ئۇيغۇرچە مۇقەددەس كىتاب جەمئىيىتى

ياقۇپ يازغان خەت

1

¹خۇدانىڭ ۋە رەببىمىز ئەيسا مەسىھنىڭ خىزمەتكارى بولغان مەنكى ياقۇپتىن دۇنيانىڭ ھەرقايسى جايلىرىغا تارقالغان ئون ئىككى يەھۇدىي قەبىلىسىگە، يەنى ئەيسا مەسىھكە ئېتىقاد قىلىدىغانلارغا سالام.

ئېتىقاد ۋە سىناق

²قېرىنداشلار، ھەر خىل سىناقلارغا دۇچ كەلگەندە، ئۇنى زور خۇشاللىق دەپ بىلىڭلار. ³چۈنكى سىلەرگە مەلۇمكى، بۇنداق سىناقلار ئارقىلىق ئېتىقادىڭلار سىنىلىپ، چىداملىق بولىسىلەر. ⁴شۇڭا ھەرقانداق سىناقلارغا بەرداشلىق بېرىپ، چىداملىقىڭلارنى يېتىلدۈرۈڭلار. شۇنداق قىلساڭلار، خۇدانىڭ كۈتكىنىدەك ئېتىقادتا پىشقان كەمچىلىكسىز ئادەملەردىن بولىسىلەر. ⁵ئەگەر ئاراڭلاردىكى بىرى ئەقىل-پاراسەتكە موھتاج بولسا، سېخىي ۋە مالال كۆرمەيدىغان خۇدادىن تىلىسۇن. شۇندىلا ئۇ ئەقىل-پاراسەتكە ئېرىشىدۇ. ⁶بىراق ئۇ ئەقىل-پاراسەت تىلىگەندە، خۇدادىن قىلچىمۇ گۇمانلانمىسۇن ۋە تولۇق ئىشەنچ بىلەن تىلىسۇن. چۈنكى خۇدادىن گۇمانلانغان كىشى شامال چىقسىلا تەۋرىنىپ كېتىدىغان دېڭىز دولقۇنىغا ئوخشايدۇ. ^7‏-8بۇنداق كىشى ئۆزىنىڭ بارلىق ئىشلىرىدا بىقارار ۋە تۇراقسىز كېلىدۇ. شۇڭا بۇنداق ئادەم خۇدادىن تىلىگەن نەرسىلىرىگە ئېرىشىمەن دەپ ئويلىمىسۇن.

نامراتلىق ۋە بايلىق

⁹ئېتىقادچىلار نامرات بولسىمۇ، ئۆزلىرىنىڭ يەنىلا خۇدانىڭ نەزىرىدە قىممەتلىك ئىكەنلىكىدىن خۇشال بولسۇن. ¹⁰ئۆزلىرىنى خۇدا ئالدىدا تۆۋەن تۇتقان باي ئېتىقادچىلار خۇشال بولسۇن. چۈنكى بايلار خۇددى دالادىكى گۈل چېچەكلەردەك تېز غايىب بولىدۇ. ¹¹كۈن قىزىغاندا دالادىكى ئوت-چۆپلەر قۇرۇپ، چېچەكلىرى توزۇيدۇ ۋە گۈزەللىكى يوقىلىدۇ. خۇددى شۇنىڭغا ئوخشاش، باي ئادەملەرمۇ ئۆز ھەلەكچىلىكىدە يوقىلىدۇ.

سىنىلىش ۋە ئازدۇرۇلۇش

¹²سىناقلارغا سەۋرچانلىق بىلەن بەرداشلىق بەرگەن كىشى نەقەدەر بەختلىك-ھە! چۈنكى ئۇ سىناقتىن ئۆتكەندىن كېيىن، خۇدا ئۆزىنى سۆيگەنلەرگە ۋەدە قىلغان مەڭگۈلۈك ھاياتنىڭ تاجىغا مۇيەسسەر بولىدۇ. ¹³ئازدۇرۇلۇشقا دۇچ كەلگەن ئادەم خۇدا مېنى ئازدۇرۇۋاتىدۇ دەپ ئويلىمىسۇن. چۈنكى خۇدا باشقىلارنى ئازدۇرمايدۇ ھەم ئۆزىمۇ ئازمايدۇ. ¹⁴كىمدىكىم ئۆز ھەۋەسلىرىنىڭ كەينىگە كىرسە، ئۇ ئازىدۇ. ¹⁵ھەۋەس گۇناھ تۇغىدۇ. گۇناھ ئۆسۈپ يېتىلسە، مەڭگۈلۈك ئۆلۈمگە ئېلىپ بارىدۇ.

¹⁶شۇڭا قەدىرلىك قېرىنداشلىرىم، ئالدىنىپ قالماڭلار! ¹⁷ھەرقانداق ئېسىل ۋە مۇكەممەل ئىلتىپات ئاسماندىن، يەنى پۈتكۈل يورۇقلۇقلارنى ياراتقان خۇدادىن كېلىدۇ. خۇدا يورۇقلۇقتىن پەيدا بولغان كۆلەڭگىلەردەك ئۆزگىرىشچان ئەمەس. ¹⁸خۇدا ئۆزىنىڭ ھەقىقىي سۆزىنى ئاشكارىلاش ئارقىلىق بىزنى يېڭى ھاياتقا ئېرىشتۈرۈشكە ئىرادە قىلدى. شۇنىڭ بىلەن خۇددى تۇنجى ھوسۇل خۇداغا ئاتالغىنىدەك، بىز ئېتىقادچىلار پۈتكۈل ئىنسانلار ئىچىدە تۇنجى بولۇپ خۇداغا ئاتالدۇق.

ئاڭلاش ۋە ئىجرا قىلىش

¹⁹قەدىرلىك قېرىنداشلىرىم، شۇنى ئېسىڭلاردا تۇتۇڭلاركى، ئاڭلاشقا چاققان، سۆزلەشكە تەمكىن بولۇڭلار، ئاسان غەزەپلەنمەڭلار. ²⁰چۈنكى غەزەپلەنسەڭلار، خۇدانى خۇرسەن قىلىدىغان ھەققانىي ئىشلارنى قىلالمايسىلەر. ²¹شۇنىڭ ئۈچۈن بارلىق ئىپلاس ۋە رەزىل قىلمىشلارنى تاشلاڭلار. قەلبىڭلاردىن ئورۇن ئالغان ۋە سىلەرنى قۇتقۇزۇشقا قادىر بولغان خۇدانىڭ سۆزىنى كەمتەرلىك بىلەن ئۆزلەشتۈرۈڭلار.

²²خۇدانىڭ سۆزىنى ئاڭلاپ قويساملا بولىدۇ دەپ، ئۆزۈڭلارنى ئالدىماڭلار. ئەكسىچە، ئۇنى ئىجرا قىلغۇچىلاردىن بولۇڭلار. ²³خۇدانىڭ سۆزىنى ئاڭلاپ قويۇپلا، ئۇنى ئىجرا قىلمىغان كىشى خۇددى ئۆز ئەپتىنى ئەينەكتە كۆرگەن كىشىگە ئوخشايدۇ. ²⁴بۇنداق كىشى ئەينەكتىن يىراقلاشسىلا، ئۆزىنىڭ ئەپتىنى ئۇنتۇپ قالىدۇ. ²⁵سىلەر خۇدانىڭ ئەركىنلىك ئاتا قىلغۇچى مۇكەممەل قانۇنىنى دائىم ئەستايىدىل ئوقۇڭلار. قانۇننى ئوقۇپ بولۇپلا، ئۇنتۇپ قالماستىن، بەلكى ئۇنىڭغا قەتئىي ئەمەل قىلىڭلار. شۇنداق قىلساڭلار، خۇدا ئىشلىرىڭلارغا بەرىكەت ئاتا قىلىدۇ.

²⁶ئۆزىنى خۇداغا ئىخلاسمەن ئادەم دەپ قارىغان، لېكىن تىلىنى تىزگىنلىمىگەن كىشى ئۆزىنى ئۆزى ئالدايدۇ. بۇنداق ئىخلاسمەنلىك ئەھمىيەتسىزدۇر. ²⁷خۇدائاتىمىزنىڭ نەزىرىدىكى پاك ۋە ئەيىبسىز ئىخلاسمەنلىك بولسا قىيىنچىلىقتا قالغان يېتىم-يېسىر، ئېرى ئۆلۈپ كەتكەن تۇل ئاياللارغا غەمخورلۇق قىلىش ۋە ئۆزىنى دۇنيانىڭ بۇلغىشىدىن ساقلاشتۇر.

2

ئايرىمىچىلىق قىلماسلىق

¹قېرىنداشلىرىم، سىلەر ئۇلۇغ رەببىمىز ئەيسا مەسىھكە ئېتىقاد قىلغانىكەنسىلەر، باشقىلارغا ئىككى خىل كۆز بىلەن قارىماڭلار. ²سىلەرنىڭ خۇداغا ئىبادەت قىلىدىغان يىغىلىشىڭلارغا پۇزۇر كىيىنىۋالغان بىر باي ۋە جۇل-جۇل كىيىنىۋالغان بىر كەمبەغەل كەلسە، ³سىلەر باي كىشىگە: «تۆرگە چىقسىلا!»، كەمبەغەلگە: «ئۇ يەردە تۇرغىن» ياكى «تۆۋەندە ئولتۇرغىن» دېسەڭلار، ⁴سىلەرنىڭ بۇنداق ئوخشىمايدىغان مۇئامىلەڭلار نىيىتىڭلارنىڭ يامان ئىكەنلىكىنى ئېنىق كۆرسىتىپ بەرمەمدۇ؟

⁵قەدىرلىك قېرىنداشلىرىم، قۇلاق سېلىڭلار! خۇدا بۇ دۇنيادىكى كەمبەغەللەرنى ئېتىقاد جەھەتتە باي قىلىش، ھەمدە ئۇلارنى ئۆزىنى سۆيگەنلەرگە بېرىشكە ۋەدە قىلغان پادىشاھلىقىغا ئېرىشتۈرۈش ئۈچۈن تاللىدى. ⁶بىراق سىلەر كەمبەغەللەرنى خارلىدىڭلار! سىلەرنى ئەزگەن ۋە سوتقا سۆرىگەنلەر ئەمەلىيەتتە بايلار ئەمەسمىدى؟ ⁷سىلەر مەنسۇپ بولغان ئەيسا مەسىھنىڭ ئالىيجاناب نامىغا كۇپۇرلۇق قىلىۋاتقانلار يەنە شۇ بايلار ئەمەسمۇ؟

⁸مۇقەددەس يازمىلاردىكى «باشقىلارنى ئۆزۈڭلارنى سۆيگەندەك سۆيۈڭلار» دېگەن ئەمرگە، يەنى خۇدانىڭ پادىشاھلىقىنىڭ قانۇنىغا ھەقىقىي ئەمەل قىلساڭلار، ياخشى قىلغان بولىسىلەر. ⁹لېكىن باشقىلارغا ئىككى خىل كۆز بىلەن قارىساڭلار، گۇناھ قىلغان بولىسىلەر. چۈنكى سىلەر خۇدانىڭ قانۇنىغا خىلاپلىق قىلدىڭلار. ¹⁰ئەگەر بىر كىشى خۇدانىڭ پۈتۈن قانۇنىغا ئەمەل قىلدىم دەپ تۇرۇپ، ئۇنىڭدىكى بىرەر ئەمرىگە خىلاپلىق قىلسا، ئۇ خۇدانىڭ نەزىرىدە پۈتۈن قانۇنغا خىلاپلىق قىلغان ئادەمگە ئوخشاش گۇناھكار ھېسابلىنىدۇ. ¹¹«زىنا قىلماڭلار» دېگەن خۇدا ھەم «قاتىللىق قىلماڭلار»مۇ دېگەن. شۇڭا سىلەر زىنا قىلمىساڭلارمۇ، لېكىن قاتىللىق قىلساڭلار، يەنىلا پۈتۈن تەۋرات قانۇنىغا خىلاپلىق قىلغان بولىسىلەر. ¹²سىلەر سىلەرنى گۇناھتىن ئازاد قىلىدىغان قانۇن بويىچە سوراق قىلىنىسىلەر. شۇڭا سۆز-ھەرىكىتىڭلار بۇ قانۇنغا ئۇيغۇن بولسۇن. ¹³سىلەر باشقىلارغا رەھىم قىلمىساڭلار، سوراق قىلىنغاندا خۇدا سىلەرگىمۇ رەھىم قىلمايدۇ. رەھىمدىل ئادەم سوراق پەيتىدە خۇدانىڭ شەپقىتىگە ئېرىشىدۇ.

ئېتىقاد ۋە ئەمەلىيەت

¹⁴قېرىنداشلىرىم، ئەگەر بىر كىشى ئاغزىدا: «مەن ئەيسا مەسىھكە ئېتىقاد قىلىمەن» دەپ تۇرۇپ، ئۇنى ئۆزىنىڭ ئەمەلىيىتىدە كۆرسەتمىسە، بۇنىڭ نېمە پايدىسى؟ ئۇ بۇنداق ئېتىقاد بىلەن قۇتقۇزۇلۇشقا ئېرىشەلەمدۇ؟ ^15‏-16ئەگەر قېرىنداشلىرىڭلاردىن بىرى ئاچ-يالىڭاچ قالسا، ئۇنىڭغا: «خۇدا قورسىقىڭنى توق، كىيىمىڭنى پۈتۈن قىلسۇن، ئامان بول!» دەپ قويۇپلا، ھاجىتىدىن چىقمىساڭلار، بۇنىڭ نېمە پايدىسى؟ ¹⁷شۇنىڭغا ئوخشاش، ئادەمنىڭ ئۆز ئېتىقادىغا ماس كېلىدىغان ئەمەلىيىتى بولمىسا، بۇنداق ئېتىقادنىڭ ھېچقانداق ئەھمىيىتى يوقتۇر.

¹⁸لېكىن بەزىلەر: «بەزىلەرنىڭ پەقەت ئېتىقادىلا بار، بەزىلەرنىڭ پەقەت ئەمەللىرىلا بار» دېيىشى مۇمكىن. لېكىن مەن بۇنداق ئادەملەرگە: «ئەمەللىرىڭ بولمىسا، ئېتىقادىڭنى قانداق نامايان قىلالايسەن؟ مەن ئېتىقادىمنى ئەمەللىرىم ئارقىلىق نامايان قىلىمەن» دەپ جاۋاب بېرىمەن. ¹⁹سەن خۇدانىڭ بىر ئىكەنلىكىگە ئىشەنسەڭلا كۇپايە قىلامدۇ؟ خۇدانىڭ بىر ئىكەنلىكىگە ھەتتا جىنلارمۇ ئىشىنىدۇ ھەم خۇدادىن قورقۇپ دىر-دىر تىترەيدۇ. ²⁰ئەي نادان، ئەمەلىيىتى يوق ئېتىقادنىڭ ئەھمىيەتسىز ئىكەنلىكىنى قاچانمۇ بىلەرسەن؟ ²¹ئەجدادىمىز ئىبراھىم خۇدانىڭ ئەمرىگە ئىتائەت قىلىش ئۈچۈن ئۆز ئوغلى ئىسھاقنى قۇربانلىق قىلماقچى بولغان ۋە ئۇ بۇ ئەمەلىيىتى ئۈچۈن خۇدا تەرىپىدىن ھەققانىي ئادەم دەپ ھېسابلانغان ئەمەسمۇ؟ ²²دېمەك، ئۇنىڭ ئەمەلىيىتى ئۇنىڭ ئېتىقادىغا ماس كەلدى. شۇنداق قىلىپ، ئۇنىڭ ئېتىقادى ئەمەلىيىتى ئارقىلىق تولۇقلاندى. ²³شۇنىڭ بىلەن مۇقەددەس يازمىلاردا ئېيتىلغان: «ئىبراھىم خۇداغا ئىشەندى، شۇڭا خۇدا ئۇنى ھەققانىي ئادەم ھېسابلىدى» دېگەن سۆز ئىسپاتلاندى ۋە ئىبراھىم خۇدانىڭ دوستى دەپ ئاتالدى. ²⁴بىز بۇنىڭدىن شۇنى كۆرۈۋالالايمىزكى، خۇدا ئېتىقادىلا بولۇپ ئەمەلىيىتى بولمىغان ئادەمنى ئەمەس، بەلكى ئېتىقادى بىلەن ئەمەلىي ھەرىكىتى بىردەك بولغان ئادەمنى ھەققانىي ئادەم دەپ ھېسابلايدۇ. ²⁵بۇ توغرۇلۇق يەنە بىر مىسال بار. پاھىشە ئايال راھاب ئىسرائىل ئايغاقچىلىرىنى ئۆز ئۆيىدە يوشۇرۇپ، ئۇلارنىڭ باشقا يول بىلەن قېچىپ كېتىشىگە ياردەم بەرگەن ئەمەلىي ھەرىكىتى ئۈچۈن ھەققانىي ئادەم دەپ ھېسابلانغان ئەمەسمۇ؟ ²⁶روھى يوق تەن ئۆلۈك بولغىنىدەك، ئەمەلىيىتى يوق ئېتىقادمۇ ئۆلۈكتۇر.

3

تىلنى تىزگىنلەش

¹قېرىنداشلىرىم، ئېتىقادچىلار جامائىتىدە ھەممىڭلار تەلىم بەرگۈچى بولۇۋالماڭلار! سىلەرگە مەلۇمكى، خۇدا بىز تەلىم بەرگۈچىلەرنى باشقىلاردىن تېخىمۇ ئېغىر سوراققا تارتىدۇ. ²ئادەملەر دائىم خاتالىق سادىر قىلىدۇ. ھالبۇكى، تىلدا خاتالاشمىغان كىشى ھەر جەھەتتىن پىشىپ يېتىلگەن ۋە ئۆزىنى تىزگىنلىگەن كىشى بولىدۇ. ³بىز ئاتلارنى تىزگىنلەش ئۈچۈن ئۇلارنىڭ ئاغزىغا ئېغىزدۇرۇق سېلىپ، ئۇلارنى خالىغان يېرىمىزگە ماڭدۇرالايمىز. ⁴يەنە مەسىلەن، شۇنچە چوڭ كېمە كۈچلۈك بورانغا دۇچ كەلسىمۇ، لېكىن كېمىچى كىچىككىنە رول ئارقىلىق ئۇنى خالىغان يېرىگە ھەيدىيەلەيدۇ. ⁵شۇنىڭغا ئوخشاش، گەرچە تىل تېنىمىزنىڭ كىچىك بىر ئەزاسى بولسىمۇ، لېكىن چوڭ ئىشلارغا سەۋەب بولالايدۇ. كىچىككىنە بىر ئوت ئۇچقۇنىنىڭ شۇنچە چوڭ ئورماننى كۆيدۈرۈۋېتەلەيدىغانلىقىنى ئويلاپ بېقىڭلار. ⁶تىل دەل شۇ ئوت ئۇچقۇنىغا ئوخشايدۇ. ئۇ ئەزالىرىمىزنىڭ ئىچىدىكى ھەر خىل قىلمىشنىڭ مەنبەسى بولۇپ، پۈتۈن بەدىنىمىزنى بۇلغايدۇ ھەم ھاياتىمىزنى ۋەيران قىلىدۇ. بۇ ئوت دوزاختىن يېقىلغاندۇر. ⁷ئىنسانلار ياۋايى ھايۋانلار، ئۇچار قاناتلار، ئۆمىلىگۈچى ھايۋانلار ۋە سۇ مەخلۇقاتلىرىنى تىزگىنلىيەلەيدۇ، ھەمدە ئۇلارنى ئاللىبۇرۇن تىزگىنلىدى. ⁸ئەمما تىلنى ھېچكىم تىزگىنلىيەلمەيدۇ. تىل تىزگىنلىگىلى بولمايدىغان ئوسال بىر نەرسىدۇر. ئۇ خۇددى جانغا زامىن بولىدىغان زەھەرگە ئوخشايدۇ. ⁹بىز تىلىمىز بىلەن خۇدائاتىمىزنى مەدھىيەلەيمىز، يەنە شۇ تىلىمىز بىلەن خۇدا ئۆزىنىڭ ئوبرازىدا ياراتقان ئىنسانلارنى قارغايمىز. ¹⁰دېمەك، بىر ئېغىزدىن ھەم مەدھىيە ھەم قارغىش چىقىدۇ. قېرىنداشلىرىم، بۇنداق بولماسلىقى كېرەك! ¹¹بىر بۇلاقتىن شەربەتمۇ، زەرداپمۇ چىقامدۇ؟ ¹²قېرىنداشلىرىم، ئەنجۈر دەرىخىدە زەيتۇن، ئۈزۈم تېلىدا ئەنجۈر بولامدۇ؟ ئەلۋەتتە، شەربەت بۇلىقىدىنمۇ زەرداب چىقمايدۇ.

خۇدادىن كەلگەن ئەقىل-پاراسەت

¹³ئەگەر ئاراڭلاردا بىرسى ئۆزىنى ئەقىل-پاراسەتلىك دەپ ھېسابلىسا، ئۇ بۇنى ئۆزىنىڭ پەزىلەتلىك ھاياتى، يەنى كەمتەرلىك بىلەن قىلغان ياخشى ئەمەللىرى ئارقىلىق نامايان قىلسۇن. ¹⁴لېكىن قەلبىڭلاردا قاتتىق ھەسەتخورلۇق ۋە شەخسىيەتچىلىك بولسا، ئۆزۈڭلارنى ئەقىل-پاراسەتلىكمەن دەپ ماختىنىپ، يالغان سۆزلىمەڭلار. ¹⁵ھەسەتخورلۇق ۋە شەخسىيەتچىلىك ئارىلاشقان بۇنداق ئەقىل-پاراسەت خۇدادىن كەلگەن بولماستىن بەلكى شەيتاندىن كەلگەن بولۇپ، بۇ دۇنياغا ۋە ئىنسان تەبىئىتىگە خاستۇر. ¹⁶ھەسەتخورلۇق ۋە شەخسىيەتچىلىك بولغانلا يەردە قالايمىقانچىلىق ۋە ھەر خىل رەزىللىكلەر بولىدۇ. ¹⁷لېكىن بىر ئادەمدە خۇدادىن كەلگەن ئەقىل-پاراسەت بولسا، ئۇ ئالدى بىلەن پاك، ئاندىن تىنچلىقپەرۋەر، خۇش پېئىل، كەمتەر ۋە رەھىمدىل بولىدۇ ۋە ئۇنىڭ ھاياتى ياخشى ئەمەللەر بىلەن تولغان بولىدۇ. ئۇ يەنە ئايرىمىچىلىق ۋە ساختىپەزلىك قىلمايدۇ. ¹⁸تىنچلىق ئىزدىگۈچىلەر تىنچلىق ئۇرۇقىنى چاچىدۇ ۋە ئۇنىڭدىن ئادالەت ھوسۇلىنى ئالىدۇ.

4

بۇ دۇنيانى دوست تۇتماسلىق

¹ئاراڭلاردىكى توقۇنۇش ۋە ماجىرالارنىڭ سەۋەبى نېمە؟ بۇ دەل قەلبىڭلاردىكى سىلەرگە قارشى جەڭ قىلىۋاتقان بولمىغۇر ھەۋەسلىرىڭلار ئەمەسمۇ؟ ²سىلەر ئارزۇ قىلغان نەرسىلەرگە ئېرىشەلمىسەڭلار، ئادەم ئۆلتۈرۈشتىن يانمايسىلەر. ھەسەت قىلغان نەرسەڭلارغا ئېرىشمىسەڭلار، جېدەل-ماجىرا چىقىرىسىلەر. سىلەر خۇدادىن تىلىمىگەنلىكىڭلار ئۈچۈن ئېرىشەلمەيسىلەر. ³خۇدادىن تىلىسەڭلارمۇ، تىلىگىنىڭلارغا ئېرىشەلمەيسىلەر، چۈنكى نىيىتىڭلار يامان بولۇپ، ئارزۇ-ھەۋەسلىرىڭلارنى قاندۇرۇش ئۈچۈنلا تىلەيسىلەر. ⁴ئەي ساداقەتسىزلەر، بۇ دۇنيا بىلەن دوستلىشىشنىڭ ئەمەلىيەتتە خۇدا بىلەن دۈشمەنلىشىش ئىكەنلىكىنى بىلمەمتىڭلار؟ ئەگەر سىلەر بۇ دۇنيانى دوست تۇتساڭلار، خۇدانىڭ دۈشمىنىگە ئايلىنىسىلەر. ⁵مۇقەددەس يازمىلاردا: «خۇدا بىزنىڭ ئىچىمىزگە سالغان روھ كۈچلۈك ھەسەتخورلۇققا تولدى» دېيىلگەن. سىلەرچە، بۇ قۇرۇق سۆزمۇ؟ ⁶خۇدا بىزنىڭ يامان ئارزۇ-ھەۋەسلىرىمىزنىڭ ئۈستىدىن غەلىبە قىلىشىمىز ئۈچۈن بىزگە ناھايىتى كۆپ مېھرىبانلىق قىلدى. مۇقەددەس يازمىلاردا: «خۇدا قارشىدۇر تەكەببۇرلارغا، مېھىر-شەپقەت قىلار كىچىك پېئىللارغا» دەپ يېزىلغاندۇر.

⁷شۇنىڭ ئۈچۈن خۇداغا ئىتائەتمەن بولۇپ، شەيتانغا قارشى تۇرۇڭلار. شۇ چاغدىلا شەيتان سىلەردىن قاچىدۇ. ⁸خۇداغا يېقىنلىشىڭلار، خۇدا سىلەرگە يېقىنلىشىدۇ. ئەي گۇناھكارلار، گۇناھتىن قول ئۈزۈڭلار. ئەي خۇدانى ھەم دۇنيانى دوست تۇتىمىز دېگۈچىلەر، قەلبىڭلارنى پاكلاڭلار. ⁹قىلغان گۇناھلىرىڭلار ئۈچۈن قايغۇرۇڭلار، ھازا تۇتۇپ يىغلاڭلار، كۈلكەڭلارنى ماتەمگە، خۇشاللىقىڭلارنى قايغۇغا ئايلاندۇرۇڭلار. ¹⁰خۇدانىڭ ئالدىدا ئۆزۈڭلارنى تۆۋەن تۇتۇڭلار. شۇ چاغدا خۇدا سىلەرنى ئۈستۈن قىلىدۇ.

قېرىنداشلار ئۈستىدىن ھۆكۈم قىلماسلىق

¹¹قېرىنداشلار، بىر-بىرىڭلارنى قارىلىماڭلار. كىمكى بىر قېرىندىشىنى قارىلىسا ياكى ئۇنىڭ ئۈستىدىن ھۆكۈم قىلسا، ئۇ قانۇننى قارىلىغان ۋە قانۇن ئۈستىدىن ھۆكۈم قىلغان بولىدۇ. ئەگەر سەن قانۇن ئۈستىدىن ھۆكۈم قىلساڭ، قانۇنغا رىئايە قىلغۇچى ئەمەس، بەلكى قانۇننىڭ ئۈستىدىن ھۆكۈم قىلغۇچى بولىسەن. ¹²پەقەت خۇدالا قانۇن تۈزگۈچى ۋە ھۆكۈم قىلغۇچىدۇر. پەقەت ئۇلا قۇتقۇزۇش ۋە ھالاك قىلىش قۇدرىتىگە ئىگىدۇر. شۇنداق ئىكەن، سىلەرنىڭ باشقىلارنىڭ ئۈستىدىن ھۆكۈم قىلىشقا نېمە ھوقۇقۇڭلار بار؟!

ماختانماسلىق

¹³بەزىلەر: «بۈگۈن ياكى ئەتە پالان شەھەرگە بارىمىز. ئۇ يەردە بىر يىل تۇرۇپ، تىجارەت قىلىپ، كۆپ پۇل تاپىمىز» دەيدۇ. بۇنداق دەيدىغانلار ماڭا قۇلاق سېلىڭلار، ¹⁴ئەتە نېمە بولىدىغانلىقىنى بىلەمسىلەر؟ سىلەرنىڭ ھاياتىڭلار خۇددى بىر دەمدىلا پەيدا بولۇپ يوقاپ كېتىدىغان تۇمانغا ئوخشايدۇ. ¹⁵شۇنىڭ ئۈچۈن «خۇدا بۇيرۇسا، ئۆلمىسەكلا، ئۇنى قىلىمىز، بۇنى قىلىمىز» دەڭلار. ¹⁶بىراق ھازىر سىلەر ئۆزۈڭلارنىڭ پىلانىڭلاردىن مەغرۇرلىنىپ ماختىنىسىلەر. بۇنداق قىلىش توغرا ئەمەس. ¹⁷ئېسىڭلاردا تۇتۇڭلاركى، قىلىشقا تېگىشلىك ياخشى ئىشنى بىلىپ تۇرۇپ قىلمىغانلار گۇناھ قىلغان بولىدۇ.

5

بايلارنى ئاگاھلاندۇرۇش

¹ئەي بايلار، قۇلاق سېلىڭلار! بېشىڭلارغا كېلىدىغان پالاكەتلەر ئۈچۈن ھۆڭرەپ يىغلاڭلار. ²بايلىقىڭلار چىرىپ كېتىدۇ، كىيىم-كېچىكىڭلارنى كۈيە يەيدۇ، ³ئالتۇن-كۈمۈشلىرىڭلارنى دات باسىدۇ. بۇ دات قىيامەت كۈنىدە شەخسىيەتچىلىكىڭلارغا گۇۋاھ بولۇپ، دوزاختا كۆيۈشۈڭلارغا سەۋەب بولىدۇ. چۈنكى سىلەر ئاخىر زامان كەلسىمۇ، يەنىلا بايلىق توپلاش بىلەنلا بولۇپ كېتىۋاتىسىلەر. ⁴سىلەر ئېتىزلىقىڭلاردا ئىشلەۋاتقانلارنىڭ ئىش-ھەقلىرىگە ھىيلە-مىكىر ئىشلىتىپ كەلدىڭلار. ئۇلار ئۈستۈڭلاردىن شىكايەت قىلىۋاتىدۇ. سىلەرگە ھوسۇل يىغىپ بېرىۋاتقان بۇ كىشىلەرنىڭ ئاھ-زارى قۇدرەتلىك سەردار پەرۋەردىگارنىڭ قۇلىقىغا يەتتى. ⁵سىلەر بۇ دۇنيادا باياشات ۋە ئەيش-ئىشرەت ئىچىدە ياشاۋاتىسىلەر. قويلار بوغۇزلىنىدىغان كۈنگە قەدەر بوردالغىنىغا ئوخشاش، سىلەرمۇ قىيامەت كۈنىگە قەدەر ئۆزۈڭلارنى بورداۋاتىسىلەر. ⁶سىلەرگە قارشى چىققۇدەك كۈچىمۇ بولمىغان گۇناھسىز كىشىلەرنى گۇناھقا مەھكۇم قىلىپ، ئۆلتۈرۈۋاتىسىلەر.

سەۋر-تاقەت ۋە دۇئا

^7‏-8شۇڭا قېرىنداشلار، رەببىمىز ئەيسا قايتىپ كېلىدىغان كۈنگىچە سەۋر-تاقەت قىلىپ تۇرۇڭلار. دېھقانلار مول ھوسۇل ئېلىش ئۈچۈن كۈز ۋە باھار يامغۇرلىرىنى سەۋر-تاقەت بىلەن كۈتكىنىگە ئوخشاش، سىلەرمۇ ئەيسا مەسىھنىڭ قايتىپ كېلىشىنى سەۋر-تاقەت بىلەن كۈتۈڭلار. ئىرادەڭلار مۇستەھكەم بولسۇن، چۈنكى رەببىمىز ئەيسانىڭ قايتىپ كېلىشىگە ئاز قالدى.

⁹قېرىنداشلار، خۇدانىڭ جازاسىدىن ساقلىنىش ئۈچۈن بىر-بىرىڭلاردىن ئاغرىنماڭلار، سوراق قىلغۇچى كېلىش ئالدىدا تۇرىدۇ. ¹⁰خۇدا ئەۋەتكەن پەيغەمبەرلەرنىڭ ئازاب-ئوقۇبەتلەرگە قانداق سەۋر-تاقەت قىلغانلىقىدىن ئۈلگە ئېلىڭلار. ¹¹بىز مانا مۇشۇنداق سەۋر-تاقەت بىلەن بەرداشلىق بەرگەنلەرنى بەختلىك ھېسابلايمىز. ئايۇپنىڭ ئۆز بېشىغا كەلگەن ھەر خىل ئېغىر ئازاب-ئوقۇبەتلەرگە قانداق سەۋر-تاقەت بىلەن بەرداشلىق بەرگەنلىكىنى، شۇنداقلا ئاخىردا خۇدانىڭ ئۇنىڭ ھاياتىنى قانداق ياخشى ئورۇنلاشتۇرغانلىقىنى بىلىسىلەر. خۇدا ھەقىقەتەنمۇ ناھايىتى شەپقەتلىك ۋە رەھىمدىلدۇر.

¹²قېرىنداشلىرىم، ئەڭ مۇھىمى، قەسەم قىلماڭلار! ئاسمان، زېمىن ۋە باشقا نەرسىلەرنىڭ نامى بىلەن قەسەم قىلغۇچى بولماڭلار. جاۋابىڭلار تۈزلا «ھەئە» ياكى «ياق» بولسۇن. شۇنداق قىلساڭلار، خۇدانىڭ جازاسىغا تارتىلمايسىلەر.

¹³ئاراڭلاردا جاپا تارتىۋاتقان كىشى بولسا، ئۇ خۇداغا دۇئا قىلسۇن، خۇشال ياشاۋاتقان كىشى بولسا، ئۇ خۇدانى مەدھىيەلەپ، ناخشا ئېيتسۇن. ¹⁴ئاراڭلاردا ئاغرىق-سىلاقلار بولسا، ئېتىقادچىلار جامائىتىنىڭ يېتەكچىلىرىنى چاقىرسۇن. ئۇلار كېلىپ، بۇ ئاغرىقلارغا رەببىمىزنىڭ نامى بىلەن ياغ سۈركەپ دۇئا قىلسۇن. ¹⁵تولۇق ئىشەنچ بىلەن قىلىنغان دۇئا ئاغرىقنى ساقايتىدۇ، رەببىمىز ئۇنىڭغا شىپالىق بېرىدۇ. ئەگەر بىمار گۇناھ قىلغان بولسا، كەچۈرۈم قىلىنىدۇ. ¹⁶شۇڭا شىپالىق تېپىشىڭلار ئۈچۈن قىلغان گۇناھلىرىڭلارنى ئۆزئارا ئىقرار قىلىڭلار ۋە بىر-بىرىڭلار ئۈچۈن دۇئا قىلىڭلار. ھەققانىي ئادەمنىڭ قىلغان دۇئاسى كۈچلۈك ئۈنۈمگە ئىگىدۇر. ¹⁷ئىلياس پەيغەمبەرمۇ بىزگە ئوخشاش ئادەم ئىدى. ئۇ ئىسرائىلىيەدە يامغۇر ياغمىسۇن دەپ، ئىخلاس بىلەن دۇئا قىلغانىدى. نەتىجىدە، ئۈچ يېرىم يىل يامغۇر ياغمىدى. ¹⁸كېيىن قايتا يامغۇر يېغىش ئۈچۈن دۇئا قىلغانىدى، يامغۇر يېغىپ، يەرمۇ ھوسۇل بەردى.

¹⁹قېرىنداشلىرىم، ئاراڭلاردا ھەقىقەتتىن چەتنىگەن كىشى بولسا، ئۇنى ھەقىقەتكە قايتۇرۇپ كېلىشكە تىرىشىڭلار. ²⁰شۇنى بىلىڭلاركى، گۇناھكار كىشىنى ھەقىقەتكە قايتۇرۇپ ئەكەلگەن ئادەم ئۇ كىشىنىڭ مەڭگۈلۈك ئۆلۈمدىن قۇتۇلۇشىغا ۋە نۇرغۇن گۇناھلىرىنىڭ كەچۈرۈم قىلىنىشىغا سەۋەبچى بولىدۇ.