Zifaniya
1
1Bu, Zifaniyaƣa Pərwərdigardin kəlgən wəⱨiydur. Zifaniya Kuxning oƣli, Kux Gidalyaning oƣli, Gidalya Amaryaning oƣli, Amarya Hizkiyaning oƣlidur. Xu waⱪitta Amonning oƣli Yoxiya Yəⱨudiyəgə padixaⱨ idi.
Pərwərdigarning soraⱪ küni
2Pərwərdigar mundaⱪ dəydu:
“Mən yər yüzidiki ⱨəmmə nərsini süpürüp taxlaymən.
3Insanlarni, ⱨaywanlarni, asmandiki ⱪuxlarni, dengizdiki beliⱪlarni ⱨalak ⱪilimən.
Rəzillərni yiⱪitimən. Yər yüzidin insanlarni yoⱪ ⱪilimən.
Buni mən Pərwərdigar jakarlidim.
4Mən Yəⱨudiyə wə Yerusalemda yaxawatⱪanlarni jazalax üqün ⱪol kɵtürimən.
Ilaⱨ Ba’alƣa qoⱪunidiƣanlarning ⱨəmmisini yoⱪ ⱪilimən,
butpərəs roⱨaniylar ⱨeqkimning esidə ⱪalmaydu.
5Ɵgzilərgə qiⱪiwelip, kün, ay wə yultuzlarƣa qoⱪunidiƣanlarni,
manga səjdə ⱪilip, mening namimda ⱪəsəm ⱪilƣan turuⱪluⱪ
yənə ilaⱨ Moləkning nami bilən ⱪəsəm ⱪilƣanlarni ⱨalak ⱪilimən.
6Məndin waz kəqkən, meni izdimigən,
məndin məsliⱨət sorimiƣanlarni yoⱪ ⱪilimən.”
7Igimiz Pərwərdigarning aldida jim turunglar,
qünki Pərwərdigarning soraⱪ küni kelidiƣanƣa az ⱪaldi.
U ɵz həlⱪini ⱪurbanliⱪⱪa təyyarlap, ⱪurbanliⱪ ⱪilƣuqilarni tallidi.
8Pərwərdigar mundaⱪ dəydu:
“Manga ⱪurbanliⱪ ⱪilinidiƣan küni əməldarlarni, han jəmətidikilərni wə
yat həlⱪlərning ɵrp-adətlirigə berilgənlərni jazalaymən.
9U küni butpərəslərning adətliridək bosuƣa atliƣanlarni* wə
hojayinlirining ɵyliridə
zorawanliⱪ wə aldamqiliⱪ ⱪilƣanlarni jazalaymən.”
10Pərwərdigar mundaⱪ dəydu:
“U küni silər beliⱪ dərwazisidin yiƣa awazini,
xəⱨərning yengi məⱨəllisidin pəryad awazini
wə taƣlardin güldürligən awazni anglaysilər.
11Əy bazardiki halayiⱪ, pəryad ⱪilinglar,
qünki pütün sodigərlər ⱨalak bolidu,
setiⱪqilar yoⱪitilidu.
12U qaƣda, mən Yerusalemni qiraƣ bilən yorutup, təkxürüp qiⱪimən.
Gunaⱨⱪa petip olturƣan bipərwa gunaⱨkarlarni,
yəni ‘ Huda yahxiliⱪmu ⱪilmaydu, yamanliⱪmu ⱪilmaydu’ degüqilərni jazalaymən.
13Ularning mal-dunyaliri bulang-talangƣa uqraydu,
ɵyliri harabilikkə aylandurulidu.
Ular ⱨeqⱪaqan ɵzliri salƣan ɵylərdə olturalmaydu.
Ularƣa ɵz üzümzarliⱪidin qiⱪⱪan xarabni iqix nesip bolmaydu.”
14Pərwərdigarning qong soraⱪ künining kelixigə az ⱪaldi,
az ⱪaldi, u kün naⱨayiti tezla kelidu!
U külpətlik bir kündur!
U qaƣda əng batur əzimətmu pəryad ⱪilidu!
15U ƣəzəp, dərd-ələm künidur,
harab bolidiƣan, wəyran bolidiƣan kündur,
ⱪarangƣu zulmət wə ⱪara bulutlar ⱪaplaydiƣan kündur.
16U, burƣilar qelinip, quⱪan-sürənlər selinip,
mustəⱨkəm xəⱨərlər wə egiz munarlarƣa ⱨujum ⱪilinidiƣan kündur.
17Pərwərdigar mundaⱪ dəydu:
“Mən insanlarƣa balayi’apət əkelip,
ularni əmalardək timisⱪilap mangdurimən.
Qünki ular manga ⱪarxi gunaⱨ ⱪildi.
Ularning ⱪanliri yundidək tɵkülüp,
jəsətliri qiritilip taxlinidu.”
18Pərwərdigarning ƣəzipi kəlgən küni
altun-kümüxlirimu ularni ⱪutⱪuzalmaydu.
Uning rəxk oti pütün zeminni kɵydürüp,
yər yüzidiki ⱨəmmə insanlarni dəⱨxətlik ⱨalda ⱨalak ⱪilidu.
2
Həlⱪni towa ⱪilixⱪa muraji’ət ⱪilix
1Əy nomussiz həlⱪ, uyⱪungni aq!
2Waⱪtinglar samandək tozup, bəlgiləngən waⱪit yetip kəlməstə,
Pərwərdigarning ƣəzəp oti yanmasta,
uning ⱪəⱨr-ƣəzəp küni yetip kəlməstə
uyⱪungni aq!
3Əy, Pərwərdigarning əmrlirigə kəmtərlik bilən ⱪulaⱪ salƣuqilar,
Pərwərdigarni izdənglar!
Adalətni ⱪoƣlixip,
kəmtər bolunglar.
Pərwərdigarning soraⱪ künidə
bəlkim silər Pərwərdigarning ƣəzipidin ⱪoƣdilip ⱪalisilər.
Isra’iliyəning ⱪoxnilirining ⱨaliƣa way
4Gaza xəⱨiridə ⱨeqkim ⱪalmaydu,
Axⱪilon ⱪaⱪaslixip ketidu.
Axdodluⱪlar qüxkiqə ⱪoƣlap qiⱪirilidu.
Əⱪron aⱨalilirimu xəⱨərdin yiltizi bilən ⱪomurup taxlinidu.
5Əy dengiz boyidiki Kiretlər, ⱨalinglarƣa way!
Əy Kən’anda turidiƣan Filistiyəliklər,
Pərwərdigar silər ⱪarxi mundaⱪ dəydu:
“Mən silərni wəyran ⱪilimən,
biringlarnimu ⱪoymay yoⱪ ⱪilimən.”
6Dengiz boyidiki jayinglar bayawanƣa aylinip,
pəⱪət malqilarning kəpiliri bilən ⱪoy ⱪotanlirila ⱪalidu.
7Yər-zeminliringlarni aman ⱪalƣan Yəⱨuda ⱪəbilisidikilər igiləydu.
Ular u yərlərdə ⱪoy beⱪip,
Axⱪilondiki ɵylərdə keqisi yatidu.
Pərwərdigar Huda ularning ⱨalidin həwər elip,
ilgiriki parawan ⱨayatini əsligə kəltüridu.
8-9Ⱪudrətlik Sərdar Pərwərdigar mundaⱪ dəydu:
“Mən Mo’ablarning məshiriliri
wə Ammonlarning ⱨaⱪarətlirini anglidim.
Ular həlⱪimni məshirə ⱪilip,
zeminlirini besiwalidiƣanliⱪi ⱨəⱪⱪidə jar saldi.
Mən – Isra’illar etiⱪad ⱪilip kəlgən Huda mənggü məwjutluⱪum bilən ⱪəsəm ⱪilimənki,
Mo’ab jəzmən Sodomdək,
Ammonlar Gomoradək wəyran bolidu.
Ularning yərlirini xor wə qeⱪir tikən besip,
mənggülük qɵl-bayawanƣa aylinidu.
Aman ⱪalƣan həlⱪim ularni bulang-talang ⱪilip,
zeminlirini besiwalidu.”
10Mo’ab wə Ammonlar təkəbburlixip,
Ⱪudrətlik Sərdar Pərwərdigarning həlⱪini məshirə ⱪilip, ⱨaⱪarətlidi.
Xuning üqün ular jazasini yəydu.
11Pərwərdigar ularni alaⱪzadə ⱪiliwetidu.
U, dunyadiki sahta ilaⱨlarni yoⱪitidu.
Andin dunyadiki ⱨərbir həlⱪ ɵz tupriⱪida uningƣa ibadət ⱪilidu.
12Pərwərdigar mundaⱪ dəydu:
“Əy Kuxlar*, silərmu uruxta ɵlisilər.”
13Pərwərdigar ximaldiki Assuriyəgə ⱪarxi ⱪol kɵtürüp,
Ninəwi xəⱨirini ⱪaⱪas qɵl-bayawanƣa aylanduruwetidu.
14U yər kala, ⱪoy, wə ⱨər hil ⱨaywanlarning makani bolup ⱪalidu.
Harabiliklərdiki tüwrüklərni ⱨuwⱪuxlar makan ⱪilip,
deriziliridə ⱨuwlixidu.
Ⱪaƣilar bosuƣilarda ⱪaⱪildixidu.
Imarətlərning kedir yaƣaqliri ⱪomurulup ketidu.
15Bu xəⱨərning aⱪiwiti mana muxundaⱪ bolidu.
Bu xəⱨər: “Mən büyük xəⱨərdurmən, mening təngdixim yoⱪtur” dəp, mahtinip,
ɵzini hatirjəm ⱨes ⱪilixidu,
biraⱪ u ⱪaⱪaslixip, yawayi ⱨaywanlarning makaniƣa aylinidu.
U yərdin ɵtkən-kəqkənlər ⱪollirini xiltixip, məshirə ⱪilixidu.
3
Yerusalem xəⱨirining gunaⱨliri
1Asiyliⱪⱪa, qiriklikkə wə zulumƣa tolƣan Yerusalemning ⱨaliƣa way!
2U ⱨeqkimgə boysunmidi.
Ⱨeqkimning tərbiyəsini ⱪobul ⱪilmidi.
U Pərwərdigarƣa tayanmidi,
Hudaƣa yeⱪinlaxmidi.
3Uning əməldarliri ⱨɵrkirigən xirlarƣa ohxaydu;
soraⱪqiliri bir tal sɵngəknimu ətigə ⱪaldurmaydiƣan aq bɵrilərdəktur.
4Pəyƣəmbərliri təkəbbur, ⱨiyligərdur.
Roⱨaniyliri ibadəthanini bulƣap,
Hudaning ⱪanunini dəpsəndə ⱪilidu.
5Pərwərdigar yənila adalətliktur, Yerusalem bilən billidur.
U adalətsiz ixlarni ⱨərgiz ⱪilmaydu.
Ⱨər küni ⱨəⱪiⱪətni üzüp ⱪoymay namayan ⱪilsimu,
lekin adalətsizlər nomus ⱪilmaydu.
6Pərwərdigar mundaⱪ dəydu:
“Yat həlⱪlərni yoⱪattim,
ularning xəⱨər wə sepil munarlirini gumran ⱪildim.
U yərdin ⱨeqkim ɵtməydiƣan boldi.
Ularning xəⱨərlirini harabigə aylandurdum.
Koqilirini qɵlləxtürüp, ⱨeqkimni ⱪaldurmidim.
7U qaƣda ‘həlⱪim qoⱪum məndin əyminip, tərbiyəmni ⱪobul ⱪilidu.
Xundaⱪ bolƣanda, bekitkinim boyiqə ularning turalƣulirini wəyran ⱪiliximning zɵrüriyiti ⱪalmaydu’ dəp oyliƣanidim.
Lekin ular yaman ixlarƣa tehimu məptun bolup ⱪaldi.”
8Pərwərdigar mundaⱪ dəydu:
“Əmdi meni kütünglar,
mening soraⱪ künümni kütünglar!
Mən ⱨəmmə əllər wə həlⱪlərni yiƣip,
ularƣa ⱪəⱨr-ƣəzipimni qeqix ⱪarariƣa kəldim.
Pütün dunya ƣəzəp otum bilən wəyran ⱪilinidu.”
Yerusalemning ⱪutⱪuzuluxi
9“Keyin, pütün həlⱪlərning manga bir niyəttə ibadət ⱪilip,
birliktə hizmət ⱪilixi üqün,
ularning eƣizlirini paklaymən.
10Tarⱪitiwetilgən həlⱪim Kux dəryalirining ⱪarxi ⱪirƣaⱪliridin kelip,
manga ⱨədiyə təⱪdim ⱪilidu.
11Əy həlⱪim,
u qaƣda silərning məndin yüz ɵrügininglar üqün
nomus ⱪilixinglarning ⱨajiti ⱪalmaydu.
Qünki mən iqinglardiki təkəbbur wə ⱨakawurlarni yoⱪitimən.
Silər mening muⱪəddəs teƣimda ⱪayta kibirlik ⱪilmaysilər.
12Mən iqinglardiki kəmtər wə peⱪir kixilərni ⱪaldurimən.
Ular mening namimdin panaⱨliⱪ izdəydu.
13Ⱨayat ⱪalƣan Isra’illar
yaman ixlarni ⱪilmaydu,
yalƣan sɵzliməydu,
aldamqiliⱪ ⱪilmaydu.
Ular yəp-iqip hatirjəm yaxaydu,
ⱨeqkim ularni ⱪorⱪutmaydu.”
Huxalliⱪ munajiti
14Əy Si’on ⱪizi*, təntənə ⱪil, əy Isra’il, quⱪan sal!
Əy Yerusalem ⱪizi, huxalliⱪⱪa qɵm!
15Pərwərdigar seni jazalaxtin yandi!
U sening düxmənliringni ⱪoƣlap qiⱪardi.
Pərwərdigar – Isra’iliyəning padixaⱨi
sən bilən billidur,
sening əmdi bala-ⱪazadin ⱪorⱪuxung biⱨajəttur.
16Xu küni Yerusalemƣa mundaⱪ deyilidu:
“Əy Si’on, ⱪorⱪma!
Ⱪolliring boxixip kətmisun,
17Pərwərdigaring Huda sən bilən billidur,
u ⱪudrətlik ⱪutⱪuzƣuqidur.
U səndin huxal bolup, təntənə ⱪilidu.
U muⱨəbbiti bilən sanga təsəlli beridu.
U səndin xadlinip, nahxa eytidu.”
18Pərwərdigar mundaⱪ dəydu:
“Silər ⱨeyt ⱪilalmiƣanliⱪinglardin məyüsləngənidinglar,
silərni əmdi yiƣip, nomusta ⱪaldurmaymən.
19Xu qaƣda mən silərgə zulum salƣanlarning ⱨəmmisini jazalaymən.
Ajizlarni ⱪutⱪuzup,
sürgündikilərni yiƣimən.
Ularning nomusini xərəpkə aylandurup,
namini pütün dunyaƣa tarⱪitimən.
20U qaƣda mən silərni yiƣip,
yurtunglarƣa apirimən.
Uningdin keyin, dangⱪinglarni pütün dunyaƣa tarⱪitimən.
Silərni ⱪayta gülləndürüp, mədⱨiyə wə xan-xərəpkə sazawər ⱪilimən.”