Zebur

Qisqiche chüshendürüsh

PDF chushurung

1-bölek

¹Neqeder bextlik he!

Yamanlarning salasigha kirmigüchi,

gunahkarlarning yolida mangmighuchi,

mesxirichiler^* arisida yürmigüchi.

²Perwerdigarning telimliridin söyünch tapidu ular,

këche-kündüz shu telimler heqqide pikir qilar.

³U goya derextur tikilgen ëriq boyigha,

öz peslide mëwilerni bërip turar.

Solashmas esla yopurmaqliri,

hemme ishliri ongushluq bolar.

⁴Biraq yamanlar oxshimas ulargha,

ular oxshar shamalda sorulghan topangha.^*

⁵Bash kötürelmes yamanlar Xudaning soriqida,

gunahkarlar turalmas heqqaniylar qatarida.

⁶Perwerdigar yorutar heqqaniylar yolini,

yamanlar yoli bashlar halaketke ularni.

¹Nëchün quturar xelqler?

Nëchün ishqa ashmaydighan suyiqest oylar ademler?

²Sep tüzüshüp jahandiki padishahlar,

ora koliship birlikte hökümdarlar,

Perwerdigar we u tallighan padishahqa qarshi turar.

³Deydu ular: “Üzüp tashlap ular salghan kishenlerni,

chörüwëteyli boynimizdiki sirtmaqlarni.”

⁴Mana külmekte, olturghuchi ersh textide,

Perwerdigar qilmaqta ularni mesxire.

⁵Eyibler ularni ghezep bilen,

wehimige salar qehri bilen.

⁶Deydu u: “Öz muqeddes tëghimda –

textke olturghuzdum padishahimni Si’onda.”

⁷Ëlan qilay Perwerdigarning permanini,^*

dëdi u manga: “Sen mëning oghlumsen,^*

jakarlidim bügün sëning atang ikenlikimni.

⁸Sora mendin, bërimen ilkingge barche xelqni,

te’elluq qilimen sanga pütün zëminni.

⁹Tömür kaltek bilen weyran qilisen qarshilashqanlarni,

sapal qachini chaqqandek pare-pare qilisen ularni.”

¹⁰Eqlinglarni tëpinglar emdi, ey padishahlar,

agah bolunglar jahandiki hökümranlar.

¹¹Perwerdigargha eyminip ita’et qilinglar,

shadlininglar hem Xudadin qorqunglar.

¹²Achchiqlanmisun, bash ëginglar oghligha,

tutsa uning ghezipi birdinla,

halak bolisiler mangghan yolunglarda.

Neqeder bextliktur panah tapqanlar uningda.

Bu munajatni Dawut öz oghli Absalomdin qëchip yürgende yazghan.

¹Neqeder köptur reqiblirim, i Perwerdigar,

shunche jiqtur manga qarshi chiqqanlar.

²Dëyisher nurghun kishiler üstümdin:

“Yoqtur uninggha nijatliq Xudadin.” Sëlah^*

³Emma, i Perwerdigar qalqinimdursen,

shan-shöhritim, qeddimni kötürgüchisen.

⁴Peryad qilghanidim yuqiri awazda Perwerdigargha,

u jawab berdi muqeddes Si’on tëghidin manga. Sëlah

⁵Saqlighach mëni Xuda öz panahida,

yatsam këtimen bexiraman uyqugha,

tinch-aman oyghinimen yene tangda.

⁶Qorqmasmen minglighan kishilerdin,

ularning her tereptin qilghan hujumidin.

⁷I Perwerdigar, yardemge kelgin,

i Ilahim, mëni qutquzghin.

Testikige salisen reqiblirimning,

chishlirini sundurisen rezillerning.

⁸I Perwerdigar, sendin këler nijatliq,

öz xelqingni qilghaysen beriketlik. Sëlah

Dawut yazghan munajat bolup, tarliq sazlar tengkishide ëytilsun dep, neghmichiler bëshigha tapshurulghan.

¹Jawab bergin, nida qilsam sanga,

ëh mëni himaye qilghuchi Xuda.

Mëni azad qilghaniding külpette qalghinimda,

anglighin du’ayimni yene rehim qilip manga.

²Ey insan baliliri,

qachanghiche depsende qilisiler mëning izzet-hörmitimni,

qachanghiche qedirleysiler asassiz shikayetlerni,

qachanghiche toqup chiqisiler manga qarshi yalghanchiliqlarni? Sëlah

³Bilip qoyunglar shuni,

Perwerdigar tallaydu teqwadarlarni,

anglaydu mëning nidayimni.

⁴Xudadin qorqunglar, gunah qilmanglar!^*

jimjit yëtip ornunglarda,

buni chongqur oylininglar! Sëlah

⁵Chin dil bilen qilinglar qurbanliqlarni,

Perwerdigargha baghlanglar ishenchinglarni.

⁶Soraydu nurghun kishiler:

Yaxshiliq qilar kim bizge?

Ëh Perwerdigar, chüshürgin

jamalingning nurini üstimizge.

⁷Ziyade xushal qilding könglümni,

shunche mol bolghanlardinmu ashliq we sharabliri.

⁸Yatsamla uyqum këler bexiraman,

chünki mëni aman-ësen saqlighuchi

peqet sen – Perwerdigar özüngdursen.

Dawut yazghan munajat bolup, neyge tengkesh qilinip ëytilsun dep, neghmichiler bëshigha tapshurulghan.

¹Ëh Perwerdigar, qulaq salghin du’ayimgha,

köngül bölgin ahuzarimgha.

²Ëh ilahim, padishahim, yetkin mëning halimgha,

du’a qilmaqtimen chünki sanga.

³Ëh Perwerdigar, anglaysen seherde awazimni,

tang bilen teng iltija qilip kütimen jawabingni.

⁴Xudadursen yaqturmaydighan yamanliqni,

özüngge hemrah qilmaysen rezillikni.

⁵Nepretlinisen eskilik qilghuchilargha,

tik turalmas hakawurlar aldingda.

⁶Halak qilisen yalghanchilarni,

öch körisen qanxor, hiyligerlerni.

⁷Shundaq, men kirimen sëning öyüngge,

cheksiz, menggülük muhebbiting bolghach manga.

Sejde qilimen muqeddes ibadetxanangda,

ixlasim bardur sanga.

⁸I Perwerdigar, bashlighin mëni heqqaniyliqingda,

chünki paylap yürer düshmenlirim etrapimda.

Roshen qilghin öz yolungni aldimda.

⁹Semimiylik yoqtur ularning ëghizlirida,

rezillik chirmiwalghandur dillirini,

ochuq qebre kebidur galliri,

xushametke tolghandur tilliri.

¹⁰I Xuda, bëkitkeysen ularning gunahlirini,

özi kolighan orida körsun ular özlirini.

Ita’etsizlik qilghachqa ular sanga,

köp gunahqa patti ular, qoghliwetkin ularni.

¹¹Emma sendin xursen bolsun panahinggha ërishkenler,

ular da’im shadlinip, yangratsun naxsha-küyler.

Sen alghaysen ularni qanitingning astigha,

shu waqitta sëningdin shadlinidu sëni söygenler.

¹²I Perwerdigar, bext ata qilisen heqqaniylargha,

saxawitingni qalqan qilip, bashpanah bolisen ulargha.

Dawut yazghan munajat bolup, sekkiz tarliq sazlar tengkishide ëytilsun dep, neghmichiler bëshigha tapshurulghan.

¹I Perwerdigar,

mëni qehring bilen eyiblime,

manga ghezipingde terbiye berme.

²I Perwerdigar, rehim qil manga,

ze’ipliship kettim qewetla.

I Perwerdigar, shipaliq bergin manga,

boshiship ketti ustixanlirim biraqla.

³I Perwerdigar, hesret toldi qelbimge,

yürermen bu ehwalda qachanghiche?

⁴Ötüney Perwerdigar, saqlap qalghin jënimni,

menggülük muhebbitingde qutquz mëni.

⁵Chünki hëchkim sëni eslimes ölse,

kim sanga rehmet ëytar gör ichide.

⁶Hëch madarim qalmidi nale-peryad qilip sanga,

köz yëshim derya bolur her këchisi ornumda.

⁷Közlirimning nuri ketti derd-elemdin,

ajizlashti közlirim düshmenlirim destidin.

⁸Berheq, qulaq saldi zarimgha Perwerdigar,

yoqilinglar yënimdin ey yamanliq qilghuchilar.

⁹Perwerdigar anglap iltijayimni,

qobul qildi du’ayimni.

¹⁰Qalar hemme düshmenlirim nomus we wehimide,

tuyuqsizla chëkiner, bolup shermende.

Binyamin qebilisidin bolghan Kush isimlik bir ademning qilghan sözige qarita Dawutning Perwerdigargha iltija qilip ëytqan munajiti.

¹I igem Perwerdigar, tapimen panah sendin,

xalas qilip barliq düshmenlirimdin,

qutquzghaysen mëni qoghlap yürgenlerdin.

²Bolmisa, ular shirdek titip tashlar mëni,

hëchkimim yoqtur qutquzidighangha jënimni.

³I Perwerdigarim, qilghan bolsam birer yamanliqni,

bulghighan bolsam naheq ishlar bilen qollirimni,

⁴qilghan bolsam dostumgha yamanliqni,

sewebsiz bulighan bolsam düshminimni,

⁵düshminim tutuwalsun qoghlap mëni,

jënimni alsun ular cheylep tënimni,

yer bilen yeksan qilsun izzitimni. Sëlah

⁶I Perwerdigar, ghezeplengin, süküt qilma,

qarshi chiqqin qehrlik düshmenlirimge i Xuda,

men üchün oyghanghin, ularni tartqin sotqa,

sen bëkitken hökümni ada qilghin ulargha.

⁷Sot achmaq üchün olturghin büyük ornungda,

hemme xelqler toplashsun etrapinggha.

⁸Perwerdigar sot achar xelqlerge,

i Perwerdigar qilghaysen höküm

layiq halda heqqaniy, diyanitimge.

⁹Axirlashturghin rezillerning yamanliqini,

tewrenmes qilghin heqqaniylarni,

i heqqaniy Xuda, sinighuchisen qelblerni.

¹⁰Qalqinimdur Xuda,

nijatkar bolur qelbi paklargha.

¹¹Adil sotchidur Xuda,

nepretliner rezillerdin da’ima.

¹²Eger tashlimisa insan yaman yolini,

bilep u qilichini,

betlep quyar ya oqini.

¹³U teyyarlap qoyghandur ejellik qorallarni,

betlep qoyghandur yayining otluq oqini.

¹⁴Rezil kishi gunahqa hamildar bolar,

qorsiqi achchiq zeherge tolar,

tughqan balisi yalghanchi bolar.

¹⁵Kim kolisa bashqilar üchün ora,

yiqilip chüsher özi uninggha.

¹⁶Kim yamanliq qilsa bashqilargha,

yënip këler öz bëshigha.

Kim zulum salsa bashqilargha,

yënip këler öz bëshigha.

¹⁷Teshekkür ëytimen heqqaniy Perwerdigargha,

medhiye oquymen ulugh Xudaning namigha.

Dawut yazghan munajat bolup, “gittif”ta^* orunlansun dep, neghmichiler bëshigha tapshurulghan.

¹I Rebbimiz Perwerdigar,

shunche heywet naming bar yer yüzide,

sheripingni namayan qilding asman-pelekte.

²Balilar we bowaqlarning tillirida medhiyeletting özüngni,

yumush üchün düshmen we qisaschilarning ëghizlirini.

³Qarisam men barmaqliring ijad qilghan asmangha –

kökke orunlashturup qoyghan yultuzlargha we aygha,

⁴deymen: insan nëme idi, sen uni yad etküdek?

Adem nesli nëme idi, shunche köngül bölgüdek?

⁵Perishtilerdin azraqla töwen qilding ornini,

kiydürdüng sen uninggha shan-shöhretning tajini.

⁶Bashqurghuzdung uninggha külli jahanni,

tiz püktürdüng uninggha hemmini.

⁷Tiz püker qoy, kala, yawayi haywanlar,

⁸asmandiki ucharqanat, dëngizdiki bëliqlar,

shundaqla dëngizda yashighuchi hemme janliqlar.

⁹I Rebbimiz Perwerdigar,

yer yüzide shunche heywet naming bar.

Dawut yazghan munajat bolup, “mut-labben”de^* ëytilsun dep, neghmichiler bëshigha tapshurulghan.

¹I Xuda, chin dilimdin ëytimen teshekkürümni,

bayan eylep sëning pütkül karametliringni.

²Sendin aldim xushalliq, shadliqimni,

i ulugh Xuda, küyleymen namingni.

³Düshmenlirim meghlup bolup qachqinida,

halak qilisen ularni aldimda.

⁴Chünki, mëni aqliding sen heq dewayimda,

adaletlik sotchi bolup seltenetlik ornungda.

⁵Soraq qilip yat ellerni,

halak qilding rezil xelqlerni,

öchürüwetting menggüge namlirini.

⁶Düshmenler weyran boldi ebedke,

aylinip sheherliri xarabilikke.

Qalmidi u jaylarning namliri tarix bëtide.

⁷Perwerdigar olturar menggü shahliq textide,

höküm üchün qurghandur u textini eslide.

⁸Dunyani u soraq qilar adalette,

adil höküm chiqirar xelqlerge.

⁹Perwerdigar qorghandur ëzilgenlerge,

panah bolar u da’im azabliq künlerde.

¹⁰Sëning peziletliringni bilgenler

ishenchisini baghlar sanga,

chünki, terk etmeysen

sanga telpüngenlerni, i Xuda.

¹¹Küylenglar Si’onda^* höküm sürgen Perwerdigarni,

bayan eylep eller ara uning büyük ejrini.

¹²Chünki, u alghuchidur tökülgen qanning hësabini,

yad ëtip bicharilerni, untumas ularning peryadini.

¹³I Perwerdigar, shepqitingni körsitip manga,

qutquz mëni ölümning girdabidin.

Qarighin, öchmenlerning manga salghan azabigha.

¹⁴Bayan eyley qudritingni xelqning aldida,

Si’on shehirining derwazilirida.

Nijatliqingdin chömüley shadliqqa.

¹⁵Yat eller chüshti özliri kolighan origha,

putliri ilinip qaldi yoshurup qoyghan tuzaqqa.

¹⁶Hökümi bilen tonutti özini Perwerdigar,

yamanliqliri bilen chüshilip qaldi yamanlar. xigga’on^* Sëlah

¹⁷Qebrilerge kirip këter yamanlar,

Xudani untughan barliq qowmlar.

¹⁸Menggülük untulup ketmes bu dunyaning yoqsulliri,

emelge ashmay qalmas ëzilgenlerning arzuliri.

¹⁹I Perwerdigar, yardem qil, ghalib kelmisun reziller,

aldingda soraq qilinsun yat eller.

²⁰I Perwerdigar, qorqunchqa salghin ularni,

bilip yetsun ular peqetla bende ikenlikini. Sëlah

¹I Perwerdigar, nëchün mendin qëchip turisen yiraqta,

nëchün mendin yoshurisen özüngni kün chüshkende bëshimgha?

²Yamanlar tekebburluqta salmaqta zulum ajizlargha,

ajizlar chüshüp qalmaqta ularning tuzaqlirigha.

³Yamanlar közge ilmas Perwerdigarni,

pexirlinip ular hewesliridin,

maxtap uchurar ach közlerni.

⁴Yamanlar izdimes Xudani hakawurliqida,

Xuda yoqtur ularning oy-xiyallirida.

⁵Ongushluq bolar ularning yolliri hemishe,

Xuda hökümining bëshigha këlishini almay nezerge,

meghrur halda dimaq qaqar düshmenlirige.

⁶Ular der köngülliride: “Tewrenmesmiz,

hëchqachan külpetlerge uchrimasmiz.”

⁷Hiyle, lenet we zorluq tolghandur ëghizlirigha,

yamanliq we zeher chachar tillirida.

⁸Möküp turup mehellilerning pinhanlirida,

gunahsizlarni qetl qilar tuyuqsizla,

tikilgendur közliri panahsizlargha.

⁹Chatqalliqta möküp turghan shir kebi ular,

paylap turar tutushqa ajizlarni,

chüshürüp qiltaqlirigha, tutuwalar ularni.

¹⁰Purset küter möküp turup yamanlar,

changgiligha chüsher ularning panahsizlar.

¹¹Der yamanlar köngülliride: “Untup qaldi Xuda bizni,

nezer salmaydu hergiz bizge, yumuwalghandur közlirini.”

¹²Ötüney i Xuda, jazalighaysen yamanlarni,

i Perwerdigar, untumighaysen bicharilerni.

¹³Nëchün yamanlar közge ilmas i Xuda sëni,

nëchün köngülliride der: “Jazalimaydu Xuda mëni.”

¹⁴Bilimiz, körüp turisen bularni,

ularning zeherxende, zulumlirigha

tashlap turuwatisen neziringni,

alisen yamanlarni haman aliqininggha.

Panahsizlar özlirini tapshurar sanga,

yardem qilghuchisen yëtim-yësirlargha.

¹⁵Sundurghaysen rezil we yamanlarning bileklirini,

rezillikliri yoqalghuche jazalighaysen ularni.

¹⁶Menggülük padishahtur Perwerdigar,

yoqilar zëminidin uninggha ëtiqad qilmighanlar.

¹⁷I Perwerdigar, qulaq salisen ëzilgenlerning isteklirige,

quwwet bërisen ularning yüreklirige.

Köngül bölüp turisen du’a-tilawetlirige.

¹⁸Qoghdaysen yëtim-yësir, ëzilgenlerning heqqini,

paniy alemde hëchkim qorqutalmas ularni.

Dawut yazghan munajat bolup, naxsha qilip ëytilsun dep, neghmichiler bëshigha tapshurulghan.

¹Panahliq tapqan tursam Perwerdigarda,

“qushqach kebi uchup ket öz tëghinggha”

dëgininglar nëmisi manga?!

²Mana yamanlar tartip yayini,

teq qildi sëlip oqini,

yoshurun atmaqchi bolup yaxshini.

³Nëmimu qilalar heqqaniy kishi,

buzulsa heqqaniyliqning ulliri?

⁴Perwerdigarning texti ershtidur,

u turar muqeddes dergahida.

Közitip turar u hemme insanlarni,

diqqet bilen tikilgendur közliri insanlargha.

⁵Perwerdigar köziter heqqaniy we rezillerni,

öch körer zorawanliqqa meptunlarni.

⁶Qiziq shamal, ot, günggürt, choghlar,

yamanlarning hayatigha nësiwe bolar.

⁷Heqqaniydur Perwerdigar, söyer heqqaniyliqni,

peqet köngli duruslar körer uning chëhrini.

Dawut yazghan munajat bolup, “shëminit”ta^* ëytilsun dep, neghmichiler bëshigha tapshurulghan.

¹Qutuldurghin, i Perwerdigar,

tügep ketti teqwadarlar,

qalmidi sanga sadiq insanlar.

²Yalghan sözler ademler bir-birige,

aghzi siliq bolsimu rastchilliq yoq qelbide.

^3-4Deydu ular: “Tilimiz bilen ghalib këlimiz,

özimizningkidur aghzimiz,

kimmu bolalaytti xojimiz?!”

Perwerdigar ëtiwetkey xushametchilerning ëghizlirini,

kësiwetkey hem pochilarning tillirini.

⁵“Men baray” deydu Xuda:

“zulum tartqach ëzilgenler,

nale qilghach miskinler,

yetküzey ularni

teshna bolghan amanliqigha.”

⁶Tonurda yette qëtim tawlanghan sap kümüsh kebi,

chin sözlerdur Perwerdigarning sözliri.

⁷I Perwerdigar, qoghdighaysen miskinlerni,

menggü qoghdighaysen bu dewrdikilerdin bizni.

⁸Teripliship pes ishlarni insanlar,

ghadiyip yürüshidu etrapimizda yamanlar.

Dawut yazghan munajat bolup, naxsha qilip ëytilsun dep, neghmichiler bëshigha tapshurulghan.

¹I Perwerdigar, untarsenmu menggü mëni?

Yoshurarsen qachanghiche mendin yüzüngni?

²Hesret yutup ötermen, qachanghiche endishide,

düshminim dessep turar qachanghiche yelkemge?

³I Igem Perwerdigar, jawab bergin neziringni sëlip manga,

nurlandurghin közlirimni, bolmisa këtermen menggülük uyqugha.

⁴Eger közlirim yumulsa xush bolar reqiblirim,

“men uningdin ghalib keldim” dëyisher düshmenlirim.

⁵Tayinip keldim men menggülük muhebbitingge,

nijatingdin tolup tashsun shadliq qelbimge.

⁶Iltipat eyligech sen manga,

i Perwerdigar, munajat oquymen sanga.

Dawut yazghan munajat bolup, naxsha qilip ëytilsun dep, neghmichiler bëshigha tapshurulghan.

¹Exmeqler köngülliride dëyisher “yoqtur Xuda”.

Yirginchlik, rezil bolup qilmishliri,

mangmighandur ularning birsimu toghra yolda.

²Perwerdigar ershtin insangha sëlip nezer,

Xudani izdigüchi aqil adem izder.

³Azghundur hemmisi, birdek buzulghan,

birimu yoqtur hetta toghra yolda mangghan.

⁴Chüshenmesmu ejeba qilmishlirini pasiqlar?!

Ular mëning xelqimni nan yigendek yep yutar,

Perwerdigargha ibadet qilmas esla ular.

⁵Heqqaniylar bilen birge bolghach Xuda,

exmeqlerni wehime basmaqta mana.

⁶Yoqatmaqchimusiler arzulirini ëzilgenlerning?!

Emma Perwerdigar panahidur ularning.

⁷Isra’illargha nijatliq Si’ondin chiqip kelse idi!

Perwerdigar hörlükke chiqarghinida zulumdiki xelqini,

shadlinar Isra’illar – söyüner Yaqup ewladi.

Dawut yazghan munajat

¹I Perwerdigar, kim kireler muqeddes chëdiringgha,

kim sanga ibadet qilalar muqeddes Si’on tëghingda?

²Ibadet qilalar u yerde:

toghra yolda mangidighanlar,

heqqaniy ish qilidighanlar,

heqiqetni chin dilidin sözleydighanlar,

³bashqilargha qara chaplimaydighanlar,

dostigha yamanliq qilmaydighanlar,

qoshnisigha haqaret qilmaydighanlar.

⁴Peskeshlerdin yirginidighanlar,

teqwadarlarni hörmetleydighanlar,

ziyan tartsimu wediside turidighanlar.

⁵Jazanigha pul qerz bermeydighanlar,

para yep bigunahqa ziyan salmaydighanlar,

menggü tewrenmestur mana bular.

Dawut yazghan miqtam^*

¹Özüng mëni saqlighin Xuda,

chünki sendin taparmen panah.

²Dëdim men Perwerdigargha:

“Igemdursen, bextim yoqtur sendin bashqa.”

³Aliyjanabtur zëmindiki teqwadar xelqing,

barliq xushalliqimdur ular mëning.

⁴Kimki choqunmaq bolsa gheyriy ilahlargha,

ashar uning derdliri qewetla.

Qurbanliq qilmasmen atap ulargha,

almasmen namlirini hetta tilimgha.

⁵Perwerdigar istiqbalim, nësiwemdur,^*

i Perwerdigar, këlechikim qolungdidur.

⁶Ësil riziqliring manga teqdim qilinghandur,

sen ata qilghan güzel bextim bayliqimdur.

⁷Hemdusana ëytimen nesihetchim Perwerdigargha,

këchidimu toghra yolni körsiter qelbim manga.

⁸Perwerdigarni tutarmen her da’im yadimda,

ong yënimda bolghach u tewrenmesmen peqetla.

⁹Shunga rohim shadliqta, xushalliq bar qelbimde,

bixeterlik-amanliq berding mëning tënimge.

¹⁰Bilimen, tashlap qoymaysen mëni gör ichige,

yol qoymaysen teqwadaringning tënining chirishige.

¹¹Körsitip bërisen hayatliq yolini manga,

xushalliq tolup tashqandur huzurunggha,

menggülük shadliq bardur ong qolungda.

Dawutning du’asi

¹I Perwerdigar,

qulaq salghin sanga qilghan dewayimgha,

ëtibar qilghin mëning nale-peryadimgha,

köngül qoyghin chin, semimiy du’ayimgha.

²“Gunahsiz” dep aqlighin mëni,

chünki, közüng körer adilliqni.

³Sinap mëning qelbimni,

közitip këchide xiyalimni,

tekshürüp baqqan bolsangmu mëni,

tapalmiding hëchbir nuqsanni.

Ching yumay, dep oylidim aghzimni.

⁴Ela bilip sëning telimliringni,

zorawanlarning yolidin tarttim özümni,

yuqturmidim yamanlarning qilmishlirini.

⁵Izingdin mangdim men qedem ëlip,

shunga ketmidi putlirim tëyilip.

⁶I Igem, iltija qildim sanga,

jawab bergechke sen manga.

Bërip manga diqqitingni,

tingshighin sözlirimni.

⁷Manga bexsh etkin menggülük muhebbitingni,

i özüngge tayanghanlarning nijatkari,

hujumgha qalghanlarning qudretlik qutquzghuchisi.

^8-9Köz qarichuqungdek asrighin mëni,

mëni halak qilmaqchi bolghan rezillerdin.

Qanatliring astigha yoshurghin mëni,

qorshiwalghan esheddiy düshmenlirimdin.

¹⁰Tashtek qattiqtur ularning baghirliri,

chong sözleydu hem ëghizliri.

¹¹Pëyimgha chüshüp qorshawgha aldi mëni,

almaq bolup ular mëning jënimni.

¹²Ular oxshar böktürmide turghan yash shirlargha,

owgha hërismen shir kebi oljisini talashqa.

¹³Ötüney Xuda, aldini tosup ularning,

qiliching bilen tiz püktürüp ularni,

qutquzghin rezillerdin jënimni.

¹⁴I Perwerdigar, qutquz mëni öz qolung bilen

bu paniy dunyadiki rezillerdin.

Peqet mushu dunyadidur ularning nësiwisi,

nëmetliring bilen toyar ularning qorsiqi.

Perzentliri bilen qana’et tapar köngülliri,

balilirigha qaldurar ular mal-mülkini.

¹⁵Heqqaniyliqim bilen yüzüngni körermen,

oyghanghinimda didaringgha qanarmen.

Bu Perwerdigarning quli Dawut yazghan munajat bolup, naxsha qilip ëytilsun dep, neghmichiler bëshigha tapshurulghan. Perwerdigar Dawutni barliq düshmenliri we padishah Sa’ulning qolidin qutquzghan küni Dawut bu munajatni Perwerdigargha oqughan.

¹Küch-madarim Perwerdigar söyimen sëni.

²Qoram tëshim, qorghinim, nijatkarim Perwerdigardur,

manga panah bolidighan gigant tëghim, bashpanahim,

qalqinim, yëngilmes qutquzghuchim Xudayimdur.

³Iltija qilsam medhiyeler igisi Perwerdigargha,

düshmenlirim qolliridin qutquzilarmen shundila.

⁴Ölüm asaretliri chirmidi mëni,

halaket dolqunliri chümkidi mëni.

⁵Göristan tanilirida baghlandim,

ölüm tuzaqlirigha duch keldim.

⁶Ëghir külpet ara iltija qildim Perwerdigargha,

yardem telep qildim peryad kötürüp Xudayimgha.

Awazimni anglidi Perwerdigar dergahida,

ahuzarim yëtip bardi uning quliqigha.

⁷Shu chagh zëmin silkinip, yer tewridi,

taghlarning uli titrep, midirlidi,

chünki Xuda derghezepke kelgenidi.

⁸Chiqti Xudaning burnidin is-tütekler,

ëtildi Xudaning aghzidin ot-lawilar,

lawuldap küyetti hetta qipqizil choghlar.

⁹Kökni yërip yer taman chüshkende Xuda,

turatti qara bulutlar ayighining astida.

¹⁰U minip uchti bir “kërub”qa,^*

perwaz qildi shamalning qanatlirida.

¹¹Yëpincha qilghanidi u qarangghuluqni,

qoyuq, qara bulutlar qorshap turatti uni.

¹²Yorutqanidi aldini parlaq nuri,

yaghdurup möldür we qipqizil choghlarni,

parchilidi qapqara bulutlarni.

¹³Perwerdigarning awazi güldürlep asmanda

yangritip awazini ulugh Xuda,

yaghdurdi möldür we qipqizil choghlar.

¹⁴Tarqitiwetti Xuda düshmenlirini, yaghdurup oqlirini,

chaqmaqlar chaqturup tiripiren qilip ularni.

¹⁵I Perwerdigar, tenbihingdin,

qehrlik tiniqingning zerbisidin,

körünüp qaldi dëngizning tëgi,

ëchilip qaldi zëminning uli.

¹⁶Perwerdigar köktin sunup qolini,

chongqur sulardin tartip aldi mëni.

¹⁷Qutquzdi mëni wehshiy düshminimdin,

manga öch bolghanlardin,

chünki ular küchlük idi mendin.

¹⁸Apetlik künlirimde hujum qildi ular manga,

Perwerdigar yar-yölikim boldi emma.

¹⁹U mendin xursen bolghach nijatliq berdi manga,

ëlip chiqti mëni hem bixeter jaygha.

²⁰Heqqaniyliqim üchün yaxshiliq qildi Xuda,

qolumning pakliqidin in’am berdi manga.

²¹Chünki mëngip keldim Perwerdigarning yolida,

rezillik qilip, asiyliq qilmidim Xudayimgha.

²²Köz aldimda boldi da’im uning barliq hökümliri,

bir yaqqa qayrip qoymidim hem uning permanlirini.

²³Uning aldida ghubarsiz boldum,

özümni gunah qilishtin saqlidim.

²⁴Qolum pak, özüm heqqaniy bolghachqa,

Perwerdigar in’am berdi manga.

²⁵Wapadarlargha körsitisen wapadarliqingni,

heqqaniy ademlerge heqqaniyliqingni.

²⁶Pakliqingni körsitisen pak ademlerge,

layiqida jawab qayturisen niyiti egrilerge.

²⁷Qutquzisen charisizlarni,

yerge urisen hakawurlarni.

²⁸Perwerdigar, hayatliq chirighimni yaqquchisen,

Ilahim, zulmitimni yoruqluqqa aylandurisen.

²⁹Sanga tayinip, düshmen qoshunigha hujum qilalaymen,

i Igem, yardimingde sëpillardin bösüp öteleymen.

³⁰Xudaning yoli mukemmel yoldur,

uning ëytqan sözliri heqiqettur.

Panah izdigüchilerge Xuda bir qalqandur.

³¹“Menggü bar bolghuchi”din bashqa kimdur Xuda?!

Igimizdin bashqa kim bolar qoram tashtek bashpanah?

³²Xudadur bëlimni qudritide baghlighuchi,

yolumni eyib-nuqsansiz qilghuchi.

³³Këyikningkidek yügürük qilip u putlirimni,

ëgiz taghlarda hem mezmut turghuzdi mëni.

³⁴Qollirimni ögetti u jeng qilishqa,

bileklirimni tuch oqyani tartishqa.

³⁵I Igem, berding manga nijatliq qalqiningni,

ong qolung yölep, mulayimliqing yüksek qildi mëni.

³⁶Bixeter qilghach sen basqan herbir qedimimni,

tëyilmastin mëngip yürimen yollirimni.

³⁷Qoghlap yürüp tutuwaldim düshmenlirimni,

qaytmidim keynimge yoqatmastin ularni.

³⁸Men ularni yanjiwettim, turalmas qayta,

yiqildi ular putlirimning astigha.

³⁹Jengge baghliding küch-qudret bilen bëlimni,

bash egdürdüng putlirimgha manga hujum qilghanlarni.

⁴⁰Chëkinishke mejbur qilding reqiblirimni,

yoqattim manga öch bolghanlarni.

⁴¹Ular peryad kötersimu chiqmidi qutquzidighanlar,

nale qilip yalwursimu jawab bermidi Perwerdigar.

⁴²Ëziwettim ularni shamalda uchqan tozandek,

cheyliwettim ularni kochidiki patqaqtek.

⁴³Xelq bilen qarshilishshtin mustesna qilding mëni.

Bash qilghaniding mëni yat ellerge,

qilmaqta ular mëning xizmitimni.

⁴⁴Awazimni anglash bilen boysunar ular manga,

teslim bolidu yat eller shümshiyip aldimda.

⁴⁵Jasaritini yoqatqan yat eller,

titrigen halda qorghanliridin chiqishar.

⁴⁶Hayattur Perwerdigar!

U qoram tëshimgha ëytilsun hemdusana,

ulughlansun nijatkarim bolghan Xuda!

⁴⁷Xudadur qisas ëlip bergüchi manga,

boysundurghuchidur xelqlerni qol astimgha.

⁴⁸Qutquzdung mëni düshmenlirimdin,

üstün qilding manga hujum qilghanlardin,

qutuldurdung hem zorawanlardin.

⁴⁹I Perwerdigar, sanga rehmet ëytimen yatlar aldida,

medhiye küyi oquymen naminggha.

⁵⁰Perwerdigar ërishtürer özi tikligen padishahni ulugh ghelibige,

u bëghishlar menggülük muhebbitini özi tallighan padishahqa –

ta ebed Dawut we uning ewladlirigha.

Dawut yazghan munajat bolup, naxsha qilip ëytilsun dep, neghmichiler bëshigha tapshurulghan.

¹Ersh jakarlar Xudaning shan-sheripini,

asman namayan qilar uning ijadini.

²Toxtimastin sözlisher ular her kün,

teriplisher Xudani këche we tün.

³Ishletmigen bolsimu gerche ular tillirini,

chiqarmighan bolsimu gerche ular ünlirini.

⁴Tiwishliri yëyilip ketken tamam yer yüzige,

xewiri yëtip barghandur jahanning chetlirige.

quyash üchün bir chëdir tikkendur Xuda asmangha,

⁵chiqar undin quyash oxshap toyi bolghan oghulgha.

Shadlinar u oxshap goya yügürüshke chiqqan palwangha.

⁶Örlise u asmanning bir chëtidin,

barar chörgülep yene bir chëtigiche,

qachalmas hëch nerse uning hararitidin.

⁷Mukemmeldur Perwerdigarning telimliri,

yëngilar u insan wujudini,

ishenchliktur Perwerdigarning perzliri,

dana qilar nadanlarni.

⁸Toghridur Perwerdigarning körsetmiliri,

shadlandurar qelblerni.

Ochuqtur Perwerdigarning emrliri,

roshen qilar közlerni.

⁹Pakliqtur ixlas qilish Perwerdigargha,

ixlasmenlik dawamlishar ebediyge.

Berheqtur Perwerdigarning hökümliri,

adilliq singgendur ularning herbirige.

¹⁰Qimmettur ular altundin, hetta barche sap altundin,

shërindur heseldin, hetta here könikidin tamchighan heseldin.

¹¹Shundaqla agahlandurar men bendengni,

ching turghuchi bularda alar katta in’amini.

¹²Kim bilip yëtelisun özi qilghan xataliqlirini,

bilmey qilghan gunahlirimdin paklighin mëni.

¹³Saqlighaysen bendengni bilip gunah qilishtin,

hökümranliq qilmighay gunah mëning üstümdin.

Eyibsiz bolurmen men shundila,

saqlinimen qilishtin ëghir gunah.

¹⁴I Perwerdigar, qoram tëshim we nijatkarim,

xush qilghay sëni sözlirim we xiyallirim.

Dawut yazghan munajat bolup, naxsha qilip ëytilsun dep, neghmichiler bëshigha tapshurulghan.

¹Külpette qalghiningda Perwerdigar jawab bergey nidayinggha,

yaqupni yëtekligen Xuda saqlighay sëni öz panahida.

²Yardem bergey muqeddes ibadetxanidin,

yöligey sëni Si’ondin.

³Xudaning yadida bolghay atighan hediyeliring,

qobul qilinghay huzurida köydürme qurbanliqliring. Sëlah

⁴Emelge ashurghay armanliringni,

ijabet qilghay könglüngge pükkenliringni.

⁵Ërishtürgen ghelibeng üchün chuqan salimiz shadliqta,

tiklep ghelibe tughimizni igimizning namida.

U barliq iltijaliringni keltürgey beja.

⁶Bildimki, özi tallighan padishahni qutquzar Xuda,

muqeddes ersh’eladin jawab bërip uninggha,

zor ghelibe ata qilar qudretlik ong qolida.

⁷Beziler ishiner jeng harwilirigha, beziliri atlirigha,

emma biz ishinimiz Perwerdigarimizgha.

⁸Yiqildi ular halak bolup,

qeddimizni rusliduq biz tik turup.

⁹I Perwerdigar, ghelibe ata qilghin padishahqa,

jawab bergeysen iltija qilghinimizda.

Dawut yazghan munajat bolup, naxsha qilip ëytilsun dep, neghmichiler bëshigha tapshurulghan.

¹I Perwerdigar, shadlinar padishah^* qudritingdin,

xushaldur u ërishtürgen ghelibengdin.

²Sen emelge ashurdung isteklirini,

ret qilmiding sorighan tileklirini. Sëlah

³Mol beriketler ata qilding uninggha,

sap altundin taj kiydürdüng bëshigha.

⁴Ömür berding ömür tilise,

hayatini uzartting menggüge.

⁵Zor shöhretke ërishtürdi sen in’am qilghan ghelibe,

beheywet sherep quchti u sëning himmitingde.

⁶Menggülük beriket ata qilip uninggha,

huzurungda chömdürisen uni shadliqqa.

⁷Berheq, padishah ishench baghlar Perwerdigargha,

ulugh Xudaning muhebbitide tewrenmes esla.

⁸Esir ëlip barliq düshmenliringni,

ong qolungda tutarsen sanga öch bolghanlarni.

⁹Tonurdiki choghlar kebi köyer ular,

namayan qilghiningda qehringni,

yalmap këter ot yalquni –

ghezepliring yutar ularni.

¹⁰Yoqitarsen yer yüzidin ularning ewladlirini,

qurutarsen insaniyet dunyasidin neslini.

¹¹Yamanliq qilishqa urunsimu ular sanga,

oylap chiqsimu hem hiyle-mikir,

emma emelge ashuralmas peqetla.

¹²Chëkindürisen ularni,

yüzlirige betligende oqyayingni.

¹³I Perwerdigar körsetkeysen qudritingni,

naxsha ëytip medhiyeleyli ghelibiliringni.

Dawut yazghan munajat bolup, “tang seherdiki chishi jeren” dëgen ahangda ëytilsun dep, neghmichiler bëshigha tapshurulghan.

¹Ah Xudayim, Xudayim tashliwetting nëchün mëni?

Qutquzmastin, nëchün yiraq tashlap ketting mëni?

Anglimaysen nëchün mëning nale-peryadimni.

²I Rebbim, bermiding hëchbir jawab nale qilsam künboyi,

ah urup, yardem sorap tapmasmen hëchbir aram këchiliri.

³Lëkin sen shübhisizki, muqeddestursen,

Isra’illarning medhiyesini text qilip olturghuchisen.

⁴Ejdadlirimiz baghlighandur sanga ishenchisini,

baghlidi sanga ishenchisini, qutuldurdung ularni.

⁵Nale-zar qilip Rebbim sanga aman qaldi ular,

sanga ishench qilghanliqtin uyatta qalmidi ular.

⁶Emma, men insan emes belki qurt kebi,

insanlar arisida xar we zebundurmen,

awam xelq arisida kemsitilgendurmen.

⁷Körgenlerning hemmisi mazaq qilar mëni.

Dëyisher pürüshtürüp ëghizlirini, chayqiship bashlirini:

⁸“Perwerdigargha tapshurghan emesmidi u özini,

qutquzsun Perwerdigar emdi uni.

Eger Perwerdigar shadlanghan bolsa uningdin,

qëni, qutuldurup baqsun uni!”

⁹Lëkin, sen anamning qarnidin tughdurdung mëni,

emchektiki chëghimdila tayanchim qilghanidim sëni.

¹⁰Mëning Xudayim iding men apiride bolghandila,

sanga tapshurulghanidim qorsaqtiki chëghimdila.

¹¹Ketmigin tashlap mëni yiraqqa,

kelmekte külpetler qistap mëni,

yardem qilmas hëchkim manga.

¹²Nurghun buqilar qorshawgha aldi mëni,^*

bashanning küchlük buqiliri oriwaldi etrapimni.

¹³Olja taliship hörkiriwatqan shirdek ular goya,

ëghizlirini yoghan achti xiris qiliship manga.

¹⁴Goya sudek tökülüp mendin ketti qudritim,

ügüliridin ajrap ketti ustixanlirim,

goya sham bolup ichimde ëridi yürikim,

ümidsizliktin yoqaldi jasaritim.

¹⁵Quridi küch-madarim oxshap sapal parchisigha,

chapliship qaldi tilim tangliyimgha,

qoydung mëni ölüm topisigha.

¹⁶Qorshawgha aldi mëni bir top reziller,

etrapimni oriwaldi ashu itlar,

put-qollirimni teshti ular.

¹⁷Körünüp qaldi söngeklirim mana,

homiyip turmaqta u reziller manga.

¹⁸Bölüshmek üchün ular kiyimlirimni,

chek tartishqa tashlidi könglikimni.

¹⁹I Perwerdigar, mëni tashlap ketme yiraqqa,

medetkarim Xuda tëzdin yardem qilghin manga.

²⁰Qilichtin qutquz mëning jënimni,

itlarning changgilidin qimmetlik hayatimni.

²¹Tartiwal mëni shirning aghzidin,

tënimni yawa buqilarning münggüzidin.

²²Jakarlaymen namingni qërindashlirimgha,

medhiyeleymen sëni ëtiqadchiliring arisida.

²³Ey ixlasmenler Perwerdigargha, uni medhiyelenglar,

ey Yaqupning ewladliri, uninggha shan-sherep keltürünglar,

ey Isra’il ewladliri, uningdin eymininglar.

²⁴Chünki, u untup qalmidi xorlanghanlarni,

ulardin yirgenmidi hem yoshurmidi özini,

belki, anglidi ularning nidalirini.

²⁵Medhiyelirimning ilhamidursen büyük jama’et arisida i Xuda,

ada qilay qesemlirimni sanga ixlasmenlerning aldida.

²⁶Ëzilgenler qana’etliner nëmetlerdin,

Perwerdigargha telpüngenler medhiyeler uni,

Xuda menggü yashnatqay silerning qelbinglarni.

²⁷Yüzliner Perwerdigargha, yad ëtip uni barche xelqler,

i Perwerdigar, sejde qilar aldingda barliq qebililer.

²⁸Berheq, alemning padishahliqi tewedur Perwerdigargha,

u seltenet yürgüzer barliq millet, eller ara.

²⁹Sejde qilar Perwerdigargha dunyadiki güllengen baylar,

tiz püker uning aldida hetta gör aghzigha bërip qalghanlar.

³⁰Bolur bir ewlad Perwerdigarning xizmitide,

ige bolar uchurgha ewladlar Igem heqqide.

³¹Jakarlinar këyinki ewladlargha Xudaning heqqaniyliqi,

bayan qilinar uning heqqaniyliqni emelge ashurghanliqi.

Dawut yazghan munajat

¹Qoychimdur Perwerdigar, baqar u mëni,

körmesmen shunga men hëch mohtajliqni.

²Yaylitar u mëni yapyëshil yaylaqlarda,

bashlap barar shildirlighan sular boyigha.

³Urghutar rohimni küch-quwwet bërip manga,

sheripi üchün bashlar mëni heqqaniyet yolida.

⁴Ötsemmu ger ölüm saye tashlap turghan jilghilardin,

özüng manga yar bolghach qorqmasmen xeterlerdin,

hasang bilen tayiqing xalas qilar teshwishlerdin.

⁵Düshmenlirim aldida dastixan sëlip manga,

ezizlep mëni yagh sürkersen bëshimgha,^*

bext sharabim tolup tashar hayat jamimgha.

⁶Berheq, shapa’et we menggülük muhebbiting,

hemrah bolar ömürwayet yandiship manga,

menggü yashaymen Perwerdigar huzurungda.

Dawut yazghan munajat

¹Perwerdigargha tewedur dunya, uningdiki barliq mewjudat,

yer yüzi hem uningda yashighuchi hemme mexluqat.

²Chünki u dëngizlar üstige qurghandur jahanni,

chongqur sular üstide mustehkem qilghandur uni.

³Perwerdigarning Si’on tëghigha kimmu chiqalar?

Muqeddes ibadetxanisida kimmu ibadet qilalar?

⁴Ibadet qilalar qoli pak, qelbi sap bolghan,

saxtigha köngül bermigen,

yalghandin qesem ichmigen insan.

⁵Undaq ademler Xudadin bext tapar,

nijatkari Xuda teripidin aqlinar.

⁶Mushundaq ademler telpüner Xudagha,

i Yaqup ëtiqad qilghan Xuda,

telpüngüchilerdur ular jamalinggha. Sëlah

⁷Ëchilinglar ey derwazilar,

ëchilinglar ey ebediylik qowuqlar!

Shewketlik padishah kirip kelsun.

⁸Bu shanushewketlik padishah kimdur?

U küchlük, qudretlik Perwerdigardur,

u jeng meydanidiki qadir Perwerdigardur.

⁹Ëchilinglar ey derwazilar,

ëchilinglar ey ebediylik qowuqlar!

Shewketlik padishah kirip kelsun.

¹⁰Bu shanushewketlik padishah kimdur?

U Qudretlik Serdar Perwerdigardur,^*

u birdinbir shewketlik padishahtur. Sëlah

Dawut yazghan munajat

¹I Perwerdigar, sanga sëghinip oquymen du’a.

²I Ilahim, tayinip keldim ishinimen sanga,

yerge qaritip shermende qilma mëni,

ghelibe qilghuzup üstümdin düshmenlirimni.

³Shermende bolmas sanga ümid baghlighanlar,

shermende bolar xa’inliq qilishqa urunghanlar.

⁴I Perwerdigar, körsetkin manga yolungni,

ögetkin manga uningda qandaq mëngishni.

⁵Telim ber manga, heqiqiting bashlisun mëni,

chünki sen qutquzghuchi Ilahimsen,

künboyi sanga ümid baghlighanmen.

⁶I Perwerdigar, yadinggha alghaysen rehimingni,

ezeldin körsetken menggülük muhebbitingni.

⁷I Perwerdigar, ësingde tutmighin

ösmürlükte ötküzgen gunah we eyiblirimni,

menggülük muhebbitingde yad etkin mëni,

körsitip manga mëhribanliqingni.

⁸Shapa’etlik, adildur Perwerdigar,

shunga toghra yolgha bashlinar gunahkarlar.

⁹Kemterlerni yëtekler durus yolgha,

öz yolini ögiter kichik pë’illargha.

¹⁰Toghra yolgha muhebbiti we sadaqiti bilen bashlar,

ehdisi we emrlirige ri’aye qilghuchilarni Perwerdigar.

¹¹I Perwerdigar, qilip öz namingning hörmitini,

gunahlirim köp bolsimu kechürüm qilghin mëni.

¹²Eger kimki ixlas qilsa Perwerdigargha,

durus yolni ögiter uninggha Xuda.

¹³Bext-sa’adet ichide yashar u kishi,

zëminigha warisliq qilar uning ewladliri.

¹⁴Xuda özige ixlas qilghanlarni dost tutar,

ulargha öz ehdisini ëniq tonutar.

¹⁵Tikimen da’im Perwerdigargha közlirimni,

tuzaqtin u tartip alar putlirimni.

¹⁶Halimgha baq i Igem himmitingni körset manga,

yalghuzdurmen, qaldim azab, külpet ara.

¹⁷Derd-elemler basmaqta yürikimni,

shu derdlerdin qutquzghin özüng mëni.

¹⁸Neziringdin ötküzgin azab we derdlirimni,

kechürgin özüng barliq gunahlirimni.

¹⁹Düshmenlirim neqeder köptur, qara,

wehshiylerche öch bolmaqta ular manga.

²⁰Qutquz hem qoghdighin hayatimni,

shermende qilma mëni,

bashpanahim bilimen peqet sëni.

²¹Diyanetlik, durusluq qoghdighay mëni,

chünki, sanga baghlidim ümidimni.

²²I Xuda, barliq külpetlerdin qutquzghin Isra’illarni.

Dawut yazghan munajat

¹I Perwerdigar, aqlighin mëni,

saqlap keldim diyanitimni,

tayanchim qildim peqet sëni.

²I Perwerdigar, sinap kör, közet mëni,

paklighin mëning niyet, qelbimni.

³Ayan bolghach menggülük muhebbiting köz aldimda,

mëngip keldim sen körsetken heqiqet yolungda.

⁴Shërik emesmen yalghanchilargha,

arilashmaymen saxtipezlerge.

⁵Yirginimen pasiqlardin,

reziller bilen bolmaymen birge.

⁶I Perwerdigar, pak qelbte yuyarmen qollirimni,

aylinarmen andin sëning qurbanliq supangni.

⁷Shükür ëytay kötürüp awazimni,

bayan eylep sëning barliq karametliringni.

⁸I Perwerdigar, söyimen sen turghan ibadetxanini,

shewkiting namayan bolghan jayni.

⁹Gunahkarlar qatari almighin jënimni,

qanxorlar qatari hayatimni.

¹⁰Parigha tolup ularning ong qolliri,

suyiqest bilen bulghanghandur qolliri.

¹¹Men bolsam yoqatmidim diyanitimni,

iltipat qilip, qutquz mëni.

¹²Putlirim turar mëning bixeter yerde,

teripleymen Perwerdigarni teqwadarlar jama’itide.

Dawut yazghan munajat

¹Nijatliqim we nurum tursa Perwerdigar,

men yene kimlerdin qorqup yashay?

Hayatimning qorghini tursa Perwerdigar,

yene kimler aldida titrep turay?

²Reqiblirim, düshmenlirim putliship chüshti düm,

göshümni yëmek bolup manga qilghanda hujum.

³Yaw leshkerliri alsimu mëni qorshawgha,

qorqunch bolmas qelbimde esla.

Atlansimu ular manga qarshi jengge,

tewrenmes ishenchim bardur yenila.

⁴Ötünimen Perwerdigardin bir ishni,

ëytay yeni istigimni:

“Yashap bir ömür Perwerdigarning öyide,

qansam uning güzel hösnige,

tepekkur qilalisam Igem heqqide.”

⁵Ëghir künler kelginide bëshimgha,

alar u mëni sayiwini astigha.

Chiqirip mëni panahlinidighan ëgiz jaygha,

yoshurup quyar muqeddes chëdirigha.

⁶Emdi qeddim kötürüldi reqiblirim aldida.

Shadliq bilen alqishlap Perwerdigarni,

qilarmen qurbanliq Xudaning chëdirida,

uni küyleymen yangritip neghme-nawa.

⁷I Perwerdigar, anglighaysen awazimni qilsam nida,

körsetkeysen iltipat jawab bërip manga.

⁸“I Perwerdigar, telpünimen peqet sanga”

dëdim men, dëginingde “telpüngin manga”.

⁹Qachurmighin mëningdin didaringni,

tashlimighin ghezipingde men qulungni.

Bolup kelding i Xuda, medetkarim,

terk etme, tashlima mëni, nijatkarim.

¹⁰Waz kechsimu mëningdin ata-anam,

öz qoynigha alar mëni Perwerdigarim.

¹¹I Perwerdigar, heq yolungni öget manga,

bashla mëni heqqaniyet yolunggha,

chünki bardur düshmenlirim etrapimda.

¹²Tashlap qoyma reqiblirimning meylige mëni,

bashlidi bu saxta guwahchilar manga qarshi hujumni,

shunche yawuz, zeherdur ularning tilliri.

¹³Yoqitar idim özümni eger ishenchim bolmisa

körüshke Perwerdigarning mëhribanliqini bu dunyada.

¹⁴Telmürüp kütkin Perwerdigarni,

dadil bol, jur’etlik qil yürikingni,

shundaq, telmürüp kütkin Perwerdigarni.

Dawut yazghan munajat

¹I Perwerdigar, iltija qilimen sanga,

i qoram tëshim, qulaq salmay qoymighin manga.

Eger jim turuwëlip bermiseng jawab,

qalarmen goya gördiki murdigha oxshap.

²Muqeddes jaying terepke qilip yüzümni,

kötürüp turup qolumni, bayan qilsam derdimni,

anglighin, sanga qilghan ötünüshümni.

³Yamanliq qilghuchilar, reziller qatarigha,

chüshürüp qoymighin mëni esla,

dostane bolsimu ular qoshnilirigha,

yamanliq oylar dillirida.

⁴Jazalighaysen ularni qilmishlirigha qarap,

qilghan yamanliqlirini hësablap.

Qayturup bergin emellirige layiq jaza,

qollirining qilghanlirini sanap.

⁵Perwerdigar weyran qilar rezillerni,

eslige keltürmes qaytidin ularni.

Chünki ular közge ilmas Xudaning ejrini,

pisentige almas uning yaratqanlirini.

⁶Hemdusana oqulsun Perwerdigargha,

qulaq saldi u mëning iltijayimgha.

⁷Qudritim we qalqinimdur Perwerdigar,

yardimige ërishtim ishench baghlap uninggha.

Shunga men shadlinip qelbimdin,

shükür ëytarmen uninggha munajitimda.

⁸Küch-qudritidur Perwerdigar öz xelqining,

nijatliq qorghinidur özi tallighan padishahning.

⁹I Perwerdigar, qutquzghaysen öz xelqingni,

beriketlik qilghaysen özüngge tewe bolghanlarni,

chopani bolup baqqaysen menggü ularni.

Dawut yazghan munajat

¹Ey perishtiler, teriplenglar Perwerdigarni,

teriplenglar uning shan-sheripi we qudritini.

²Teriplenglar Perwerdigarni munasip uning namigha,

sejde qilinglar parlaq, muqeddes Perwerdigargha.

³Perwerdigarning awazi anglinar dëngiz-okiyanlarda,

güldürmama güldürliter shanushewketlik Xuda,

uning awazi bipayan sular üstide yangritip sada.

⁴Perwerdigarning awazi qudretliktur,

Perwerdigarning awazi heywetliktur.

⁵Jaranglisa Perwerdigarning awazi sunup këter këdir derexliri,

shundaq, Perwerdigarning awazida pare-pare bolup këter Liwan^* këdirliri.

⁶Jaranglisa Perwerdigarning awazi mozaydek sekrep këter Liwan taghliri,

köndürülmigen buqidek taqlap këter Siryon^* tëghi.

⁷Perwerdigarning awazi chaqturar chaqmaqlarni.

⁸Perwerdigarning awazi titriter chöl-jezirini,

Perwerdigar zilzilige salar Kadësh chöllükini.

⁹Yangrisa Perwerdigarning awazi tolghinar dup derexliri,^*

yalingachlinar ormanlar jaranglisa Perwerdigarning awazi.

“Ajayip ulughdur Xuda” dep warqirishar,

Perwerdigarning ibadetxanisida turghanlar.

¹⁰Topan balasi bolghanda Perwerdigar idi öz textide,

padishahtur Perwerdigar, u höküm sürer menggüge.

¹¹Perwerdigar küch-qudret bërer öz xelqige,

toldurar ularni tinch-amanliq bextige.

Muqeddes ibadetxanini Xudagha atash murasimida ëytish üchün Dawut yazghan munajat

¹I Perwerdigar, ulughlaymen sëni,

ölüm girdabidin qutquzdung mëni.

Mëni zangliq qilip külüshke

qoymiding düshmenlirimni.

²I Perwerdigar, i Ilahim,

nale qilsam sanga,

shipaliq berding manga.

³Ölükler makanidin nëri qilding jënimni,

görge kirip këtishtin saqliding mëni.

⁴Ey teqwadarlar, hemdusana oqunglar Perwerdigargha,

shükür ëytinglar uning muqeddes namigha.

⁵Ötüp këter ghezipi közni yumup achquche,

emma uning shapa’iti hemrahdur adaqqiche.

Këchiche dawam etsimu ger yigha-zare,

shad-xuramliq yëtip këler seherde.

⁶Meghrurlinip dëdim men ronaq tapqan chëghimda:

“Tewrenmesmen esla.”

⁷I Perwerdigar, körsitip manga shapa’itingni,

taghdek büyük qilding mëni.

Emma boldum alaqzade,

qachurghiningda didaringni.

⁸I Perwerdigar, iltija qilip sanga,

rehim tilep dëdimki Igem sanga:

⁹Ömrüm tügep, ketsem ölükler makanigha,

nëme paydam tiger sanga?

Jesitim jakarlap sëning wapadarliqingni,

oquyalarmu medhiye sanga?

¹⁰I Perwerdigar,

körsetkin shepqitingni qulaq sëlip ahimgha,

i Perwerdigar, medetkar bolghin manga.

¹¹Ussulgha aylandurup matimimni,

saldurup üstümdin haza kiyimimni,

baghliding shadliq kemeri bilen bëlimni.

¹²Shunglashqa wujudum süküt qilmay oqusun hemdusana,

i Perwerdigar, i Ilahim, shükür ëytay menggü sanga.

Dawut yazghan munajat bolup, naxsha qilip ëytilsun dep, neghmichiler bëshigha tapshurulghan.

¹I Perwerdigar, taparmen sendin panah,

mëni hergiz shermende qilma,

qutquz mëni, heqqaniysen da’ima.

²Qutquz tëzdin mëni, qulaq sëlip ahimgha,

panahlinay men sende, qoram tash bolghin manga,

qutquzushqa jënimni qorghan bolup bergin manga.

³Berheq, qoram tëshim, qorghinimdursen mëning,

yëtekle mëni özüng, hörmiti üchün namingning.

⁴Düshmenlerning tuzaqliridin saqlighaysen,

chünki, sen mëning bashpanahimdursen.

⁵I Perwerdigar – wapadar Xuda,

tapshurdum rohimni qolunggha,

teyyarsen özüng mëni qutquzushqa.

⁶Öch körimen butlargha choqunidighanlarni,

baghlighanmen Perwerdigargha ishenchimni.

⁷Menggülük muhebbiting shad-xuram qilar mëni,

berheq, kördüng japalirimni,

bilip yetting azablirimni.

⁸Mëni tashlap bermiding düshmen qoligha,

orunlashturup qoydung bixeter jaygha.

⁹I Perwerdigar, qilghaysen manga rehim,

chünki, men külpette qaldim,

derd-elemdin xireleshti közlirim,

ajizlap ketti hem rohim, tënim.

¹⁰Uprimaqta hesret bilen hayatim,

ghem-qayghuda tügimekte yillirim,

maghdurum ketmekte gunahlirim destidin,

qurup, qaqshal bolmaqta ustixan, yiliklirim.

¹¹Qaldim düshmenlirimning haqaritige,

hetta qoshnilirimning ahanitige.

Boldum men tonushlirimgha bir wehime,

qachar ular kochida mëni körse.

¹²Untuldum men xuddi ölgen ademlerdek,

tashlandim be’eyni sunghan sapal qachilardek.

¹³Anglidim manga qilghan töhmetlerni,

wehime orap turar etrapimni.

Meslihetlisher manga qarshi ular,

pilan tüzer almaq bolup jënimni.

¹⁴I Perwerdigar, tayanchim peqet sen,

deymen shunga: “Sen mëning Xudayimsen.”

¹⁵Hayatim ilkingdidur peqet sëning,

changgilidin qutquz mëni düshmenlirimning –

manga ziyankeshlik qilghuchilarning.

¹⁶Chüshürgin qulunggha didaringning nurini,

menggülük muhebbitingde qutquzghin mëni.

¹⁷I Perwerdigar, mëni hergiz shermende qilma,

chünki men iltija qildim sanga.

Reziller bolghay shermende,

zuwani tutulup barghay görge.

¹⁸Heqqaniylargha kibir körsitip, mazaq qilghuchilarning,

chapliship qalghay yalghan sözligen lewliri ularning.

¹⁹I Perwerdigar, sanga ixlas qilghanlargha,

iltipatliring neqeder moldur ulargha.

Ata qilisen nëmetliringni sëni panah tartqanlargha,

jahan ehli – xelqi’alem aldida.

²⁰Sëni panah qilghanlarni saqlap huzurungda,

qoghdaysen insanlarning suyiqestliridin,

ëlip ularni öz panahinggha,

saqlaysen chëqimchilarning tilliridin.

²¹Hemdusanalar bolsun Perwerdigargha,

chünki u körsetti manga

özining cheksiz mëhir-muhebbitini,

sheher qorshawda qalghanda.

²²Dekke-dükkide dëgenidim:

“Neziringdin mehrum boldum.”

Lëkin sanga nale qilip yighlighinimda,

qulaq salding peryadimgha.

²³Ey Perwerdigarning teqwadarliri, söyünglar uni,

Perwerdigar qoghdar özige sadiqlarni,

emma qattiq jazalar hakawurlarni.

²⁴Ey ümidini Perwerdigargha baghlighanlar,

gheyretlik bolunglar, jasaretke tolsun qelbinglar.

Dawut yazghan terbiyewi munajat

¹Neqeder bextlik insanlar-he,

gunahliri kechürüm qilinghanlar,

ita’etsizliki epu qilinghanlar.

²Neqeder bextlik insanlar-he,

Xuda gunahlirini saqit qilghanlar,

köngülliride hiyle-mikir bolmighanlar.

³Iqrar bolmay gunahlirimgha,

yürdüm künboyi ah urup,

chiridi ustixanlirim azabta.

⁴I Perwerdigar, këche-kündüz jazalishing ëghir keldi manga,

iliklirim qurup ketti, qurup ketken su kebi tomuzda. Sëlah

⁵Emdi iqrar qildim gunahlirimni,

tonudum aldingda eskilikimni.

Dëginimde: “Perwerdigar, iqrarmen gunahimgha”,

xalas qilding azabtin mëni, kechürüp gunahlirimni. Sëlah

⁶Shunga du’a qilsun sanga,

teqwadarlar pursitining barida.

Dëngiz-okyan tashqin bolup tashsimu nawada,

shübhisizki, tashqinliri yëtip baralmas ulargha.

⁷I Perwerdigar, sen mëning panahgahimdursen,

saqlaysen külpettin mëni,

yangrar etrapimda nijatliq naxshiliri. Sëlah

⁸Eqil-idrak bërip sanga körsitimen yolungni,^*

halingdin xewer ëlip ögitimen yolumda mëngishni.

⁹At yaki qëchirdek angsiz bolma,

qamcha, yügen bolmisa boysunmas ular sanga.

¹⁰Derd-elemler këler yamanlarning bëshigha,

Perwerdigarning menggülük muhebbiti quchaq achar uninggha tayanghanlargha.

¹¹Ey heqqaniylar, Perwerdigardin xursen bolup shadlininglar,

ey qelbi paklar, shadliqtin alqish yangritinglar.

¹Ey heqqaniylar, Perwerdigarni küylenglar shadliqta,

uni medhiyelesh yarishar durus yolda mangghanlargha.

²Lira^* chëlip minnetdarliq bildürünglar Perwerdigargha,

küy chëlinglar on tarliq chiltarda atap uninggha.

³Yëngi naxsha ëytinglar bëghishlap Xudagha,

shadliq bilen yangrisun awazinglar,

chëkinglar tarini yetküzüp wayigha.

⁴Chünki, heqiqettur Perwerdigarning sözliri,

sadaqetliktur uning barliq ishliri.

⁵U söyer heqqaniyet we adaletni,

toldurghandur zëmingha menggülük muhebbitini.

⁶Yaraldi asman Perwerdigarning buyruqida,

yultuzlar uning nepes tiniqida.

⁷Chek-chëgra bëkitti u okyanlargha,

saqlighandur u sularni ambarlirida.

⁸Eymensun Perwerdigardin jimi mexluqatlar,

qorqsun uningdin dunyadiki barliq insanlar.

⁹Chünki Xuda “bar bolsun” dëse bar boldi,

emridin yoq nersiler apiride boldi.

¹⁰Bikar qilar Perwerdigar xudasizlarning qararlirini,

yoq qilar ularning könglige pükken meqsetlirini.

¹¹Emma menggülüktur Perwerdigarning qararliri,

ewladtin-ewladqiche emelge ashar meqsetliri.

¹²Perwerdigarni^* Xudayimiz dep tonughanlar bextliktur,

Perwerdigar özige tewe qilip tallighan xelq bextliktur.

¹³Ershtin nezer sëlip Perwerdigar,

jimiki insanlarni körüp turar.

¹⁴Textide olturup Xuda,

nezer salar insanlargha.

¹⁵Xuda yaratqach insanlarning yürikini,

bilip turar ularning jimi ishlirini.

¹⁶Padishah ghalib bolalmas qoshunining büyükliki bilen,

palwan qutquzalmas özini küchtünggürlüki bilen.

¹⁷Exmeqliqtur qutulimen dëyish meghlubiyettin at bilen,

qutquzalmas hëchkimni at qara küchi bilen.

¹⁸Berheq, Xudaning neziri uninggha ixlas qilghanlarda,

uning menggülük muhebbitige ümid baghlighanlarda.

¹⁹Qutquzidu ularni ölümdin,

saqlaydu acharchiliqtin.

²⁰Perwerdigarni telmürüp kütimiz,

udur bizning medetkar, qalqinimiz.

²¹Shadlinar uningdin qelbimiz,

chünki, muqeddes Xudagha ishench baghliduq biz.

²²I Perwerdigar, ümidimiz sende,

menggülük muhebbiting yar bolghay bizge.

Dawut sarang boluwalghachqa, Abimelek padishah teripidin qoghliwëtilgen. Dawut ushbu munajatni shu weqelerni eslep yazghan.

¹Teripleymen her da’im Perwerdigarni,

chüshürmesmen aghzimdin medhiyeleshni.

²Chin dilimdin apirin oquymen Perwerdigargha,

anglap buni ajizlar chömüler xushalliqqa.

³Medhiyeleyli birlikte Perwerdigarning büyüklükini,

ulughlayli hemmimiz uning namini.

⁴Ijabet qilip Perwerdigar du’ayimni,

hemme wehimilerdin xalas qildi mëni.

⁵Nurlinar chëhri baqsa kim sëghinip Xudagha,

yerge qarap qalmas ularning yüzliri esla.

⁶Perwerdigar anglap pëqirning nidayini,

hemme külpetlerdin qutquzdi mëni.

⁷Her tereptin qoghdap Xudaning perishtisi,

qutquzar xewptin Perwerdigargha ixlasmenlerni.

⁸Hës qilghin we bilgin Xudaning mëhribanliqini,

shunchilik bextlik bolar bashpanah qilghanlar uni.

⁹Perwerdigargha ixlas qilinglar, ey uning teqwadarliri,

uninggha ixlas qilghanlarning kem bolmas hëch nersisi.

¹⁰Ussuz we ach qëlishi mumkin küchlük arslanlar,

emma qalmas hëch mohtajliqta Perwerdigargha ümid baghlighanlar.

¹¹Këlinglar ey balilirim, qulaq sëlinglar sözümge,

Perwerdigargha ixlas qilishni ögitey silerge.

¹²Kimki istise hayattin zoqlinishni,

bextlik yashap, uzun ömür körüshni,

¹³tartsun tilini yaman sözdin,

chiqmisun yalghan sözler lewliridin.

¹⁴Yamanliqtin bash tartip, qilsun yaxshiliq,

izdisun tinch-amanliq.

¹⁵Perwerdigar nezer salar heqqaniylargha,

jawab bërer ularning nidalirigha.

¹⁶Yüz örer Perwerdigar rezillerdin,

yoq qilar namlirini yer yüzidin.

¹⁷Qulaq salar Perwerdigar nale qilsa heqqaniylar,

ularni barliq külpetlerdin qutuldurar.

¹⁸Miskinlerge yëqindur Perwerdigar,

rohi azab chekkenlerni qutquzar.

¹⁹Köp bolar heqqaniy adem duch kelgen qiyinchiliqlar,

emma ulardin xalas qilar Perwerdigar.

²⁰Aman saqlar Xuda uning barliq söngeklirini,

hetta sunuq qilmas bir tal ustixinini.

²¹Ölüm ëlip këler özlirige rezillerning qilmishliri,

jazalinar öch körgenler heqqaniylarni.

²²Qutquzar teqwadarlirining hayatini Perwerdigar,

kimki uni panah qilsa jazadin xaliy bolar.

Dawut yazghan munajat

¹I Perwerdigar, qarshi chiqqin manga qarshi chiqqanlargha,

urush qilghin manga qarshi urush qilghanlargha.

²Qalqanliringni ëlip qolunggha,

yardem qilghin këlip yënimgha.

³Aypalta we neyzeng bilen tosuwalghin mëni qoghlap kelgenlerni,

“Men sëning qutquzghuching” dep manga, righbetlendür rohimni.

⁴Jënimni almaq bolghanlar,

shermende bolghay, reswa bolup.

Manga suyiqest qiliwatqanlar,

yansun keynige, qara yüz bolup.

⁵Perwerdigarning perishtisi ularni yiraq qoghliwetkey,

ular goya shamalda uchqan samandek tozup ketkey.

⁶Qoghliwetkey ularni Perwerdigarning perishtisi,

qarangghu hem tëyilghaq bolghay ularning mangghan yolliri.

⁷Ular manga tuzaq qurup sewebsizla,

almaq boldi jënimni kolap ora.

⁸Tuyuqsiz bala kelgey ularning bashlirigha,

yögiship qalsun özliri qurghan torigha,

halak bolsun chüshüp özliri kolighan origha.

⁹Shadlinarmen shunda men Perwerdigardin,

bolarmen xushal manga bergen nijatliqidin.

¹⁰Deymen chin qelbimdin:

“I Perwerdigar, teng këler kimmu sanga?

Ajizlarni küchlüklerdin qutquzghuchi peqet senla,

ëzilgen, mohtajlarni zalimlardin qoghdaydighan yene senla.”

¹¹Otturigha chiqip niyiti yaman guwahchilar,

xewirim yoq ishlarni sorap soraq qilar.

¹²Yaxshiliqimgha yamanliq qayturup ular,

ich-ichimdin mëni azabta qaldurar.

¹³Mata kiydim qayghurup, ular kësel bolghanda,

kemter bolup roza tuttum, ular üchün qildim du’a,

jawabsiz qaldi lëkin du’alirim her zaman.

¹⁴Qayghurdum qërindishim yaki dostum üchün azablanghandek,

meyüslendim xuddi anisi üchün matem tutqan ademdek.

¹⁵Putliship këtiwëdim xushal bolup olashti etrapimgha,

jem bolushti hem manga qarshi chiqishqa.

Natonush pes ademlermu qoshulup ulargha,

mazaq qilip, toxtimay zerbe berdi manga.

¹⁶Nomussizlarche mesxire qiliship mëni,

xiris qiliship, ghuchurlatti chishlirini.

¹⁷I Perwerdigar, qarap turarsen qachanghiche?

Qutquz mëni yawuzlarning zerbisidin,

eziz jënimni qanxor shirning ëghizidin.

¹⁸Teshekkür ëytimen sanga jama’et aldida,

medhiyeleymen sëni teqwadarlar arisida.

¹⁹Zangliq qilip külmisun manga sewebsizla reqib bolghanlar,

közlirini alaytmisun manga sewebsiz öch bolup qalghanlar.

²⁰Shübhisizki, ëlip qoymas ular inaqliqni ëghizlirigha,

belki tüzer shum pilanlar tinch-xatirjem yashaydighanlargha.

²¹Warqirishar ular manga chong ëchip ëghizlirini:

“Way, körduq öz közimiz bilen qilmishliringni.”

²²I Igem, kördüng ularni, süküt qilmighin,

i Perwerdigar, mendin yiraqlashmighin.

²³Ötüney, chiqarghin manga adil hökümüngni,

i Xuda, i Igem qollighaysen dewayimni.

²⁴I Perwerdigar, Ilahim adalitingde aqlighin mëni,

mesxire qilip külüshke yol qoymighin düshmenlirimni.

²⁵Yol qoymighin, “arzuyimiz emelge ashti” dëyishke ularni,

yol qoymighin, “biz axir yutuwalduq uni” dep maxtinishqa ularni.

²⁶Külpitimdin xushal bolghanlar,

gheplet bësip shermende bolghay.

Mendin özini üstün tutqanlar,

reswa bolup nomusta qalghay.

²⁷Gunahsizliqimdin xush bolidighanlar,

chuqan salsun chömüp shadliqqa.

“Qulining amanliqidin söyüngen Perwerdigar

ulughdur” dësun ular her chaghda.

²⁸Bayan eyler tilim adalitingni,

künboyi medhiyeleymen sëni.

Perwerdigarning bendisi Dawut yazghan munajat bolup, naxsha qilip ëytilsun dep, neghmichiler bëshigha tapshurulghan.

¹Bir chüshenche ayan boldi qelbimge,

rezillerning ita’etsizliki heqqide.

Xudadin qorqush yoqtur ularning neziride.

²Özlirini chong tutar ular meghrurluqta,

tonumas gunahlirini hetta,

nepretlenmes ulardin esla.

³Hiyle-mikir, zeher chiqar ëghizliridin,

bash tartidu aqilane, yaxshi ishlardin.

⁴Rezil pilan tüzüsher yatqandimu këchiliri,

atqandur gunah yoligha özlirini,

hëchqachan ret qilmas yamanliqni.

⁵I Perwerdigar, muhebbiting ersh kebi büyüklükte,

wapadarliqing asman-pelek cheksizlikide.

⁶I Perwerdigar,

heqqaniyliqing oxshar büyük taghlargha,

hökümliring dëngiz-okyan chongqurluqigha,

ghemxorluq qilisen insan hem haywangha.

⁷Bibahadur menggülük muhebbiting, i Xuda,

panah tapar insanlar qanatliring sayisida.

⁸Qana’etliner ular öyüngdiki mol nëmetlerdin,

behre alar sëning huzurluq deryaliringdin.

⁹Chünki özüng hayatliq buliqisen,

körimiz heqiqetni nurung bilen.

¹⁰Ayrilmighay menggülük muhebbiting sëni tonughanlardin,

ayrilmighay adaliting qelbi paklardin.

¹¹Dessimisun mëni tekebburlar,

qoghlimisun mëni reziller.

¹²Qara mana, ghulap chüshti yamanliq qilghuchilar,

yiqitildi, emdi turalmas ular.

Dawut yazghan munajat

¹Rezillerdin könglüngni bi’aram qilma,

yamanlargha ichingdin heset qilma.

²Chöptek qurup këter ular shunche tizla,

mamkaptek tozup këter birdemdila.

³Yaxshiliq qil, ishench baghla Perwerdigargha,

tinch-aman yashaysen Xuda bergen zëminda.

⁴Shadliqim dep bilseng eger Perwerdigarni,

u emelge ashurar qelbingdiki arzularni.

⁵Amanet qil ishliringni Perwerdigargha,

u yëtekchi bolar sanga, ishen uninggha.

⁶Tang seherdek yorutar u heqqaniyliqingni,

chüshtiki quyash kebi chaqnitar gunahsizliqingni.

⁷Sewr bilen süküt qilip kütkin Perwerdigarni,

bi’aram bolmighin ronaq tapqan rezillerdin,

haram pilani emelge ashqanlardin.

⁸Yanghin achchiqingdin, basqin ghezipingni,

biseremjan bolma, bi’aramliq ëlip këler peqet yamanliqni.

⁹Zëminidin qoghlap chiqirilidu rezillik qilghuchilar,

emma zëmingha ige bolidu ümidini Perwerdigargha baghlighanlar.

¹⁰Pat yëqinda tügeydu rezillerning künliri,

yoqilar makanliridin, izdepmu tapalmaysen ularni.

¹¹Lëkin kemterlik bilen Xudagha tayinidighanlar,

zëmingha ige bolup, mol berikettin huzurlinar.

¹²Reziller qest qilidu heqqaniylargha,

chishlirini ghuchurlitidu, öch bolup ulargha.

¹³Emma Igimiz mesxire qilar rezillerni,

chünki, u biler ularning jazalinidighanliqini.

¹⁴Yiqitish üchün bichare, mohtajlarni,

reziller tartti oqyasining kirichini.

Qirish üchün durus yolda mangghanlarni,

ghilipidin sughardi qilichini.

¹⁵Axiri ularning sundurulup yaliri,

öz yüreklirige sanjilidu qilichliri.

¹⁶Qolidiki az dunyamu heqqaniy ademlerning,

ewzeldur nurghun bayliqliridin rezillerning.

¹⁷Sundurulidu rezillerning bilekliri,

Perwerdigar yölep turar heqqaniylarni.

¹⁸Perwerdigar köngül böler pak insanlargha,

bërilgen zëmini menggü qalar ulargha.

¹⁹Yerge qarap qalmas ular ëghir künlerde,

toq yürüydu qehetchilikte.

²⁰Biraq halak bolar reziller,

Perwerdigarning düshmenliri yawa güldek tozup tüger,

is-tütektek ghayib bolup, yoqap këter.

²¹Qerz ëlip qayturmaydu reziller,

heqqaniylar shepqet bilen saxawet qilar.

²²Zëmingha ige bolar Perwerdigarning berikitige ërishkenler,

zëminidin qoghlap chiqirilar uning lenitige uchurghanlar.

²³Xursen bolsa bir ademdin Perwerdigar,

u uning qedemlirini mezmut qilar.

²⁴Yölep turghachqa uni Perwerdigar,

putlashsimu yiqilmay mezmut turar.

²⁵Yash idim men, qëridim emdi,

körmidim hëch Xudaning heqqaniy ademni tashliwetkenlikini,

uning perzentlirining nan tiligenlikini.

²⁶Shepqetlik bolup u adem ötne bërer,

perzentlirimu beriket ëlip këler.

²⁷Yaxshiliq qilghin, tashla yamanliqni,

makan qilisen menggüge Xuda bergen zëminni.

²⁸Chünki Perwerdigar söyer adaletni,

tashlimas özining teqwadar xelqini.

Ta’ebed qoghdaydu, saqlaydu ularni,

biraq qurutidu rezillerning neslini.

²⁹Heqqaniylar ige bolar zëmingha,

makan tutup menggü yashar uningda.

³⁰Heqqaniylarning sözliri dana bolur,

ularning hemmisi adil bolur.

³¹Qelbidin orun alghach Xudaning telimliri,

shunga xata bësilmas qedemliri.

³²Heqqaniylarni paylap yürer reziller,

ularni öltürüshning peytini izdep yürer.

³³Perwerdigar qaldurmas ularni rezillerning qoligha,

hem qarshi hökümmu chiqarghuzmaydu ulargha.

³⁴Telmürüp kütkin Perwerdigarni.

Ching tutqin uning yolini,

ige qilar zëmingha sëni.

Körisen rezillerning zëmindin qoghlap chiqirilishini.

³⁵Körgenmen rezil, zorawanning ronaq tapqinini,

chongqur yiltiz tartqan bük-baraqsan derextek bolghinini.

³⁶Emma ötüp ketti u, yoq boldi qara,

uni izdisemmu tapalmaymen qayta.

³⁷Pak ademlerge baq, küzet duruslarni,

tinchliqni söygenlerning bolidu istiqbali.

³⁸Biraq, ita’etsizler qirilip tüger,

rezillerning nesli qurup këter.

³⁹Perwerdigar nijatliq bërer heqqaniylargha,

bashpanah bolar ëghir künlerde ulargha.

⁴⁰Qutquzar ularni yardem qilip Perwerdigar,

rezillerdin qutuldurup aman saqlar,

chünki ular Perwerdigardin panah tapar.

Dawut yazghan xatire munajiti

¹I Perwerdigar,

mëni qehring bilen eyiblime,

manga ghezipingde terbiye berme.

²Kirdi tënimge oqliring,

basti mëni qolliring.

³Ghezipingdin yürek-baghrim yara boldi,

gunahimdin tënim mëning pare boldi.

⁴Gherq boldum gunahlirim kelkünige,

salmiqidin gunahimning pattim yerge.

⁵Yiringlap sësip ketti jarahitim,

seweb boldi buninggha nadanliqim.

⁶Bellirim püküldi qeddim mükchiyip,

künboyi yürimen qayghugha pëtip.

⁷Aghrimaqta köyüp pütün bedinim,

tënimde qalmidi hëchbir saq yërim.

⁸Tumshuqumgha këlip qaldi jënim mëning,

hesrettin peryad qilar qelbim mëning.

⁹I Rebbim, arzulirim ayandur sanga,

ah urushum yoshurun emestur sanga.

¹⁰Yürikim jighildap hali ketti,

hetta közlirimning nuri ketti.

¹¹Yar-burader, tughqanlirim kësilim sewebidin,

yiraq qachti özlirini ëlip mendin.

¹²Tuzaq qurar jënimgha qest qilmaqchi bolghanlar,

ular manga ziyankeshlik qilmaq üchün meslihet qurar.

Hiyle-mikir, suyiqest oylar künboyi ular.

¹³Hëchnëmini anglimaymen gas ademdek,

hëchbirige söz qilmaymen gachilardek.

¹⁴Shundaq, quliqi pang ademdekmen,

rediyege tili yoq gachidekmen.

¹⁵I Perwerdigar, ümidimni baghlidim sanga,

i Igem, Ilahim jawab bërisen manga.

¹⁶Tileymen, üstümdin külmisun birawlar,

tëyilghinimda hakawurluq qilghanlar.

¹⁷Yiqilay dep qaldim i Xuda,

azab hemrahdur da’im manga.

¹⁸Iqrar qilip gunahimgha,

pushayman qildim xataliqimgha.

¹⁹Düshmenlirim segek hem küchlüktur,

sewebsizla manga öchler shunche köptur.

²⁰Yaxshiliqimqa yamanliq qayturghanlar,

toghra yolda mangding dep qarshi chiqar.

²¹I Perwerdigar, ötüney mëni tashlima,

i Ilahim, mëni tashlap ketme yiraqqa.

²²I Igem, nijatkarim,

qilghin manga tëzdin yardem.

Dawut yazghan munajat bolup, naxsha qilip ëytilsun dep, neghmichilerning bëshi Yidutungha tapshurulghan.

¹Öz-özümge dëdim men mundaq:

“Qalmasliqim üchün bolup gunahkar, tartay tilimni,

rezillerning aldida tikip qoyay ëghizimni.”

²Gerche kërek bolsimu sözlishim,

süküt qilip, zuwan sürmidim,

emma mëning ëshiwerdi azabim.

³Zerdab bolup qaynidi baghrim,

oylighanche köydi yürikim.

Axir bolmay mundaq dëdim:

⁴“I Perwerdigar, chüshiney hayatning qisqiliqini,

künlirimning sanaqliq qalghanliqini.

Bilip qalay ömürning ötkünchi ikenlikini.”

⁵Bilimen, qilghansen ömrümni nechche ghërichla,

uzun emestur hayat yolum sëning aldingda,

birla tiniqtur insanlarning ömri peqetla. Sëlah

⁶Sayidek yoqilidu insanlarning ejirliri,

bihudidur ularning aldirap-tëneshliri.

Bayliq yighar, lëkin bilmes ular

bayliqlirining kimlerge qalidighanliqini.

⁷I Perwerdigar, nëmini kütey emdi?

Ümidim peqet sendila qaldi.

⁸Saqit qilghin gunahlirimni,

hamaqetlerning mesxirisige qoyma mëni.

⁹Süküt qilip achmaymen aghzimni,

chünki, adildur jazalishing mëni.

¹⁰Toxtatqaysen emdi jazalishingni,

kötürelmes tënim qolungning zerbisini.

¹¹Gunahlirini eyiblep, jazalighanda sen insanni,

küye chüshkendek yoq qilisen qedirligenlirini.

Bir tiniqtur xalas insanning ömri. Sëlah

¹²I Perwerdigar, qulaq salghin du’ayimgha,

köngül qoyghin mëning nale-peryadimgha,

süküt qilip turmighin köz yashlirimgha,

chünki bir musapirmen sëning aldingda,

ata-bowilirimdek ghëribmen bu paniy dunyada.

¹³Ghezep bilen qarimighin manga,

ölümdin burun chömiley shadliqqa.

¹Sewr-taqet qilip küttüm Perwerdigarni,

qulaq sëlip anglidi u peryadimni.

²Tartiwaldi u mëni halaket girdabidin,

chiqiriwaldi chongqur patqaq-sazliqtin.

Qoram tash üstige turghuzup putlirimni,

mustehkem qildi mëning qedemlirimni.

³Perwerdigar ata qildi manga yëngi bir küyni,

Igimizni medhiyeleydighan munajatni.

Nurghun adem körüp uning qudritini,

Perwerdigargha ishench baghlap hörmetler uni.

⁴Bextliktur ishench baghlighanlar Perwerdigargha,

choqunmighanlar saxta ilahlargha,

yürmigenler butperesler arisida.

⁵I Igimiz Perwerdigar, shunche köptur möjiziliring,

biz üchün qilghan katta iltipat we pilanliring.

Sansizdur bayan qilsam ejir we mëhnetliring,

yoqtur sëning hëchbir tengdishing.

⁶Istimeysen qurbanliq yaki hediyelerni,

istimeysen ne köydürme, ne gunah qurbanliqini.

Anglisun dep buni achting qulaqlirimni.

⁷Shunga dëdim: “Men keldim mana,

pütülgendur men heqqide muqeddes yazmilarda.

⁸I Ilahim, iradengni emelge ashurush xushalliqimdur,

telimliring qelbimge ching pütülgendur.”

⁹Zor jama’et arisida jakarlidim adalitingni,

i Perwerdigar, bilisen, yumuwalmaymen aghzimni.

¹⁰Yoshurup yürmidim qelbimde adalitingni,

bayan eylidim wapadarliqing hem nijatliqingni.

Pinhan tutmidim büyük jama’ettin,

menggülük muhebbiting we heqiqitingni.

¹¹I Perwerdigar, ayimighin mendin shepqitingni,

menggülük muhebbiting, heqiqiting saqlighay mëni.

¹²Chirmiwaldi heddi-hësabsiz külpetler mëni,

kor boldum, gunahlirim tosuwalghach köz nurumni.

Bëshimdiki chëchimdin köp bolghachqa gunahlirim,

terk etti jismimdin jasaritimni.

¹³I Perwerdigar, qutquz mëni yetküzüp iltipatingni,

i Perwerdigar, tëzdin manga bergin yardimingni.

¹⁴Jënimni almaqchi bolghanlar,

shermende bolsun yüzi tökülüp.

Japayimdin xushal bolghanlar,

chëkinsun reswa bolup.

¹⁵Miyiqida külgenler qilip mëni mesxire,

endishe ichide bolsun shermende.

¹⁶Sanga telpüngüchi barliq kishiler,

sendin xushal bolup shadlansun.

Nijatliqingni söygenler her da’im:

“Perwerdigar ulughdur” dësun!

¹⁷Bir bichare, hajetmen özüm,

biraq, mëni yad ëter igem.

Medetkarimsen hem nijatkarim,

hayal bolma, i Ilahim.

Dawut yazghan munajat bolup, naxsha qilip ëytilsun dep, neghmichiler bëshigha tapshurulghan.

¹Bextliktur ghëriblarning halidin xewer alghuchi,

bëshigha kün chüshkende Perwerdigar qutquzar uni.

²Hayatini saqlaydu, qoghdap uni Perwerdigar,

Xuda ata qilghan zëminda yashaydu u bextiyar,

reqiblirining meylige tashlimas uni zinhar.

³Saqsiz bolup, orun tutup yëtip qalghinida,

Perwerdigar yölek bolup, quwwet bërer uninggha,

shipaliq bërer kësel bolghan chaghlirida.

⁴Iltija qildim Xudagha:

I Perwerdigar, shepqet qilip manga,

saqaytqin mëni,

gunah qilip, qarshi chiqqan bolsammu sanga.

⁵Rehimsiz düshmenlirim qarghar mëni:

“Tëzraq ölüp u, öchsun nami.”

⁶Ulardin birersi këlip yënimgha,

yalghan sözlerni ëytar manga.

Könglide toplap men heqqide gheywetni,

yënimdin chiqipla yayar ularni xalayiqqa.

⁷Men heqqide pichirlishar manga öchler,

ziyankeshlik qestide mundaq dëyisher:

⁸“Yaman kësel chaplishiptu uninggha,

yatqan ornidin turalmas u emdi esla.”

⁹Hetta özüm ishengen qedinas dostummu

sëtiwetti mëni, ash-tuzumni yep turupmu.

¹⁰I Perwerdigar, qilip manga shepqitingni,

turghuzghaysen ornumdin mëni,

shunda ulardin alalaymen entimni.

¹¹Ghelibe qilghuzmiding üstümdin düshmenlirimni,

bildim shuningdin, mendin xush ikenlikingni.

¹²Diyanetlik bolghinim üchün yölek bolisen manga,

menggü turghuzisen mëni huzurungda.

¹³Medhiyeler bolghay Perwerdigargha,

isra’illarni tallighan Xudagha,

menggüdin-menggüge! Amin, amin!

2-bölek

Korahning ewladliri yazghan terbiyewi munajat bolup, naxsha qilip ëytilsun dep, neghmichiler bëshigha tapshurulghan.

¹Changqighan këyik teshna bolghandek ëqinlargha,

teshna boldum sanga, i Xuda!

²Intizarmen sanga – hayatliq buliqi bolghan birdinbir Xuda,^*

qachanmu körermen sëning chëhringni, kirip huzurunggha?

³Köz yashlirim men üchün këche-kündüz boldi ghiza,

“Qëni Xudaying” dëyisher reqiblirim da’im manga.

⁴Könglüm buzulidu ötken künlerni esliginimde:

Barattim jama’et bilen hëyt ötküzüshke,

kishilerni bashlayttim Perwerdigarning öyige,

medhiye ëytip towlishattuq xushal bolup shu demde.

⁵Ey qelbim, nëmishqa shunche chüshkünsen?!

Ey könglüm, nëmishqa aram tapmaysen?!

Ümid küt Xudadin, medhiyeleymen yenila uni,

Xudayim saqlighuchidur shermende bolushtin yüzümni.^*

⁶I Ilahim, ghem basti könglümni,

shunga esleymen sëni,

I’ordan zëminida,

Xermon we Mizar taghlirida.

⁷Güldürlep ëqip chüshken sharqiratmiliringdek,

toxtimay kelmekte bëshimgha külpetliring,

bësip ötmekte mana üstümdin dolqunliring, örkeshliring.

⁸Kündüzi körsiter Perwerdigar menggülük muhebbitini,

këchisi ata qilar u manga men ëytidighan naxshamni,

hayatimning igisi Xudagha bëghishlighan munajatlirimni.

⁹Ëytarmen qoram tëshim Xudagha:

Untup qalding nëchün mëni?

Nëchün matem tutup yürimen,

düshmenlirimning zulumi astida?

¹⁰Ötti jënimdin düshmenlirimning tapa-teniliri,

da’im manga: “Qëni Xudaying” dëyishliri.

¹¹Ey qelbim, nëmishqa shunche chüshkünsen?!

Ey könglüm, nëmishqa aram tapmaysen?!

Ümid küt Xudadin, medhiyeleymen yenila uni,

Xudayim saqlighuchidur shermende bolushtin yüzümni.^*

¹I Xuda, “gunahsiz” dep aqlighin mëni,

qollighin sadaqetsiz xelqqe qarshi dewayimni,

adaletsiz, hiyligerlerdin qutquz mëni.

²Bashpanahim turup i Xuda,

terk ëtisen mëni nëmishqa?

Nëchün matem tutup yürimen,

düshmenlirimning zulumi astida?

³Chachqin nurungni, körset heqiqitingni,

yëteklisun ular mëni muqeddes tëghinggha,

ëlip barsun uchrishish jayimizgha.

⁴Qurbanliq supanggha barimen shunda,

birdinbir shadliqim bolghan Xuda aldigha.

Chëlip lira hemdusana ëytimen sanga,

mëning Ilahim bolghan i Xuda.

⁵Ey qelbim, nëmishqa shunche chüshkünsen?!

Ey könglüm, nëmishqa aram tapmaysen?!

Ümid küt Xudadin, medhiyeleymen yenila uni,

Xudayim saqlighuchidur shermende bolushtin yüzümni.^*

Korahning ewladliri yazghan terbiyewi munajat bolup, naxsha qilip ëytilsun dep, neghmichiler bëshigha tapshurulghan.

¹I Xuda, qedimki zamanda ejdadlirimizning arisida,

sen körsetken möjizilik ishliringni

anglighaniduq biz öz quliqimizda,

ata-bowilirimiz ëytip bergenidi buni.

²Öz qolung bilen zëminidin qoghliwëtip yat xelqlerni,

ularning yurtigha orunlashturghaniding ata-bowilirimizni.

Qattiq azablap yat xelqlerni,

ronaq tapquzdung ejdadlirimizni.

³Alghan emes ular zëminini shemshiri bilen,

ghelibige ërishkini yoq öz biliki bilen.

Belki ularning ghalib këlishi sen Xudadin,

ong qolung, qudriting, chëhringning nuridin,

chünki söyündüng sen ulardin.

⁴I Xuda mëning padishahimsen,

Yaqup neslige ghelibe ata qilghuchisen.

⁵Yardimingde qoghliwëtimiz düshmenlirimizni,

qudriting bilen cheyliwëtimiz bizge qarshilarni.

⁶Ishenchim yoqtur öz oqyayimgha,

shemshirim ërishtürelmes mëni utuqqa.

⁷Ghelibe qilghuzdung reqiblirimiz üstidin bizni,

shermende qilding bizdin nepretlengenlerni.

⁸Her da’im pexirlinip teripleymiz sëni,

i Xuda ebediy medhiyeleymiz namingni. Sëlah

⁹Biraq sen hazir bizni terk ëtip, qaldurdung ahanetke,

chiqmaysen hetta qoshunlirimiz bilen birge jengge.

¹⁰Meghlup qilding bizni reqiblirimiz aldida,

bizdin nepretlengenler bulidi bizni shu halda.

¹¹Bizni qoy kebi tutup berding boghuzlashqa ulargha,

chëchiwetting bizni hem yat xelqler arisigha.

¹²Erzan satting qul qilip öz xelqingni,

qedir-qimmitimiz payxan boldi sëtip bizni.

¹³Qaldurdung bizni yat ellerning haqaritige,

etrapimizdikilerning nepiriti we mesxirisige.

¹⁴Yat eller arisida mazaqqa qaldurdung bizni,

mesxire qilidu ular chayqiship bashlirini.

^15-16Nomusqa qalghanliqim turar köz aldimda,

shermendichilik bardur mëning boynumda.

Chünki reqibler we qarshi turghuchilarning

til-ahanetliri da’im yëter quliqimgha.

¹⁷Bëshimizgha chüshti bularning hemmisi,

untumighan bolsaqmu gerche sëni,

yaki buzmighan bolsaqmu ehdengni.

^18-19Sen nusret ata qilmay ezding bizni,

xarabide yardemchisiz qaldurdung xelqingni.

Gerche qaytmighan bolsimu sendin könglimiz,

chetnimigen bolsimu yolungdin qedemlirimiz.

²⁰Eger biz Igimizning namini untughan bolsaq,

qol kötürüp yat ilahqa du’a qilghan bolsaq,

²¹Igimiz Perwerdigar bayqimay qalarmidi?

U biler insan qelbidiki barliq sirlarni.

²²Sanga bolghan sadaqitimizdin künboyi qirilmaqtimiz,

soyulidighan qoylarning qatarida bolmaqtimiz.

²³Oyghanghin i Perwerdigar, uxlap yatisen nëmishqa?

Tashliwetmigin bizni menggüge, kelgin yënimizgha!

²⁴Nëmishqa yoshurisen özüngni,

nëmishqa körmeysen ëzilish, külpetlirimizni?

²⁵Payxan boldi ar-nomusimiz,

milendi chang-tupraqqa tënimiz.

²⁶Kelgin Xuda, bergin bizge yardimingni,

menggülük muhebbitingde azad qilghin bizni.

Korahning ewladliri yazghan muhebbet heqqidiki terbiyewi munajat bolup, “nëluperler” dëgen ahangda ëytilsun dep, neghmichiler bëshigha tapshurulghan.

¹Güzel bir ish hayajangha salghach mëning qelbimni,

oqumaqtimen padishahqa atap yazghan shë’irimni,

tilim sözge mahirdur goya bir sha’ir kebi.

²Eng këlishken ademsen insanlar arisida,

lewliringdin töküler shepqetlik sözler,

menggülük bext ata qilghandur Xuda sanga.

³I bahadir padishah, asqin yëninggha qilichingni,

ayan qilghin shewkiting we heywitingni.

⁴Zeper quchqin heywet bilen at üstide,

qoghdighin kemterlik, heqiqet we adaletni,

ghayet zor ishlarni qil qudritingde.

⁵Ötkür oqliring sanjilar yürikige reqibliringning,

düshmenliring yiqilar astigha ayaghliringning.

⁶I Xuda, sëning texting menggülüktur,

seltenet hasang, adalet hasisidur.

⁷Öch körisen naheqchilikni, söyisen heqqaniyetni,

shunga sëni tallighan Xuda yaghdurdi sanga shadliqini.

Hemrahliringdin bekrek shadlandurdi sëni.

⁸Hidi këler kiyimliringdin murmekkining,

shundaqla mu’etter we darchinning.

Pil chishida bëzelgen saraylardiki tarliq sazlarning sadasi,

yëqimliq anglinip xursen qilar sëni.

⁹Shah qizliri bardur izzetligenliringning arisida,

Ofir altunida bëzelgen mehbubung turar ong yëningda.

¹⁰Tingshighin ey qiz, qulaq salghin sözümge,

untughin xelqingni, atangning öyi bolmisun ësingde.

¹¹Padishah meptundur güzel turqunggha,

xojayiningdur u, ita’et qil uninggha.

¹²Tir xelqi ëlip këler sanga hediyeler,

iltipat ister sendin u puldarlar.

¹³Neqeder jilwe qilar melike hujrisida,

keshtilengendur kiyimliri zer altunda.

¹⁴Padishah aldigha keltüriler u keshtilik kiyimliride,

aldigha ëlip këliner kënizeklirimu uning bilen birge.

¹⁵Bashlap këlinidu hemmisi xushal halda,

kirishidu ular padishah sariyigha.

¹⁶Izini basar oghulliring ata-bowiliringning,

shahzadiliri qilisen ularni pütkül jahanning.

¹⁷Ewladtin-ewladqiche este saqlatquzimen namingni,

ebedil’ebed maxtishar xelqler sëni.

Korahning ewladliri yazghan munajat bolup, “alamot” ahangida ëytilsun dep, neghmichiler bëshigha tapshurulghan.

¹Küch-qudret, bashpanah bolghuchimiz Rebbimizdur,

külpette qalsaq eger her zaman yardemdidur.

^2-3Astin-üstün bolup ketsimu zëmin nawada,

taghlar ghulap chüshsimu dëngizlarning astigha.

Dolqunlinip dëngizlar, örkesh yasap tashsimu,

tashqinidin dëngizning, taghlar tewrep ketsimu,

bizde qorqunush yoqtur esla. Sëlah

⁴Bardur ëqinliri shadliq ëlip këlidighan bir derya,

Xudaning shehiri – ulugh Xudaning muqeddes makanigha.

⁵Shu sheherde bolghach Xuda, tewrenmes u makan esla,

tang ëtishi bilen teng yardemge këler Xuda.

⁶Gumran boldi shahliqlar,

ghowgha kötürüp xelqler.

Jaranglisa Rebbimizning awazi

yer-zëmin ërip këter.

⁷Qudretlik Serdar Perwerdigar^* biz bilen birgidur,

Yaqup ëtiqad qilghan Xuda qorghinimizdur. Sëlah

⁸Körünglar Perwerdigarning qudritini,

zëminda körsetken weyranchiliqlirini.

⁹Toxtatquchidur u hemme urushlarni,

sundurup oqya, neyzilerni.

Köydürüp jeng harwilirini.

¹⁰Deydu u: “Toxtitinglar urushunglarni,

bilip qoyunglar mëning xudaliqimni!

Ulughlinimen pütün alemde,

barche xelqler ulughlar mëni.”

¹¹Qudretlik Serdar Perwerdigar biz bilen birgidur,

Yaqup ëtiqad qilghan Xuda qorghinimizdur. Sëlah

Korahning ewladliri yazghan munajat bolup, naxsha qilip ëytilsun dep, neghmichiler bëshigha tapshurulghan.

¹Ey barche xelqler, chëlip chawaklar,

Xudagha atap yangritinglar alqishlar.

²Chünki büyük Perwerdigar heywetliktur,

u jahangha hökümdar ulugh padishahtur.

³Bash egdürüp berdi u bizge düshminimizni,

ayighimiz astigha yiqildurdi yat xelqlerni.

⁴Nësiwe qilip bizge tallap berdi bu yerni,

özi söygen Yaqupning^* pexri bolghan zëminni. Sëlah

⁵Höküm sürmek bolup Xuda textke chiqti chuqan ara,

chiqti Perwerdigar burgha^* sadasida öz ornigha.

⁶Küylenglar Perwerdigarni yangritip neghme-nawa,

küylenglar padishahimizni yangritip saz bilen naxsha.

⁷Chünki pütkül jahangha padishahtur Perwerdigar,

munajatlar ëytip uni küylenglar.

⁸Höküm sürmekte Xuda barche xelq üstide,

olturup u özining muqeddes textide.

⁹Yighilip jahandiki ellerning hökümdarliri,

qoshulidu Ibrahim ëtiqad qilghan Xudaning xelqige,

berheq, Xudagha tewedur pütkül jahanning padishahliri,

eng aliy hökümrandur Perwerdigar, jahan ehli ulughlar uni.

Korahning ewladliri yazghan munajat

¹Ulughdur Perwerdigar!

Uning muqeddes tëghida,

Xudayimizning shehiride,

layiqtur u köptin-köp medhiyelinishke.

²Büyük we körkem Si’on tëghi,

shadliqidur pütkül jahanning.

Heywetliktur Zafon tëghining choqqiliridek,

turar u shehiride ulugh padishahning.

³Xuda turup qel’eliride Yërusalëmning,

qoghdighuchiliqini namayan qilar özining.

⁴Bir yerge yighip qoshunlirini padishahlar,

mangghanidi jeng qilmaq bolup ular.

⁵Lëkin, ular körüpla sheherni boldi alaqzade,

arqisigha beder qëchishti chüshüp wehimige.

⁶Titrek bësip ularning hemmisini,

qiynaldi tolghaq yigen ayal kebi.

⁷I Xuda, chiqirip sherq shamilingni,

weyran qilding “Tarshishning^* këmiliri”ni.

⁸Qudretlik Serdar Perwerdigarning shehiri –

Xudayimizning shehiride,

körginimiz boldi xuddi anglighinimizdekla.

Xuda mustehkem qilar bu sheherni menggüge. Sëlah

⁹I Xuda, muqeddes ibadetxanang ichide,

chongqur oylanduq menggülük muhebbiting heqqide.

¹⁰Sanga bëghishlanghan medhiyeler, i Xuda,

xuddi namingdekla taraldi keng jahangha.

¹¹Heqqaniy hökümliringdin,

xush bolsun Si’on tëghi,

shadlansun Yehudiye sheherliri.

¹²Ey Xudaning xelqliri,

ziyaret qilinglar Yërusalëmni.^*

aylinip körüp uni,

sanap chiqinglar munarlirini.

¹³Közitip chiqinglar sëpillirini,

közdin kechürünglar qel’elirini,

bayan qilish üchün këyinki ewladlargha ularni.

¹⁴Berheq, Xuda bizning Xudayimizdur ebedke,

u bizni yëtekler menggüge.

Korahning ewladliri yazghan munajat bolup, naxsha qilip ëytilsun dep, neghmichiler bëshigha tapshurulghan.

¹Ey jahan ehli qulaq sëlinglar,

ey xelqler yaxshi anglanglar.

²Ësilzade yaki addiy adem bolsun,

bay we namrat hemmisi qulaq salsun.

³Bayan eyley hëkmetke tolghan durdanilarni,

chüshendürey qelbimdiki chongqur oylarni.

⁴Diqqitimni bërip men hëkmetlik sözlerge,

lira^* chëlip sherhi bërey uning sirliq menilirige.

⁵Men nëmishqa qorqup yürey külpet kelse bëshimgha,

reqiblirimning yawuzluqliri etrapimni qaplap tursa?!

⁶Mal-mülkige ishiner ular,

bayliqining köplükidin maxtinar.

^7-9Qërindishi üchün hëchkim Xudagha bedel töliyelmes,

qërindishi üchün bedel tölesh mumkin emes,

bahasizdur insan hayati, sëtip alghili bolmas.

Qutquzalmas hëchkim ölümdin qërindishini,

menggü yashap, gör azabini körmeslikini.

¹⁰Bilimiz danishmenlerning ölüm sherbiti ichidighanliqini,

nadan we exmeqlerningmu oxshashla ölidighanliqini.

Ular haman qaldurup këter bashqilargha mal-mülkini.

¹¹Ger nam qilip bersimu isimlirini yerlirige,

ularning qebriliri öyliri bolup qalar menggüge.

Turalghusidur shu qebriler dewrdin-dewrgiche.

¹²Bayliqi bolsimu menggü yashawermes insan,

haywangha oxshash bir küni ölüp tügeydu haman.

¹³Mushundaq bolar aqiwiti özige ishengen exmeqlerning,

ulargha egiship sözlirige qayil bolghanlarning. Sëlah

¹⁴Padichi bolup ölüm ulargha,

heyder ularni qoy kebi ölükler makanigha.

Jesetliri chirip këter gör ichide,

heshemetlik öylirimu qalar yiraqta.

Heqqaniylar ghelibe küni kelgende

höküm sürer ularning üstide.

¹⁵Lëkin Xuda öz yënigha tartar mëni,

gör azabidin xalas qilip jënimni. Sëlah

¹⁶Biseremjan bolma birersi bëyip ketse,

a’ilisining mal we mülki köpeyse.

¹⁷Hëchnëmisini ëlip këtelmes u ölgende,

bille bolmas mal we mülki qebriside.

¹⁸Bextlik hës qilsimu u özini hayat chëghida,

kishiler maxtisimu u ronaq tapqinida,

¹⁹këter u yenila ata-bowilirining yënigha,

chiqalmas menggü ular yoruqluqqa.

²⁰Chüshenmes bayliqi bar insanlar buni,

haywangha oxshash ölidighanliqini bir küni.

Asaf yazghan munajat

¹Qadir Xuda – Perwerdigar xitab qildi jahan ehlige,

meshriqtin-meghribqiche bolghan pütkül yer yüzidikilerge.

²Xudaning parlaq nuri julalidi Si’ondin,

güzellikning kamaliti bolghan ashu makandin.

³Rebbimiz süküt qilip turmas zinhar, kelmekte u,

aldida ot yalquni yalmap këler,

etrapida boran-chapqun huwlap këler.

⁴U chaqirip asman bilen zëminni guwahliqqa,

deydu mundaq, öz xelqini tartish üchün soraqqa:

⁵“Huzurumgha yighinglar manga sadiq xelqimni,

qurbanliq qilip men bilen ehde tüzgenlerni.”

⁶Ershte namayan bolar Xudaning heqqaniyliqi,

berheq, alemning soraqchisidur Xuda özi. Sëlah

⁷“Men Xudadurmen, silerni yaratqan Xuda,

ey xelqim, qulaq sëlinglar manga,

ey Isra’il, shikayitim bar sanga.

⁸Qurbanliqing üchün eyiblimeymen sëni,

eyiblimeymen da’im atighan köydürme qurbanliqingni.

⁹Lazim emestur manga ëghilingdiki buqiliring,

yaki qotiningdiki öchkiliring.

¹⁰Chünki, mëningkidur ormanlardiki barliq haywanlar,

minglighan yaylaqlardiki mal-waranlar.

¹¹Manga tewedur taghlardiki uchar qanatlar,

daladiki jimi janiwarlar.

¹²Sorimasmen sendin qorsiqim achsa nawada,

chünki bu dunya, uningdiki me’ishetler tewedur manga.

¹³Ejeba, men yermenmu buqa göshini,

ichermenmu öchke qënini?!

¹⁴Qurbanliq süpitide shükürlerni ëyt manga,

wapa qil bergen wedengge men ulugh Xudagha.

¹⁵Chaqir mëni her waqit kün chüshse bëshinggha,

qutquzimen sëni, ulughlaysen mëni shunda.”

¹⁶Emma Xuda deyduki rezillerge:

“Nëme heqqing bar qira’et qilishqa nizamlirimni?

Nëme heqqing bar tilgha ëlishqa ehdemni?

¹⁷Öch köridighan tursang telimlirimni,

ret qilidighan tursang sözlirimni.

¹⁸Dostlishisen oghri bilen,

arilishisen zinaxor bilen.

¹⁹Pasiq sözlerdin tartmaysen tilingni,

tiling toqup chiqar yalghanchiliqlarni.

²⁰Olturuwëlip qara chaplaysen tughqininggha,

töhmet qilisen bir qorsaq qërindishinggha.

²¹Süküt qildim qilghiningda bu ishlarni,

özüngge oxshash, dep oyliding shunga mëni.

Biraq, men eyibleymen choqum sëni,

aldinggha qoyimen qilmishliringni.

²²Ey mëni untughanlar, yaxshi oylanglar qilmishinglarni,

bolmisa bitchit qiliwëtimen hemminglarni.

U chaghda hëchkim qutquzalmas silerni.

²³Qurbanliq süpitide manga shükür ëytqanlar mëni ulughlar,

shundaq qilip nijatliqimgha ërishmek üchün yol hazirlar.”

Dawut yazghan munajat bolup, naxsha qilip ëytilsun dep, neghmichiler bëshigha tapshurulghan. Padishah Dawut Batsheba^* dëgen ayal bilen bir orunda yatqandin këyin, Dawutning aldigha Natan peyghember këlip Xudaning sözini yetküzgenidi. Shuning bilen padishah Dawut bu munajatni yazghan.

¹Rehimingni iltipat eyligeysen, i Xuda,

chünki menggülük muhebbet bar sende.

Kechürgeysen mëning qilghan gunahimni,

cheksiz rehimdillik xislitingde.

²Paklighaysen etmishimdin Igem mëni,

yuyup pakiz mëning barliq gunahimni.

³Berheq, mëning iqrarim bar qilmishimgha,

gunahlirim turar da’im köz aldimda.

⁴Gunah qildim aldi bilen sëning aldingda,

neziringde rezil ishlar igisimen i Xuda.

Adaletning igisisen peqet özüng,

heqtursen manga höküm chiqarmaqqa.

⁵Gunahkarmen shübhisizki tughulghinimdila,

hetta anamning qarnida peyda bolghinimdila.

⁶Sen isteysen qelbimning pakliqini,

salghin yürikimning chongqur qatlimigha danaliqingni.

⁷Tazila mëni lipekgülde^* paklinay,

yuyghin mëni qardin aqqa aylinay.

⁸Kechürginingni anglap, shad-xuram bolay,

sen yanjighan ustixanlirim hem shadlanghay.

⁹Neziringdin saqit qilip gunahlirimni,

öchürüwetkin sanga qilghan ita’etsizlikimni.

¹⁰Bir pak yürek ata qilghin manga Rebbim,

ixlasmen qelbni qayta qilip teqdim.

¹¹Qoghlimighin huzurungdin zinhar mëni,

tartiwalma mendin Muqeddes Rohingni.

¹²Hës qildurghaysen yëngibashtin nijatliqning shadliqini,

ata qilghaysen manga bir ita’etmen qelbni.

¹³Shundila men azghunlargha ögitey chin yolungni,

gunahkarlar towa qilip, makan qilsun yëningni.

¹⁴Ëh Xuda, nijatkarim Xuda!

Qan töküsh jinayitidin qutquzghin mëni,

shunda shadlinip, küyley nijatliqingni.

¹⁵I Igem, sözlet mëning tilimni,

ëytsun aghzim sanga bolghan medhiyemni.

¹⁶Istimeysen qurbanliq qilishni, bolmisa qilar idim uni,

köydürme qurbanliq qilsammu xursen qilmas könglüngni.

¹⁷Xudani xursen qilidighan qurbanliq – del qelbning pushaymini,

i Xuda, terk etmeysen pushayman qilip towa qilghan köngülni.

¹⁸Shapa’iting bilen yashnatqaysen Si’on^* shehirini,

yëngibashtin qurghaysen Yërusalëmning sëpillirini.

¹⁹Memnun bolisen bëkitilgen qurbanliqlardin shundila,

qobul qilisen köydürme we pütün qurbanliqlarni,

awam qurbanliq qilar torpaqlarni qurbanliq supangda.

Bu munajat, Do’ëg isimlik bir Idomluq, Sa’ul padishahning aldigha bërip, Dawutning rohaniy Aximelekning öyide ikenlikini xewer qilip qoyghandin këyin Dawut teripidin yëzilghan terbiyewi munajat bolup, naxsha qilip ëytilsun dep, neghmichilerning bëshigha tapshurulghan.

¹Nëchün maxtinisen rezillikingdin ey nochi?

Menggülüktur Xudaning manga bolghan muhebbiti.

²Tiling ittik, oxshar ötkür ustirigha,

u ister weyran qilishni, mahirdur yalghanchiliqqa.

³Ewzel körisen yaxshiliqtin yamanliqni,

heq sözleshtin yalghanchiliqni. Sëlah

^4-5Amraqsen ademni tügeshtüridighan yalghan sözlerge,

shuning üchün Xuda sëni yoqitidu menggüge.

Tutuwëlip u sëni tartip chiqar öyüngdin,

yiltizingni yulup tashlar bu paniy alemdin. Sëlah

⁶Buni körüp heqqaniylar hang-tang qalar,

u nochini mundaq dep zangliq qilar:

⁷“Qaranglar, bu Xudagha tayanmighan küchlük adem idi,

u peqet öz bayliqigha tayanghanidi,

bashqilarni weyran qilish bedilige küchlengenidi.”

⁸Men xuddi baraqsan ösken zeytun deriximen,

Xudaning öyide mustehkem güllinip ösimen,

uning mëhir-muhebbitige menggü ishinimen.

⁹Shapa’etlik bolghach Xuda, ümid baghlaymen sanga,

teqwadar xelqing arisida

menggü shükür ëytimen qilghan yaxshi ishliringgha.

Dawut yazghan terbiyewi munajat bolup, “maxalat”ta^* ëytilsun dep, neghmichiler bëshigha tapshurulghan.

¹Exmeqler öz könglide “Xuda yoq” der,

eslide ular rezil, buzuqlardur.

Ulardin birmu toghra yolda mangghuchi yoqtur.

²Insangha nezer salar Perwerdigar ersh’eladin,

barmidu dep, manga telpüngen birer aqil ulardin.

³Emma ular buzulghan bolup pasiq, azghuchi,

hetta ularning birimu emes toghra yolda mangghuchi.

⁴Bilmesmu ejeba Xudaning barliqini pasiqlar?!

Ular bulap xelqimni, nandek ëzip yep-yutar,

esla du’a-tilawet qilmas Xudagha ular.

⁵Basar ularni shunche küchlük wehime,

hetta hëchbir qorqunch yoq yerde.

Chünki ey Isra’il, yanchiwëter^* Xuda

sëni qorshawgha alghanlarning ustixanlirini.

Sen derweqe uyatta qaldurisen ularni,

chünki Xuda ret qilghandur yamanliq qilghuchilarni.

⁶Ëh, Si’ondin chiqip kelse idi nijatliq Isra’illargha!

Yaqup ewladliri shadlinar, Isra’illar chömer xushalliqqa,

Xuda asarettiki xelqini hörlükke chiqarghanda.

Bu Zifliqlar Sa’ul padishahning yënigha bërip “dawut bizning arimizda yoshurunup yüridu” dep chëqimchiliq qilghandin këyin^* Dawut yazghan terbiyewi munajat bolup, tarliq sazlar bilen orunlansun dep, neghmichiler bëshigha tapshurulghan.

¹I Xuda, qutquzghin özüng mëni,

qudritingde qoghdighin mëni.

²I Xuda, anglighin du’alirimni,

tingshighin munajat-nidalirimni.

³Zorawan düshmenler qarshi chiqmaqta manga,

ular qest qilmaqchi eziz jënimgha.

Ëtibar bermes ular esla Xudagha.

⁴Ishenchim kamilki medetkar Xuda,

Igimiz yar-yölek bolidu manga.

⁵Bergey u yamangha yamanche jaza,

halak qilip düshmenni wapadar Xuda.

⁶I Perwerdigar, sunay sanga xalis qurbanliqimni,

bolghachqa sen shapa’etlik, medhiyeleymen namingni.

⁷Shundaq Xuda, barliq külpetlerdin xalas qilding mëni,

öz közüm bilen kördüm düshmenlirimning meghlubiyitini.

Dawut yazghan terbiyewi munajat bolup, tarliq sazda tengkesh qilinip ëytilsun dep, neghmichiler bëshigha tapshurulghan.

¹Qulaq salghin du’ayimgha i Xuda,

biperwa bolmighin iltijayimgha.

²Jawab bergin nezer sëlip bu halimgha,

yürimen qaqshap, perishanmen da’ima.

³Saldi düshmenler tehdit manga,

reziller salmaqta jebir-japa.

Shikayet qilar ular manga,

qehridin bala yaghar bëshimgha.

⁴Yürikim siqilar qepiside,

wujudum bësilar ölüm teshwishide.

⁵Ensizlik chirmap aldi jismimni,

wehime, titrekler qaplimaqta mëni.

⁶Bolsa idi qanitim kepterler kebi,

perwaz qilip tapar idim aramgahni.

⁷Der heqiqet qëchip bërip yiraqlargha,

qonar idim chöl-jezire, bayawangha. Sëlah

⁸U yerlerdin bir panah jay tapar idim,

boran-chapqun, quyunlardin qutular idim.

⁹I Igem, biseremjan qilip yawlirimni,

böliwetkin birqanchigha tillirini.

Chünki kördümmen shehirimizde

zorawanning herikiti we jëdilini.

^10-11Qarawulluq qilar ular këche-kündüz,

aylinip yürüp sheher sëpilini.

Wahalenki, qaplighan sheherni jinayet we shumluq,

öz ilkige alghan zulum, hiyle we buzuqchiliq.

¹²Düshmenlirim emes manga haqaret qilghanlar,

bolmisa sewr-taqet qilar idim.

Öchmenlirim emes mëni kemsitkenler,

bolmisa ulardin özümni qachurar idim.

¹³Emma buni qilghuchi del sen – mëning yëqinim,

janjiger dostum we yaxshi hemrahim.

¹⁴Biz sirdash dostlar iduq,

muqeddes ibadetxana hoylisida

jama’et arisida bille yürgeniduq.

¹⁵Ölüm düshmenlirimni qoynigha alsun tuyuqsizla,

tirik ketsun ular ölükler makanigha,

chünki rezillik makan tutar ularning dillirida.

¹⁶Iltija qilarmen yalwurup Xudagha,

Perwerdigarim nijatliq bërer manga.

¹⁷Peryad qilsam töküp derdimni,

Xuda anglar awazimni,

etigen, chüsh we axshimi.

¹⁸Gerche shunche köp bolsimu,

qarshi chiqqanlar manga.

U qutquzar jenglerde mëni,

zerer yetküzmey jënimgha.

¹⁹Ezeldin höküm sürüp kelgüchi,

anglap mëning du’alirimni, Sëlah

mat qilar düshmenlirimni.

Chünki ular yanmas yolidin,

qorqmas hem Xudayimdin.

²⁰U hemrahim musht kötürdi,

özini dost bilgenlerge.

Xilapliq qildi u hem

dostigha bergen wedisige.

²¹Sëriq maydin siliqtur aghzi,

biraq shumluqqa tolghandur dili.

Shiker-sherbettek sözler tili,

lëkin ittik shemsherdek xeterliktur ëytqanliri.

²²Perwerdigargha tapshur ghem-qayghungni,

u qollap-quwwetler sëni.

Perwerdigar yiqitmas hergiz,

toghra yolda mangghan ademni.

²³Ëh Xuda,

sen tashlaysen halaket hanglirigha düshmenlirimni,

qanxor, hiyligerler yashiyalmas ömrining yërimini,

emma men yoqatmasmen sanga bolghan ishenchimni.

U Dawut yazghan miqtam^* bolup, “yiraqtiki ünsiz kepter” dëgen ahangda ëytilsun dep, neghmichiler bëshigha tapshurulghan. Dawut bu munajatni Filistiyelikler uni Gat dëgen sheherde tutuwalghanda yazghan.

¹Shepqet qilghin manga, i Xuda.

Kishiler qilip mëni depsende,

künboyi qiynap, bekla ezmekte.

²Reqiblirim ziyankeshlik qilishqa urunmaqta.

Tekebburliship ularning nurghunliri,

manga qarshi jenggi-jëdel chiqarmaqta.

^3-4Ishench qildim sanga Xuda qorqqan chëghimda,

wediliring bolghach mëning yürikimning chongqur qëtida.

Ishenchim bolghach Xuda sanga ezeldinla,

qorqmidim, nëmimu qilalar dep insan manga.

⁵Burmilar ular mëning sözlirimni da’ima,

xiyalliri ularning ziyankeshlik qilishtur manga.

⁶Ular manga yoshurun halda hujumgha chiqmaqta,

chüshüp mëning pëyimge hayatimgha qest qilmaqta.

⁷Jazasiz qalarmu ular gunahi turupmu shunche?!

I Xuda, ularni gumran qilghaysen qehringde.

⁸Xatirilep qoyghansen bu sersanchiliqlirimni,

tulumgha qachilap qoyghansen köz yashlirimni,

yëzip qoyghansen deptiringge bularni.

⁹Düshmenlirim chëkiner iltija qilsam sanga,

shübhisizki, men tereptidursen, i Xuda.

¹⁰Ulughlarmen Xudani we uning manga bergen wedilirini,

ulughlarmen Igemni we uning manga ëytqan sözlirini.

¹¹Ishenchim bolghach Xuda sanga ezeldinla,

qorqmidim, nëmimu qilalar dep insan manga.

¹²Turmisam bolmas wedilirimde, i Xuda,

sunimen shunga shükür qurbanliqlirimni sanga.

¹³Chünki mëni qutquzup qalding ölümdin,

saqliding hem putlirimni putliship këtishtin.

Meqsiting mëni aman yürsun dep aldingda,

mangsun dep hem hayatliq nurungda.

Dawut yazghan miqtam bolup, “halak qilmighin” dëgen ahangda ëytilsun dep, neghmichiler bëshigha tapshurulghan. Dawut bu munajatni Sa’ul padishahtin qëchip, bir öngkürge yoshurunuwalghan chëghida yazghan.

¹Shepqet körsetkin i Xuda,

shepqet körsetkin manga.

Chünki men panah taparmen sende,

qanatliringning astida,

taki xeter ötüp ketküche.

²Nida qilarmen Xudagha – ulugh bolghuchigha,

men heqqidiki iradisini ijra qilghuchigha.

³U ershtin eweter nijatliqini,

shermende qilar mëni xarlighanlarni, Sëlah

körsiter manga muhebbiti we sadaqitini.

⁴Men yatarmen arisida shirlarning,

adem göshi yeydighan ach közlerning.

Tilliri xuddi ötkür qilich bolsa,

neyze we oqlar kebi chishliri ularning.

⁵I Xuda, ulughluqing körsitilgey asman-pelekte,

shan-sheriping namayan bolghay pütkül yer yüzide.

⁶Tuzaq qurar yollirimgha reqiblirim,

elemlerdin ëzildi bu yüreklirim.

Ular ora koliwidi yollirimgha,

özliri chüshti qazghan orilirigha. Sëlah

⁷Ishenchim kamil Xuda, ishenchim kamil sanga,

shunga medhiye oqup ëytimen sanga naxsha.

⁸Oyghan ey rohim!

Sayra lira, chiltarim!

Oyghitayli tangni neghme-saz bilen,

oyghitayli tangni medhiye bilen.

⁹Hemdusana ëytimen sanga, i Igem Xuda,

sëni küyleymen barche el, xelqi’alem ara.

¹⁰Chünki menggülük muhebbiting asman kebi bipayan,

sadaqiting shunche moldur bulutlargha taqashqan.

¹¹I Xuda, ulughluqing körsitilgey asman-pelekte,

shan-sheriping namayan bolghay pütkül yer yüzide.

Dawut yazghan miqtam bolup, “halak qilmighin” dëgen ahangda ëytilsun dep, neghmichiler bëshigha tapshurulghan.

¹Chiqiramsiler heq qarar hökümdarlar rasttinla?

Adilmidu xelqning üstidiki hökümingla?

²Yaq, könglünglarda yamanliq oylap qarar chiqirisiler,

yer yüzide özünglar zorawanliq qilisiler.

³Reziller adashqandur baliyatqudin chiqqandila,

yalghanchilar yoldin azar anisidin tughulupla.

^4-5Zeherxendidur ular zeherlik yilan kebi,

jahilliqi ularning ney awazini anglimaydighan kobra be’eyni,

yilan oynatquchining mungluq küyini anglimas ular qet’iy.

⁶I Xuda, urup sunduruwetkin ularning chishlirini,

i Igem, yuluwetkin u shirlarning tongkay chishlirini.

⁷Ular xuddi ëqip ketken sular kebi yoqalsun,

oqyalirini betlise, oqi shu’an sunup ketsun.

⁸Arimizdin yoqalsun ular xuddi qululiler mangghansëri ërip yoqalghandek,^*

kün körmisun ular ayalning boyidin chüshüp ketken bowaqtek.

⁹Tiken yëqilip ochaqta qazan sezgüche issiqini,

i Xuda, yoqutiwetkin ularni – yash-qërilarning hemmisini.

¹⁰Yamanlarni jazalisa Xudayim heqqaniylar xush bolar,

yamanlarning qënida putlirini yuyidu ular.

¹¹Shunga derki insanlar: “Heqqaniylar in’am alur,

shübhisizki, yer yüzide soraq qilghuchi Xuda bardur.”

Dawut bu miqtamni padishah Sa’ul paylaqchilarni ewetip uni közitip turushqa we pursiti kelgende öltürüwëtishke buyruq qilghanda yazghan.

¹Qutquz Igem mëni reqiblirimdin,

qoghda mëni manga qarshi turghanlardin.

²Qutquzghaysen yamanlarning qolidin,

azad qilghin qanxorlarning qoynidin.

^3-4Jënimni almaq üchün ular paylap yürmekte,

ne jinayet, ne gunahlar bolsun mëningde.

Wehshiyler birliship manga suyiqest qilmaqta,

hëch yamanliq qilmisammu ulargha.

Ular teyyar bolmaqta manga hujum qilishqa,

kelgin manga yardem bërishke,

nezer sëlip mëning ushbu halimgha.

⁵I Perwerdigar – qudretlik serdar Xuda,^*

i Isra’illarni tallighan Xuda,

kelgin barliq Xudasizlarni jazalashqa,

shepqet qilmighin rezil satqunlargha. Sëlah

⁶Her axshimi këler ular,

lalma ittek sheherde hawship yürer,

⁷toxtimastin ëghizliridin yamanliq chiqar,

tilliri ularning xenjerge oxshar,

ichide “qilghanlirimizni kimmu biler” dep oylar.

⁸Lëkin Xuda sen ular üstidin külisen,

barliq xudasiz ellerni mazaq qilisen.

⁹Sanga telmürimen i küch-qudritim Xuda,

chünki bashpanahimdursen manga da’ima.

¹⁰Wapadar Perwerdigar manga këlip yardem bërer,

düshmenlirimning meghlubiyitini körsiter.

¹¹I qalqinimiz bolghan Igem,

halak qilma ularni,

untumisun xelqim ularning halini,

qudriting bilen sersan qilghin ularni,

yerge qaratqin ularning yüzlirini.

¹²Ëghizliri tolghandur yamanliqqa,

zeher tamar tilliridin ularning,

yaman söz we yalghanchiliqliri,

tumshuqidin ilgey tekebburluqining.

¹³Ghezipingde yoq qil ularni,

qirip tashla qaldurmay birini.

Ayan bolsun pütün dunyagha,

Yaqup ewladlirigha Xudaning hökümran ikenliki. Sëlah

¹⁴Her axshimi këler ular,

lalma ittek sheherde hawship yürer.

¹⁵Ozuq izdep heryangha qatrar,

tapalmisa eger ach qëlip huwlar.

¹⁶Wahalenki, men küyleymen qudritingni,

her seherde, menggülük muhebbitingni.

Chünki sen mëning qorghinimsen,

ëghir künlerde panahgahimsen.

¹⁷I manga küch-quwwet bolghan Igem,

bardur sanga mëning medhiyem.

Sen mëning mustehkem qorghinimdursen,

manga muhebbet körsetküchi Xudadursen.

Dawut yazghan terbiyewi qimmetke ige bir miqtam bolup, “guwahliq nëluperi” dëgen ahangda ëytilsun dep, neghmichilerning bëshigha tapshurulghan. Ushbu miqtam Dawut Arram-Naxarayim we Arram-Zobahliqlar bilen jeng qilghandin këyin, hemde leshker bëshi Yo’ab Tuz jilghisida Idomluqlardin on ikki ming ademni öltürgendin këyin yëzilghan.

¹I Xuda, yer bilen yeksan qilding ret qilip bizni,

ghezeplending, emdi qaytur yëninggha hemmimizni.

²Sen tewritip ëchiwetting yer-zëminni,

mana silkinmekte yer, ongsha uni.

³I Xuda, azab salding öz xelqingge,

jaza sharabini ichküzding bizge.

⁴Emma tikliding belge tughi sanga ixlasi barlargha,

panahlanghay dep yaw oqyaliridin qëchip uninggha. Sëlah

⁵Ong qolungda qutquz bizni qilip bizge ijabet,

özüng söygen bendiliring tapsun shunda nijat.

⁶Xuda shundaq deydu öz muqeddesliki bilen:

“Shadliqta xelqimge bölüp bërimen Shekem diyarini,

teqsim qilip bërimen Sukkot wadisini.

⁷Gil’ad rayoni mensuptur manga,

Manassemu hem te’elluq manga.

Efrayim – bëshimdiki dubulghamdur,

Yehuda mëning seltenet hasamdur.

⁸Put yuyidighan qachidur Mo’ab manga,

choruqumni tashlaymen Idomgha.

Chuqan salimen,

Filistiye üstidin ghelibe qilghinimgha.”^*

⁹Kim mëni idomgha zeper bilen bashlap kirer,

kim mëni u mustehkem sheherge bashlap barar?

¹⁰I Xuda, bizdin waz kechtingmu?

Biz bilen birge bolmiding jengdimu.

¹¹Düshmenge qarshi bizge bol yardemde,

bihudidur zeper qazinish insanning yardimide.

¹²Xudaning qudriti bilen küresh qilimiz baturlarche,

Igem özi meghlup qilar düshminimiz tügigüche.

Dawut yazghan munajat bolup, tarliq sazlar tengkishide ëytilsun dep, neghmichiler bëshigha tapshurulghan.

¹I Xuda, anglighaysen peryadimni,

qobul qilghin sanga qilghan du’ayimni.

²Chüshkünlük basqanda qelbimni, iltija qilimen yiraqtin sanga,

yëtekligin mëni panahlinidighan ëgiz qoram tashqa.

³Shübhisizki, sen mëning bashpanahim,

düshminimdin qoghdaydighan mustehkem qorghinim.^*

⁴Chëdiringni menggülük makan qilay,

qanatliringning sayisida panah tapay. Sëlah

⁵I Xuda, anglap sen qesemlirimni,

berding manga, sanga ixlas qilghanlargha atighan bextni.

⁶Uzartip padishahning ömrini,

ewladtin-ewladqiche dawam etkin textini.

⁷I Xuda, u menggü höküm sürsun köz aldingda,

qoghdighay uni muhebbiting we sadaqiting da’ima.

⁸Neghme-nawa qilay menggü atap sëning naminggha,

sanga bergen qesemlirimni her küni qilip ada.

Dawut yazghan munajat bolup, “yidutun” ahangida ëytilsun dep, neghmichiler bëshigha tapshurulghan.

¹Aram tapar jënim peqet Xudadin,

nijatliqmu manga peqet këler uningdin.

²Qoram tëshim, nijatkarim peqet Xudadur,

tewrenmesmen chünki u qorghinimdur.

^3-4Ey reziller qachanghiche manga hujum qilisiler?

Qachanghiche hemminglar mëni öltürmekchi bolisiler?

Xuddi yiqitqandek qiysiyip qalghan tam, lingship qalghan qashani,

silerning qestinglar heywetlik ornumdin yiqitishtur mëni.

Shunche amraq siler yalghanchiliqqa,

bext tiligininglar bilen ëghizinglarda,

qarghaysiler ichinglarda. Sëlah

⁵Peqet Xudadinla aram tap ey jënim,

chünki uningdidur mëning barliq ümidim.

⁶Qoram tëshim, nijatkarim peqet Xudadur,

tewrenmesmen chünki u qorghinimdur.

⁷Nijatliqim, shan-shöhritim Xudadin këlur,

Xuda mëning bashpanahim, qoram tëshimdur.

⁸Ey xalayiq her da’im ishininglar Xudagha,

izhar eylep köngül we derdinglarni uninggha.

Chünki Perwerdigar bizge bolidu bir panahgah. Sëlah

⁹Insan peqet birla tiniqtur,

shöhritimu uning quruqtur.

Kötürülüp këter sëlinsa tarazigha ular,

chünki ular bir tiniqtinmu yëniktur.

¹⁰Tayanma zomigerlikke,

ümid baghlima bulangchiliqqa.

Egerde bayliqing awusa,

köngül berme uninggha.

^11-12Xuda dëding: “Küch-qudret mensuptur manga.”

Tekitliding: “Menggülük muhebbet tewedur manga.”

Berheq, sen qayturisen herbir insangha,

qilghan emellirige yarisha.

Dawut Yehuda chölide sersan bolup yürgen waqtida yazghan munajat

¹Perwerdigarim ëtiqad qilimen sanga,

izdeymen sëni intizar bolup i Xuda.

Sugha teshna bolghan qurghaq, qaqas yer kebi,

teshna boldum özüngge, wujudum intiler sanga.

²Muqeddes jayda turup nezer salsam,

küch-qudret, shan-sheripingni körüwalsam.

³Hayattinmu qimmettur menggülük muhebbiting,

shunga sëni medhiyeler tilim mëning.

⁴Teripleymen Igem sëni jënim tende bolsila,

qollirimni kötürüp du’a qilimen sangila.

^5-6Ornumda yëtip Xuda sëni oylisam,

këchiliri sen heqqide xiyal qilsam,

shadliqqa chömüp medhiyeler töküler aghzimdin,

qorsiqim toyghandek mol dastixandin,

rohim toydi sëning mol iltipatingdin.

⁷Sen medetkar bolup kelding manga i Xuda,

küyleymen sëni qanatliring sayisida.

⁸Birdinbir tayanchim bildim sëni,

ong qolung yöler mëni.

⁹Emma tëgi yoq görge chüsher,

jënimning pëyige chüshkenler.

¹⁰Qilichta ëlinar ularning janliri,

chilbörige yem bolar hem ularning tenliri.

¹¹Ishinimenki padishah Xudadin xursen bolar,

“Xuda guwah” dep qesem ichkenler Xudani ulughlar,

berheq, yalghan sözligenlerning zuwani tutular.

Dawut yazghan munajat bolup, naxsha qilip ëytilsun dep, neghmichiler bëshigha tapshurulghan.

¹Qulaq salghin i Xuda, angla mëning ahimni,

düshmenlerning qestidin qoghdighin hayatimni.

²Saqlighin mëni özüng rezillerning suyiqestidin,

aman qil hayatimni yamanlarning qestidin.

³Be’eyni shemsher kebi ötkür ularning tilliri,

xuddi oqyadek betleklik ularning zeher sözliri.

⁴Yoshurun atar ular gunahsiz kishilerni,

tuyuqsiz oqqa tutar tep tartmastin ularni.

⁵Betniyetlik qilishqa ilhamlandurup bir-birini,

meslihetlisher öz’ara yoshurun tuzaq qurushni,

oylaydu ular: “Kim bilip qalatti bu ishlarni.”

⁶Deydu ular herxil suyiqest oylap chiqip:

“Mukemmel pilan tüzduq birliship.”

Nëmidëgen sirliq he, insanning ichki dunyasi.

⁷Emma Xuda ulargha oq atar,

ular tuyuqsiz yaridar bolar.

⁸Tilliridin ilinip gumran bular,

ularni körgenler mesxire qilar.

⁹Qorqunch basar hemme insanlarni,

oylighanda Xudaning qudritini,

bayan qilar uning karametlirini.

¹⁰Heqqaniylar shadlansun Perwerdigardin da’ima,

panah tapsun hem ular Perwerdigarning qoynida,

qelbi paklar hemdusana ëytsun uninggha.

Dawut yazghan munajat bolup, naxsha qilip ëytilsun dep, neghmichiler bëshigha tapshurulghan.

¹Hemdusana oqumaq bolup sanga i Xuda,

kishiler kütmekte sëni Si’onda.^*

wedilirini emelge ashurar ular shu jayda.

²Du’alarni anglighuchi i Xuda,

hemme insan këlidu sëning aldinggha.

³Gunahlar bësiwalghan bolsimu bizni,

kechürüm qilisen gunahlirimizni.

⁴Neqeder bextliktur

sen özüngge yëqin qilip tallighan kishiler,

yashar ular muqeddes hoyliliringda,

bolimiz memnun öyüngning berikitidin,

ibadetxanangning muqeddeslikidin.

⁵Ulugh ghelibeng bilen

jawab bërisen bizge,

i qutquzghuchimiz Xuda.

Ümidisen barche insanning,

taki chëtidikilergiche zëminning.

⁶Qudret bilen baghlap bëlingni,

küchüng bilen tikliding taghlarni.

⁷Tinchitisen dëngizlarning shawqunlirini,

hem yat ellerning topilanglirini.

⁸Eyminer karametliringdin yiraqtiki eller,

sherqtin-gherbkiche küy yangritar xelqler.

⁹Sen yerge köngül bölüp,

su bilen sughirip uni

bekmu munbetleshtürdüng zëminingni.

Sugha toldurdung ëriq, östeng, deryaliringni,

ashliq bilen teminleshke bendiliringni.

Sen nësip qilding shundaq bolushni.

¹⁰Toldurup sugha chöneklerni,

tarashlaysen qirlirini.

Yamghur bilen yumshitip yerni,

ündürisen unda mol zira’etlerni.

¹¹Mol hosulni bëshigha taj qilip taqaysen yillarning,

bay-bayashat, toq bolar yetkenla jaylar qediming.

¹²Qoyuq we elwek bolar daladiki otlaqlar,

tagh-dawanlarmu bëlini shadliq kemiride baghlar.

¹³Ëkin kebi yarashqan qoylar topi otlaqqa,

zira’et we maysilar tolup ketken jilghigha.

Shunga ular naxsha ëytar yangritip shadliqta.

Dawut yazghan munajat bolup, naxsha qilip ëytilsun dep, neghmichiler bëshigha tapshurulghan.

^1-2Ey jahan ehli Xudagha yangritinglar alqishlar,

xisletlirini teriplep küy-naxshigha qëtinglar,

hayajanda uninggha medhiyeler oqunglar.

³Shundaq denglar ey xalayiq Xudagha:

“Neqeder heywetlik-he qudriting!

Körsitilgende karamiting i Xuda,

düshmenliring tügülüp qalar aldingda.

⁴Pütkül yer-jahan sejde qilmaqta sanga,

küylep hemdusana oqumaqta naminggha.” Sëlah

⁵Körünglar Xudaning büyük qudritini,

uning körsetken karametlirini.

⁶U yol achti dëngizni yërip,

mëngip ötti xelqler qurghaq yoldin.

Tentene qilduq minnetdar bolup Xudadin.

⁷Öz qudriti bilen menggü höküm süridu Xuda,

pütkül insan ishliri ayandur köz aldida.

Ita’etsizler qarshi chiqmisun uninggha. Sëlah

⁸Ey yat xelqler medhiyelenglar Xudayimizni,

yangritinglar uninggha atap hemdusana, alqishlarni.

⁹U saqlap keldi hayatimizni,

tëyilip këtishtin putlirimizni.

¹⁰I Xuda, sen bizni siniding,

kümüshni otta tawlighandek tawliding.

¹¹Sen tuzaqqa chüshürdüng bizni,

yelkimizge hem artting ëghir yükni.

¹²Ghelibe qildurghaniding üstimizdin düshminimizni.^*

sen özüng sudinmu, ottinmu ötküzüp bizni,

axiri molchiliqqa ëlip kelding xelqimizni.

^13-14I Xuda, sanga wede bergenidim külpette qalghinimda,

qesem qilghanidim yelkemni ëghir kün basqinida.

Ëlip kirip ibadetxananggha köydürme qurbanliqlarni,

ada qilimen dep, sanga bergen qesemlirimni.

¹⁵I Xuda sanga atap bordaq mallarni,

köydürme qurbanliqqa bëghishlaymen.

Qochqar yëghini köydürüp, puritimen,

buqa we öchkilernimu özüngge sunimen. Sëlah

¹⁶Ey Xudagha ixlasi barlar, tingshanglar sözümni,

sözlep bërey Xudaning manga körsetken karametlirini.

¹⁷Awazimni kötürüp Xudagha qildim nida,

oqudum uninggha medhiye, hemdusana.

¹⁸Perwerdigar qulaq salmas idi du’ayimgha,

mayil bolsa nawada qelbim mëning gunahqa.

¹⁹Shübhisizki, du’ayimni anglidi Xuda,

du’a qilghinimda qulaq sëlip turdi manga.

²⁰Teripleyli hemmimiz Xudayimizni,

u ret qilmidi du’ayimni,

mendin xaliy qilmidi menggülük muhebbitini.

Bu munajat tarliq sazlarda tengkesh qilinip, naxsha qilip ëytilsun dep, neghmichiler bëshigha tapshurulghan.

¹Bizni bextlik qilghaysen Xuda,

shepqitingni körsitip bizge,

didaringning jilwilirini,

chëchip bizning üstimizge. Sëlah

²Alem ara melum bolghay sëning yolung,

barche eller arisida nijatliqing.

³Medhiyeligey sëni Xuda hemme xelqler,

hemdusana oqughay sanga jimi milletler.

⁴Barche elni bir özüng yëtekleysen i Xuda,

hem ularning üstidin adil höküm chiqirisen i Xuda,

shunga barliq insanlar shadlinip alqish yangratqay sanga. Sëlah

⁵Medhiyeligey sëni Xuda hemme xelqler,

hemdusana oqughay sanga jimi milletler.

⁶Yer-zëmindin alduq hosulni,

Xudayimiz bextiyar qildi bizni.

⁷Xuda bizge bext ata qilghay,

barche insan uninggha ixlas qilghay.

Dawut yazghan munajat bolup, naxsha qilip ëytilsun dep, neghmichiler bëshigha tapshurulghan.

¹Heriket qilghan bolsa idi Perwerdigar,

düshmenliri tiripiren bolar idi.

Öchmenliri her terepke qachar idi.

²Shamal uchurup ketkendek is-tütekni,

Xuda jezmen yoq qilidu rezillerni.

Halak bolar reziller Xuda aldida,

xuddi momdek ërigen otta.

³Heqqaniylar tentene qilip, xushal bolar,

Xuda huzurida rohi urghup, shadlinar.

⁴Xudagha hemdusana ëytinglar,

namini küy-naxshigha qëtinglar.

U bulutlar üstididur, ulughlanglar,^*

“Menggü bar bolghuchi – yah”dur uning nami.

Huzurida xushalliqqa chömünglar.

⁵Ata bolghan yëtimlargha,

ige chiqqan tul xotunlargha,

u Xudadur, makani muqeddestur.

⁶Öy-uchaqliq qilar Xuda ghëriblarni,

azad qilip, munbet yerge bashlar sürgünlerni,

lëkin, qaghjiraq yerge qaldurar boysunmighanlarni.

^7-8I Sinay tëghida sözligen Xuda,

i Isra’illarni tallighan Xuda,

zëmin titrep, yamghur tökti asman baghridin,

öz qowmingni chöller ara bashlap mangghiningda.

⁹I Xuda, zëmin we bendiliring üstige,

xasiyetlik yamghurungni yaghdurdung.

Halsirighanda ulargha quwwet berding.

¹⁰Shepqitingge na’il bolghan bendiliring makan tutti,

ëzilgen qowming sëning berikitingge ërishti.

¹¹Perwerdigar ghelibisini jakarlidi,

qiz-ayallar top bolup, xush xewerni tarqatti:

¹²“Padishahlar we ularning qoshunliri qëchishti.”

Öyde olturghan qiz-ayallar oljilarni bölüshti.

¹³Bayliq boldi hemmisige bu oljilar,

bay boldi hetta öy-makansiz padichilar,

ige boldi yene kümüsh qanatliq,

altun peylik kepterlerge ular.

¹⁴Qadir Xuda yat shahlarni tiripiren qilghinida,

qar yaghqandek halet peyda boldi Zalmon^* tëghida.

¹⁵Ey heywetlik Bashan tëghi,

choqqiliring shunche köp tëxi,

¹⁶ey hakawur Bashan tëghi,

nëchün shunche heset bilen qaraysen,

Xuda makan qilip tallighan Si’on tëghigha –

Xuda menggü makan tutqan tursa uningda?

¹⁷Xudaning jeng harwiliri nurghun, san-sanaqsiz,

Sinay tëghidin muqeddes ibadetxanigha kirer Igimiz.

¹⁸Rebbimiz sen yuqirigha chiqqiningda,

ëlip këtisen nurghunlighan esirlerni.

Sëliq qobul qilisen insanlardin,

hetta sanga ita’etsizlik qilghanlardin,

Igem Xuda orun alisen Si’ondin.

¹⁹Medhiyeler bolsun Igimizge,

u her küni ëghirchiliqimizni kötürmekte,

Perwerdigar nijatkardur bizge. Sëlah

²⁰Peqet bizning Rebbimiz nijatkar Xuda,

ölümdin qutquzush qadir Igemning qolida.

²¹Berheq, Xuda kukum-talqan qiliwëter düshmenlirining bëshini,

chaqar yaman yolda mëngiwergenlerning uzun chachliq bëshini.^*

²²Perwerdigar mundaq dëdi:

“Düshmenlirimni qayturup këlimen Bashan diyaridin,

ëlip chiqimen ularni dëngizning chongqur yëridin.

²³Shuning bilen milinidu putliring qangha –

düshmenliringning qënigha,

ulardin alalaydu nësiwisini itliringmu.”

²⁴I Xuda, sëning zeper qedemliring körünmekte,

i Xuda, mëning padishahim bolghan Perwerdigarim –

muqeddes ibadetxanigha këtiwatqining körünmekte.

²⁵Mangmaqta aldingda munajatchilar,

keyningde sazchilar.

Otturisida dapchi qizlar.

²⁶Jama’etler ara alqish-sada yangritinglar Xudagha,

ey Isra’illar,^* medhiye oqunglar Perwerdigargha.

²⁷Ene u yerde kichik Binyamin qebilisi

ulargha bashlamchi bolup mangmaqta.

Bardur ularning keynide sep tüzgen Yehuda emirliri,

shundaqla Zebulunning hem Naftalining emirliri.

²⁸I Xuda, namayan qilip qudritingni,

ilgiri körsetkendek körsetkin küchüngni.

²⁹Këlip Yërusalëmdiki ibadetxananggha,

padishahlar atar hediyeler sanga.

³⁰Tenbih bergin qomushluqtiki ashu yirtquch haywanlargha,

buqilar bashlap mangidighan mozaylar kebi yat ellerge.

Yerge urghin bizdin kümüsh-tengge teme qilghanlarni,

tarmar qilghin hem yat ellerdiki urushxumarlarni.

³¹Misirdin mötiwer elchiler këler,

Üfiyopiye Xudagha xalis hediye teqdim qilar.

³²I jahandiki padishahliqlar,

Igimizge medhiye naxsha ëytinglar,

Rebbimizni küyinglerge qëtinglar. Sëlah

³³Qedimdin bar bolghan, asmanlarda yüridighan,

qudretlik awazida asman baghrini yarghan,

Igimizning shenige küy-naxshilar ëytinglar.

³⁴Jakarlanglar Perwerdigarning qudritini,

u yürgüzer Isra’il üstidin seltenetlik hoquqini,

namayan qilar u hem samada küch-qudritini.

³⁵Shewketliktur Xuda muqeddes ibadetxanisida.

Isra’illarni tallighan Perwerdigar,

öz qowmigha küch-qudret ata qilar.

Medhiyeler oqulghay Xudagha!

Dawut yazghan munajat bolup, “nëluper” ahangida ëytilsun dep, neghmichiler bëshigha tapshurulghan.

¹I Xuda qutquzghin mëni,

su tumshuqumgha yetti!^*

²Tëgi yoq patqaqqa pëtip kettim,

kelkünde gherq bolup,

chongqurgha chöküp kettim.

³Peryad chëkip halim ketti,

gallirim qurup ketti,

telmürüp Xudayimgha

közümning nuri ketti.

⁴Chëchimdin köptur mëning,

sewebsiz manga öchler.

Qara chaplar manga ular,

mëni yoqatmaqchi bolghanlar –

mendin küchlük düshmenler.

Men bulimighan nersini,

qayturup ber, deydu ular.

⁵I Xuda, nadanliqim sanga ayan,

mëning yene qebihliklirim –

yoshurun emes, sanga ayan.

⁶I Perwerdigar –

qudretlik serdar Xuda,

mëning sewebimdin

ümidini sanga baghlap kütkenler

yerge qarap qalmighay.

I Isra’illarni tallighan Xuda,

sanga telpüngenler,

mëning sewebimdin

shermende bolmighay.

⁷Haqaretlendim sen üchün Xuda,

yüzüm chüshüp, qaldim nomusta.

⁸Yat boldum tughqanlirimgha,

yaqqa yurtluq ataldim qërindashlirimgha.

⁹Chünki muqeddes öyüngge bolghan muhebbitim

urghutidu xuddi ottek mëning qelbimni.

Sanga haqaret qilghanlarning haqaretlirimu,

basti hem mëning üstümni.

¹⁰Men roza tutup yighlisam

töwen tutup özümni,

mesxire qildi ular mëni.

¹¹Matem tutup, meyüslinip yürsemmu özüm,

men ularning söz-chöchikige yene qaldim.

¹²Tene qildi sheher qowuqida olturghanlar,

meyxorlarning naxshisigha tëma boldum.

¹³Shundaqtimu du’a qilimen toxtimay sanga,

menggülük muhebbet bolghach sende,

xalighan waqtingda, ishenchlik nijatliqingni

du’alirimgha jawab qilip, bergin manga.

¹⁴Qutquz mëni manga öch bolghanlardin,

qutquz mëni pëtip qalghan patqaqliqtin,

qutquz mëni suning chongqur qaynimidin.

¹⁵Gherq qilma mëni kelkün sulirigha,

yutquzmighin mëni dëngiz dolqunigha,

yem qilmighin mëni tegsiz hanggha.

¹⁶I Perwerdigar, manga özüng jawab bergin,

chünki menggülük muhebbiting ewzel manga,

mëhri cheksiz jamalingni körset Xuda.

¹⁷Jamalingni men qulungdin yoshurmighin,

chünki ëghir kün chüshti mëning bëshimgha.

I Ilahim, manga tëzdin jawab bergin.

¹⁸I Perwerdigar, yëqinlashqin manga,

xalas qilip düshmenlirimdin,

qutquzghuchi bolghin jënimgha.

¹⁹Bilisen mëning qandaq haqaretlengenlikimni,

reswa bolup bihörmet qalghanliqimni,

sen bilisen mëning barliq reqiblirimni.

²⁰Qelbimni zide qildi haqaretler,

qayghu we hesretlerge chömüldim.

Telmürsemmu hësdashliq qilarmu dep bireri,

yaki teselli birermu dep birersi,

birersimu chiqmidi, yoqtur hëchkim.

²¹Ular berdi ozuqluqumgha zeherni,

ussuzluqumgha buzulghan sharabni.

²²Ziyapiti özlirige qiltaq bolghay,

mëhmanliri üchün qapqan bolghay.

²³Bel-putliri madarsiz titrep turghay,

közliri torliship kor bolghay.

²⁴Ghezipingni ulargha chüshürgeysen,

qehringning otida köydürgeysen.

²⁵Makanliri ularning xarab bolsun,

chëdirliri chölderep qalsun.

²⁶Chünki ular tëximu ziyankeshlik qilmaqta sen jazalighanlargha,

azab qoshmaqta sen zeximlendürgenlerning azabigha.

²⁷I Perwerdigar, jaza qoshqin ularning jazasigha,

hem adaletning nësiwisini bermigin ulargha.

²⁸Öchürüwetkin hayatliqning deptiridin ularni,

hem heqqaniylar qatarigha pütmigin ularni.

²⁹Biraq özüm derd tarttim we ëzildim,

qutquz mëni, panahinggha al Igem.

³⁰Medhiyeleymen munajatta namingni,

ulughlaymen shükür ëytip sëni.

³¹Bundaq qilish sëni xursen qilar,

bu sanga öküz teqdim qilghandin ewzeldur,

münggüzlük we tuyaqliq buqilardinmu eladur.

³²Ëzilgenler buni körüp xush bolar,

Xudagha telpüngenler rohlinip ilhamlinar.

³³Chünki Xuda qulaq salar mohtajlarning derdlirige,

ëtibarsiz qarimas azab tartqan bendilirige.

³⁴Medhiyelisun asman-zëmin Xudani,

medhiyelisun dëngiz-okyan, janiwarlar hem uni.

³⁵Chünki Xuda qutquzar Si’onni,

qayta bina qilar Yehudiye sheherlirini.

U yer Xudaning xelqige mensup bolar,

ular shu zëminda hem makanlishar.

³⁶Xuda qullirining ewladlirigha bu zëminni ata qilar.

Xudani söygenler bu yerlerde makanlishar.

Dawut yazghan xatire munajiti bolup, naxsha qilip ëytilsun dep, neghmichiler bëshigha tapshurulghan.

¹I Perwerdigar,

tëzrek yardem qilip manga,

qutquz mëni i Xuda.

²Yüzi chüshüp shermende bolsun,

hayatimgha qest qilghanlar.

Reswa bolup arqida qalsun,

japayimdin shadlanghanlar.

³Mesxire qilip, külgenler manga,

shermende bolup qaytsun arqigha.

⁴Sendin xushal bolup, shadlansun,

hemme telpüngenler sanga.

Nijatliqingni söygenler,

dësun da’im “ulughdur Xuda”.

⁵Men bir bichare, hajetmen,

i Xuda, tëz kelgeysen yënimgha.

Sen mëning medetkarim, qutquzghuchim,

i Perwerdigar, ötüney, hayal bolma.

¹Perwerdigar, senla bashpanahdursen manga,

mëni yerge qaratmighin qilip reswa.

²Qutquzghin mëni öz heqqaniyliqingda,

qutuldur mëni qulaq sëlip ahlirimgha.

³Qoram tashtek panah bolghin da’im manga,

sen mëning tëghimdursen qorghan kebi,

irade qilding mëni özüng qutquzmaqqa.

⁴Igem mëni azad qilghin rezillerning qolidin,

adaletsiz, rehimi yoq ademlerning aliqinidin.

⁵Özüng ümidimsen, i Perwerdigar Xudayim,

yashliqimdin tartip sen boldung tayanchim.

⁶Hamile waqtimdin bashlap sanga tayandim,

anamning qorsiqidin sen özüng chiqarding,

shundin buyan medhiyemni sanga atap keldim.

⁷Köp ademler üchün nemune men,

chünki sen qudretlik panahimdursen.

⁸Aghzimdin esla chüshmes sanga hemdusanalar,

chüshmes shan-sheripingni alqishlighan sadalar.

⁹Tashlap ketmigin mëni qërip halim qalmighanda,

terk etmigin mëni quwwitimdin ayrilghanda.

¹⁰Chünki düshmenlirim mëni qestliship,

jënimni almaq bolghanlar birliship,

¹¹dëyisher: “Xuda uni terk etti,

uni qoghlap tutayli,

qutulduridighanlar yoqtur emdi.”

¹²Mendin yiraq ketmigin i Xuda,

yardemge tëzraq kelgin yënimgha.

¹³Mëni qarilighuchilar shermende bolup yoq bolsun,

manga qest oylighanlar reswa bolup jaq toysun.

¹⁴Biraq özüm ümidsiz bolmaymen zinhar,

sanga bolghan alqishlirim barghanche ashar.

¹⁵Aghzimdin chüshmes adaliting we nijating,

eqlim yetmeydighan ashu ajayip ishliring.

¹⁶Lebbey bolup aldingda,

medhiyeleymen büyük ishliringni Rebbim Xuda,

jakarlaymen heqqaniy dep peqet sënila.

¹⁷I Xudayim, bilmigenni sen bildürdüng yashliqimdin,

karametliringning jakarchisi bolup keldim shu chaghdin.

¹⁸Qërip aqarghanda qara chachlirim,

tashlap ketme mëni Ilahim.

Bayan qilay ewladlargha qudritingni,

sözlep bërey mendin këyin kelgenlerge,

sëning körsetken ulugh möjiziliringni.

¹⁹Ulugh karametlerni qilghan tengdashsiz Xuda,

taqishar adaliting asman-pelekke,

kimmu qilalar bundaq ishni oxshash sanga.

²⁰Manga azab-külpetlerni körsetkining,

del gör aghzidin mëni tartip ëlip,

janlandurup yëngi hayatqa bashlighining.

²¹Tëximu bek üstün qilisen hörmitimni,

yënimgha këlip manga bërisen teselli.

²²Ilahim küyleymen sëni chëlip lira,

sadaqitingge ëytimen hemdusana,

sanga mensup küylirim bar chiltarimda,

Isra’illarni tallighan muqeddes Xuda.

²³Sëni küylisem tentene qilar lewlirim,

shadlinar, sen hör qilghan qelbim.

²⁴Tilim hemishe bayan eyler sëning adalitingni,

chünki reswa qilip yiqitting shum niyette bolghanlarni.

Sulayman yazghan munajat

¹I Xuda, padishahqa^* ata qilghin adalitingni,

bergin shahning oghligha^* heqqaniyitingni.

²U xelqing üstidin hökümlerni adil chiqarghay,

ajiz, yoqsul bendilerge heqqaniy bolghay.

³Taghlar ëlip kelgey xelqlerge memurchiliq,

adalettin ëdirlarmu bergey bayashatliq.

⁴Aqlighuchi bolup padishah ëzilgen möminlerge,

qutuldurghay namratlarning balilirini

hem bitchit qilghay zalimlarni.

⁵I Xuda, bendiliring ewladtin-ewladqiche ixlas qilghay sanga,

taki kün we ay parlap turghuche asmanda.

⁶Yamghur kebi padishahning hökümrani,

yashartqay yëngidin orulghan otlaqlarni,

yëghin bolup sugharghay yer-zëminni.

⁷Ronaq tapqay heqqaniylar uning zamanida,

tinchliq bolghay zëminda

taki ay nur bërishtin toxtighiche asmangha.

⁸U hökümranliq qilghay dëngizdin okyanghiche,

Firat deryasidin zëminning chëtigiche.

⁹Chöl-bayawanda yashawatqanlar tiz püker uninggha,

reqibliri meghlup bolar milinip topa-changgha.

¹⁰Uninggha baj tapshurar Tarshish^* we arallarning padishahliri,

sowgha teqdim qilishar Shiba^* we Sibaning^* shahliri.

¹¹Barliq padishahlar uninggha bash ëger,

xizmitide bolar barche xelqler.

¹²U qutquzar nale qilghanlarni,

bashpanahsiz ajizlarni,

medetkari yoq yoqsullarni.

¹³Ich aghritar u ajiz, yoqsullargha,

panah bolar u ghërib panahsizlargha.

¹⁴U xalas qilar zulum we zorawanliqtin ularni,

uning neziride qimmettur ularning jëni.

¹⁵Yashisun padishah!

Uninggha Shibaning altunliri sowgha bolghay,

da’im du’alar qilinip, künboyi bext tilengey.

¹⁶Ëtizlarda zira’etler mol bolghay,

ëdirlarda hetta bashaq oxshighay.

Hosullar Liwan taghliridiki ormanlardek ziyade bolghay,

sheher ahaliliri yaylaqtiki chöptek ronaq tapqay.

¹⁷Nami uning menggü öchmigey,

her chagh quyash kebi parlighay,

bext tapqay barliq qowmlar uningdin,

hemme xelqler uni bextlik dep atighay.

¹⁸Teriplengey Isra’illarni tallighan Perwerdigar,

barche möjize we karametler igisi peqet udur.

¹⁹Menggüge teriplengey uning nam-sheripi,

pütkül yer yüzini qaplighay shan-sheripi.

Amin, amin!

²⁰(Shuning bilen Yishayning oghli Dawutning du’aliri tamam boldi.)

3-bölek

Asaf yazghan munajat

¹Berheq!

Mëhribandur Xuda Isra’illargha,

mëhribandur Xuda qelbi paklargha.

^2-3Rezil we hakawurlarning

ronaq tapqinini körginimde,

heset qildim ulargha.

Kalwaliship putlirim,

putliship yiqilay dëdim shunga.

⁴Taki ölgüche

yashaydu ghurbetsiz ular,

tëni salamet, bedini mezmut bolar.

⁵Ular bashqilardek derd tartmas,

hem balayi’apetke qalmas.

⁶Kibirlik boynidiki marjinidur,

zorawanliq orunuwalghan tonliridur.

⁷Közliri sëmizliktin tompiyip chiqqan,

qelbige exmiqane niyetliri tolup tashqan.

⁸Mesxire qilar,

zeherdek tilliri bilen sözleydu ular.

Meghrurlinip,

“Zulum salimiz silerge” dep tehdit salar.

⁹Ershke qarshidur ularning ëghizliri,

quruq sözler hemme yerde tilliri.

¹⁰Shunga xelq ulargha bek yüzliner,

sudek ichip sözlirini yamanliqqa kirisher.

¹¹Der reziller:

“Ulugh Xuda hemmini bilermu?

Bilse u qandaq biler?”

¹²Yamanlar mana shundaq rezil bolar,

ular da’im rahette, bayliq toplar.

¹³Qelbimni pak tutqinim bihudimu?

Gunahsiz yashash hayatta bikarmidu?

¹⁴Nëme üchün künboyi azabtimen,

nëme üchün her seherde jazadimen.

¹⁵Eger men shundaq oyda bolsam idim,

xelqingge^* asiyliq qilghan bolar idim.

¹⁶Men bularni chüshinishke tirishqanda

bular shunche ëghir bilindi manga.

¹⁷Xudaning ibadetxanisigha kirshimge

chüshendim,

nëmilerning barliqini ularning teqdiride.

¹⁸I Xuda, derweqe,

tëyilghaq yerlerge qoyisen ularni,

tëyilip pare-pare bolar ular axiri.

¹⁹Wehime ichide yoqilar ular,

hem bir deqiqidila parche-parche bolar.

²⁰Ularning hayati chüshke oxshar,

oyghansila hemmisi yoqilar.

Ularni közge ilmaysen esla,

i Rebbim ornungdin qozghalghanda.

²¹Ichim ëchishar,

yürikim sanjilip aghrar.

²²Chünki men hamaqet, nadan ikenmen,

aldingda goya angsiz haywan ikenmen.

²³Emma men hemishe sëghinimen sëni,

i Xuda ong qolumdin tuttung mëni.

²⁴Bilimen, nesiheting mëni yëtekler,

axiri shan-sherepmu qolumgha këler.

²⁵Sendin bashqa medetkarim yoqtur ershte,

sendin bashqini istimesmen hem yer yüzide.

²⁶Tënim, qelbim ze’ipleshse egerde,

quwwitidur Xuda qelb, tënimning,

menggülükke nësiwemdur u mëning.

²⁷Shübhisizki,

halak bolar sendin yiraq turghanlar,

yoq qilisen ularni,

yoqilidu sanga wapasiz bolghanlar.

²⁸Shunga deymen ewzeldur yëqin turush Xudagha,

panah qildim her zaman Perwerdigarni özümge,

bayan qilip Xudaning qudritini hemmige.

Asaf yazghan terbiyewi munajat^*

¹Terk etting bizni nëchün i Xuda,

bizni shundaq menggü untup qalamsen?

Sëning ilkingdiki bizdek qoyliringgha

nëchün ghezep otliringni chachisen?

²Bedel tölep azad qilghan qowmingni eske alghin,

mülküm bolsun dep qutquzghan qebilengni eske alghin,

özüng makan qilghan Si’on tëghini eske alghin.

³Këlip körgin xarab bolghan muqeddes jayingni,

düshmenler urup-chëqip weyran qilghan uningdiki nersilerni.

⁴Reqibliring dawrang sëlishti muqeddes jayingda,

ghelibisige tentene qilishti tughlirini qadap unda.

⁵Özlirini köz-köz qilishti bu hujumchilardek,

paltilirini oynitishti xuddi orman kesküchidek.

⁶Andin ular muqeddes jayinggha kirdi,

palta we bolqa bilen neqishlerni chëqishti.

⁷I Xuda, ular muqeddes jayinggha ot qoyushti,

sanga ibadet qilidighan jayni depsende qilishti.

⁸Köngülliride oylap ular “boysundurayli biz ularning hemmisini”,

köydürüwetti Xudaning zëmindiki muqeddes jaylirini.

⁹Karametliring ghayib boldi arimizdin,

peyghembermu ketti yiraq yënimizdin.

Qachanghiche dawam qilar bu ishlar-he,

hëchkim bilmes buni eger sorap baqsang hemmisidin.

¹⁰Reqibliring mesxire qilar sëni Xuda qachanghiche?

Haqaretke qalarmu naming sëning ebedkiche?

¹¹Nëmishqa tartiwalding qolungni, ëh Xuda ong qolungni?

Qolungni qoyningdin ëlip Xuda yoqatqaysen ularni!

¹²Ezeldin bizge shah bolup kelgeniding Xuda,

qazanghanting ghelibilerni biz üchün zëminimizda.

¹³Küchüng bilen ikkige bölgeniding dëngiz süyini,

yarghaniding uningdiki ejdihalarning bashlirini.

¹⁴Chaqqaniding dëngizdiki liwyatanning^* bashlirini,

bergeniding chöldiki haywanlargha ozuq qilip göshlirini.

¹⁵Bulaq közini ëchip yerdin hasil qilghanting ëriqlarni,

qurutqanting toxtimay ëqiwatqan deryalarni.

¹⁶Yaratting sen kün we tün her ikkilisini,

orunlashturdung öz ornigha ay we künni.

¹⁷Ayriding barliq chëgra-pasillarni,

peyda qilding özüng yaz bilen qishni.

¹⁸Ësingde tutqaysen i Perwerdigar,

düshmenliringning mesxire qilghanlirini.

Untumighaysen i Perwerdigar,

hamaqet xelqning közge ilmighanlirini.

¹⁹Tutup bermigin wehshiy düshmenge panahsiz bendiliringni,

menggü untumighin ëzilgen möminliringning hayatini.

²⁰Biz bilen tüzgen ehdengni ësingge alghin Xuda,

zorluq we zombuluqlar yamrap ketti,

zëmindiki qarangghuluq qaplighan bulunglarda.

²¹Ëzilgenler yerge qarap qalmisun,

ular sëning naminggha medhiyeler oqusun.

²²Arimizgha yënip këlip i Xuda,

namingni qoghdighina qaytidin.

Hamaqet kishilerning her da’im

mesxire qilghanlirini chiqarmighin yadingdin.

²³Düshminingning chuqanliri bolsun da’im ësingde,

toxtimidi ularning dawrangliri tëxiche.

Asaf yazghan munajat bolup, “halak qilmighaysen” dëgen ahangda ëytilsun dep, neghmichiler bëshigha tapshurulghan.

¹Sanga shükür ëytimiz i Xuda, shükür ëytimiz,

chünki sen yëqinsen bizge,

bayan qilimiz karametliringni hemishe.

²Xuda ëytar: “Men bëkitken waqitta,

soriqimni adalette soraymen.

³Tursimu ger yer-zëminlar tewrinip,

özümdurmen qoyghuchisi anga tüwrük ornitip.” Sëlah

⁴Men deymen maxtanchaqqa: “Maxtanma”,

pasiqlargha: “Meghrurlinip ghadayma,

⁵öz küchüngdin körenglep,

tumshuqungni üshlap, po atma.”

⁶Chünki yüksilish këler peqetla Xudadin,

kelmeydu, sherq, gherb yaki jenub, shimaldin.^*

⁷Berheq, Perwerdigar birdinbir sotchidur,

u birini eziz qilisa, birini xar qilar.

⁸Chünki Perwerdigarning qolida bir qedeh bolar,

uninggha achchiq, köpüklük sharab tolghan bolar.

Qachanki Xuda uni tökse zëmingha,

pasiqlar dughlirini qoshup ichiwalar.

⁹Yaquplarni tallighan Xuda heqqide

men menggü guwahliq bërimen,

hem uning namigha munajatlar ëytimen.

¹⁰Xoriki chong maxtanchaqlarning xorikini kësiwëtimen.^*

biraq adil-heqqaniylarni shan-sherepke ërishtürimen.

Bu Asaf yazghan mungluq munajat bolup, tarliq sazlar tengkishide ëytilsun dep, neghmichiler bëshigha tapshurulghan.

¹Xuda meshhurdur Yehudiye xelqige,

nami büyüktur Isra’iliye ëlide.

²Turar jayi Si’ondidur,

muqeddes chëdiri Salëmdidur.^*

³U shu yerde sundurdi düshmenning otluq oqlirini,

chëqip tashlidi qalqan, qilich we barliq jeng qorallirini. Sëlah

⁴I Xuda, sheriping parlaq nurlar chachar,

owgha bay taghlardinmu zor heywiting bar.

⁵Düshminingning baturliri bulang-talang qilinghanda,

qol körtürelmidi hetta birmu palwini,

tamam menggülük uyqugha ketkenidi hemmisi.

⁶Gürkireshliringdin Yaqup ëtiqad qilip kelgen i Xuda,

at hem jeng harwiliri turup qaldi urush meydanida.

⁷Qorqushqa tëgishliktur peqet sendinla, i Xuda,

kimmu özini tik tutalar ghezipingning aldida?

^8-9Höküm ëlan qilish üchün sen ornungdin turghiningda,

yer-zëminni basti qorqunch sükinati, i Xuda.

Jakarliding ersh’elada turup büyük hökümüngni,

qutquzmaq bolup jahandiki barliq ëzilgenlerni. Sëlah

¹⁰Xuda sëning gheziping ashurar shöhritingni,

kemer qilip baghliding bëlingge qehringni.

¹¹Ada qilinglar qesem qilghanni Perwerdigaringlargha,

sowgha keltürsun qoshna eller qorqushqa layiq Xudagha.

¹²Emeldarlar kibrini Xuda sundurar,

qorqar uningdin barliq padishahlar.

Asaf yazghan munajat bolup, “yidutun” ahangida ëytilsun dep, neghmichiler bëshigha tapshurulghan.

¹Kötürimen Xudagha peryadimni,

muqerrer anglar u mëning zarimni.

²Musheqqette Rebbim sanga telpündim,

këchiliri du’a qilip ötündim,

tesellige ërishmidi bu könglüm.

³Ahuzar chektim i Xuda, sëni sëghinip,

yoqitar boldum özümni, sëni yad ëytip. Sëlah

⁴Sen jawab bermigech uyqusizdur közlirim,

köngül bi’aramliqta gepke kelmes tillirim.

⁵Yad ëtimen ötüp ketken künlerni,

yiraq ötmüshtiki güzel chaghlarni.

⁶U këchiler, ëytqan munajatlirim bilen tolghanidi,

ularni oylap, könglümde shundaq so’allar peyda boldi:

⁷Rebbim mëni menggüge terk ëtermu?

Emdi manga rehim-shepqet qilmasmu?

⁸Öchmes muhebbiti emdi bizge öchtimu?

Wediliri menggüge inawetsiz boldimu?

⁹Xuda shepqet qilishni yaki untup qaldimu?

Rehimdillik ornini yaki ghezep aldimu? Sëlah

¹⁰Andin men dëdim: “Mëni eng azablaydighini shuki,

ulugh Xuda emdi bëshimizni silimaydighan boldi.”

¹¹Yad ëtimen Igem yardemliringni,

qedimdin buyanqi karametliringni.

¹²Zahir bolar ejirliring xiyalimda,

bizler üchün qilghan ishliring dilimda.

¹³I Xuda, sëning yolung muqeddestur,

ulughluqing alemde yëganidur.

¹⁴Möjiziler igisi bolghan Xudadursen,

qudritingni insaniyetke körsetkensen.

¹⁵Qudritingde qutquzdung öz xelqingni,

Yaqup bilen Yüsüpning ewladini. Sëlah

¹⁶I Xuda, sular^* sëni körginide

titrep sendin qorqqanidi.

Dëngiz tëgi lerzige kelgenidi.

¹⁷Qara bulut köksidin sular töküp,

asmanmu hem güldürmama güldürlitip,

nur oqliring chaqmaq chëqip ëtilghanti.

¹⁸Quyunda güldürmamang güldürligenidi,

chaqmiqingdin jahan nurgha chömülgenidi,

alaqzade bolup yermu tewrigenidi.

¹⁹Sen dëngizdin yol achqaniding,

ulugh sulardin ötüshke imkan qilding,

lëkin esla körünmes idi izing.

²⁰Yëtekliding qowmingni qoy padisidek,

Musa we Harunni qilip sen qoychidek.

Asaf yazghan terbiyewi munajat

¹Ey xelqim, qulaq salghin telimimge,

zëhningni ber mëning herbir sözlirimge.

²Hëkmet bilen achay men aghzimni,

bayan eylep silerge ötmüshtiki sawaqlarni.

³Bizge ëytip qaldurghan bularni ejdadimiz,

anglighan we bilgentuq bularni ulardin biz.

⁴Neslimizdin yoshurmaymiz shunga ularni,

biz sözlep bërimiz ewladlargha,

Xudaning shereplik ishi we qudritini,

hem uning körsetken möjizilirini.

⁵Perzlirini chüshürdi u Yaqup neslige,

qanunlirini turghuzdi u hem Isra’illargha.

“Balanglargha ögitinglar bularni” dep,

emr qilghanidi u ejdadimizgha.

⁶Ewladlirimiz bularni choqum bilgey,

hetta tughulmaqchi bolghan balilarmu,

ewladmu-ewlad balilirigha ögetkey.

⁷Yar-yölek qilghay ular Xudani,

ri’aye qilip uning emrlirige,

ejrini püküp köngüllirige.

⁸Dorimisun ular ejdadlirini –

ularning ita’etsiz, jahilliqini.

Semimiyetsizlik bolmisun dillirida,

sadaqetsizlik bolmisun ularda.

⁹Oqyaliq bolsimu Efrayim nesli,

jengde arqigha burulup qachti.

¹⁰Ular Xudaning ehdisige boysunmidi,

hem uning qanuni boyiche mangmidi.

¹¹Untughandur ular Xudaning ishlirini,

yene uning körsetken möjizilirini.

¹²Misirdiki Zo’an dalalirida,

körsitilgenidi möjize ejdadlirimizgha.

¹³Dëngizni yërip ularni ötküzgenidi,

suni qiya kebi tik turghuzghanidi.

¹⁴Kündüzi yëteklise ularni bulut bilen,

këchisi yol bashlighanidi Otning nuri bilen.

¹⁵U chölde tashni yërip su chiqarghanidi,

süyini dëngiz kebi mol qilghanidi.

¹⁶Tashlardin ëtilip chiqip sular,

aqqanidi derya kebi ular.

¹⁷Emma chölde isyan kötürdi ulugh Xudagha,

shuning bilen patti ular yene ëghir gunahqa.

¹⁸Ular qesten sinap Xudani,

nepsi üchün telep qildi ta’amni.

¹⁹Dëgenidi ular haqaret qilip Xudagha:

“Salalamdu dastixan mushu chöl-dalagha?”

²⁰Derweqe, u uruwidi tashni,

sular bulaqtek ëtilip chiqti.

“Emdi u bizge nan bilen

göshni bërelemdu?” dëyishti.

²¹Anglap buni Perwerdigar ghezeplendi,

Yaqup neslige ghezep oti chüshti,

qehri uning Isra’il neslige tegdi.

²²Ishenmidi ular Xudagha,

tayanmidi uning nijatliqigha.

²³Biraq Xuda emr qilip yene asmangha,

buyrudi ershning derwazisini ëchishqa.

²⁴Yëmekliki üchün köktin yaghdurdi manna,

dëmek, ersh yëmeklikini berdi ulargha.

²⁵Insanlar perishtilerning nënini yëdi,

Xuda ata qilghach buni, ular toydi.

²⁶Xuda kökte uchurdi sherq shamilini,

yëteklep keldi jenub shamilini.

²⁷Chang-tozandek yaghdurdi göshlerni ulargha –

qushlarni qondurdi sahildiki qumlar kebi etrapigha.

²⁸U yaghdurdi bularni bargahlirining otturisigha,

chüshürdi chëdirlirining etrapigha.

²⁹Ular yëdi xalighanche, toydi qorsaqliri,

boldi ijabet ularning Xudadin tiligenliri.

³⁰Lëkin nepsi ularning tëxi toymay turupla,

chaynawatqan göshliri ëghizlirida turghandila,

³¹ghezipi këlip Xudaning ulargha,

qiriwetti ularning eng jesur palwanlirini,

Isra’illarning yaramliq yash yigitlirini.

³²Kördi shunche köp körgülükni, lëkin towa qilmidi,

kördi shunche köp möjizilerni, lëkin anga ishenmidi.

³³Shunga Xuda hayatini ularning

axirlashturdi menisizlik ichide,

ötti yilliri dekke-dükkide.

³⁴Ölüm kelgende ular eske aldi Xudani,

towa qilip ixlas bilen izdeshke bashlidi uni.

³⁵Oylidi ular “qoram tashtek bashpanahimiz –

ulugh Xuda – qutquzghuchi, nijatkarimiz.”

³⁶Lëkin ularning maxtashliri ëghizda idi,

tillirida dëgenliri yalghan idi.

³⁷Xudagha sadiqliq yoq idi köngülliride,

shunga emel qilmaytti tüzgen ehdisige.

³⁸Biraq Xuda yenila rehimdil bolghach,

gunahlirini kechürüp, yoqatmidi ularni,

qayta-qayta bësiwaldi ghezipini,

hem tökmidi qehrining hemmisini.

³⁹Eslidi u ularning insanliqini,

nepes kebi ketse qaytip kelmeydighanliqini.

⁴⁰Biraq ular isyan qilghach chölde talay qëtim,

azar yep dili Xudaning, boldi köngli yërim.

⁴¹Ular qaytidin yoldin chiqip sinap Xudani,

zëde qildi Isra’illar ëtiqad qilip kelgen

muqeddes Xudaning yürikini.

⁴²Untudi ular Xudaning küch-qudritini,

estin chiqirip yawdin qutuldurghan künini.

⁴³Untudi ular Xudaning Misirdiki möjizilirini,

Zo’an tüzlenglikide körsetken karametlirini.

⁴⁴Qangha aylandurup qoyghach Xuda deryasini ularning,

ichmek mumkin bolmidi sulirini deryaning.

⁴⁵Neshterlik chiwin apiti peyda qildi ulargha,

paqilarni ewetti zëminini xarab qilargha.

⁴⁶Ëtizliri uchridi chëketkiler hujumigha,

hosullirining hemmisi yem boldi ulargha.

⁴⁷Weyran boldi möldürde üzümzarliri,

üshshüp qaldi soghuqta enjürliri.

⁴⁸Möldür tëgip weyran boldi qoy-kaliliri,

köyüp ketti chaqmaq soqup charwa-malliri.

⁴⁹Qehr-ghezep, külpet, nepret yaghdi Xudadin,

keldi bu bir türküm buzghunchi perishtiler ershtin.

⁵⁰Ghezipi chekke yëtip Xudaning,

jënini ayimaq bolup ularning,

waba kësel ewetti ulargha.

⁵¹Perwerdigar öltürüwetti Misirda barliq tunji balilarni,

yeni Ham^* chëdirining ghururi bolghan tunji oghullarni.

⁵²U xelqini pada kebi bashlap mangdi chopan bolup,

chöl-bayawan, jeziride padisigha qoychi bolup.

⁵³Aman-ësen qilghach Xuda ularni,

qorqunchtin xaliy mangdi yolini,

gherq qildi dëngizgha düshmenlirini.

⁵⁴Xuda yëteklidi ularni muqeddes zëminigha,

ëlip keldi ong qolida ërishken tëghigha.

⁵⁵Xuda qoghliwëtip u yerdin yat ellerni,

Isra’illargha bölüp berdi yerlirini.

Isra’il qebilisige ëlip berdi öylirini.

⁵⁶Emma ular ita’etsizlik qilip,

sinap kördi ulugh Xudani,

terk etti uning perzlirini.

⁵⁷Ejdadliridek yoldin tëyip wapasizliq qildi ular,

ishenchsizlikte xuddi ëgilip ketken yagha oxshar.

⁵⁸Ëgizlikte qurup ibadetgahlar,

yasap uninggha herxil butlar,

keltürdi ular Xudaning achchiqini,

örtidi Xudaning yürikini.

⁵⁹Buni körüp ghezeplendi Perwerdigar,

ret qilindi shu haman Isra’illar.

⁶⁰Terk etti u yene Shilodiki^* makanini,

insanlar arisigha tikken chëdirini.

⁶¹Qudritini^* tapshurdi u esirlikke,

shöhritini^* berdi hem düshmenlerge.

⁶²Tashlap berdi öz qowmini qilich astigha,

chachti hem ghezipini ular bëshigha.

⁶³Otta köydi ularning qiran yigitliri,

naxsha-küysiz qaldi berna qizliri.

⁶⁴Yiqilsimu rohaniyliri tigh aldida,

tul qalghan ayalliri tutalmidi haza.

⁶⁵Bu chagh Igem uyqudin oyghanghan adem kebi,

sharabning küchi bilen rohlanghan batur kebi.

⁶⁶Meghlup qilip chëkindürdi reqiblirini,

menggüge reswa qilip ularni.

⁶⁷Xuda ret qilip Yüsüp chëdirini,

tallimastin Efrayim qowmini,

⁶⁸belki tallidi Yehuda qowmini,

yeni özi söygen Si’on tëghini.

⁶⁹Quruldi muqeddes ibadetgah asman-pelek,

mezmut we ebediydur asman-zëmin yaralghandek.

⁷⁰Perwerdigar tallap Dawutni,

chaqiriwaldi qoy qotinidin uni.

⁷¹Yeni bëqishtin saghliq qoylarni,

chaqirdi bëqishqa Yaqup qowmini –

özige mensup bolghan Isra’illarni.

⁷²Baqti Dawut ularni köngül qoyup,

yëteklidi shundaqla mahir bolup.

Asaf yazghan munajat^*

¹I Xuda, yat eller bësip kirdi zëmininggha,

ular bulghap muqeddes ibadetxanangni,

xarabige aylandurdi Yërusalëmni.

²Asmandiki qushlargha yem qildi ular,

qulliringning jesetlirini.

Tashlap berdi daladiki haywanlargha,

mömin bendiliringning etlirini.

³Yërusalëmda derya qilip ëqitti ular,

xelqingning qanlirini.

Birer tirik jannimu qaldurmidi hetta,

kömgili jesetlirini.

⁴Haqaritige qalduq qoshna ellerning,

mesxire nishani bolduq ularning.

⁵I Perwerdigar, gheziping qachanghiche, menggügimu?!

Ot bolup yanghan gheziping bësilarmu?

⁶Qehringni chach sëni tonumighan ellerge,

we sanga ëtiqad qilmighan seltenetlerge.

⁷Chünki ular weyran qildi Yaqupning neslini,

xaniweyran qilip uning makanini.

⁸Bizdin alma soriqini gunah qilsa ejdadimiz,

bizge tëzraq rehim qilghin,

bekmu nachar chünki bizning ehwalimiz.

⁹I nijatkarimiz Perwerdigar,

shöhriti üchün namingning,

bolghin bizge medetkar.

Kechürgeysen gunahimizni,

naming üchün qutquzghin bizni.

¹⁰“qëni ularning Xudasi” dep,

yat eller mazaq qilsa bolamdu?

Qirghin qilghan tursa ular qulliringni,

körset bizge ularni jazalighanliqingni.

¹¹Esirlerning ah-zarlirini anglighaysen,

ölümge buyrulghanlarni qudritingde saqlighaysen.

¹²I Igem,

sanga qilghan haqaritini qoshna ellerning,

yette hesse ashurup özige ber ularning.

¹³Biz sëning öz qowming, qoy padangdurmiz,

sanga menggü hemdusana-shükür ëytimiz,

medhiyemizni ewladtin-ewladqiche dawam ëtimiz.

Bu Asaf yazghan munajat bolup, “guwahliq nëluperi” dëgen ahangda ëytilsun dep, neghmichiler bëshigha tapshurulghan.

¹I Isra’illargha qoychi bolup yol bashlighuchi,

Yüsüp neslini qoy padisidek yëtekligüchi,

kërublar^* otturisida textte olturghuchi,

ötüney, bizge qulaq salghin,

shan-shereplik nurungni chachqin.

²Efrayim, Binyamin we Manasse qebililirimizde,

körsitip qudritingni, qutquzghin bizni.

³Qayta güllet bizni i Xuda,

körsetkin bizge didaringni,

shunda taparmiz nijatliqni.

⁴I Perwerdigar – Qudretlik Serdar Xuda,

ghezipingdin qobul körmey du’ayimizni,

qachanghiche ret qilarsen bizlerni?

⁵Qayghu berding nan ornigha yëyishke,

chëlek-chëlek yashni berding ichishke.

⁶Qilding qoshna ellerge bizni talishish nishani,

düshmenlirimiz öz’ara mesxire qilishar bizni.

⁷I Qudretlik Serdar Xuda,

qayta güllet bizni,

körsetkin bizge didaringni,

shunda taparmiz nijatliqni.

⁸Misirdin ëlip kelding bir tüp üzüm köchiti,^*

yat ellerni qoghlap özüng tikting uni.

⁹Zëmin teyyar qilip berding u köchetke,

yiltiz tartip keng yëyildi zëmingha.

¹⁰Taghlar qaldi uning sayisi tëgide,

këdir derexliri qaldi shaxliri astida.

¹¹U uzartti shaxlirini ta dëngizghiche,

notilirini Firat deryasighiche.

¹²Nëchün buzup uning qashasini,

yoldin ötkenlerge bërisen mëwisini?

¹³Ormandiki yawa tongguz uni xarab qilmaqta,

daladiki haywanatlar uningdin ozuqlanmaqta.

¹⁴I Qudretlik Serdar Xuda,

qayta kelgin yënimizgha.

Samadin nezer sëlip üzümzarliqqa,

ghemxorluq qilghin üzüm tallirigha.

¹⁵Ong qolungda östürgen yiltizghu bu,

u özüng üchün chong qilghan oghlung idighu.

¹⁶Mana u kësiwëtildi, köydürüldi otta,

halak bolmaqta ghezeplik bëqishingda.

¹⁷Qanat astinggha alghaysen özüng tallighanni,

aman qilghaysen özüng üchün östürgenni.

¹⁸Bizler hergiz sendin ayrilmaymiz shunda,

gülletkin bizni, ibadet qilimiz sanga.

¹⁹I Perwerdigar – Qudretlik Serdar Xuda,

qayta güllet bizni,

körsetkin bizge didaringni,

shunda taparmiz nijatliqni.

Bu Asaf yazghan munajat bolup, neghmichiler bëshigha “gittif”ta^* chëlinsun dep tapshurulghan.

¹Küch-quwwitimiz bolghan Xudagha,

shadliqta medhiyeler oqunglar.

Yaqup ëtiqad qilip kelgen Xudani

xush bolup küy-naxshigha qëtinglar.

²Chiltar, dap, mungluq lirani ëlip qolunglargha,

medhiye naxshanglarni tengkesh qilip ëytinglar.

³Yëngi ay tughqanda we ay tolghanda,

bayram qilip burghilarni chëlinglar.

⁴Bu Isra’illargha chüshken bir permandur,

Yaqup ëtiqad qilghan Xudaning hökümidur.

^5-6Yüsüp neslini Misirdin chiqqan waqtida,

buni Isra’illargha qanun qilip bëkitkendur.

men natonush bir awazni anglidim:

“Uning mürisini yüktin bikar qildim,

qollirini sëwettin azad qildim.

⁷Qistangchiliqta nida qilsang,

men sëni qutuldurdum.

Qara bulutlar arisidin sanga jawab berdim,

Miribada^* aqqan su boyida sëni sinidim. Sëlah

⁸Tingsha xelqim, qulaq sal ey Isra’illar!

Men silerni agahlanduray:

⁹Zëmininglarda yat ilahlargha orun bermenglar,

hem ulargha bash qoyup, sejde qilmanglar.

¹⁰Silerni Misirdin ëlip chiqqan

Perwerdigaringlar mendurmen.

Ëghizinglarni achsanglar,

beriketke toldurimen.

¹¹Biraq xelqim sözümni anglimidi,

Isra’il xelqi manga boysunmidi.

¹²Shunga men qoyuwettim ularni öz tersaliqigha,

mëngiwerdi dessep ular özi xalighan yollargha.

¹³Xelqim sözümge qulaq salsa idi,

Isra’illar men bashlighan yolda mangsa idi.

¹⁴Düshmenlirini ularning tëzla bash egdürer idim,

reqiblirige qudritimni bildürüp quyar idim.

¹⁵Shunda, manga öchmenler qorqup boysunar idi,

ular hemishe shermendilikte qalar idi.

¹⁶Silerni bughdayning eng ësilida baqar idim,

tashtin hesel chiqirip teshnaliqinglarni qandurar idim.”

Asaf yazghan munajat

¹Xuda bash bolup olturup ershtiki mejliste,

deydu mundaq hökümdarlargha:

²“Naheq höküm chiqirisiler qachanghiche?

Rezillerge yan basisiler ne chaghqiche? Sëlah

³Yëtim-yësir, namratlargha körsitinglar adaletni,

aqlanglar ëzilgenler we ajizlarni.

⁴Miskin we yoqsullarni qutquzunglar,

rezillerdin ularni azad qilinglar.

⁵Nadan we bilimsizdur ularning hemmisi,

mangar ular zulmet ara, tewrer yerning ulliri.

⁶Dëgenidim silerge: siler ‘ilahlar’,

hemminglar ulugh Xudaning ‘perzentisiler’!

⁷Lëkin silermu bashqa bendilerdek ölisiler,

xuddi barliq hökümranlardek tügeysiler.”

⁸Soraq qilghin yer yüzige këlip i Xuda,

chünki pütkül xelqler tewedur sanga.

Asaf yazghan munajat

¹Ün chiqarmay jimip qalma i Xuda,

süküt qilip yoqap ketme i Xuda.

²Chünki sanga öch bolghanlar

bash kötürüp chiqmaqta.

Sanga düshmen bolghanlar

shunche dawrang salmaqta.

³Ular quwluq ishlitip,

suyiqest qilar xelqingge.

Qarshi pilan tüzüsher,

sen qedirligenlerge.

⁴Deydu ular:

“Yürünglar, barche qowm qataridin yoq qilayli Isra’illarni,

ëlinmisun ikkinchi ëghizimizgha ularning nami.”

⁵Ular birge meslihetler qilishmaqta,

sanga qarshi ittipaqmu tüzüshmekte.

⁶Mana, Idomluqlar, Isma’ilning nesilliri,

Mo’abliqlar we Hagrilar,

⁷Gibal, Ammon we Amalek,

Filistiye hemde Tir ahaliliri,

⁸Assuriyemu ulargha qoshuldi,

ular Lut oghullirigha

yar-yölek bolup kelgenidi. Sëlah

⁹I Xuda, sen Midyanliqlargha

Qishon deryasida Sisira we Yabingha

qandaq taqabil turghan bolsang,

shundaq taqabil turghin ulargha.

¹⁰Ular Ëndor yëzisida qirilghanidi,

tenliri tëzek kebi oghutqa aylanghanidi.

¹¹Halak qilghaysen ularning

beglirini Orëb we Zi’ëbtek,^*

emirlirini Zebax hem Zalmunnadek.^*

¹²Chünki ular mundaq dëgenidi:

“Özimizning mülki qiliwalayli

Xudaning chimen-yaylaqlirini.”^*

¹³I Ilahim, sersan qiliwet ularni

boranda qalghan qamghaqtek.

Soruwetkin ularni

shamalda qalghan samandek.

¹⁴Köydürüwetkin ularni –

otqa oxshash ormanliqqa tutashqan,

yalqun kebi tagh baghrigha yamashqan.

¹⁵Qoghliwetkin ularni borining bilen,

wehime sal ulargha quyunung bilen.

¹⁶Chüshürgin nomusta yüzini, i Perwerdigar,

taki yardem sorighiche sëningdin ular.

¹⁷Qara yüz bolghay ular nomustin,

reswa bolup yoqalghay zëmindin.

¹⁸Ular bilsunki, peqet Perwerdigar^*

pütkül jahanda eng büyük turar.

Korahning ewladliri yazghan munajat bolup, “gittif”ta^* orunlansun dep, neghmichiler bëshigha tapshurulghan.

¹Neqeder ezizdur uchrishish jaying,

i Perwerdigar – Qudretlik Serdar.

²Sëghinip shunchilik boldum men teshna,

i Igem ibadetxanining hoylilirigha.

Bolmaqta qelbim we jismim shunche intizar,

hayatliq buliqi bolghan birdinbir Xudagha.^*

³Manga shah bolghan i Qudretlik Serdar Xuda,

qurbanliq supangning etraplirigha,

hetta qushqachlar saldi uwa,

qarlighachmu jay tapti balilirini bëqishqa.

⁴Neqeder bextlik ibadetxanangda bolghanlar,

toxtimastin sanga hemdusana oquwatqanlar. Sëlah

⁵Neqeder bextlik sendin küch-qudret tapqanlar,

qelbidin Si’onni tawap qilishqa intizar bolghanlar.

⁶Yigha-zar qaplighan qurghaq jilghidin ötkende ular,

u yerni bulaqliq makangha aylandurar,

u yer küz yamghurliri bilen beriketliner.

⁷Mangghansëri ular quwwet üstige quwwet tapar,

Si’ongha yëtip bërip, Xudaning huzurida hazir bolar.

⁸I Perwerdigar – Qudretlik Serdar Xuda,

qulaq salghin du’alirimgha.

Tingshighin iltijayimni,

i Yaqupni tallighan Xuda. Sëlah

⁹Ilahim, köngül bölgin qalqinimiz padishahqa,

neziringni ber özüng tallighininggha.

¹⁰Berheq, ibadetxanangda^* ötken bir kün,

ewzeldur bashqa yerde ötken ming kündin.

Ela bilimen Xuda öyining bosughisida turushni,

rezillerning rahet-paraghetlik öyide yashashtin.

¹¹Bizge quyash, qalqandur Perwerdigar Igimiz,

ata qilar u shan-shöhret we shapa’et.

Durus yolda mangghanlardin,

ayimas yaxshiliqini ta’ebed.

¹²I Perwerdigar – Qudretlik Serdar,

bextliktur sanga tayanghanlar.

Korahning ewladliri yazghan munajat bolup, naxsha qilip ëytilsun dep, neghmichiler bëshigha tapshurulghan.

¹Neziring tegken zëmingha iltipat eylep i Igem,

qayta güllep-yashnatqaniding yurtini Yaqupning.

²Epu qilip qilmishini xelqingning,

kechürgeniding gunahlirini ularning. Sëlah

³Achchiqingni yutuwëtip ichingge,

ottek yanghan qehringni basqaniding.

⁴Bizge nijatliq bërip kelgen i Xuda,

bizge bolghan achchiqinggha hay bërip,

alghin bizni qaytidin öz mëhringning qoynigha.

⁵Bizge Xuda ebediy ghezeplinip turamsen?

Ghezipingni ewladtin-ewladqiche sozamsen?

⁶Shadlinishi üchün sendin xelqingning

bizni qayta güllendürüp qoymamsen?

⁷Bizge bergin menggülük muhebbitingni,

ata qilghin bizge hem nijatliqingni.

⁸Qulaq salay Xudaning sözlirige,

xatirjemlik, amanliq bëridu Igem

öz xelqi we teqwadarlirigha,

mangmisun dep xata yolda ular yene.

⁹Shundaq, ixlasmenlerni qutquzar Xuda,

zahir bolup shan-sheripi zëminimizda.

¹⁰Xudaning menggülük muhebbiti we sadaqiti

ëlip këler heqqaniyliq we amanliqni.

¹¹Wapadarliq zëminda mewjut bolar,

heqqaniyliq ershlerdin baqar.

¹²Perwerdigar beriket ata qilar,

yerlirimiz choqum hosulluq bolar.

¹³Heqqaniyliq, elchisi bolup Xudaning,

këler aldida yol hazirlap Perwerdigarning.

Dawutning du’asi

¹Bichare we mohtajdurmen, i Rebbim Xuda,

nidayimgha qulaq sëlip jawab bergin manga.

²Sanga sadiq bendengning saqlap qalghin jënini.

Qutquzuwalghin, peqetla sanga tayanghan qulungni.

Chünki senla birdinbir mëning Xudayimsen.

³I Rebbim, iltipat eyligin manga,

qilmaqtimen künboyi iltija sanga.

⁴Men pëqir qulungning könglini bir shad qilghina,

chünki men sëghinip du’a qilimen sanga.

⁵I Rebbim, berheq sen mëhriban we epuchan,

mëhring cheksiz, iltija qilghanlargha her qachan.

⁶I Perwerdigar, köngül bölgin mëning du’ayimgha,

qulaq salghin shepqet sorighan iltijayimgha.

⁷Sëghinimen Rebbim sëni kün chüshkende bëshimgha,

chünki sen jawab bërip kelding manga da’ima.

⁸Yëganisen i Rebbim gheyriy ilahlar^* aldida,

ulugh ishni qilghuchi peqet bir özüngla.

⁹Sen yaratqan barliq qowmlar

këlip aldinggha sejde qilar

hem namingni ulughlar ular.

¹⁰Ajayip ulugh möjiziler igisisen,

berheq, yalghuz senla Xudadursen.

¹¹Perwerdigar, ögetkin manga yolungni,

egiship sanga heq yolda yashay.

Qaratqin özünggila bu qelbimni,

chin dilimdin sanga ixlas qilay.

¹²Pütün qelbim bilen shükürler ëytimen sanga,

ulughlaymen namingni menggüge Rebbim Xuda.

¹³Chünki qutquzdung jënimni jehennem dergahidin,

özgermes muhebbiting shunche cheksiz bolghach manga.

¹⁴I Xuda, manga qarshi turidu menmenchiler,

jënimni almaq üchün izder mëni wehshiyler.

Közge ilip qoymas sëni qilche ular.

¹⁵Lëkin Rebbim rehimdil, shepqetliksen,

asanliqche ghezeplenmeysen,

mëhir-muhebbet, sadaqette cheksizsen.

¹⁶Halimgha baq, manga shepqet eyligin,

mendek qulunggha küch-madar ata qilghin,

pëqir qulungni musheqqettin qutquzghin.

¹⁷Körset manga shepqitingni,

yardem bergin i Perwerdigar,

tapsun qelbim teselli,

bolsun shermende manga öch bolghanlar.

Korahning ewladliri yazghan mungluq munajat

¹Muqeddes taghlar ara Xuda qurghan sheher^* turar.

²Perwerdigar Isra’iliyening barliq jayliridin

Si’on shehirini eng yaxshi körer.

³Ey Xudaning shehiri,

sheripingge pütülmekte ulugh ishlar. Sëlah

⁴Raxabliq^* we Babilliqlar bardur mëni tonughanlar arisida,^*

Filistiyelik, Tirliq hem Ëfiyopiyelikmu shu qatarda.

Deymen ular heqqide: “Bu ademler tughulghan Si’onda.”

⁵Si’on toghruluq mundaq ëytilar:

“Si’onda tughulghan her millettin bolghanlar”,

ulugh Xuda özi Si’onni puxta qilar.

⁶Yat qowmni pütkinide tizimgha Perwerdigar:

“Bu kishi Si’onda tughulghan” dep yëzip qoyar. Sëlah

⁷Naxshichi, ussulchilar naxshini mundaq ëytar:

“Ey Si’on, mëning hayat menbeyim sëningdidur.”

Korahning ewladliri we Ezraxning oghli Hëman yazghan terbiyewi munajat bolup, “maxalat-lë’anot” ahangida naxsha qilip ëytilsun dep, neghmichiler bëshigha tapshurulghan.

¹I Perwerdigar, nijatkarim Xuda,

këche-kündüz men sanga qildim nida.

²Qobul qilghin du’ayimni,

anglighin nidayimni.

³Chünki derdler jënimgha patti,

hayatimmu ölümge yëqinlashti.

⁴Bir putum sanggilidi gör aghzigha,

küch-madar qalmidi hëch tënimda.

⁵Ölüklerdin hëchbir perqsizmen,

tënim lehettiki murdidekla.

Untulghanmen ölüklerdek,

mëhringdin mehrummen ulardekla.

⁶Tashliwetting sen mëni chongqur hanggha,

tashliding hem zulmet, qarangghuluqqa.

⁷Yelkemni basti yük bolup sëning qehring,

manga qattiq zerbe boldi hayat dolqunliring. Sëlah

⁸Yiraq qilding mëningdin dostlirimni,

yirgendürdüng mëningdin hem ularni,

qamap qoydung chiqalmas qilip mëni.

⁹I Perwerdigar, közlirim xireleshti azabta,

her küni qilimen sanga nida,

qollirimni kötürüp du’agha.

¹⁰Ölüklerge körsetmekchimusen karametliringni?

Murdilar ornidin turup medhiyelermu sëni? Sëlah

¹¹Qebride kimmu bayan qilsun menggülük muhebbitingni?

Ölükler makanida kimmu maxtisun sadaqitingni?

¹²Qarangghuluqta kimmu körelisun karametliringni?

“Untulghanlar zëmini”da yaxshiliqingni?

¹³I Perwerdigar, nale qilimen sanga,

her seherde qilip du’a.

¹⁴I Perwerdigar, tashliwetting nëchün mëni?

Nëchün mendin yoshurisen didaringni?

¹⁵Ëzilip tas qalghantim ölüshke yash chëghimdin,

qiynilip pëtip qaldim ümidsizlikke dehshitingdin.

¹⁶Qehr-gheziping basti üstümni,

wehimiliring nabut qildi mëni.

¹⁷Kelkün kebi ular mëni ëliwaldi qoynigha,

chüshüp qaldim men ularning qorshawigha.

¹⁸Yiraq qilip mëningdin hemrahlirim, dostlirimni,

yar qilding peqet manga qarangghuluqni.

Ezraxning oghli Ëtan yazghan terbiyewi munajat

¹Perwerdigar menggülük muhebbitingni ebediy küyleymen,

sadaqitingni ewladtin-ewladqiche bayan eyleymen.

²Jakarlaymenki muhebbiting menggü özgermes,

sadaqiting ersh’eladek mezmut, tewrenmes.

³Rebbim, sen dëdingki:

“Talliwalghan bendem bilen ehde qildim,

qulum bolghan Dawutqa qesem qildim.

⁴Sëning ewladliringni ebediy xanidanliqqa ige qilimen,

neslingning textke warisliq qilishigha kapaletlik qilimen.” Sëlah

⁵I Igem, ersh’elada möjiziliring tebrikliner,

sadaqiting perishtiler arisida medhiyeliner.

⁶Büyüklükte sanga tengdash biri yoqtur,

ersh’elada hëchkim sanga oxshimastur.

⁷Xudaning heywisidin perishtiler titrep turar,

etrapida hemmeylen qorqup turar.

⁸I Xuda – Qudretlik Serdar Perwerdigar,^*

sanga oxshash qudret igisidin yene kim bar?

Etrapingni sadaqetlik orap turar.

⁹Dëngiz qanche meghrur bolsun sen uninggha hökümransen,

örkeshlise dolqun yasap uni bësip tinchlandurisen.

¹⁰Dëngizdiki raxabni^* sen berbat qilding,

qudritingde düshminingni bitchit qilding.

¹¹Asman, zëmin – pütün jahan sëningkidur,

uningdiki hemme nerse peqet sëning ijadingdur.

¹²Yaratqansen shimal, jenub we ulardiki hemmini,

shadliqta namingni küyler Tabor, Xermon choqqiliri.

¹³Biliking qudretlik, qolung küchlüktur,

üstün kötürülgen ong qolung ghalibtur.

¹⁴Textingning uli bolsa heqqaniyliq, adalettur,

muhebbet we sadaqetlik hökümranliqingning hemrahidur.

¹⁵Tentene, alqishlarni qilghan xelq bextlik hësablinar,

yashar ular huzurungning nurida i Perwerdigar.

¹⁶Naming bilen ular da’im shad bolar,

adalitingdin söyünüp tentene qilar.

¹⁷Ularning küch-quwwet, shan-sheripi sendin këler,

shapa’iting bolghach ular da’im ghelibe qilar.

¹⁸Berheq, bizning padishahimiz mensuptur Perwerdigargha,

tewedur Isra’illarni tallighan muqeddes Xudagha.

¹⁹Bir wehiyingde mundaq dëgeniding sadiq öz bendengge:

“Men bir ezimetke yardimimni yetküzdüm,

el arisidin uni tallap, kötürdüm.

²⁰Dëmek, qulum Dawutni taptim,

muqeddes mëyimni sürkep bëshigha,

uni silerge padishah qilip tiklidim.

²¹Qolum uninggha yölek bolar,

bilikim uni küchke toldurar.

²²Düshmenliri uni peqet yëngelmes,

peskeshlermu uni qistap ëzelmes.

²³Reqiblirini uning aldida weyran qilimen,

öchmenlirini yer bilen yeksan qilimen.

²⁴Sadaqitim, muhebbitim uninggha yar bolar,

mëning namim bilen u zeper quchar.

²⁵Men uni hökümranliq qilghuzarmen dëngizgha,^*

hoquqini yürgüzermen hem deryalargha.

²⁶U manga nida qilip dëdiki:

‘sen mëning atam, Xudayimdursen,

nijatkarim, qoram tëshimdursen.’

²⁷Men uni mëning tunji oghlum qilimen,

dunyadiki eng ulugh padishah qilip tikleymen.

²⁸Muhebbitim uninggha ebediydur,

qilghan ehdem menggüge buzulmastur.

²⁹Ewladlirini ebediy xanidanliqqa ige qilimen,

textini uning asman kebi dawam qildurimen.

³⁰Mubada uning ewladliri telimlirimdin chiqip ketse,

hökümlirim boyiche ish körmise.

³¹Ular permanlirimni buzsa,

emrlirimge ita’et qilmisa,

³²unda men ita’etsizliklirini tayaq bilen,

gunahlirini yara-jarahet bilen jazalaymen.

³³Lëkin muhebbitimni Dawuttin üzmeymen,

yaki wedemge xiyanet qilmaymen.

³⁴Tüzgen ehdemni esla buzmaymen,

wedemdin peqet qaytmaymen.

³⁵Men muqeddes namimda qesem ichkenmen,

Dawutqa ëytqan sözümdin yanmaymen.

³⁶Uning ewladliri ebediy dawamlishar,

uning texti quyash kebi parlap turar.

³⁷U asmandiki sadiq guwahchi ay kebi

mustehkem, mezmut turar ebediy.” Sëlah

³⁸Biraq hazir sen uni ret qilip tashliwetting,

özüng tallap bëkitken padishahqa ghezeplending.

³⁹Inkar qilding qulung bilen tüzgen ehdini,

tashliwetting uning taj-text – hoquqini.

⁴⁰Weyran qilding uning barliq qorghanlirini,

xarabe qilding sheher-qel’elirini.

⁴¹Yoldin ötüwatqanlar bulimaqta shehirini,

u qoshna eller aldida reswa boldi.

⁴²Ghelibe qildurdung uning reqiblirini,

xushal qilding pütkül düshmenlirini.

⁴³Qayturdung uning qilichining bisini,

jenglerde meghlup qilding uni.

⁴⁴Yerge urdung uning heywitini,

küldek tozuttung textini.

⁴⁵Xijaletke chömdürüp

qisqartting yashliqini. Sëlah

⁴⁶I Perwerdigar,

qachanghiche özüngni mendin qachurisen?

Qehr-ghezep otungni qachanghiche köydürisen?

⁴⁷Este tutqin i Xuda, ömrümning qisqiliqini,

nëmidëgen bihudiliktur insanning hayati.

⁴⁸Qaysi insan yashap ölüm körmeydiken?

Gördin öz jënini aman saqlap qalidiken? Sëlah

⁴⁹I Rebbim,

sadaqette Dawutqa qilghan wediliring nelerde qaldi?

Burun körsetken mëhir-muhebbiting qeyerde qaldi?

⁵⁰Qulung uchrawatqan mesxirilerni eske alghaysen,

barche elning manga qilghan haqaretlirini körgeysen!

⁵¹Reqibliring mëni da’im mesxire qilar,

özüng tallighan padishahni xar qilar.

⁵²Perwerdigargha menggü hemdusanalar bolghay!

Amin, amin!

4-bölek

Teqwadar Musa peyghemberning du’asi

¹I Rebbim, panah bolup kelding bizge,

ewladtin-ewladqiche.

²Taghlar berpa qilinmastinla,

zëmin we alem yaritilmastinla,

özüng Xuda iding ezeldinla,

menggüge Xudadursen yenila.

³Dëseng eger “ey insanlar, tupraqqa qaytinglar”,

insan shu’an tupraqqa aylinar.

⁴Berheq, sen üchün ming yil goya

tünügün ötken bir kündekla,

yaki këchidiki birnechche sa’ettekla.

⁵Insanni ëlip këtisen kelkündek,

uning ömri tüger goyaki chüshtek,

tang seherde ünüp chiqqan maysidek.

⁶Maysilar ünüp chiqar seherde,

soliship këter axshamghiche.

⁷Shübhisizki, biz halak bolimiz ghezipingdin,

wehimige chüshimiz qehringdin.

⁸Ashkara qilisen yamanliqimizni aldingda,

pinhan gunahlirimizni jamalingning nurida.

⁹Künlirimiz ghezep-neprette öter,

yillirimiz uh tartip azabta këter.

¹⁰Ömrimiz yetmish yilche bolar,

seksenge ulishar maghduri barlar.

Emma eng yaxshi chaghlirimizmu

japa we qayghuda öter,

künlirimiz közni yumup achquche tüger,

hayatimiz uchqandek ötüp këter.

¹¹Ghezipingning qudritini kim oylap yëter?

Qehringge layiq kim sendin eyminer?

¹²Ömür qisqa, qedirleshni ögetkin bizge,

shu ömürning sawaqliri ornisun qelbimizge.

¹³I Igem ötüney men, qaytip kelgin arimizgha,

qachanghiche yashaymizki mohtaj bolup shepqitingge?

Rehim eyle sëni söygen bendiliringge!

¹⁴Her seherde qandursang ger bizni chin muhebbitingge,

her kün alqish yangratqaymiz sëning qutluq sheningge.

¹⁵Bizge qanche uzun azab salghan bolsang,

bizni qandaq külpetlerge qoyghan bolsang,

emdi shunche külke, shadliq bergin bizge.

¹⁶Sadiq bendiliring körsun nijatliqingni,

ularning perzentliri shan-shöhritingni.

¹⁷I Rebbimiz, mëhring bizge yar bolsun,

medet qilghin, ishlirimiz ong bolsun,

qollirimiz berikitingge liq tolsun.

¹Kimki makan tutsa ulugh Xudaning panahida,

yashar u hemmige qadir Xuda sayisida.

²Ëytarmen Perwerdigargha: “Bashpanahim, qorghinimsen,

ishenchimni baghlighan Xudayimsen.”

³Berheq, Xuda qutquzar sëni qiltaqchining qiltaqliridin,

qirghin qilghuchi wabadin.

⁴Bürküt kebi u qanatliri astigha alar sëni,

sen üchün panah bolar uning qanatliri,

qalqan we istihkaming bolar sadaqiti.

⁵Qorqmassen ne këchining wehimisidin,

ne kündüzi ëtilghan oqtin.

⁶Ne qarangghuda bildürmey tarqalghan wabadin,

ne yoruqta kelgen ejellik apettin.

⁷Gerche minglighan kishiler yiqilsimu bu yëningda,

tümenligen jesetler yatsimu u yëningda,

bala-qazalar hëch yëqinlashmas sanga.

⁸Körisen peqet öz közüng bilen bu ishlarni,

pasiqlarning qandaq jazalanghinini.

⁹Perwerdigarni panah qilghining üchün,

ulugh Xudani qorghinim dep bilgining üchün,

¹⁰hëchbir yamanliq kelmes bëshinggha,

hëch waba yëqinlashmas chëdiringgha.

¹¹Perwerdigar emr bërer sen üchün perishtilirige,

ular qoghdar sëni hemme yolliringda.

¹²Yürer perishtiler sëni kötürüp qollirida,

urulup ketmisun dep putliring birer tashqa.

¹³Bësip desseysen yilan we shirni,

cheyleysen zeherlik yilan we arslanni.

¹⁴Deyduki Perwerdigar:

“Mëni söygenliki üchün uni qutquzimen.

Mëni tonughanliqi üchün qoghdaymen.

¹⁵Jawab bërimen iltija qilghinida,

uning bilen bille bolimen ëghir künliride,

qutquzup uni, sazawer qilimen shöhretke.

¹⁶Uzun ömür ata qilip, memnun qilimen uni,

bërimen uninggha nijatliqimni.”

Dem ëlish künde^* ëytilidighan munajat

¹I Perwerdigar, neqeder bexttur sanga shükür ëytish,

i ulugh Xuda, neqeder bexttur namingni naxshigha qëtish.

²Bayan eylep menggülük muhebbitingni seherde,

sadaqitingni teriplesh herbir këchide –

³On tarliq saz we chiltarning nawasida,

liraning yëqimliq munglirida.

⁴Chünki mëni shadlandurdung karametliringde i Xuda,

manga qilghan ejringdin naxsha ëytarmen xushalliqta.

⁵I Perwerdigar, neqeder büyük sëning möjiziliring.

Shunchilik yüksek, niyet, meqsetliring.

⁶Töwendiki heqiqetni bilmes nadan ademler,

chüshenmeydu uni yene hamaqet we exmeqler.

⁷Gerche ot-chöp öskendek tëz össimu reziller,

shunche güllep yashnisimu hemde barliq peskeshler,

lëkin menggülük halaketke duchardur ular.

⁸Hemmige menggü qadirdursen, i Perwerdigar.

⁹Mana qara, düshmenliring muqerrerki halak bolar,

tiripiren bolidu hem yamanliq qilghuchilar.

¹⁰Lëkin yawa buqidek küchlendürdüng sen mëni,

hem bëshimgha sürkiding rohlandurghuch mëyini.^*

¹¹Kördüm düshmenlirimning meghlubiyitini,

anglidim rezil reqiblirimning yigha-zarini.

¹²Xuddi xorma derixidek güllep yashnar heqqaniylar,

hem yene Liwandiki këdir derixidek aynip öser.

¹³Tikilgendur ular Perwerdigar huzurigha,

güllep yashnar Igimizning hoyla-aramlirida.

¹⁴Qërisimu ular yene bëridu mëwe,

bük-baraqsan kökirip turar hemishe.

¹⁵Shunga ular deyduki: “Perwerdigar adildur,

adaletlik u da’im, qoram tashtek panahimiz Xudadur.”

¹Hökümrandur Perwerdigar,

heywet uning yëpinchisi,

oralghandur ulughwarliq,

qudret uning bel potisi.

Mezmut qilinghan dunya,

tewrenmes u esla.

²Mustehkemdur texting ezeldin,

mewjutsen özüng elmisaqtin.

³I Perwerdigar,

sharqirimaqta dëngiz suliri,

yangrimaqta shawqunliri,

güldürlimekte dolqunliri.

⁴Dëngizlarning güldürleshliridin,

dolqunlarning yulqunushliridin,

qudretliktur ershtiki Perwerdigar.

⁵I Perwerdigar, özgermestur perzliring,

öyüngge zinnettur menggülük muqeddesliking.

¹I jazalighuchi Perwerdigar, i Xuda,

i jazalighuchi Perwerdigar, chachqin jula.

²I jahan soraqchisi, chiqip otturigha,

layiqida jaza bergin tekebburlargha.

³I Perwerdigar, reziller qachanghiche maxtinar,

qachanghiche bëshini kötürüp yürüsher ular?

⁴Walaqshiydu tekebburluq bilen ular,

po atidu u yamanliq qilghuchilar!

⁵Sen tallighan qowmingni ëzip ular,

sanga tewe bolghanlargha jebir salar.

⁶Qirghin qilip tul xotun, ghëriblarni,

öltüridu panahsiz yëtimlarni.

⁷Ular der: “Körmeydu Perwerdigar,

Yaqupning Xudasi bilmeydu zinhar.”

⁸Ey elning hamaqetliri, oylap bëqinglar!

Ey exmeqler, qachan bolar eqlinglar?

⁹Anglimasmu qulaqni yaratquchi?!

Körmesmu közni ata qilghuchi?!

¹⁰Yat ellerni jazalighuchi Xuda jazalimasmu silerni?

Insangha eqil ögetküchi terbiyelimesmu ademni?

¹¹Xuda bilidu insanning oy-pikrini,

bihudidur xiyallarning hemmisi.

¹²Bextliktur sen terbiyeligen kishi, i Perwerdigar,

insan terbiyengdin, telimingdin bext tapar!

¹³Sen ularni aman qilisen yaman künlerde,

taki yamanlar origha chüshüp halak bolghuche.

¹⁴Perwerdigar öz qowmini terk etmes,

özige mensup bolghanlarni tashlap ketmes.

¹⁵Höküm-perman hoquqi qaytar haman adaletke,

qelbi paklar himaye qilar adaletning keynide.

¹⁶Rezillerdin qoghdaydu mëni kim chiqip otturigha?

Kim turar men terepte qarshi halda yamanlargha?

¹⁷Eger yardem bermigen bolsa idi manga Xuda,

yatar idim jimjitliq qaplighan ölükler makanida.

¹⁸I Perwerdigar, tëyilip këtey dëginimde,

yöliding mëni menggülük muhebbitingde.

¹⁹Ghem-qayghu, endishide qalghinimda,

shadlandurisen teselli bërip manga.

²⁰Sanga dost bolalmas chirikleshken emeldarlar,

qanunni qalqan qilar qilghanlirida eski ishlar.

²¹Ular birlisher heqqaniylarni öltürüshke,

höküm qilar bigunahlarni ölümge.

²²Perwerdigar qorghinimdur,

panahgahim – qoram tëshimdur.

²³Gunahliri üchün Xuda ularni jazalar,

rezilliki üchün Xuda ularni halak qilar,

shundaq, Perwerdigarimiz ularni qirip tashlar.

¹Naxsha ëytayli këlinglar Perwerdigargha bëghishlap,

qoram tashtek qutquzghuchi Xudani medhiyeleyli alqishlap.

²Huzurigha Xudaning shükür ëytip kireyli,

tentene bilen uninggha nawa qilip medhiyeler ëytayli.

³Chünki Xuda – Igimiz Perwerdigar ulughdur,

u bir büyük padishah, barliq “ilahlar”din^* üstündur.

⁴Choqqilardin taki eng chongqur yerlirigiche zëminning,

jimisi uning qolida, mülkidur uning.

⁵Dëngiz-okyanlar tewedur Xudagha, u yaratqan ularni,

zëmin anga mensuptur, qolliri wujudqa keltürgen uni.

⁶Sejde qilayli këlinglar Perwerdigargha,

Yaratquchimiz u bizning tiz pükeyli uninggha.

⁷Chünki u bizning Xudayimizdur,

biz uning ghemxorluqidiki qowmdurmiz,

u perwish qiliwatqan qoyliridurmiz.

⁸Bügün uning awazigha qulaq salsanglar eger,

u derki: “Jahil bolmanglar ejdadinglar Miribada bolghinidek,

chöl-bayawan Massahta tersaliq qilghinidek.^*

⁹Ata-bowanglar ene shu yerde mëni sinighanidi,

möjizilirimni körüp turupmu mëni tekshürgenidi.

¹⁰Men qiriq yilghiche yirginip ejdadliringlardin,

dëdimki: ‘ularning qelbi yiraqtur mendin,

mangmas ular mëning yolumdin.’

¹¹Qesem qilip ëyttim yene ghezepte shunga:

‘kirelmes ular mëning aramgahimgha.’ ”

¹Yëngi naxsha ëytinglar Perwerdigargha bëghishlap,

ey jahan ehli yangritinglar ghezeller uninggha atap.

²Naxshanglarda teriplenglar Xudaning namini,

bayan eylep her küni uning nijatliqini.

³Tarqitinglar shan-sheripini eller ara,

ajayip ishlirini xelq ara.

⁴Ulugh bolghach Perwerdigar da’ima,

u layiqtur hessilep medhiyelinishke,

üstün bolghach u gheyriy ilahlardin,

peqet ula erziydu eyminishke.

⁵Peqet buttur bashqilarning ilahliri,

emma Xuda yaratqandur ershlerni.

⁶Orap turar shan-sherep we büyüklük uni,

qudret we güzellikke tolghandur uning turargahi.

⁷Teriplenglar ey el-qowmlar Perwerdigarni,

küylenglar uning shan-shöhret we qudritini.

⁸Perwerdigar sheripige munasip hemdusana oqunglar,

Xudaning ibadetxana hoylisigha hediye bilen kiringlar.

⁹Ey jahan ehli, Perwerdigardin qorqunglar,

parlaq, muqeddes Perwerdigargha sejde qilinglar,

¹⁰ëytinglar eller ara:

“Perwerdigar eng aliy hökümrandur,

u sorar xelqlerni adalette.

Berheq, dunya mustehkem, tewrenmestur.”

¹¹Shadlansun yer-jahan, xush bolsun asmanlar,

tentene qilishsun dëngiz we uningdiki janliqlar.

¹²Yayrisun dalilar, uningdiki charwilar,

naxsha ëytsun Igimiz aldida ormanlar.

¹³Chünki Perwerdigar jezmen këlidu hökümranliq qilishqa,

këlidu dunyani adalette, xelqlerni heqqaniy bashqurushqa.

¹Eng aliy hökümrandur Perwerdigar,

xushallansun buningdin hemme xelqler,

shadlansun hetta eng yiraqtiki eller.

²Sirliq we pinhanliq ara turar Perwerdigar,

heqqaniyet, adalette texti uning mezmut turar.

³Otlar lawuldap köyüp turar aldida,

reqiblirini köydürüwëter heryanda.

⁴Chaqmiqini chaqturup yorutar u jahanni,

yer-zëmin titrep këter körüp buni.

⁵Momdek ërip këter büyük taghlar hetta,

alemning hökümrani Perwerdigar aldida.

⁶Ershler jakarlar uning heqqaniyliqini,

jimi xelqler körer uning shan-sheripini.

⁷Shermendilikte qalar axir butperesler,

erzimes butlirini maxtighanlar.

Perwerdigargha sejde qilar barliq “ilahlar”.

⁸I Perwerdigar,

shadlandi adalitingdin pütün Yehudiye sheherliri,

xushalliqqa chömdi Si’on anglap hökümliringni.

⁹Berheq, i Perwerdigar,

jahangha hökümran ulugh Xudadursen,

gheyriy ilahlardin shuqeder üstündursen.

¹⁰Ey Perwerdigarni söygenler, öch körünglar yamanliqni,

Perwerdigar qoghdar öz teqwadarlirining jënini,

qutquzar rezillerning changgilidin u sadiqlarni.

¹¹Nur xuddi uruqtek chëchilghandur heqqaniylargha,

shadliq tërilghandur dili duruslargha.

¹²Ey heqqaniylar, Perwerdigardin xushallininglar,

muqeddeslikini yad ëtip uninggha shükür ëytinglar.

¹Perwerdigargha bëghishlap ëytinglar yëngi naxsha,

chünki ajayip möjiziler igisidur Xuda,

muqeddes biliki, ong qoli zeper bergendur uninggha.

²Qildi Xuda namayan ghelibisini hemmige,

adalitini körsetti jahandiki ellerge.

³U yetküzdi Isra’illargha mëhir we muhebbitini,

untumidi u zinhar Isra’illargha bolghan sadaqitini,

barche awam kördi hem Igimizning utuqini.

⁴Ey barche insanlar, alqish yangritinglar Xudagha,

xush bolup medhiyeler oqunglar naxshanglarda uninggha.

⁵Xudagha atap lira bilen neghme-nawa qilinglar,

hem uninggha lira bilen naxsha-ghezel ëytinglar.

⁶Yangritinglar alqishlar padishahimiz Xudagha,

alqishimiz bolsun anga kanay bilen burghida.

⁷Jushqunlisun dëngiz we uningdiki janliqlar,

qilsun qizghin tentene zëmin yene janliqlar.

⁸Chawak chalsun Xudagha xushalliqtin deryalar,

shadliq bilen Xudani küyge qatsun hem taghlar.

⁹Chünki Perwerdigar jezmen këlidu hökümranliq qilishqa,

këlidu dunyani adalette, xelqlerni heqqaniy bashqurushqa.

¹Eng aliy hökümrandur Perwerdigar!

U kërublar^* otturisida textte olturar,

uningdin eyminip titrisun pütkül qowmlar,

heywisidin zilzilige kelsun hemme jaylar.

²Hökümrandur Si’ongha Perwerdigar,

u barliq qowmlar üstidin höküm sürer.

³Muqeddestursen i Perwerdigar,

heywetlik, büyük namingni medhiyelisun ular.

⁴I adalet söygüchi qudretlik shahimiz – Xuda,

adilliqni ornatqanting Yaqup ewladliri arisigha,

adalet we heqqaniyet emelge ashqanidi ularda.

⁵Perwerdigarimizni ulughlanglar,

ayighigha bash qoyup sejde qilinglar.

Chünki u muqeddestur!

⁶Musa we Harunlar uning rohaniyliridindur,^*

Samu’ilmu uninggha iltija qilghanlardindur.

Ular du’a qilghanda Perwerdigargha,

berheq u jawab bergenidi ulargha.

⁷Perwerdigar sözligenidi bulut tüwrüki ichidin^* ulargha,

ular emel qilishti Xuda bergen perz-permanlargha.

⁸I Igimiz Perwerdigar, jawab berding ulargha.

Ularning gunahlirini meghpiret qilding da’ima,

emma jazaliding ularni towa qilmighinida.

⁹Perwerdigarimizni ulughlanglar,

muqeddes Si’on tëghida uninggha sejde qilinglar,

chünki muqeddestur Perwerdigarimiz!

100

Shükür ëytish munajiti

¹Ey pütkül jahandiki insanlar,

yangritinglar Perwerdigargha alqishlar.

²Xushalliq bilen ibadet qilinglar uninggha,

shadliq bilen munajat oqup kiringlar huzurigha.

³Bilinglarki, Perwerdigar yëganidur,

bizni u yaratqandur, biz uninggha tewedurmiz,

biz uning xelqidurmiz, yayliqining qoyliridurmiz.

⁴Derwaziliridin kiringlar hemdusana-shükür ëytip,

qedem teshrip qilinglar hoylilirigha medhiye oqup,

teriplenglar namini minnetdarliq bildürüp.

⁵Berheq, Perwerdigar shapa’etliktur,

uning mëhir-muhebbiti menggülüktur,

ewladtin-ewladqiche sadaqetliktur.

101

Dawut yazghan munajat

¹Küyleymen menggülük muhebbet we adalitingni,

i Perwerdigar küylirimge qatimen sëni.

²Yolum toghra bolsimu ëhtiyat qilip mangimen,

Perwerdigar qachanmu yardemge këlersen?

³Xiyalimgha kelmes esla pasiq qilmish, rezillik,

yoldin chiqqan azghunlargha nepritim bar shunchilik,

ular qilghan gunahlargha hewisim yoq qilchilik.

⁴Könglüm mëning egriliktin xaliydur,

hemde hemme rezilliktin yiraqtur.

⁵Bashqilargha kimki töhmet eylise yoq qilarmen uni düshmen bilip,

körsem eger hali üstün, menmenchini turalmasmen süküt qilip.

⁶Kim ershtiki Xudagha sadiq bolsa,

ulargha öz ordamdin orun bërimen.

Toghra, heq yolda mangghanlarni

mëning xizmitimge qoyimen.

⁷Hiyligerlerge ordamda orun yoqtur,

yalghanchilar huzurumda bolalmastur.

⁸Zëminimdin yoq qilimen rezillerni her seherde,

birmu yaman qalmas hetta Perwerdigarning shehiride.

102

Ëzilip halidin ketken bir ademning Perwerdigargha dad-peryad qilip qilghan du’asi.

¹Anglighaysen Perwerdigar du’ayimni,

tingshighaysen mëning qilghan peryadimni.

²Yoshurmighin didaringni mendin Xuda külpette qalghinimda,

nida qilsam qulaq sëlip tëzdin jawab bergin manga.

³Ömrüm mëning is-tütektek ketmekte ghayib bolup,

wujudum örtenmekte ottek köyüp.

⁴Yürikim quruq chöptek qurup ketti.

Ishtihasiz, tamiqim azlap ketti.

⁵Hesret we nadamette köp qiynaldim,

oruqlap bir tëre, bir ustixan bolup qaldim.

⁶Men goya bayawanda uchup yürgen tazqarimen,

weyrane xarabini makan qilghan huwqushmen.

⁷Men goya ögzidiki yëtim qushmen,

yatsammu közüm ochuq, uyqusizmen.

⁸Künboyi mesxire qilar mëni düshmenlirim,

haqaretlik sözge yandash bolup qaldi mëning ismim.

^9-10Sen qehr-ghezep qilghach manga,

kül yëdim qorsiqimgha nan ornigha.

Köz yëshimsiz ichelmeymen ichimlikimni,

berheq, Xuda exlet kebi tashliding mëni.

¹¹Gugumdiki kölenggidek hayatimmu ghuwalashti,

tënim chöptek bolup qaqshal-ghazanglashti.

¹²Lëkin texting menggülüktur Perwerdigar,

shöhriting elmisaqtin ta’ebedke dawamlishar.

¹³Sen yardimingni ayimay, Si’ongha rehim qilisen,

chünki uninggha mëhriban bolup, yardem qilish waqti keldi,

shundaq, yardem qilishning waqit-sa’iti yëtip keldi.

¹⁴Qulliring tashlirini chin qelbidin söyer Si’onning,

xarab bolghan tupriqigha ichini aghritip uning.

¹⁵Barche eller naminggha hörmet qilar Perwerdigar,

sheripingdin eyminer alemdiki hemme shah, hökümranlar.

¹⁶Perwerdigar Si’onni qayta qurar,

shan-shöhriti Xudaning namayan bolar.

¹⁷Qobul qilar Perwerdigar miskinning du’asini,

ret qilmaydu ghëribning peryadini.

¹⁸Këlichek bir ewlad üchün

xatirilenglar Xudaning qudritini,

kelgüside xelqler medhiyelisun Xudani.

^19-20Chünki Xuda anglay dep, mehbuslarning ah-zarini,

azad qilay dep, yene ölümge buyrulghanlarni.

Nezer saldi üstimizge muqeddes makanidin,

qaridi zëmin taman Perwerdigar ersh’eladin.

^21-22Padishahlar, qowmlar jem bolghinida,

Perwerdigargha ibadet qilghinida.

Uning ulughluqini jakarlar Si’onda,

shenige medhiye oqur Yërusalëmda.

²³Biraq Xuda ajiz qildi qiran waqtimda,

hayatimni qisqartti ömrümning yërimida.

²⁴Yilliringning chëki yoqtur i Xuda,

jënimni alma ömrümning yërimida.

²⁵Dunyani yartqanting elmisaqta,

asmanmu berpa boldi öz qolungda.

²⁶Biraq ularning hemmisi yoqilidu,

sen bolsang ebediy we menggülüksen.

Ular goya kiyimdek konirighanda,

sen ularni kiyim kebi almashturisen.

Asman-zëmin yoq bolar birdinla.

²⁷Lëkin senla özgermes Perwerdigar,

peqet sende ebediy hayatliq bar.

²⁸Xatirjem yashaydu qulliringning baliliri,

huzurungda güllep yashnar ularning ewladliri.

103

Dawut yazghan munajat

¹Igimizge hemdusana ëytqin mëning ey qelbim,

teripligin uning muqeddes namini ey wujudum.

²Igimizge hemdusana ëytqin mëning ey qelbim,

untumighin Xudaning shepqitini her da’im.

³Kechürer u barliq gunahliringni,

saqaytar herqandaq këselliringni.

⁴U qutquzar ölümdin hayatingni,

yaghdurar hem muhebbiti, rehimdilliqini.

⁵U sëni berikitide memnun qilar ömür boyi,

yash chëghingdek küch-quwwiting urghup turar bürküt kebi.

⁶Perwerdigar yürgüzer heqqaniyet,

ëzilgen barliq mezlumlargha adalet.

⁷Namayan qildi Xuda Musa peyghemberge öz yolini,

Isra’il ewladlirigha karametlirini.

⁸Xuda rehimdil, shepqetliktur,

asanliqche ghezipi kelmes,

mëhir-muhebbiti cheksizdur.

⁹Eyiblimes u bizni uzaqqiche,

ghezipimu emestur adaqqiche.

¹⁰U mu’amile qilmighandur bizge gunahlirimizgha Yarisha,

jazalimighandur bizni u qilmishlirimizgha qarita.

¹¹Asman, zëmindin ëgiz bolsa qanchilik,

Xudaning ixlasmenlerge bolghan muhebbiti cheksizdur shunchilik.

¹²Meshriq meghribtin yiraq bolsa qanchilik,

yiraqlashturghandur gunahlirimizni u bizdin shunchilik.

¹³Ata öz balilirigha köyse qanchilik,

Perwerdigar köyümchanliq qilar ixlasmenlirige shunchilik.

¹⁴Shundaq, u biler bizning nëmidin yasalghanliqimizni,

ësige alar u bizning tupraq ikenlikimizni.

¹⁵Maysidek qisqidur insanning ömri,

dalada ëchilghan güldür insanning özi.

¹⁶Egerde chiqsa shamal u gül tozar,

hëchbir iz qaldurmastin ghayib bolar.

^17-18Emma Perwerdigar özige ixlas qilghanlargha,

hem uning ehdisige sadiq bolghanlargha,

emrlirige emel qilishni ëside tutqanlargha,

u körsiter menggülük muhebbitini adaqqiche,

heqqaniyiti dawam ëter ewladtin-ewladqiche.

¹⁹Perwerdigar ornatqandur textini ershke,

u hökümranliq qilar hemmining üstide.

²⁰Ey Perwerdigarning qudretlik perishtiliri,

silerdursiler uning sözige qulaq salghuchiliri,

uning emrlirini ijra qilghuchiliri,

shunga teriplep küylenglar Perwerdigarni.

²¹Ey Xudaning ershtikiliri,

silerdursiler uning iradisini ijra qilidighan xizmetchiliri,

shunga teriplep küylenglar Perwerdigarni.

²²Ey Perwerdigar yaratqanlar,

teriplenglar Perwerdigarni u höküm sürgen hemme jayda,

ey mëning qelbim ëytqin hemdusana Perwerdigargha.

104

¹Ey qelbim, hemdusana ëytqin Perwerdigargha!

Shan-shewketlik, heywetliksen, i Xuda,

Ilahim tengdashsizsen ulughluqta.

²Libasingdur yoruqluq, sen uninggha pürkengen,

asminingning gümbizi chëdir kebi tikilgen.

³Ershtiki turargahing limlirini

ornitipsen köktiki sulargha,

jeng harwisi kebi qilip bulutni,

mangdurupsen shamalning qanitida.

⁴Shamal qilisen perishtiliringni,

ot yalquni qilisen xizmetkarliringni.^*

⁵Ornitipsen yerni shunche mukemmel

u ulidin hëchbir zaman tewrenmes.

^6-7Dëngiz yerni libas kebi orighan,

choqqilarmu su astida qalghanti.

Güldürmamang eymendurgech sularni,

sular tëzdin öz ornigha yanghanti.

⁸Taghlar körünüp, wadilarmu ayan boldi,

sular hem sen buyrughan yerge këlip jaylashti.

⁹Dëngiz süyi tëship yene basmisun dep zëminni,

sen ulargha chek qoyup sizding chëgra siziqni.

^10-11Sen bolghach wadida bulaq közi ëchilip,

taghlar ara shildirlap aqti suliri.

Sular ichse uningdin daladiki janiwarlar,

qanar idi hettaki yawa ëshekning teshnaliqi.

¹²Su boyigha qushlarmu köktin chüshüp qonidu,

da’im ular shaxlarda taqlap yürüp sayraydu.

¹³Ershtiki su bilen sughirisen taghlarni,

özüng östürgen mëwige toldurisen zëminni.

¹⁴Charwa üchün dalida ot-chöplerni östürdüng,

ozuqini insanlar qara yerdin alsun dep,

ëtizlarda zira’et-köktatlarni östürdüng.

¹⁵Köngüllerni shad eyliseng sharabta,

quwwet berding nëning bilen tenlerge,

jilwe berding mëying bilen yüzlerge.

¹⁶Liwandiki këdir derexliri

Perwerdigar tikkendur uni,

Xuda qanghuche sughirar ularni.

¹⁷U derexlerge qushlar këlip uwa yasar,

archa derexliri leylekning öyi bolar.

¹⁸Tagh öchkiliri taghlarda oynar,

tik qiya sughurgha panah bolar.

¹⁹I Xuda, pesillerni ayrish üchün ayni yaratting,

quyashqimu patidighan waqitni bildürdüng.

²⁰Qarangghuluq chüshürseng këche bolidu,

ormanlarda janliqlar shipirlap këzip yüridu.

²¹Arslanlar olja izdep huwlishar,

riziqlirini ular, Xuda sendin sorar.

²²Quyash chiqsa ularmu uwisigha qaytar,

qaytip këlip uwisida aram alar.

²³Hemme adem öz ishigha mëngishar,

etigendin kechkiche mëhnet qilar.

²⁴Perwerdigar yaratqan mexluqatliring shunche köptur.

Sen yaratqan janliqlar bilen tolghandur zëmin yüzi,

bularning hemmisila hëkmitingning mëwisidur.

²⁵Ene aldingda bipayan dëngiz yatar,

uningda san-sanaqsiz janliq yashar,

hem ularning chongi we kichiki bardur.

²⁶Unda yene sen yaratqan liwyatan^* bar,

üstide uning qëyiq bilen këme qatnar.

²⁷Ular sendin rizqi üchün ozuq küter,

ozuq üchün jamalinggha telmürer.

²⁸Ozuqini ular sëning qolungdin alar,

shu ozuqta ularning qorsiqi toyar.

²⁹Dekke-dükkige chüsher ular jamalingni yoshurghiningda,

jan üzüp qara yerge qaytar, nepeslirini toxtatqiningda.

³⁰Sen öz nepisingni ewetkiningde ular yaritilar,

pütün yer yüzi yëngilinar.

³¹Perwerdigarning shöhriti ebediy bolghay,

Perwerdigar yaratqanliridin xursen bolghay.

³²Perwerdigar yerge baqsa zëmin titrer,

taghqa tegse otlar yënip, tütün chiqar.

³³Nawada jënim tende bolsila

medhiye oquymen Xudayimgha,

menggü hemdusana ëytimen uninggha.

³⁴Oylirimdin Xuda razi bolghay,

chünki Perwerdigardin boldum xushal,

³⁵gunahkarlar yer yüzide qalmighay,

reziller zawal tapqay.

Hemdusana ëytqin ey qelbim Perwerdigargha,

hemdusana oqunglar hemminglar uninggha.

105

¹Perwerdigargha shükürler ëytinglar,

uning shenige medhiyeler oqunglar,

karametlirini eller ara bayan qilinglar!

²Xudani küylenglar qëtip naxsha-neghmige,

möjizilirini uning jakarlanglar hemmige.

³Ulughlanglar muqeddes xisletlirini Xudaning,

qelbi shadlansun Perwerdigarni sëghinghanlarning.

⁴Telpününglar Xudaning qudritige-küchige,

intilinglar hem uning huzurigha-mëhrige.

⁵Ësinglarda bolsun uning karametliri,

möjiziliri we chiqarghan hökümliri.

⁶I Xudaning quli Ibrahimning nesilliri,

u özi tallighan Yaqupning ewladliri.

⁷U Perwerdigardur, u bizning Xudayimizdur,

uning hökümliri hemme yerde küchke igidur.

⁸Uning tüzgen ehdisi ebediy yadididur,

bu uning adaqqiche wede qilghan sözidur.

⁹Perwerdigar Ibrahim bilen ehde tüzgenidi,

Is’haqqimu qesem ichkenidi.

¹⁰U buni Yaqupqimu nizam qilip bergenidi.

Isra’ilgha^* menggülük ehde qilip mundaq dëgenidi:

¹¹“Kenan zëminini sëning mülküng qilimen,

uni sanga te’elluq nësiweng qilimen.”

¹²U chaghda ular nahayiti az sanliq idi,

nezerde yoq hem musapir idi.

¹³Ular yurtmu-yurt sersan idi,

eldin-elge këzer idi.

¹⁴Xuda hëchkimning ularni ëzishige yol qoymidi,

ularni dep, padishahlarnimu mundaq agahlandurdi:

¹⁵“Mëning tallighanlirimgha chëqilmanglar,

peyghemberlirimge ziyankeshlik qilmanglar.”

¹⁶Acharchiliq berdi Xuda Ken’angha,

zar qildi ularni ash-nangha.

¹⁷Xuda ularni dep aldin’ala Yüsüpni Misirgha ewetkenidi,

akiliri uni qul qilip satqanidi.

¹⁸Uning putliri zenjirde zeximlengenidi,

boynigha boyunturuq sëlinghanidi.

¹⁹U tawlandi Perwerdigarning bëshariti körülgüche,

Xuda Yüsüpning chüshide körsetkenliri ispatlanghuche.

²⁰Uni azad qilishqa Pir’ewn emr qildi,

ellerning hökümrani uninggha hörlük berdi.

²¹Pir’ewn uni ordisigha ghojidar qildi,

barliq mal-mülkige bashliq qilip teyinlidi.

²²Berdi uning ixtiyarigha wezirlirini,

danaliq öginishke tapshurdi aqsaqallirini.

²³Shundaq qilip Isra’illar Misirgha keldi,

Hamning^* zëminida Yaqup ewladliri musapir boldi.

²⁴Ularni köp nesillik qildi Perwerdigar,

hem düshmenliridin küchlük boldi ular.

²⁵Shunga ulardin bizar bolup Misirliqlar,

hiyle-mikir mu’amilide boldi ular.

²⁶Andin ewetti Xuda öz quli Musani,

yollidi öz tallighini Harunni.

²⁷Xudaning alametlirini bayan qildi ular Misirda,

uning möjizilirini körsetti ham zëminida.

²⁸Zëminni zulmet qilsimu qarangghuluqida Perwerdigar,

uning emrige ita’etsizlik qilmidi ular.

²⁹Qan qildi Xuda Misirning sulirini,

öltürüwetti ularning bëliqlirini.

³⁰Paqa apiti qaplidi yerlirini,

qaplidi hetta paqilar padishah sariyini.

³¹Xudaning emri bilen qaplidi ghuzh-ghuzh chiwinlar,

hemme yerni basti ghing-ghing pashilar.

³²Yamghur ornigha möldür yaghdi,

Misirni chaqmaq urdi.

³³Nabut boldi enjür derixi, üzüm talliri,

weyran boldi derexlerning barliqi.

³⁴Xudaning emri bilen keldi yene chëketkiler,

mizhildap keldi san-sanaqsiz chëketkiler.

³⁵Qoymidi ular barliq giyahlarni,

yep tügetti ëtizlarda hosullarni.

³⁶Axirida öltürdi Xuda Misirdiki tunji balilarni –

ularning ghururi bolghan birinchi oghullarni.

³⁷U Isra’illarni seperge altun-kümüsh bayliq bilen chiqardi.

Ularning hemmisi saghlam hem küchlük idi.

³⁸Ularning ketkinige Misirliqlar xushal boldi,

chünki Misirliqlar Isra’illardin bek qorqqanidi.

³⁹Perwerdigar bulutni sayiwen qildi,

tünde ulargha otni nur qilip berdi.

⁴⁰Ular Xudadin tiligenidi, bödüne ata qildi,

toqlash üchün ularni asmandin nan chüshürdi.

⁴¹Tashni yërip ariliqliridin su chiqardi,

qaqas chölde ëqin-derya peyda qildi.

⁴²Berheq Xuda muqeddes wedisini untumidi,

quli bolghan Ibrahimni es-yadida saqlidi.

⁴³U xelqini chiqardi Misirdin shad qilip,

hörlükige tentene qildi xelqi naxsha ëtip.

⁴⁴Yat ellerning zëminlirini berdi ulargha Perwerdigar,

bashqilarning ejir-mëhnetlirige muyesser boldi ular,

⁴⁵shunga ita’et qilip Perwerdigarning qanunlirigha,

boysununglar uning permanlirigha.

Hemdusana oqunglar Perwerdigargha!

106

¹Hemdusana oqunglar Perwerdigargha,

shükürler ëytinglar uninggha.

Chünki Perwerdigar shapa’etliktur,

uning muhebbiti menggülüktur.

²Qudritini Xudaning kimmu toluq teripliyeler?

Kim uninggha ëytalar mukemmel medhiyeler?

³Neqeder bextlik-he, adaletlik ish qilghanlar,

her da’im heqqaniyet yolini tutqanlar.

⁴I Perwerdigar, alghaysen mëni ësingge,

himmitingni körsetkiningde öz xelqingge.

Xewer alghin halimdin nijatliqing kelgende.

⁵Özüng tallighan xelqingning iqbalini körey,

ularning külkisige jor bolup küley,

sanga mensup xelqing bilen maxtinip yürey.

⁶Xuddi ejdadlirimizdek bizmu gunah ötküzduq,

rezil, iplas hem yaman ishlarni hemmimiz qilduq.

⁷Ejdadlirimiz Misirdiki chëghida,

mensitmigenidi Xudaning möjizilirini.

Isyan kötergenidi ular Qizil Dëngiz boyida,

ësidimu tutmastin Xudaning muhebbitini.

⁸Emma Perwerdigar özining sheripi üchün,

ularni qutquzup qudritini namayan qilghanidi.

⁹Uning emri bilen süyi qurup Qizil Dëngizning,

ularni xuddi chöllükte ëlip mangghandek

dëngiz astidin yëteklep mangghanidi.

¹⁰Perwerdigar ularni

düshmenlirining qolliridin azad qildi,

reqiblirining changgilidin qutquzdi.

¹¹Düshmenliri su astida gherq boldi,

ulardin birersimu hayat qalmidi.

¹²Shundila Xudaning wedisige ishendi ular,

Perwerdigarni medhiyelep oqudi küy-naxshilar.

¹³Lëkin ular uzun ötmey untudi Perwerdigarni,

rawa körmidi özlirige Xudaning iradisini.

¹⁴Ular chölde nepsige teslim boldi,

hem Perwerdigarni sinap kördi.

¹⁵Telep qilghan nersisini Perwerdigar berdi ulargha,

biraq bir këselni küshende qilip ewetti ulargha.

¹⁶Chëdirlirida ular heset qildi hezriti Musagha,

we Xuda tallighan muqeddes rohaniy Harungha.

¹⁷Shuning bilen yer yërilip Datanni yutuwaldi,

Abiramni hemrahliri bilen qapsiwaldi.

¹⁸Hemrahliri arisigha ot chüshürülgenidi,

ot yalquni rezillerni köydürüwetti.

¹⁹Mozay butni yasap ular Sinay^* tëghida,

sejde qilip choqundi shu altun butqa.

²⁰Chöp yeydighan bir kalining butini ular,

qoydi shan-shereplik Perwerdigarning ornigha.

²¹Untudi ular qutquzghuchisi Xudani,

Misirda ulugh ishlarni qilghuchini.

²²Karamitini körsitip Qizil Dëngizda,

Ham diyarida möjiziler Yaratquchini.

²³Shunga Xuda ularni halak qilmaq bolghanidi,

lëkin Xuda teripidin tallanghan Musa chiqip

rehim tilep Xudaning ghezipini basqanidi.

²⁴Ular bu güzel zëmingha kirishni ret qildi,

Perwerdigarning wedisige ishenmidi.

²⁵Qaqshap turup ular öz chëdirlirida,

qulaq salmidi Perwerdigarning awazigha.

²⁶Shunga Xuda qolini kötürüp qesem qilip,

dëdiki: “Ularni chöllerde yoqitimen.

²⁷Ewladlirini yat ellerde weyran qilip,

yaqa yurt, yiraqlargha tarqitimen.”

²⁸Pë’or tëghida ular Ba’al ilahigha choqunup,

ölüklerge atalghan qurbanliqlarni yëyishti.

²⁹Qilmishliri ularning ghezipini keltürdi Xudaning,

shu wejidin waba kësel tarqaldi arisigha ularning.

³⁰Shunga Pinixas chiqip otturigha,

toxtatti u wabani dadilliqida.

³¹Buning bilen Pinixas heqqaniy dep hësablandi,

uning töhpisi ewladtin-ewladqiche tarqaldi.

³²Xudaning ghezipini qozghidi ular yene

Miribada peyda bolghan suning boyida.^*

bu seweblik azar yetti Musagha.

³³Chünki ular Musaning jënigha tegkech,

bixestelik qilip Musa sözlep saldi ulargha.

³⁴Perwerdigarning emrige xilapliq qilip

halak qilmay hemme yat ellerni,

³⁵eksiche ariliship ular bilen

ögendi ularning qiliqlirini.

³⁶Choqundi ularning butlirigha,

halaket ëlip keldi but ulargha.

³⁷Qiz-oghullirini atidi qurbanliqqa,

bëghishlap ularni jin-sheytangha.

³⁸Atap Ken’andiki butlargha,

ular tökti qiz-oghullirining

bigunah qanlirini,

qanlar bulghidi zëminni.

³⁹Pahishe ayaldek boldi ularning ishliri,

bulghidi ularni öz qilmishliri.

⁴⁰Perwerdigar özi tallighan xelqige ghezeplendi,

peqet özigila tewe bolghan qowmidin nepretlendi.

⁴¹Shunga ularni tashlap berdi yat ellerning qoligha,

öchmen bolup kelgenler hökümranliq qildi ulargha.

⁴²Reqibliri qolida ëzildi ular,

qeddini püküp, bëshini egdi yawlar.

⁴³Talay qëtim qutquzsimu ularni Perwerdigar,

emma qesten boysunushni ret qilip kelgech,

boldi gumran axirda gunahliri sewebidin ular.

⁴⁴Shundaqtimu ularning peryadini anglighanda,

rehimdillik bilen nezer saldi Xuda japalirigha.

⁴⁵Ular üchün Perwerdigar ehdisini ësige ëlip,

mëhir-muhebbiti birle burunqi niyitidin yënip,

⁴⁶ulargha rehim-shepqet qildurdi,

ularni esir alghuchilarning diligha sëlip.

⁴⁷I Xudayimiz Perwerdigar, qutquzghin bizni,

qayta yighip ekelgin yurtimizgha bizlerni.

Shunda sëni medhiyeleyli, küyleyli,

shu muqeddes naminggha shükür-rehmet ëytayli.

⁴⁸Medhiyelengey menggüdin-menggüge,

isra’illarni tallighan Perwerdigar!

Xalayiqlar “amin” dësun birlikte!

Perwerdigargha hemdusana oqunglar!

107

5-bölek

¹Shükür ëytinglar Perwerdigargha, shapa’etliktur Perwerdigar,

uning mëhir-muhebbiti menggülükke dawam qilar.

²Ëytinglar bu medhiyeni Perwerdigar qutquzghanlar,

bayan qilinglar yaw qolidin qutquzulghanlar.

³Ëytinglar bu medhiyeni her yurtlardin yighilghanlar –

sherq, gherb, jenub, shimaldin kelgenler.

⁴Beziliri këzip adem ayagh basmighan bayawanni,

tapalmidi adem makan tutqan hëchbir yerni.

⁵Ular ach, ussughanidi,

ümidliri üzülgenidi.

⁶Külpette qalghinida nida qilghanidi Perwerdigargha,

Perwerdigar chiqardi ularni külpettin azadliqqa.

⁷Tapquche ular makanlashqudek bir yerni,

tüz yolgha bashlidi Xuda ularni.

⁸Shükür ëytsun ular Perwerdigargha,

uning menggülük muhebbitige,

insanlargha körsetken möjizilirige.

⁹U qandurghuchidur ussuzluqini changqighanlarning,

u toydurghuchidur ësil nëmetler bilen qorsiqini achlarning.

¹⁰Beziler zulmet qarangghuluqta yashighanidi,

ular kishenlinip, azab chekken mehbuslar idi.

¹¹Chünki ular yerge urup Xudaning emrlirini,

közge ilmighanidi ulugh Xudaning körsetmilirini.

¹²Derd tartquzup kemter qildi Xuda ularni,

yiqilsimu ger ular chiqmidi yöleydighan hëchbiri.

¹³Külpette qalghinida nida qilghanidi Perwerdigargha,

Perwerdigar chiqardi ularni külpettin azadliqqa.

¹⁴Qarangghu zulmettin chiqardi ularni,

sundurup zenjir-asaretlirini.

¹⁵Shükür ëytsun ular Perwerdigargha,

uning menggülük muhebbitige,

insanlargha körsetken möjizilirige.

¹⁶Pachaqlap tashlidi u tuch derwazilarni,

chëqip tashlap tömür taqaqlarni.

¹⁷Beziler hamaqet boldi gunahliridin,

duchar boldi azablargha qebihlikliridin.

¹⁸Yëmekliklerdin bolup bizar,

bërip qaldi ölüm girdabigha ular.

¹⁹Külpette qalghinida nida qilghanidi Perwerdigargha,

Perwerdigar chiqardi ularni külpettin azadliqqa.

²⁰Këselliri tëpip shipa Xudaning kalamidin,

qutquzdi ularni ölüm girdabidin.

²¹Shükür ëytsun ular Perwerdigargha,

uning menggülük muhebbitige,

insanlargha körsetken möjizilirige.

²²Sunup Xudagha minnetdarliq qurbanliqini,

medhiyege qëtinglar uning karametlirini.

²³Beziler olturup këme-paraxotlarda,

tirikchilik qilatti dëngizlarda.

²⁴Guwahchidur ular Perwerdigarning qudritige,

chongqur dëngizlarda körsetken karametlirige.

²⁵Emri bilen hörkiritip boranlarni,

peyda qilghanidi u dolqunlarni.

²⁶Këmiler gah kötürülüp asman-pelekke,

gah chüshkinide dolqun tektige,

ular xeterdin chüshkenidi sarasimige.

²⁷Ular goya mestlerdek deldengshiytti,

hëchqandaq chare-amali qalmighanti.

²⁸Külpette qalghinida nida qilghanidi Perwerdigargha,

Perwerdigar chiqardi ularni külpettin azadliqqa.

²⁹U boranni toxtatti,

dolqunlarmu tinchidi.

³⁰Shadlandi ular tinchitqachqa dolqunni,

nishan qilghan portqa yëteklidi Xuda ularni.

³¹Shükür ëytsun ular Perwerdigargha,

uning menggülük muhebbitige,

insanlargha körsetken möjizilirige.

³²Ular xelq arisida ulughlisun Xudani,

aqsaqallar mejliside medhiyelisun Xudani.

^33-34Gunah qilsa bu yerning ademliri,

bayawangha aylandurular deryaliri,

süyi tügep qaghjirar bulaqliri,

shorluq tupraq bolar munbet yerliri.

³⁵U yene köl qilar chöl-bayawanni,

bulaqlargha aylandurar changqaq yerlerni.

³⁶Achlarni jaylashturup ashu yerge,

aylandurar u yerni bir sheherge.

³⁷Üzüm tikip, yer tërip ular,

alidu mol hosullar.

³⁸Beriket bergech ulargha Perwerdigar,

zor kölemde sani awup ularning,

ziyade bolar ularda mal-waranlar.

³⁹Zulum, külpet, derd sëlip düshmenliri,

nawada xorlinip, aziyip ketse sanliri,

⁴⁰yaw hökümdarlirini shermende qilip Perwerdigar,

ularni desht-chöl, bayawanda sersan qilar.

⁴¹Zulumdin azad qilip miskinlerni,

qoy padisidek köp qilidu ewladlirini.

⁴²Buni körüp shadlinidu heqqaniylar,

aghzi ëtilip, ünsiz turar pasiqlar.

⁴³Köngül qoysun bu ishlargha eqli barlar,

Xudaning menggülük muhebbitini chüshensun ular.

108

Dawut yazghan mungluq munajat

¹Ishenchim kamildur sanga, i Xuda!

Pütün qelbim bilen medhiye oquymen naxshamda.

²Ey lira,^* chiltar oyghan emdi,

qeside oqup oyghitayli tangni.

³I Perwerdigar, shükürler ëytip sanga,

küyleymen sëni xelqler, yat eller ara.

⁴Chünki menggülük muhebbiting asmandin bipayan,

sadaqiting shunche moldur, bulutlargha taqashqan.

⁵I Xuda, ulughluqung körsitilgey asman-pelekte,

shan-sheriping namayan bolghay pütkül yer yüzide.

⁶Du’ayimni qilip ijabet, qutquz bizni ong qolungda,

özüng söygen bendiliring nijatliq tapar shunda.

⁷Xuda mundaq dëdi öz muqeddesliki bilen:

“Shadliqta xelqimge bölüp bërimen Shekem diyarini,

teqsim qilip bërimen Sukkot wadisini.

⁸Gil’ad rayoni mensuptur manga,

Manassemu hem te’elluq manga.

Efrayim – bëshimdiki dubulghamdur,

Yehuda mëning seltenet hasamdur.

⁹Put yuyidighan qachidur Mo’ab manga,

choruqumni tashlaymen Idomgha.

Chuqan salimen,

Filistiye üstidin ghelibe qilghinimgha.”^*

¹⁰Kim mëni Idomgha zeper bilen bashlap kirer?

Kim mëni u mustehkem sheherge bashlap barar?

¹¹I Xuda, bizdin waz kechtingmu?

Biz bilen birge bolmiding jengdimu?

¹²Düshmenge qarshi bizge bol yardemde,

bihudidur zeper qazinish insanning yardimide.

¹³Xudaning qudriti bilen jeng qilimiz baturlarche,

igem özi dessep cheyler düshminimiz tügigüche.

109

Dawut yazghan munajat bolup, naxsha qilip ëytilsun dep, neghmichiler bëshigha tapshurulghan.

¹I medhiyemning igisi Xuda,

süküt qilip, ünsiz turma.

²Haqaret qilmaqta reziller manga,

yalghanchi tilida chaplap qara.

³Nepretlik sözliri aldi mëni qorshawgha,

sewebsiz hujum qilip ular manga.

⁴Muhebbitimni bersemmu men ulargha,

shikayetler qildi ular qarshi manga,

shundaqtimu ular üchün qilimen du’a.

⁵Yaxshiliqimgha berdi yamanliqni,

söygümge berdi nepretni.

⁶Bir rezil adem eyiblisun uni sotta,

dewagerdin birsi bolsun ong yënida.

⁷Eyibkar bolup chiqsun u soraqta,

du’asimu gunahliq bolsun hetta.

⁸Ömri qisqa bolsun,

mensipini bashqisi alsun.

⁹Baliliri yëtim bolsun,

xotuni tul qalsun.

¹⁰Oghulliri ghëribane öyidin ayrilip sergerdan bolsun,

yaqa yurtlarda rizqini izdep tilemchi bolsun.

¹¹Tartiwalsun jazanixorlar mal-mülkini,

buliwalsun yatlar hemme bisatlirini.

¹²Mëhribanliq körsetmisun uninggha hëchkim,

köngül bölüp yürmisun balilirigha birkim.

¹³Qurutulup uning nesli,

qalmisun këyinki ewladliri.

¹⁴Ejdadlirining qebihliki yadida bolsun Xudaning,

untulmisun gunahliri hem anisining.

¹⁵Xudaning köz aldida bolsun da’im gunahliri,

yer yüzidin yoq qilsun Perwerdigar uning namini.

¹⁶Chünki u mëhribanliq körsetmestin bashqilargha,

öltürmek boldi, belki sëlip zulum

ëzilgen, dili sunuq, yoqsullargha.

¹⁷U xushtar idi lenet oqushqa,

shunga lenet kelsun uning bëshigha.

Rayi yoq idi bext tileshke,

shunga bext yiraq bolsun uninggha.

¹⁸U özige kiyim qilip kiyidu lenetlerni,

lenetliri aqqan sudek kirsun ichige,

singip ketsun may kebi söngeklirige.

¹⁹Lenetliri oriwalsun uni tonidek,

da’im bëlini baghliwalsun belbëghidek.

²⁰Perwerdigar ene shundaq jazalisun shikayette bolghanlarni,

edeplisun, yaman sözler bilen manga hujum qilghanlarni.

²¹I Rebbim Perwerdigar,

namingning hörmiti üchün yardem qil manga,

qutquz mëni, menggülük muhebbiting bolghach ela.

²²Chünki men hajetmen, bichare,

derdimmu jiq ichimde.

²³Hayatimmu ghuwalashti gugumdiki kölenggidek,

chetke qëqildim qëqiwëtilgen chëketkidek.

²⁴Roza tutup putumning madari ketti,

tënim jüdep, harghinliq yetti.

²⁵Düshmenlirim aldida boldum reswa,

bëshini chayqar ular manga qarashqanda.

²⁶Perwerdigar, i Rebbim yardem qil manga,

qutquz mëni, menggülük muhebbet sende bolghachqa.

²⁷Ular bilsun bu ishni sëning qilghanliqingni,

manga nijatkar bolghuchining Perwerdigar ikenlikini.

²⁸Meyli ular oquwersun lenet manga,

biraq sen ata qilisen bext manga.

Hujum qilsa ular xijalette qalar,

emma menki qulung shadliqqa tolar.

²⁹Reqiblirim kiyim qilsun xijaletni,

ton qilip yëpinsun nomusni.

³⁰Perwerdigargha shükür ëytimen,

uni awam ichide medhiyeleymen.

³¹Chünki u turar mohtajlarning ong yënida,

ularni ölümge mehkum qilghanlardin qutquzushqa.

110

Dawut yazghan munajat

¹Perwerdigar ëyttiki Igemge:

“Olturghin sen mëning ong yënimda,

men dessetküche düshmenliringni ayighing astigha.”

²Perwerdigar zoraytar hökümranliqingni Si’ondin,

derki u: “Sen höküm sürgin düshmenliring üstidin.”

³Sen jeng qilidighan küni qoshunliringni yighqanda,

teqwadarliring chiqar öz ixtiyarliqida.

Sübhide këlur newqiranlar aldinggha,

xuddi shebnem chüshkendek sen turghan taghqa.

⁴Perwerdigar özgertmes qilghan munu qesimini:

“Menggülük rohaniydursen Malkisidiqning^* qataridiki.”

⁵I Perwerdigar, turar Igem sëning ong teripingde,

padishahlarni bitchit qilar ghezipini körsetken künide.

⁶U höküm chiqirar xudasiz xelqlerge,

bashlirini kukum-talqan qiliwëter yer yüzide,

ularning zëminini toldurar jesetlerge.

⁷Igem yol üstide bulaqtin su icher,

küch-quwwet ëlip, meydisini ëgiz kötürer.

111

¹Hemdusana oqunglar Perwerdigargha!

Heq yoldiki jama’et arisida,

shükür ëytimen ixlas bilen Xudagha.

²Ulughdur Perwerdigarning biz üchün qilghanliri,

buni tilgha ëlishar ularning qedrini bilgenliri.

³Perwerdigarning ejri heywet, sherepliktur,

uning heqqaniyliqi menggülükke dawam qilur.

⁴Möjizilirini kishilerning ësige salar,

rehimdil, shepqetliktur Perwerdigar.

⁵Xuda bërer ixlasmenlirining rizqini,

ta’ebed ëside tutar öz ehdisini.

⁶Perwerdigar körsetti öz qowmigha qudritini,

ëlip bërip ulargha yatlarning zëminini.

⁷U adil, wapadar herbir ishida,

ishench bardur yolyoruqlirida.

⁸Dawamlishar ular menggü, ta’ebedke,

orundilar ular durus, sadaqetlikte.

⁹Muqeddes, sürlüktur Xuda!

Qutulush berdi öz qowmigha,

ehdisini bëkitti hem menggüge.

¹⁰Danaliq Perwerdigargha ixlasmenliktin bashlinur,

emrige emel qilghuchilar hëkmetlik bolur.

Perwerdigargha atalghan hemdusanalar menggülük bolur.

112

¹Perwerdigargha hemdusana oqunglar!

Neqeder bextliktur Perwerdigargha ixlasi barlar,

uning emrlirige boysunushtin söyünidighanlar.

²Küchlük bolar zëminda ularning ewladliri,

bextliktur durus yolda mangghanliri.

³Öyliri bayliqqa tolup, döletmen bolar,

ularning heqqaniyliqi menggülük bolar.

⁴Qarangghuluqta nur chëchilar durus yolda mangghanlargha,

rehimdil, shepqetlik, heqqaniydur Xuda.

⁵Saxawetlik, merd adem bextlik bolar,

adil ish qilidighanlar ronaq tapar.

⁶Heqqaniylar ebediy meghlup bolmas,

heqqaniylar menggüge untulmas.

⁷Qorqup ketmes shum xewer kelse ulargha,

köngli toqtur ularning tayanghach Perwerdigargha.

⁸Iradisi mustehkemdur ularning,

qorqmaydu esla,

körer meghlubiyitini düshmenlirining.

⁹Sëxiydur ular, yoqsullargha bërer sediqe,

menggü untulmas heqqaniyliqi ularning,

qudret tëpip, na’il bolar hörmitige kishilerning.

¹⁰Buni körüp chidimaydu reziller,

achchiqida öz göshini özi yer,

ze’ipliship ümidliri üzüler.

113

¹Perwerdigargha hemdusana oqunglar!

Ey uning qulliri, uni medhiyelenglar,

Perwerdigar namigha medhiyeler ëytinglar.

^2-3Teriplensun nam-shöhriti Xudaning

hazirmu we këyinmu ta adaqqiche.

Medhiyelensun nam-shöhriti Xudaning

sübhi-tangdin taki gugum-shamghiche.

⁴Hökümranliq qilar Xuda barche insan üstidin,

shan-sheripi büyüktur, üstün turar pelektin.

^5-6Hëchkim teng bolalmas igimiz Perwerdigargha,

kimmu oxshar u samawi textte olturup,

asman-zëmingha yuqiridin nezer salghuchigha?

⁷U qutquzar yoqsullarni yoqsulluq tozanidin,

ëlip chiqar u mohtajlarni mohtajliq ewrizidin.

⁸Olturghuzar ularni shahzadiler qëshigha,

hetta öz xelqining shahzadiliri yënigha.

⁹U shadliq bëghishlar tughmas ayalgha,

öz öyide quchiqini toldurar baligha.

Hemdusana oqunglar Perwerdigargha.

114

¹Isra’illar Misirdin chiqqinida,

Yaqup ewladi yat xelqlerdin ayrilghinida,

²Yehuda neslini makan qildi Xuda,

Isra’illar Xudaning ilkidiki xelq idi.

³Dëngiz buni bilip yandi arqigha,

I’ordan deryasi burulup keynige aqti.

⁴Taghlar chöchüp sekridi qochqarlardek,

dönglermu ürküdi qozilardek.

⁵Ey dëngiz, nëmishqa qachisen?

Ey I’ordan deryasi, nëmishqa keyningge aqisen?

⁶Ey taghlar, nëmishqa sekreysiler?

Ey döngler, nëmishqa ürküysiler?

⁷Ey zëmin, tewren Rebbingning siymasidin,

Yaqup ëtiqad qilghan Xudaning kelginidin.

⁸U tashni kölchekke aylandurdi,

uyul tashtin bulaqni peyda qildi.

115

¹Bolmisun bizge i Perwerdigar, bolmisun bizge,

bolsun mensup shan-shöhret peqet özüngge,

chünki menggülük muhebbet we

cheksiz sadaqitingni körsetting bizge.

²Mesxire qiliship bizni yat xelqler,

“Qëni ularning Xudasi” dëyisher.

³Bizning Xudayimiz ersh’elada turar,

nëme qilishni xalisa shu ishni qilar.

⁴Yat xelqlerning ilahliri altun-kümüsh buttur peqet,

ularni insan öz qolida qilidu ijad.

⁵Ularning ëghizliri turup sözliyelmes,

közliri turup hëchnëmini körelmes.

⁶Qulaqliri tursimu angliyalmas,

burni turupmu hëchnëmini puriyalmas.

⁷Qolliri bolsimu, ular tutalmas,

putliri bolsimu, mangalmas.

Kanayliridin awaz chiqiralmas.

⁸Butlarni yasighanlar we ulargha ümid baghlighanlar,

özliri axiri butlirigha oxshap qalar.

⁹Ey Isra’il ewladliri, tayininglar Igimizge,

u yölenchük, qalqandur silerge.

¹⁰Ey Harun jemeti,^* tayininglar Igimizge,

u yölenchük, qalqandur silerge.

¹¹Ey Perwerdigargha ixlasi barlar,

tayininglar Igimizge.

U yölenchük, qalqandur silerge.

¹²Perwerdigar bizni yad ëter,

isra’il ewladigha beriket bërer,

Harun jemetige beriket bërer.

¹³Hemmisi Perwerdigargha ixlas qilsa eger,

kichikidin-chongighiche beriket bërer.

¹⁴Igimizdin siler we ewladliringlargha,

hessilep bext-sa’adet yaghqay da’ima.

¹⁵Yaratquchi Perwerdigar asman we zëminni,

silerge ata qilghay cheksiz bextni.

¹⁶Asmanlar te’elluqtur Perwerdigargha,

zëminni u bergen insanlargha.

¹⁷Ölükler süküttidur qebrilikte,

medhiyeler bolmas görde Igimizge.

¹⁸Lëkin biz bügün we ta’ebedke,

Rebbimizni teripleymiz menggüge.

Hemdusana oquyli Igimizge!

116

¹Men söyimen Perwerdigarni,

chünki u anglar nidayimni,

anglar mëning ötünüshümni.

²Qulaq salghach u manga,

ömürwayet nida qilimen uninggha.

³Ölüm asaretliri chirmidi mëni,

göristan wehimisi qapsidi mëni,

qayghu, hesret ilkige aldi mëni.

⁴Nida qildim tilgha ëlip Perwerdigar namini,

“Qutquzghin dep Perwerdigar jënimni.”

⁵Perwerdigar shepqetlik, heqqaniydur,

u bizning Xudayimiz rehimdildur.

⁶Perwerdigar panahida saqlaydu panahsizni,

u bëshimgha kün chüshkende qutquzdi mëni.

⁷Hey qelbim, qaytqin emdi aramgahinggha,

chünki Perwerdigar iltipat eylidi manga.

⁸I Xuda, saqliding ölümdin jënimni,

yigha-zar qilishtin közlirimni,

putliship këtishtin putlirimni.

⁹I Perwerdigar, sen üchün yashaymen paniy alemde.

¹⁰Shunche xar bolsammu yenila,

ishench baghlidim men sanga.

¹¹Lëkin dëdim men teshwish ara:

“Yalghanchidur hemme insanlar.”

¹²Perwerdigarning manga qilghan iltipatigha,

qandaq jawab qilay uninggha?

¹³Nijatliq qedihini sundum Xudagha,

shükür ëytip uning namigha.

¹⁴Perwerdigarning xelqi aldida,

qesimimni qilimen ada.

¹⁵Ölüp ketse teqwadar bendiliri,

Perwerdigar etiwarlar ularning ölümini.

¹⁶I Perwerdigar, men sëning qulungdurmen,

berheq, sëning pëqir qulungdurmen.^*

Azad qilding mëni özüng asarettin.

¹⁷Shükür qurbanliqi sunimen sanga,

shükür ëytimen naminggha, i Xuda.

¹⁸Perwerdigarning xelqi aldida,

qesimimni qilimen ada.

¹⁹Ibadetxanining hoyla-aramlirida,

ey Yërusalëm, turup sëning otturangda,

qesimimni qilimen ada.

Hemdusana oqunglar Perwerdigargha.

117

¹Ey jahan ehli, medhiyelenglar Perwerdigarni,

ey pütkül qowmlar, alqishlanglar Xudani.

²Büyüktur uning menggülük muhebbiti,

menggülükke dawam qilar wapadarliqi,

hemdusana oqunglar Perwerdigargha.

118

¹Shükür ëytinglar Xudagha, shapa’etliktur Perwerdigar,

uning mëhir-muhebbiti menggüge dawam qilar.

²“Uning mëhir-muhebbiti menggülük” dësun Isra’illar.

³“Uning mëhir-muhebbiti menggülük” dësun Harun jemetige tewe bolghanlar.

⁴“Uning mëhir-muhebbiti menggülük” dësun Perwerdigargha ixlasi barlar.

⁵Nida qildim Perwerdigargha kün chüshkende bëshimgha,

nidayimgha jawaben nijatliq berdi manga.

⁶Qorqmaymen, men terepte Perwerdigar,

nëme qilalisun mëni insanlar!

⁷Men tereptidur yölenchüküm Perwerdigar,

köz aldimda meghlup bolar manga öch bolghanlar.

⁸Bashpanah qilmaq Perwerdigarni,

ewzeldur yölenchük qilishtin insanni.

⁹Bashpanah qilmaq Perwerdigarni,

ewzeldur tayanch qilmaqtin hakimlarni.

¹⁰Qorshiwalghan bolsimu barliq yat eller mëni,

Perwerdigarning yardimide meghlup qildim men ularni.

¹¹Shundaq, qorshap turghan bolsimu etrapimni,

Perwerdigarning yardimide meghlup qildim men ularni.

¹²Qorshiwalghan bolsimu ular mëni herilerdek,

öchürüldi shunche tëzdin qurghaq tiken otidek.

Perwerdigarning yardimide meghlup qildim men ularni.

¹³Yiqilghili tas qalghanidim ittirilgende,

biraq, men yiqilmidim Perwerdigarning yardimide.

¹⁴Perwerdigar munajitim we küch-qudritim,

boldi u mëning nijatkarim.

¹⁵Heqqaniylarning chëdirlirida nijatliq tentenisi yangrimaqta,

Perwerdigarning küchlük ong qoli zeper quchmaqta.

¹⁶Perwerdigarning küchlük ong qoli ghelibe qilmaqta,

Perwerdigarning küchlük ong qoli zeper quchmaqta.

¹⁷Men ölmeymen, belki yashaymen,

Perwerdigarning möjizilirini bayan eyleymen.

¹⁸Mëni qattiq jazalighan bolsimu Perwerdigar,

emma tashlap qoymidi ölümge zinhar.

¹⁹Heqqaniylar kiridighan derwazini ëchip bëringlar manga,

men kirip, shükür ëytimen Perwerdigargha.

²⁰Derwazisidur bu Perwerdigarning,

kirish yolidur heqqaniylarning.

²¹Sanga shükür ëytimen Xuda,

chünki manga jawab bërip

nijatkar boldung manga.

²²Këreksiz bilingen tash tamchilargha,

ultash boldi qurulushqa.

²³Perwerdigarning qilghan ishidur bu,

köz aldimizda karamet boldi u.

²⁴Perwerdigar yaratqan mushu künde,

xushalliqqa tolayli qilip tentene.

²⁵I Perwerdigar, ötüney, qutquzghin bizni,

ötüney, muweppeqiyetlik qilghaysen ishimizni.

²⁶Bext yar bolghay Perwerdigarning namida kelgüchige,

bext tileymiz Perwerdigarning öyidin silerge.

²⁷Perwerdigar^* – yaratquchidur,

birdinbir yëganidur.

U chachar nurini üstimizge.

Qurbanliqni baghlanglar tanilar bilen

qurbanliq supisining burjeklirige.

²⁸Sen mëning Ilahimsen, shükür ëytimen,

sen mëning Ilahimsen, ulughlaymen.

²⁹Shükür ëytinglar Xudagha, shapa’etliktur Perwerdigar,

uning mëhir-muhebbiti menggüge dawam qilar.

119

¹Neqeder bextliktur durus yolda mangidighanlar,

Perwerdigarning telimliri boyiche yashaydighanlar.

²Bextliktur yene uning perzlirini tutup,

pütün qelbi bilen uninggha telpünidighanlar.

³Naheqchilik qilmas ular esla,

mangar ular Perwerdigarning yolida.

⁴Perwerdigar chüshürdüng emrliringni,

estayidil orundanglar dep ularni.

⁵Qararlirim qet’iy bolghay mëning,

permanliringgha emel qilishqa sëning.

⁶Köngül bölsem emrliringge,

qalmasmen esla shermendilikke.

⁷Medhiyeleymen pak qelbimdin sëni,

ögenginimde adil hökümliringni.

⁸Permanliringgha emel qilimen,

mëni hergiz tashliwetmigin.

⁹Yash yigit qandaq qilip pak yolda mangalar?

U peqet kalaminggha emel qilghanda bolar.

¹⁰Pütün qelbim bilen telpündüm sanga,

heq yolungdin ëzishqa yol qoyma manga.

¹¹Niyet qilip gunahkar bolmasliqni,

saqlidim qelbimde ching sözliringni.

¹²Hemdusana bolsun Perwerdigar sanga,

ögetkeysen nizamliringni manga.

¹³Bayan qilimen hökümliringni,

jakarlaymen telimliringni.

¹⁴Ademler xursen bolghandek bayliqliridin,

shadlinimen özüm perzliringdin.

¹⁵Chongqur pikir qilimen nizamliring üstide,

oylinimen yol-qediming heqqide.

¹⁶Söyündürdi nizaming mëni,

untumaymen kalamingni.

¹⁷Shepqitingni körsetseng men qulunggha,

shunda men hayat yashap, emel qilay kalaminggha.

¹⁸Achqin mëning közlirimni,

körey telimliringdiki karametlerni.

¹⁹musapirmen zëminda,

emringni yoshurma.

²⁰Yürikim ëzilmekte,

telpünüshtin hökümüngge.

²¹Eyiblersen lenetke uchrighan tekebburlarni,

emringdin ëzip ketken meghrurlarni.

²²Ëlip tashla mendin xorluq, mesxirilerni,

chünki ada qilip keldim perzliringni.

²³Topliship manga suyiqest qilsimu hökümranlar,

pëqir qulung nizamliring heqqide yenila oylinar.

²⁴Perzliring söyünishimdur,

hem mëning meslihetchimdur.

²⁵Qara tupraq qoynigha almaqchi mëni,

wedengge wapa qilip qutquzghin hayatimni.

²⁶Bayan qilsam sanga yürgen yollirimni,

jawab berding, öget manga nizamliringni.

²⁷Telimingni chüshinishke qadir qil mëni,

shunda xiyal qilalaymen karamet ishliringni.

²⁸Ghem-ghussilar destidin harduq yetti jënimgha,

kalaminggha asasen küch-qudret bergin manga.

²⁹Hiyle-mikir yolidin nëri qil mëni,

iltipat eylep öget manga telimliringni.

³⁰Tallidim men sadaqet yolini,

köz aldimda tutimen hökümliringni.

³¹Perwerdigar, ching tutimen perzliringni,

shermendilikte qoymighin mëni.

³²Qizghin ada qilimen sëning emrliringni,

chünki shundaq qilishqa qadir qilding mëni.

³³Perwerdigar, chüshendürgin emrliringni,

axirghiche ijra qilay ularni.

³⁴Qelbimni yorutqaysen, yolungni tutay,

pütün wujudum bilen ulargha emel qilay.

³⁵Emrliringge boysunidighan qilghin mëni,

chünki söyimen sëning yolungda mëngishni.

³⁶Mayil qilmay qelbimni menpe’etlerge,

belki xushtar qilghin sëning perzliringge.

³⁷Nezirimni yiraq qilip saxtiliqtin,

öz yolung bilen mëni rohlandurghin.

³⁸Emelge ashursang qulunggha bergen wedengni,

xelqler tëximu hörmetler sëni.

³⁹Qorqimen, yiraq qil mendin haqaretlerni,

berheq, ela bilimen hökümliringni.

⁴⁰Neqeder telpünimen yolyoruqliringgha,

mëni rohlandurghin heqqaniyliqingda.

⁴¹I Perwerdigar, körsitip menggülük muhebbitingni,

ata qil manga wede qilghan nijatliqingni.

⁴²Shunda jawab bëreleymen manga haqaret qilghanlargha,

chünki men tayinimen peqet sëning kalaminggha.

⁴³Bergin manga heqiqiy guwahliqning pursitini,

baghlighanmen peqet sëning hökümingge ümidimni.

⁴⁴Boysunimen da’ima telimliringge,

ri’aye qilimen hem menggüge.

⁴⁵Men erkin, bixetermen hemme jaylarda,

chünki ita’et qilip keldim yolyoruqliringgha.

⁴⁶Perzliringni sözleymen shahlar aldida,

reddiyege uchrap nomusta qalmasmen esla.

⁴⁷Emrliringdin xursen bolurmen,

hem ularni shunche söyermen.

⁴⁸Emrliringni hörmetlep qolum turar köksümde,

oylinimen men söygen permanliring heqqide.

⁴⁹Untumighin men qulunggha bergen wedengni –

manga ümid bëghishlighan ashu kalamingni.

⁵⁰U manga tesellidur külpette qalghinimda,

yëngi roh ata qilar wedeng manga.

⁵¹Mesxire qilsimu mëni da’im tekebburlar,

lëkin sëning telimliringdin aghmidim zinhar,

⁵²eslisem qedimdin buyanqi hökümliringni,

i Perwerdigar, bërer ular manga tesellini.

⁵³Terk etkech reziller telimliringni,

basalmaymen ulargha bolghan ghezipimni.

⁵⁴Yürsemmu ger musapir bolup paniy dunyada,

permanliring boldi manga güzel bir naxsha.

⁵⁵I Perwerdigar, ri’aye qilimen telimliringge,

yad ëtimen namingni herbir këchide.

⁵⁶Ri’aye qilip keldim sëning yolyoruqliringgha,

bundaq qilish bext ëlip keldi manga.

⁵⁷Nësiwem dep bilimen Perwerdigar bir özüngni,

wedem bar ching tutushqa kalamingni.

⁵⁸Chin qelbimdin istep keldim shepqitingni,

körset manga wede qilghan iltipatingni.

⁵⁹Nezer sëlip mëngiwatqan yolumgha,

qedimimni buridim perzliring tamanigha,

⁶⁰aldiridim,

emrliringni ijra qilishqa,

hem hëch ikkilenmidim.

⁶¹Ger reziller chirmiwalsimu arghamchilar bilen mëni,

untumasmen esla sëning telimliringni.

⁶²Adalet bolghach hökümliringde

hemdusana oquymen sanga,

ornumdin turup yërim këchide.

⁶³Dostturmen sanga ixlas qilghanlargha,

shërikmen yolyoruqliringgha ri’aye qilidighanlargha.

⁶⁴Menggülük muhebbitingge tolghandur zëmin,

i Perwerdigar, nizamliringni manga ögetkin.

⁶⁵Özüng bergen wedengge asasen,

qulunggha yaxshiliq qilding sen.

⁶⁶Eqil we bilim bergeysen manga,

chünki men ishendim permanliringgha.

⁶⁷Azghun idim sen mëni jazalashtin ilgiri,

ching tutimen ësimde emdi sëning sözüngni.

⁶⁸Neqeder shapa’etliksen, ayimiding yaxshiliqingni,

ögetkin manga nizamliringni.

⁶⁹Tekebburlar chaplisimu yalghandin bohtan manga,

emma chin qelbimdin boysunimen yolyoruqliringgha.

⁷⁰Bixudlashqan ularning qelbi ezeldin,

men bolsam söyünimen telimingdin.

⁷¹Tartqan japalirim paydiliq boldi manga,

chünki mëngishni ögendim permanliring yolida.

⁷²Ëytqan telimliringni bilimen ela,

minglighan altun-kümüshtin hetta.

⁷³Qolliring yaratti, yasidi mëni,

eqil ber manga, chüshiney emrliringni.

⁷⁴Mëni körüp xush bolar ixlasi barlar sanga,

chünki men ümidimni baghlighanmen kalaminggha.

⁷⁵Bilimen hökümliringning adilliqini,

sadaqiting bilen jazaliding mëni.

⁷⁶Bergen wedeng boyiche men qulunggha,

menggülük muhebbiting teselli bolsun manga.

⁷⁷Rehim qilip, saqlighaysen hayatimni,

shadliqim dep bilip keldim telimliringni.

⁷⁸Shermende bolsun tekebburlar,

sewebsizla manga naheqchilik qilghanlar,

oylirim peqet telimliring heqqide bolar.

⁷⁹Sanga ixlas qilidighanlar kelsun yënimgha,

perzliringni ögitimen ulargha.

⁸⁰Semimiy ijra qilay permanliringni,

shermendilikte qoymas ular mëni.

⁸¹Zariqimen nijatliqinggha,

ümidimni baghlighach kalaminggha.

⁸²Sëni “qachan teselli bërerkin” dep,

zariqishtin taldi közler wede kütüp.

⁸³Oxshap qalsammu ger ista qurighan këreksiz tulumgha,

her dem ching saqlidim permanliringni yadimda.

⁸⁴Qachanghiche kütküzersen men qulungni,

qachanliqqa jazalarsen manga ziyankeshlik qilghanlarni?

⁸⁵Tekebburlar men üchün ora kolar,

ular sëning telimingge qarshi chiqar.

⁸⁶Ishenchliktur emrliringning hemmisila,

yardem qil, düshmenler sewebsiz ziyankeshlik qilmaqta manga.

⁸⁷Yer yüzidin yoq qilay dep qalsimu ular mëni,

emma terk etmidim yolyoruqliringni.

⁸⁸Rohlandurghin mëni menggülük muhebbitingde,

boysunay sëning bergen perzliringge.

⁸⁹I Perwerdigar, kalaming menggülüktur,

u ershte mukemmel pütülgendur.

⁹⁰Ewladtin-ewladqiche bildürdüng sadaqitingni,

ornatting öz ornigha mustehkem qilip yerni.

⁹¹Emring bilen mewjut bolup turmaqta pütün dunya,

chünki pütkül mewjudat quldur sanga.

⁹²Shadlanmighan bolsam eger telimliringdin,

halak bolar idim azab-oqubetlerdin.

⁹³Untumasmen esla sëning yolyoruqliringni,

chünki ular rohlandurdi hayatimni.

⁹⁴Men sanga mensupturmen, qutquz mëni,

chünki ijra qilip keldim yolyoruqliringni.

⁹⁵Peyt kütsimu reziller weyran qilmaqqa mëni,

emma dilimda saqlaymen yenila perzliringni.

⁹⁶Kördüm men chekliklikini hemme nersining,

emma kemtüki yoqtur emrliringning.

⁹⁷Shu qeder söyimen telimliringni,

yad ëtimen künboyi ularni.

⁹⁸Reqibimdin dana boldum emring bilen,

chünki teliming birge bolghach da’im men bilen.

⁹⁹Eqil-idrak ustazlirimdin köprek boldi mende,

chünki chongqur tepekkur qildim emrliring heqqide.

¹⁰⁰Aqsaqallardinmu danaliqraq boldum,

chünki yolyoruqliringgha boysundum.

¹⁰¹Ela bilip kalaminggha egishishni,

ret qilip keldim hemme rezillikni.

¹⁰²Hökümliringdin qëyip ketmidim,

chünki özüng bergensen telim.

¹⁰³Kalaming shërin tëtidi tilimgha,

heseldin tatliq tuyuldi aghzimgha.

¹⁰⁴Dana bolurmen yolyoruqliringdin,

nepretlinimen shunga saxta yollardin.

¹⁰⁵Chiragh bolup kalaming putlirimgha,

nur bërer u yollirimgha.

¹⁰⁶Qesem ichtim, sadiqmen qesimimge,

boysunimen adil hökümliringge.

¹⁰⁷Qaldim men qiyinchiliq, müshküllükte,

i Perwerdigar, rohlandur mëni wedeng boyiche.

¹⁰⁸Qobul qil chin dilimdin chiqqan medhiyelirimni,

i Perwerdigar, ögetkin manga telimliringni.

¹⁰⁹Hayatim bolsimu da’im xewp astida,

emma telimliringni untumasmen esla.

¹¹⁰Tuzaq qursimu men üchün gerche reziller,

yolyoruqliringdin chiqmasmen zinhar.

¹¹¹Menggülük mirastur manga perzliring,

shübhisizki, shadliqidur ular qelbimning.

¹¹²Qararim bar boysunushqa,

adaqqiche nizamliringgha.

¹¹³Öch körimen ikki yüzlimichilerni,

biraq, söyimen sëning telimliringni.

¹¹⁴Bashpanah, qalqandursen manga,

ümidim bardur sëning kalamingda.

¹¹⁵Köz aldimdin yoqilinglar, ey yamanliq qilghuchilar,

Xudayimning emrige boysunmaqqa qararim bar.

¹¹⁶Özüng wede qilghiningdek yar-yölek bol hayatimgha,

shermende qilip, qoyma mëni ümidsiz halgha.

¹¹⁷Yölenchük bolghin manga, shunda ërishey nijatliqqa,

hem köngül böley sëning permanliringgha da’ima.

¹¹⁸Neziringde erzimestur permaningdin tayghanlar,

bihudidur qanchilik neyrengwazliq qilsimu ular.

¹¹⁹Exlitini ayrighandek otta tawlap altunni,

yoq qilisen yer yüzidin rezillerning hemmisini,

men söyimen sëning barliq perzliringni.

¹²⁰Wujudum titrer qorqup sëningdin,

wehimige chüshimen hökümliringdin.

¹²¹Qildim adil, toghra ishlarni,

zalimlarning qoligha qaldurma mëni.

¹²²Kapalet bergin men qulungning bextige,

yol qoyma tekebburlarning mëni ëzishige.

¹²³Közlirim taldi sëning nijatliqinggha telmürüp,

ishenchlik wedengning emelge ëshishini kütüp.

¹²⁴Men qulunggha yetküzüp menggülük muhebbitingni,

öget manga nizamliringni.

¹²⁵Eqil-idrak bergin men qulunggha,

perzliringni chüshineleymen shundila.

¹²⁶I Perwerdigar, waqting keldi heriket qilishqa,

chünki xelq boysunmidi qanunliringgha.

¹²⁷Berheq, altundin ela bilimen emrliringni,

hetta sap altundin artuq körimen ularni.

¹²⁸Adil dep qaraymen permanliringni,

öch körimen barliq saxtiliqlarni.

¹²⁹Perzliring bolghach sëning bibaha,

boysunimen shunga men ulargha.

¹³⁰Kalamingning menisi yëshilgende, nur chachar yolimizgha,

eqil-idrak bërer u sadda insanlargha.

¹³¹Nepsimni qisar mëning teqezzaliq,

chünki bardur emringge intizarliq.

¹³²Halimdin xewer alghin körsitip shepqitingni,

namingni söygenlerge körsetkendek mëhringni.

¹³³Wedeng bar mezmut qilmaqliqqa qedimimni,

manga xoja qilip qoyma hëchbir gunahni.

¹³⁴Insanlar zulmidin qutquz mëni,

ching tutay sëning yolyoruqungni.

¹³⁵Jamalingning nurini chëchip manga,

permanliringni ögetkin men qulunggha.

¹³⁶Xelqler boysunmighach qanununggha,

köz yëshim derya bolup aqmaqta.

¹³⁷I Perwerdigar, adilsen özüng,

heqqaniy hem hökümliring.

¹³⁸Adildur buyrughan perzliring,

ishenchliktur hemmisi ularning.

¹³⁹Ghezeplirim köydürmekte tënimni,

reqiblirim mensitmigech sözüngni.

¹⁴⁰Ishenchlik bolghachqa wediliring sëning,

söyer ularni shunchilik, menki qulung.

¹⁴¹Xarlansammu këreksiz insan bolup,

qalmasmen yolyoruqliringni esla untup.

¹⁴²Menggülüktur adaliting,

heqiqettur telimliring.

¹⁴³Kelginide bëshimgha azab we külpet,

emrliring boldi manga shadliq ülpet.

¹⁴⁴Perzliring adildur ta’ebedke,

rohlinay men, nur ata qil qelbimge.

¹⁴⁵I Perwerdigar, chin qelbimdin nida qilimen sanga,

boysunimen permanliringgha, jawab ber manga.

¹⁴⁶Iltija qilimen, qutquzghin mëni,

ching tutay shunda perzliringni.

¹⁴⁷Peryad qilimen medet tilep sübhide,

ümidimni baghlighachqa peqet sëning sözüngge.

¹⁴⁸Kirpik qaqmay chiqimen këchiche,

oygha pëtip sëning wedeng heqqide.

¹⁴⁹Muhebbetlik Perwerdigar, anglighaysen awazimni,

adaletlik Perwerdigar, qutquzghin hayatimni.

¹⁵⁰Yëqinlap kelmekte manga rezil insanlar,

telimliringdin yiraqtur ular.

¹⁵¹I Perwerdigar, yëqinsen manga,

emrliringning hemmisi toghra.

¹⁵²Uzundin bëri bildimki shuni,

perzliringning menggülükini.

¹⁵³Nezer sëlip azablirimgha, qutquzghin mëni,

untumidim men sëning telimliringni.

¹⁵⁴Dewayimni qollighin, qutquzghin mëni,

wedeng boyiche saqlighin hayatimni.

¹⁵⁵Rezil insanlar nijatsiz qalar,

ëtibar bermigech emrliringge ular.

¹⁵⁶Perwerdigar, mëhir-shepqet moldur sëningde,

mëni rohlandurghin dëginingdek hökümüngde.

¹⁵⁷Bolsimu ger shunche köp ziyankeshlik qilghuchilar,

perzliringdin yüz örümesmen zinhar.

¹⁵⁸Nepretlinimen ita’etsizlerge,

ri’aye qilmighach sözliringge.

¹⁵⁹Neqeder söyimen-he, sëning yolyoruqliringni,

menggülük muhebbiting bilen rohlandur mëni.

¹⁶⁰Kalamingning asasi heqiqettur,

hökümliring adil, menggüge dawam qilur.

¹⁶¹Sewebsizla ziyankeshlik qilsimu hökümdarlar,

qelbim peqet kalamingdin qorqup turar.

¹⁶²Kalamingdin söyünüp keldim shunche,

ërishkendek ghayet zor xezinige.

¹⁶³Yirginimen yalghanchiliqtin,

söyünimen telimingdin.

¹⁶⁴Sanga her kün yette waq medhiyem bar,

berheq, hemme hökümüngge adilliq yar.

¹⁶⁵Telimingni söygenlerge amanliq bolar,

hëch nersige putliship yiqilmas ular.

¹⁶⁶I Perwerdigar, telmürüp kütimen nijatliqingni.

Ijra qilip keldim men sëning emrliringni.

¹⁶⁷Perzliringge ri’aye qilimen,

hem ularni qizghin söyimen.

¹⁶⁸Boysunimen perzliring, nizamliringgha,

berheq, hemme emellirim ayandur sanga.

¹⁶⁹Perwerdigar qulaq salghin ahuzarimgha,

wapa qilip wedengge idrak bergin manga.

¹⁷⁰Anglighaysen Perwerdigar iltijayimni,

wapa qilip kalaminggha qutquzghin mëni.

¹⁷¹Lewlirimdin urghup chiqar hemdusana,

chünki sen emrliringni ögetting manga.

¹⁷²Kalamliring küyliner tillirimda,

chünki bardur adilliq buyruqungda.

¹⁷³Teyyar qilghin yardemge qolungni,

chünki men tallighanmen yolungni.

¹⁷⁴Nijatliqinggha teshnamen Perwerdigar,

telimingdin qelbim mëning shadliqqa tolar.

¹⁷⁵Ilham ber manga, hemdusana oquy sanga,

hökümliring yardem qilsun manga.

¹⁷⁶Adashtim qoy kebi yolumdin, izde qulungni,

chünki men untumasmen emrliringni.

120

Yërusalëmdiki ibadetxanigha bërish yolida ëytilghan munajat

¹Nida qilsam Perwerdigargha,

külpette qalghinimda,

u jawab berdi manga.

²“Qutquzghin mëni i Xuda,

yalghanchi lewlerdin, aldamchi tillardin”

dep iltija qildim uninggha.

³Ey yalghanchi til!

Qandaq urar sëni Xuda?

Bërer sanga qandaq jaza?

⁴Baturlarning oqliri tëger,

archilarning choghliri köydürer.

⁵Halimgha way, musapir boldum Meshek diyarida,

bextsiz boldum Qëdarlarning chëdirida.

⁶Toydum yashashtin bu yerde,

tinchliqqa öch xelq arisida.

⁷Söyüp men tinchliqni,

dësemmu “tinchliqta yashayli” ger,

biraq ular “urushayli” der.

121

Yërusalëmdiki ibadetxanigha bërish yolida ëytilghan munajat

¹Közlirimni tikimen taghlargha,

qeyerdin këler dep yardem manga.

²Perwerdigarla qilar yardemni,

u yaratqandur asman-zëminni.

³Saqlar u tëyilishtin putliringni,

segek turup qoghdaydu sëni.

⁴Bilginki, qoghdighuchi Isra’illarni,

uxlimas, terk etkendur uyquni.

⁵Qoghdighuchingdur Perwerdigar,

ong yëningda sayiwen bolup turar.

⁶Zerer yetküzelmes sanga zinhar,

ay we quyash, këche we kündüz.

⁷Yamanliqlardin qoghdaydu Perwerdigar,

hem jëningni u aman qilar.

⁸Nezer sëlip Perwerdigar yürüsh-turushunggha,

bügündin ta’ebedkiche alar sëni öz panahigha.

122

Yërusalëmdiki ibadetxanigha bërish yolida ëytilghan, Dawut yazghan munajat

¹Shadlanghanidim, dëginide kishiler manga:

“Barayli Xudaning öyi – ibadetxanigha.”

²Ey Yërusalëm, derwazangning ichide turimiz emdi mana!

³Yërusalëm – retlik sëlinghan puxta bir sheher.

⁴Këler qowmlar, Perwerdigarning qowmliri uninggha,

këler bërilgen perman boyiche Isra’ilgha,

shükür ëytidu ular Perwerdigarning namigha.

⁵Ey Yërusalëm, höküm chiqirilsun dep sende,

text sëlindi Dawut jemetidikilerge.

⁶Yërusalëmning tinchliqi üchün mundaq du’a oqulsun:

“Sëni söygenler ronaq tapsun,

⁷qorghan ichi aman bolsun,

ordiliri awat bolsun!”

⁸Qërindash we dostlirim sende turghachqa,

tileymen: “Tinchliq bolsun Yërusalëmda”.

⁹Perwerdigarimizning öyi sende bolghachqa,

ey Yërusalëm, bext tileymen sanga.

123

Yërusalëmdiki ibadetxanigha bërish yolida ëytilghan munajat

¹Ersh textide olturghuchi i Xuda,

telmürüp közlirimni tikimen sanga.

²Közlirimiz tikilgendur Xudayimiz – Perwerdigargha,

qullarning közliri kebi tikilgen quldarning qollirigha,

dëdekning közliri kebi tikilgen aghicha xënimning qollirigha.

Taki bizge shepqitini körsetkiche telmürimiz Perwerdigargha.

³I Perwerdigar, shepqet qil, shepqet qil bizge,

chünki tartqan xorluqlirimiz yëtip ashquche.

⁴Mazaqlirigha qalduq tolimu baghri tashlarning,

xorluqini tarttuq xoymu hakawurlarning.

124

Yërusalëmdiki ibadetxanigha bërish yolida ëytilghan, Dawut yazghan munajat

¹“Eger Igem biz terepte turmighan bolsa”,

ah Isra’illar, shundaq denglar!

^2-5Kishiler bizge achchiqlinip hujumgha ötkinide

eger Igem biz terepte turmighan bolsa,

ular bizni tirik pëti yewëter idi.

Kelkün kebi ëqip kelgen adem topi

dolqun yasap basqinida üstimizdin

ezim deryadek bizni gherq qilar idi.

⁶Ëytayli Perwerdigargha hemdusana,

yem qilmidi bizni ularning chishlirigha.

⁷Qëchip chiqtuq qush kebi biz ularning qapqinidin,

tuziqi buzulup, qachtuq ularning changgilidin.

⁸Bizge yardem bergen Perwerdigardur,

u asman-zëminni yaratquchidur.

125

Yërusalëmdiki ibadetxanigha bërish yolida ëytilghan munajat

¹Si’on tëghi tewrenmey, menggüge mezmut turar,

Si’ongha oxshar, ümidini Perwerdigargha baghlighanlar.

²Taghlar qorshap turghandek Yërusalëmni,

Perwerdigar qorshap turar öz xelqini,

ta’ebedkiche qoghdap ularni.

³Boliwermes hökümranliq hasisi pasiqlarda,

heqqaniylargha riziq qilip bërilgen bu zëminda,

reziller hökümranliq qilsa heqqaniylar üstide,

heqqaniylarmu aylinip këter rezillerge.

⁴I Perwerdigar, mëhringni bergin da’ima,

yaxshilar we qelbi paklargha.

⁵Adiship ketkenlerni egri yollargha,

jazalaydu Perwerdigar rezillerge qoshupla,

tinch-amanliq bolghay Isra’illargha.

126

Yërusalëmdiki ibadetxanigha bërish yolida ëytilghan munajat

¹Perwerdigar sürgündikilerni qayturup kelgende Si’ongha,

bolup qalghaniduq biz xuddi chüsh körüwatqandekla.

²Xushalliqtin aghzimiz yëtip quliqimizgha,

chuqanlar kötergeniduq shadliqta.

“Perwerdigar zor bir yaxshiliq qildi ulargha”,

dëgen sözler tarqalghanidi yat eller arisida.

³Derweqe Perwerdigar zor yaxshiliq qildi bizge,

shad-xuramliq toldi bizning qelbimizge.

⁴Ronaq tapqan waqtimizgha qaytur bizni, i Perwerdigar,

tosattin sugha tolghandek jenubtiki quruq ëriqlar.

⁵Yighlap turup uruq chachqanlar, naxsha bilen hosul yighar.

⁶Dümbisige artip uruq xaltisini, yigha bilen ketken kishi,

qaytip këler naxsha bilen, orighan baghlamlirini kötürgen pëti.

127

Yërusalëmdiki ibadetxanigha bërish yolida ëytilghan, Sulayman yazghan munajat

¹Öyni salmisa özi Perwerdigar,

öy salghuchilarning ejri bikar këter.

Nawada sheherni qoghdimisa Perwerdigar,

bihudidur oyghaq tursimu qarawullar.

²Bikardur nan üchün japa tartqininglar

ensirep seher turup kech yatqininglar,

chünki Perwerdigar öz söygenlirige

këche yatqandimu rizqini ata qilar.

³Perwerdigarning sowghitidur perzentler,

uning bergen iltipatidur hamililer.

⁴Tapqan oghulliri ademning yashliqida,

oxshar palwanning qolidiki oqlirigha.

⁵Bextliktur sadiqini toldurghanlar mushundaq oqlargha,

chünki ular munazirileshkende sheher derwazisi aldida,

yëngilip, shermende bolmas qarshilashqanlargha.^*

128

Yërusalëmdiki ibadetxanigha bërish yolida ëytilghan munajat

¹Neqeder bextliktur Perwerdigargha ixlasi barlar,

neqeder bextliktur uning yolida mangghanlar.

²Berheq, mëhnitinglarning mëwisini yeysiler,

ronaq tëpip, bextiyar bolisiler.

³Ayalinglar oxshar mol mëwe bergen üzüm tëligha,

zeytun shëxidek köp bolar baliliringlar yëninglarda,

dastixininglarni chöridep olturar ular etrapinglarda.

⁴Mana shundaq beriket tapar Perwerdigargha ixlasmen adem.

⁵Perwerdigar Si’ondin ata qilsun sanga bextni,

körgeysen ömür boyi ronaq tapqan Yërusalëmni.

⁶Ömrüng yetkey balangning balilirigha,

tinch-amanliq bolghay Isra’illargha.

129

Yërusalëmdiki ibadetxanigha bërish yolida ëytilghan munajat

¹“Yashliqimdin tartip manga köp qëtim

ziyankeshlik qilip kelgenidi ular.”

Ah Isra’illar, shundaq denglar!

²“Yashliqimdin tartip manga köp qëtim

ziyankeshlik qilip kelgen bolsimu ular,

biraq ghelibe qilalmidi üstümdin zinhar.”

³Qoshchi yerni chongqur aghdurghan kebi,

qamchida ular dumbemge izlar saldi.

⁴Adaletlik, heqqaniydur Perwerdigar,

rezillerning asaritini u sundurar.

⁵Si’ongha nepret bilen qaraydighanlar,

reswa qilinip arqisigha chëkindürülsun.

⁶Xuddi ögzide ünüp qalghan chöplerdek

orulmay turup ular solushup qalsun.

⁷Chöp orighuchi chöpni yighsa bir tutammu chiqmisun.

Chöp baghlighuchi baghlisa bir baghlamgha toshmisun.

⁸Yoldin ötkenler dëmes bu qutluq tilekni ulargha:

“Igimiz beriket bersun ishinglargha,

silerge bext tileymiz Perwerdigarning namida.”

130

Yërusalëmdiki ibadetxanigha bërish yolida ëytilghan munajat

^1-2Peryad qildim Perwerdigar müshküllükte,

qulaq salghin Igem mëning erzimge.

Anglighaysen awazimni,

yardem tiligen sadayimni.

³Eger Xuda pütüp qoysang pütüküngge

bizning qilghan gunah we qilmishimizni,

qutquzalar jazayingdin kim özini?

⁴Biraq kechürüm bolghach sende,

sanga ixlas bardur bizde.

⁵Kütmektimen Perwerdigarni telmürüshte,

wujudumda ümid bolghach uning sözige.

⁶Seherge teshna bolghan këchilik közetchining

zariqishidek kütmektimen Igemni qëtidin yürikimning.

⁷Ey Isra’illar, ümid baghlanglar Perwerdigargha,

chünki menggülük muhebbet bardur uningda,

teyyar turghandur u bizni qutquzushqa.

⁸Peqet Perwerdigar qutquzar Isra’illarni,

gunahlirining jazasidin xalas qilip ularni.

131

Yërusalëmdiki ibadetxanigha bërish yolida ëytilghan, Dawut yazghan munajat

¹I Perwerdigar,

tekebburluq yoqtur könglümde,

hakawurluq qilmasmen qilche.

Arilashmaymen qurbim yetmes ishlargha,

kirishmeymen büyük arzu-armanlargha.

²Sütke toyghan balidek anisining baghrida,

könglüm tinip, tinchlandi tënim,

berheq, sütke toyghan balidek aram taptim.

³Ey Isra’illar, ebediy ümid baghlanglar Perwerdigargha.

132

Yërusalëmdiki ibadetxanigha bërish yolida ëytilghan munajat

¹Perwerdigar eske alghaysen Dawutni,

uning tartqan jebir-zulum, japalirini.

²Qesem ichip Perwerdigargha,

u mundaq wedilerni bergenidi,

Yaqup ëtiqad qilghan qadir Xudagha:

³“Kirmesmen öyümge, yatmasmen ornumda.

⁴Uxlimasmen, mügdimesmen hetta,

⁵taki teyyar qilmighuche Yaqupning qudretlik Xudasi –

Perwerdigar bilen uchrishish jayini.”

⁶Ehde sanduqi heqqidiki xewerni

Efratada anglighaniduq,

biz u sanduqni Ya’ir dalaliridin taptuq.

⁷Xuda bilen uchrishidighan jaygha barayli,

uning putliri astida sejde qilayli.

⁸I Perwerdigar, merhemet ibadetxananggha –

sanga atalghan aramgahinggha.

Kirgeysen qudriting nishani bolghan

ehde sanduqi bilen birge.

⁹Heqqaniyliq rohaniylargha kiyim bolsun,

teqwadar xelqliring shadliqqa tolsun.

¹⁰Qilip qulung Dawutning hörmitini,

ret qilmighin özüng tikligen padishahingni.

¹¹Qayturuwalmas Perwerdigar wedisini,

Dawutqa bergen munu qesimini:

“Waris qilimen textingge,

öz pushtungdin bolghan birsini.

¹²Oghulliring ri’aye qilsa ehdemge,

boysunsa men qilghan barliq emrge,

olturar oghullirimu textingde ebedke.”

¹³Shundaq, Perwerdigar tallighandur Si’onni,

biz bilen uchrishishqa xalighandur bu yerni.

¹⁴“Aramgahim bu mëning,^*

menggügidur u mëning makanim,

xalighanmen bu yerni men özüm.

¹⁵Berheq, Si’onni ronaq tapquzimen,

yoqsullirining qorsaqlirini toq qilimen.

¹⁶Kiydürimen rohaniylirigha nijatliq tonini,

yangritidu teqwadarliri tentenilik awazni.

¹⁷Küchlük qilimen bu yerde Dawut neslini,

yandurimen özüm tallighanning ömür chirighini.

¹⁸Kiydürimen düshmenlirige shermendilik tonini,

parlaq qilimen Dawutning bëshidiki tajini.”

133

Yërusalëmdiki ibadetxanigha bërish yolida ëytilghan, Dawut yazghan munajat

¹Qaranglar, neqeder güzel, neqeder yëqimliq,

qërindashlar ara bolsa inaqliq.

²Inaqliq qimmetlik yaghdek bolur,

Harunning bëshidin quyulup bu yagh,^*

ëqip chüshüp saqallirigha,

tamghanidi yaqilirigha.

³Mol shebnemge oxshar inaqliq,

Xermon tëghidiki shebnemler^* chüshken kebi Si’ongha,

berheq, bextni – menggülük hayatni,

ata qilghanidi Perwerdigar Si’on tëghida.

134

Yërusalëmdiki ibadetxanigha bërish yolida ëytilghan munajat

¹Ey Perwerdigargha xizmet qilidighanlar,

këchilep Xuda öyide ibadette bolidighanlar,

këlinglar, Perwerdigarni teriplenglar!

²Muqeddes jay terepke qarap,

du’agha kötürülsun qolliringlar,

Perwerdigarni teriplenglar!

³Yaratquchidur Xuda asman, zëminni,

bextiyar qilghay u Si’ondin silerni.

135

^1-2Hemdusana oqunglar Perwerdigargha,

medhiyeler ëytinglar uning namigha.

Ey Perwerdigargha xizmet qilidighanlar,

uning öyide ibadette bolidighanlar,

Igimizning hoylilirida turidighanlar,

medhiyeler oqunglar uninggha.

³Medhiyelenglar Perwerdigarni,

chünki shapa’etliktur Perwerdigar.

Küy-naxshigha qëtinglar uning namini,

chünki uni küylimek bizni shad qilar.

⁴Perwerdigar talliwaldi Yaqup qowmini,

özige tewe qilip Isra’illarni.

⁵Bilimen, berheq Perwerdigar ulughdur,

Rebbimiz gheyriy ilahlardin^* üstündur.

⁶Asman-zëmin, dëngiz-okyan, chongqurluqlarda,

nëme qilishni xalisa shuni qilar Xuda.

⁷U, zëminning töt teripidin ekëlip bulutlarni,

yamghur yaghdurup hem chaqturup chaqmaqlarni,

kuhiqapliridin ëlip chiqar shamallarni.

⁸U Misirliqlarning halak qildi tunji tughulghanlirini,

yeni halak qildi adem we mallarning tunjilirini.

⁹U Misirda körsetti möjize we karametlirini,

jazalidi Pir’ewn we uning wezirlirini.

¹⁰Weyran qildi u nurghun döletlerni,

öltürdi qudretlik padishahlarni.

¹¹Örüwetti u Amorlarning padishahi Sixonni,

Bashanning padishahi Ogni,

hetta Ken’andiki barliq padishahlarni.

¹²Ularning zëminini berdi öz qowmigha,

ata qildi ularni öz xelqi Isra’ilgha.

¹³I Perwerdigar, untulmaydu sëning naming,

ewladtin-ewladqiche dewr sürer shöhriting.

¹⁴Xuda “gunahsiz” dep jakarlar öz qowmini,

körsiter uning qullirigha öz rehimini.

¹⁵Altun bilen kümüshtur yat ellerning butliri,

yasighandur ularni insanlarning qolliri.

¹⁶Ularning aghzi bar sözliyelmes,

közliri bar körelmes.

¹⁷Qulaqliri bar anglimas,

aghzida yoqtur nepes.

¹⁸Butlarni yasighanlar, uninggha ümid baghlighanlar,

axiri özlirining butlirigha oxshap qalar.

¹⁹Ey Isra’il jemeti, Perwerdigargha hemdusana ëytinglar,

ey Harun jemeti, Perwerdigargha hemdusana ëytinglar.

²⁰Ey Lawiy jemeti, Perwerdigargha hemdusana ëytinglar,

hemdusana ëytinglar Perwerdigargha ixlasi barlar.

²¹Perwerdigar turar Yërusalëmda,

hemdusana ëytilsun Si’onda,

hemdusana oqunglar uninggha.

136

^1-2Perwerdigargha shükür ëytinglar, u shapa’etliktur,

Perwerdigargha shükür ëytinglar, u hemme “ilahlar”din^* üstündur,