ئۇيغۇرچە مۇقەددەس كىتاب جەمئىيىتى

Yuⱨanna yazƣan birinqi hət

1

Əysa Məsiⱨ – ⱨayatliⱪ kalamidur

¹Biz bu hetimizdə silərgə əzəldin bar bolƣan ⱨayatliⱪ kalami toƣrisida bayan ⱪilmaⱪqimiz. Biz bu ⱨayatliⱪ kalamini ɵz ⱪuliⱪimiz bilən angliƣan, ɵz kɵzimiz bilən kɵrgən wə kɵzətkən ⱨəmdə uni ɵz ⱪollirimiz bilən tutⱪan. ²Bu ⱨayatliⱪ bizgə ayan boldi. Biz uni kɵrduⱪ. Xunga, bu ⱨəⱪtə guwaⱨliⱪ berimiz ⱨəmdə əslidə ərxtiki Atimiz bilən billə bolup, keyin bizgə ayan bolƣan bu mənggülük ⱨayatni silərgə bayan ⱪilimiz. ³Silərningmu biz bilən ⱪerindax boluxunglar üqün, kɵrgən wə angliƣanlirimizni silərgə yətküzüwatimiz. Biz bundaⱪ ⱪerindaxliⱪtin billə bəⱨrimən bolalaymiz. Qünki, biz ⱨəmmimiz birliktə atimiz wə uning oƣli Əysa Məsiⱨkə baƣlanduⱪ. ⁴Ⱨəmmimizning huxalliⱪi tolup taxsun dəp, bularni silərgə yeziwatimiz.

Hudaning yoruⱪluⱪida pak yaxiximiz kerək

⁵Biz Əysa Məsiⱨtin angliƣan ⱨəm silərgə yətküzməkqi bolƣan həwər dəl xuningdin ibarətki, Huda yoruⱪluⱪtur, uningda ⱨeqⱪandaⱪ ⱪarangƣuluⱪ bolmaydu. ⁶Əgər ɵzimizni Hudaƣa yeⱪin dəp turup, yənila gunaⱨ ɵtküzüp, ⱪarangƣuluⱪta mengiwərsək, yalƣan eytⱪan wə ⱨəⱪiⱪətkə əməl ⱪilmiƣan bolimiz. ⁷Xunga, Huda yoruⱪluⱪta bolƣinidək, bizmu yoruⱪluⱪta bolsaⱪ, bir-birimizgə yeⱪin bolimiz ⱨəm Hudaning Oƣli Əysa Məsiⱨning ⱪurbanliⱪ ⱪeni bizni barliⱪ gunaⱨtin pak ⱪilidu. ⁸Gunaⱨimiz yoⱪ desək, ɵz-ɵzimizni aldiƣan bolimiz wə ⱨəⱪiⱪət ⱪəlbimizdin orun almiƣan bolidu. ⁹Gunaⱨlirimizni iⱪrar ⱪilsaⱪ, ixənqlik wə adil Huda gunaⱨlirimizni kəqürüm ⱪilip, bizni barliⱪ gunaⱨlirimizdin pak ⱪilidu. ¹⁰Gunaⱨ ⱪilmiduⱪ desək, Hudani yalƣanqi ⱪilip ⱪoyƣan bolimiz wə uning sɵzi ⱪəlbimizdin orun almiƣan bolidu.

2

Əysa Məsiⱨ – aⱪliƣuqimizdur

¹Əziz balilirim, mən silərni gunaⱨ sadir ⱪilmisun dəp, bu sɵzlərni yazmaⱪtimən. Mubada birimiz gunaⱨ sadir ⱪilsaⱪ, aⱪliƣuqimiz bolƣan adil Əysa Məsiⱨ ərxtiki atimizning aldida bizni aⱪlaydu. ²Əysa Məsiⱨ gunaⱨlirimizning kəqürüm ⱪilinixi üqün ⱪilinƣan ⱪurbanliⱪtur. Uning ɵz jenini ⱪurban ⱪilixi pəⱪət bizning gunaⱨlirimiz üqünla əməs, bəlki pütkül dunyadiki insanlarning gunaⱨliri üqündur.

³Hudaning əmrlirigə əməl ⱪilsaⱪ, u qaƣda Hudani tonuƣanliⱪimizni bilələymiz. ⁴“Hudani tonuymən” dəp turup, uning əmrlirigə əməl ⱪilmiƣan kixi yalƣanqidur, uningda ⱨəⱪiⱪət yoⱪtur. ⁵Lekin, Hudaning sɵzigə əməl ⱪilsaⱪ, Hudaƣa bolƣan meⱨir-muⱨəbbitimizni ⱨəⱪiⱪətən mukəmməl ipadiligən bolimiz. Ɵzimizning Hudaƣa baƣlinip yaxawatⱪanliⱪimizni ənə xuningdin bilələymiz. ⁶“Hudaƣa baƣlinip yaxaymən” degən kixi Əysa Məsiⱨkə ohxax yaxixi kerək.

Ⱪerindaxlarƣa meⱨir-muⱨəbbət kɵrsitiximiz kerək

⁷Ⱪədirlik ⱪerindaxlar, silərgə burun anglap baⱪmiƣan yengi bir əmrni əməs, bəlki burundin tartip silər ⱪobul ⱪilip keliwatⱪan kona əmrni yazmaⱪtimən. Bu əmr Hudaning silər burundinla anglap keliwatⱪan sɵzidur. ⁸Lekin, bu əmrni yengi əmr desəkmu bolidu. Qünki, uning ⱨəⱪiⱪət ikənliki Əysa Məsiⱨning ⱨayatida wə silərning ⱨayatinglarda namayan boldi. Ⱪarangƣuluⱪ ahirlaxmaⱪta, ⱨəⱪiⱪiy yoruⱪluⱪ bolsa ɵz nurini qeqixⱪa baxlimaⱪta. ⁹Kimdəkim ɵzini “yoruⱪluⱪta yaxawatimən” dəp turup, ⱪerindixiƣa ɵqmənlik ⱪilsa, u yənila ⱪarangƣuluⱪta turuwatⱪan bolidu. ¹⁰Ⱪerindixiƣa meⱨir-muⱨəbbət kɵrsətkən kixi yoruⱪluⱪta yaxaydu, uningda gunaⱨⱪa baxlaydiƣan ⱨeqnemə ⱪalmaydu. ¹¹Lekin, ⱪerindixiƣa ɵqmənlik ⱪilƣan kixi ⱪarangƣuluⱪtidur. U ⱪarangƣuluⱪta mangidu wə ⱪəyərgə ketiwatⱪanliⱪini bilməydu, qünki ⱪarangƣuluⱪ uning kɵzlirini kor ⱪiliwətkən.

¹²Əziz balilirim, mən bu hetimni silərgə yeziwatimən,

qünki gunaⱨliringlar Əysa Məsiⱨ arⱪiliⱪ kəqürüm ⱪilindi.

¹³Atilar, buni silərgə yeziwatimən,

qünki silər əzəldin bar bolƣuqini tonudunglar.

Yigitlər, buni silərgə yeziwatimən,

qünki silər Xəytan üstidin ƣəlibə ⱪildinglar.

¹⁴Əziz balilirim, buni silərgə yeziwatimən,

qünki silər ərxtiki atimizni tonudunglar.

Atilar, buni silərgə yeziwatimən,

qünki silər əzəldin bar bolƣuqini tonudunglar.

Yigitlər, buni silərgə yeziwatimən,

qünki etiⱪadinglar küqlük,

Hudaning sɵzi ⱪəlbinglarda yaxaydu,

Xəytan üstidinmu ƣəlibə ⱪildinglar.

¹⁵Bu dunyani wə bu dunyadiki ixlarni sɵymənglar. Bu dunyani sɵysənglar, ərxtiki atimizni sɵymigən bolisilər. ¹⁶Qünki, bu dunyadiki ixlar, yəni jismaniy ⱨəwəs, aqkɵzlük wə məƣrurluⱪⱪa ohxaxlarning ⱨəmmisi bu dunyaƣa mənsup bolup, ular ⱨərgizmu ərxtiki atimizdin kəlgən əməs. ¹⁷Bu dunya wə uningdiki ⱨəwəslərning ⱨəmmisi ɵtüp ketidu. Lekin, Hudaning iradisigə əməl ⱪilƣan kixi mənggü yaxaydu.

Əysa Məsiⱨning rəⱪibi

¹⁸Əziz balilirim, zaman ahiri bolup ⱪaldi. Silər Əysa Məsiⱨning rəⱪibining ahir zamanda kelidiƣanliⱪini angliƣan. Əməliyəttə, ⱨazirning ɵzidila nurƣunliri məydanƣa qiⱪti. Buningdin zaman ahiri bolup ⱪalƣanliⱪi bizgə məlum. ¹⁹Ular arimizdin qiⱪti, lekin ular bizning kixilirimizdin əməs. Qünki, bizning kixilirimizdin bolƣan bolsa, bizdin ayrilmiƣan bolatti. Ularning ayrilip ketixi ⱨeqⱪaysisining rasttinla bizning kixilirimizdin əməslikini kɵrsitip bərdi.

²⁰Silər bolsanglar Əysa Məsiⱨtin Muⱪəddəs Roⱨni ⱪobul ⱪildinglar. Xuning üqün, ⱨəmminglar ⱨəⱪiⱪətni bilisilər. ²¹Silərgə bu hətni yeziximdiki səwəb, silərning ⱨəⱪiⱪətni bilmigənlikinglar üqün əməs, bəlki ⱨəⱪiⱪətni bilip, yalƣanqiliⱪning ⱨəⱪiⱪəttin kelip qiⱪmaydiƣanliⱪini qüxəngənlikinglar üqündur.

²²Əmisə, kim uqiƣa qiⱪⱪan yalƣanqi? Ⱨəzriti Əysani rət ⱪilip, uni “Məsiⱨ, yəni ⱪutⱪuzƣuqi əməs” dəp ⱪariƣan adəm uqiƣa qiⱪⱪan yalƣanqidur! Ərxtiki atimizni wə uning oƣli Əysa Məsiⱨni rət ⱪilƣan kixi Əysa Məsiⱨning rəⱪibidur. ²³Huda ɵz oƣlini rət ⱪilƣanlarning atisi bolmaydu. Əksiqə, uni etirap ⱪilƣanlarning atisi bolidu.

²⁴Burundin anglap keliwatⱪan təlimni dawamliⱪ ⱪəlbinglarda saⱪlanglar. Xundaⱪ ⱪilsanglar, silərmu dawamliⱪ ərxtiki Atimiz wə uning oƣliƣa baƣlinip yaxawatⱪan bolisilər. ²⁵Əysa Məsiⱨning bizgə ⱪilƣan wədisi bizni mənggü ⱨayatliⱪⱪa erixtürüxtur.

²⁶Silərni azdurmaⱪqi bolƣanlarni kɵzdə tutup, bularni silərgə yazdim. ²⁷Silərgə kəlsək, Əysa Məsiⱨ silərgə ata ⱪilƣan Muⱪəddəs Roⱨ ⱪəlbinglarda bolƣaqⱪa, silər baxⱪilarning yengi təlimigə moⱨtaj əməssilər. Muⱪəddəs Roⱨ silərgə ⱨəmmə ⱨəⱪiⱪətni ɵgitidu. Qünki, u ⱨəⱪtur, yalƣan əməstur. Xunga, muxu ⱨəⱪiⱪət boyiqə dawamliⱪ Əysa Məsiⱨkə baƣlinip yaxanglar.

²⁸Demək, əziz balilirim, dawamliⱪ Əysa Məsiⱨkə baƣlinip yaxanglar. Xundaⱪ ⱪilsanglar, u ⱪaytip kəlgəndə yürikimiz toⱪ turidu ⱨəm uning aldida hijalətqiliktə ⱪalmaymiz. ²⁹Hudaning adil ikənlikini bilgənikənsilər, adilliⱪⱪa əməl ⱪilƣuqilarning uning pərzəntliri ikənlikinimu bilələysilər.

3

Biz Hudaning pərzəntliri

¹Ⱪaranglar, ərxtiki Atimiz bizgə nəⱪədər meⱨir-muⱨəbbət kɵrsətkən-ⱨə! Uning meⱨir-muⱨəbbiti xunqilik qongⱪurki, u bizni “pərzəntlirim” dəp atidi. Ⱨəⱪiⱪətənmu biz Hudaning pərzəntlirimiz. Biraⱪ, Əysa Məsiⱨkə etiⱪad ⱪilmiƣanlar ərxtiki atimizni tonumiƣanliⱪtin, bizning Hudaning pərzəntliri ikənlikimiznimu tonup yetəlməydu. ²Ⱪədirlik ⱪerindaxlar, biz ⱨazir Hudaning pərzəntlirimiz, lekin kəlgüsidə ⱪandaⱪ bolidiƣanliⱪimiz tehi bizgə oquⱪ ayan ⱪilinmiƣan. Biraⱪ, Əysa Məsiⱨ ⱪaytip kəlgəndə, uningƣa ohxax bolidiƣanliⱪimizni bilimiz. Qünki, xu qaƣda u ⱪandaⱪ bolsa, biz uni xu peti kɵrimiz. ³Əysa Məsiⱨkə bu ümidni baƣliƣan ⱨərⱪandaⱪ kixi ɵzini pak tutidu. Qunki, Əysa Məsiⱨ paktur.

⁴Gunaⱨ sadir ⱪilƣan kixi Hudaning ⱪanuniƣa hilapliⱪ ⱪilƣan bolidu. Qünki, gunaⱨ sadir ⱪilƣanliⱪ Hudaning ⱪanuniƣa hilapliⱪ ⱪilƣanliⱪtur. ⁵Ⱨalbuki, silər Əysa Məsiⱨning insanlarni gunaⱨidin azad ⱪilix üqün dunyaƣa kəlgənlikini wə uning gunaⱨsiz ikənlikini bilisilər. ⁶Xunga, Əysa Məsiⱨkə baƣlinip yaxawatⱪan kixi gunaⱨ sadir ⱪiliwərməydu. Gunaⱨ sadir ⱪiliweridiƣan kixi Əysa Məsiⱨni qüxənmigən wə uni tonup yətmigən bolidu.

⁷Əziz balilirim, kixilər silərni aldap kətmisun. Ⱨəⱪⱪaniyliⱪⱪa əməl ⱪilƣan kixi Əysa Məsiⱨ ⱨəⱪⱪaniy bolƣinidək ⱨəⱪⱪaniydur. ⁸Lekin, gunaⱨ sadir ⱪiliweridiƣan kixi Xəytanƣa mənsuptur. Qünki, Xəytan əlmisaⱪtin tartip gunaⱨ sadir ⱪilip kəlməktə. Hudaning Oƣli Əysa Məsiⱨning dunyaƣa kelixtiki məⱪsiti Xəytanning ⱪilmixlirini yoⱪitixtur. ⁹Hudaning pərzənti bolƣan kixi gunaⱨ sadir ⱪiliwərməydu. Uningda Hudaning təbi’iti məwjut bolƣaqⱪa, gunaⱨ sadir ⱪiliwerəlməydu. ¹⁰Ⱨəⱪⱪaniy yol tutmaydiƣan yaki ⱪerindixiƣa meⱨir-muⱨəbbət kɵrsətməydiƣan kixi Hudaning pərzənti əməstur. Hudaning pərzəntliri bilən Xəytanning pərzəntliri mana muxuning bilən pərⱪlinidu.

Bir-birimizgə meⱨir-muⱨəbbət kɵrsitəyli

¹¹Bir-birimizgə meⱨir-muⱨəbbət kɵrsitəyli! Mana bu, silər burundin anglap keliwatⱪan təlim. ¹²Xəytanƣa mənsup bolup, inisini ɵltürgən Ⱪabilƣa ohxax bolmanglar! Ⱪabil nemixⱪa inisiƣa ɵqmənlik ⱪilip, uni ɵltürdi? U ɵzining ⱪilƣanliri naⱨəⱪ, inisining ⱪilƣanliri ⱨəⱪ bolƣanliⱪi üqün xundaⱪ ⱪilƣan. ¹³Xunga, ⱪerindaxlar, Əysa Məsiⱨkə etiⱪad ⱪilmiƣanlar silərgə ɵqmənlik ⱪilsa, buningƣa ⱨəyran ⱪalmanglar. ¹⁴Biz ⱪerindaxlarƣa meⱨir-muⱨəbbət kɵrsətkənlikimizdin, ɵlümdin mənggülük ⱨayatⱪa ɵtkənlikimizni bilimiz. Meⱨir-muⱨəbbətlik bolmiƣan kixi ɵlümning ilkidə ⱪalidu. ¹⁵Ⱪerindixiƣa ɵqmənlik ⱪilƣan kixi Hudaning nəziridə ⱪatildur. Ⱨeqⱪandaⱪ bir ⱪatilning mənggülük ⱨayatⱪa igə bolalmaydiƣanliⱪini bilisilər. ¹⁶Biz meⱨir-muⱨəbbətning nemə ikənlikini, Əysa Məsiⱨning biz üqün ɵz jenini pida ⱪilƣanliⱪidin bilələymiz. Xunga, bizmu ⱪerindaxlirimiz üqün ɵz jenimizni pida ⱪilixⱪa təyyar turuximiz kerək. ¹⁷Əgər mal-dunyasi bar bolƣan kixi ⱪerindixining eⱨtiyajini kɵrüp turup, uningƣa yardəm ⱪilmisa, bundaⱪ kixidə nədimu Hudaning meⱨir-muⱨəbbiti bolsun? ¹⁸Əziz balilirim, ⱪuruⱪ sɵz bilən əməs, bəlki əməliyət wə ⱨəⱪiⱪət bilən baxⱪilarƣa meⱨir-muⱨəbbət kɵrsitəyli.

Huda aldida yürikimiz toⱪ bolsun

¹⁹Biz ⱪerindaxlirimizƣa meⱨir-muⱨəbbət kɵrsətkənlikimizdin ɵzimizning ⱨəⱪiⱪətkə mənsup ikənlikimizni bilələymiz wə Hudaning aldida ɵzimizni hatirjəm ⱪilalaymiz. ²⁰Xundaⱪtimu, bəzidə wijdanimiz yənila azablansa, xuni biliximiz kerəkki, Huda wijdanimizdin uluƣ wə ⱨəmmini bilgüqidur. ²¹Ⱪədirlik ⱪerindaxlar, əgər wijdanimiz azablanmisa, yürikimiz toⱪ ⱨalda Hudaning aldiƣa baralaymiz. ²²Xundaⱪla, Hudaning əmrlirigə əməl ⱪilip, uni hursən ⱪilidiƣan ixlarni ⱪilƣanliⱪimizdin, uningdin tiligənlirimizgə erixələymiz. ²³Hudaning əmri xuki, uning oƣli Əysa Məsiⱨkə etiⱪad ⱪiliximiz ⱨəmdə Əysa Məsiⱨning bizgə buyruƣinidək, bir-birimizgə meⱨir-muⱨəbbət kɵrsitiximizdin ibarəttur. ²⁴Hudaning əmrlirigə əməl ⱪilƣan kixi Hudaƣa baƣlinip yaxiƣan wə Huda uning ⱪəlbidə yaxiƣan bolidu. Hudaning ⱪəlbimizdə yaxaydiƣanliⱪini uning bizgə ata ⱪilƣan Muⱪəddəs Roⱨidin bilimiz.

4

Sahta pəyƣəmbərlərdin ⱨəzər əylənglar

¹Ⱪədirlik ⱪerindaxlar, “Muⱪəddəs Roⱨ arⱪiliⱪ wəⱨiy yətküzdum” dəydiƣanlarning ⱨəmmisigila ixənmənglar. Ularning roⱨining Hudadin kəlgən-kəlmigənlikini pərⱪləndürüx üqün, ularni sinanglar. Qünki, nurƣun sahta pəyƣəmbərlər dunyaning ⱨəmmə jaylirida pəyda boldi. ²Bir kixidə Hudaning Roⱨining bar yaki yoⱪluⱪini mundaⱪ pərⱪləndürüxkə bolidu: Əysa Məsiⱨning dunyaƣa insan tenidə kəlgənlikini etirap ⱪilƣan kixidə Hudaning Roⱨi bar bolidu. ³Biraⱪ, buni etirap ⱪilmiƣan kixidə^* Hudaning Roⱨi yoⱪ bolidu. Bundaⱪlarda Əysa Məsiⱨning rəⱪibining roⱨi bardur. Bu roⱨning kelidiƣanliⱪi toƣruluⱪ angliƣanidinglar. Dərwəⱪə, u ⱨazirmu dunyada məwjuttur.

⁴Əziz balilirim, silər bolsanglar Hudaƣa mənsup, silər sahta pəyƣəmbərlər üstidin ƣəlibə ⱪildinglar. Qünki, silərdiki Muⱪəddəs Roⱨning küq-ⱪudriti bu dunyadiki Xəytanning küqidin uluƣdur. ⁵Sahta pəyƣəmbərlər bu dunyaƣa mənsup. Xunga, ular bu dunyaning sɵzlirini ⱪilidu, Əysa Məsiⱨkə etiⱪad ⱪilmiƣanlarmu ularning sɵzlirini anglaydu. ⁶Biz bolsaⱪ Hudaƣa mənsup. Xunga, Hudani tonuƣan kixi bizning sɵzlirimizni anglaydu. Hudaƣa mənsup bolmiƣan kixi bolsa bizning sɵzlirimizni anglimaydu. Mana buningdin bir kixidə ⱨəⱪiⱪətkə yetəkləydiƣan Roⱨ yaki yalƣanqiliⱪⱪa azduridiƣan roⱨning barliⱪini bilgili bolidu.

Huda ɵzi meⱨir-muⱨəbbəttur

⁷Ⱪədirlik ⱪerindaxlar, bir-birimizgə meⱨir-muⱨəbbət kɵrsitəyli. Qünki, meⱨir-muⱨəbbətning ɵzi Hudadin kelidu. Meⱨir-muⱨəbbət kɵrsətkən kixi Hudaning pərzənti bolƣan bolidu wə Hudani tonuydu. ⁸Meⱨir-muⱨəbbət kɵrsətmigən kixi Hudani tonumiƣan bolidu. Qünki, Huda ɵzi meⱨir-muⱨəbbəttur. ⁹Huda bizni mənggülük ⱨayatⱪa erixtürüx üqün ɵzining birdinbir yeganə oƣlini bu dunyaƣa əwətti wə buning bilən bizgə bolƣan meⱨir-muⱨəbbitini kɵrsətti. ¹⁰Ⱨəⱪiⱪiy meⱨir-muⱨəbbət bizning Hudaƣa kɵrsətkən meⱨir-muⱨəbbitimiz əməs, bəlki Hudaning bizgə kɵrsətkən meⱨir-muⱨəbbitidur. Qünki, u bizning gunaⱨlirimizning kəqürüm ⱪilinixi üqün, ɵz oƣlini ⱪurban boluxⱪa əwətti.

¹¹Ⱪədirlik ⱪerindaxlar, Huda bizgə xu ⱪədər meⱨir-muⱨəbbət kɵrsətkən yərdə, bizmu bir-birimizgə meⱨir-muⱨəbbət kɵrsitiximiz kerək. ¹²Ⱨeqkim ⱨeqⱪaqan Hudani kɵrgən əməs, lekin bir-birimizgə meⱨir-muⱨəbbət kɵrsətsək, Huda ⱪəlbimizdə yaxaydu wə uning meⱨir-muⱨəbbiti ⱨayatimizda mukəmməl ipadiləngən bolidu. ¹³Hudaƣa baƣlinip yaxawatⱪanliⱪimizni wə Hudaning bizning ⱪəlbimizdə yaxawatⱪanliⱪini uning ɵz Roⱨini bizgə ata ⱪilƣanliⱪidin bilimiz. ¹⁴Ərxtiki atimiz ɵz oƣli Əysa Məsiⱨni bu dunyadiki insanlarning ⱪutⱪuzƣuqisi boluxⱪa əwətti. Buni biz kɵrduⱪ ⱨəm buningƣa guwaⱨliⱪ berimiz. ¹⁵Əgər kimdəkim Əysa Məsiⱨning Hudaning Oƣli ikənlikini oquⱪ etirap ⱪilsa, Huda uningda, umu Hudada yaxaydu. ¹⁶Buning bilən, Hudaning bizgə bolƣan meⱨir-muⱨəbbitini tonup yetimiz wə buningdin gumanlanmaymiz. Huda ɵzi meⱨir-muⱨəbbəttur. Xunga, meⱨir-muⱨəbbət iqidə yaxiƣan kixi Hudada yaxaydu, Hudamu uningda yaxaydu. ¹⁷Muxundaⱪ bolƣanda, meⱨir-muⱨəbbət bizdə mukəmməllixidu. Ⱪiyamət küni, Hudaning aldida yürikimiz toⱪ bolidu. Qünki, Əysa Məsiⱨ Hudaning meⱨir-muⱨəbbitidin bəⱨrimən boluwatⱪandək, ⱨazir bizmu bu dunyada xu meⱨir-muⱨəbbəttin bəⱨriməndurmiz. ¹⁸Meⱨir-muⱨəbbəttə ⱪorⱪunq bolmaydu. Meⱨir-muⱨəbbət mukəmməl bolsa, ⱪorⱪunqni yoⱪⱪa qiⱪiridu. Qünki, ⱪorⱪunq Hudaning jazasi bilən baƣlinixliⱪ bolup, ⱪorⱪunq bar kixidə meⱨir-muⱨəbbət mukəmməl əməstur.

¹⁹Bizning ⱪəlbimiz meⱨir-muⱨəbbətlik, qünki Huda aldi bilən bizgə meⱨir-muⱨəbbətlik boldi. ²⁰Əgər biri, “Hudani sɵyimən” dəp turup, ⱪerindixiƣa ɵqmənlik ⱪilsa, u yalƣanqidur. Qünki, kɵzigə kɵrünüp turƣan ⱪerindixiƣa meⱨir-muⱨəbbət kɵrsətmigən kixi kɵrüp baⱪmiƣan Hudani ⱪandaⱪmu sɵysun? ²¹Xunga, Huda bizgə: “Hudani sɵygən kixi ⱪerindixinimu sɵysun” dəp əmr ⱪilƣan.

5

Etiⱪadimiz arⱪiliⱪ Xəytan üstidin ƣəlibə ⱪilimiz

¹Əysaning Məsiⱨ, yəni ⱪutⱪuzƣuqi ikənlikigə ixəngən kixi Hudaning pərzənti bolƣan bolidu. Atisini sɵyidiƣan kixi uning pərzəntlirinimu sɵyidu. ²Biz ɵzimizning Hudaning pərzəntlirini sɵyidiƣanliⱪimizni ⱪandaⱪ bilimiz? Hudani sɵyüp, uning əmrlirigə əməl ⱪiliximiz arⱪiliⱪ bilimiz. ³Hudani sɵyüx uning əmrlirigə əməl ⱪilix deməktur. Uning əmrlirimu eƣir əməs. ⁴Qünki, Hudaning pərzənti bolƣanlarning ⱨəmmisi Əysa Məsiⱨkə bolƣan etiⱪadi arⱪiliⱪ bu dunyadiki yamanliⱪ üstidin ƣəlibə ⱪilidu. ⁵Bu dunyadiki yamanliⱪ üstidin ƣəlibə ⱪilƣuqilar zadi kimlər? Ular pəⱪət Əysa Məsiⱨni Hudaning Oƣli, dəp uningƣa etiⱪad ⱪilƣanlardur.

Əysa Məsiⱨkə berilgən guwaⱨliⱪ

⁶Əysa Məsiⱨ dunyaƣa kəlgəndə, suda qɵmüldürüx rəsmiyitinimu, krestkə mihlinip ⱪan tɵküxnimu bexidin ɵtküzdi. U kəlgəndə, pəⱪət suda qɵmüldürüx rəsmiyitidin ɵtüpla ⱪalmastin, bəlki ɵz ⱪenini tɵküp ⱪurbanliⱪnimu bərdi. Muⱪəddəs Roⱨning ɵzimu buningƣa guwaⱨliⱪ beridu. Qünki, Hudaning Roⱨi ⱨəⱪiⱪəttur.^*7Əysa Məsiⱨ toƣruluⱪ üq guwaⱨliⱪ bar. ⁸Bular: Muⱪəddəs Roⱨ, qɵmüldürüx süyi wə Əysa Məsiⱨning tɵkkən ⱪenidin ibarət. Bu üqining guwaⱨliⱪi birdəktur. ⁹Biz insanlarning guwaⱨliⱪini ixənqlik, dəp ⱪariƣan yərdə, Hudaning guwaⱨliⱪi tehimu ixənqliktur. Huda ɵz oƣli Əysa Məsiⱨ toƣrisida xundaⱪ guwaⱨliⱪ bərgən. ¹⁰Hudaning Oƣliƣa etiⱪad ⱪilƣan kixi Hudaning guwaⱨliⱪini ⱨəⱪ, dəp bilidu. Biraⱪ, Hudaning guwaⱨliⱪiƣa ixənmigən kixi Hudani yalƣanqi, dəp ⱪariƣan bolidu. Qünki u, Hudaning ɵz oƣli toƣruluⱪ bərgən guwaⱨliⱪiƣa ixənmigən bolidu. ¹¹Bu guwaⱨliⱪ xuki, Huda bizgə mənggülük ⱨayatni ata ⱪildi. Bu ⱨayatliⱪ bizgə uning oƣli arⱪiliⱪ kəldi. ¹²Xunga, Hudaning Oƣlini ⱪobul ⱪilƣan kixi ⱨayatliⱪⱪa igə bolƣan bolidu. Biraⱪ, Hudaning Oƣlini ⱪobul ⱪilmiƣan kixi ⱨayatliⱪⱪa igə bolmiƣan bolidu.

Mənggülük ⱨayat

¹³Mən bularni Hudaning Oƣliƣa etiⱪad ⱪilƣan silərgə mənggülük ⱨayatⱪa igə bolƣanliⱪini bilsun, dəp yazdim. ¹⁴Hudaning aldida yürikimiz xundaⱪ toⱪki, Hudaning iradisigə uyƣun nemini tilisək, u du’a-tilawitimizni qoⱪum anglaydu. ¹⁵Uning anglaydiƣanliⱪini bilgənikənmiz, nemini tilisək, xuni beridiƣanliⱪinimu bilimiz.

¹⁶Biri ⱪerindixining mənggülük ɵlümgə elip barmiƣudək gunaⱨ sadir ⱪilƣanliⱪini kɵrsə, uning üqün du’a ⱪilsun. Buning bilən, Huda uning bu ⱪerindixiƣa ⱨayatliⱪ ata ⱪilidu. Bu, ɵlümgə elip barmiƣudək gunaⱨ ɵtküzgənlərgə ⱪarita eytilƣan. Lekin, mənggülük ɵlümgə elip barƣudək gunaⱨmu bar. Mən silərni bundaⱪ gunaⱨ sadir ⱪilƣanlar üqün du’a ⱪilinglar deməymən. ¹⁷Ⱨəmmə adalətsizlik gunaⱨtur. Lekin mənggülük ɵlümgə elip barmaydiƣan gunaⱨmu bar. ¹⁸Hudaning pərzənti bolƣan kixining gunaⱨ sadir ⱪiliwərməydiƣanliⱪini bilimiz. Qünki, Hudaning Oƣli Əysa Məsiⱨ bundaⱪ kixini ⱪoƣdap ⱪalidu. Xunga, Xəytanmu uningƣa tegəlməydu. ¹⁹Bizgə məlumki, biz Hudaƣa mənsupmiz. Əysa Məsiⱨkə etiⱪad ⱪilmiƣanlar bolsa Xəytanning baxⱪuruxididur. ²⁰Yənə bizgə məlumki, Hudaning Oƣli dunyaƣa kəldi wə ⱨəⱪiⱪiy Hudani tonuximiz üqün, u bizgə əⱪil-parasət ata ⱪildi. Biz ⱨəⱪiⱪiy Hudaƣa baƣlinip yaxawatimiz. Qünki, biz uning oƣli Əysa Məsiⱨkə baƣlanƣanmiz. Əysa Məsiⱨ ⱨəⱪiⱪiy Hudadur wə mənggülük ⱨayattur!

²¹Əziz balilirim, Hudaƣa beƣixlanƣan ⱪəlbinglardiki orunni ⱨərⱪandaⱪ nərsilərning igiliwelixidin saⱪlininglar.