ئۇيغۇرچە مۇقەددەس كىتاب جەمئىيىتى

Yuhanna yazghan ikkinchi xet

1

¹Xuda teripidin tallanghan xanimgha^* we uning perzentlirige menki ëtiqadchilar jama’etchilikining yëtekchisidin salam! Men chin könglümdin silerni söyimen. Silerni yalghuz menla emes, Xudaning heqiqitini tonup yetkenlerning hemmisi söyidu. ²Chünki, bu heqiqet qelbimizde yashimaqta we menggü bizge yar bolidu. ³Ershtiki atimiz we uning oghli Eysa Mesih heqiqet we mëhir-muhebbet ichide yashaydighan bizlerge mëhir-shepqet, rehimdillik we amanliq ata qilghay!

Heqiqet we mëhir-muhebbet

⁴Perzentliringizdin bezilirining ershtiki atimizdin alghan emr boyiche heqiqet yolida mangghanliqini körüp, intayin xursen boldum. ⁵Hörmetlik xanim, emdi men sizdin shuni ötünimenki, biz hemmimiz bir-birimizge mëhir-muhebbet körsitishimiz kërek. Men sizge yëziwatqanlirim yëngi bir emr emes, belki biz burundin tartip qobul qilip këliwatqan emrdur. ⁶Mëhir-muhebbet Xudaning emrlirige emel qilip yashash dëmektur. Xudaning emri bolsa siler burundin tartip anglap këliwatqandek, mëhir-muhebbet yolida mëngishtur.

⁷Nurghun saxta telim bergüchiler dunyaning hemme jaylirida peyda boldi. Ular Eysa Mesihning dunyagha insan tënide kelgenlikini ëtirap qilmaydu. Bundaqlar del aldamchi we Eysa Mesihning reqibidur. ⁸Xuda yolida singdürgen ejringlarni yoqitip qoymay, Xudaning toluq in’amigha ige bolushunglar üchün, özünglargha agah bolunglar. ⁹Eysa Mesihning telimliride ching turmay, uningdin chetnigenler Xuda’atigha baghlanmighan bolidu. Eysa Mesihning telimliride ching turghanlar bolsa ershtiki Atimiz we uning Oghligha baghlinip yashawatidu. ¹⁰Eger birer kishi silerning jama’etchilikinglargha Eysa Mesihning telimlirini emes, belki bashqiche telim ëlip kelgen bolsa, uni öyünglargha teklip qilmanglar hem uni qarshi almanglar. ¹¹Chünki, undaq ademni qarshi alghan kishi uning yaman ishlirigha shërik bolghuchidur.

Axirqi söz

¹²Silerge deydighan yene köp sözlirim bar idi. Lëkin, qeghez bilen siyahni ishletkendin köre, xushalliqimizning tolup tëshishi üchün, yëninglargha bërip didar körüshüp sözlishishni ewzel bildim. ¹³Xuda teripidin tallanghan hedingizning perzentliridin^* sizge salam!