ئۇيغۇرچە مۇقەددەس كىتاب جەمئىيىتى

Salonikaliⱪlarƣa yezilƣan birinqi hət

1

¹Mənki Pawlus wə mən arⱪiliⱪ Silas ⱨəmdə Timotiydin Huda’atimiz wə Rəbbimiz Əysa Məsiⱨkə mənsup bolƣan, Salonika xəⱨiridiki etiⱪadqilar jama’ətqilikigə salam. Huda silərgə meⱨir-xəpⱪət wə amanliⱪ ata ⱪilƣay!

Salonikaliⱪlarning etiⱪadi

²Biz du’alirimizda silər üqün da’im Hudaƣa xükür eytip, silərni yad etip turuwatimiz. ³Huda’atimizning aldida etiⱪadinglardin kəlgən yahxi ixliringlarni, meⱨir-muⱨəbbitinglar bilən singdürgən əjringlarni wə Rəbbimiz Əysa Məsiⱨkə baƣliƣan ümidinglardin kəlgən səwr-taⱪət bilən bərdaxliⱪ bərgənlikinglarni da’im əsləp turuwatimiz. ⁴Əy Huda sɵygən ⱪerindaxlar, bizgə məlumki, Huda silərni tallidi. ⁵Silərgə yətküzgən bu hux həwərni biz sɵz bilənla əməs, bəlki Muⱪəddəs Roⱨtin kəlgən küq-ⱪudrət bilən, xundaⱪla Hudaning bu hux həwər arⱪiliⱪ silərni ⱪutⱪuzidiƣanliⱪiƣa bolƣan toluⱪ ixənqimiz bilən silərgə yətküzduⱪ. Biz silər bilən billə bolƣan qaƣlarda ⱪandaⱪ yaxiƣanliⱪimizni silər bilisilər. Bularning ⱨəmmisi silərning mənpə’itinglar üqün idi. ⁶Silər bizdin, xundaⱪla Rəbbimizdin ülgə aldinglar. Qünki, silər eƣir ⱪiyinqiliⱪlarƣa ⱪarimay, Muⱪəddəs Roⱨ ata ⱪilƣan xad-huramliⱪ iqidə Hudaning sɵzini ⱪobul ⱪildinglar. ⁷Nətijidə, silərmu Makedoniyə wə Yunan ɵlkiliridiki pütkül etiⱪadqilarƣa ülgə boldunglar. ⁸Rəbbimiz ⱨəⱪⱪidiki sɵzlər silərdin baxlinip, Makedoniyə wə Yunanƣila əməs, ⱨəmmə yərgə tarⱪiliptu. Biz u yərlərgə barƣinimizda, kixilərning silərning Hudaƣa bolƣan etiⱪadinglardin alliⱪaqan həwiri barliⱪini uⱪtuⱪ. Xunga, bizning etiⱪadinglar toƣrisida yənə eƣiz eqiximizning ⱨajiti yoⱪ. ⁹Biz barƣan jaydiki kixilər silərning bizni illiⱪ ⱪobul ⱪilƣanliⱪinglarni angliƣanidi. Ular silərning butlarƣa qoⱪunuxtin waz keqip, ⱨayat bolƣan ⱨəⱪiⱪiy Hudaƣa hizmət ⱪilix üqün uningƣa yüzləngənlikinglarni bizgə eytti. ¹⁰Ular yənə bizgə silərning Hudaning Oƣlining, yəni Huda ɵlümdin tirildürgən Əysa Məsiⱨning ərxtin ⱪayta kelixini kütüwatⱪanliⱪinglarni eytti. Bizlərni Hudadin kelidiƣan ƣəzəptin ⱪutⱪuzƣuqi dəl Əysa Məsiⱨtur.

2

Pawlusning Salonikadiki hizmiti

¹Ⱪerindaxlar, silərgə məlumki, bizning ⱪexinglarƣa barƣinimiz bikarƣa kətmidi. ²Silərgə yənə xumu məlumki, biz ⱪexinglarƣa berixtin ilgiri Filipi xəⱨiridə turƣan waⱪtimizda, u yərdə azab qəktuⱪ wə ⱨaⱪarətkə uqriduⱪ. Keyin, silərning xəⱨiringlardimu yənə ⱪattiⱪ ⱪarxiliⱪlarƣa uqriduⱪ. Lekin, biz Hudaning yardimi bilən ƣəyrətkə kelip, Hudaning hux həwirini silərgə yətküzduⱪ. ³Biz bu hux həwərni birər sahtiliⱪ, yaman niyət yaki ⱨiyligərlik bilən yətküzüwatⱪinimiz yoⱪ. ⁴Əməliyəttə, Huda bizni layiⱪ kɵrüp, hux həwərni yətküzüx wəzipisini bizgə tapxurdi. Biz hux həwərni insanlarni hursən ⱪilix üqün əməs, bəlki bizning ⱪəlbimizni kɵzitiwatⱪan Hudani hursən ⱪilix üqün yətküzüwatimiz. ⁵Silərgə məlumki, biz ⱨeqⱪaqan silərning yeninglarƣa huxamət ⱪilƣili yaki niⱪablinip təməhorluⱪ ⱪilƣili barmiduⱪ. Buningƣa Huda guwaⱨtur. ⁶Məyli silər bolunglar yaki baxⱪilar bolsun, biz ⱨeqkimdin birər mahtax təmə ⱪilmiduⱪ. ⁷Əysa Məsiⱨning əlqiliridin bolƣanliⱪimiz üqün, yardiminglarni tələp ⱪilixⱪa ⱨəⱪliⱪ iduⱪ. Lekin, silərgə huddi balilirini baƣriƣa basⱪan mulayim anidək mu’amilə ⱪilduⱪ. ⁸Xu qaƣda, silərgə xundaⱪ muⱨəbbət baƣliƣaniduⱪki, biz Hudaning hux həwirinila əməs, ɵz jenimiznimu təⱪdim ⱪilixⱪa razi iduⱪ. Qünki, silərni xu ⱪədər yahxi kɵrəttuⱪ! ⁹Ⱪerindaxlar, bizning ⱪandaⱪ tirixip-tirmixip ixligənlikimiz jəzmən esinglarda bardur. Biz ⱨeqⱪaysinglarƣa eƣirimizni salmasliⱪ üqün, bir tərəptin keqə-kündüzləp ixləp turmuximizni ⱪamdisaⱪ, yənə bir tərəptin Hudaning hux həwirini silərgə yətküzduⱪ. ¹⁰Etiⱪadqilardin bolƣan silərning aranglardiki əməliy ⱨərikitimizning pak, ⱨəⱪⱪaniy wə əyibsiz ikənlikigə ɵzünglar guwaⱨliⱪ berələysilər, buningƣa Hudamu guwaⱨtur. ¹¹Silərgə məlumki, biz ⱨərbiringlarƣa ata pərzəntigə əjir singdürgəndək əjir singdürduⱪ, ¹²silərgə mədət bərduⱪ, təsəlli bərduⱪ. Silərni ɵz padixaⱨliⱪiƣa wə xan-xəripigə qaⱪirƣan Hudaning pərzəntlirigə layiⱪ yaxaxⱪa dəwət ⱪilduⱪ.

¹³Hudaƣa ⱨəmixə xükür eytiximizdiki yənə bir səwəb xuki, silər bizdin Hudaning sɵzini anglap, uni ⱪobul ⱪilƣininglarda, bu sɵzni insanlarning sɵzi əməs, bəlki Hudaning sɵzi dəp etirap ⱪildinglar. Əməliyəttimu, bu sɵz Hudaning sɵzi bolup, u ⱨazir uningƣa ixinidiƣan silərgə küqlük təsir kɵrsətməktə. ¹⁴Ⱪerindaxlar, silərning əⱨwalinglarmu Hudaƣa etiⱪad ⱪilƣan wə Əysa Məsiⱨkə mənsup bolƣan Yəⱨudiyə ɵlkisidiki etiⱪadqilar jama’ətqiliklirigə ohxaydu. Qünki, ularning xu yərdiki Yəⱨudiylar təripidin ziyankəxlikkə uqriƣiniƣa ohxax, silərmu ɵz yurtdaxliringlar təripidin ziyankəxlikkə uqridinglar. ^15-16Burun Yəⱨudiylarning əjdadliri pəyƣəmbərlərni ɵltürgən, keyin ularning əwladliri Rəbbimiz Əysani ɵltürdi. Ⱨazir yənila bəzi Yəⱨudiylar bizgimu zulum selip, bizni biz hux həwər tarⱪitiwatⱪan xəⱨərlərdin ⱪoƣlap qiⱪardi. Ularning bundaⱪ ⱪilmixliri Hudaning ƣəzipini kəltüridu. Ular huddi pütkül insanlar bilən düxmənləxkəndək, bizning Yəⱨudiy əməslərning ⱪutⱪuzuluxⱪa erixixi üqün ularƣa bu hux həwərni tarⱪitiximizƣa tosⱪunluⱪ ⱪiliwatidu. Buning bilən, ular gunaⱨlirini üzlüksiz kɵpəytip, qekigə yətküzməktə. Xuning üqün, Hudaning ƣəzipi əmdi ularƣa qüxüx aldida turidu.

Pawlusning ənsirixi

¹⁷Ⱪerindaxlar, biz amalsiz ⱨalda silərdin waⱪitliⱪ ayrilduⱪ. Biz silər bilən billə bolmisaⱪmu, ⱪəlbimiz yənila silər bilən billə. Biz silər bilən yənə bir ⱪetim didar kɵrüxüxkə intizar bolƣanliⱪimiz üqün, yeninglarƣa berixⱪa intayin tirixtuⱪ! ¹⁸Bizning yeninglarƣa barƣumiz kəlgənidi. Bolupmu, mənki Pawlus nəqqə ⱪetim silərni yoⱪlap barmaⱪqi bolƣan bolsammu, biraⱪ buningƣa Xəytan tosalƣu boldi. ¹⁹Silərning etiⱪadinglarda ahirƣiqə qoⱪum qing turidiƣanliⱪinglarƣa ixinimiz wə silər üqün bək huxal bolimiz. Rəbbimiz Əysa ⱪayta kəlgəndə, uning aldida pəhirlinidiƣan tajimiz dəl silər əməsmu? ²⁰Biz ⱨəⱪiⱪətən silərdin pəhirlinimiz, silər bizning huxalliⱪimiz!

3

^1-2Biz silərning həwiringlarni alalmay, taⱪitimiz ⱪalmiƣanda, ɵzimiz Afina xəⱨiridə yalƣuz ⱪelip, aldinglarƣa ⱪerindiximiz ⱨəm Huda yolida biz bilən billə Əysa Məsiⱨ ⱨəⱪⱪidiki hux həwərni tarⱪitiwatⱪan hizmətdiximiz Timotiyni əwətixni ⱪarar ⱪilduⱪ. ³Bizning uni əwətiximizdiki məⱪsitimiz, silərning kɵz aldinglardiki ⱪiyinqiliⱪlar səwəbidin etiⱪadinglarning təwrinip ⱪalmasliⱪi ⱨəmdə silərni riƣbətləndürüx wə etiⱪadinglarni küqəytixtur. Bizning qoⱪum ⱪiyinqiliⱪⱪa uqraydiƣanliⱪimizmu silərgə məlum. ⁴Biz silər bilən billə bolƣan waⱪtimizda, ⱨəmmimizning ⱪiyinqiliⱪlarƣa uqraydiƣanliⱪimizni silərgə aldin’ala eytⱪaniduⱪ. Əməliyəttimu deginimizdək boldi. ⁵Xu səwəbtin taⱪitim taⱪ bolup, etiⱪadinglarning zadi ⱪandaⱪ ikənlikini bilix üqün, Timotiyni yeninglarƣa əwətkənidim. Mən Xəytanning silərni azduruxi wə buning bilən bizning silərgə singdürgən əjrimizning bikarƣa ketixidin ənsirigənidim.

⁶Lekin, yeⱪinda yeninglardin ⱪaytip kəlgən Timotiy etiⱪadinglar wə meⱨir-muⱨəbbitinglar toƣrisida bizgə yahxi həwər elip kəldi. U silərning bizni ⱨər da’im hursənlik bilən əsləp turƣanliⱪinglarni, huddi bizning silərni kɵrgümiz kəlgəndək, silərningmu bizni kɵrgünglar kəlgənlikini eytti. ⁷Ⱪerindaxlar, silərning etiⱪadinglar boxaxmaptu. Muxundaⱪ japa-muxəⱪⱪət wə ⱪiyinqiliⱪlar iqidə turƣan biz buningdin qong ilⱨam alduⱪ. ⁸Qünki, Rəbbimizgə bolƣan etiⱪadinglar mustəⱨkəm bolƣanliⱪi üqün, biz ⱨəⱪiⱪətən yengiwaxtin roⱨlanduⱪ, ⁹silər üqün huxalliⱪⱪa qɵmduⱪ. Bundaⱪ əⱨwalda biz Hudaning aldida silər üqün ⱪandaⱪmu təxəkkür eytmay turalaymiz! ¹⁰Silər bilən didar kɵrüxüx wə etiⱪadinglardiki yetərsizliklərni tüzitixkə yardəm berəliximiz üqün, keqə-kündüz qin ⱪəlbimizdin Hudaƣa du’a ⱪilmaⱪtimiz.

¹¹Atimiz Huda wə rəbbimiz Əysa bizning silər bilən kɵrüxüximizgə yol aqⱪay. ¹²Rəbbimiz Silərning bir-biringlarƣa wə ⱨəmmə adəmlərgə bolƣan meⱨir-muⱨəbbitinglarni bizning silərgə bolƣan meⱨir-muⱨəbbitimizdək tolup taxturƣay. ¹³Ⱨəm xu arⱪiliⱪ, Rəbbimiz Əysa ɵzigə mənsup bolƣan barliⱪ muⱪəddəs həlⱪi bilən billə ⱪaytip kəlginidə, silərning atimiz Hudaning aldida əyibsiz wə pak boluxunglar üqün iradənglarni mustəⱨkəm ⱪilƣay!

4

Hudani hursən ⱪilidiƣan ⱨayat yoli

¹Ⱪerindaxlar, ahirda biz yənə xuni deməkqimizki, Hudani hursən ⱪilix üqün ⱪandaⱪ yaxax kerəklikini bizdin ɵginiwaldinglar ⱨəmdə silər əməliyitinglardimu bizdin ɵgəngininglar boyiqə xundaⱪ yaxawatisilər. Əmdi Hudani hursən ⱪilixⱪa tehimu tirixixinglarni Rəbbimiz Əysaning nami bilən soraymiz. ²Qünki, silər bizning Rəbbimiz Əysaning nami bilən silərgə yətküzgən təlimlirimizni bilisilər. ³Hudaning iradisi xuki, pak bolunglar wə jinsiy əhlaⱪsizliⱪtin saⱪlininglar; ^4-5Ⱨərbiringlar Hudani tonumaydiƣan adəmlərdək xəⱨwaniy ⱨəwəslərgə berilməy, bəlki teninglardiki bu ⱨəwəslərni baxⱪurup, pak wə izzət-ⱨɵrmitinglar bilən ⱨayat kəqürünglar.^*6Bu yaman ixlarda ⱪerindaxliringlarni aldap, ulardin paydilinip kətmənglar. Ilgiri silərni agaⱨlandurƣinimizdək, Rəbbimiz mana xundaⱪ gunaⱨlar tüpəylidin insanlarni jazalaydu. ⁷Qünki, Huda bizni napak əməs, bəlki pak yaxaxⱪa qaⱪirdi. ⁸Xuning üqün, bu təlimni rət ⱪilƣan kixi insanni əməs, bəlki silərgə Muⱪəddəs Roⱨ ata ⱪilƣan Hudani rət ⱪilƣan bolidu.

⁹Ⱪerindaxliⱪ meⱨir-muⱨəbbitigə kəlsək, bu toƣrisida silərgə hət yeziximizning ⱨajiti yoⱪ. Qünki, Huda bir-biringlarƣa meⱨir-muⱨəbbət kɵrsitixni ɵgətkən. ¹⁰Əməliyəttə, silər pütün Makedoniyə ɵlkisidiki ⱪerindaxlarƣa xundaⱪ ⱪiliwatisilər. Xundaⱪ bolsimu, ⱪerindaxlar, meⱨir-muⱨəbbət kɵrsitixtə tehimu tirixixinglarni soraymiz. ¹¹Silərgə tapiliƣinimizdək, tinq-aman ⱨayat kəqürüxkə, baxⱪilarning ixliriƣa arilaxmay, ɵz ixinglar bilən boluxⱪa wə ikki bilikinglarƣa tayinip yaxaxⱪa tirixinglar. ¹²Mana xundaⱪ ⱪilsanglar, etiⱪadqilar jama’ətqilikining sirtidiki kixilər aldida izzət-ⱨɵrmətkə igə bolup yaxiyalaysilər wə iⱪtisad jəⱨəttə ⱨeqkimgə beⱪinmaysilər.

Əysa Məsiⱨning ⱪayta kelixi

¹³Ⱪerindaxlar, silərning Əysa Məsiⱨkə etiⱪad ⱪilmay ümidsizlik iqidə yaxawatⱪan kixilərdək ⱨəsrət qəkməslikinglar üqün, biz, aləmdin ɵtkən etiⱪadqilar toƣrisidiki ⱨəⱪiⱪəttin həwərdar boluxunglarni halaymiz. ¹⁴Əysa Məsiⱨning ɵlüp tirilgənlikigə ixəngənikənmiz, Əysa Məsiⱨ ⱪayta kəlgəndə Hudaning aləmdin ɵtkən etiⱪadqilarni Əysa Məsiⱨ bilən billə elip kelidiƣanliⱪiƣa ixiniximiz kerək. ¹⁵Biz ⱨazir Rəbbimizning sɵzi boyiqə silərgə xuni eytimizki, Rəbbimiz ⱪayta kəlgəndə, biz ⱨayat yaxawatⱪanlar ⱨərgizmu ɵlüp kətkən etiⱪadqilardin awwal Rəbbimiz bilən jəm bolalmaymiz. ¹⁶Rəbbimiz ɵzi bir pərman arⱪiliⱪ bax pərixtining awazi wə Huda yangratⱪan Kanay sadasi bilən asmandin qüxidu. Əysa Məsiⱨkə mənsup bolup ɵlüp kətkənlər awwal tirilidu. ¹⁷Keyin ⱨayat yaxawatⱪan bizlər, yəni bu dunyada ⱨayat kəqürüwatⱪanlar axu ɵlgənlər bilən birliktə Rəbbimiz bilən asmanda kɵrüxüx üqün, bulutlar arisiƣa kɵtürülimiz. Xuningdin keyin, Rəbbimiz bilən mənggü birgə bolimiz. ¹⁸Xunga, bir-biringlarni bu sɵzlər bilən riƣbətləndürünglar.

5

Rəbbimizning ⱪayta kelixini kütüwelix

¹Ⱪerindaxlar, silərgə bu ixlarning ⱪaqan yüz beridiƣanliⱪi toƣrisida yezixim ⱨajətsiz. ²Qünki, silərmu yahxi bilisilər, Rəbbimizning ⱪayta kelidiƣan küni huddi keqidiki oƣrining kelixigə ohxax tuyuⱪsiz kelidu. ³Kixilər “dunya tinq-aman” dəp turƣanda, tasadipiy ularƣa ⱨalakət kelidu. Bu huddi ⱨamilidar ayalning tolƣiⱪi uxtumtut tutⱪiniƣa ohxax bolup, uningdin ⱪeqip ⱪutulƣili bolmaydu. ⁴Lekin, ⱪerindaxlar, silər Əysa Məsiⱨkə etiⱪad ⱪilƣanliⱪinglar üqün, ⱪarangƣuluⱪta əməssilər. Xunga, u kün silərni oƣriƣa ohxax qɵqütüp kəlməydu. ⁵Biz ⱨəmmimiz kündüzning, yəni yoruⱪluⱪning pərzəntlirimiz. Ⱨəmmimiz keqining, yəni gunaⱨning ⱪarangƣuluⱪiƣa mənsup əməsmiz. ⁶Xuning üqün, Əysa Məsiⱨkə etiⱪad ⱪilmiƣanlardək uhlap yatmayli. Əksiqə, səgək wə ⱨoxyar bolayli. ⁷Uhlaydiƣanlar keqisi uhlaydu, məs bolidiƣanlarmu keqisi məs bolidu. ⁸Yoruⱪluⱪⱪa mənsup bolƣan bizlər bolsaⱪ üstimizgə etiⱪad wə meⱨir-muⱨəbbət sawutini, beximizƣa ⱪutⱪuzulux ümidining dubulƣisini kiyip, ɵzimizni səgək tutuximiz kerək. ⁹Qünki, Huda bizni ɵz ƣəzipigə uqrisun dəp əməs, bəlki Rəbbimiz Əysa Məsiⱨ arⱪiliⱪ ⱪutⱪuzulsun, dəp talliƣandur. ¹⁰Əysa Məsiⱨ biz üqün ɵldi. Buningdiki məⱪsət, u ⱪayta kəlgəndə, biz məyli ⱨayat yaki ɵlgən bolayli, bizning uning bilən billə mənggü yaxiximiz üqündur. ¹¹Xuning üqün, ⱨazirmu bir-biringlarni burunⱪiƣa ohxax dawamliⱪ riƣbətləndürüp, bir-biringlarning etiⱪadini küqəytinglar.

Ahirⱪi təlim wə salamlar

¹²Ⱪerindaxlar, aranglarda japaliⱪ ixləwatⱪan wə Rəbbimizning yolida silərgə yetəkqilik ⱪilip, nəsiⱨət ⱪiliwatⱪanlarni ⱪədirlixinglarni soraymiz. ¹³Ularning bu hizmətliri üqün ularƣa qongⱪur ⱨɵrmət wə muⱨəbbitinglar bilən mu’amilə ⱪilinglar. Bir-biringlar bilən inaⱪ ɵtünglar. ¹⁴Ⱪerindaxlar, silərdin ɵtünimizki, bikar tələplərni oyƣitinglar, yürəksizlərni riƣbətləndürünglar, ajizliⱪi bolƣanlarƣa yar-yɵlək bolunglar wə ⱨəmmə adəmgə səwrqan bolunglar. ¹⁵Ⱨeqⱪaysinglar yamanliⱪⱪa yamanliⱪ ⱪayturmanglar. Əksiqə, bir-biringlarƣa wə barliⱪ kixilərgə ⱨəmixə yahxiliⱪ ⱪilixni niyət ⱪilinglar.

¹⁶Ⱨər da’im huxal-huram bolunglar. ¹⁷Ⱨəmixə du’a ⱪilinglar. ¹⁸Ⱨərⱪandaⱪ əⱨwalda Hudaƣa xükür eytinglar. Qünki, mana bular Hudaning Əysa Məsiⱨkə mənsup bolƣan silərgə ⱪaratⱪan iradisidur. ¹⁹Muⱪəddəs Roⱨning ⱪəlbinglardiki otini ɵqürmənglar. ²⁰Aranglarda yətküzülgən wəⱨiylərgə səl ⱪarimanglar. ²¹Ularning ⱨəmmisini təkxürüp kɵrüp, ⱨəⱪiⱪətən Hudadin kəlgən yaki kəlmigənlikini pərⱪ etip, Hudadin kəlgən wəⱨiyni ⱪobul ⱪilinglar. ²²Ⱨər hil yamanliⱪlardin yiraⱪ turunglar.

²³Bizgə amanliⱪ ata ⱪilƣuqi Huda ɵzi silərni təltɵküs pak ⱪilƣay. Rəbbimiz Əysa Məsiⱨ ⱪayta kəlgüqə Huda roⱨinglar, jeninglar wə teninglarni əyibsiz saⱪliƣay. ²⁴Silərni qaⱪirƣan Huda jəzmən xundaⱪ ⱪilidu. U ixənqliktur!

²⁵Ⱪerindaxlar, biz üqün du’a ⱪilinglar. ²⁶Ⱨəmmə ⱪerindaxlar bilən meⱨribanlarqə salamlixinglar. ²⁷Rəbbimizning nami bilən silərning bu hətni xu yərdiki ⱨəmmə ⱪerindaxlarƣa oⱪup berixinglarni tapilaymən.

²⁸Rəbbimiz Əysa Məsiⱨning meⱨir-xəpⱪiti silərgə yar bolƣay!