪurutⱪanting tohtimay eⱪiwatⱪan dəryalarni.

¹⁶Yaratting sən kün wə tün ⱨər ikkilisini,

orunlaxturdung ɵz orniƣa ay wə künni.

¹⁷Ayriding barliⱪ qegra-pasillarni,

pəyda ⱪilding ɵzüng yaz bilən ⱪixni.

¹⁸Esingdə tutⱪaysən i Pərwərdigar,

düxmənliringning məshirə ⱪilƣanlirini.

Untumiƣaysən i Pərwərdigar,

ⱨamaⱪət həlⱪning kɵzgə ilmiƣanlirini.

¹⁹Tutup bərmigin wəⱨxiy düxməngə panaⱨsiz bəndiliringni,

mənggü untumiƣin ezilgən mɵminliringning ⱨayatini.

²⁰Biz bilən tüzgən əⱨdəngni esinggə alƣin Huda,

zorluⱪ wə zombuluⱪlar yamrap kətti,

zemindiki ⱪarangƣuluⱪ ⱪapliƣan bulunglarda.

²¹Ezilgənlər yərgə ⱪarap ⱪalmisun,

ular sening namingƣa mədⱨiyələr oⱪusun.

²²Arimizƣa yenip kelip i Huda,

namingni ⱪoƣdiƣina ⱪaytidin.

Ⱨamaⱪət kixilərning ⱨər da’im

məshirə ⱪilƣanlirini qiⱪarmiƣin yadingdin.

²³Düxminingning quⱪanliri bolsun da’im esingdə,

tohtimidi ularning dawrangliri tehiqə.

Asaf yazƣan munajat bolup, “ⱨalak ⱪilmiƣaysən” degən aⱨangda eytilsun dəp, nəƣmiqilər bexiƣa tapxurulƣan.

¹Sanga xükür eytimiz i Huda, xükür eytimiz,

qünki sən yeⱪinsən bizgə,

bayan ⱪilimiz karamətliringni ⱨəmixə.

²Huda eytar: “Mən bekitkən waⱪitta,

soriⱪimni adaləttə soraymən.

³Tursimu gər yər-zeminlar təwrinip,

ɵzümdurmən ⱪoyƣuqisi anga tüwrük ornitip.” Selaⱨ

⁴Mən dəymən mahtanqaⱪⱪa: “Mahtanma”,

pasiⱪlarƣa: “Məƣrurlinip ƣadayma,

⁵ɵz küqüngdin kɵrəngləp,

tumxuⱪungni üxlap, po atma.”

⁶Qünki yüksilix kelər pəⱪətla Hudadin,

kəlməydu, xərⱪ, ƣərb yaki jənub, ximaldin.^*

⁷Bərⱨəⱪ, Pərwərdigar birdinbir sotqidur,

u birini əziz ⱪilisa, birini har ⱪilar.

⁸Qünki Pərwərdigarning ⱪolida bir ⱪədəⱨ bolar,

uningƣa aqqiⱪ, kɵpüklük xarab tolƣan bolar.

Ⱪaqanki Huda uni tɵksə zeminƣa,

pasiⱪlar duƣlirini ⱪoxup iqiwalar.

⁹Yaⱪuplarni talliƣan Huda ⱨəⱪⱪidə

mən mənggü guwaⱨliⱪ berimən,

ⱨəm uning namiƣa munajatlar eytimən.

¹⁰Horiki qong mahtanqaⱪlarning horikini kesiwetimən.^*

biraⱪ adil-ⱨəⱪⱪaniylarni xan-xərəpkə erixtürimən.

Bu Asaf yazƣan mungluⱪ munajat bolup, tarliⱪ sazlar təngkixidə eytilsun dəp, nəƣmiqilər bexiƣa tapxurulƣan.

¹Huda məxⱨurdur Yəⱨudiyə həlⱪigə,

nami büyüktur Isra’iliyə elidə.

²Turar jayi Si’ondidur,

muⱪəddəs qediri Salemdidur.^*

³U xu yərdə sundurdi düxmənning otluⱪ oⱪlirini,

qeⱪip taxlidi ⱪalⱪan, ⱪiliq wə barliⱪ jəng ⱪorallirini. Selaⱨ

⁴I Huda, xəriping parlaⱪ nurlar qaqar,

owƣa bay taƣlardinmu zor ⱨəywiting bar.

⁵Düxminingning baturliri bulang-talang ⱪilinƣanda,

ⱪol kɵrtürəlmidi ⱨətta birmu palwini,

tamam mənggülük uyⱪuƣa kətkənidi ⱨəmmisi.

⁶Gürkirəxliringdin Yaⱪup etiⱪad ⱪilip kəlgən i Huda,

at ⱨəm jəng ⱨarwiliri turup ⱪaldi urux məydanida.

⁷Ⱪorⱪuxⱪa tegixliktur pəⱪət səndinla, i Huda,

kimmu ɵzini tik tutalar ƣəzipingning aldida?

^8-9Ⱨɵküm elan ⱪilix üqün sən ornungdin turƣiningda,

yər-zeminni basti ⱪorⱪunq sükinati, i Huda.

Jakarliding ərx’əlada turup büyük ⱨɵkümüngni,

ⱪutⱪuzmaⱪ bolup jaⱨandiki barliⱪ ezilgənlərni. Selaⱨ

¹⁰Huda sening ƣəziping axurar xɵⱨritingni,

kəmər ⱪilip baƣliding belinggə ⱪəⱨringni.

¹¹Ada ⱪilinglar ⱪəsəm ⱪilƣanni Pərwərdigaringlarƣa,

sowƣa kəltürsun ⱪoxna əllər ⱪorⱪuxⱪa layiⱪ Hudaƣa.

¹²Əməldarlar kibrini Huda sundurar,

ⱪorⱪar uningdin barliⱪ padixaⱨlar.

Asaf yazƣan munajat bolup, “yidutun” aⱨangida eytilsun dəp, nəƣmiqilər bexiƣa tapxurulƣan.

¹Kɵtürimən Hudaƣa pəryadimni,

muⱪərrər anglar u mening zarimni.

²Muxəⱪⱪəttə Rəbbim sanga təlpündim,

keqiliri du’a ⱪilip ɵtündim,

təsəlligə erixmidi bu kɵnglüm.

³Aⱨuzar qəktim i Huda, seni seƣinip,

yoⱪitar boldum ɵzümni, seni yad eytip. Selaⱨ

⁴Sən jawab bərmigəq uyⱪusizdur kɵzlirim,

kɵngül bi’aramliⱪta gəpkə kəlməs tillirim.

⁵Yad etimən ɵtüp kətkən künlərni,

yiraⱪ ɵtmüxtiki güzəl qaƣlarni.

⁶U keqilər, eytⱪan munajatlirim bilən tolƣanidi,

ularni oylap, kɵnglümdə xundaⱪ so’allar pəyda boldi:

⁷Rəbbim meni mənggügə tərk etərmu?

Əmdi manga rəⱨim-xəpⱪət ⱪilmasmu?

⁸Ɵqməs muⱨəbbiti əmdi bizgə ɵqtimu?

Wədiliri mənggügə inawətsiz boldimu?

⁹Huda xəpⱪət ⱪilixni yaki untup ⱪaldimu?

Rəⱨimdillik ornini yaki ƣəzəp aldimu? Selaⱨ

¹⁰Andin mən dedim: “Meni əng azablaydiƣini xuki,

uluƣ Huda əmdi beximizni silimaydiƣan boldi.”

¹¹Yad etimən Igəm yardəmliringni,

ⱪədimdin buyanⱪi karamətliringni.

¹²Zaⱨir bolar əjirliring hiyalimda,

bizlər üqün ⱪilƣan ixliring dilimda.

¹³I Huda, sening yolung muⱪəddəstur,

uluƣluⱪing aləmdə yeganidur.

¹⁴Mɵjizilər igisi bolƣan Hudadursən,

ⱪudritingni insaniyətkə kɵrsətkənsən.

¹⁵Ⱪudritingdə ⱪutⱪuzdung ɵz həlⱪingni,

Yaⱪup bilən Yüsüpning əwladini. Selaⱨ

¹⁶I Huda, sular^* seni kɵrginidə

titrəp səndin ⱪorⱪⱪanidi.

Dengiz tegi lərzigə kəlgənidi.

¹⁷Ⱪara bulut kɵksidin sular tɵküp,

asmanmu ⱨəm güldürmama güldürlitip,

nur oⱪliring qaⱪmaⱪ qeⱪip etilƣanti.

¹⁸Ⱪuyunda güldürmamang güldürligənidi,

qaⱪmiⱪingdin jaⱨan nurƣa qɵmülgənidi,

alaⱪzadə bolup yərmu təwrigənidi.

¹⁹Sən dengizdin yol aqⱪaniding,

uluƣ sulardin ɵtüxkə imkan ⱪilding,

lekin əsla kɵrünməs idi izing.

²⁰Yetəkliding ⱪowmingni ⱪoy padisidək,

Musa wə Ⱨarunni ⱪilip sən ⱪoyqidək.

Asaf yazƣan tərbiyəwi munajat

¹Əy həlⱪim, ⱪulaⱪ salƣin təlimimgə,

zeⱨningni bər mening ⱨərbir sɵzlirimgə.

²Ⱨekmət bilən aqay mən aƣzimni,

bayan əyləp silərgə ɵtmüxtiki sawaⱪlarni.

³Bizgə eytip ⱪaldurƣan bularni əjdadimiz,

angliƣan wə bilgəntuⱪ bularni ulardin biz.

⁴Nəslimizdin yoxurmaymiz xunga ularni,

biz sɵzləp berimiz əwladlarƣa,

Hudaning xərəplik ixi wə ⱪudritini,

ⱨəm uning kɵrsətkən mɵjizilirini.

⁵Pərzlirini qüxürdi u Yaⱪup nəsligə,

ⱪanunlirini turƣuzdi u ⱨəm Isra’illarƣa.

“Balanglarƣa ɵgitinglar bularni” dəp,

əmr ⱪilƣanidi u əjdadimizƣa.

⁶Əwladlirimiz bularni qoⱪum bilgəy,

ⱨətta tuƣulmaⱪqi bolƣan balilarmu,

əwladmu-əwlad baliliriƣa ɵgətkəy.

⁷Yar-yɵlək ⱪilƣay ular Hudani,

ri’ayə ⱪilip uning əmrlirigə,

əjrini püküp kɵngüllirigə.

⁸Dorimisun ular əjdadlirini –

ularning ita’ətsiz, jaⱨilliⱪini.

Səmimiyətsizlik bolmisun dillirida,

sadaⱪətsizlik bolmisun ularda.

⁹Oⱪyaliⱪ bolsimu Əfrayim nəsli,

jəngdə arⱪiƣa burulup ⱪaqti.

¹⁰Ular Hudaning əⱨdisigə boysunmidi,

ⱨəm uning ⱪanuni boyiqə mangmidi.

¹¹Untuƣandur ular Hudaning ixlirini,

yənə uning kɵrsətkən mɵjizilirini.

¹²Misirdiki Zo’an dalalirida,

kɵrsitilgənidi mɵjizə əjdadlirimizƣa.

¹³Dengizni yerip ularni ɵtküzgənidi,

suni ⱪiya kəbi tik turƣuzƣanidi.

¹⁴Kündüzi yetəklisə ularni bulut bilən,

keqisi yol baxliƣanidi Otning nuri bilən.

¹⁵U qɵldə taxni yerip su qiⱪarƣanidi,

süyini dengiz kəbi mol ⱪilƣanidi.

¹⁶Taxlardin etilip qiⱪip sular,

aⱪⱪanidi dərya kəbi ular.

¹⁷Əmma qɵldə isyan kɵtürdi uluƣ Hudaƣa,

xuning bilən patti ular yənə eƣir gunaⱨⱪa.

¹⁸Ular ⱪəstən sinap Hudani,

nəpsi üqün tələp ⱪildi ta’amni.

¹⁹Degənidi ular ⱨaⱪarət ⱪilip Hudaƣa:

“Salalamdu dastihan muxu qɵl-dalaƣa?”

²⁰Dərwəⱪə, u uruwidi taxni,

sular bulaⱪtək etilip qiⱪti.

“Əmdi u bizgə nan bilən

gɵxni berələmdu?” deyixti.

²¹Anglap buni Pərwərdigar ƣəzəpləndi,

Yaⱪup nəsligə ƣəzəp oti qüxti,

ⱪəⱨri uning Isra’il nəsligə təgdi.

²²Ixənmidi ular Hudaƣa,

tayanmidi uning nijatliⱪiƣa.

²³Biraⱪ Huda əmr ⱪilip yənə asmanƣa,

buyrudi ərxning dərwazisini eqixⱪa.

²⁴Yeməkliki üqün kɵktin yaƣdurdi manna,

demək, ərx yeməklikini bərdi ularƣa.

²⁵Insanlar pərixtilərning nenini yedi,

Huda ata ⱪilƣaq buni, ular toydi.

²⁶Huda kɵktə uqurdi xərⱪ xamilini,

yetəkləp kəldi jənub xamilini.

²⁷Qang-tozandək yaƣdurdi gɵxlərni ularƣa –

ⱪuxlarni ⱪondurdi saⱨildiki ⱪumlar kəbi ətrapiƣa.

²⁸U yaƣdurdi bularni bargaⱨlirining otturisiƣa,

qüxürdi qedirlirining ətrapiƣa.

²⁹Ular yedi haliƣanqə, toydi ⱪorsaⱪliri,

boldi ijabət ularning Hudadin tiligənliri.

³⁰Lekin nəpsi ularning tehi toymay turupla,

qaynawatⱪan gɵxliri eƣizlirida turƣandila,

³¹ƣəzipi kelip Hudaning ularƣa,

ⱪiriwətti ularning əng jəsur palwanlirini,

Isra’illarning yaramliⱪ yax yigitlirini.

³²Kɵrdi xunqə kɵp kɵrgülükni, lekin towa ⱪilmidi,

kɵrdi xunqə kɵp mɵjizilərni, lekin anga ixənmidi.

³³Xunga Huda ⱨayatini ularning

ahirlaxturdi mənisizlik iqidə,

ɵtti yilliri dəkkə-dükkidə.

³⁴Ɵlüm kəlgəndə ular əskə aldi Hudani,

towa ⱪilip ihlas bilən izdəxkə baxlidi uni.

³⁵Oylidi ular “ⱪoram taxtək baxpanaⱨimiz –

uluƣ Huda – ⱪutⱪuzƣuqi, nijatkarimiz.”

³⁶Lekin ularning mahtaxliri eƣizda idi,

tillirida degənliri yalƣan idi.

³⁷Hudaƣa sadiⱪliⱪ yoⱪ idi kɵngülliridə,

xunga əməl ⱪilmaytti tüzgən əⱨdisigə.

³⁸Biraⱪ Huda yənila rəⱨimdil bolƣaq,

gunaⱨlirini kəqürüp, yoⱪatmidi ularni,

ⱪayta-ⱪayta besiwaldi ƣəzipini,

ⱨəm tɵkmidi ⱪəⱨrining ⱨəmmisini.

³⁹Əslidi u ularning insanliⱪini,

nəpəs kəbi kətsə ⱪaytip kəlməydiƣanliⱪini.

⁴⁰Biraⱪ ular isyan ⱪilƣaq qɵldə talay ⱪetim,

azar yəp dili Hudaning, boldi kɵngli yerim.

⁴¹Ular ⱪaytidin yoldin qiⱪip sinap Hudani,

zedə ⱪildi Isra’illar etiⱪad ⱪilip kəlgən

muⱪəddəs Hudaning yürikini.

⁴²Untudi ular Hudaning küq-ⱪudritini,

əstin qiⱪirip yawdin ⱪutuldurƣan künini.

⁴³Untudi ular Hudaning Misirdiki mɵjizilirini,

Zo’an tüzlənglikidə kɵrsətkən karamətlirini.

⁴⁴Ⱪanƣa aylandurup ⱪoyƣaq Huda dəryasini ularning,

iqmək mumkin bolmidi sulirini dəryaning.

⁴⁵Nəxtərlik qiwin apiti pəyda ⱪildi ularƣa,

paⱪilarni əwətti zeminini harab ⱪilarƣa.

⁴⁶Etizliri uqridi qekətkilər ⱨujumiƣa,

ⱨosullirining ⱨəmmisi yəm boldi ularƣa.

⁴⁷Wəyran boldi mɵldürdə üzümzarliri,

üxxüp ⱪaldi soƣuⱪta ənjürliri.

⁴⁸Mɵldür tegip wəyran boldi ⱪoy-kaliliri,

kɵyüp kətti qaⱪmaⱪ soⱪup qarwa-malliri.

⁴⁹Ⱪəⱨr-ƣəzəp, külpət, nəprət yaƣdi Hudadin,

kəldi bu bir türküm buzƣunqi pərixtilər ərxtin.

⁵⁰Ƣəzipi qəkkə yetip Hudaning,

jenini ayimaⱪ bolup ularning,

waba kesəl əwətti ularƣa.

⁵¹Pərwərdigar ɵltürüwətti Misirda barliⱪ tunji balilarni,

yəni Ⱨam^* qedirining ƣururi bolƣan tunji oƣullarni.

⁵²U həlⱪini pada kəbi baxlap mangdi qopan bolup,

qɵl-bayawan, jəziridə padisiƣa ⱪoyqi bolup.

⁵³Aman-esən ⱪilƣaq Huda ularni,

ⱪorⱪunqtin haliy mangdi yolini,

ƣərⱪ ⱪildi dengizƣa düxmənlirini.

⁵⁴Huda yetəklidi ularni muⱪəddəs zeminiƣa,

elip kəldi ong ⱪolida erixkən teƣiƣa.

⁵⁵Huda ⱪoƣliwetip u yərdin yat əllərni,

Isra’illarƣa bɵlüp bərdi yərlirini.

Isra’il ⱪəbilisigə elip bərdi ɵylirini.

⁵⁶Əmma ular ita’ətsizlik ⱪilip,

sinap kɵrdi uluƣ Hudani,

tərk ətti uning pərzlirini.

⁵⁷Əjdadliridək yoldin teyip wapasizliⱪ ⱪildi ular,

ixənqsizliktə huddi egilip kətkən yaƣa ohxar.

⁵⁸Egizliktə ⱪurup ibadətgaⱨlar,

yasap uningƣa ⱨərhil butlar,

kəltürdi ular Hudaning aqqiⱪini,

ɵrtidi Hudaning yürikini.

⁵⁹Buni kɵrüp ƣəzəpləndi Pərwərdigar,

rət ⱪilindi xu ⱨaman Isra’illar.

⁶⁰Tərk ətti u yənə Xilodiki^* makanini,

insanlar arisiƣa tikkən qedirini.

⁶¹Ⱪudritini^* tapxurdi u əsirlikkə,

xɵⱨritini^* bərdi ⱨəm düxmənlərgə.

⁶²Taxlap bərdi ɵz ⱪowmini ⱪiliq astiƣa,

qaqti ⱨəm ƣəzipini ular bexiƣa.

⁶³Otta kɵydi ularning ⱪiran yigitliri,

nahxa-küysiz ⱪaldi bərna ⱪizliri.

⁶⁴Yiⱪilsimu roⱨaniyliri tiƣ aldida,

tul ⱪalƣan ayalliri tutalmidi ⱨaza.

⁶⁵Bu qaƣ Igəm uyⱪudin oyƣanƣan adəm kəbi,

xarabning küqi bilən roⱨlanƣan batur kəbi.

⁶⁶Məƣlup ⱪilip qekindürdi rəⱪiblirini,

mənggügə rəswa ⱪilip ularni.

⁶⁷Huda rət ⱪilip Yüsüp qedirini,

tallimastin Əfrayim ⱪowmini,

⁶⁸bəlki tallidi Yəⱨuda ⱪowmini,

yəni ɵzi sɵygən Si’on teƣini.

⁶⁹Ⱪuruldi muⱪəddəs ibadətgaⱨ asman-pələk,

məzmut wə əbədiydur asman-zemin yaralƣandək.

⁷⁰Pərwərdigar tallap Dawutni,

qaⱪiriwaldi ⱪoy ⱪotinidin uni.

⁷¹Yəni beⱪixtin saƣliⱪ ⱪoylarni,

qaⱪirdi beⱪixⱪa Yaⱪup ⱪowmini –

ɵzigə mənsup bolƣan Isra’illarni.

⁷²Baⱪti Dawut ularni kɵngül ⱪoyup,

yetəklidi xundaⱪla maⱨir bolup.

Asaf yazƣan munajat^*

¹I Huda, yat əllər besip kirdi zeminingƣa,

ular bulƣap muⱪəddəs ibadəthanangni,

harabigə aylandurdi Yerusalemni.

²Asmandiki ⱪuxlarƣa yəm ⱪildi ular,

ⱪulliringning jəsətlirini.

Taxlap bərdi daladiki ⱨaywanlarƣa,

mɵmin bəndiliringning ətlirini.

³Yerusalemda dərya ⱪilip eⱪitti ular,

həlⱪingning ⱪanlirini.

Birər tirik jannimu ⱪaldurmidi ⱨətta,

kɵmgili jəsətlirini.

⁴Ⱨaⱪaritigə ⱪalduⱪ ⱪoxna əllərning,

məshirə nixani bolduⱪ ularning.

⁵I Pərwərdigar, ƣəziping ⱪaqanƣiqə, mənggügimu?!

Ot bolup yanƣan ƣəziping besilarmu?

⁶Ⱪəⱨringni qaq seni tonumiƣan əllərgə,

wə sanga etiⱪad ⱪilmiƣan səltənətlərgə.

⁷Qünki ular wəyran ⱪildi Yaⱪupning nəslini,

haniwəyran ⱪilip uning makanini.

⁸Bizdin alma soriⱪini gunaⱨ ⱪilsa əjdadimiz,

bizgə tezraⱪ rəⱨim ⱪilƣin,

bəkmu naqar qünki bizning əⱨwalimiz.

⁹I nijatkarimiz Pərwərdigar,

xɵⱨriti üqün namingning,

bolƣin bizgə mədətkar.

Kəqürgəysən gunaⱨimizni,

naming üqün ⱪutⱪuzƣin bizni.

¹⁰“ⱪeni ularning Hudasi” dəp,

yat əllər mazaⱪ ⱪilsa bolamdu?

Ⱪirƣin ⱪilƣan tursa ular ⱪulliringni,

kɵrsət bizgə ularni jazaliƣanliⱪingni.

¹¹Əsirlərning aⱨ-zarlirini angliƣaysən,

ɵlümgə buyrulƣanlarni ⱪudritingdə saⱪliƣaysən.

¹²I Igəm,

sanga ⱪilƣan ⱨaⱪaritini ⱪoxna əllərning,

yəttə ⱨəssə axurup ɵzigə bər ularning.

¹³Biz sening ɵz ⱪowming, ⱪoy padangdurmiz,

sanga mənggü ⱨəmdusana-xükür eytimiz,

mədⱨiyəmizni əwladtin-əwladⱪiqə dawam etimiz.

Bu Asaf yazƣan munajat bolup, “guwaⱨliⱪ nelupəri” degən aⱨangda eytilsun dəp, nəƣmiqilər bexiƣa tapxurulƣan.

¹I Isra’illarƣa ⱪoyqi bolup yol baxliƣuqi,

Yüsüp nəslini ⱪoy padisidək yetəkligüqi,

kerublar^* otturisida təhttə olturƣuqi,

ɵtünəy, bizgə ⱪulaⱪ salƣin,

xan-xərəplik nurungni qaqⱪin.

²Əfrayim, Binyamin wə Manassə ⱪəbililirimizdə,

kɵrsitip ⱪudritingni, ⱪutⱪuzƣin bizni.

³Ⱪayta güllət bizni i Huda,

kɵrsətkin bizgə didaringni,

xunda taparmiz nijatliⱪni.

⁴I Pərwərdigar – Ⱪudrətlik Sərdar Huda,

ƣəzipingdin ⱪobul kɵrməy du’ayimizni,

ⱪaqanƣiqə rət ⱪilarsən bizlərni?

⁵Ⱪayƣu bərding nan orniƣa yeyixkə,

qelək-qelək yaxni bərding iqixkə.

⁶Ⱪilding ⱪoxna əllərgə bizni talixix nixani,

düxmənlirimiz ɵz’ara məshirə ⱪilixar bizni.

⁷I Ⱪudrətlik Sərdar Huda,

ⱪayta güllət bizni,

kɵrsətkin bizgə didaringni,

xunda taparmiz nijatliⱪni.

⁸Misirdin elip kəlding bir tüp üzüm kɵqiti,^*

yat əllərni ⱪoƣlap ɵzüng tikting uni.

⁹Zemin təyyar ⱪilip bərding u kɵqətkə,

yiltiz tartip kəng yeyildi zeminƣa.

¹⁰Taƣlar ⱪaldi uning sayisi tegidə,

kedir dərəhliri ⱪaldi xahliri astida.

¹¹U uzartti xahlirini ta dengizƣiqə,

notilirini Firat dəryasiƣiqə.

¹²Neqün buzup uning ⱪaxasini,

yoldin ɵtkənlərgə berisən mewisini?

¹³Ormandiki yawa tongguz uni harab ⱪilmaⱪta,

daladiki ⱨaywanatlar uningdin ozuⱪlanmaⱪta.

¹⁴I Ⱪudrətlik Sərdar Huda,

ⱪayta kəlgin yenimizƣa.

Samadin nəzər selip üzümzarliⱪⱪa,

ƣəmhorluⱪ ⱪilƣin üzüm talliriƣa.

¹⁵Ong ⱪolungda ɵstürgən yiltizƣu bu,

u ɵzüng üqün qong ⱪilƣan oƣlung idiƣu.

¹⁶Mana u kesiwetildi, kɵydürüldi otta,

ⱨalak bolmaⱪta ƣəzəplik beⱪixingda.

¹⁷Ⱪanat astingƣa alƣaysən ɵzüng talliƣanni,

aman ⱪilƣaysən ɵzüng üqün ɵstürgənni.

¹⁸Bizlər ⱨərgiz səndin ayrilmaymiz xunda,

güllətkin bizni, ibadət ⱪilimiz sanga.

¹⁹I Pərwərdigar – Ⱪudrətlik Sərdar Huda,

ⱪayta güllət bizni,

kɵrsətkin bizgə didaringni,

xunda taparmiz nijatliⱪni.

Bu Asaf yazƣan munajat bolup, nəƣmiqilər bexiƣa “gittif”ta^* qelinsun dəp tapxurulƣan.

¹Küq-ⱪuwwitimiz bolƣan Hudaƣa,

xadliⱪta mədⱨiyələr oⱪunglar.

Yaⱪup etiⱪad ⱪilip kəlgən Hudani

hux bolup küy-nahxiƣa ⱪetinglar.

²Qiltar, dap, mungluⱪ lirani elip ⱪolunglarƣa,

mədⱨiyə nahxanglarni təngkəx ⱪilip eytinglar.

³Yengi ay tuƣⱪanda wə ay tolƣanda,

bayram ⱪilip burƣilarni qelinglar.

⁴Bu Isra’illarƣa qüxkən bir pərmandur,

Yaⱪup etiⱪad ⱪilƣan Hudaning ⱨɵkümidur.

^5-6Yüsüp nəslini Misirdin qiⱪⱪan waⱪtida,

buni Isra’illarƣa ⱪanun ⱪilip bekitkəndur.

mən natonux bir awazni anglidim:

“Uning mürisini yüktin bikar ⱪildim,

ⱪollirini sewəttin azad ⱪildim.

⁷Ⱪistangqiliⱪta nida ⱪilsang,

mən seni ⱪutuldurdum.

Ⱪara bulutlar arisidin sanga jawab bərdim,

Miribada^* aⱪⱪan su boyida seni sinidim. Selaⱨ

⁸Tingxa həlⱪim, ⱪulaⱪ sal əy Isra’illar!

Mən silərni agaⱨlanduray:

⁹Zemininglarda yat ilaⱨlarƣa orun bərmənglar,

ⱨəm ularƣa bax ⱪoyup, səjdə ⱪilmanglar.

¹⁰Silərni Misirdin elip qiⱪⱪan

Pərwərdigaringlar məndurmən.

Eƣizinglarni aqsanglar,

bərikətkə toldurimən.

¹¹Biraⱪ həlⱪim sɵzümni anglimidi,

Isra’il həlⱪi manga boysunmidi.

¹²Xunga mən ⱪoyuwəttim ularni ɵz tərsaliⱪiƣa,

mengiwərdi dəssəp ular ɵzi haliƣan yollarƣa.

¹³Həlⱪim sɵzümgə ⱪulaⱪ salsa idi,

Isra’illar mən baxliƣan yolda mangsa idi.

¹⁴Düxmənlirini ularning tezla bax əgdürər idim,

rəⱪiblirigə ⱪudritimni bildürüp ⱪuyar idim.

¹⁵Xunda, manga ɵqmənlər ⱪorⱪup boysunar idi,

ular ⱨəmixə xərməndiliktə ⱪalar idi.

¹⁶Silərni buƣdayning əng esilida baⱪar idim,

taxtin ⱨəsəl qiⱪirip təxnaliⱪinglarni ⱪandurar idim.”

Asaf yazƣan munajat

¹Huda bax bolup olturup ərxtiki məjlistə,

dəydu mundaⱪ ⱨɵkümdarlarƣa:

²“Naⱨəⱪ ⱨɵküm qiⱪirisilər ⱪaqanƣiqə?

Rəzillərgə yan basisilər nə qaƣⱪiqə? Selaⱨ

³Yetim-yesir, namratlarƣa kɵrsitinglar adalətni,

aⱪlanglar ezilgənlər wə ajizlarni.

⁴Miskin wə yoⱪsullarni ⱪutⱪuzunglar,

rəzillərdin ularni azad ⱪilinglar.

⁵Nadan wə bilimsizdur ularning ⱨəmmisi,

mangar ular zulmət ara, təwrər yərning ulliri.

⁶Degənidim silərgə: silər ‘ilaⱨlar’,

ⱨəmminglar uluƣ Hudaning ‘pərzəntisilər’!

⁷Lekin silərmu baxⱪa bəndilərdək ɵlisilər,

huddi barliⱪ ⱨɵkümranlardək tügəysilər.”

⁸Soraⱪ ⱪilƣin yər yüzigə kelip i Huda,

qünki pütkül həlⱪlər təwədur sanga.

Asaf yazƣan munajat

¹Ün qiⱪarmay jimip ⱪalma i Huda,

süküt ⱪilip yoⱪap kətmə i Huda.

²Qünki sanga ɵq bolƣanlar

bax kɵtürüp qiⱪmaⱪta.

Sanga düxmən bolƣanlar

xunqə dawrang salmaⱪta.

³Ular ⱪuwluⱪ ixlitip,

suyiⱪəst ⱪilar həlⱪinggə.

Ⱪarxi pilan tüzüxər,

sən ⱪədirligənlərgə.

⁴Dəydu ular:

“Yürünglar, barqə ⱪowm ⱪataridin yoⱪ ⱪilayli Isra’illarni,

elinmisun ikkinqi eƣizimizƣa ularning nami.”

⁵Ular birgə məsliⱨətlər ⱪilixmaⱪta,

sanga ⱪarxi ittipaⱪmu tüzüxməktə.

⁶Mana, Idomluⱪlar, Isma’ilning nəsilliri,

Mo’abliⱪlar wə Ⱨagrilar,

⁷Gibal, Ammon wə Amalək,

Filistiyə ⱨəmdə Tir aⱨaliliri,

⁸Assuriyəmu ularƣa ⱪoxuldi,

ular Lut oƣulliriƣa

yar-yɵlək bolup kəlgənidi. Selaⱨ

⁹I Huda, sən Midyanliⱪlarƣa

Ⱪixon dəryasida Sisira wə Yabinƣa

ⱪandaⱪ taⱪabil turƣan bolsang,

xundaⱪ taⱪabil turƣin ularƣa.

¹⁰Ular Endor yezisida ⱪirilƣanidi,

tənliri tezək kəbi oƣutⱪa aylanƣanidi.

¹¹Ⱨalak ⱪilƣaysən ularning

bəglirini Oreb wə Zi’ebtək,^*

əmirlirini Zəbah ⱨəm Zalmunnadək.^*

¹²Qünki ular mundaⱪ degənidi:

“Ɵzimizning mülki ⱪiliwalayli

Hudaning qimən-yaylaⱪlirini.”^*

¹³I Ilaⱨim, sərsan ⱪiliwət ularni

boranda ⱪalƣan ⱪamƣaⱪtək.

Soruwətkin ularni

xamalda ⱪalƣan samandək.

¹⁴Kɵydürüwətkin ularni –

otⱪa ohxax ormanliⱪⱪa tutaxⱪan,

yalⱪun kəbi taƣ baƣriƣa yamaxⱪan.

¹⁵Ⱪoƣliwətkin ularni borining bilən,

wəⱨimə sal ularƣa ⱪuyunung bilən.

¹⁶Qüxürgin nomusta yüzini, i Pərwərdigar,

taki yardəm soriƣiqə seningdin ular.

¹⁷Ⱪara yüz bolƣay ular nomustin,

rəswa bolup yoⱪalƣay zemindin.

¹⁸Ular bilsunki, pəⱪət Pərwərdigar^*

pütkül jaⱨanda əng büyük turar.

Koraⱨning əwladliri yazƣan munajat bolup, “gittif”ta^* orunlansun dəp, nəƣmiqilər bexiƣa tapxurulƣan.

¹Nəⱪədər əzizdur uqrixix jaying,

i Pərwərdigar – Ⱪudrətlik Sərdar.

²Seƣinip xunqilik boldum mən təxna,

i Igəm ibadəthanining ⱨoyliliriƣa.

Bolmaⱪta ⱪəlbim wə jismim xunqə intizar,

ⱨayatliⱪ buliⱪi bolƣan birdinbir Hudaƣa.^*

³Manga xaⱨ bolƣan i Ⱪudrətlik Sərdar Huda,

ⱪurbanliⱪ supangning ətrapliriƣa,

ⱨətta ⱪuxⱪaqlar saldi uwa,

ⱪarliƣaqmu jay tapti balilirini beⱪixⱪa.

⁴Nəⱪədər bəhtlik ibadəthanangda bolƣanlar,

tohtimastin sanga ⱨəmdusana oⱪuwatⱪanlar. Selaⱨ

⁵Nəⱪədər bəhtlik səndin küq-ⱪudrət tapⱪanlar,

ⱪəlbidin Si’onni tawap ⱪilixⱪa intizar bolƣanlar.

⁶Yiƣa-zar ⱪapliƣan ⱪurƣaⱪ jilƣidin ɵtkəndə ular,

u yərni bulaⱪliⱪ makanƣa aylandurar,

u yər küz yamƣurliri bilən bərikətlinər.

⁷Mangƣanseri ular ⱪuwwət üstigə ⱪuwwət tapar,

Si’onƣa yetip berip, Hudaning ⱨuzurida ⱨazir bolar.

⁸I Pərwərdigar – Ⱪudrətlik Sərdar Huda,

ⱪulaⱪ salƣin du’alirimƣa.

Tingxiƣin iltijayimni,

i Yaⱪupni talliƣan Huda. Selaⱨ

⁹Ilaⱨim, kɵngül bɵlgin ⱪalⱪinimiz padixaⱨⱪa,

nəziringni bər ɵzüng talliƣiningƣa.

¹⁰Bərⱨəⱪ, ibadəthanangda^* ɵtkən bir kün,

əwzəldur baxⱪa yərdə ɵtkən ming kündin.

Əla bilimən Huda ɵyining bosuƣisida turuxni,

rəzillərning raⱨət-paraƣətlik ɵyidə yaxaxtin.

¹¹Bizgə ⱪuyax, ⱪalⱪandur Pərwərdigar Igimiz,

ata ⱪilar u xan-xɵⱨrət wə xapa’ət.

Durus yolda mangƣanlardin,

ayimas yahxiliⱪini ta’əbəd.

¹²I Pərwərdigar – Ⱪudrətlik Sərdar,

bəhtliktur sanga tayanƣanlar.

Koraⱨning əwladliri yazƣan munajat bolup, nahxa ⱪilip eytilsun dəp, nəƣmiqilər bexiƣa tapxurulƣan.

¹Nəziring təgkən zeminƣa iltipat əyləp i Igəm,

ⱪayta gülləp-yaxnatⱪaniding yurtini Yaⱪupning.

²Əpu ⱪilip ⱪilmixini həlⱪingning,

kəqürgəniding gunaⱨlirini ularning. Selaⱨ

³Aqqiⱪingni yutuwetip iqinggə,

ottək yanƣan ⱪəⱨringni basⱪaniding.

⁴Bizgə nijatliⱪ berip kəlgən i Huda,

bizgə bolƣan aqqiⱪingƣa ⱨay berip,

alƣin bizni ⱪaytidin ɵz meⱨringning ⱪoyniƣa.

⁵Bizgə Huda əbədiy ƣəzəplinip turamsən?

Ƣəzipingni əwladtin-əwladⱪiqə sozamsən?

⁶Xadlinixi üqün səndin həlⱪingning

bizni ⱪayta gülləndürüp ⱪoymamsən?

⁷Bizgə bərgin mənggülük muⱨəbbitingni,

ata ⱪilƣin bizgə ⱨəm nijatliⱪingni.

⁸Ⱪulaⱪ salay Hudaning sɵzlirigə,

hatirjəmlik, amanliⱪ beridu Igəm

ɵz həlⱪi wə təⱪwadarliriƣa,

mangmisun dəp hata yolda ular yənə.

⁹Xundaⱪ, ihlasmənlərni ⱪutⱪuzar Huda,

zaⱨir bolup xan-xəripi zeminimizda.

¹⁰Hudaning mənggülük muⱨəbbiti wə sadaⱪiti

elip kelər ⱨəⱪⱪaniyliⱪ wə amanliⱪni.

¹¹Wapadarliⱪ zeminda məwjut bolar,

ⱨəⱪⱪaniyliⱪ ərxlərdin baⱪar.

¹²Pərwərdigar bərikət ata ⱪilar,

yərlirimiz qoⱪum ⱨosulluⱪ bolar.

¹³Ⱨəⱪⱪaniyliⱪ, əlqisi bolup Hudaning,

kelər aldida yol ⱨazirlap Pərwərdigarning.

Dawutning du’asi

¹Biqarə wə moⱨtajdurmən, i Rəbbim Huda,

nidayimƣa ⱪulaⱪ selip jawab bərgin manga.

²Sanga sadiⱪ bəndəngning saⱪlap ⱪalƣin jenini.

Ⱪutⱪuzuwalƣin, pəⱪətla sanga tayanƣan ⱪulungni.

Qünki sənla birdinbir mening Hudayimsən.

³I Rəbbim, iltipat əyligin manga,

ⱪilmaⱪtimən künboyi iltija sanga.

⁴Mən peⱪir ⱪulungning kɵnglini bir xad ⱪilƣina,

qünki mən seƣinip du’a ⱪilimən sanga.

⁵I Rəbbim, bərⱨəⱪ sən meⱨriban wə əpuqan,

meⱨring qəksiz, iltija ⱪilƣanlarƣa ⱨər ⱪaqan.

⁶I Pərwərdigar, kɵngül bɵlgin mening du’ayimƣa,

ⱪulaⱪ salƣin xəpⱪət soriƣan iltijayimƣa.

⁷Seƣinimən Rəbbim seni kün qüxkəndə beximƣa,

qünki sən jawab berip kəlding manga da’ima.

⁸Yeganisən i Rəbbim ƣəyriy ilaⱨlar^* aldida,

uluƣ ixni ⱪilƣuqi pəⱪət bir ɵzüngla.

⁹Sən yaratⱪan barliⱪ ⱪowmlar

kelip aldingƣa səjdə ⱪilar

ⱨəm namingni uluƣlar ular.

¹⁰Ajayip uluƣ mɵjizilər igisisən,

bərⱨəⱪ, yalƣuz sənla Hudadursən.

¹¹Pərwərdigar, ɵgətkin manga yolungni,

əgixip sanga ⱨəⱪ yolda yaxay.

Ⱪaratⱪin ɵzünggila bu ⱪəlbimni,

qin dilimdin sanga ihlas ⱪilay.

¹²Pütün ⱪəlbim bilən xükürlər eytimən sanga,

uluƣlaymən namingni mənggügə Rəbbim Huda.

¹³Qünki ⱪutⱪuzdung jenimni jəⱨənnəm dərgaⱨidin,

ɵzgərməs muⱨəbbiting xunqə qəksiz bolƣaq manga.

¹⁴I Huda, manga ⱪarxi turidu mənmənqilər,

jenimni almaⱪ üqün izdər meni wəⱨxiylər.

Kɵzgə ilip ⱪoymas seni ⱪilqə ular.

¹⁵Lekin Rəbbim rəⱨimdil, xəpⱪətliksən,

asanliⱪqə ƣəzəplənməysən,

meⱨir-muⱨəbbət, sadaⱪəttə qəksizsən.

¹⁶Ⱨalimƣa baⱪ, manga xəpⱪət əyligin,

məndək ⱪulungƣa küq-madar ata ⱪilƣin,

peⱪir ⱪulungni muxəⱪⱪəttin ⱪutⱪuzƣin.

¹⁷Kɵrsət manga xəpⱪitingni,

yardəm bərgin i Pərwərdigar,

tapsun ⱪəlbim təsəlli,

bolsun xərməndə manga ɵq bolƣanlar.

Koraⱨning əwladliri yazƣan mungluⱪ munajat

¹Muⱪəddəs taƣlar ara Huda ⱪurƣan xəⱨər^* turar.

²Pərwərdigar Isra’iliyəning barliⱪ jayliridin

Si’on xəⱨirini əng yahxi kɵrər.

³Əy Hudaning xəⱨiri,

xəripinggə pütülməktə uluƣ ixlar. Selaⱨ

⁴Rahabliⱪ^* wə Babilliⱪlar bardur meni tonuƣanlar arisida,^*

Filistiyəlik, Tirliⱪ ⱨəm Efiyopiyəlikmu xu ⱪatarda.

Dəymən ular ⱨəⱪⱪidə: “Bu adəmlər tuƣulƣan Si’onda.”

⁵Si’on toƣruluⱪ mundaⱪ eytilar:

“Si’onda tuƣulƣan ⱨər milləttin bolƣanlar”,

uluƣ Huda ɵzi Si’onni puhta ⱪilar.

⁶Yat ⱪowmni pütkinidə tizimƣa Pərwərdigar:

“Bu kixi Si’onda tuƣulƣan” dəp yezip ⱪoyar. Selaⱨ

⁷Nahxiqi, ussulqilar nahxini mundaⱪ eytar:

“Əy Si’on, mening ⱨayat mənbəyim seningdidur.”

Koraⱨning əwladliri wə Əzrahning oƣli Ⱨeman yazƣan tərbiyəwi munajat bolup, “mahalat-le’anot” aⱨangida nahxa ⱪilip eytilsun dəp, nəƣmiqilər bexiƣa tapxurulƣan.

¹I Pərwərdigar, nijatkarim Huda,

keqə-kündüz mən sanga ⱪildim nida.

²Ⱪobul ⱪilƣin du’ayimni,

angliƣin nidayimni.

³Qünki dərdlər jenimƣa patti,

ⱨayatimmu ɵlümgə yeⱪinlaxti.

⁴Bir putum sanggilidi gɵr aƣziƣa,

küq-madar ⱪalmidi ⱨeq tenimda.

⁵Ɵlüklərdin ⱨeqbir pərⱪsizmən,

tenim ləⱨəttiki murdidəkla.

Untulƣanmən ɵlüklərdək,

meⱨringdin məⱨrummən ulardəkla.

⁶Taxliwətting sən meni qongⱪur ⱨangƣa,

taxliding ⱨəm zulmət, ⱪarangƣuluⱪⱪa.

⁷Yəlkəmni basti yük bolup sening ⱪəⱨring,

manga ⱪattiⱪ zərbə boldi ⱨayat dolⱪunliring. Selaⱨ

⁸Yiraⱪ ⱪilding meningdin dostlirimni,

yirgəndürdüng meningdin ⱨəm ularni,

ⱪamap ⱪoydung qiⱪalmas ⱪilip meni.

⁹I Pərwərdigar, kɵzlirim hirələxti azabta,

ⱨər küni ⱪilimən sanga nida,

ⱪollirimni kɵtürüp du’aƣa.

¹⁰Ɵlüklərgə kɵrsətməkqimusən karamətliringni?

Murdilar ornidin turup mədⱨiyələrmu seni? Selaⱨ

¹¹Ⱪəbridə kimmu bayan ⱪilsun mənggülük muⱨəbbitingni?

Ɵlüklər makanida kimmu mahtisun sadaⱪitingni?

¹²Ⱪarangƣuluⱪta kimmu kɵrəlisun karamətliringni?

“Untulƣanlar zemini”da yahxiliⱪingni?

¹³I Pərwərdigar, nalə ⱪilimən sanga,

ⱨər səⱨərdə ⱪilip du’a.

¹⁴I Pərwərdigar, taxliwətting neqün meni?

Neqün məndin yoxurisən didaringni?

¹⁵Ezilip tas ⱪalƣantim ɵlüxkə yax qeƣimdin,

ⱪiynilip petip ⱪaldim ümidsizlikkə dəⱨxitingdin.

¹⁶Ⱪəⱨr-ƣəziping basti üstümni,

wəⱨimiliring nabut ⱪildi meni.

¹⁷Kəlkün kəbi ular meni eliwaldi ⱪoyniƣa,

qüxüp ⱪaldim mən ularning ⱪorxawiƣa.

¹⁸Yiraⱪ ⱪilip meningdin ⱨəmraⱨlirim, dostlirimni,

yar ⱪilding pəⱪət manga ⱪarangƣuluⱪni.

Əzrahning oƣli Etan yazƣan tərbiyəwi munajat

¹Pərwərdigar mənggülük muⱨəbbitingni əbədiy küyləymən,

sadaⱪitingni əwladtin-əwladⱪiqə bayan əyləymən.

²Jakarlaymənki muⱨəbbiting mənggü ɵzgərməs,

sadaⱪiting ərx’əladək məzmut, təwrənməs.

³Rəbbim, sən dedingki:

“Talliwalƣan bəndəm bilən əⱨdə ⱪildim,

ⱪulum bolƣan Dawutⱪa ⱪəsəm ⱪildim.

⁴Sening əwladliringni əbədiy hanidanliⱪⱪa igə ⱪilimən,

nəslingning təhtkə warisliⱪ ⱪilixiƣa kapalətlik ⱪilimən.” Selaⱨ

⁵I Igəm, ərx’əlada mɵjiziliring təbriklinər,

sadaⱪiting pərixtilər arisida mədⱨiyəlinər.

⁶Büyüklüktə sanga təngdax biri yoⱪtur,

ərx’əlada ⱨeqkim sanga ohximastur.

⁷Hudaning ⱨəywisidin pərixtilər titrəp turar,

ətrapida ⱨəmməylən ⱪorⱪup turar.

⁸I Huda – Ⱪudrətlik Sərdar Pərwərdigar,^*

sanga ohxax ⱪudrət igisidin yənə kim bar?

Ətrapingni sadaⱪətlik orap turar.

⁹Dengiz ⱪanqə məƣrur bolsun sən uningƣa ⱨɵkümransən,

ɵrkəxlisə dolⱪun yasap uni besip tinqlandurisən.

¹⁰Dengizdiki rahabni^* sən bərbat ⱪilding,

ⱪudritingdə düxminingni bitqit ⱪilding.

¹¹Asman, zemin – pütün jaⱨan seningkidur,

uningdiki ⱨəmmə nərsə pəⱪət sening ijadingdur.

¹²Yaratⱪansən ximal, jənub wə ulardiki ⱨəmmini,

xadliⱪta namingni küylər Tabor, Hərmon qoⱪⱪiliri.

¹³Biliking ⱪudrətlik, ⱪolung küqlüktur,

üstün kɵtürülgən ong ⱪolung ƣalibtur.

¹⁴Təhtingning uli bolsa ⱨəⱪⱪaniyliⱪ, adaləttur,

muⱨəbbət wə sadaⱪətlik ⱨɵkümranliⱪingning ⱨəmraⱨidur.

¹⁵Təntənə, alⱪixlarni ⱪilƣan həlⱪ bəhtlik ⱨesablinar,

yaxar ular ⱨuzurungning nurida i Pərwərdigar.

¹⁶Naming bilən ular da’im xad bolar,

adalitingdin sɵyünüp təntənə ⱪilar.

¹⁷Ularning küq-ⱪuwwət, xan-xəripi səndin kelər,

xapa’iting bolƣaq ular da’im ƣəlibə ⱪilar.

¹⁸Bərⱨəⱪ, bizning padixaⱨimiz mənsuptur Pərwərdigarƣa,

təwədur Isra’illarni talliƣan muⱪəddəs Hudaƣa.

¹⁹Bir wəⱨiyingdə mundaⱪ degəniding sadiⱪ ɵz bəndənggə:

“Mən bir əzimətkə yardimimni yətküzdüm,

əl arisidin uni tallap, kɵtürdüm.

²⁰Demək, ⱪulum Dawutni taptim,

muⱪəddəs meyimni sürkəp bexiƣa,

uni silərgə padixaⱨ ⱪilip tiklidim.

²¹Ⱪolum uningƣa yɵlək bolar,

bilikim uni küqkə toldurar.

²²Düxmənliri uni pəⱪət yengəlməs,

pəskəxlərmu uni ⱪistap ezəlməs.

²³Rəⱪiblirini uning aldida wəyran ⱪilimən,

ɵqmənlirini yər bilən yəksan ⱪilimən.

²⁴Sadaⱪitim, muⱨəbbitim uningƣa yar bolar,

mening namim bilən u zəpər ⱪuqar.

²⁵Mən uni ⱨɵkümranliⱪ ⱪilƣuzarmən dengizƣa,^*

ⱨoⱪuⱪini yürgüzərmən ⱨəm dəryalarƣa.

²⁶U manga nida ⱪilip dediki:

‘sən mening atam, Hudayimdursən,

nijatkarim, ⱪoram teximdursən.’

²⁷Mən uni mening tunji oƣlum ⱪilimən,

dunyadiki əng uluƣ padixaⱨ ⱪilip tikləymən.

²⁸Muⱨəbbitim uningƣa əbədiydur,

ⱪilƣan əⱨdəm mənggügə buzulmastur.

²⁹Əwladlirini əbədiy hanidanliⱪⱪa igə ⱪilimən,

təhtini uning asman kəbi dawam ⱪildurimən.

³⁰Mubada uning əwladliri təlimlirimdin qiⱪip kətsə,

ⱨɵkümlirim boyiqə ix kɵrmisə.

³¹Ular pərmanlirimni buzsa,

əmrlirimgə ita’ət ⱪilmisa,

³²unda mən ita’ətsizliklirini tayaⱪ bilən,

gunaⱨlirini yara-jaraⱨət bilən jazalaymən.

³³Lekin muⱨəbbitimni Dawuttin üzməymən,

yaki wədəmgə hiyanət ⱪilmaymən.

³⁴Tüzgən əⱨdəmni əsla buzmaymən,

wədəmdin pəⱪət ⱪaytmaymən.

³⁵Mən muⱪəddəs namimda ⱪəsəm iqkənmən,

Dawutⱪa eytⱪan sɵzümdin yanmaymən.

³⁶Uning əwladliri əbədiy dawamlixar,

uning təhti ⱪuyax kəbi parlap turar.

³⁷U asmandiki sadiⱪ guwaⱨqi ay kəbi

mustəⱨkəm, məzmut turar əbədiy.” Selaⱨ

³⁸Biraⱪ ⱨazir sən uni rət ⱪilip taxliwətting,

ɵzüng tallap bekitkən padixaⱨⱪa ƣəzəplənding.

³⁹Inkar ⱪilding ⱪulung bilən tüzgən əⱨdini,

taxliwətting uning taj-təht – ⱨoⱪuⱪini.

⁴⁰Wəyran ⱪilding uning barliⱪ ⱪorƣanlirini,

harabə ⱪilding xəⱨər-ⱪəl’əlirini.

⁴¹Yoldin ɵtüwatⱪanlar bulimaⱪta xəⱨirini,

u ⱪoxna əllər aldida rəswa boldi.

⁴²Ƣəlibə ⱪildurdung uning rəⱪiblirini,

huxal ⱪilding pütkül düxmənlirini.

⁴³Ⱪayturdung uning ⱪiliqining bisini,

jənglərdə məƣlup ⱪilding uni.

⁴⁴Yərgə urdung uning ⱨəywitini,

küldək tozuttung təhtini.

⁴⁵Hijalətkə qɵmdürüp

ⱪisⱪartting yaxliⱪini. Selaⱨ

⁴⁶I Pərwərdigar,

ⱪaqanƣiqə ɵzüngni məndin ⱪaqurisən?

Ⱪəⱨr-ƣəzəp otungni ⱪaqanƣiqə kɵydürisən?

⁴⁷Əstə tutⱪin i Huda, ɵmrümning ⱪisⱪiliⱪini,

nemidegən biⱨudiliktur insanning ⱨayati.

⁴⁸Ⱪaysi insan yaxap ɵlüm kɵrməydikən?

Gɵrdin ɵz jenini aman saⱪlap ⱪalidikən? Selaⱨ

⁴⁹I Rəbbim,

sadaⱪəttə Dawutⱪa ⱪilƣan wədiliring nələrdə ⱪaldi?

Burun kɵrsətkən meⱨir-muⱨəbbiting ⱪəyərdə ⱪaldi?

⁵⁰Ⱪulung uqrawatⱪan məshirilərni əskə alƣaysən,

barqə əlning manga ⱪilƣan ⱨaⱪarətlirini kɵrgəysən!

⁵¹Rəⱪibliring meni da’im məshirə ⱪilar,

ɵzüng talliƣan padixaⱨni har ⱪilar.

⁵²Pərwərdigarƣa mənggü ⱨəmdusanalar bolƣay!

Amin, amin!

4-bɵlək

Təⱪwadar Musa pəyƣəmbərning du’asi

¹I Rəbbim, panaⱨ bolup kəlding bizgə,

əwladtin-əwladⱪiqə.

²Taƣlar bərpa ⱪilinmastinla,

zemin wə aləm yaritilmastinla,

ɵzüng Huda iding əzəldinla,

mənggügə Hudadursən yənila.

³Desəng əgər “əy insanlar, tupraⱪⱪa ⱪaytinglar”,

insan xu’an tupraⱪⱪa aylinar.

⁴Bərⱨəⱪ, sən üqün ming yil goya

tünügün ɵtkən bir kündəkla,

yaki keqidiki birnəqqə sa’əttəkla.

⁵Insanni elip ketisən kəlkündək,

uning ɵmri tügər goyaki qüxtək,

tang səⱨərdə ünüp qiⱪⱪan maysidək.

⁶Maysilar ünüp qiⱪar səⱨərdə,

solixip ketər ahxamƣiqə.

⁷Xübⱨisizki, biz ⱨalak bolimiz ƣəzipingdin,

wəⱨimigə qüximiz ⱪəⱨringdin.

⁸Axkara ⱪilisən yamanliⱪimizni aldingda,

pinⱨan gunaⱨlirimizni jamalingning nurida.

⁹Künlirimiz ƣəzəp-nəprəttə ɵtər,

yillirimiz uⱨ tartip azabta ketər.

¹⁰Ɵmrimiz yətmix yilqə bolar,

səksəngə ulixar maƣduri barlar.

Əmma əng yahxi qaƣlirimizmu

japa wə ⱪayƣuda ɵtər,

künlirimiz kɵzni yumup aqⱪuqə tügər,

ⱨayatimiz uqⱪandək ɵtüp ketər.

¹¹Ƣəzipingning ⱪudritini kim oylap yetər?

Ⱪəⱨringgə layiⱪ kim səndin əyminər?

¹²Ɵmür ⱪisⱪa, ⱪədirləxni ɵgətkin bizgə,

xu ɵmürning sawaⱪliri ornisun ⱪəlbimizgə.

¹³I Igəm ɵtünəy mən, ⱪaytip kəlgin arimizƣa,

ⱪaqanƣiqə yaxaymizki moⱨtaj bolup xəpⱪitinggə?

Rəⱨim əylə seni sɵygən bəndiliringgə!

¹⁴Ⱨər səⱨərdə ⱪandursang gər bizni qin muⱨəbbitinggə,

ⱨər kün alⱪix yangratⱪaymiz sening ⱪutluⱪ xəninggə.

¹⁵Bizgə ⱪanqə uzun azab salƣan bolsang,

bizni ⱪandaⱪ külpətlərgə ⱪoyƣan bolsang,

əmdi xunqə külkə, xadliⱪ bərgin bizgə.

¹⁶Sadiⱪ bəndiliring kɵrsun nijatliⱪingni,

ularning pərzəntliri xan-xɵⱨritingni.

¹⁷I Rəbbimiz, meⱨring bizgə yar bolsun,

mədət ⱪilƣin, ixlirimiz ong bolsun,

ⱪollirimiz bərikitinggə liⱪ tolsun.

¹Kimki makan tutsa uluƣ Hudaning panaⱨida,

yaxar u ⱨəmmigə ⱪadir Huda sayisida.

²Eytarmən Pərwərdigarƣa: “Baxpanaⱨim, ⱪorƣinimsən,

ixənqimni baƣliƣan Hudayimsən.”

³Bərⱨəⱪ, Huda ⱪutⱪuzar seni ⱪiltaⱪqining ⱪiltaⱪliridin,

ⱪirƣin ⱪilƣuqi wabadin.

⁴Bürküt kəbi u ⱪanatliri astiƣa alar seni,

sən üqün panaⱨ bolar uning ⱪanatliri,

ⱪalⱪan wə istiⱨkaming bolar sadaⱪiti.

⁵Ⱪorⱪmassən nə keqining wəⱨimisidin,

nə kündüzi etilƣan oⱪtin.

⁶Nə ⱪarangƣuda bildürməy tarⱪalƣan wabadin,

nə yoruⱪta kəlgən əjəllik apəttin.

⁷Gərqə mingliƣan kixilər yiⱪilsimu bu yeningda,

tümənligən jəsətlər yatsimu u yeningda,

bala-ⱪazalar ⱨeq yeⱪinlaxmas sanga.

⁸Kɵrisən pəⱪət ɵz kɵzüng bilən bu ixlarni,

pasiⱪlarning ⱪandaⱪ jazalanƣinini.

⁹Pərwərdigarni panaⱨ ⱪilƣining üqün,

uluƣ Hudani ⱪorƣinim dəp bilgining üqün,

¹⁰ⱨeqbir yamanliⱪ kəlməs bexingƣa,

ⱨeq waba yeⱪinlaxmas qediringƣa.

¹¹Pərwərdigar əmr berər sən üqün pərixtilirigə,

ular ⱪoƣdar seni ⱨəmmə yolliringda.

¹²Yürər pərixtilər seni kɵtürüp ⱪollirida,

urulup kətmisun dəp putliring birər taxⱪa.

¹³Besip dəssəysən yilan wə xirni,

qəyləysən zəⱨərlik yilan wə arslanni.

¹⁴Dəyduki Pərwərdigar:

“Meni sɵygənliki üqün uni ⱪutⱪuzimən.

Meni tonuƣanliⱪi üqün ⱪoƣdaymən.

¹⁵Jawab berimən iltija ⱪilƣinida,

uning bilən billə bolimən eƣir künliridə,

ⱪutⱪuzup uni, sazawər ⱪilimən xɵⱨrətkə.

¹⁶Uzun ɵmür ata ⱪilip, məmnun ⱪilimən uni,

berimən uningƣa nijatliⱪimni.”

Dəm elix kündə^* eytilidiƣan munajat

¹I Pərwərdigar, nəⱪədər bəhttur sanga xükür eytix,

i uluƣ Huda, nəⱪədər bəhttur namingni nahxiƣa ⱪetix.

²Bayan əyləp mənggülük muⱨəbbitingni səⱨərdə,

sadaⱪitingni təripləx ⱨərbir keqidə –

³On tarliⱪ saz wə qiltarning nawasida,

liraning yeⱪimliⱪ munglirida.

⁴Qünki meni xadlandurdung karamətliringdə i Huda,

manga ⱪilƣan əjringdin nahxa eytarmən huxalliⱪta.

⁵I Pərwərdigar, nəⱪədər büyük sening mɵjiziliring.

Xunqilik yüksək, niyət, məⱪsətliring.

⁶Tɵwəndiki ⱨəⱪiⱪətni bilməs nadan adəmlər,

qüxənməydu uni yənə ⱨamaⱪət wə əhməⱪlər.

⁷Gərqə ot-qɵp ɵskəndək tez ɵssimu rəzillər,

xunqə gülləp yaxnisimu ⱨəmdə barliⱪ pəskəxlər,

lekin mənggülük ⱨalakətkə duqardur ular.

⁸Ⱨəmmigə mənggü ⱪadirdursən, i Pərwərdigar.

⁹Mana ⱪara, düxmənliring muⱪərrərki ⱨalak bolar,

tiripirən bolidu ⱨəm yamanliⱪ ⱪilƣuqilar.

¹⁰Lekin yawa buⱪidək küqləndürdüng sən meni,

ⱨəm beximƣa sürkiding roⱨlandurƣuq meyini.^*

¹¹Kɵrdüm düxmənlirimning məƣlubiyitini,

anglidim rəzil rəⱪiblirimning yiƣa-zarini.

¹²Huddi horma dərihidək gülləp yaxnar ⱨəⱪⱪaniylar,

ⱨəm yənə Liwandiki kedir dərihidək aynip ɵsər.

¹³Tikilgəndur ular Pərwərdigar ⱨuzuriƣa,

gülləp yaxnar Igimizning ⱨoyla-aramlirida.

¹⁴Ⱪerisimu ular yənə beridu mewə,

bük-baraⱪsan kɵkirip turar ⱨəmixə.

¹⁵Xunga ular dəyduki: “Pərwərdigar adildur,

adalətlik u da’im, ⱪoram taxtək panaⱨimiz Hudadur.”

¹Ⱨɵkümrandur Pərwərdigar,

ⱨəywət uning yepinqisi,

oralƣandur uluƣwarliⱪ,

ⱪudrət uning bəl potisi.

Məzmut ⱪilinƣan dunya,

təwrənməs u əsla.

²Mustəⱨkəmdur təhting əzəldin,

məwjutsən ɵzüng əlmisaⱪtin.

³I Pərwərdigar,

xarⱪirimaⱪta dengiz suliri,

yangrimaⱪta xawⱪunliri,

güldürliməktə dolⱪunliri.

⁴Dengizlarning güldürləxliridin,

dolⱪunlarning yulⱪunuxliridin,

ⱪudrətliktur ərxtiki Pərwərdigar.

⁵I Pərwərdigar, ɵzgərməstur pərzliring,

ɵyünggə zinnəttur mənggülük muⱪəddəsliking.

¹I jazaliƣuqi Pərwərdigar, i Huda,

i jazaliƣuqi Pərwərdigar, qaqⱪin jula.

²I jaⱨan soraⱪqisi, qiⱪip otturiƣa,

layiⱪida jaza bərgin təkəbburlarƣa.

³I Pərwərdigar, rəzillər ⱪaqanƣiqə mahtinar,

ⱪaqanƣiqə bexini kɵtürüp yürüxər ular?

⁴Walaⱪxiydu təkəbburluⱪ bilən ular,

po atidu u yamanliⱪ ⱪilƣuqilar!

⁵Sən talliƣan ⱪowmingni ezip ular,

sanga təwə bolƣanlarƣa jəbir salar.

⁶Ⱪirƣin ⱪilip tul hotun, ƣeriblarni,

ɵltüridu panaⱨsiz yetimlarni.

⁷Ular dər: “Kɵrməydu Pərwərdigar,

Yaⱪupning Hudasi bilməydu zinⱨar.”

⁸Əy əlning ⱨamaⱪətliri, oylap beⱪinglar!

Əy əhməⱪlər, ⱪaqan bolar əⱪlinglar?

⁹Anglimasmu ⱪulaⱪni yaratⱪuqi?!

Kɵrməsmu kɵzni ata ⱪilƣuqi?!

¹⁰Yat əllərni jazaliƣuqi Huda jazalimasmu silərni?

Insanƣa əⱪil ɵgətküqi tərbiyəliməsmu adəmni?

¹¹Huda bilidu insanning oy-pikrini,

biⱨudidur hiyallarning ⱨəmmisi.

¹²Bəhtliktur sən tərbiyəligən kixi, i Pərwərdigar,

insan tərbiyəngdin, təlimingdin bəht tapar!

¹³Sən ularni aman ⱪilisən yaman künlərdə,

taki yamanlar oriƣa qüxüp ⱨalak bolƣuqə.

¹⁴Pərwərdigar ɵz ⱪowmini tərk ətməs,

ɵzigə mənsup bolƣanlarni taxlap kətməs.

¹⁵Ⱨɵküm-pərman ⱨoⱪuⱪi ⱪaytar ⱨaman adalətkə,

ⱪəlbi paklar ⱨimayə ⱪilar adalətning kəynidə.

¹⁶Rəzillərdin ⱪoƣdaydu meni kim qiⱪip otturiƣa?

Kim turar mən tərəptə ⱪarxi ⱨalda yamanlarƣa?

¹⁷Əgər yardəm bərmigən bolsa idi manga Huda,

yatar idim jimjitliⱪ ⱪapliƣan ɵlüklər makanida.

¹⁸I Pərwərdigar, teyilip ketəy deginimdə,

yɵliding meni mənggülük muⱨəbbitingdə.

¹⁹Ƣəm-ⱪayƣu, əndixidə ⱪalƣinimda,

xadlandurisən təsəlli berip manga.

²⁰Sanga dost bolalmas qirikləxkən əməldarlar,

ⱪanunni ⱪalⱪan ⱪilar ⱪilƣanlirida əski ixlar.

²¹Ular birlixər ⱨəⱪⱪaniylarni ɵltürüxkə,

ⱨɵküm ⱪilar bigunaⱨlarni ɵlümgə.

²²Pərwərdigar ⱪorƣinimdur,

panaⱨgaⱨim – ⱪoram teximdur.

²³Gunaⱨliri üqün Huda ularni jazalar,

rəzilliki üqün Huda ularni ⱨalak ⱪilar,

xundaⱪ, Pərwərdigarimiz ularni ⱪirip taxlar.

¹Nahxa eytayli kelinglar Pərwərdigarƣa beƣixlap,

ⱪoram taxtək ⱪutⱪuzƣuqi Hudani mədⱨiyələyli alⱪixlap.

²Ⱨuzuriƣa Hudaning xükür eytip kirəyli,

təntənə bilən uningƣa nawa ⱪilip mədⱨiyələr eytayli.

³Qünki Huda – Igimiz Pərwərdigar uluƣdur,

u bir büyük padixaⱨ, barliⱪ “ilaⱨlar”din^* üstündur.

⁴Qoⱪⱪilardin taki əng qongⱪur yərlirigiqə zeminning,

jimisi uning ⱪolida, mülkidur uning.

⁵Dengiz-okyanlar təwədur Hudaƣa, u yaratⱪan ularni,

zemin anga mənsuptur, ⱪolliri wujudⱪa kəltürgən uni.

⁶Səjdə ⱪilayli kelinglar Pərwərdigarƣa,

Yaratⱪuqimiz u bizning tiz pükəyli uningƣa.

⁷Qünki u bizning Hudayimizdur,

biz uning ƣəmhorluⱪidiki ⱪowmdurmiz,

u pərwix ⱪiliwatⱪan ⱪoyliridurmiz.

⁸Bügün uning awaziƣa ⱪulaⱪ salsanglar əgər,

u dərki: “Jaⱨil bolmanglar əjdadinglar Miribada bolƣinidək,

qɵl-bayawan Massaⱨta tərsaliⱪ ⱪilƣinidək.^*

⁹Ata-bowanglar ənə xu yərdə meni siniƣanidi,

mɵjizilirimni kɵrüp turupmu meni təkxürgənidi.

¹⁰Mən ⱪiriⱪ yilƣiqə yirginip əjdadliringlardin,

dedimki: ‘ularning ⱪəlbi yiraⱪtur məndin,

mangmas ular mening yolumdin.’

¹¹Ⱪəsəm ⱪilip eyttim yənə ƣəzəptə xunga:

‘kirəlməs ular mening aramgaⱨimƣa.’ ”

¹Yengi nahxa eytinglar Pərwərdigarƣa beƣixlap,

əy jaⱨan əⱨli yangritinglar ƣəzəllər uningƣa atap.

²Nahxanglarda təriplənglar Hudaning namini,

bayan əyləp ⱨər küni uning nijatliⱪini.

³Tarⱪitinglar xan-xəripini əllər ara,

ajayip ixlirini həlⱪ ara.

⁴Uluƣ bolƣaq Pərwərdigar da’ima,

u layiⱪtur ⱨəssiləp mədⱨiyəlinixkə,

üstün bolƣaq u ƣəyriy ilaⱨlardin,

pəⱪət ula ərziydu əyminixkə.

⁵Pəⱪət buttur baxⱪilarning ilaⱨliri,

əmma Huda yaratⱪandur ərxlərni.

⁶Orap turar xan-xərəp wə büyüklük uni,

ⱪudrət wə güzəllikkə tolƣandur uning turargaⱨi.

⁷Təriplənglar əy əl-ⱪowmlar Pərwərdigarni,

küylənglar uning xan-xɵⱨrət wə ⱪudritini.

⁸Pərwərdigar xəripigə munasip ⱨəmdusana oⱪunglar,

Hudaning ibadəthana ⱨoylisiƣa ⱨədiyə bilən kiringlar.

⁹Əy jaⱨan əⱨli, Pərwərdigardin ⱪorⱪunglar,

parlaⱪ, muⱪəddəs Pərwərdigarƣa səjdə ⱪilinglar,

¹⁰eytinglar əllər ara:

“Pərwərdigar əng aliy ⱨɵkümrandur,

u sorar həlⱪlərni adaləttə.

Bərⱨəⱪ, dunya mustəⱨkəm, təwrənməstur.”

¹¹Xadlansun yər-jaⱨan, hux bolsun asmanlar,

təntənə ⱪilixsun dengiz wə uningdiki janliⱪlar.

¹²Yayrisun dalilar, uningdiki qarwilar,

nahxa eytsun Igimiz aldida ormanlar.

¹³Qünki Pərwərdigar jəzmən kelidu ⱨɵkümranliⱪ ⱪilixⱪa,

kelidu dunyani adaləttə, həlⱪlərni ⱨəⱪⱪaniy baxⱪuruxⱪa.

¹Əng aliy ⱨɵkümrandur Pərwərdigar,

huxallansun buningdin ⱨəmmə həlⱪlər,

xadlansun ⱨətta əng yiraⱪtiki əllər.

²Sirliⱪ wə pinⱨanliⱪ ara turar Pərwərdigar,

ⱨəⱪⱪaniyət, adaləttə təhti uning məzmut turar.

³Otlar lawuldap kɵyüp turar aldida,

rəⱪiblirini kɵydürüwetər ⱨəryanda.

⁴Qaⱪmiⱪini qaⱪturup yorutar u jaⱨanni,

yər-zemin titrəp ketər kɵrüp buni.

⁵Momdək erip ketər büyük taƣlar ⱨətta,

aləmning ⱨɵkümrani Pərwərdigar aldida.

⁶Ərxlər jakarlar uning ⱨəⱪⱪaniyliⱪini,

jimi həlⱪlər kɵrər uning xan-xəripini.

⁷Xərməndiliktə ⱪalar ahir butpərəslər,

ərziməs butlirini mahtiƣanlar.

Pərwərdigarƣa səjdə ⱪilar barliⱪ “ilaⱨlar”.

⁸I Pərwərdigar,

xadlandi adalitingdin pütün Yəⱨudiyə xəⱨərliri,

huxalliⱪⱪa qɵmdi Si’on anglap ⱨɵkümliringni.

⁹Bərⱨəⱪ, i Pərwərdigar,

jaⱨanƣa ⱨɵkümran uluƣ Hudadursən,

ƣəyriy ilaⱨlardin xuⱪədər üstündursən.

¹⁰Əy Pərwərdigarni sɵygənlər, ɵq kɵrünglar yamanliⱪni,

Pərwərdigar ⱪoƣdar ɵz təⱪwadarlirining jenini,

ⱪutⱪuzar rəzillərning qanggilidin u sadiⱪlarni.

¹¹Nur huddi uruⱪtək qeqilƣandur ⱨəⱪⱪaniylarƣa,

xadliⱪ terilƣandur dili duruslarƣa.

¹²Əy ⱨəⱪⱪaniylar, Pərwərdigardin huxallininglar,

muⱪəddəslikini yad etip uningƣa xükür eytinglar.

¹Pərwərdigarƣa beƣixlap eytinglar yengi nahxa,

qünki ajayip mɵjizilər igisidur Huda,

muⱪəddəs biliki, ong ⱪoli zəpər bərgəndur uningƣa.

²Ⱪildi Huda namayan ƣəlibisini ⱨəmmigə,

adalitini kɵrsətti jaⱨandiki əllərgə.

³U yətküzdi Isra’illarƣa meⱨir wə muⱨəbbitini,

untumidi u zinⱨar Isra’illarƣa bolƣan sadaⱪitini,

barqə awam kɵrdi ⱨəm Igimizning utuⱪini.

⁴Əy barqə insanlar, alⱪix yangritinglar Hudaƣa,

hux bolup mədⱨiyələr oⱪunglar nahxanglarda uningƣa.

⁵Hudaƣa atap lira bilən nəƣmə-nawa ⱪilinglar,

ⱨəm uningƣa lira bilən nahxa-ƣəzəl eytinglar.

⁶Yangritinglar alⱪixlar padixaⱨimiz Hudaƣa,

alⱪiximiz bolsun anga kanay bilən burƣida.

⁷Juxⱪunlisun dengiz wə uningdiki janliⱪlar,

ⱪilsun ⱪizƣin təntənə zemin yənə janliⱪlar.

⁸Qawak qalsun Hudaƣa huxalliⱪtin dəryalar,

xadliⱪ bilən Hudani küygə ⱪatsun ⱨəm taƣlar.

⁹Qünki Pərwərdigar jəzmən kelidu ⱨɵkümranliⱪ ⱪilixⱪa,

kelidu dunyani adaləttə, həlⱪlərni ⱨəⱪⱪaniy baxⱪuruxⱪa.

¹Əng aliy ⱨɵkümrandur Pərwərdigar!

U kerublar^* otturisida təhttə olturar,

uningdin əyminip titrisun pütkül ⱪowmlar,

ⱨəywisidin zilziligə kəlsun ⱨəmmə jaylar.

²Ⱨɵkümrandur Si’onƣa Pərwərdigar,

u barliⱪ ⱪowmlar üstidin ⱨɵküm sürər.

³Muⱪəddəstursən i Pərwərdigar,

ⱨəywətlik, büyük namingni mədⱨiyəlisun ular.

⁴I adalət sɵygüqi ⱪudrətlik xaⱨimiz – Huda,

adilliⱪni ornatⱪanting Yaⱪup əwladliri arisiƣa,

adalət wə ⱨəⱪⱪaniyət əməlgə axⱪanidi ularda.

⁵Pərwərdigarimizni uluƣlanglar,

ayiƣiƣa bax ⱪoyup səjdə ⱪilinglar.

Qünki u muⱪəddəstur!

⁶Musa wə Ⱨarunlar uning roⱨaniyliridindur,^*

Samu’ilmu uningƣa iltija ⱪilƣanlardindur.

Ular du’a ⱪilƣanda Pərwərdigarƣa,

bərⱨəⱪ u jawab bərgənidi ularƣa.

⁷Pərwərdigar sɵzligənidi bulut tüwrüki iqidin^* ularƣa,

ular əməl ⱪilixti Huda bərgən pərz-pərmanlarƣa.

⁸I Igimiz Pərwərdigar, jawab bərding ularƣa.

Ularning gunaⱨlirini məƣpirət ⱪilding da’ima,

əmma jazaliding ularni towa ⱪilmiƣinida.

⁹Pərwərdigarimizni uluƣlanglar,

muⱪəddəs Si’on teƣida uningƣa səjdə ⱪilinglar,

qünki muⱪəddəstur Pərwərdigarimiz!

100

Xükür eytix munajiti

¹Əy pütkül jaⱨandiki insanlar,

yangritinglar Pərwərdigarƣa alⱪixlar.

²Huxalliⱪ bilən ibadət ⱪilinglar uningƣa,

xadliⱪ bilən munajat oⱪup kiringlar ⱨuzuriƣa.

³Bilinglarki, Pərwərdigar yeganidur,

bizni u yaratⱪandur, biz uningƣa təwədurmiz,

biz uning həlⱪidurmiz, yayliⱪining ⱪoyliridurmiz.

⁴Dərwaziliridin kiringlar ⱨəmdusana-xükür eytip,

ⱪədəm təxrip ⱪilinglar ⱨoyliliriƣa mədⱨiyə oⱪup,

təriplənglar namini minnətdarliⱪ bildürüp.

⁵Bərⱨəⱪ, Pərwərdigar xapa’ətliktur,

uning meⱨir-muⱨəbbiti mənggülüktur,

əwladtin-əwladⱪiqə sadaⱪətliktur.

101

Dawut yazƣan munajat

¹Küyləymən mənggülük muⱨəbbət wə adalitingni,

i Pərwərdigar küylirimgə ⱪatimən seni.

²Yolum toƣra bolsimu eⱨtiyat ⱪilip mangimən,

Pərwərdigar ⱪaqanmu yardəmgə kelərsən?

³Hiyalimƣa kəlməs əsla pasiⱪ ⱪilmix, rəzillik,

yoldin qiⱪⱪan azƣunlarƣa nəpritim bar xunqilik,

ular ⱪilƣan gunaⱨlarƣa ⱨəwisim yoⱪ ⱪilqilik.

⁴Kɵnglüm mening əgriliktin haliydur,

ⱨəmdə ⱨəmmə rəzilliktin yiraⱪtur.

⁵Baxⱪilarƣa kimki tɵⱨmət əylisə yoⱪ ⱪilarmən uni düxmən bilip,

kɵrsəm əgər ⱨali üstün, mənmənqini turalmasmən süküt ⱪilip.

⁶Kim ərxtiki Hudaƣa sadiⱪ bolsa,

ularƣa ɵz ordamdin orun berimən.

Toƣra, ⱨəⱪ yolda mangƣanlarni

mening hizmitimgə ⱪoyimən.

⁷Ⱨiyligərlərgə ordamda orun yoⱪtur,

yalƣanqilar ⱨuzurumda bolalmastur.

⁸Zeminimdin yoⱪ ⱪilimən rəzillərni ⱨər səⱨərdə,

birmu yaman ⱪalmas ⱨətta Pərwərdigarning xəⱨiridə.

102

Ezilip ⱨalidin kətkən bir adəmning Pərwərdigarƣa dad-pəryad ⱪilip ⱪilƣan du’asi.

¹Angliƣaysən Pərwərdigar du’ayimni,

tingxiƣaysən mening ⱪilƣan pəryadimni.

²Yoxurmiƣin didaringni məndin Huda külpəttə ⱪalƣinimda,

nida ⱪilsam ⱪulaⱪ selip tezdin jawab bərgin manga.

³Ɵmrüm mening is-tütəktək kətməktə ƣayib bolup,

wujudum ɵrtənməktə ottək kɵyüp.

⁴Yürikim ⱪuruⱪ qɵptək ⱪurup kətti.

Ixtiⱨasiz, tamiⱪim azlap kətti.

⁵Ⱨəsrət wə nadaməttə kɵp ⱪiynaldim,

oruⱪlap bir terə, bir ustihan bolup ⱪaldim.

⁶Mən goya bayawanda uqup yürgən tazⱪarimən,

wəyranə harabini makan ⱪilƣan ⱨuwⱪuxmən.

⁷Mən goya ɵgzidiki yetim ⱪuxmən,

yatsammu kɵzüm oquⱪ, uyⱪusizmən.

⁸Künboyi məshirə ⱪilar meni düxmənlirim,

ⱨaⱪarətlik sɵzgə yandax bolup ⱪaldi mening ismim.

^9-10Sən ⱪəⱨr-ƣəzəp ⱪilƣaq manga,

kül yedim ⱪorsiⱪimƣa nan orniƣa.

Kɵz yeximsiz iqəlməymən iqimlikimni,

bərⱨəⱪ, Huda əhlət kəbi taxliding meni.

¹¹Gugumdiki kɵlənggidək ⱨayatimmu ƣuwalaxti,

tenim qɵptək bolup ⱪaⱪxal-ƣazanglaxti.

¹²Lekin təhting mənggülüktur Pərwərdigar,

xɵⱨriting əlmisaⱪtin ta’əbədkə dawamlixar.

¹³Sən yardimingni ayimay, Si’onƣa rəⱨim ⱪilisən,

qünki uningƣa meⱨriban bolup, yardəm ⱪilix waⱪti kəldi,

xundaⱪ, yardəm ⱪilixning waⱪit-sa’iti yetip kəldi.

¹⁴Ⱪulliring taxlirini qin ⱪəlbidin sɵyər Si’onning,

harab bolƣan tupriⱪiƣa iqini aƣritip uning.

¹⁵Barqə əllər namingƣa ⱨɵrmət ⱪilar Pərwərdigar,

xəripingdin əyminər aləmdiki ⱨəmmə xaⱨ, ⱨɵkümranlar.

¹⁶Pərwərdigar Si’onni ⱪayta ⱪurar,

xan-xɵⱨriti Hudaning namayan bolar.

¹⁷Ⱪobul ⱪilar Pərwərdigar miskinning du’asini,

rət ⱪilmaydu ƣeribning pəryadini.

¹⁸Keliqək bir əwlad üqün

hatirilənglar Hudaning ⱪudritini,

kəlgüsidə həlⱪlər mədⱨiyəlisun Hudani.

^19-20Qünki Huda anglay dəp, məⱨbuslarning aⱨ-zarini,

azad ⱪilay dəp, yənə ɵlümgə buyrulƣanlarni.

Nəzər saldi üstimizgə muⱪəddəs makanidin,

ⱪaridi zemin taman Pərwərdigar ərx’əladin.

^21-22Padixaⱨlar, ⱪowmlar jəm bolƣinida,

Pərwərdigarƣa ibadət ⱪilƣinida.

Uning uluƣluⱪini jakarlar Si’onda,

xənigə mədⱨiyə oⱪur Yerusalemda.

²³Biraⱪ Huda ajiz ⱪildi ⱪiran waⱪtimda,

ⱨayatimni ⱪisⱪartti ɵmrümning yerimida.

²⁴Yilliringning qeki yoⱪtur i Huda,

jenimni alma ɵmrümning yerimida.

²⁵Dunyani yartⱪanting əlmisaⱪta,

asmanmu bərpa boldi ɵz ⱪolungda.

²⁶Biraⱪ ularning ⱨəmmisi yoⱪilidu,

sən bolsang əbədiy wə mənggülüksən.

Ular goya kiyimdək koniriƣanda,

sən ularni kiyim kəbi almaxturisən.

Asman-zemin yoⱪ bolar birdinla.

²⁷Lekin sənla ɵzgərməs Pərwərdigar,

pəⱪət səndə əbədiy ⱨayatliⱪ bar.

²⁸Hatirjəm yaxaydu ⱪulliringning baliliri,

ⱨuzurungda gülləp yaxnar ularning əwladliri.

103

Dawut yazƣan munajat

¹Igimizgə ⱨəmdusana eytⱪin mening əy ⱪəlbim,

təripligin uning muⱪəddəs namini əy wujudum.

²Igimizgə ⱨəmdusana eytⱪin mening əy ⱪəlbim,

untumiƣin Hudaning xəpⱪitini ⱨər da’im.

³Kəqürər u barliⱪ gunaⱨliringni,

saⱪaytar ⱨərⱪandaⱪ kesəlliringni.

⁴U ⱪutⱪuzar ɵlümdin ⱨayatingni,

yaƣdurar ⱨəm muⱨəbbiti, rəⱨimdilliⱪini.

⁵U seni bərikitidə məmnun ⱪilar ɵmür boyi,

yax qeƣingdək küq-ⱪuwwiting urƣup turar bürküt kəbi.

⁶Pərwərdigar yürgüzər ⱨəⱪⱪaniyət,

ezilgən barliⱪ məzlumlarƣa adalət.

⁷Namayan ⱪildi Huda Musa pəyƣəmbərgə ɵz yolini,

Isra’il əwladliriƣa karamətlirini.

⁸Huda rəⱨimdil, xəpⱪətliktur,

asanliⱪqə ƣəzipi kəlməs,

meⱨir-muⱨəbbiti qəksizdur.

⁹Əyibliməs u bizni uzaⱪⱪiqə,

ƣəzipimu əməstur adaⱪⱪiqə.

¹⁰U mu’amilə ⱪilmiƣandur bizgə gunaⱨlirimizƣa Yarixa,

jazalimiƣandur bizni u ⱪilmixlirimizƣa ⱪarita.

¹¹Asman, zemindin egiz bolsa ⱪanqilik,

Hudaning ihlasmənlərgə bolƣan muⱨəbbiti qəksizdur xunqilik.

¹²Məxriⱪ məƣribtin yiraⱪ bolsa ⱪanqilik,

yiraⱪlaxturƣandur gunaⱨlirimizni u bizdin xunqilik.

¹³Ata ɵz baliliriƣa kɵysə ⱪanqilik,

Pərwərdigar kɵyümqanliⱪ ⱪilar ihlasmənlirigə xunqilik.

¹⁴Xundaⱪ, u bilər bizning nemidin yasalƣanliⱪimizni,

esigə alar u bizning tupraⱪ ikənlikimizni.

¹⁵Maysidək ⱪisⱪidur insanning ɵmri,

dalada eqilƣan güldür insanning ɵzi.

¹⁶Əgərdə qiⱪsa xamal u gül tozar,

ⱨeqbir iz ⱪaldurmastin ƣayib bolar.

^17-18Əmma Pərwərdigar ɵzigə ihlas ⱪilƣanlarƣa,

ⱨəm uning əⱨdisigə sadiⱪ bolƣanlarƣa,

əmrlirigə əməl ⱪilixni esidə tutⱪanlarƣa,

u kɵrsitər mənggülük muⱨəbbitini adaⱪⱪiqə,

ⱨəⱪⱪaniyiti dawam etər əwladtin-əwladⱪiqə.

¹⁹Pərwərdigar ornatⱪandur təhtini ərxkə,

u ⱨɵkümranliⱪ ⱪilar ⱨəmmining üstidə.

²⁰Əy Pərwərdigarning ⱪudrətlik pərixtiliri,

silərdursilər uning sɵzigə ⱪulaⱪ salƣuqiliri,

uning əmrlirini ijra ⱪilƣuqiliri,

xunga təripləp küylənglar Pərwərdigarni.

²¹Əy Hudaning ərxtikiliri,

silərdursilər uning iradisini ijra ⱪilidiƣan hizmətqiliri,

xunga təripləp küylənglar Pərwərdigarni.

²²Əy Pərwərdigar yaratⱪanlar,

təriplənglar Pərwərdigarni u ⱨɵküm sürgən ⱨəmmə jayda,

əy mening ⱪəlbim eytⱪin ⱨəmdusana Pərwərdigarƣa.

104

¹Əy ⱪəlbim, ⱨəmdusana eytⱪin Pərwərdigarƣa!

Xan-xəwkətlik, ⱨəywətliksən, i Huda,

Ilaⱨim təngdaxsizsən uluƣluⱪta.

²Libasingdur yoruⱪluⱪ, sən uningƣa pürkəngən,

asminingning gümbizi qedir kəbi tikilgən.

³Ərxtiki turargaⱨing limlirini

ornitipsən kɵktiki sularƣa,

jəng ⱨarwisi kəbi ⱪilip bulutni,

mangdurupsən xamalning ⱪanitida.

⁴Xamal ⱪilisən pərixtiliringni,

ot yalⱪuni ⱪilisən hizmətkarliringni.^*

⁵Ornitipsən yərni xunqə mukəmməl

u ulidin ⱨeqbir zaman təwrənməs.

^6-7Dengiz yərni libas kəbi oriƣan,

qoⱪⱪilarmu su astida ⱪalƣanti.

Güldürmamang əyməndurgəq sularni,

sular tezdin ɵz orniƣa yanƣanti.

⁸Taƣlar kɵrünüp, wadilarmu ayan boldi,

sular ⱨəm sən buyruƣan yərgə kelip jaylaxti.

⁹Dengiz süyi texip yənə basmisun dəp zeminni,

sən ularƣa qək ⱪoyup sizding qegra siziⱪni.

^10-11Sən bolƣaq wadida bulaⱪ kɵzi eqilip,

taƣlar ara xildirlap aⱪti suliri.

Sular iqsə uningdin daladiki janiwarlar,

ⱪanar idi ⱨəttaki yawa exəkning təxnaliⱪi.

¹²Su boyiƣa ⱪuxlarmu kɵktin qüxüp ⱪonidu,

da’im ular xahlarda taⱪlap yürüp sayraydu.

¹³Ərxtiki su bilən suƣirisən taƣlarni,

ɵzüng ɵstürgən mewigə toldurisən zeminni.

¹⁴Qarwa üqün dalida ot-qɵplərni ɵstürdüng,

ozuⱪini insanlar ⱪara yərdin alsun dəp,

etizlarda zira’ət-kɵktatlarni ɵstürdüng.

¹⁵Kɵngüllərni xad əylisəng xarabta,

ⱪuwwət bərding nening bilən tənlərgə,

jilwə bərding meying bilən yüzlərgə.

¹⁶Liwandiki kedir dərəhliri

Pərwərdigar tikkəndur uni,

Huda ⱪanƣuqə suƣirar ularni.

¹⁷U dərəhlərgə ⱪuxlar kelip uwa yasar,

arqa dərəhliri ləyləkning ɵyi bolar.

¹⁸Taƣ ɵqkiliri taƣlarda oynar,

tik ⱪiya suƣurƣa panaⱨ bolar.

¹⁹I Huda, pəsillərni ayrix üqün ayni yaratting,

ⱪuyaxⱪimu patidiƣan waⱪitni bildürdüng.

²⁰Ⱪarangƣuluⱪ qüxürsəng keqə bolidu,

ormanlarda janliⱪlar xipirlap kezip yüridu.

²¹Arslanlar olja izdəp ⱨuwlixar,

riziⱪlirini ular, Huda səndin sorar.

²²Ⱪuyax qiⱪsa ularmu uwisiƣa ⱪaytar,

ⱪaytip kelip uwisida aram alar.

²³Ⱨəmmə adəm ɵz ixiƣa mengixar,

ətigəndin kəqkiqə meⱨnət ⱪilar.

²⁴Pərwərdigar yaratⱪan məhluⱪatliring xunqə kɵptur.

Sən yaratⱪan janliⱪlar bilən tolƣandur zemin yüzi,

bularning ⱨəmmisila ⱨekmitingning mewisidur.

²⁵Ənə aldingda bipayan dengiz yatar,

uningda san-sanaⱪsiz janliⱪ yaxar,

ⱨəm ularning qongi wə kiqiki bardur.

²⁶Unda yənə sən yaratⱪan liwyatan^* bar,

üstidə uning ⱪeyiⱪ bilən kemə ⱪatnar.

²⁷Ular səndin rizⱪi üqün ozuⱪ kütər,

ozuⱪ üqün jamalingƣa təlmürər.

²⁸Ozuⱪini ular sening ⱪolungdin alar,

xu ozuⱪta ularning ⱪorsiⱪi toyar.

²⁹Dəkkə-dükkigə qüxər ular jamalingni yoxurƣiningda,

jan üzüp ⱪara yərgə ⱪaytar, nəpəslirini tohtatⱪiningda.

³⁰Sən ɵz nəpisingni əwətkiningdə ular yaritilar,

pütün yər yüzi yengilinar.

³¹Pərwərdigarning xɵⱨriti əbədiy bolƣay,

Pərwərdigar yaratⱪanliridin hursən bolƣay.

³²Pərwərdigar yərgə baⱪsa zemin titrər,

taƣⱪa təgsə otlar yenip, tütün qiⱪar.

³³Nawada jenim təndə bolsila

mədⱨiyə oⱪuymən Hudayimƣa,

mənggü ⱨəmdusana eytimən uningƣa.

³⁴Oylirimdin Huda razi bolƣay,

qünki Pərwərdigardin boldum huxal,

³⁵gunaⱨkarlar yər yüzidə ⱪalmiƣay,

rəzillər zawal tapⱪay.

Ⱨəmdusana eytⱪin əy ⱪəlbim Pərwərdigarƣa,

ⱨəmdusana oⱪunglar ⱨəmminglar uningƣa.

105

¹Pərwərdigarƣa xükürlər eytinglar,

uning xənigə mədⱨiyələr oⱪunglar,

karamətlirini əllər ara bayan ⱪilinglar!

²Hudani küylənglar ⱪetip nahxa-nəƣmigə,

mɵjizilirini uning jakarlanglar ⱨəmmigə.

³Uluƣlanglar muⱪəddəs hislətlirini Hudaning,

ⱪəlbi xadlansun Pərwərdigarni seƣinƣanlarning.

⁴Təlpününglar Hudaning ⱪudritigə-küqigə,

intilinglar ⱨəm uning ⱨuzuriƣa-meⱨrigə.

⁵Esinglarda bolsun uning karamətliri,

mɵjiziliri wə qiⱪarƣan ⱨɵkümliri.

⁶I Hudaning ⱪuli Ibraⱨimning nəsilliri,

u ɵzi talliƣan Yaⱪupning əwladliri.

⁷U Pərwərdigardur, u bizning Hudayimizdur,

uning ⱨɵkümliri ⱨəmmə yərdə küqkə igidur.

⁸Uning tüzgən əⱨdisi əbədiy yadididur,

bu uning adaⱪⱪiqə wədə ⱪilƣan sɵzidur.

⁹Pərwərdigar Ibraⱨim bilən əⱨdə tüzgənidi,

Is’ⱨaⱪⱪimu ⱪəsəm iqkənidi.

¹⁰U buni Yaⱪupⱪimu nizam ⱪilip bərgənidi.

Isra’ilƣa^* mənggülük əⱨdə ⱪilip mundaⱪ degənidi:

¹¹“Kənan zeminini sening mülküng ⱪilimən,

uni sanga tə’əlluⱪ nesiwəng ⱪilimən.”

¹²U qaƣda ular naⱨayiti az sanliⱪ idi,

nəzərdə yoⱪ ⱨəm musapir idi.

¹³Ular yurtmu-yurt sərsan idi,

əldin-əlgə kezər idi.

¹⁴Huda ⱨeqkimning ularni ezixigə yol ⱪoymidi,

ularni dəp, padixaⱨlarnimu mundaⱪ agaⱨlandurdi:

¹⁵“Mening talliƣanlirimƣa qeⱪilmanglar,

pəyƣəmbərlirimgə ziyankəxlik ⱪilmanglar.”

¹⁶Aqarqiliⱪ bərdi Huda Kən’anƣa,

zar ⱪildi ularni ax-nanƣa.

¹⁷Huda ularni dəp aldin’ala Yüsüpni Misirƣa əwətkənidi,

akiliri uni ⱪul ⱪilip satⱪanidi.

¹⁸Uning putliri zənjirdə zəhimləngənidi,

boyniƣa boyunturuⱪ selinƣanidi.

¹⁹U tawlandi Pərwərdigarning bexariti kɵrülgüqə,

Huda Yüsüpning qüxidə kɵrsətkənliri ispatlanƣuqə.

²⁰Uni azad ⱪilixⱪa Pir’əwn əmr ⱪildi,

əllərning ⱨɵkümrani uningƣa ⱨɵrlük bərdi.

²¹Pir’əwn uni ordisiƣa ƣojidar ⱪildi,

barliⱪ mal-mülkigə baxliⱪ ⱪilip təyinlidi.

²²Bərdi uning ihtiyariƣa wəzirlirini,

danaliⱪ ɵginixkə tapxurdi aⱪsaⱪallirini.

²³Xundaⱪ ⱪilip Isra’illar Misirƣa kəldi,

Ⱨamning^* zeminida Yaⱪup əwladliri musapir boldi.

²⁴Ularni kɵp nəsillik ⱪildi Pərwərdigar,

ⱨəm düxmənliridin küqlük boldi ular.

²⁵Xunga ulardin bizar bolup Misirliⱪlar,

ⱨiylə-mikir mu’amilidə boldi ular.

²⁶Andin əwətti Huda ɵz ⱪuli Musani,

yollidi ɵz talliƣini Ⱨarunni.

²⁷Hudaning alamətlirini bayan ⱪildi ular Misirda,

uning mɵjizilirini kɵrsətti ⱨam zeminida.

²⁸Zeminni zulmət ⱪilsimu ⱪarangƣuluⱪida Pərwərdigar,

uning əmrigə ita’ətsizlik ⱪilmidi ular.

²⁹Ⱪan ⱪildi Huda Misirning sulirini,

ɵltürüwətti ularning beliⱪlirini.

³⁰Paⱪa apiti ⱪaplidi yərlirini,

ⱪaplidi ⱨətta paⱪilar padixaⱨ sariyini.

³¹Hudaning əmri bilən ⱪaplidi ƣuⱬ-ƣuⱬ qiwinlar,

ⱨəmmə yərni basti ƣing-ƣing paxilar.

³²Yamƣur orniƣa mɵldür yaƣdi,

Misirni qaⱪmaⱪ urdi.

³³Nabut boldi ənjür dərihi, üzüm talliri,

wəyran boldi dərəhlərning barliⱪi.

³⁴Hudaning əmri bilən kəldi yənə qekətkilər,

miⱬildap kəldi san-sanaⱪsiz qekətkilər.

³⁵Ⱪoymidi ular barliⱪ giyaⱨlarni,

yəp tügətti etizlarda ⱨosullarni.

³⁶Ahirida ɵltürdi Huda Misirdiki tunji balilarni –

ularning ƣururi bolƣan birinqi oƣullarni.

³⁷U Isra’illarni səpərgə altun-kümüx bayliⱪ bilən qiⱪardi.

Ularning ⱨəmmisi saƣlam ⱨəm küqlük idi.

³⁸Ularning kətkinigə Misirliⱪlar huxal boldi,

qünki Misirliⱪlar Isra’illardin bək ⱪorⱪⱪanidi.

³⁹Pərwərdigar bulutni sayiwən ⱪildi,

tündə ularƣa otni nur ⱪilip bərdi.

⁴⁰Ular Hudadin tiligənidi, bɵdünə ata ⱪildi,

toⱪlax üqün ularni asmandin nan qüxürdi.

⁴¹Taxni yerip ariliⱪliridin su qiⱪardi,

ⱪaⱪas qɵldə eⱪin-dərya pəyda ⱪildi.

⁴²Bərⱨəⱪ Huda muⱪəddəs wədisini untumidi,

ⱪuli bolƣan Ibraⱨimni əs-yadida saⱪlidi.

⁴³U həlⱪini qiⱪardi Misirdin xad ⱪilip,

ⱨɵrlükigə təntənə ⱪildi həlⱪi nahxa etip.

⁴⁴Yat əllərning zeminlirini bərdi ularƣa Pərwərdigar,

baxⱪilarning əjir-meⱨnətlirigə muyəssər boldi ular,

⁴⁵xunga ita’ət ⱪilip Pərwərdigarning ⱪanunliriƣa,

boysununglar uning pərmanliriƣa.

Ⱨəmdusana oⱪunglar Pərwərdigarƣa!

106

¹Ⱨəmdusana oⱪunglar Pərwərdigarƣa,

xükürlər eytinglar uningƣa.

Qünki Pərwərdigar xapa’ətliktur,

uning muⱨəbbiti mənggülüktur.

²Ⱪudritini Hudaning kimmu toluⱪ təripliyələr?

Kim uningƣa eytalar mukəmməl mədⱨiyələr?

³Nəⱪədər bəhtlik-ⱨə, adalətlik ix ⱪilƣanlar,

ⱨər da’im ⱨəⱪⱪaniyət yolini tutⱪanlar.

⁴I Pərwərdigar, alƣaysən meni esinggə,

ⱨimmitingni kɵrsətkiningdə ɵz həlⱪinggə.

Həwər alƣin ⱨalimdin nijatliⱪing kəlgəndə.

⁵Ɵzüng talliƣan həlⱪingning iⱪbalini kɵrəy,

ularning külkisigə jor bolup küləy,

sanga mənsup həlⱪing bilən mahtinip yürəy.

⁶Huddi əjdadlirimizdək bizmu gunaⱨ ɵtküzduⱪ,

rəzil, iplas ⱨəm yaman ixlarni ⱨəmmimiz ⱪilduⱪ.

⁷Əjdadlirimiz Misirdiki qeƣida,

mənsitmigənidi Hudaning mɵjizilirini.

Isyan kɵtərgənidi ular Ⱪizil Dengiz boyida,

esidimu tutmastin Hudaning muⱨəbbitini.

⁸Əmma Pərwərdigar ɵzining xəripi üqün,

ularni ⱪutⱪuzup ⱪudritini namayan ⱪilƣanidi.

⁹Uning əmri bilən süyi ⱪurup Ⱪizil Dengizning,

ularni huddi qɵllüktə elip mangƣandək

dengiz astidin yetəkləp mangƣanidi.

¹⁰Pərwərdigar ularni

düxmənlirining ⱪolliridin azad ⱪildi,

rəⱪiblirining qanggilidin ⱪutⱪuzdi.

¹¹Düxmənliri su astida ƣərⱪ boldi,

ulardin birərsimu ⱨayat ⱪalmidi.

¹²Xundila Hudaning wədisigə ixəndi ular,

Pərwərdigarni mədⱨiyələp oⱪudi küy-nahxilar.

¹³Lekin ular uzun ɵtməy untudi Pərwərdigarni,

rawa kɵrmidi ɵzlirigə Hudaning iradisini.

¹⁴Ular qɵldə nəpsigə təslim boldi,

ⱨəm Pərwərdigarni sinap kɵrdi.

¹⁵Tələp ⱪilƣan nərsisini Pərwərdigar bərdi ularƣa,

biraⱪ bir kesəlni küxəndə ⱪilip əwətti ularƣa.

¹⁶Qedirlirida ular ⱨəsət ⱪildi ⱨəzriti Musaƣa,

wə Huda talliƣan muⱪəddəs roⱨaniy Ⱨarunƣa.

¹⁷Xuning bilən yər yerilip Datanni yutuwaldi,

Abiramni ⱨəmraⱨliri bilən ⱪapsiwaldi.

¹⁸Ⱨəmraⱨliri arisiƣa ot qüxürülgənidi,

ot yalⱪuni rəzillərni kɵydürüwətti.

¹⁹Mozay butni yasap ular Sinay^* teƣida,

səjdə ⱪilip qoⱪundi xu altun butⱪa.

²⁰Qɵp yəydiƣan bir kalining butini ular,

ⱪoydi xan-xərəplik Pərwərdigarning orniƣa.

²¹Untudi ular ⱪutⱪuzƣuqisi Hudani,

Misirda uluƣ ixlarni ⱪilƣuqini.

²²Karamitini kɵrsitip Ⱪizil Dengizda,

Ⱨam diyarida mɵjizilər Yaratⱪuqini.

²³Xunga Huda ularni ⱨalak ⱪilmaⱪ bolƣanidi,

lekin Huda təripidin tallanƣan Musa qiⱪip

rəⱨim tiləp Hudaning ƣəzipini basⱪanidi.

²⁴Ular bu güzəl zeminƣa kirixni rət ⱪildi,

Pərwərdigarning wədisigə ixənmidi.

²⁵Ⱪaⱪxap turup ular ɵz qedirlirida,

ⱪulaⱪ salmidi Pərwərdigarning awaziƣa.

²⁶Xunga Huda ⱪolini kɵtürüp ⱪəsəm ⱪilip,

dediki: “Ularni qɵllərdə yoⱪitimən.

²⁷Əwladlirini yat əllərdə wəyran ⱪilip,

yaⱪa yurt, yiraⱪlarƣa tarⱪitimən.”

²⁸Pe’or teƣida ular Ba’al ilaⱨiƣa qoⱪunup,

ɵlüklərgə atalƣan ⱪurbanliⱪlarni yeyixti.

²⁹Ⱪilmixliri ularning ƣəzipini kəltürdi Hudaning,

xu wəjidin waba kesəl tarⱪaldi arisiƣa ularning.

³⁰Xunga Pinihas qiⱪip otturiƣa,

tohtatti u wabani dadilliⱪida.

³¹Buning bilən Pinihas ⱨəⱪⱪaniy dəp ⱨesablandi,

uning tɵⱨpisi əwladtin-əwladⱪiqə tarⱪaldi.

³²Hudaning ƣəzipini ⱪozƣidi ular yənə

Miribada pəyda bolƣan suning boyida.^*

bu səwəblik azar yətti Musaƣa.

³³Qünki ular Musaning jeniƣa təgkəq,

bihəstəlik ⱪilip Musa sɵzləp saldi ularƣa.

³⁴Pərwərdigarning əmrigə hilapliⱪ ⱪilip

ⱨalak ⱪilmay ⱨəmmə yat əllərni,

³⁵əksiqə arilixip ular bilən

ɵgəndi ularning ⱪiliⱪlirini.

³⁶Qoⱪundi ularning butliriƣa,

ⱨalakət elip kəldi but ularƣa.

³⁷Ⱪiz-oƣullirini atidi ⱪurbanliⱪⱪa,

beƣixlap ularni jin-xəytanƣa.

³⁸Atap Kən’andiki butlarƣa,

ular tɵkti ⱪiz-oƣullirining

bigunaⱨ ⱪanlirini,

ⱪanlar bulƣidi zeminni.

³⁹Paⱨixə ayaldək boldi ularning ixliri,

bulƣidi ularni ɵz ⱪilmixliri.

⁴⁰Pərwərdigar ɵzi talliƣan həlⱪigə ƣəzəpləndi,

pəⱪət ɵzigila təwə bolƣan ⱪowmidin nəprətləndi.

⁴¹Xunga ularni taxlap bərdi yat əllərning ⱪoliƣa,

ɵqmən bolup kəlgənlər ⱨɵkümranliⱪ ⱪildi ularƣa.

⁴²Rəⱪibliri ⱪolida ezildi ular,

ⱪəddini püküp, bexini əgdi yawlar.

⁴³Talay ⱪetim ⱪutⱪuzsimu ularni Pərwərdigar,

əmma ⱪəstən boysunuxni rət ⱪilip kəlgəq,

boldi gumran ahirda gunaⱨliri səwəbidin ular.

⁴⁴Xundaⱪtimu ularning pəryadini angliƣanda,

rəⱨimdillik bilən nəzər saldi Huda japaliriƣa.

⁴⁵Ular üqün Pərwərdigar əⱨdisini esigə elip,

meⱨir-muⱨəbbiti birlə burunⱪi niyitidin yenip,

⁴⁶ularƣa rəⱨim-xəpⱪət ⱪildurdi,

ularni əsir alƣuqilarning diliƣa selip.

⁴⁷I Hudayimiz Pərwərdigar, ⱪutⱪuzƣin bizni,

ⱪayta yiƣip əkəlgin yurtimizƣa bizlərni.

Xunda seni mədⱨiyələyli, küyləyli,

xu muⱪəddəs namingƣa xükür-rəⱨmət eytayli.

⁴⁸Mədⱨiyələngəy mənggüdin-mənggügə,

isra’illarni talliƣan Pərwərdigar!

Halayiⱪlar “amin” desun birliktə!

Pərwərdigarƣa ⱨəmdusana oⱪunglar!

107

5-bɵlək

¹Xükür eytinglar Pərwərdigarƣa, xapa’ətliktur Pərwərdigar,

uning meⱨir-muⱨəbbiti mənggülükkə dawam ⱪilar.

²Eytinglar bu mədⱨiyəni Pərwərdigar ⱪutⱪuzƣanlar,

bayan ⱪilinglar yaw ⱪolidin ⱪutⱪuzulƣanlar.

³Eytinglar bu mədⱨiyəni ⱨər yurtlardin yiƣilƣanlar –

xərⱪ, ƣərb, jənub, ximaldin kəlgənlər.

⁴Bəziliri kezip adəm ayaƣ basmiƣan bayawanni,

tapalmidi adəm makan tutⱪan ⱨeqbir yərni.

⁵Ular aq, ussuƣanidi,

ümidliri üzülgənidi.

⁶Külpəttə ⱪalƣinida nida ⱪilƣanidi Pərwərdigarƣa,

Pərwərdigar qiⱪardi ularni külpəttin azadliⱪⱪa.

⁷Tapⱪuqə ular makanlaxⱪudək bir yərni,

tüz yolƣa baxlidi Huda ularni.

⁸Xükür eytsun ular Pərwərdigarƣa,

uning mənggülük muⱨəbbitigə,

insanlarƣa kɵrsətkən mɵjizilirigə.

⁹U ⱪandurƣuqidur ussuzluⱪini qangⱪiƣanlarning,

u toydurƣuqidur esil nemətlər bilən ⱪorsiⱪini aqlarning.

¹⁰Bəzilər zulmət ⱪarangƣuluⱪta yaxiƣanidi,

ular kixənlinip, azab qəkkən məⱨbuslar idi.

¹¹Qünki ular yərgə urup Hudaning əmrlirini,

kɵzgə ilmiƣanidi uluƣ Hudaning kɵrsətmilirini.

¹²Dərd tartⱪuzup kəmtər ⱪildi Huda ularni,

yiⱪilsimu gər ular qiⱪmidi yɵləydiƣan ⱨeqbiri.

¹³Külpəttə ⱪalƣinida nida ⱪilƣanidi Pərwərdigarƣa,

Pərwərdigar qiⱪardi ularni külpəttin azadliⱪⱪa.

¹⁴Ⱪarangƣu zulməttin qiⱪardi ularni,

sundurup zənjir-asarətlirini.

¹⁵Xükür eytsun ular Pərwərdigarƣa,

uning mənggülük muⱨəbbitigə,

insanlarƣa kɵrsətkən mɵjizilirigə.

¹⁶Paqaⱪlap taxlidi u tuq dərwazilarni,

qeⱪip taxlap tɵmür taⱪaⱪlarni.

¹⁷Bəzilər ⱨamaⱪət boldi gunaⱨliridin,

duqar boldi azablarƣa ⱪəbiⱨlikliridin.

¹⁸Yeməkliklərdin bolup bizar,

berip ⱪaldi ɵlüm girdabiƣa ular.

¹⁹Külpəttə ⱪalƣinida nida ⱪilƣanidi Pərwərdigarƣa,

Pərwərdigar qiⱪardi ularni külpəttin azadliⱪⱪa.

²⁰Kesəlliri tepip xipa Hudaning kalamidin,

ⱪutⱪuzdi ularni ɵlüm girdabidin.

²¹Xükür eytsun ular Pərwərdigarƣa,

uning mənggülük muⱨəbbitigə,

insanlarƣa kɵrsətkən mɵjizilirigə.

²²Sunup Hudaƣa minnətdarliⱪ ⱪurbanliⱪini,

mədⱨiyəgə ⱪetinglar uning karamətlirini.

²³Bəzilər olturup kemə-parahotlarda,

tirikqilik ⱪilatti dengizlarda.

²⁴Guwaⱨqidur ular Pərwərdigarning ⱪudritigə,

qongⱪur dengizlarda kɵrsətkən karamətlirigə.

²⁵Əmri bilən ⱨɵrkiritip boranlarni,

pəyda ⱪilƣanidi u dolⱪunlarni.

²⁶Kemilər gaⱨ kɵtürülüp asman-pələkkə,

gaⱨ qüxkinidə dolⱪun təktigə,

ular hətərdin qüxkənidi sarasimigə.

²⁷Ular goya məstlərdək dəldəngxiytti,

ⱨeqⱪandaⱪ qarə-amali ⱪalmiƣanti.

²⁸Külpəttə ⱪalƣinida nida ⱪilƣanidi Pərwərdigarƣa,

Pərwərdigar qiⱪardi ularni külpəttin azadliⱪⱪa.

²⁹U boranni tohtatti,

dolⱪunlarmu tinqidi.

³⁰Xadlandi ular tinqitⱪaqⱪa dolⱪunni,

nixan ⱪilƣan portⱪa yetəklidi Huda ularni.

³¹Xükür eytsun ular Pərwərdigarƣa,

uning mənggülük muⱨəbbitigə,

insanlarƣa kɵrsətkən mɵjizilirigə.

³²Ular həlⱪ arisida uluƣlisun Hudani,

aⱪsaⱪallar məjlisidə mədⱨiyəlisun Hudani.

^33-34Gunaⱨ ⱪilsa bu yərning adəmliri,

bayawanƣa aylandurular dəryaliri,

süyi tügəp ⱪaƣjirar bulaⱪliri,

xorluⱪ tupraⱪ bolar munbət yərliri.

³⁵U yənə kɵl ⱪilar qɵl-bayawanni,

bulaⱪlarƣa aylandurar qangⱪaⱪ yərlərni.

³⁶Aqlarni jaylaxturup axu yərgə,

aylandurar u yərni bir xəⱨərgə.

³⁷Üzüm tikip, yər terip ular,

alidu mol ⱨosullar.

³⁸Bərikət bərgəq ularƣa Pərwərdigar,

zor kɵləmdə sani awup ularning,

ziyadə bolar ularda mal-waranlar.

³⁹Zulum, külpət, dərd selip düxmənliri,

nawada horlinip, aziyip kətsə sanliri,

⁴⁰yaw ⱨɵkümdarlirini xərməndə ⱪilip Pərwərdigar,

ularni dəxt-qɵl, bayawanda sərsan ⱪilar.

⁴¹Zulumdin azad ⱪilip miskinlərni,

ⱪoy padisidək kɵp ⱪilidu əwladlirini.

⁴²Buni kɵrüp xadlinidu ⱨəⱪⱪaniylar,

aƣzi etilip, ünsiz turar pasiⱪlar.

⁴³Kɵngül ⱪoysun bu ixlarƣa əⱪli barlar,

Hudaning mənggülük muⱨəbbitini qüxənsun ular.

108

Dawut yazƣan mungluⱪ munajat

¹Ixənqim kamildur sanga, i Huda!

Pütün ⱪəlbim bilən mədⱨiyə oⱪuymən nahxamda.

²Əy lira,^* qiltar oyƣan əmdi,

ⱪəsidə oⱪup oyƣitayli tangni.

³I Pərwərdigar, xükürlər eytip sanga,

küyləymən seni həlⱪlər, yat əllər ara.

⁴Qünki mənggülük muⱨəbbiting asmandin bipayan,

sadaⱪiting xunqə moldur, bulutlarƣa taⱪaxⱪan.

⁵I Huda, uluƣluⱪung kɵrsitilgəy asman-pələktə,

xan-xəriping namayan bolƣay pütkül yər yüzidə.

⁶Du’ayimni ⱪilip ijabət, ⱪutⱪuz bizni ong ⱪolungda,

ɵzüng sɵygən bəndiliring nijatliⱪ tapar xunda.

⁷Huda mundaⱪ dedi ɵz muⱪəddəsliki bilən:

“Xadliⱪta həlⱪimgə bɵlüp berimən Xəkəm diyarini,

təⱪsim ⱪilip berimən Sukkot wadisini.

⁸Gil’ad rayoni mənsuptur manga,

Manassəmu ⱨəm tə’əlluⱪ manga.

Əfrayim – beximdiki dubulƣamdur,

Yəⱨuda mening səltənət ⱨasamdur.

⁹Put yuyidiƣan ⱪaqidur Mo’ab manga,

qoruⱪumni taxlaymən Idomƣa.

Quⱪan salimən,

Filistiyə üstidin ƣəlibə ⱪilƣinimƣa.”^*

¹⁰Kim meni Idomƣa zəpər bilən baxlap kirər?

Kim meni u mustəⱨkəm xəⱨərgə baxlap barar?

¹¹I Huda, bizdin waz kəqtingmu?

Biz bilən birgə bolmiding jəngdimu?

¹²Düxməngə ⱪarxi bizgə bol yardəmdə,

biⱨudidur zəpər ⱪazinix insanning yardimidə.

¹³Hudaning ⱪudriti bilən jəng ⱪilimiz baturlarqə,

igəm ɵzi dəssəp qəylər düxminimiz tügigüqə.

109

Dawut yazƣan munajat bolup, nahxa ⱪilip eytilsun dəp, nəƣmiqilər bexiƣa tapxurulƣan.

¹I mədⱨiyəmning igisi Huda,

süküt ⱪilip, ünsiz turma.

²Ⱨaⱪarət ⱪilmaⱪta rəzillər manga,

yalƣanqi tilida qaplap ⱪara.

³Nəprətlik sɵzliri aldi meni ⱪorxawƣa,

səwəbsiz ⱨujum ⱪilip ular manga.

⁴Muⱨəbbitimni bərsəmmu mən ularƣa,

xikayətlər ⱪildi ular ⱪarxi manga,

xundaⱪtimu ular üqün ⱪilimən du’a.

⁵Yahxiliⱪimƣa bərdi yamanliⱪni,

sɵygümgə bərdi nəprətni.

⁶Bir rəzil adəm əyiblisun uni sotta,

dəwagərdin birsi bolsun ong yenida.

⁷Əyibkar bolup qiⱪsun u soraⱪta,

du’asimu gunaⱨliⱪ bolsun ⱨətta.

⁸Ɵmri ⱪisⱪa bolsun,

mənsipini baxⱪisi alsun.

⁹Baliliri yetim bolsun,

hotuni tul ⱪalsun.

¹⁰Oƣulliri ƣeribanə ɵyidin ayrilip sərgərdan bolsun,

yaⱪa yurtlarda rizⱪini izdəp tiləmqi bolsun.

¹¹Tartiwalsun jazanihorlar mal-mülkini,

buliwalsun yatlar ⱨəmmə bisatlirini.

¹²Meⱨribanliⱪ kɵrsətmisun uningƣa ⱨeqkim,

kɵngül bɵlüp yürmisun baliliriƣa birkim.

¹³Ⱪurutulup uning nəsli,

ⱪalmisun keyinki əwladliri.

¹⁴Əjdadlirining ⱪəbiⱨliki yadida bolsun Hudaning,

untulmisun gunaⱨliri ⱨəm anisining.

¹⁵Hudaning kɵz aldida bolsun da’im gunaⱨliri,

yər yüzidin yoⱪ ⱪilsun Pərwərdigar uning namini.

¹⁶Qünki u meⱨribanliⱪ kɵrsətməstin baxⱪilarƣa,

ɵltürmək boldi, bəlki selip zulum

ezilgən, dili sunuⱪ, yoⱪsullarƣa.

¹⁷U huxtar idi lənət oⱪuxⱪa,

xunga lənət kəlsun uning bexiƣa.

Rayi yoⱪ idi bəht tiləxkə,

xunga bəht yiraⱪ bolsun uningƣa.

¹⁸U ɵzigə kiyim ⱪilip kiyidu lənətlərni,

lənətliri aⱪⱪan sudək kirsun iqigə,

singip kətsun may kəbi sɵngəklirigə.

¹⁹Lənətliri oriwalsun uni tonidək,

da’im belini baƣliwalsun bəlbeƣidək.

²⁰Pərwərdigar ənə xundaⱪ jazalisun xikayəttə bolƣanlarni,

ədəplisun, yaman sɵzlər bilən manga ⱨujum ⱪilƣanlarni.

²¹I Rəbbim Pərwərdigar,

namingning ⱨɵrmiti üqün yardəm ⱪil manga,

ⱪutⱪuz meni, mənggülük muⱨəbbiting bolƣaq əla.

²²Qünki mən ⱨajətmən, biqarə,

dərdimmu jiⱪ iqimdə.

²³Ⱨayatimmu ƣuwalaxti gugumdiki kɵlənggidək,

qətkə ⱪeⱪildim ⱪeⱪiwetilgən qekətkidək.

²⁴Roza tutup putumning madari kətti,

tenim jüdəp, ⱨarƣinliⱪ yətti.

²⁵Düxmənlirim aldida boldum rəswa,

bexini qayⱪar ular manga ⱪaraxⱪanda.

²⁶Pərwərdigar, i Rəbbim yardəm ⱪil manga,

ⱪutⱪuz meni, mənggülük muⱨəbbət səndə bolƣaqⱪa.

²⁷Ular bilsun bu ixni sening ⱪilƣanliⱪingni,

manga nijatkar bolƣuqining Pərwərdigar ikənlikini.

²⁸Məyli ular oⱪuwərsun lənət manga,

biraⱪ sən ata ⱪilisən bəht manga.

Ⱨujum ⱪilsa ular hijaləttə ⱪalar,

əmma mənki ⱪulung xadliⱪⱪa tolar.

²⁹Rəⱪiblirim kiyim ⱪilsun hijalətni,

ton ⱪilip yepinsun nomusni.

³⁰Pərwərdigarƣa xükür eytimən,

uni awam iqidə mədⱨiyələymən.

³¹Qünki u turar moⱨtajlarning ong yenida,

ularni ɵlümgə məⱨkum ⱪilƣanlardin ⱪutⱪuzuxⱪa.

110

Dawut yazƣan munajat

¹Pərwərdigar eyttiki Igəmgə:

“Olturƣin sən mening ong yenimda,

mən dəssətküqə düxmənliringni ayiƣing astiƣa.”

²Pərwərdigar zoraytar ⱨɵkümranliⱪingni Si’ondin,

dərki u: “Sən ⱨɵküm sürgin düxmənliring üstidin.”

³Sən jəng ⱪilidiƣan küni ⱪoxunliringni yiƣⱪanda,

təⱪwadarliring qiⱪar ɵz ihtiyarliⱪida.

Sübⱨidə kelur nəwⱪiranlar aldingƣa,

huddi xəbnəm qüxkəndək sən turƣan taƣⱪa.

⁴Pərwərdigar ɵzgərtməs ⱪilƣan munu ⱪəsimini:

“Mənggülük roⱨaniydursən Malkisidiⱪning^* ⱪataridiki.”

⁵I Pərwərdigar, turar Igəm sening ong təripingdə,

padixaⱨlarni bitqit ⱪilar ƣəzipini kɵrsətkən künidə.

⁶U ⱨɵküm qiⱪirar hudasiz həlⱪlərgə,

baxlirini kukum-talⱪan ⱪiliwetər yər yüzidə,

ularning zeminini toldurar jəsətlərgə.

⁷Igəm yol üstidə bulaⱪtin su iqər,

küq-ⱪuwwət elip, məydisini egiz kɵtürər.

111

¹Ⱨəmdusana oⱪunglar Pərwərdigarƣa!

Ⱨəⱪ yoldiki jama’ət arisida,

xükür eytimən ihlas bilən Hudaƣa.

²Uluƣdur Pərwərdigarning biz üqün ⱪilƣanliri,

buni tilƣa elixar ularning ⱪədrini bilgənliri.

³Pərwərdigarning əjri ⱨəywət, xərəpliktur,

uning ⱨəⱪⱪaniyliⱪi mənggülükkə dawam ⱪilur.

⁴Mɵjizilirini kixilərning esigə salar,

rəⱨimdil, xəpⱪətliktur Pərwərdigar.

⁵Huda berər ihlasmənlirining rizⱪini,

ta’əbəd esidə tutar ɵz əⱨdisini.

⁶Pərwərdigar kɵrsətti ɵz ⱪowmiƣa ⱪudritini,

elip berip ularƣa yatlarning zeminini.

⁷U adil, wapadar ⱨərbir ixida,

ixənq bardur yolyoruⱪlirida.

⁸Dawamlixar ular mənggü, ta’əbədkə,

orundilar ular durus, sadaⱪətliktə.

⁹Muⱪəddəs, sürlüktur Huda!

Ⱪutulux bərdi ɵz ⱪowmiƣa,

əⱨdisini bekitti ⱨəm mənggügə.

¹⁰Danaliⱪ Pərwərdigarƣa ihlasmənliktin baxlinur,

əmrigə əməl ⱪilƣuqilar ⱨekmətlik bolur.

Pərwərdigarƣa atalƣan ⱨəmdusanalar mənggülük bolur.

112

¹Pərwərdigarƣa ⱨəmdusana oⱪunglar!

Nəⱪədər bəhtliktur Pərwərdigarƣa ihlasi barlar,

uning əmrlirigə boysunuxtin sɵyünidiƣanlar.

²Küqlük bolar zeminda ularning əwladliri,

bəhtliktur durus yolda mangƣanliri.

³Ɵyliri bayliⱪⱪa tolup, dɵlətmən bolar,

ularning ⱨəⱪⱪaniyliⱪi mənggülük bolar.

⁴Ⱪarangƣuluⱪta nur qeqilar durus yolda mangƣanlarƣa,

rəⱨimdil, xəpⱪətlik, ⱨəⱪⱪaniydur Huda.

⁵Sahawətlik, mərd adəm bəhtlik bolar,

adil ix ⱪilidiƣanlar ronaⱪ tapar.

⁶Ⱨəⱪⱪaniylar əbədiy məƣlup bolmas,

ⱨəⱪⱪaniylar mənggügə untulmas.

⁷Ⱪorⱪup kətməs xum həwər kəlsə ularƣa,

kɵngli toⱪtur ularning tayanƣaq Pərwərdigarƣa.

⁸Iradisi mustəⱨkəmdur ularning,

ⱪorⱪmaydu əsla,

kɵrər məƣlubiyitini düxmənlirining.

⁹Sehiydur ular, yoⱪsullarƣa berər sədiⱪə,

mənggü untulmas ⱨəⱪⱪaniyliⱪi ularning,

ⱪudrət tepip, na’il bolar ⱨɵrmitigə kixilərning.

¹⁰Buni kɵrüp qidimaydu rəzillər,

aqqiⱪida ɵz gɵxini ɵzi yər,

zə’iplixip ümidliri üzülər.

113

¹Pərwərdigarƣa ⱨəmdusana oⱪunglar!

Əy uning ⱪulliri, uni mədⱨiyələnglar,

Pərwərdigar namiƣa mədⱨiyələr eytinglar.

^2-3Təriplənsun nam-xɵⱨriti Hudaning

ⱨazirmu wə keyinmu ta adaⱪⱪiqə.

Mədⱨiyələnsun nam-xɵⱨriti Hudaning

sübⱨi-tangdin taki gugum-xamƣiqə.

⁴Ⱨɵkümranliⱪ ⱪilar Huda barqə insan üstidin,

xan-xəripi büyüktur, üstün turar pələktin.

^5-6Ⱨeqkim təng bolalmas igimiz Pərwərdigarƣa,

kimmu ohxar u samawi təhttə olturup,

asman-zeminƣa yuⱪiridin nəzər salƣuqiƣa?

⁷U ⱪutⱪuzar yoⱪsullarni yoⱪsulluⱪ tozanidin,

elip qiⱪar u moⱨtajlarni moⱨtajliⱪ əwrizidin.

⁸Olturƣuzar ularni xaⱨzadilər ⱪexiƣa,

ⱨətta ɵz həlⱪining xaⱨzadiliri yeniƣa.

⁹U xadliⱪ beƣixlar tuƣmas ayalƣa,

ɵz ɵyidə ⱪuqiⱪini toldurar baliƣa.

Ⱨəmdusana oⱪunglar Pərwərdigarƣa.

114

¹Isra’illar Misirdin qiⱪⱪinida,

Yaⱪup əwladi yat həlⱪlərdin ayrilƣinida,

²Yəⱨuda nəslini makan ⱪildi Huda,

Isra’illar Hudaning ilkidiki həlⱪ idi.

³Dengiz buni bilip yandi arⱪiƣa,

I’ordan dəryasi burulup kəynigə aⱪti.

⁴Taƣlar qɵqüp səkridi ⱪoqⱪarlardək,

dɵnglərmu ürküdi ⱪozilardək.

⁵Əy dengiz, nemixⱪa ⱪaqisən?

Əy I’ordan dəryasi, nemixⱪa kəyninggə aⱪisən?

⁶Əy taƣlar, nemixⱪa səkrəysilər?

Əy dɵnglər, nemixⱪa ürküysilər?

⁷Əy zemin, təwrən Rəbbingning siymasidin,

Yaⱪup etiⱪad ⱪilƣan Hudaning kəlginidin.

⁸U taxni kɵlqəkkə aylandurdi,

uyul taxtin bulaⱪni pəyda ⱪildi.

115

¹Bolmisun bizgə i Pərwərdigar, bolmisun bizgə,

bolsun mənsup xan-xɵⱨrət pəⱪət ɵzünggə,

qünki mənggülük muⱨəbbət wə

qəksiz sadaⱪitingni kɵrsətting bizgə.

²Məshirə ⱪilixip bizni yat həlⱪlər,

“Ⱪeni ularning Hudasi” deyixər.

³Bizning Hudayimiz ərx’əlada turar,

nemə ⱪilixni halisa xu ixni ⱪilar.

⁴Yat həlⱪlərning ilaⱨliri altun-kümüx buttur pəⱪət,

ularni insan ɵz ⱪolida ⱪilidu ijad.

⁵Ularning eƣizliri turup sɵzliyəlməs,

kɵzliri turup ⱨeqnemini kɵrəlməs.

⁶Ⱪulaⱪliri tursimu angliyalmas,

burni turupmu ⱨeqnemini puriyalmas.

⁷Ⱪolliri bolsimu, ular tutalmas,

putliri bolsimu, mangalmas.

Kanayliridin awaz qiⱪiralmas.

⁸Butlarni yasiƣanlar wə ularƣa ümid baƣliƣanlar,

ɵzliri ahiri butliriƣa ohxap ⱪalar.

⁹Əy Isra’il əwladliri, tayininglar Igimizgə,

u yɵlənqük, ⱪalⱪandur silərgə.

¹⁰Əy Ⱨarun jəməti,^* tayininglar Igimizgə,

u yɵlənqük, ⱪalⱪandur silərgə.

¹¹Əy Pərwərdigarƣa ihlasi barlar,

tayininglar Igimizgə.

U yɵlənqük, ⱪalⱪandur silərgə.

¹²Pərwərdigar bizni yad etər,

isra’il əwladiƣa bərikət berər,

Ⱨarun jəmətigə bərikət berər.

¹³Ⱨəmmisi Pərwərdigarƣa ihlas ⱪilsa əgər,

kiqikidin-qongiƣiqə bərikət berər.

¹⁴Igimizdin silər wə əwladliringlarƣa,

ⱨəssiləp bəht-sa’adət yaƣⱪay da’ima.

¹⁵Yaratⱪuqi Pərwərdigar asman wə zeminni,

silərgə ata ⱪilƣay qəksiz bəhtni.

¹⁶Asmanlar tə’əlluⱪtur Pərwərdigarƣa,

zeminni u bərgən insanlarƣa.

¹⁷Ɵlüklər süküttidur ⱪəbriliktə,

mədⱨiyələr bolmas gɵrdə Igimizgə.

¹⁸Lekin biz bügün wə ta’əbədkə,

Rəbbimizni təripləymiz mənggügə.

Ⱨəmdusana oⱪuyli Igimizgə!

116

¹Mən sɵyimən Pərwərdigarni,

qünki u anglar nidayimni,

anglar mening ɵtünüxümni.

²Ⱪulaⱪ salƣaq u manga,

ɵmürwayət nida ⱪilimən uningƣa.

³Ɵlüm asarətliri qirmidi meni,

gɵristan wəⱨimisi ⱪapsidi meni,

ⱪayƣu, ⱨəsrət ilkigə aldi meni.

⁴Nida ⱪildim tilƣa elip Pərwərdigar namini,

“Ⱪutⱪuzƣin dəp Pərwərdigar jenimni.”

⁵Pərwərdigar xəpⱪətlik, ⱨəⱪⱪaniydur,

u bizning Hudayimiz rəⱨimdildur.

⁶Pərwərdigar panaⱨida saⱪlaydu panaⱨsizni,

u beximƣa kün qüxkəndə ⱪutⱪuzdi meni.

⁷Ⱨəy ⱪəlbim, ⱪaytⱪin əmdi aramgaⱨingƣa,

qünki Pərwərdigar iltipat əylidi manga.

⁸I Huda, saⱪliding ɵlümdin jenimni,

yiƣa-zar ⱪilixtin kɵzlirimni,

putlixip ketixtin putlirimni.

⁹I Pərwərdigar, sən üqün yaxaymən paniy aləmdə.

¹⁰Xunqə har bolsammu yənila,

ixənq baƣlidim mən sanga.

¹¹Lekin dedim mən təxwix ara:

“Yalƣanqidur ⱨəmmə insanlar.”

¹²Pərwərdigarning manga ⱪilƣan iltipatiƣa,

ⱪandaⱪ jawab ⱪilay uningƣa?

¹³Nijatliⱪ ⱪədiⱨini sundum Hudaƣa,

xükür eytip uning namiƣa.

¹⁴Pərwərdigarning həlⱪi aldida,

ⱪəsimimni ⱪilimən ada.

¹⁵Ɵlüp kətsə təⱪwadar bəndiliri,

Pərwərdigar ətiwarlar ularning ɵlümini.

¹⁶I Pərwərdigar, mən sening ⱪulungdurmən,

bərⱨəⱪ, sening peⱪir ⱪulungdurmən.^*

Azad ⱪilding meni ɵzüng asarəttin.

¹⁷Xükür ⱪurbanliⱪi sunimən sanga,

xükür eytimən namingƣa, i Huda.

¹⁸Pərwərdigarning həlⱪi aldida,

ⱪəsimimni ⱪilimən ada.

¹⁹Ibadəthanining ⱨoyla-aramlirida,

əy Yerusalem, turup sening otturangda,

ⱪəsimimni ⱪilimən ada.

Ⱨəmdusana oⱪunglar Pərwərdigarƣa.

117

¹Əy jaⱨan əⱨli, mədⱨiyələnglar Pərwərdigarni,

əy pütkül ⱪowmlar, alⱪixlanglar Hudani.

²Büyüktur uning mənggülük muⱨəbbiti,

mənggülükkə dawam ⱪilar wapadarliⱪi,

ⱨəmdusana oⱪunglar Pərwərdigarƣa.

118

¹Xükür eytinglar Hudaƣa, xapa’ətliktur Pərwərdigar,

uning meⱨir-muⱨəbbiti mənggügə dawam ⱪilar.

²“Uning meⱨir-muⱨəbbiti mənggülük” desun Isra’illar.

³“Uning meⱨir-muⱨəbbiti mənggülük” desun Ⱨarun jəmətigə təwə bolƣanlar.

⁴“Uning meⱨir-muⱨəbbiti mənggülük” desun Pərwərdigarƣa ihlasi barlar.

⁵Nida ⱪildim Pərwərdigarƣa kün qüxkəndə beximƣa,

nidayimƣa jawabən nijatliⱪ bərdi manga.

⁶Ⱪorⱪmaymən, mən tərəptə Pərwərdigar,

nemə ⱪilalisun meni insanlar!

⁷Mən tərəptidur yɵlənqüküm Pərwərdigar,

kɵz aldimda məƣlup bolar manga ɵq bolƣanlar.

⁸Baxpanaⱨ ⱪilmaⱪ Pərwərdigarni,

əwzəldur yɵlənqük ⱪilixtin insanni.

⁹Baxpanaⱨ ⱪilmaⱪ Pərwərdigarni,

əwzəldur tayanq ⱪilmaⱪtin ⱨakimlarni.

¹⁰Ⱪorxiwalƣan bolsimu barliⱪ yat əllər meni,

Pərwərdigarning yardimidə məƣlup ⱪildim mən ularni.

¹¹Xundaⱪ, ⱪorxap turƣan bolsimu ətrapimni,

Pərwərdigarning yardimidə məƣlup ⱪildim mən ularni.

¹²Ⱪorxiwalƣan bolsimu ular meni ⱨərilərdək,

ɵqürüldi xunqə tezdin ⱪurƣaⱪ tikən otidək.

Pərwərdigarning yardimidə məƣlup ⱪildim mən ularni.

¹³Yiⱪilƣili tas ⱪalƣanidim ittirilgəndə,

biraⱪ, mən yiⱪilmidim Pərwərdigarning yardimidə.

¹⁴Pərwərdigar munajitim wə küq-ⱪudritim,

boldi u mening nijatkarim.

¹⁵Ⱨəⱪⱪaniylarning qedirlirida nijatliⱪ təntənisi yangrimaⱪta,

Pərwərdigarning küqlük ong ⱪoli zəpər ⱪuqmaⱪta.

¹⁶Pərwərdigarning küqlük ong ⱪoli ƣəlibə ⱪilmaⱪta,

Pərwərdigarning küqlük ong ⱪoli zəpər ⱪuqmaⱪta.

¹⁷Mən ɵlməymən, bəlki yaxaymən,

Pərwərdigarning mɵjizilirini bayan əyləymən.

¹⁸Meni ⱪattiⱪ jazaliƣan bolsimu Pərwərdigar,

əmma taxlap ⱪoymidi ɵlümgə zinⱨar.

¹⁹Ⱨəⱪⱪaniylar kiridiƣan dərwazini eqip beringlar manga,

mən kirip, xükür eytimən Pərwərdigarƣa.

²⁰Dərwazisidur bu Pərwərdigarning,

kirix yolidur ⱨəⱪⱪaniylarning.

²¹Sanga xükür eytimən Huda,

qünki manga jawab berip

nijatkar boldung manga.

²²Kerəksiz bilingən tax tamqilarƣa,

ultax boldi ⱪuruluxⱪa.

²³Pərwərdigarning ⱪilƣan ixidur bu,

kɵz aldimizda karamət boldi u.

²⁴Pərwərdigar yaratⱪan muxu kündə,

huxalliⱪⱪa tolayli ⱪilip təntənə.

²⁵I Pərwərdigar, ɵtünəy, ⱪutⱪuzƣin bizni,

ɵtünəy, muwəppəⱪiyətlik ⱪilƣaysən iximizni.

²⁶Bəht yar bolƣay Pərwərdigarning namida kəlgüqigə,

bəht tiləymiz Pərwərdigarning ɵyidin silərgə.

²⁷Pərwərdigar^* – yaratⱪuqidur,

birdinbir yeganidur.

U qaqar nurini üstimizgə.

Ⱪurbanliⱪni baƣlanglar tanilar bilən

ⱪurbanliⱪ supisining burjəklirigə.

²⁸Sən mening Ilaⱨimsən, xükür eytimən,

sən mening Ilaⱨimsən, uluƣlaymən.

²⁹Xükür eytinglar Hudaƣa, xapa’ətliktur Pərwərdigar,

uning meⱨir-muⱨəbbiti mənggügə dawam ⱪilar.

119

¹Nəⱪədər bəhtliktur durus yolda mangidiƣanlar,

Pərwərdigarning təlimliri boyiqə yaxaydiƣanlar.

²Bəhtliktur yənə uning pərzlirini tutup,

pütün ⱪəlbi bilən uningƣa təlpünidiƣanlar.

³Naⱨəⱪqilik ⱪilmas ular əsla,

mangar ular Pərwərdigarning yolida.

⁴Pərwərdigar qüxürdüng əmrliringni,

əstayidil orundanglar dəp ularni.

⁵Ⱪararlirim ⱪət’iy bolƣay mening,

pərmanliringƣa əməl ⱪilixⱪa sening.

⁶Kɵngül bɵlsəm əmrliringgə,

ⱪalmasmən əsla xərməndilikkə.

⁷Mədⱨiyələymən pak ⱪəlbimdin seni,

ɵgənginimdə adil ⱨɵkümliringni.

⁸Pərmanliringƣa əməl ⱪilimən,

meni ⱨərgiz taxliwətmigin.

⁹Yax yigit ⱪandaⱪ ⱪilip pak yolda mangalar?

U pəⱪət kalamingƣa əməl ⱪilƣanda bolar.

¹⁰Pütün ⱪəlbim bilən təlpündüm sanga,

ⱨəⱪ yolungdin ezixⱪa yol ⱪoyma manga.

¹¹Niyət ⱪilip gunaⱨkar bolmasliⱪni,

saⱪlidim ⱪəlbimdə qing sɵzliringni.

¹²Ⱨəmdusana bolsun Pərwərdigar sanga,

ɵgətkəysən nizamliringni manga.

¹³Bayan ⱪilimən ⱨɵkümliringni,

jakarlaymən təlimliringni.

¹⁴Adəmlər hursən bolƣandək bayliⱪliridin,

xadlinimən ɵzüm pərzliringdin.

¹⁵Qongⱪur pikir ⱪilimən nizamliring üstidə,

oylinimən yol-ⱪədiming ⱨəⱪⱪidə.

¹⁶Sɵyündürdi nizaming meni,

untumaymən kalamingni.

¹⁷Xəpⱪitingni kɵrsətsəng mən ⱪulungƣa,

xunda mən ⱨayat yaxap, əməl ⱪilay kalamingƣa.

¹⁸Aqⱪin mening kɵzlirimni,

kɵrəy təlimliringdiki karamətlərni.

¹⁹musapirmən zeminda,

əmringni yoxurma.

²⁰Yürikim ezilməktə,

təlpünüxtin ⱨɵkümünggə.

²¹Əyiblərsən lənətkə uqriƣan təkəbburlarni,

əmringdin ezip kətkən məƣrurlarni.

²²Elip taxla məndin horluⱪ, məshirilərni,

qünki ada ⱪilip kəldim pərzliringni.

²³Toplixip manga suyiⱪəst ⱪilsimu ⱨɵkümranlar,

peⱪir ⱪulung nizamliring ⱨəⱪⱪidə yənila oylinar.

²⁴Pərzliring sɵyüniximdur,

ⱨəm mening məsliⱨətqimdur.

²⁵Ⱪara tupraⱪ ⱪoyniƣa almaⱪqi meni,

wədənggə wapa ⱪilip ⱪutⱪuzƣin ⱨayatimni.

²⁶Bayan ⱪilsam sanga yürgən yollirimni,

jawab bərding, ɵgət manga nizamliringni.

²⁷Təlimingni qüxinixkə ⱪadir ⱪil meni,

xunda hiyal ⱪilalaymən karamət ixliringni.

²⁸Ƣəm-ƣussilar dəstidin ⱨarduⱪ yətti jenimƣa,

kalamingƣa asasən küq-ⱪudrət bərgin manga.

²⁹Ⱨiylə-mikir yolidin neri ⱪil meni,

iltipat əyləp ɵgət manga təlimliringni.

³⁰Tallidim mən sadaⱪət yolini,

kɵz aldimda tutimən ⱨɵkümliringni.

³¹Pərwərdigar, qing tutimən pərzliringni,

xərməndiliktə ⱪoymiƣin meni.

³²Ⱪizƣin ada ⱪilimən sening əmrliringni,

qünki xundaⱪ ⱪilixⱪa ⱪadir ⱪilding meni.

³³Pərwərdigar, qüxəndürgin əmrliringni,

ahirƣiqə ijra ⱪilay ularni.

³⁴Ⱪəlbimni yorutⱪaysən, yolungni tutay,

pütün wujudum bilən ularƣa əməl ⱪilay.

³⁵Əmrliringgə boysunidiƣan ⱪilƣin meni,

qünki sɵyimən sening yolungda mengixni.

³⁶Mayil ⱪilmay ⱪəlbimni mənpə’ətlərgə,

bəlki huxtar ⱪilƣin sening pərzliringgə.

³⁷Nəzirimni yiraⱪ ⱪilip sahtiliⱪtin,

ɵz yolung bilən meni roⱨlandurƣin.

³⁸Əməlgə axursang ⱪulungƣa bərgən wədəngni,

həlⱪlər tehimu ⱨɵrmətlər seni.

³⁹Ⱪorⱪimən, yiraⱪ ⱪil məndin ⱨaⱪarətlərni,

bərⱨəⱪ, əla bilimən ⱨɵkümliringni.

⁴⁰Nəⱪədər təlpünimən yolyoruⱪliringƣa,

meni roⱨlandurƣin ⱨəⱪⱪaniyliⱪingda.

⁴¹I Pərwərdigar, kɵrsitip mənggülük muⱨəbbitingni,

ata ⱪil manga wədə ⱪilƣan nijatliⱪingni.

⁴²Xunda jawab berələymən manga ⱨaⱪarət ⱪilƣanlarƣa,

qünki mən tayinimən pəⱪət sening kalamingƣa.

⁴³Bərgin manga ⱨəⱪiⱪiy guwaⱨliⱪning pursitini,

baƣliƣanmən pəⱪət sening ⱨɵküminggə ümidimni.

⁴⁴Boysunimən da’ima təlimliringgə,

ri’ayə ⱪilimən ⱨəm mənggügə.

⁴⁵Mən ərkin, bihətərmən ⱨəmmə jaylarda,

qünki ita’ət ⱪilip kəldim yolyoruⱪliringƣa.

⁴⁶Pərzliringni sɵzləymən xaⱨlar aldida,

rəddiyəgə uqrap nomusta ⱪalmasmən əsla.

⁴⁷Əmrliringdin hursən bolurmən,

ⱨəm ularni xunqə sɵyərmən.

⁴⁸Əmrliringni ⱨɵrmətləp ⱪolum turar kɵksümdə,

oylinimən mən sɵygən pərmanliring ⱨəⱪⱪidə.

⁴⁹Untumiƣin mən ⱪulungƣa bərgən wədəngni –

manga ümid beƣixliƣan axu kalamingni.

⁵⁰U manga təsəllidur külpəttə ⱪalƣinimda,

yengi roⱨ ata ⱪilar wədəng manga.

⁵¹Məshirə ⱪilsimu meni da’im təkəbburlar,

lekin sening təlimliringdin aƣmidim zinⱨar,

⁵²əslisəm ⱪədimdin buyanⱪi ⱨɵkümliringni,

i Pərwərdigar, berər ular manga təsəllini.

⁵³Tərk ətkəq rəzillər təlimliringni,

basalmaymən ularƣa bolƣan ƣəzipimni.

⁵⁴Yürsəmmu gər musapir bolup paniy dunyada,

pərmanliring boldi manga güzəl bir nahxa.

⁵⁵I Pərwərdigar, ri’ayə ⱪilimən təlimliringgə,

yad etimən namingni ⱨərbir keqidə.

⁵⁶Ri’ayə ⱪilip kəldim sening yolyoruⱪliringƣa,

bundaⱪ ⱪilix bəht elip kəldi manga.

⁵⁷Nesiwəm dəp bilimən Pərwərdigar bir ɵzüngni,

wədəm bar qing tutuxⱪa kalamingni.

⁵⁸Qin ⱪəlbimdin istəp kəldim xəpⱪitingni,

kɵrsət manga wədə ⱪilƣan iltipatingni.

⁵⁹Nəzər selip mengiwatⱪan yolumƣa,

ⱪədimimni buridim pərzliring tamaniƣa,

⁶⁰aldiridim,

əmrliringni ijra ⱪilixⱪa,

ⱨəm ⱨeq ikkilənmidim.

⁶¹Gər rəzillər qirmiwalsimu arƣamqilar bilən meni,

untumasmən əsla sening təlimliringni.

⁶²Adalət bolƣaq ⱨɵkümliringdə

ⱨəmdusana oⱪuymən sanga,

ornumdin turup yerim keqidə.

⁶³Dostturmən sanga ihlas ⱪilƣanlarƣa,

xerikmən yolyoruⱪliringƣa ri’ayə ⱪilidiƣanlarƣa.

⁶⁴Mənggülük muⱨəbbitinggə tolƣandur zemin,

i Pərwərdigar, nizamliringni manga ɵgətkin.

⁶⁵Ɵzüng bərgən wədənggə asasən,

ⱪulungƣa yahxiliⱪ ⱪilding sən.

⁶⁶Əⱪil wə bilim bərgəysən manga,

qünki mən ixəndim pərmanliringƣa.

⁶⁷Azƣun idim sən meni jazalaxtin ilgiri,

qing tutimən esimdə əmdi sening sɵzüngni.

⁶⁸Nəⱪədər xapa’ətliksən, ayimiding yahxiliⱪingni,

ɵgətkin manga nizamliringni.

⁶⁹Təkəbburlar qaplisimu yalƣandin boⱨtan manga,

əmma qin ⱪəlbimdin boysunimən yolyoruⱪliringƣa.

⁷⁰Bihudlaxⱪan ularning ⱪəlbi əzəldin,

mən bolsam sɵyünimən təlimingdin.

⁷¹Tartⱪan japalirim paydiliⱪ boldi manga,

qünki mengixni ɵgəndim pərmanliring yolida.

⁷²Eytⱪan təlimliringni bilimən əla,

mingliƣan altun-kümüxtin ⱨətta.

⁷³Ⱪolliring yaratti, yasidi meni,

əⱪil bər manga, qüxinəy əmrliringni.

⁷⁴Meni kɵrüp hux bolar ihlasi barlar sanga,

qünki mən ümidimni baƣliƣanmən kalamingƣa.

⁷⁵Bilimən ⱨɵkümliringning adilliⱪini,

sadaⱪiting bilən jazaliding meni.

⁷⁶Bərgən wədəng boyiqə mən ⱪulungƣa,

mənggülük muⱨəbbiting təsəlli bolsun manga.

⁷⁷Rəⱨim ⱪilip, saⱪliƣaysən ⱨayatimni,

xadliⱪim dəp bilip kəldim təlimliringni.

⁷⁸Xərməndə bolsun təkəbburlar,

səwəbsizla manga naⱨəⱪqilik ⱪilƣanlar,

oylirim pəⱪət təlimliring ⱨəⱪⱪidə bolar.

⁷⁹Sanga ihlas ⱪilidiƣanlar kəlsun yenimƣa,

pərzliringni ɵgitimən ularƣa.

⁸⁰Səmimiy ijra ⱪilay pərmanliringni,

xərməndiliktə ⱪoymas ular meni.

⁸¹Zariⱪimən nijatliⱪingƣa,

ümidimni baƣliƣaq kalamingƣa.

⁸²Seni “ⱪaqan təsəlli berərkin” dəp,

zariⱪixtin taldi kɵzlər wədə kütüp.

⁸³Ohxap ⱪalsammu gər ista ⱪuriƣan kerəksiz tulumƣa,

ⱨər dəm qing saⱪlidim pərmanliringni yadimda.

⁸⁴Ⱪaqanƣiqə kütküzərsən mən ⱪulungni,

ⱪaqanliⱪⱪa jazalarsən manga ziyankəxlik ⱪilƣanlarni?

⁸⁵Təkəbburlar mən üqün ora kolar,

ular sening təliminggə ⱪarxi qiⱪar.

⁸⁶Ixənqliktur əmrliringning ⱨəmmisila,

yardəm ⱪil, düxmənlər səwəbsiz ziyankəxlik ⱪilmaⱪta manga.

⁸⁷Yər yüzidin yoⱪ ⱪilay dəp ⱪalsimu ular meni,

əmma tərk ətmidim yolyoruⱪliringni.

⁸⁸Roⱨlandurƣin meni mənggülük muⱨəbbitingdə,

boysunay sening bərgən pərzliringgə.

⁸⁹I Pərwərdigar, kalaming mənggülüktur,

u ərxtə mukəmməl pütülgəndur.

⁹⁰Əwladtin-əwladⱪiqə bildürdüng sadaⱪitingni,

ornatting ɵz orniƣa mustəⱨkəm ⱪilip yərni.

⁹¹Əmring bilən məwjut bolup turmaⱪta pütün dunya,

qünki pütkül məwjudat ⱪuldur sanga.

⁹²Xadlanmiƣan bolsam əgər təlimliringdin,

ⱨalak bolar idim azab-oⱪubətlərdin.

⁹³Untumasmən əsla sening yolyoruⱪliringni,

qünki ular roⱨlandurdi ⱨayatimni.

⁹⁴Mən sanga mənsupturmən, ⱪutⱪuz meni,

qünki ijra ⱪilip kəldim yolyoruⱪliringni.

⁹⁵Pəyt kütsimu rəzillər wəyran ⱪilmaⱪⱪa meni,

əmma dilimda saⱪlaymən yənila pərzliringni.

⁹⁶Kɵrdüm mən qəkliklikini ⱨəmmə nərsining,

əmma kəmtüki yoⱪtur əmrliringning.

⁹⁷Xu ⱪədər sɵyimən təlimliringni,

yad etimən künboyi ularni.

⁹⁸Rəⱪibimdin dana boldum əmring bilən,

qünki təliming birgə bolƣaq da’im mən bilən.

⁹⁹Əⱪil-idrak ustazlirimdin kɵprək boldi məndə,

qünki qongⱪur təpəkkur ⱪildim əmrliring ⱨəⱪⱪidə.

¹⁰⁰Aⱪsaⱪallardinmu danaliⱪraⱪ boldum,

qünki yolyoruⱪliringƣa boysundum.

¹⁰¹Əla bilip kalamingƣa əgixixni,

rət ⱪilip kəldim ⱨəmmə rəzillikni.

¹⁰²Ⱨɵkümliringdin ⱪeyip kətmidim,

qünki ɵzüng bərgənsən təlim.

¹⁰³Kalaming xerin tetidi tilimƣa,

ⱨəsəldin tatliⱪ tuyuldi aƣzimƣa.

¹⁰⁴Dana bolurmən yolyoruⱪliringdin,

nəprətlinimən xunga sahta yollardin.

¹⁰⁵Qiraƣ bolup kalaming putlirimƣa,

nur berər u yollirimƣa.

¹⁰⁶Ⱪəsəm iqtim, sadiⱪmən ⱪəsimimgə,

boysunimən adil ⱨɵkümliringgə.

¹⁰⁷Ⱪaldim mən ⱪiyinqiliⱪ, müxküllüktə,

i Pərwərdigar, roⱨlandur meni wədəng boyiqə.

¹⁰⁸Ⱪobul ⱪil qin dilimdin qiⱪⱪan mədⱨiyəlirimni,

i Pərwərdigar, ɵgətkin manga təlimliringni.

¹⁰⁹Ⱨayatim bolsimu da’im həwp astida,

əmma təlimliringni untumasmən əsla.

¹¹⁰Tuzaⱪ ⱪursimu mən üqün gərqə rəzillər,

yolyoruⱪliringdin qiⱪmasmən zinⱨar.

¹¹¹Mənggülük mirastur manga pərzliring,

xübⱨisizki, xadliⱪidur ular ⱪəlbimning.

¹¹²Ⱪararim bar boysunuxⱪa,

adaⱪⱪiqə nizamliringƣa.

¹¹³Ɵq kɵrimən ikki yüzlimiqilərni,

biraⱪ, sɵyimən sening təlimliringni.

¹¹⁴Baxpanaⱨ, ⱪalⱪandursən manga,

ümidim bardur sening kalamingda.

¹¹⁵Kɵz aldimdin yoⱪilinglar, əy yamanliⱪ ⱪilƣuqilar,

Hudayimning əmrigə boysunmaⱪⱪa ⱪararim bar.

¹¹⁶Ɵzüng wədə ⱪilƣiningdək yar-yɵlək bol ⱨayatimƣa,

xərməndə ⱪilip, ⱪoyma meni ümidsiz ⱨalƣa.

¹¹⁷Yɵlənqük bolƣin manga, xunda erixəy nijatliⱪⱪa,

ⱨəm kɵngül bɵləy sening pərmanliringƣa da’ima.

¹¹⁸Nəziringdə ərziməstur pərmaningdin tayƣanlar,

biⱨudidur ⱪanqilik nəyrəngwazliⱪ ⱪilsimu ular.

¹¹⁹Əhlitini ayriƣandək otta tawlap altunni,

yoⱪ ⱪilisən yər yüzidin rəzillərning ⱨəmmisini,

mən sɵyimən sening barliⱪ pərzliringni.

¹²⁰Wujudum titrər ⱪorⱪup seningdin,

wəⱨimigə qüximən ⱨɵkümliringdin.

¹²¹Ⱪildim adil, toƣra ixlarni,

zalimlarning ⱪoliƣa ⱪaldurma meni.

¹²²Kapalət bərgin mən ⱪulungning bəhtigə,

yol ⱪoyma təkəbburlarning meni ezixigə.

¹²³Kɵzlirim taldi sening nijatliⱪingƣa təlmürüp,

ixənqlik wədəngning əməlgə exixini kütüp.

¹²⁴Mən ⱪulungƣa yətküzüp mənggülük muⱨəbbitingni,

ɵgət manga nizamliringni.

¹²⁵Əⱪil-idrak bərgin mən ⱪulungƣa,

pərzliringni qüxinələymən xundila.

¹²⁶I Pərwərdigar, waⱪting kəldi ⱨərikət ⱪilixⱪa,

qünki həlⱪ boysunmidi ⱪanunliringƣa.

¹²⁷Bərⱨəⱪ, altundin əla bilimən əmrliringni,

ⱨətta sap altundin artuⱪ kɵrimən ularni.

¹²⁸Adil dəp ⱪaraymən pərmanliringni,

ɵq kɵrimən barliⱪ sahtiliⱪlarni.

¹²⁹Pərzliring bolƣaq sening bibaⱨa,

boysunimən xunga mən ularƣa.

¹³⁰Kalamingning mənisi yexilgəndə, nur qaqar yolimizƣa,

əⱪil-idrak berər u sadda insanlarƣa.

¹³¹Nəpsimni ⱪisar mening təⱪəzzaliⱪ,

qünki bardur əmringgə intizarliⱪ.

¹³²Ⱨalimdin həwər alƣin kɵrsitip xəpⱪitingni,

namingni sɵygənlərgə kɵrsətkəndək meⱨringni.

¹³³Wədəng bar məzmut ⱪilmaⱪliⱪⱪa ⱪədimimni,

manga hoja ⱪilip ⱪoyma ⱨeqbir gunaⱨni.

¹³⁴Insanlar zulmidin ⱪutⱪuz meni,

qing tutay sening yolyoruⱪungni.

¹³⁵Jamalingning nurini qeqip manga,

pərmanliringni ɵgətkin mən ⱪulungƣa.

¹³⁶Həlⱪlər boysunmiƣaq ⱪanunungƣa,

kɵz yexim dərya bolup aⱪmaⱪta.

¹³⁷I Pərwərdigar, adilsən ɵzüng,

ⱨəⱪⱪaniy ⱨəm ⱨɵkümliring.

¹³⁸Adildur buyruƣan pərzliring,

ixənqliktur ⱨəmmisi ularning.

¹³⁹Ƣəzəplirim kɵydürməktə tenimni,

rəⱪiblirim mənsitmigəq sɵzüngni.

¹⁴⁰Ixənqlik bolƣaqⱪa wədiliring sening,

sɵyər ularni xunqilik, mənki ⱪulung.

¹⁴¹Harlansammu kerəksiz insan bolup,

ⱪalmasmən yolyoruⱪliringni əsla untup.

¹⁴²Mənggülüktur adaliting,

ⱨəⱪiⱪəttur təlimliring.

¹⁴³Kəlginidə beximƣa azab wə külpət,

əmrliring boldi manga xadliⱪ ülpət.

¹⁴⁴Pərzliring adildur ta’əbədkə,

roⱨlinay mən, nur ata ⱪil ⱪəlbimgə.

¹⁴⁵I Pərwərdigar, qin ⱪəlbimdin nida ⱪilimən sanga,

boysunimən pərmanliringƣa, jawab bər manga.

¹⁴⁶Iltija ⱪilimən, ⱪutⱪuzƣin meni,

qing tutay xunda pərzliringni.

¹⁴⁷Pəryad ⱪilimən mədət tiləp sübⱨidə,

ümidimni baƣliƣaqⱪa pəⱪət sening sɵzünggə.

¹⁴⁸Kirpik ⱪaⱪmay qiⱪimən keqiqə,

oyƣa petip sening wədəng ⱨəⱪⱪidə.

¹⁴⁹Muⱨəbbətlik Pərwərdigar, angliƣaysən awazimni,

adalətlik Pərwərdigar, ⱪutⱪuzƣin ⱨayatimni.

¹⁵⁰Yeⱪinlap kəlməktə manga rəzil insanlar,

təlimliringdin yiraⱪtur ular.

¹⁵¹I Pərwərdigar, yeⱪinsən manga,

əmrliringning ⱨəmmisi toƣra.

¹⁵²Uzundin beri bildimki xuni,

pərzliringning mənggülükini.

¹⁵³Nəzər selip azablirimƣa, ⱪutⱪuzƣin meni,

untumidim mən sening təlimliringni.

¹⁵⁴Dəwayimni ⱪolliƣin, ⱪutⱪuzƣin meni,

wədəng boyiqə saⱪliƣin ⱨayatimni.

¹⁵⁵Rəzil insanlar nijatsiz ⱪalar,

etibar bərmigəq əmrliringgə ular.

¹⁵⁶Pərwərdigar, meⱨir-xəpⱪət moldur seningdə,

meni roⱨlandurƣin deginingdək ⱨɵkümüngdə.

¹⁵⁷Bolsimu gər xunqə kɵp ziyankəxlik ⱪilƣuqilar,

pərzliringdin yüz ɵrüməsmən zinⱨar.

¹⁵⁸Nəprətlinimən ita’ətsizlərgə,

ri’ayə ⱪilmiƣaq sɵzliringgə.

¹⁵⁹Nəⱪədər sɵyimən-ⱨə, sening yolyoruⱪliringni,

mənggülük muⱨəbbiting bilən roⱨlandur meni.

¹⁶⁰Kalamingning asasi ⱨəⱪiⱪəttur,

ⱨɵkümliring adil, mənggügə dawam ⱪilur.

¹⁶¹Səwəbsizla ziyankəxlik ⱪilsimu ⱨɵkümdarlar,

ⱪəlbim pəⱪət kalamingdin ⱪorⱪup turar.

¹⁶²Kalamingdin sɵyünüp kəldim xunqə,

erixkəndək ƣayət zor həzinigə.

¹⁶³Yirginimən yalƣanqiliⱪtin,

sɵyünimən təlimingdin.

¹⁶⁴Sanga ⱨər kün yəttə waⱪ mədⱨiyəm bar,

bərⱨəⱪ, ⱨəmmə ⱨɵkümünggə adilliⱪ yar.

¹⁶⁵Təlimingni sɵygənlərgə amanliⱪ bolar,

ⱨeq nərsigə putlixip yiⱪilmas ular.

¹⁶⁶I Pərwərdigar, təlmürüp kütimən nijatliⱪingni.

Ijra ⱪilip kəldim mən sening əmrliringni.

¹⁶⁷Pərzliringgə ri’ayə ⱪilimən,

ⱨəm ularni ⱪizƣin sɵyimən.

¹⁶⁸Boysunimən pərzliring, nizamliringƣa,

bərⱨəⱪ, ⱨəmmə əməllirim ayandur sanga.

¹⁶⁹Pərwərdigar ⱪulaⱪ salƣin aⱨuzarimƣa,

wapa ⱪilip wədənggə idrak bərgin manga.

¹⁷⁰Angliƣaysən Pərwərdigar iltijayimni,

wapa ⱪilip kalamingƣa ⱪutⱪuzƣin meni.

¹⁷¹Ləwlirimdin urƣup qiⱪar ⱨəmdusana,

qünki sən əmrliringni ɵgətting manga.

¹⁷²Kalamliring küylinər tillirimda,

qünki bardur adilliⱪ buyruⱪungda.

¹⁷³Təyyar ⱪilƣin yardəmgə ⱪolungni,

qünki mən talliƣanmən yolungni.

¹⁷⁴Nijatliⱪingƣa təxnamən Pərwərdigar,

təlimingdin ⱪəlbim mening xadliⱪⱪa tolar.

¹⁷⁵Ilⱨam bər manga, ⱨəmdusana oⱪuy sanga,

ⱨɵkümliring yardəm ⱪilsun manga.

¹⁷⁶Adaxtim ⱪoy kəbi yolumdin, izdə ⱪulungni,

qünki mən untumasmən əmrliringni.

120

Yerusalemdiki ibadəthaniƣa berix yolida eytilƣan munajat

¹Nida ⱪilsam Pərwərdigarƣa,

külpəttə ⱪalƣinimda,

u jawab bərdi manga.

²“Ⱪutⱪuzƣin meni i Huda,

yalƣanqi ləwlərdin, aldamqi tillardin”

dəp iltija ⱪildim uningƣa.

³Əy yalƣanqi til!

Ⱪandaⱪ urar seni Huda?

Berər sanga ⱪandaⱪ jaza?

⁴Baturlarning oⱪliri tegər,

arqilarning qoƣliri kɵydürər.

⁵Ⱨalimƣa way, musapir boldum Məxək diyarida,

bəhtsiz boldum Ⱪedarlarning qedirida.

⁶Toydum yaxaxtin bu yərdə,

tinqliⱪⱪa ɵq həlⱪ arisida.

⁷Sɵyüp mən tinqliⱪni,

desəmmu “tinqliⱪta yaxayli” gər,

biraⱪ ular “uruxayli” dər.

121

Yerusalemdiki ibadəthaniƣa berix yolida eytilƣan munajat

¹Kɵzlirimni tikimən taƣlarƣa,

ⱪəyərdin kelər dəp yardəm manga.

²Pərwərdigarla ⱪilar yardəmni,

u yaratⱪandur asman-zeminni.

³Saⱪlar u teyilixtin putliringni,

səgək turup ⱪoƣdaydu seni.

⁴Bilginki, ⱪoƣdiƣuqi Isra’illarni,

uhlimas, tərk ətkəndur uyⱪuni.

⁵Ⱪoƣdiƣuqingdur Pərwərdigar,

ong yeningda sayiwən bolup turar.

⁶Zərər yətküzəlməs sanga zinⱨar,

ay wə ⱪuyax, keqə wə kündüz.

⁷Yamanliⱪlardin ⱪoƣdaydu Pərwərdigar,

ⱨəm jeningni u aman ⱪilar.

⁸Nəzər selip Pərwərdigar yürüx-turuxungƣa,

bügündin ta’əbədkiqə alar seni ɵz panaⱨiƣa.

122

Yerusalemdiki ibadəthaniƣa berix yolida eytilƣan, Dawut yazƣan munajat

¹Xadlanƣanidim, deginidə kixilər manga:

“Barayli Hudaning ɵyi – ibadəthaniƣa.”

²Əy Yerusalem, dərwazangning iqidə turimiz əmdi mana!

³Yerusalem – rətlik selinƣan puhta bir xəⱨər.

⁴Kelər ⱪowmlar, Pərwərdigarning ⱪowmliri uningƣa,

kelər berilgən pərman boyiqə Isra’ilƣa,

xükür eytidu ular Pərwərdigarning namiƣa.

⁵Əy Yerusalem, ⱨɵküm qiⱪirilsun dəp səndə,

təht selindi Dawut jəmətidikilərgə.

⁶Yerusalemning tinqliⱪi üqün mundaⱪ du’a oⱪulsun:

“Seni sɵygənlər ronaⱪ tapsun,

⁷ⱪorƣan iqi aman bolsun,

ordiliri awat bolsun!”

⁸Ⱪerindax wə dostlirim səndə turƣaqⱪa,

tiləymən: “Tinqliⱪ bolsun Yerusalemda”.

⁹Pərwərdigarimizning ɵyi səndə bolƣaqⱪa,

əy Yerusalem, bəht tiləymən sanga.

123

Yerusalemdiki ibadəthaniƣa berix yolida eytilƣan munajat

¹Ərx təhtidə olturƣuqi i Huda,

təlmürüp kɵzlirimni tikimən sanga.

²Kɵzlirimiz tikilgəndur Hudayimiz – Pərwərdigarƣa,

ⱪullarning kɵzliri kəbi tikilgən ⱪuldarning ⱪolliriƣa,

dedəkning kɵzliri kəbi tikilgən aƣiqa henimning ⱪolliriƣa.

Taki bizgə xəpⱪitini kɵrsətkiqə təlmürimiz Pərwərdigarƣa.

³I Pərwərdigar, xəpⱪət ⱪil, xəpⱪət ⱪil bizgə,

qünki tartⱪan horluⱪlirimiz yetip axⱪuqə.

⁴Mazaⱪliriƣa ⱪalduⱪ tolimu baƣri taxlarning,

horluⱪini tarttuⱪ hoymu ⱨakawurlarning.

124

Yerusalemdiki ibadəthaniƣa berix yolida eytilƣan, Dawut yazƣan munajat

¹“Əgər Igəm biz tərəptə turmiƣan bolsa”,

aⱨ Isra’illar, xundaⱪ dənglar!

^2-5Kixilər bizgə aqqiⱪlinip ⱨujumƣa ɵtkinidə

əgər Igəm biz tərəptə turmiƣan bolsa,

ular bizni tirik peti yəwetər idi.

Kəlkün kəbi eⱪip kəlgən adəm topi

dolⱪun yasap basⱪinida üstimizdin

əzim dəryadək bizni ƣərⱪ ⱪilar idi.

⁶Eytayli Pərwərdigarƣa ⱨəmdusana,

yəm ⱪilmidi bizni ularning qixliriƣa.

⁷Ⱪeqip qiⱪtuⱪ ⱪux kəbi biz ularning ⱪapⱪinidin,

tuziⱪi buzulup, ⱪaqtuⱪ ularning qanggilidin.

⁸Bizgə yardəm bərgən Pərwərdigardur,

u asman-zeminni yaratⱪuqidur.

125

Yerusalemdiki ibadəthaniƣa berix yolida eytilƣan munajat

¹Si’on teƣi təwrənməy, mənggügə məzmut turar,

Si’onƣa ohxar, ümidini Pərwərdigarƣa baƣliƣanlar.

²Taƣlar ⱪorxap turƣandək Yerusalemni,

Pərwərdigar ⱪorxap turar ɵz həlⱪini,

ta’əbədkiqə ⱪoƣdap ularni.

³Boliwərməs ⱨɵkümranliⱪ ⱨasisi pasiⱪlarda,

ⱨəⱪⱪaniylarƣa riziⱪ ⱪilip berilgən bu zeminda,

rəzillər ⱨɵkümranliⱪ ⱪilsa ⱨəⱪⱪaniylar üstidə,

ⱨəⱪⱪaniylarmu aylinip ketər rəzillərgə.

⁴I Pərwərdigar, meⱨringni bərgin da’ima,

yahxilar wə ⱪəlbi paklarƣa.

⁵Adixip kətkənlərni əgri yollarƣa,

jazalaydu Pərwərdigar rəzillərgə ⱪoxupla,

tinq-amanliⱪ bolƣay Isra’illarƣa.

126

Yerusalemdiki ibadəthaniƣa berix yolida eytilƣan munajat

¹Pərwərdigar sürgündikilərni ⱪayturup kəlgəndə Si’onƣa,

bolup ⱪalƣaniduⱪ biz huddi qüx kɵrüwatⱪandəkla.

²Huxalliⱪtin aƣzimiz yetip ⱪuliⱪimizƣa,

quⱪanlar kɵtərgəniduⱪ xadliⱪta.

“Pərwərdigar zor bir yahxiliⱪ ⱪildi ularƣa”,

degən sɵzlər tarⱪalƣanidi yat əllər arisida.

³Dərwəⱪə Pərwərdigar zor yahxiliⱪ ⱪildi bizgə,

xad-huramliⱪ toldi bizning ⱪəlbimizgə.

⁴Ronaⱪ tapⱪan waⱪtimizƣa ⱪaytur bizni, i Pərwərdigar,

tosattin suƣa tolƣandək jənubtiki ⱪuruⱪ eriⱪlar.

⁵Yiƣlap turup uruⱪ qaqⱪanlar, nahxa bilən ⱨosul yiƣar.

⁶Dümbisigə artip uruⱪ haltisini, yiƣa bilən kətkən kixi,

ⱪaytip kelər nahxa bilən, oriƣan baƣlamlirini kɵtürgən peti.

127

Yerusalemdiki ibadəthaniƣa berix yolida eytilƣan, Sulayman yazƣan munajat

¹Ɵyni salmisa ɵzi Pərwərdigar,

ɵy salƣuqilarning əjri bikar ketər.

Nawada xəⱨərni ⱪoƣdimisa Pərwərdigar,

biⱨudidur oyƣaⱪ tursimu ⱪarawullar.

²Bikardur nan üqün japa tartⱪininglar

ənsirəp səⱨər turup kəq yatⱪininglar,

qünki Pərwərdigar ɵz sɵygənlirigə

keqə yatⱪandimu rizⱪini ata ⱪilar.

³Pərwərdigarning sowƣitidur pərzəntlər,

uning bərgən iltipatidur ⱨamililər.

⁴Tapⱪan oƣulliri adəmning yaxliⱪida,

ohxar palwanning ⱪolidiki oⱪliriƣa.

⁵Bəhtliktur sadiⱪini toldurƣanlar muxundaⱪ oⱪlarƣa,

qünki ular munaziriləxkəndə xəⱨər dərwazisi aldida,

yengilip, xərməndə bolmas ⱪarxilaxⱪanlarƣa.^*

128

Yerusalemdiki ibadəthaniƣa berix yolida eytilƣan munajat

¹Nəⱪədər bəhtliktur Pərwərdigarƣa ihlasi barlar,

nəⱪədər bəhtliktur uning yolida mangƣanlar.

²Bərⱨəⱪ, meⱨnitinglarning mewisini yəysilər,

ronaⱪ tepip, bəhtiyar bolisilər.

³Ayalinglar ohxar mol mewə bərgən üzüm teliƣa,

zəytun xehidək kɵp bolar baliliringlar yeninglarda,

dastihininglarni qɵridəp olturar ular ətrapinglarda.

⁴Mana xundaⱪ bərikət tapar Pərwərdigarƣa ihlasmən adəm.

⁵Pərwərdigar Si’ondin ata ⱪilsun sanga bəhtni,

kɵrgəysən ɵmür boyi ronaⱪ tapⱪan Yerusalemni.

⁶Ɵmrüng yətkəy balangning baliliriƣa,

tinq-amanliⱪ bolƣay Isra’illarƣa.

129

Yerusalemdiki ibadəthaniƣa berix yolida eytilƣan munajat

¹“Yaxliⱪimdin tartip manga kɵp ⱪetim

ziyankəxlik ⱪilip kəlgənidi ular.”

Aⱨ Isra’illar, xundaⱪ dənglar!

²“Yaxliⱪimdin tartip manga kɵp ⱪetim

ziyankəxlik ⱪilip kəlgən bolsimu ular,

biraⱪ ƣəlibə ⱪilalmidi üstümdin zinⱨar.”

³Ⱪoxqi yərni qongⱪur aƣdurƣan kəbi,

ⱪamqida ular dumbəmgə izlar saldi.

⁴Adalətlik, ⱨəⱪⱪaniydur Pərwərdigar,

rəzillərning asaritini u sundurar.

⁵Si’onƣa nəprət bilən ⱪaraydiƣanlar,

rəswa ⱪilinip arⱪisiƣa qekindürülsun.

⁶Huddi ɵgzidə ünüp ⱪalƣan qɵplərdək

orulmay turup ular soluxup ⱪalsun.

⁷Qɵp oriƣuqi qɵpni yiƣsa bir tutammu qiⱪmisun.

Qɵp baƣliƣuqi baƣlisa bir baƣlamƣa toxmisun.

⁸Yoldin ɵtkənlər deməs bu ⱪutluⱪ tiləkni ularƣa:

“Igimiz bərikət bərsun ixinglarƣa,

silərgə bəht tiləymiz Pərwərdigarning namida.”

130

Yerusalemdiki ibadəthaniƣa berix yolida eytilƣan munajat

^1-2Pəryad ⱪildim Pərwərdigar müxküllüktə,

ⱪulaⱪ salƣin Igəm mening ərzimgə.

Angliƣaysən awazimni,

yardəm tiligən sadayimni.

³Əgər Huda pütüp ⱪoysang pütükünggə

bizning ⱪilƣan gunaⱨ wə ⱪilmiximizni,

ⱪutⱪuzalar jazayingdin kim ɵzini?

⁴Biraⱪ kəqürüm bolƣaq səndə,

sanga ihlas bardur bizdə.

⁵Kütməktimən Pərwərdigarni təlmürüxtə,

wujudumda ümid bolƣaq uning sɵzigə.

⁶Səⱨərgə təxna bolƣan keqilik kɵzətqining

zariⱪixidək kütməktimən Igəmni ⱪetidin yürikimning.

⁷Əy Isra’illar, ümid baƣlanglar Pərwərdigarƣa,

qünki mənggülük muⱨəbbət bardur uningda,

təyyar turƣandur u bizni ⱪutⱪuzuxⱪa.

⁸Pəⱪət Pərwərdigar ⱪutⱪuzar Isra’illarni,

gunaⱨlirining jazasidin halas ⱪilip ularni.

131

Yerusalemdiki ibadəthaniƣa berix yolida eytilƣan, Dawut yazƣan munajat

¹I Pərwərdigar,

təkəbburluⱪ yoⱪtur kɵnglümdə,

ⱨakawurluⱪ ⱪilmasmən ⱪilqə.

Arilaxmaymən ⱪurbim yətməs ixlarƣa,

kirixməymən büyük arzu-armanlarƣa.

²Sütkə toyƣan balidək anisining baƣrida,

kɵnglüm tinip, tinqlandi tenim,

bərⱨəⱪ, sütkə toyƣan balidək aram taptim.

³Əy Isra’illar, əbədiy ümid baƣlanglar Pərwərdigarƣa.

132

Yerusalemdiki ibadəthaniƣa berix yolida eytilƣan munajat

¹Pərwərdigar əskə alƣaysən Dawutni,

uning tartⱪan jəbir-zulum, japalirini.

²Ⱪəsəm iqip Pərwərdigarƣa,

u mundaⱪ wədilərni bərgənidi,

Yaⱪup etiⱪad ⱪilƣan ⱪadir Hudaƣa:

³“Kirməsmən ɵyümgə, yatmasmən ornumda.

⁴Uhlimasmən, mügdiməsmən ⱨətta,

⁵taki təyyar ⱪilmiƣuqə Yaⱪupning ⱪudrətlik Hudasi –

Pərwərdigar bilən uqrixix jayini.”

⁶Əⱨdə sanduⱪi ⱨəⱪⱪidiki həwərni

Əfratada angliƣaniduⱪ,

biz u sanduⱪni Ya’ir dalaliridin taptuⱪ.

⁷Huda bilən uqrixidiƣan jayƣa barayli,

uning putliri astida səjdə ⱪilayli.

⁸I Pərwərdigar, mərⱨəmət ibadəthanangƣa –

sanga atalƣan aramgaⱨingƣa.

Kirgəysən ⱪudriting nixani bolƣan

əⱨdə sanduⱪi bilən birgə.

⁹Ⱨəⱪⱪaniyliⱪ roⱨaniylarƣa kiyim bolsun,

təⱪwadar həlⱪliring xadliⱪⱪa tolsun.

¹⁰Ⱪilip ⱪulung Dawutning ⱨɵrmitini,

rət ⱪilmiƣin ɵzüng tikligən padixaⱨingni.

¹¹Ⱪayturuwalmas Pərwərdigar wədisini,

Dawutⱪa bərgən munu ⱪəsimini:

“Waris ⱪilimən təhtinggə,

ɵz puxtungdin bolƣan birsini.

¹²Oƣulliring ri’ayə ⱪilsa əⱨdəmgə,

boysunsa mən ⱪilƣan barliⱪ əmrgə,

olturar oƣullirimu təhtingdə əbədkə.”

¹³Xundaⱪ, Pərwərdigar talliƣandur Si’onni,

biz bilən uqrixixⱪa haliƣandur bu yərni.

¹⁴“Aramgaⱨim bu mening,^*

mənggügidur u mening makanim,

haliƣanmən bu yərni mən ɵzüm.

¹⁵Bərⱨəⱪ, Si’onni ronaⱪ tapⱪuzimən,

yoⱪsullirining ⱪorsaⱪlirini toⱪ ⱪilimən.

¹⁶Kiydürimən roⱨaniyliriƣa nijatliⱪ tonini,

yangritidu təⱪwadarliri təntənilik awazni.

¹⁷Küqlük ⱪilimən bu yərdə Dawut nəslini,

yandurimən ɵzüm talliƣanning ɵmür qiriƣini.

¹⁸Kiydürimən düxmənlirigə xərməndilik tonini,

parlaⱪ ⱪilimən Dawutning bexidiki tajini.”

133

Yerusalemdiki ibadəthaniƣa berix yolida eytilƣan, Dawut yazƣan munajat

¹Ⱪaranglar, nəⱪədər güzəl, nəⱪədər yeⱪimliⱪ,

ⱪerindaxlar ara bolsa inaⱪliⱪ.

²Inaⱪliⱪ ⱪimmətlik yaƣdək bolur,

Ⱨarunning bexidin ⱪuyulup bu yaƣ,^*

eⱪip qüxüp saⱪalliriƣa,

tamƣanidi yaⱪiliriƣa.

³Mol xəbnəmgə ohxar inaⱪliⱪ,

Hərmon teƣidiki xəbnəmlər^* qüxkən kəbi Si’onƣa,

bərⱨəⱪ, bəhtni – mənggülük ⱨayatni,

ata ⱪilƣanidi Pərwərdigar Si’on teƣida.

134

Yerusalemdiki ibadəthaniƣa berix yolida eytilƣan munajat

¹Əy Pərwərdigarƣa hizmət ⱪilidiƣanlar,

keqiləp Huda ɵyidə ibadəttə bolidiƣanlar,

kelinglar, Pərwərdigarni təriplənglar!

²Muⱪəddəs jay tərəpkə ⱪarap,

du’aƣa kɵtürülsun ⱪolliringlar,

Pərwərdigarni təriplənglar!

³Yaratⱪuqidur Huda asman, zeminni,

bəhtiyar ⱪilƣay u Si’ondin silərni.

135

^1-2Ⱨəmdusana oⱪunglar Pərwərdigarƣa,

mədⱨiyələr eytinglar uning namiƣa.

Əy Pərwərdigarƣa hizmət ⱪilidiƣanlar,

uning ɵyidə ibadəttə bolidiƣanlar,

Igimizning ⱨoylilirida turidiƣanlar,

mədⱨiyələr oⱪunglar uningƣa.

³Mədⱨiyələnglar Pərwərdigarni,

qünki xapa’ətliktur Pərwərdigar.

Küy-nahxiƣa ⱪetinglar uning namini,

qünki uni küylimək bizni xad ⱪilar.

⁴Pərwərdigar talliwaldi Yaⱪup ⱪowmini,

ɵzigə təwə ⱪilip Isra’illarni.

⁵Bilimən, bərⱨəⱪ Pərwərdigar uluƣdur,

Rəbbimiz ƣəyriy ilaⱨlardin^* üstündur.

⁶Asman-zemin, dengiz-okyan, qongⱪurluⱪlarda,

nemə ⱪilixni halisa xuni ⱪilar Huda.

⁷U, zeminning tɵt təripidin əkelip bulutlarni,

yamƣur yaƣdurup ⱨəm qaⱪturup qaⱪmaⱪlarni,

kuⱨiⱪapliridin elip qiⱪar xamallarni.

⁸U Misirliⱪlarning ⱨalak ⱪildi tunji tuƣulƣanlirini,

yəni ⱨalak ⱪildi adəm wə mallarning tunjilirini.

⁹U Misirda kɵrsətti mɵjizə wə karamətlirini,

jazalidi Pir’əwn wə uning wəzirlirini.

¹⁰Wəyran ⱪildi u nurƣun dɵlətlərni,

ɵltürdi ⱪudrətlik padixaⱨlarni.

¹¹Ɵrüwətti u Amorlarning padixaⱨi Sihonni,

Baxanning padixaⱨi Ogni,

ⱨətta Kən’andiki barliⱪ padixaⱨlarni.

¹²Ularning zeminini bərdi ɵz ⱪowmiƣa,

ata ⱪildi ularni ɵz həlⱪi Isra’ilƣa.

¹³I Pərwərdigar, untulmaydu sening naming,

əwladtin-əwladⱪiqə dəwr sürər xɵⱨriting.

¹⁴Huda “gunaⱨsiz” dəp jakarlar ɵz ⱪowmini,

kɵrsitər uning ⱪulliriƣa ɵz rəⱨimini.

¹⁵Altun bilən kümüxtur yat əllərning butliri,

yasiƣandur ularni insanlarning ⱪolliri.

¹⁶Ularning aƣzi bar sɵzliyəlməs,

kɵzliri bar kɵrəlməs.

¹⁷Ⱪulaⱪliri bar anglimas,

aƣzida yoⱪtur nəpəs.

¹⁸Butlarni yasiƣanlar, uningƣa ümid baƣliƣanlar,

ahiri ɵzlirining butliriƣa ohxap ⱪalar.

¹⁹Əy Isra’il jəməti, Pərwərdigarƣa ⱨəmdusana eytinglar,

əy Ⱨarun jəməti, Pərwərdigarƣa ⱨəmdusana eytinglar.

²⁰Əy Lawiy jəməti, Pərwərdigarƣa ⱨəmdusana eytinglar,

ⱨəmdusana eytinglar Pərwərdigarƣa ihlasi barlar.

²¹Pərwərdigar turar Yerusalemda,

ⱨəmdusana eytilsun Si’onda,

ⱨəmdusana oⱪunglar uningƣa.

136

^1-2Pərwərdigarƣa xükür eytinglar, u xapa’ətliktur,

Pərwərdigarƣa xükür eytinglar, u ⱨəmmə “ilaⱨlar”din^* üstündur,