ئۇيغۇرچە مۇقەددەس كىتاب جەمئىيىتى

Salonikaliqlargha yëzilghan birinchi xet

1

¹Menki Pawlus we men arqiliq Silas hemde Timotiydin Xuda’atimiz we Rebbimiz Eysa Mesihke mensup bolghan, Salonika shehiridiki ëtiqadchilar jama’etchilikige salam. Xuda silerge mëhir-shepqet we amanliq ata qilghay!

Salonikaliqlarning ëtiqadi

²Biz du’alirimizda siler üchün da’im Xudagha shükür ëytip, silerni yad ëtip turuwatimiz. ³Xuda’atimizning aldida ëtiqadinglardin kelgen yaxshi ishliringlarni, mëhir-muhebbitinglar bilen singdürgen ejringlarni we Rebbimiz Eysa Mesihke baghlighan ümidinglardin kelgen sewr-taqet bilen berdashliq bergenlikinglarni da’im eslep turuwatimiz. ⁴Ey Xuda söygen qërindashlar, bizge melumki, Xuda silerni tallidi. ⁵Silerge yetküzgen bu xush xewerni biz söz bilenla emes, belki Muqeddes Rohtin kelgen küch-qudret bilen, shundaqla Xudaning bu xush xewer arqiliq silerni qutquzidighanliqigha bolghan toluq ishenchimiz bilen silerge yetküzduq. Biz siler bilen bille bolghan chaghlarda qandaq yashighanliqimizni siler bilisiler. Bularning hemmisi silerning menpe’itinglar üchün idi. ⁶Siler bizdin, shundaqla Rebbimizdin ülge aldinglar. Chünki, siler ëghir qiyinchiliqlargha qarimay, Muqeddes Roh ata qilghan shad-xuramliq ichide Xudaning sözini qobul qildinglar. ⁷Netijide, silermu Makëdoniye we Yunan ölkiliridiki pütkül ëtiqadchilargha ülge boldunglar. ⁸Rebbimiz heqqidiki sözler silerdin bashlinip, Makëdoniye we Yunanghila emes, hemme yerge tarqiliptu. Biz u yerlerge barghinimizda, kishilerning silerning Xudagha bolghan ëtiqadinglardin alliqachan xewiri barliqini uqtuq. Shunga, bizning ëtiqadinglar toghrisida yene ëghiz ëchishimizning hajiti yoq. ⁹Biz barghan jaydiki kishiler silerning bizni illiq qobul qilghanliqinglarni anglighanidi. Ular silerning butlargha choqunushtin waz këchip, hayat bolghan heqiqiy Xudagha xizmet qilish üchün uninggha yüzlengenlikinglarni bizge ëytti. ¹⁰Ular yene bizge silerning Xudaning Oghlining, yeni Xuda ölümdin tirildürgen Eysa Mesihning ershtin qayta këlishini kütüwatqanliqinglarni ëytti. Bizlerni Xudadin këlidighan ghezeptin qutquzghuchi del Eysa Mesihtur.

2

Pawlusning Salonikadiki xizmiti

¹Qërindashlar, silerge melumki, bizning qëshinglargha barghinimiz bikargha ketmidi. ²Silerge yene shumu melumki, biz qëshinglargha bërishtin ilgiri Filipi shehiride turghan waqtimizda, u yerde azab chektuq we haqaretke uchriduq. Këyin, silerning shehiringlardimu yene qattiq qarshiliqlargha uchriduq. Lëkin, biz Xudaning yardimi bilen gheyretke këlip, Xudaning xush xewirini silerge yetküzduq. ³Biz bu xush xewerni birer saxtiliq, yaman niyet yaki hiyligerlik bilen yetküzüwatqinimiz yoq. ⁴Emeliyette, Xuda bizni layiq körüp, xush xewerni yetküzüsh wezipisini bizge tapshurdi. Biz xush xewerni insanlarni xursen qilish üchün emes, belki bizning qelbimizni közitiwatqan Xudani xursen qilish üchün yetküzüwatimiz. ⁵Silerge melumki, biz hëchqachan silerning yëninglargha xushamet qilghili yaki niqablinip temexorluq qilghili barmiduq. Buninggha Xuda guwahtur. ⁶Meyli siler bolunglar yaki bashqilar bolsun, biz hëchkimdin birer maxtash teme qilmiduq. ⁷Eysa Mesihning elchiliridin bolghanliqimiz üchün, yardiminglarni telep qilishqa heqliq iduq. Lëkin, silerge xuddi balilirini baghrigha basqan mulayim anidek mu’amile qilduq. ⁸Shu chaghda, silerge shundaq muhebbet baghlighaniduqki, biz Xudaning xush xewirinila emes, öz jënimiznimu teqdim qilishqa razi iduq. Chünki, silerni shu qeder yaxshi körettuq! ⁹Qërindashlar, bizning qandaq tiriship-tirmiship ishligenlikimiz jezmen ësinglarda bardur. Biz hëchqaysinglargha ëghirimizni salmasliq üchün, bir tereptin këche-kündüzlep ishlep turmushimizni qamdisaq, yene bir tereptin Xudaning xush xewirini silerge yetküzduq. ¹⁰Ëtiqadchilardin bolghan silerning aranglardiki emeliy herikitimizning pak, heqqaniy we eyibsiz ikenlikige özünglar guwahliq bëreleysiler, buninggha Xudamu guwahtur. ¹¹Silerge melumki, biz herbiringlargha ata perzentige ejir singdürgendek ejir singdürduq, ¹²silerge medet berduq, teselli berduq. Silerni öz padishahliqigha we shan-sheripige chaqirghan Xudaning perzentlirige layiq yashashqa dewet qilduq.

¹³Xudagha hemishe shükür ëytishimizdiki yene bir seweb shuki, siler bizdin Xudaning sözini anglap, uni qobul qilghininglarda, bu sözni insanlarning sözi emes, belki Xudaning sözi dep ëtirap qildinglar. Emeliyettimu, bu söz Xudaning sözi bolup, u hazir uninggha ishinidighan silerge küchlük tesir körsetmekte. ¹⁴Qërindashlar, silerning ehwalinglarmu Xudagha ëtiqad qilghan we Eysa Mesihke mensup bolghan Yehudiye ölkisidiki ëtiqadchilar jama’etchiliklirige oxshaydu. Chünki, ularning shu yerdiki Yehudiylar teripidin ziyankeshlikke uchrighinigha oxshash, silermu öz yurtdashliringlar teripidin ziyankeshlikke uchridinglar. ^15-16Burun Yehudiylarning ejdadliri peyghemberlerni öltürgen, këyin ularning ewladliri Rebbimiz Eysani öltürdi. Hazir yenila bezi Yehudiylar bizgimu zulum sëlip, bizni biz xush xewer tarqitiwatqan sheherlerdin qoghlap chiqardi. Ularning bundaq qilmishliri Xudaning ghezipini keltüridu. Ular xuddi pütkül insanlar bilen düshmenleshkendek, bizning Yehudiy emeslerning qutquzulushqa ërishishi üchün ulargha bu xush xewerni tarqitishimizgha tosqunluq qiliwatidu. Buning bilen, ular gunahlirini üzlüksiz köpeytip, chëkige yetküzmekte. Shuning üchün, Xudaning ghezipi emdi ulargha chüshüsh aldida turidu.

Pawlusning ensirishi

¹⁷Qërindashlar, biz amalsiz halda silerdin waqitliq ayrilduq. Biz siler bilen bille bolmisaqmu, qelbimiz yenila siler bilen bille. Biz siler bilen yene bir qëtim didar körüshüshke intizar bolghanliqimiz üchün, yëninglargha bërishqa intayin tirishtuq! ¹⁸Bizning yëninglargha barghumiz kelgenidi. Bolupmu, menki Pawlus nechche qëtim silerni yoqlap barmaqchi bolghan bolsammu, biraq buninggha Sheytan tosalghu boldi. ¹⁹Silerning ëtiqadinglarda axirghiche choqum ching turidighanliqinglargha ishinimiz we siler üchün bek xushal bolimiz. Rebbimiz Eysa qayta kelgende, uning aldida pexirlinidighan tajimiz del siler emesmu? ²⁰Biz heqiqeten silerdin pexirlinimiz, siler bizning xushalliqimiz!

3

^1-2Biz silerning xewiringlarni alalmay, taqitimiz qalmighanda, özimiz Afina shehiride yalghuz qëlip, aldinglargha qërindishimiz hem Xuda yolida biz bilen bille Eysa Mesih heqqidiki xush xewerni tarqitiwatqan xizmetdishimiz Timotiyni ewetishni qarar qilduq. ³Bizning uni ewetishimizdiki meqsitimiz, silerning köz aldinglardiki qiyinchiliqlar sewebidin ëtiqadinglarning tewrinip qalmasliqi hemde silerni righbetlendürüsh we ëtiqadinglarni kücheytishtur. Bizning choqum qiyinchiliqqa uchraydighanliqimizmu silerge melum. ⁴Biz siler bilen bille bolghan waqtimizda, hemmimizning qiyinchiliqlargha uchraydighanliqimizni silerge aldin’ala ëytqaniduq. Emeliyettimu dëginimizdek boldi. ⁵Shu sewebtin taqitim taq bolup, ëtiqadinglarning zadi qandaq ikenlikini bilish üchün, Timotiyni yëninglargha ewetkenidim. Men Sheytanning silerni azdurushi we buning bilen bizning silerge singdürgen ejrimizning bikargha këtishidin ensirigenidim.

⁶Lëkin, yëqinda yëninglardin qaytip kelgen Timotiy ëtiqadinglar we mëhir-muhebbitinglar toghrisida bizge yaxshi xewer ëlip keldi. U silerning bizni her da’im xursenlik bilen eslep turghanliqinglarni, xuddi bizning silerni körgümiz kelgendek, silerningmu bizni körgünglar kelgenlikini ëytti. ⁷Qërindashlar, silerning ëtiqadinglar boshashmaptu. Mushundaq japa-musheqqet we qiyinchiliqlar ichide turghan biz buningdin chong ilham alduq. ⁸Chünki, Rebbimizge bolghan ëtiqadinglar mustehkem bolghanliqi üchün, biz heqiqeten yëngiwashtin rohlanduq, ⁹siler üchün xushalliqqa chömduq. Bundaq ehwalda biz Xudaning aldida siler üchün qandaqmu teshekkür ëytmay turalaymiz! ¹⁰Siler bilen didar körüshüsh we ëtiqadinglardiki yëtersizliklerni tüzitishke yardem bërelishimiz üchün, këche-kündüz chin qelbimizdin Xudagha du’a qilmaqtimiz.

¹¹Atimiz Xuda we rebbimiz Eysa bizning siler bilen körüshüshimizge yol achqay. ¹²Rebbimiz Silerning bir-biringlargha we hemme ademlerge bolghan mëhir-muhebbitinglarni bizning silerge bolghan mëhir-muhebbitimizdek tolup tashturghay. ¹³Hem shu arqiliq, Rebbimiz Eysa özige mensup bolghan barliq muqeddes xelqi bilen bille qaytip kelginide, silerning atimiz Xudaning aldida eyibsiz we pak bolushunglar üchün iradenglarni mustehkem qilghay!

4

Xudani xursen qilidighan hayat yoli

¹Qërindashlar, axirda biz yene shuni dëmekchimizki, Xudani xursen qilish üchün qandaq yashash këreklikini bizdin öginiwaldinglar hemde siler emeliyitinglardimu bizdin ögengininglar boyiche shundaq yashawatisiler. Emdi Xudani xursen qilishqa tëximu tirishishinglarni Rebbimiz Eysaning nami bilen soraymiz. ²Chünki, siler bizning Rebbimiz Eysaning nami bilen silerge yetküzgen telimlirimizni bilisiler. ³Xudaning iradisi shuki, pak bolunglar we jinsiy exlaqsizliqtin saqlininglar; ^4-5Herbiringlar Xudani tonumaydighan ademlerdek shehwaniy heweslerge bërilmey, belki tëninglardiki bu heweslerni bashqurup, pak we izzet-hörmitinglar bilen hayat kechürünglar.^*6Bu yaman ishlarda qërindashliringlarni aldap, ulardin paydilinip ketmenglar. Ilgiri silerni agahlandurghinimizdek, Rebbimiz mana shundaq gunahlar tüpeylidin insanlarni jazalaydu. ⁷Chünki, Xuda bizni napak emes, belki pak yashashqa chaqirdi. ⁸Shuning üchün, bu telimni ret qilghan kishi insanni emes, belki silerge Muqeddes Roh ata qilghan Xudani ret qilghan bolidu.

⁹Qërindashliq mëhir-muhebbitige kelsek, bu toghrisida silerge xet yëzishimizning hajiti yoq. Chünki, Xuda bir-biringlargha mëhir-muhebbet körsitishni ögetken. ¹⁰Emeliyette, siler pütün Makëdoniye ölkisidiki qërindashlargha shundaq qiliwatisiler. Shundaq bolsimu, qërindashlar, mëhir-muhebbet körsitishte tëximu tirishishinglarni soraymiz. ¹¹Silerge tapilighinimizdek, tinch-aman hayat kechürüshke, bashqilarning ishlirigha arilashmay, öz ishinglar bilen bolushqa we ikki bilikinglargha tayinip yashashqa tirishinglar. ¹²Mana shundaq qilsanglar, ëtiqadchilar jama’etchilikining sirtidiki kishiler aldida izzet-hörmetke ige bolup yashiyalaysiler we iqtisad jehette hëchkimge bëqinmaysiler.

Eysa Mesihning qayta këlishi

¹³Qërindashlar, silerning Eysa Mesihke ëtiqad qilmay ümidsizlik ichide yashawatqan kishilerdek hesret chekmeslikinglar üchün, biz, alemdin ötken ëtiqadchilar toghrisidiki heqiqettin xewerdar bolushunglarni xalaymiz. ¹⁴Eysa Mesihning ölüp tirilgenlikige ishengenikenmiz, Eysa Mesih qayta kelgende Xudaning alemdin ötken ëtiqadchilarni Eysa Mesih bilen bille ëlip këlidighanliqigha ishinishimiz kërek. ¹⁵Biz hazir Rebbimizning sözi boyiche silerge shuni ëytimizki, Rebbimiz qayta kelgende, biz hayat yashawatqanlar hergizmu ölüp ketken ëtiqadchilardin awwal Rebbimiz bilen jem bolalmaymiz. ¹⁶Rebbimiz özi bir perman arqiliq bash perishtining awazi we Xuda yangratqan Kanay sadasi bilen asmandin chüshidu. Eysa Mesihke mensup bolup ölüp ketkenler awwal tirilidu. ¹⁷Këyin hayat yashawatqan bizler, yeni bu dunyada hayat kechürüwatqanlar ashu ölgenler bilen birlikte Rebbimiz bilen asmanda körüshüsh üchün, bulutlar arisigha kötürülimiz. Shuningdin këyin, Rebbimiz bilen menggü birge bolimiz. ¹⁸Shunga, bir-biringlarni bu sözler bilen righbetlendürünglar.

5

Rebbimizning qayta këlishini kütüwëlish

¹Qërindashlar, silerge bu ishlarning qachan yüz bëridighanliqi toghrisida yëzishim hajetsiz. ²Chünki, silermu yaxshi bilisiler, Rebbimizning qayta këlidighan küni xuddi këchidiki oghrining këlishige oxshash tuyuqsiz këlidu. ³Kishiler “dunya tinch-aman” dep turghanda, tasadipiy ulargha halaket këlidu. Bu xuddi hamilidar ayalning tolghiqi ushtumtut tutqinigha oxshash bolup, uningdin qëchip qutulghili bolmaydu. ⁴Lëkin, qërindashlar, siler Eysa Mesihke ëtiqad qilghanliqinglar üchün, qarangghuluqta emessiler. Shunga, u kün silerni oghrigha oxshash chöchütüp kelmeydu. ⁵Biz hemmimiz kündüzning, yeni yoruqluqning perzentlirimiz. Hemmimiz këchining, yeni gunahning qarangghuluqigha mensup emesmiz. ⁶Shuning üchün, Eysa Mesihke ëtiqad qilmighanlardek uxlap yatmayli. Eksiche, segek we hoshyar bolayli. ⁷Uxlaydighanlar këchisi uxlaydu, mes bolidighanlarmu këchisi mes bolidu. ⁸Yoruqluqqa mensup bolghan bizler bolsaq üstimizge ëtiqad we mëhir-muhebbet sawutini, bëshimizgha qutquzulush ümidining dubulghisini kiyip, özimizni segek tutushimiz kërek. ⁹Chünki, Xuda bizni öz ghezipige uchrisun dep emes, belki Rebbimiz Eysa Mesih arqiliq qutquzulsun, dep tallighandur. ¹⁰Eysa Mesih biz üchün öldi. Buningdiki meqset, u qayta kelgende, biz meyli hayat yaki ölgen bolayli, bizning uning bilen bille menggü yashishimiz üchündur. ¹¹Shuning üchün, hazirmu bir-biringlarni burunqigha oxshash dawamliq righbetlendürüp, bir-biringlarning ëtiqadini kücheytinglar.

Axirqi telim we salamlar

¹²Qërindashlar, aranglarda japaliq ishlewatqan we Rebbimizning yolida silerge yëtekchilik qilip, nesihet qiliwatqanlarni qedirlishinglarni soraymiz. ¹³Ularning bu xizmetliri üchün ulargha chongqur hörmet we muhebbitinglar bilen mu’amile qilinglar. Bir-biringlar bilen inaq ötünglar. ¹⁴Qërindashlar, silerdin ötünimizki, bikar teleplerni oyghitinglar, yüreksizlerni righbetlendürünglar, ajizliqi bolghanlargha yar-yölek bolunglar we hemme ademge sewrchan bolunglar. ¹⁵Hëchqaysinglar yamanliqqa yamanliq qayturmanglar. Eksiche, bir-biringlargha we barliq kishilerge hemishe yaxshiliq qilishni niyet qilinglar.

¹⁶Her da’im xushal-xuram bolunglar. ¹⁷Hemishe du’a qilinglar. ¹⁸Herqandaq ehwalda Xudagha shükür ëytinglar. Chünki, mana bular Xudaning Eysa Mesihke mensup bolghan silerge qaratqan iradisidur. ¹⁹Muqeddes Rohning qelbinglardiki otini öchürmenglar. ²⁰Aranglarda yetküzülgen wehiylerge sel qarimanglar. ²¹Ularning hemmisini tekshürüp körüp, heqiqeten Xudadin kelgen yaki kelmigenlikini perq ëtip, Xudadin kelgen wehiyni qobul qilinglar. ²²Her xil yamanliqlardin yiraq turunglar.

²³Bizge amanliq ata qilghuchi Xuda özi silerni teltöküs pak qilghay. Rebbimiz Eysa Mesih qayta kelgüche Xuda rohinglar, jëninglar we tëninglarni eyibsiz saqlighay. ²⁴Silerni chaqirghan Xuda jezmen shundaq qilidu. U ishenchliktur!

²⁵Qërindashlar, biz üchün du’a qilinglar. ²⁶Hemme qërindashlar bilen mëhribanlarche salamlishinglar. ²⁷Rebbimizning nami bilen silerning bu xetni shu yerdiki hemme qërindashlargha oqup bërishinglarni tapilaymen.

²⁸Rebbimiz Eysa Mesihning mëhir-shepqiti silerge yar bolghay!