ئۇيغۇرچە مۇقەددەس كىتاب جەمئىيىتى

Timotiyƣa yezilƣan birinqi hət

1

¹Ⱪutⱪuzƣuqimiz Hudaning wə ümidimiz bolƣan Əysa Məsiⱨning əmri bilən uning əlqisi boluxⱪa tallanƣan mənki Pawlustin ²etiⱪad yolida ɵz oƣlumdək bolup ⱪalƣan Timotiyƣa salam. Huda’atimiz wə Rəbbimiz Əysa Məsiⱨ sanga meⱨir-xəpⱪət, rəⱨimdillik wə amanliⱪ ata ⱪilƣay!

Sahta təlimlərni tosux

³Makedoniyə ɵlkisigə barƣanda sanga eytⱪinimdək, sening dawamliⱪ Əfəs xəⱨiridə ⱪelip, aranglardiki bəzi kixilərning natoƣra təlimlərni tarⱪitixini tosuxungni soraymən. ⁴Ularƣa əpsanilər wə uzundin-uzunƣa sozulƣan nəsəbnamilər bilən waⱪtini israp ⱪilmasliⱪini buyruƣin. Bular pəⱪət bimənə talax-tartixlarni kəltürüp qiⱪiridu, xundaⱪla etiⱪad bilən ⱪilinidiƣan Huda yolidiki ixlarni ⱪilixⱪa paydisiz bolidu. Huda yolida mengix pəⱪət etiⱪad arⱪiliⱪla əməlgə axidu. ⁵Bizning bundaⱪ buyruⱪ ⱪiliximizdin məⱪsət, pak ⱪəlb, sap wijdan wə qin etiⱪadtin kelip qiⱪⱪan meⱨir-muⱨəbbətni baxⱪilarƣa kɵrsitixinglar üqündur. ⁶Bəzi kixilər bu təlimdin qətnəp, bimənə gəplərni ⱪilip yüridu. ⁷Ularning baxⱪilar təripidin Təwrat ⱪanunining ɵlimasi, dəp atalƣusi bar. Biraⱪ, ular ɵzlirining nemə dəwatⱪanliⱪini yaki ɵzlirining ixənq bilən eytⱪan sɵzlirining nemə ikənlikini qüxənməydu.

⁸Bizgə məlumki, əgər kixilər Təwrat ⱪanunini toƣra ⱪollansa, u paydiliⱪtur. ⁹Biz yənə xuni biliximiz kerəkki, Təwrat ⱪanuni Hudaning əmrlirigə boysunidiƣan adəmlər üqün əməs, bəlki natoƣra ixlarni ⱪilƣuqilar üqün tüzülgəndur, yəni ⱪanunƣa hilapliⱪ ⱪilƣuqilar, boyni ⱪattiⱪlar, Huda yolida mangmiƣanlar, gunaⱨkarlar, Hudaƣa bipərwaliⱪ ⱪilƣuqilar, Hudani məshirə ⱪilƣuqilar, ata-anisini yaki baxⱪilarni ɵltürgən ⱪatillar, ¹⁰zinahorlar, ohxax jinstiki buzuⱪlar, ⱪul sodigərliri, yalƣanqilar, ⱪəsəmhorlar wə baxⱪa ⱪilmixlar bilən toƣra təlimlərgə hilapliⱪ ⱪilƣan kixilər üqün tüzülgəndur. ¹¹Bu təlimlər mədⱨiyiləxkə munasip bolƣan Huda təripidin manga amanət ⱪilinƣan uluƣ hux həwərgə asaslanƣan.

Hudaning rəⱨimdillikigə xükür

¹²Manga küq-ⱪudrət bərgən rəbbimiz Əysa Məsiⱨkə xükür eytimən. Qünki, u meni ixənqlik dəp ⱪarap, ɵz hizmitigə təyinlidi. ¹³Mən burun Əysa Məsiⱨkə kupurluⱪ ⱪilip, uningƣa etiⱪad ⱪilƣuqilarƣa ziyankəxlik ⱪilƣan rəⱨimsiz bir adəm bolsammu, u yənila manga rəⱨim ⱪildi. Qünki, mən bu ixlarni nadanliⱪ wə Əysa Məsiⱨkə bolƣan etiⱪadsizliⱪtin ⱪilƣanidim. ¹⁴Rəbbimiz manga mol meⱨir-xəpⱪitini kɵrsitip, meni Əysa Məsiⱨtin kelidiƣan etiⱪad wə meⱨir-muⱨəbbət bilən toldurdi. ¹⁵“Əysa Məsiⱨ gunaⱨkarlarni ⱪutⱪuzux üqün dunyaƣa kəldi” degən bu sɵz ⱨəⱪtur wə uni ⱪobul ⱪilixⱪa pütünləy ərziydu. Mən gunaⱨkarlar iqidiki əng uqiƣa qiⱪⱪan gunaⱨkar bolimən. ¹⁶Lekin, Əysa Məsiⱨ manga rəⱨim-xəpⱪət ⱪildi. Buningdin məⱪsət, u ɵzining məndək uqiƣa qiⱪⱪan bir gunaⱨkarƣa qəksiz səwr-taⱪət kɵrsitixi arⱪiliⱪ baxⱪilarƣa ülgə ⱪalduruxtur, yəni bu keyin ɵzigə etiⱪad ⱪilip, mənggülük ⱨayatⱪa erixidiƣanlarƣa berilgən ülgidur. ¹⁷Barliⱪ ⱨɵrmət wə xan-xərəp Hudaƣa əbədil’əbəd mənsuptur. U mənggülük padixaⱨ, yəni ɵlməydiƣan wə kɵz bilən kɵrgili bolmaydiƣan birdinbir Hudadur, amin!

¹⁸Əy, oƣlum Timotiy, burun sən toƣruluⱪ eytilƣan wəⱨiylərgə asasən bu buyruⱪlarni sanga tapxurimən. Bu wəⱨiylərni ⱪoral ⱪilsang, Rəbbimiz üqün uluƣ kürəxlərni ⱪilalaysən. ¹⁹Etiⱪadta wə pak wijdaningda qing tur. Bəzilər pak wijdanini bir yaⱪⱪa ⱪayrip ⱪoydi. Nətijidə, ularning etiⱪadi huddi hada taxⱪa urulƣan kemigə ohxax wəyran boldi. ²⁰Imeney wə Iskəndərlər mana xundaⱪ kixilərdindur. Ularni kupurluⱪ ⱪilmasliⱪni ɵgənsun dəp, Xəytanning ilkigə ⱪayturdum.^*

2

Du’a wə ibadət

¹Aldi bilən səndin wə barliⱪ etiⱪadqilardin pütkül insan üqün Hudadin tiləklər tiləxni, Hudaƣa du’a-tilawət ⱪilixni, baxⱪilar üqün muraji’ət ⱪilixni wə Hudaƣa xükürlər eytixni, ²bolupmu padixaⱨlar wə barliⱪ əməldarlar üqün du’a-tilawət ⱪilixni ɵtünimən. Bundaⱪ bolƣanda, biz aman-esən ⱨayat kəqürələymiz. Xundaⱪla, ⱨayatimiz Hudaƣa bolƣan ihlasmənlik wə ⱨɵrmət bilən tolidu. ³Bundaⱪ du’a-tilawət ⱪilix yahxidur. U, ⱪutⱪuzƣuqimiz Hudani hursən ⱪilidu. ⁴Huda pütkül insanning ⱪutⱪuzuluxi wə ularning ⱨəⱪiⱪətni tonuxini halaydu. ⁵Qünki, Huda birdur, Huda bilən insanlar arisidiki kelixtürgüqimu birdur. U bolsimu insan tenidə dunyaƣa kəlgən Əysa Məsiⱨtur. ⁶Insanlarning gunaⱨtin azad boluxi üqün, Əysa Məsiⱨ ɵzini ⱪurban ⱪilip bədəl tɵlidi. Huda buningƣa dəl waⱪit-sa’itidə guwaⱨliⱪ bərdi. ⁷Mən Yəⱨudiy əməslərgə bu ixlarni yətküzüx üqün jakarqi wə əlqi bolup təyinlinip, ularƣa etiⱪad wə ⱨəⱪiⱪətni ɵgitixkə əwətildim. Mening bu sɵzlirimning ⱨəmmisi rast, mən yalƣan gəp ⱪilmidim.

⁸Xunga, mən xuni ümid ⱪilimənki, etiⱪadqi ərlər məyli ⱪəyərdə bolsun, ⱨər ⱪetim du’aƣa jəm bolƣanda baxⱪilarƣa ƣəzəplənməy, dətalax ⱪilmay, toƣra əməllik ⱪollirini kɵtürüp du’a ⱪilsun. ⁹Ayallar qakina kiyinməy, muwapiⱪ wə əhlaⱪliⱪ kiyinixi kerək. Ularning ɵzlirini alaⱨidə yasiwalƣan qaqliri, altun-kümüx, ünqə-mərwayit wə esil kiyim-keqəklər bilən əməs, ¹⁰bəlki yahxi əməliyiti bilən pərdazlixini ümid ⱪilimən. Bu, Huda yolida mangimən dəydiƣan ayallarƣa yarixidu. ¹¹Etiⱪadqilar jəm bolup təlim alƣanda, ayallar tinq olturup, ita’ətmənlik bilən təlim alsun. ¹²Ayallarning ərlərgə təlim berixi yaki ular üstidin ⱨɵküm sürüxigə ruhsət ⱪilmaymən. Əksiqə, ular tinq olturup təlim alsun. ¹³Qünki, awwal Adəm’ata, keyin Ⱨawa’ana yaritilƣan. ¹⁴Awwal Xəytan təripidin azdurulƣan Adəm’ata əməs, bəlki ⱨawa’ana bolup, u gunaⱨ sadir ⱪilƣan. ¹⁵Lekin, ayallar Ⱨawa’anining nəslidin tuƣulƣan Əysa Məsiⱨ arⱪiliⱪ ⱪutⱪuzulidu.^* Biraⱪ, ular qoⱪum etiⱪadta qing turup, meⱨir-muⱨəbbətlik bolup, pak wə əhlaⱪliⱪ yaxixi kerək.

3

Etiⱪadqilar jama’ətqilikining baxlamqiliri

¹“Əgər bir kixi etiⱪadqilar jama’ətqilikigə baxlamqi boluxⱪa intilsə, u yahxi bir wəzipini arzu ⱪilƣan bolidu” degən bu sɵz ⱨəⱪtur. ²Jama’ətqilik baxlamqisi bolsa əyiblinidiƣan təripi bolmiƣan, ayaliƣa sadiⱪ, ɵzini tutuwalƣan, salmaⱪ, ⱨɵrmətkə sazawər, meⱨmandost, baxⱪilarƣa Huda toƣrisida təlim berələydiƣan boluxi, ³xundaⱪla, ⱨaraⱪkəx wə zorawan bolmasliⱪi, hux pe’il, gəp talaxmaydiƣan, ɵzini mal-dunyaƣa urmaydiƣan kixi boluxi, ⁴ɵz a’ilisini yahxi baxⱪuralaydiƣan boluxi, pərzəntlirini ɵz ata-anisiƣa ⱨɵrmət bilən boysunidiƣan ⱪilip tərbiyiliyələydiƣan kixi boluxi kerək. ⁵Qünki, ɵz a’ilisini baxⱪuruxni bilməydiƣan kixi Hudaning jama’ətqilikining ⱨalidin ⱪandaⱪmu həwər alalisun? ⁶Jama’ətqilik baxlamqisi yengi etiⱪadqilardin bolmasliⱪi kerək. Əgər undaⱪ bolsa, u təkəbburlixip ketixi mumkin. Buning bilən, umu Xəytanƣa ohxax təkəbburlaxⱪanliⱪi üqün, Hudaning soriⱪiƣa uqraydu. ⁷U jama’ətqilikning sirtidimu ⱨɵrmətkə sazawər boluxi kerək. Xundaⱪ bolƣanda, baxⱪilar uni əyibliyəlməydu wə Xəytanmu uni aldam haltisiƣa qüxürəlməydu.

Etiⱪadqilar jama’ətqilikining hizmətqiliri^*

⁸Huddi jama’ətqilikning baxlamqilirigə ohxax, jama’ətqilikning hizmətqilirimu esil pəzilətlik, səmimiy gəp ⱪilidiƣan, ⱨaraⱪ-xarabⱪa berilməydiƣan, mal-dunyaƣa təməhor bolmaydiƣan kixilərdin boluxi, ⁹pak wijdani bilən etiⱪadning qongⱪur ⱨəⱪiⱪitidə qing turalaydiƣan boluxi lazim. ¹⁰Bundaⱪ adəmlərni aldi bilən sinap kɵrüp, əyiblinidiƣan tərəpliri bolmisa, andin wəzipigə ⱪoyux kerək. ¹¹Huddi xuningdək, bu hizmətqilərning ayallirimu^* esil pəzilətlik, pitnə-pasat ⱪilmaydiƣan, ɵzini tutuwalƣan wə ⱨərⱪandaⱪ ixta ixənqlik bolƣanlardin boluxi lazim. ¹²Hizmətqilər ɵz ayaliƣa sadiⱪ, ɵz pərzəntliri wə ɵz a’ilisini yahxi baxⱪuridiƣan kixilərdin bolsun. ¹³Jama’ətqilik iqidə ɵz wəzipisini yahxi orundiƣan hizmətqilər baxⱪilarning ⱨɵrmitigə sazawər bolidu, ularning Əysa Məsiⱨkə etiⱪad ⱪilixtiki ixənqimu zor axidu.

Qongⱪur sir

¹⁴Mən gərqə seni tezrək yoⱪlap berixni arzu ⱪilsammu, yənila bu hətni yazdim. ¹⁵Əgər mən yeningƣa waⱪtida baralmisam, bu hetim sanga Hudaning a’ilisi iqidə ⱪandaⱪ yaxax kerəklikini kɵrsitip beridu. Bu a’ilə bolsa mənggü ⱨayat Hudaƣa mənsup bolƣan etiⱪadqilar jama’ətqilikidur. Bu jama’ətqilik ⱨəⱪiⱪətning tüwrüki wə asasidur. ¹⁶Ⱨəmməyləngə məlumki, etiⱪadimizning siri büyüktur:

əysa Məsiⱨ insan tenidə ayan boldi,

Muⱪəddəs Roⱨ uning ⱨəⱪⱪaniyliⱪini ispatlidi,

u pərixtilərgə kɵründi,

u toƣrisidiki həwər pütkül millətlərgə jakarlandi,

insanlar uningƣa etiⱪad ⱪildi,

u uluƣluⱪ iqidə ərxkə kɵtürüldi.

4

Sahta təlim bərgüqilər

¹Muⱪəddəs Roⱨ xuni bizgə oquⱪ eytiduki, ahir zamanda bəzilər etiⱪadtin tenip, ⱨiyligər jinlar wə ularning sahta təlimlirigə əgixidu. ²Bundaⱪ təlimlər wijdani yoⱪap kətkən yalƣanqi sahtipəzlər təripidin dunyaƣa tarⱪilidu. ³Bu yalƣanqilar nikaⱨlinixni wə bəzi yeməkliklərni istemal ⱪilixni mən’i ⱪilidu. Ⱨalbuki, bu yeməkliklərni Huda ɵzigə etiⱪad ⱪilƣan ⱨəm ⱨəⱪiⱪətni bilidiƣanlarning xükür eytip ⱪobul ⱪilixi üqün yaratⱪan. ⁴Huda yaratⱪan ⱨəmmə nərsə yahxidur. Ularning ⱨeqⱪaysisi qəkləngən əməs, ularni xükür eytip ⱪobul ⱪilsa bolidu. ⁵Qünki, ⱨəmmə nərsə Hudaning sɵzi wə insanlarning du’asi bilən ⱨalal bolidu.

Əysa Məsiⱨning yahxi hizmətkari

⁶Bu nəsiⱨətlərni ⱪerindaxliringning səmigə salsang, Əysa Məsiⱨning yahxi hizmətkari bolƣan bolisən. Xundaⱪla, sening ɵzüng əgəxkən etiⱪad toƣrisidiki ⱨəⱪiⱪət wə toƣra təlimlər bilən ozuⱪlanƣanliⱪing ayan bolidu. ⁷Hudaning ⱨəⱪiⱪitini burmilaydiƣan bimənə əpsanilərni rət ⱪilip, ɵzüngni ihlasmənlik yolida yetildürgin. ⁸Bədənni yetildürüxning paydisi bar, əlwəttə. Lekin, ihlasmənlikni yetildürüxning paydisi tehimu kɵptur. Qünki u, bu dunya wə u dunyadiki ⱨayat üqün bəht elip kelidu. ⁹Bu sɵzlər ⱨəⱪtur wə pütünləy ⱪobul ⱪilixⱪa ərziydu. ¹⁰Buning üqün əjir singdürüwatimiz wə kürəx ⱪiliwatimiz. Qünki, ümidimizni pütkül insanning, bolupmu etiⱪad ⱪilƣuqilarning ⱪutⱪuzƣuqisi – mənggü ⱨayat Hudaƣa baƣliduⱪ.

¹¹Bu ixlarni ⱪerindaxliringƣa tapiliƣin wə ɵgətkin. ¹²Baxⱪilar seni yax, dəp sanga səl ⱪarimisun. Sən sɵzliringdə, əməliyitingdə meⱨir-muⱨəbbət, etiⱪad wə pakliⱪta etiⱪadqilarƣa ülgə bol. ¹³Mən seni yoⱪlap barƣuqə, ɵzüngni jama’ətqilikkə muⱪəddəs yazmilar oⱪup berix, nəsiⱨət ⱪilix wə təlim berixkə beƣixliƣin. ¹⁴Muⱪəddəs Roⱨ sanga ata ⱪilƣan ⱪabiliyətkə bipərwaliⱪ ⱪilma. Bu ⱪabiliyət Hudaning wəⱨiysi wə jama’ətqilik yetəkqilirining ⱪollirining uqangƣa tegixi^* arⱪiliⱪ sanga berilgən. ¹⁵Xuning üqün, bu ixlarni jan-diling bilən ⱪil. Ɵzüngni ularƣa xundaⱪ atiƣinki, ⱨəmmə kixi sening alƣa basⱪanliⱪingni kɵrsun. ¹⁶Ɵzünggə wə bərgən təliminggə diⱪⱪət ⱪil ⱨəmdə uni izqil dawamlaxtur. Qünki, xundaⱪ ⱪilsang, ɵzüngmu wə sanga ⱪulaⱪ salƣanlarmu ⱪutⱪuzulidu.

5

Etiⱪadqilarning məs’uliyiti

¹Yaxanƣan ərlər səwənlik ɵtküzsə, ularni ⱪattiⱪ əyiblimigin. Əksiqə, ularƣa atangni ⱨɵrmətligəndək ⱨɵrmət bilən nəsiⱨət bərgin. Xuningdək, yax ərlərgə ɵz ⱪerindaxliringƣa mu’amilə ⱪilƣandək mu’amilə ⱪil. ²Yaxanƣan ayallarƣa anangƣa mu’amilə ⱪilƣandək mu’amilə ⱪil. Yax ayallarƣimu singilliringƣa mu’amilə ⱪilƣandək pak ⱪəlb bilən mu’amilə ⱪil.

³Eri ɵlüp kətkən, ⱨəⱪiⱪiy moⱨtajliⱪta ⱪalƣan tul ayallarni ⱨɵrmətləp, ularning ⱨalidin həwər al. ⁴Lekin, tul ayallarning pərzəntliri yaki nəwriliri bolsa, u pərzəntlər aldi bilən ɵz a’ilisidin həwər elip, etiⱪadini əməliyətkə maslaxturux arⱪiliⱪ ɵz ata-anisining əjrini yandursun. Qünki bu, Hudani hursən ⱪilidu. ⁵Eri ɵlüp kətkən igə-qaⱪisiz tul ayallar ümidini Hudaƣa baƣliƣan bolup, ular keqə-kündüz du’a-tilawəttə bolidu. ⁶Lekin, eri ɵlüp kətkən, ⱨuzur-ⱨalawət üqünla yaxaydiƣan tul ayallar ⱨayat bolsimu, roⱨiy jəⱨəttə bəribir ɵlgəngə ⱨesab. ⁷Etiⱪadqilarning baxⱪilar təripidin əyiblinidiƣan əⱨwalƣa qüxüp ⱪalmasliⱪi üqün, sən jama’ətqilikkə bu ixlar toƣrisida tərbiyə bərgin. ⁸Bir kixi ɵz tuƣⱪanliriƣa, bolupmu a’ilisidikilərgə ⱪarimisa, u Əysa Məsiⱨtin tanƣan dəp ⱪarilip, ⱨətta etiⱪadsizlarqilikmu bolalmaydu.

⁹Etiⱪadqilar jama’ətqilikidə yardəm berilidiƣan, eri ɵlüp kətkən tul ayallarni tizimliƣanda, ular qoⱪum ɵz erigə sadiⱪ bolƣan boluxi wə yexi atmixtin yuⱪiri boluxi kerək. ¹⁰Ular yənə yahxiliⱪliri bilən tonulƣan boluxi, yəni balilirini yahxi tərbiyiləp qong ⱪilƣan, meⱨmandost, kəmtərlik bilən etiⱪadqilarning hizmitidə bolƣan, ⱪiyinqiliⱪta ⱪalƣanlarƣa yardəm ⱪilƣan wə ɵzini ⱨər hil həyr-sahawət ixliriƣa beƣixliƣan ayallar boluxi kerək.

¹¹Eri ɵlüp kətkən yax tul ayallarni tizimlima. Qünki, bundaⱪ ayallarning jismaniy jəⱨəttiki arzuliri Əysa Məsiⱨkə bolƣan rixtini besip kətsə, ular ⱪayta nikaⱨlinixni arzu ⱪilip, etiⱪadqilar jama’ətqilikidiki hizmitini dawamlaxturuxni halimaydu. ¹²Buning bilən, ular dəsləp bərgən wədisigə^* hilapliⱪ ⱪilix səwəblik əyiblinidu. ¹³Ular yənə ⱨurunluⱪni adət ⱪiliwelip, ɵymu ɵy doⱪurup yürüp, ƣəywət ⱪilip, baxⱪilarning ixliriƣa arilixiwalidiƣan walaⱪtəkkürlərdin bolup ⱪelixi mumkin. ¹⁴Xuning üqün, bundaⱪ yax tul ayallarning nikaⱨlinip, pərzənt kɵrüp, ɵy ixliri bilən xuƣullinixini nəsiⱨət ⱪilimən. Xundaⱪ ⱪilƣanda, bizgə ⱪarxi turƣuqilarda ⱨərⱪandaⱪ pitnə-iƣwa tarⱪitix pursiti bolmaydu. ¹⁵Bundaⱪ deyiximdiki səwəb, bəzi tul ayallar alliburun etiⱪadtin qətnəp, Xəytanning kəynigə kirip kətti. ¹⁶Əgər etiⱪadi bar bir ayalning tul ⱪalƣan tuƣⱪanliri bolsa, u ularƣa yardəm bərsun, yükni etiⱪadqilar jama’ətqilikigə ittirip ⱪoymisun. Xundaⱪ bolƣanda, jama’ətqilik ⱨəⱪiⱪiy igə-qaⱪisiz tul ayallarƣa yardəm ⱪilalaydu.

Yetəkqilər toƣrisida

¹⁷Etiⱪadqilar jama’ətqilikini yahxi baxⱪuridiƣan yetəkqilər, bolupmu Hudaning sɵzini yətküzüx wə təlim berixtə əjir singdürgən kixilər qoⱪum qongⱪur ⱨɵrmətkə sazawər boluxi wə uningƣa layiⱪ ⱨəⱪ elixi kerək. ¹⁸Qünki, muⱪəddəs yazmilarda: “Haman təpkən ɵküzning aƣzini boƣma”, “ixqi ɵz ⱨəⱪⱪini elixⱪa ⱨəⱪliⱪtur” deyilgən. ¹⁹Ikki yaki üq guwaⱨqi bolmiƣuqə, jama’ətqilikning yetəkqisi üstidin ⱪilinƣan ərzni ⱪobul ⱪilma. ²⁰Əgər u gunaⱨ ⱪilƣan bolsa, baxⱪilarningmu buningdin ibrət elixi üqün, jama’ətqilik aldida əyiblənsun. ²¹Hudaning, Əysa Məsiⱨning wə Huda talliƣan pərixtilərning aldida sanga xuni buyruymənki, sən bu sɵzlirimgə ⱪət’iy əməl ⱪil. Ayrimiqiliⱪ ⱪilma, ⱨərⱪandaⱪ ixta bir tərəpkə yan basma. ²²Birawning uqisiƣa ⱪolungni ⱪoyup, uni yetəkqilik wəzipisigə təyinləxkə aldirap kətmə, bolmisa uning gunaⱨliriƣa xerik bolup ⱪelixing mumkin. Ɵzüngni pak tutⱪin. ²³(Axⱪaziningning yahxi bolmiƣanliⱪi, xundaⱪla da’im kesəl bolup ⱪalidiƣanliⱪing üqün, sula iqməy, bir’az xarabmu iqip bərgin.) ²⁴Bəzi kixilərning gunaⱨlirini asanla kɵrüwalƣili bolidu ⱨəm ularning qoⱪum soraⱪⱪa tartilixi eniⱪ. Lekin, bəzi kixilərning gunaⱨliri bolsa keyin axkara bolidu. ²⁵Huddi xuningƣa ohxax, bəzi kixilərning yahxi əməliyitinimu asanla kɵrüwalƣili bolidu. Lekin, bəzi kixilərning yahxi əməliyiti bolsa keyin məlum bolidu.

6

¹Ⱪul etiⱪadqilarning ⱨəmmisi ɵz hojayinlirini ⱨɵrmətlisun. Xundaⱪ ⱪilƣanda, Hudaning nami wə Hudadin kəlgən təlimning kupurluⱪⱪa uqrap ⱪelixidin saⱪlanƣili bolidu. ²Hojayinlirimu etiⱪadqi bolsa, ⱪullar: “Biz ⱨəmmimiz Hudaning a’ilisidiki ⱪerindaxlarƣu” dəp, ularƣa ⱨɵrmətsizlik ⱪilmisun. Əksiqə, hojayinliriƣa tehimu yahxi hizmət ⱪilsun. Qünki, ularning yahxi hizmitidin bəⱨrimən bolidiƣan hojayinlar dəl Hudaning yahxi kɵridiƣan bəndiliridur.

Yalƣan təlim wə pulpərəslikning aⱪiwiti

Sən etiⱪadqilarƣa bu təlimlərni ɵgətkin wə tapiliƣin. ³Ohximaydiƣan təlimlərni tərƣib ⱪilƣan kixi Rəbbimiz Əysa Məsiⱨning ⱨəⱪ sɵzlirini, xundaⱪla uning bizni ihlasmənlikkə yetəkləydiƣan təlimini ⱪobul ⱪilmiƣan bolidu. ⁴Bundaⱪ kixilər təkəbbur, ⱨeqnemə qüxənməydiƣan kixilərdur. Ular ƣowƣa qiⱪirix wə gəp talixixⱪa intayin amraⱪ. Bundaⱪ ixlar baxⱪilarning arisida ⱨəsəthorluⱪ, jedəl-majira, tɵⱨmət, gumanhorluⱪ ⁵ⱨəmdə da’imliⱪ sürkilix kəltürüp qiⱪiridu. Bu kixilərning niyiti qirik bolup, ⱨəⱪiⱪəttin məⱨrum bolƣan. Ularning nəziridə ihlasmənlik pəⱪətla bir tapawət yolidur, halas.

⁶Dərwəⱪə, Hudaƣa razimənlik bilən ihlasmən bolƣan adəm ⱨəⱪiⱪiy ronaⱪ tapidu. ⁷Biz bu dunyaƣa ⱨeqnemə elip kəlmiduⱪ wə bu dunyadin ⱨeqnemə elip ketəlməymiz. ⁸Xunga, yemək-iqmək wə kiyim-keqikimiz toluⱪ bolsila, razi boluximiz kerək. ⁹Bay boluxnila oylaydiƣanlar bolsa ⱨaman azdurulup ketidu, ular insanlarni ⱪurutup ⱨalak ⱪilidiƣan nurƣun ziyanliⱪ ⱨəm əhmiⱪanə ⱨəwəslərning toriƣa qüxüp ketidu. ¹⁰Qünki, pulpərəslik ⱨər hil yamanliⱪning yiltizidur. Bəzilər bay bolux ⱨəwisi bilən etiⱪadtin qətnəp, ɵzigə tügiməs azab tepiwaldi.

Timotiyƣa nəsiⱨət

¹¹Əy Hudaning sadiⱪ bəndisi, sən bundaⱪ ixlardin yiraⱪ tur. Ⱨəⱪⱪaniyliⱪ, ihlasmənlik, etiⱪad, meⱨir-muⱨəbbət, səwr-taⱪət wə mulayimliⱪni izdə. ¹²Etiⱪad yolida uluƣ kürəxlərni ⱪil. Huda ata ⱪilƣan mənggülük ⱨayatni ⱪədirlə. Sən buning üqün qaⱪirilding ⱨəmdə nurƣunliƣan guwaⱨqilar aldida bu mənggülük ⱨayatni alliburun oquⱪ etirap ⱪilding. ¹³Ⱨəmmigə ⱨayatliⱪ bərgüqi Hudaning, xundaⱪla Pontiy Pilatusⱪa yürəklik ⱨalda uluƣ ⱨəⱪiⱪət toƣrisida guwaⱨliⱪ bərgən Əysa Məsiⱨning aldida sanga xuni tapilaymənki, ¹⁴rəbbimiz Əysa Məsiⱨ ⱪayta kəlgüqə, Hudaning bu əmrlirigə toluⱪ əməl ⱪil, buning bilən ⱨeqkim seni əyibliyəlmisun. ^15-16Mədⱨiyiləxkə munasip bolƣan birdinbir ⱨɵkümran, yəni padixaⱨlarning padixaⱨi, Rəblərning Rəbbi, birdinbir mənggü ɵlməs, adəm yeⱪinlixalmaydiƣan nur iqidə yaxaydiƣan, ⱨeqkim kɵrmigən wə kɵrəlməydiƣan Huda waⱪit-sa’iti kəlgəndə, Əysa Məsiⱨni ⱪayta əwətidu. Barliⱪ ⱨɵrmət wə küq-ⱪudrət Hudaƣa əbədil’əbəd mənsup bolƣay, amin!

¹⁷Bu dunyada bay bolƣanlarƣa məƣrurlanmasliⱪni, ɵtkünqi bayliⱪⱪa ümid baƣlimasliⱪni buyruƣin. Ular ümidini biz bəⱨrimən boluxⱪa tegixlik ⱨəmmini bizgə sehiyliⱪ bilən bərgüqi Hudaƣa baƣlisun. ¹⁸Ularƣa baxⱪilarƣa yahxiliⱪ ⱪilixni wə həyr-sahawətlik ixlarni kɵp ⱪilixni, mərd wə ⱪoli oquⱪ boluxni buyruƣin. ¹⁹Bundaⱪ ⱪilƣanda, ular ⱨəⱪiⱪiy ⱨayatⱪa erixix üqün keləqəktə ɵzlirigə puhta asas bolidiƣan bir həzinə topliyalaydu.

²⁰Əy Timotiy, sanga amanət ⱪilinƣan bu təlimlərni yahxi saⱪla. Hudaƣa bolƣan ihlasmənlikkə munasip kəlməydiƣan ⱪuruⱪ gəplərdin ⱨəmdə bimənə bilimni bilim degüqilərning talax-tartixliridin saⱪlan. ²¹Bəzilər muxundaⱪ bimənə bilimgə əgixip, etiⱪadtin qətnidi.

Hudaning meⱨir-xəpⱪiti silərgə yar bolƣay!