ئۇيغۇرچە مۇقەددەس كىتاب جەمئىيىتى

تىموتىيغا يېزىلغان بىرىنچى خەت

1

¹قۇتقۇزغۇچىمىز خۇدانىڭ ۋە ئۈمىدىمىز بولغان ئەيسا مەسىھنىڭ ئەمرى بىلەن ئۇنىڭ ئەلچىسى بولۇشقا تاللانغان مەنكى پاۋلۇستىن ²ئېتىقاد يولىدا ئۆز ئوغلۇمدەك بولۇپ قالغان تىموتىيغا سالام. خۇدائاتىمىز ۋە رەببىمىز ئەيسا مەسىھ ساڭا رەھىمدىل بولۇپ، مېھىر-شەپقەت ۋە ئامانلىق ئاتا قىلغاي!

ساختا تەلىملەرنى توسۇش

³مەن ماكېدونىيە ئۆلكىسىگە بېرىشتىن ئىلگىرى ساڭا ئېيتقىنىمدەك، سېنىڭ داۋاملىق ئەفەس شەھىرىدە قېلىپ، ئاراڭلاردىكى بەزى كىشىلەرنىڭ ناتوغرا تەلىملەرنى تارقاتماسلىققا بۇيرۇشۇڭنى سورايمەن. ⁴ئۇلارغا ئەپسانىلەر ۋە ئۇزۇندىن-ئۇزۇنغا سوزۇلغان نەسەبنامىلەر بىلەن ۋاقتىنى ئىسراپ قىلماسلىقىنى بۇيرۇغىن. بۇ ئىشلار پەقەت بىمەنە تالاش-تارتىشلارنى كەلتۈرۈپ چىقىرىدۇ. بۇ ئىشلار خۇدانىڭ پىلانىنى ئەمەلگە ئاشۇرۇشقا پايدىسىزدۇر. خۇدانىڭ پىلانىنى پەقەت ئېتىقاد ئارقىلىقلا ئەمەلگە ئاشۇرغىلى بولىدۇ. ⁵بىزنىڭ بۇنداق تەلىم بېرىشىمىزدىكى مەقسىتىمىز، مېھىر-مۇھەببەت كۆرسىتىش ئۈچۈندۇر. مېھىر-مۇھەببەت پاك قەلبتىن، ساپ ۋىجداندىن ۋە چىن ئېتىقادتىن كېلىپ چىقىدۇ. ⁶بەزى كىشىلەر بۇ تەلىملەردىن چەتنەپ، بىمەنە گەپلەرنى قىلىپ يۈرىدۇ. ⁷ئۇلار باشقىلارنىڭ ئۆزلىرىنى تەۋرات قانۇنىنىڭ ئۇستازى دەپ ئاتىشىنى ئارزۇ قىلىدۇ. بىراق ئۇلار ئۆزلىرىنىڭ نېمە دەۋاتقانلىقىنى ياكى نېمىنى ئىشەنچ بىلەن تەشەببۇس قىلىۋاتقانلىقىنى بىلمەيدۇ.

⁸بىز بىلىمىزكى، تەۋرات قانۇنى توغرا قوللىنىلسا، تەۋرات قانۇنى ياخشىدۇر. ⁹بىز يەنە شۇنى بىلىشىمىز كېرەككى، تەۋرات قانۇنى خۇدانىڭ ئەمرلىرىگە بويسۇنىدىغان ئادەملەر ئۈچۈن ئەمەس، بەلكى قانۇنغا خىلاپلىق قىلىدىغان ئىتائەتسىزلەر، خۇدا يولىدا ماڭمايدىغانلار، گۇناھكارلار، خۇداغا بىپەرۋالىق قىلىدىغانلار، خۇدانى مەسخىرە قىلىدىغانلار، ئاتا-ئانىسىنى ياكى باشقىلارنى ئۆلتۈرگەن قاتىللار، ¹⁰جىنسىي ئەخلاقسىزلار، بەچچىۋازلار، قۇل ئېلىپ ساتىدىغانلار، يالغانچىلار، قەسەمخورلار ۋە باشقا قىلمىشلار بىلەن توغرا تەلىملەرگە خىلاپلىق قىلىدىغانلار ئۈچۈن بېرىلگەندۇر. ¹¹بۇ تەلىملەر ئۇلۇغ ۋە مۇبارەك خۇدا توغرىسىدىكى خۇش خەۋەرگە ئاساسلانغاندۇر. بۇ خۇش خەۋەرنى خۇدا ماڭا ئامانەت قىلغاندۇر.

خۇدانىڭ رەھىمدىللىكىگە شۈكۈر

¹²ماڭا كۈچ-قۇدرەت بەرگەن رەببىمىز ئەيسا مەسىھكە شۈكۈر ئېيتىمەن. چۈنكى ئۇ مېنى ئىشەنچلىك دەپ قاراپ، ئۆزىنىڭ خىزمىتىگە سالدى. ¹³مەن بۇرۇن ئەيسا مەسىھكە ھاقارەت قىلغان ۋە ئۇنىڭغا ئېتىقاد قىلغۇچىلارغا زىيانكەشلىك قىلغان رەھىمسىز بىر ئادەم بولساممۇ، ئۇ يەنىلا ماڭا رەھىم قىلدى. چۈنكى مەن بۇ ئىشلارنى نادانلىقىمدىن ۋە ئەيسا مەسىھكە بولغان ئېتىقادسىزلىقىمدىن قىلغانىدىم. ¹⁴رەببىمىز ئەيسا مەسىھنىڭ چەكسىز مېھىر-شەپقىتى مېنى ئېتىقاد ۋە مېھىر-مۇھەببەتكە ئىگە قىلدى. ¹⁵«ئەيسا مەسىھ گۇناھكارلارنى قۇتقۇزۇش ئۈچۈن دۇنياغا كەلدى» دېگەن بۇ سۆز راستتۇر ۋە ئۇنى قوبۇل قىلىش پۈتۈنلەي توغرىدۇر. مەن گۇناھكارلارنىڭ ئىچىدىكى ئەڭ گۇناھكارىدۇرمەن. ¹⁶لېكىن ئەيسا مەسىھ ماڭا رەھىم-شەپقەت قىلدى. ئۇنىڭ مەقسىتى مەندەك ئۇچىغا چىققان بىر گۇناھكارغا چەكسىز سەۋر-تاقەت قىلىش ئارقىلىق مېنى كەلگۈسىدە ئۆزىگە ئېتىقاد قىلىپ، مەڭگۈلۈك ھاياتقا ئېرىشىدىغانلارغا ئۈلگە قىلىشتۇر. ¹⁷بارلىق ھۆرمەت ۋە شان-شەرەپ مەڭگۈلۈك پادىشاھقا، يەنى ئۆلمەيدىغان ۋە كۆز بىلەن كۆرگىلى بولمايدىغان بىردىنبىر خۇداغا ئەبەدىلئەبەد مەنسۇپ بولغاي، ئامىن!

¹⁸ئەي ئوغلۇم تىموتىي، بۇرۇن سەن توغرۇلۇق ئېيتىلغان ۋەھىيلەرگە ئاساسەن ساڭا شۇنى تاپىلايمەنكى، ۋەھىيلەرنى قورال قىلساڭ، رەببىمىز ئۈچۈن قىلىنىدىغان ئۇلۇغ كۈرەشكە ئۆزۈڭنى ئاتىيالايسەن. ¹⁹ئېتىقادتا ۋە پاك ۋىجدانىڭدا چىڭ تۇرغىن. بەزىلەر پاك ۋىجدانىنى بىر ياققا قايرىپ قويدى. نەتىجىدە، ئۇلارنىڭ ئېتىقادى خۇددى خادا تاشقا ئۇرۇلغان كېمىگە ئوخشاش ۋەيران بولدى. ²⁰ھۇمانايۇس ۋە ئىسكەندەرلەر مانا شۇنداق كىشىلەردىندۇر. ئۇلار كۇپۇرلۇقلىرىدىن ئىبرەت ئالسۇن دەپ، ئۇلارنى شەيتاننىڭ ئىلكىگە قايتۇردۇم.^*

2

دۇئا ۋە ئىبادەت

¹ئالدى بىلەن سەندىن ۋە بارلىق ئېتىقادچىلاردىن پۈتۈن ئىنسانلار ئۈچۈن خۇدادىن تىلەكلەر تىلەشنى، خۇداغا دۇئا قىلىشنى، باشقىلار ئۈچۈن خۇداغا مۇراجىئەت قىلىشنى ۋە شۈكۈر ئېيتىشنى، ²بولۇپمۇ پادىشاھلار ۋە بارلىق ئەمەلدارلار ئۈچۈن دۇئا قىلىشنى ئۆتۈنىمەن. شۇنداق قىلساڭلار، بىز تىنچ، خاتىرجەم، شۇنداقلا خۇداغا بولغان ئىخلاسمەنلىك ۋە ھۆرمەت بىلەن ياشايمىز. ³دۇئا-تىلاۋەت قىلىش ياخشىدۇر. ئۇ قۇتقۇزغۇچىمىز خۇدانى خۇرسەن قىلىدۇ. ⁴خۇدا بارلىق ئىنسانلارنىڭ قۇتقۇزۇلۇشىنى ۋە ئۇلارنىڭ ھەقىقەتنى تونۇشىنى خالايدۇ. ⁵چۈنكى ھەممە ئىنسانلارنىڭ خۇداسى بىردۇر، خۇدا بىلەن ئىنسانلار ئارىسىدىكى كېلىشتۈرگۈچىمۇ بىردۇر. ئۇ بولسىمۇ ئىنسان تېنىدە دۇنياغا كەلگەن ئەيسا مەسىھتۇر. ⁶ئەيسا مەسىھ ئىنسانلارنىڭ گۇناھتىن ئازاد بولۇشى ئۈچۈن ئۆزىنى قۇربان قىلدى. شۇنداق قىلىپ، خۇدانىڭ مەقسىتى بەلگىلەنگەن ۋاقىتتا ئاشكارىلاندى. ⁷بۇ ئىشلارنى يەھۇدىي ئەمەسلەرگە يەتكۈزۈش ئۈچۈن مەن جاكارچى ۋە ئەلچى بولۇپ تەيىنلەندىم ۋە ئۇلارغا ئېتىقاد ۋە ھەقىقەتنى ئۆگىتىش ئۈچۈن ئەۋەتىلدىم. مېنىڭ بۇ سۆزلىرىمنىڭ ھەممىسى راست، مەن يالغان گەپ قىلمىدىم.

⁸شۇڭا مەن ئېتىقادچى ئەرلەرنىڭ قەيەردە بولۇشىدىن قەتئىينەزەر، ھەر قېتىم دۇئا ئۈچۈن جەم بولغاندا ئاچچىقلانماي، دەتالاش قىلماي، پاك قوللىرىنى كۆتۈرۈپ دۇئا قىلىشىنى ئۈمىد قىلىمەن. ⁹ئاياللار چاكىنا كىيىنمىسۇن، مۇۋاپىق ۋە ئەخلاققا ماس كىيىنسۇن. ئۇلارنىڭ ئۆزلىرىنى ئالاھىدە چاچ پاسونلار، ئالتۇن-كۈمۈشلەر، ئۈنچە-مەرۋايىتلار ۋە ئېسىل كىيىم-كېچەكلەر بىلەن پەردازلىماستىن، ¹⁰بەلكى ياخشى ئەمەللەر بىلەن پەردازلىشىنى ئۈمىد قىلىمەن. بۇنداق ياسىنىش خۇدا يولىدا ماڭىمەن دەيدىغان ئاياللارغا يارىشىدۇ. ¹¹تەلىم بېرىلىۋاتقاندا، ئاياللار تىنچ ئولتۇرۇپ، ئىتائەتمەنلىك بىلەن تەلىم ئالسۇن. ¹²ئاياللارنىڭ ئەرلەرگە تەلىم بېرىشىگە ۋە ئۇلارنى باشقۇرۇشىغا يول قويمايمەن. ئۇلار تىنچ ئولتۇرۇپ تەلىم ئالسۇن. ¹³چۈنكى ئاۋۋال ئادەمئاتا، كېيىن ھاۋائانا يارىتىلغان. ¹⁴شەيتان تەرىپىدىن ئازدۇرۇلغىنى ئادەمئاتا ئەمەستۇر، بەلكى ئازدۇرۇلۇپ گۇناھ سادىر قىلغىنى ھاۋائانىدۇر. ¹⁵لېكىن ئاياللار ھاۋائانىنىڭ نەسلىدىن تۇغۇلغان ئەيسا مەسىھ ئارقىلىق قۇتقۇزۇلىدۇ.^* بىراق ئۇلار چوقۇم ئېتىقادىدا چىڭ تۇرۇپ، مېھىر-مۇھەببەتلىك بولۇپ، پاك ۋە ئەخلاقلىق ياشىسۇن.

3

ئېتىقادچىلار جامائىتىنىڭ باشلامچىلىرى

¹«ئەگەر بىر كىشى ئېتىقادچىلار جامائىتىگە باشلامچى بولۇشقا ئىنتىلسە، ئۇ ياخشى بىر ۋەزىپىنى ئارزۇ قىلغان بولىدۇ» دېگەن بۇ سۆز ھەقىقەتەن توغرا ئېيتىلغان سۆزدۇر. ²جامائەتكە باشلامچى بولىدىغان كىشى ئەيىبسىز، ئايالىغا سادىق، ئۆزىنى تۇتۇۋالغان، سالماق، ھۆرمەتكە سازاۋەر، مېھماندوست، باشقىلارغا خۇدا توغرىسىدا تەلىم بېرەلەيدىغان بولسۇن. ³ئۇلار شارابخور ۋە زوراۋان بولمىسۇن، بەلكى خۇش پېئىل، گەپ تالاشمايدىغان، ئۆزىنى مال-دۇنياغا ئۇرمايدىغان بولسۇن. ⁴بۇنداق كىشى ئۆز ئائىلىسىنى ياخشى باشقۇرالايدىغان، پەرزەنتلىرىنى ئاتا-ئانىسىنى ھۆرمەتلەيدىغان ۋە ئۇلارغا بويسۇنىدىغان قىلىپ تەربىيەلىيەلەيدىغان بولسۇن. ⁵چۈنكى ئۆز ئائىلىسىنى باشقۇرۇشنى بىلمەيدىغان كىشى خۇدانىڭ جامائىتىنىڭ ھالىدىن قانداقمۇ خەۋەر ئالالىسۇن؟ ⁶جامائەتنىڭ باشلامچىسى يېڭى ئېتىقادچىلاردىن بولمىسۇن. بولمىسا، ئۇ تەكەببۇرلىشىپ، شەيتاندەك خۇدانىڭ جازاسىغا ئۇچرىشى مۇمكىن. ⁷ئېتىقادچىلار جامائىتىگە باشلامچى بولغان كىشى جامائەتنىڭ سىرتىدىمۇ ھۆرمەتكە سازاۋەر بولۇشى كېرەك. شۇنداق بولغاندا، ئۇ باشقىلارنىڭ ئەيىبلىشىگە ئۇچرىمايدۇ ۋە شەيتاننىڭ ئالدام خالتىسىغا چۈشمەيدۇ.

ئېتىقادچىلار جامائىتىنىڭ خىزمەتچىلىرى^*

⁸جامائەتنىڭ خىزمەتچىلىرىمۇ خۇددى جامائەتنىڭ باشلامچىلىرىغا ئوخشاش ئېسىل پەزىلەتلىك، سەمىمىي، شارابقا ۋە مال-دۇنياغا بېرىلمەيدىغان، ⁹ۋىجدانلىق ۋە ئېتىقادىنىڭ ھەقىقىتىدە چىڭ تۇرالايدىغان بولسۇن. ¹⁰بۇنداق ئادەملەر ئالدى بىلەن سىناپ كۆرۈلسۇن، كەمچىلىكلىرى بولمىسا، ئاندىن ۋەزىپىگە قويۇلسۇن. ¹¹بۇ خىزمەتچىلەرنىڭ ئاياللىرىمۇ^* ئېسىل پەزىلەتلىك، پىتنە-پاسات قىلمايدىغان، ئۆزىنى تۇتۇۋالغان ۋە ھەممە جەھەتتە ئىشەنچلىك بولسۇن. ¹²خىزمەتچىلەر ئايالىغا سادىق، پەرزەنتلىرى ۋە ئۆز ئائىلىسىنى ياخشى باشقۇرىدىغان بولسۇن. ¹³جامائەت ئىچىدە ئۆز ۋەزىپىسىنى ياخشى ئورۇندىغان خىزمەتچىلەر باشقىلارنىڭ ھۆرمىتىگە سازاۋەر بولىدۇ. ئۇلارنىڭ ئەيسا مەسىھكە ئېتىقاد قىلىش ئىشەنچىمۇ زور ئاشىدۇ.

ئاجايىپ ھەقىقەتلەر

¹⁴مەن سېنى تېزرەك يوقلاپ بېرىشنى ئارزۇ قىلىمەن، شۇڭا بۇ خەتنى ساڭا ئالدىنئالا يازدىم. ¹⁵ئەگەر مەن يېنىڭغا ۋاقتىدا بارالمىسام، بۇ خېتىم ساڭا خۇدانىڭ ئائىلىسىدە قانداق ياشاش كېرەكلىكىنى كۆرسىتىپ بېرىدۇ. بۇ ئائىلە بولسا مەڭگۈ ھايات خۇداغا مەنسۇپ بولغان ئېتىقادچىلار جامائىتىدۇر. بۇ جامائەت ھەقىقەتنىڭ تۈۋرۈكى ۋە ئاساسىدۇر. ¹⁶ھەممەيلەنگە مەلۇمكى، ئېتىقادىمىزدا ئاجايىپ ھەقىقەتلەر باردۇر:

ئۇ ئىنسان تېنىدە ئايان بولدى،

مۇقەددەس روھ ئۇنىڭ كىم ئىكەنلىكىنى ئىسپاتلىدى،

ئۇ پەرىشتىلەرگە كۆرۈندى،

ئۇ توغرىسىدىكى خەۋەر پۈتكۈل ئەللەرگە جاكارلاندى،

ئىنسانلار ئۇنىڭغا ئېتىقاد قىلدى،

ئۇ ئۇلۇغلۇق ئىچىدە ئەرشكە كۆتۈرۈلدى.

4

ساختا تەلىم بەرگۈچىلەر

¹مۇقەددەس روھ شۇنى بىزگە ئوچۇق ئېيتىدۇكى، ئاخىر زاماندا بەزىلەر ئېتىقادىدىن تېنىپ، ھىيلىگەر جىنلارغا ئەگىشىدۇ ۋە ئۇلارنىڭ ساختا تەلىملىرىگە ئىشىنىدۇ. ²بۇنداق تەلىملەر ۋىجدانى ئۆلگەن، يالغانچى ساختىپەزلەر تەرىپىدىن دۇنياغا تارقىلىدۇ. ³بۇ ئادەملەر نىكاھلىنىشنى ۋە بەزى يېمەكلىكلەرنى ئىستېمال قىلىشنى مەنئى قىلىدۇ. ھالبۇكى، بۇ يېمەكلىكلەرنى خۇدا ئۆزىگە ئېتىقاد قىلغان ھەم ھەقىقەتنى بىلىدىغانلارنىڭ ئىستېمال قىلىشى ۋە خۇداغا شۈكۈر ئېيتىشى ئۈچۈن ياراتقاندۇر. ⁴خۇدا ياراتقان ھەممە نەرسە ياخشىدۇر. ئۇلارنىڭ ھېچقايسىسى چەكلەنگەن ئەمەستۇر، ئۇلارنى خۇداغا شۈكۈر ئېيتىپ قوبۇل قىلسا بولىدۇ. ⁵چۈنكى ھەممە نەرسە خۇدانىڭ سۆزى ۋە ئىنسانلارنىڭ دۇئاسى بىلەن ھالال بولىدۇ.

ئەيسا مەسىھنىڭ ياخشى خىزمەتكارى

⁶بۇ نەسىھەتلەرنى قېرىنداشلىرىڭنىڭ سەمىگە سالساڭ، ئەيسا مەسىھنىڭ ياخشى خىزمەتكارى بولغان بولىسەن. شۇنداقلا، سېنىڭ ئۆزۈڭ ئىشەنگەن ئېتىقاد توغرىسىدىكى سۆزلەر ۋە توغرا تەلىملەر بىلەن تەربىيەلەنگەنلىكىڭ ئايان بولىدۇ. ⁷خۇدانىڭ ھەقىقىتىنى بۇرمىلايدىغان بىمەنە ئەپسانىلەرنى رەت قىلىپ، ئۆزۈڭنى ئىخلاسمەنلىك يولىدا يېتىلدۈرگىن. ⁸جىسمانىي جەھەتتە يېتىلىشنىڭ پايدىسى بار، ئەلۋەتتە. لېكىن ئىخلاسمەنلىكنى يېتىلدۈرۈشنىڭ پايدىسى تېخىمۇ كۆپتۇر. چۈنكى ئىخلاسمەنلىك بۇ دۇنيا ۋە ئۇ دۇنيادىكى ھاياتقا بەخت ئېلىپ كېلىدۇ. ⁹يۇقىرىدىكى سۆزلەر توغرا بولۇپ، پۈتۈنلەي قوبۇل قىلىشقا ئەرزىيدۇ. ¹⁰شۇنىڭ ئۈچۈن بىز ئەجىر سىڭدۈرۈۋاتىمىز ۋە كۈرەش قىلىۋاتىمىز. چۈنكى ئۈمىدىمىزنى پۈتكۈل ئىنساننىڭ، بولۇپمۇ ئېتىقاد قىلغۇچىلارنىڭ قۇتقۇزغۇچىسى بولغان مەڭگۈ ھايات خۇداغا باغلىدۇق.

¹¹بۇلارنى قېرىنداشلىرىڭغا بۇيرۇغىن ۋە ئۆگەتكىن. ¹²باشقىلار سېنى ياش دەپ كۆزگە ئىلماي قالمىسۇن. سەن سۆزلىرىڭدە، يۈرۈش-تۇرۇشۇڭدا مېھىر-مۇھەببەتتە، ئېتىقادتا ۋە پاكلىقتا ئېتىقادچىلارغا ئۈلگە بولغىن. ¹³مەن سېنى يوقلاپ بارغۇچە، ئۆزۈڭنى جامائەتكە مۇقەددەس يازمىلارنى ئوقۇپ بېرىشكە، جامائەتكە نەسىھەت قىلىشقا ۋە تەلىم بېرىشكە بېغىشلىغىن. ¹⁴مۇقەددەس روھ ساڭا ئاتا قىلغان قابىلىيەتكە بىپەرۋالىق قىلمىغىن. بۇ قابىلىيەت ساڭا خۇدانىڭ ۋەھىيسى ئارقىلىق جامائەتنىڭ يېتەكچىلىرى قوللىرىنى ئۈستۈڭگە قويغاندا^* بېرىلگەندۇر. ¹⁵شۇنىڭ ئۈچۈن بۇ ئىشلارنى جان-دىلىڭ بىلەن قىلغىن. ئۆزۈڭنى بۇ ئىشلارغا شۇنداق ئاتىغىنكى، ھەممە كىشى سېنىڭ ئالغا باسقانلىقىڭنى كۆرسۇن. ¹⁶ئۆزۈڭگە ۋە بەرگەن تەلىمىڭگە دىققەت قىلغىن، ھەمدە بۇ ئىشلارنى ئىزچىل داۋاملاشتۇرغىن. شۇنداق قىلساڭ، قۇتقۇزۇلىسەن ۋە ساڭا قۇلاق سالغانلارمۇ قۇتقۇزۇلىدۇ.

5

ئېتىقادچىلارنىڭ مەسئۇلىيىتى

¹ياشانغان ئەرلەرگە قاتتىق گەپ قىلمىغىن. ئەكسىچە، ئۇلارنى ئاتاڭنى ھۆرمەتلىگەندەك ھۆرمەتلەپ گەپ قىلغىن. شۇنىڭدەك، ياش ئەرلەرگىمۇ ئۆز ئاكا-ئۇكىلىرىڭغا مۇئامىلە قىلغاندەك مۇئامىلە قىلغىن. ²ياشانغان ئاياللارغا ئاناڭغا مۇئامىلە قىلغاندەك مۇئامىلە قىلغىن. ياش ئاياللارغىمۇ ئاچا-سىڭىللىرىڭغا مۇئامىلە قىلغاندەك پاك قەلبىڭ بىلەن مۇئامىلە قىلغىن.

³ئېرى ئۆلۈپ كەتكەن ۋە ھەقىقىي موھتاجلىقتا قالغان تۇل ئاياللارنىڭ ھالىدىن خەۋەر ئالغىن. ⁴لېكىن بۇ تۇل ئاياللارنىڭ پەرزەنتلىرى ياكى نەۋرىلىرى بولسا، ئۇلار ئۆزلىرىنىڭ ئائىلىلىرىنىڭ ئەھۋالىدىن خەۋەر ئېلىپ، ئاتا-ئانىسىنىڭ ئەجرىنى ياندۇرسۇن ۋە ئېتىقادىنى ئەمەلىيەتتە كۆرسەتسۇن. چۈنكى بۇنداق قىلىش خۇدانى خۇرسەن قىلىدۇ. ⁵ئېرى ئۆلۈپ كەتكەن ئىگە-چاقىسىز تۇل ئاياللار ئۈمىدىنى خۇداغا باغلايدۇ ۋە كېچە-كۈندۈز دۇئا-تىلاۋەت قىلىدۇ. ⁶لېكىن پەقەت ھۇزۇر-ھالاۋەت ئۈچۈنلا ياشايدىغان ئېرى ئۆلۈپ كەتكەن ئاياللار ھايات بولسىمۇ، روھى ئاللىقاچان ئۆلگەندۇر. ⁷ئېتىقادچىلارنىڭ باشقىلار تەرىپىدىن ئەيىبلىنىدىغان ئەھۋالغا چۈشۈپ قالماسلىقى ئۈچۈن سەن جامائەتكە بۇ ئىشلار توغرىسىدا تەربىيە بەرگىن. ⁸بىر كىشى ئۆز تۇغقانلىرىغا، بولۇپمۇ ئائىلىسىدىكىلەرگە قارىمىسا، ئۇ ئەيسا مەسىھتىن تانغان دەپ قارىلىدۇ. ئۇ ھەتتا ئېتىقادسىزلاردىنمۇ ناچار ھېسابلىنىدۇ.

⁹ئېتىقادچىلار جامائىتى ياردەم بېرىلىدىغان ئېرى ئۆلۈپ كەتكەن ئاياللارنى تىزىملىغاندا، ئېرىگە سادىق بولغان ۋە يېشى ئاتمىشتىن ئاشقان ئاياللار تىزىملانسۇن. ¹⁰بۇ ئاياللار ياخشىلىقلىرى بىلەن تونۇلغان، بالىلىرىنى ياخشى تەربىيەلەپ چوڭ قىلغان، مېھماندوست، كەمتەرلىك بىلەن ئېتىقادچىلارنىڭ خىزمىتىدە بولغان، قىيىنچىلىقتا قالغانلارغا ياردەم قىلغان ۋە ئۆزىنى ھەر خىل خەير-ساخاۋەت ئىشلىرىغا بېغىشلىغان بولسۇن.

¹¹ئېرى ئۆلۈپ كەتكەن ياش تۇل ئاياللارنى تىزىملىمىغىن. چۈنكى ئۇلارنىڭ جىسمانىي جەھەتتىكى ئارزۇ-ھەۋەسلىرى ئەيسا مەسىھكە بولغان ساداقىتىدىن ئۈستۈن كېلىپ، قايتا توي قىلىشنى خالاپ قېلىشى مۇمكىن. ¹²شۇنداق بولسا، ئۇلار دەسلەپتە بەرگەن ۋەدىسىگە^* خىلاپلىق قىلغانلىقى ئۈچۈن گۇناھ قىلغان ھېسابلىنىدۇ. ¹³ئۇلار يەنە ھۇرۇنلۇقنى ئادەت قىلىۋېلىپ، ئۆيمۇ ئۆي دوقۇرۇپ يۈرۈپ، غەيۋەت قىلىپ، باشقىلارنىڭ ئىشلىرىغا ئارىلىشىۋالىدىغان ۋالاقتەككۈرلەردىن بولۇپ قېلىشى مۇمكىن. ¹⁴شۇنىڭ ئۈچۈن بۇنداق ياش تۇل ئاياللارنىڭ نىكاھلىنىپ، پەرزەنت كۆرۈپ، ئۆي ئىشلىرى بىلەن شۇغۇللىنىشىنى ئۈمىد قىلىمەن. شۇنداق بولغاندا، بىزگە قارشى تۇرغۇچىلارنىڭ پىتنە-ئىغۋا تارقىتىش پۇرسىتى بولمايدۇ. ¹⁵بۇنداق دېيىشىمدىكى سەۋەب، بەزى تۇل ئاياللار ئاللىبۇرۇن ئېتىقادتىن چەتنەپ، شەيتاننىڭ كەينىگە كىرىپ كەتتى. ¹⁶ئەگەر ئېتىقادى بار بىر ئايالنىڭ تۇل قالغان تۇغقانلىرى بولسا، ئۇ ئۇلارغا ياردەم بەرسۇن. يۈكنى ئېتىقادچىلار جامائىتىگە ئىتتىرىپ قويمىسۇن. شۇنداق بولغاندا، جامائەت ھەقىقىي ئىگە-چاقىسىز تۇل ئاياللارغا ياردەم قىلالايدۇ.

يېتەكچىلەر توغرىسىدا

¹⁷ئېتىقادچىلار جامائىتىنى ياخشى باشقۇرىدىغان يېتەكچىلەر، بولۇپمۇ خۇدانىڭ سۆزىنى يەتكۈزۈش ۋە تەلىم بېرىشتە ئەجىر سىڭدۈرگەن كىشىلەر چوقۇم ئىككى دەرىجە يۇقىرى ھۆرمەتكە سازاۋەر بولىدۇ. ¹⁸چۈنكى مۇقەددەس يازمىلاردا: «خامان تېپىۋاتقان ئۆكۈزنىڭ ئاغزىنى بوغماڭلار» ۋە «ھەرقانداق ئىشلەمچى ئۆز ھەققىنى ئېلىشقا ھەقلىقتۇر» دېيىلگەن. ¹⁹ئىككى ياكى ئۈچ گۇۋاھچى بولمىغۇچە، جامائەتنىڭ يېتەكچىسى ئۈستىدىن قىلىنغان ئەرزنى قوبۇل قىلمىغىن. ²⁰ئەگەر يېتەكچى گۇناھ قىلغان بولسا، باشقىلارنىڭ ئىبرەت ئېلىشى ئۈچۈن جامائەت ئالدىدا ئەيىبلەنسۇن. ²¹خۇدانىڭ، ئەيسا مەسىھنىڭ ۋە خۇدا تاللىغان پەرىشتىلەرنىڭ ئالدىدا ساڭا شۇنى بۇيرۇيمەنكى، سەن بۇ سۆزلىرىمگە قەتئىي ئەمەل قىلغىن. ئايرىمىچىلىق قىلمىغىن، ھەرقانداق ئىشتا بىر تەرەپكە يان باسمىغىن. ²²بىرسىنى يېتەكچىلىك ۋەزىپىسىگە تەيىنلەشكە ئالدىراپ، ئۈستىگە قولۇڭنى قويمىغىن، بولمىسا ئۇنىڭ گۇناھلىرىغا شېرىك بولۇپ قېلىشىڭ مۇمكىن. ئۆزۈڭنى پاك تۇتقىن. ²³(ئاشقازىنىڭ ئۈچۈن ۋە دائىم كېسەل بولىدىغانلىقىڭ ئۈچۈن، پەقەت سۇلا ئىچمەي، بىرئاز شارابمۇ ئىچىپ قويغىن.) ²⁴بەزى كىشىلەرنىڭ گۇناھلىرىنى ئاسانلا كۆرۈۋالغىلى بولىدۇ، ئۇلارنىڭ سوراققا تارتىلىشى ئېنىق. لېكىن بەزى كىشىلەرنىڭ گۇناھلىرى كېيىن ئاشكارا بولىدۇ. ²⁵خۇددى شۇنىڭغا ئوخشاش بەزى كىشىلەرنىڭ ياخشى ئەمەللىرىنىمۇ ئاسانلا كۆرۈۋالغىلى بولىدۇ. لېكىن بەزى كىشىلەرنىڭ ياخشى ئەمەللىرى بولسا كېيىن مەلۇم بولىدۇ.

6

¹قۇل ئېتىقادچىلارنىڭ ھەممىسى ئۆز خوجايىنلىرىنى ھۆرمەتلىسۇن. شۇنداق قىلغاندا، خۇدانىڭ نامىنىڭ ۋە خۇدادىن كەلگەن تەلىمنىڭ باشقىلار تەرىپىدىن كەمسىتىلىشىدىن ساقلانغىلى بولىدۇ. ²خوجايىنلىرىمۇ ئېتىقادچى بولسا، قۇللار: «بىز ھەممىمىز خۇدانىڭ ئائىلىسىدىكى قېرىنداشلارغۇ» دەپ، ئۇلارغا ھۆرمەتسىزلىك قىلمىسۇن. ئەكسىچە، خوجايىنلىرىغا تېخىمۇ ياخشى خىزمەت قىلسۇن. چۈنكى ئۇلارنىڭ ياخشى خىزمىتىدىن بەھرىمەن بولىدىغان خوجايىنلارمۇ خۇدانىڭ ياخشى كۆرىدىغان بەندىلىرىدۇر.

يالغان تەلىم ۋە پۇلپەرەسلىكنىڭ ئاقىۋىتى

سەن بۇ ئىشلارنى جامائەتكە ئۆگەتكىن ۋە تاپىلىغىن. ³ئوخشىمايدىغان تەلىملەرنى تەرغىب قىلغان كىشىلەر رەببىمىز ئەيسا مەسىھنىڭ ھەق سۆزلىرىنى، شۇنداقلا ئۇنىڭ بىزنى ئىخلاسمەنلىككە يېتەكلەيدىغان تەلىمىنى قوبۇل قىلمىغان كىشىلەر بولۇپ، ⁴ئۇلار ھېچنېمىنى بىلمەيدىغان تەكەببۇرلاردۇر. ئۇلار غوۋغا چىقىرىش ۋە گەپ تالىشىشقا ئىنتايىن ئامراقتۇر. بۇنداق گەپ تالىشىشلار ھەسەتخورلۇق، جېدەل-ماجىرا، تۆھمەت، گۇمانخورلۇق ⁵ۋە دائىم سۈركىلىش پەيدا قىلىدۇ. بۇ كىشىلەرنىڭ نىيىتى بۇزۇقتۇر. بۇلار ھەقىقەتتىن يۈز ئۆرۈگەنلەردۇر. ئۇلارنىڭ نەزىرىدە خۇدانىڭ يولى پەقەتلا بىر تاپاۋەت يولىدۇر، خالاس.

⁶دەرۋەقە، خۇدانىڭ يولىدا رازىمەنلىك بىلەن ماڭغان ئادەم ھەقىقىي روناق تاپىدۇ. ⁷بىز بۇ دۇنياغا ھېچنېمە ئېلىپ كەلمىدۇق ۋە بۇ دۇنيادىن ھېچنېمە ئېلىپ كېتەلمەيمىز. ⁸شۇڭا يېمەك-ئىچمەك ۋە كىيىم-كېچىكىمىز تولۇق بولسىلا، رازى بولۇشىمىز كېرەك. ⁹باي بولۇشنىلا ئويلايدىغانلار بولسا ھامان ئېزىپ كېتىدۇ. ئۇلار ئىنسانلارنى قۇرۇتۇپ ھالاك قىلىدىغان نۇرغۇن زىيانلىق ھەم ئەخمىقانە ھەۋەسلەرنىڭ تورىغا چۈشىدۇ. ¹⁰چۈنكى پۇلپەرەسلىك ھەر خىل يامانلىقنىڭ يىلتىزىدۇر. بەزىلەر باي بولۇش ھەۋىسى بىلەن ئېتىقادتىن چەتنەپ، ئۆزىگە تۈگىمەس ئازاب تېپىۋالدى.

تىموتىيغا نەسىھەت

¹¹ئەي خۇدانىڭ سادىق بەندىسى، سەن بۇنداق ئىشلاردىن يىراق تۇرغىن. ھەققانىي، ئىخلاسمەن، ئېتىقادلىق، مېھىر-مۇھەببەتلىك، سەۋر-تاقەتلىك ۋە مۇلايىم بولۇشقا ئىنتىلگىن. ¹²ئېتىقادىمىز ئۈچۈن بولىدىغان ئۇلۇغ كۈرەشكە ئۆزۈڭنى ئاتىغىن. خۇدا ئاتا قىلغان مەڭگۈلۈك ھاياتنى قەدىرلىگىن. سەن مەڭگۈلۈك ھايات ئۈچۈن چاقىرىلدىڭ، ھەمدە نۇرغۇنلىغان گۇۋاھچىلار ئالدىدا بۇ ھاياتقا يېتەكلەيدىغان ئېتىقادىڭنى ئېتىراپ قىلدىڭ. ¹³مەن ھەممىگە ھاياتلىق بەرگۈچى خۇدانىڭ، شۇنداقلا پونتىي پىلاتۇسنىڭ ئالدىدا ئۇلۇغ ھەقىقەت توغرىسىدا يۈرەكلىك ھالدا گۇۋاھلىق بەرگەن ئەيسا مەسىھنىڭ ھۇزۇرىدا ساڭا شۇنى تاپىلايمەنكى، ¹⁴رەببىمىز ئەيسا مەسىھ قايتىپ كەلگۈچە خۇدانىڭ بۇ ئەمرلىرىگە تولۇق ئەمەل قىلغىن. شۇنداق قىلساڭ، ھېچكىم سېنى ئەيىبلىيەلمەيدۇ. ¹⁵خۇدا ۋاقىت-سائىتى كەلگەندە، ئەيسا مەسىھنى قايتا ئەۋەتىدۇ. بىردىنبىر ھۆكۈمران بولغان مۇبارەك خۇدا پادىشاھلارنىڭ پادىشاھى ۋە رەبلەرنىڭ رەببىدۇر. ¹⁶پەقەت ئۇلا ئۆلمەستۇر. ئۇ ئادەم يېقىنلىشالمايدىغان نۇر ئىچىدە ياشايدۇ، ئۇنى ھېچكىم كۆرمىگەن ۋە ھېچكىم كۆرەلمەيدۇ. بارلىق ھۆرمەت ۋە كۈچ-قۇدرەت ئەبەدىلئەبەد ئۇنىڭغا مەنسۇپ بولغاي، ئامىن!

¹⁷بۇ زاماندىكى باي ئېتىقادچىلارغا مەغرۇرلانماسلىقنى، ئۆتكۈنچى بايلىققا ئۈمىد باغلىماسلىقنى بۇيرۇغىن. ئۇلار ئۈمىدىنى بىز بەھرىمەن بولۇشقا تېگىشلىك بولغان نەرسىلەرنى بىزگە سېخىيلىق بىلەن بەرگەن خۇداغا باغلىسۇن. ¹⁸ئۇلارغا باشقىلارغا ياخشىلىق قىلىشنى ۋە خەير-ساخاۋەتلىك ئىشلارنى كۆپ قىلىشنى، مەرد ۋە قولى ئوچۇق بولۇشنى بۇيرۇغىن. ¹⁹شۇنداق قىلغاندا، ئۇلار كېلەچەكتە ھەقىقىي ھاياتقا ئېرىشىشكە پۇختا ئاساس بولىدىغان خەزىنە توپلىيالايدۇ.

²⁰ئەي تىموتىي، ساڭا ئامانەت قىلىنغانلارنى ياخشى ساقلىغىن. خۇداغا بولغان ئىخلاسمەنلىككە مۇناسىپ كەلمەيدىغان قۇرۇق گەپلەردىن ۋە بىمەنە بىلىمنى بىلىم دېگۈچىلەرنىڭ تالاش-تارتىشلىرىدىن ساقلانغىن. ²¹بەزىلەر مۇشۇنداق بىمەنە بىلىملەرگە ئەگىشىپ، ئېتىقادتىن چەتنىدى.

خۇدانىڭ مېھىر-شەپقىتى سىلەرگە يار بولغاي!