ئۇيغۇرچە مۇقەددەس كىتاب جەمئىيىتى

Timotiygha yëzilghan ikkinchi xet

1

^1-2Eysa Mesih arqiliq yëngi hayatliqqa ërishish wedisini jakarlash üchün, Xudaning iradisi bilen Eysa Mesihning elchisi bolushqa tallanghan menki Pawlustin öz oghlumdek qedirlik Timotiygha salam. Xuda’atimiz we Rebbimiz Eysa Mesih sanga mëhir-shepqet, rehimdillik we amanliq ata qilghay!

Shükür we medet

³Men xuddi ejdadlirimgha oxshash, Xudagha pak wijdanim bilen xizmet qiliwatimen. Men sen üchün Xudagha shükür ëytimen. Meyli këche yaki kündüz bolsun, du’alirimda sëni da’im eslep turimen. ⁴Ayrilghan waqtimizda aqquzghan köz yashliringni esliginimde, sen bilen yene bir qëtim körüshüshni intayin arzu qilimen. Sen bilen körüshüsh mëni intayin xushal qilidu. ⁵Sëning semimiy ëtiqading ësimdin chiqmaydu. Eng awwal momang Lo’ide we anang Ewnikide bar bolghan ëtiqadning emdi sendimu bar ikenlikige chongqur ishinimen. ⁶Shuning üchün men shuni yadinggha salayki, qollirimni uchanggha qoyghan chaghda, Xuda sanga bergen qabiliyetni toluq ishletkeysen. ⁷Chünki, Xuda bizge ata qilghan Muqeddes Roh bizni qorqunchqa salmaydu, belki Xudagha xizmet qilishimiz üchün, bizni küch-qudret we mëhir-muhebbet bilen toldurup, özimizni tutuwëlishimizgha yardem bëridu.

⁸Shunga, Rebbimiz heqqide xush xewer yetküzüshtin we uning üchün xizmet qilish yolida mehbus bolghan mendin nomus qilma. Eksiche, Xuda sanga ata qilghan küch-qudretke tayinip, xush xewer yetküzüsh yolida men bilen bille azab-oqubet chëkishke teyyar tur. ⁹Xuda bizni qutquzup, pak yashashqa chaqirdi. Bu, bizning qilghan yaxshi emellirimiz bilen emes, belki Xudaning iradisi we mëhir-shepqiti bilen boldi. Xuda bizge Eysa Mesih arqiliq bu mëhir-shepqetni körsitidighanliqini dunya apiride bolushtin ilgirila pilanlighanidi. ¹⁰Hazir bu mëhir-shepqet qutquzghuchimiz Eysa Mesihning këlishi bilen ayan boldi. Eysa Mesih insanlarni iskenjige alghan ölümning küchini bikar qilip, xush xewer arqiliq insanlargha menggülük hayat yolini ëchip berdi.

¹¹Men bu xush xewerning jakarchisi we elchisi, shundaqla u toghrisida telim bergüchi bolup teyinlengen. ¹²Hazirqi bu azab-oqubetlerni tartishimning sewebimu shu. Lëkin, buningdin nomus qilmaymen. Chünki, men kimge ëtiqad qilghanliqimni bilimen hemde Xudaning manga amanet qilghan bu xush xewerni Rebbimiz qayta kelgen küngiche choqum qoghdaydighanliqigha ishinimen.^*

¹³Eysa Mesihke mensup bolup, uningdin kelgen ëtiqad we mëhir-muhebbet ichide yashap, mendin anglighan heqiqiy telimlerni nizam qilip, uningda ching tur. ¹⁴Sanga amanet qilinghan bu qimmetlik heqiqetni hemmimizning qelbide bar bolghan Muqeddes Rohning yardimi bilen saqla. ¹⁵Anglighiningdek, Asiya ölkisidiki^* ëtiqadchilarning hemmisi dëgüdek mëni tashliwetti. Ularning arisida Figël we Ërmogënmu bar. ¹⁶Rebbimiz Onësiforning a’ilisidikilirige rehim-shepqet qilghay. Chünki, u köp qëtim mëni yoqlap, könglümni kötürdi. U mëning mehbus bolghanliqimdin nomus qilmidi. ¹⁷Rim shehirige kelginide u mëni tapquche köp aware boluptu. ¹⁸Qiyamet küni, uning Rebbimizning rehim-shepqitige ërishishini tileymen. Efes shehiride uning manga qilghan nurghun xizmitidin sëningmu obdan xewiring bar.

2

Eysa Mesihning sadiq jengchisi

¹Ey oghlum, sen Eysa Mesihning mëhir-shepqitige tayinip küchlük bol. ²Sen mendin ögengen telimlerni köp ëtiqadchilar anglighan we bu telimlerning toghra ikenlikige guwahliq bërip kelgen. Emdi bu telimlerni ishenchlik hemde bashqilargha telim bëreleydighan kishilerge yetküzgin. ³Eysa Mesihning yaxshi jengchisi bolup, men bilen birge azab-oqubet tartishqa teyyar tur. ⁴Jengchi bolghan kishi öz qomandanini razi qilish üchün, turmushning ushshaq-chüshshek ishlirigha bashqa puqralardek arilashmasliqi kërek. ⁵Musabiqige qatnashqan tenheriketchimu musabiqe qa’idilirige ri’aye qilmisa, ghelibige ërishelmeydu. ⁶Ejir singdürgen dëhqan alghan hosulidin elwette birinchi bolup behrimen bolidu. ⁷Bu hëkmetlik sözlerni yaxshi oyla, chünki Rebbimiz sanga bu ishlarning hemmiside eqil bëridu. ⁸Sen Dawut padishahning ewladi bolghan we ölümdin tirilgen Eysa Mesihni ësingde tut. Mana bu, men yetküzüwatqan xush xewer. ⁹Bu xush xewerni yetküzgenlikimdin köp azab-oqubet chektim. Hetta jinayetchilerdek kishenlinip, zindangha tashlandim. Lëkin, hëchkim Xudaning sözini kishenliyelmeydu. ¹⁰Shuning üchün, Xuda tallighan bendilerning Eysa Mesih teripidin qutquzulushi we menggülük shan-sherepke ërishishi üchün, herqandaq azab-oqubetlerge berdashliq bëriwatimen. ¹¹Töwendiki bu sözler ishenchliktur: Eysa Mesih bilen bille ölgenikenmiz, uning bilen yëngi hayatta bille yashaymiz. ¹²Qiyinchiliqlargha berdashliq bersek, uning bilen bille höküm sürimiz. Biz uningdin tansaq, umu bizdin tanidu. ¹³Biz uninggha sadaqetsizlik qilsaqmu, u yenila sadaqetliktur. Chünki, u choqum özining sözide turmay qalmaydu.

Xudani xursen qilidighan xizmetchi

¹⁴Bu ishlarni dawamliq ëtiqadchilarning semige sal. Xuda aldida ularni bimene sözler toghrisida talash-tartish qilmasliqqa buyrughin. Bundaq talash-tartishlarning hëchqandaq paydisi bolmayla qalmay, belki anglighuchilarning ëtiqadini weyran qilidu. ¹⁵Xudaning heqiqitini toghra chüshendürüp, özüngni Xuda aldida yerge qarap qalmaydighan, belki Xudani xursen qilidighan xizmetchi qilip yëtishtürüshke tirish. ¹⁶Xudagha bolghan ixlasmenlikke munasip kelmigen quruq geplerdin saqlan. Chünki, bundaq geplerni qilghuchilar Xudadin tëximu yiraqlishidu. ¹⁷Ularning gepliri xuddi zeherlik ösmidek tëzla yamrap këtidu. Imënëy we Filëtlarmu mana shundaq gep-sözlerni qilghuchilardindur. ¹⁸Ular ölgenlerning tirilishidin ibaret bu ish alliqachan yüz bërip boldi dep,^* heq yoldin chetnep, bezilerning ëtiqadigha buzghunchiliq qilmaqta. ¹⁹Biraq, Xuda qurghan ul^* mezmut turmaqta. Uningda munu sözler möhürlinip yëzilghan: “Rebbimiz özige mensup kishilerni tonuydu”, “özlirini Rebbimizge mensup deydighan kishiler yamanliqlardin qol üzsun.” ²⁰Bay a’ililerde peqet altun-kümüsh qachilarla bolup qalmay, yaghach, sapal qachilarmu bolidu. Altun-kümüsh qachilar alahide sorunlarda, bashqiliri bolsa adettiki sorunlarda ishlitilidu. ²¹Eger bir kishi özini yuqiriqi yaman ishlardin pak tutsa, u xuddi alahide sorunlarda ishlitilidighan altun-kümüsh qachigha oxshaydu. Chünki, u pak bolidu hemde xojayinigha, yeni Xudagha yaramliq kishi bolup, herqandaq yaxshi ishlarni qilishqa teyyar turidu. ²²Shunga, yashliqning arzu-hewesliridin özüngni tart. Pak qelb bilen Rebbimizni chaqirghan bashqa kishiler bilen bille heqqaniyliq, ëtiqad, mëhir-muhebbet we inaqliqni izde. ²³Exmiqane we bihude talash-tartishlargha arilishishni ret qil. Chünki, bundaq ishlarning jëdel tëriydighanliqini bilisen. ²⁴Rebbimizning xizmetkari jëdelxor bolmasliqi, eksiche hemmige mëhriban we telim bërishke mahir, sewr-taqetlik bolushi kërek. ²⁵Rebbimizning telimige qarshi turghanlarghimu mulayimliq bilen nesihet qilish kërek. Belkim Xuda ulargha heqiqetni biliwëlish üchün towa qilish pursitini bëridu. ²⁶Buning bilen, ular uyqusini ëchip, özlirini tutqun qilip arzusigha yetmekchi bolghan Sheytanning toridin qutulalaydu.

3

Axir zaman

¹Shuni bilginki, axir zamanda ëghir künler bolidu. ²U chaghda, insanlar özinila oylaydighan, pulperes, maxtanchaq, tekebbur we kupurluq qilidighan, ata-anisining sözini anglimaydighan, wapagha japa qilidighan, Xudagha biperwaliq qilidighan, ³köyümsiz, bashqilarni kechürmeydighan, töhmetxor, özini tutalmaydighan, wehshiy, shundaqla xeyr-saxawetning düshmini bolidu. ⁴Ular satqun, telwe we hakawur bolup, keyp-sapani Xudadin yaxshi köridu. ⁵Sirtqi qiyapette ixlasmen boluwëlip, emeliyette könglide Xudaning qudritini inkar qilidu. Bundaqlardin yiraq tur. ⁶Ularning arisidiki bezi kishiler bashqilarning öylirige suqunup kiriwëlip, iradisi ajiz, gunahqa patqan we her xil arzu-heweslerning quli bolup qalghan ayallarni azduridu. ⁷Bundaq ayallar herqandaq ademning telimlirini anglaydu we heqiqetni tonup yëtelmeydu. ⁸Yanni bilen Yambiri^* Musa peyghemberge qandaq qarshi chiqqan bolsa, bu azdurghuchilarmu heqiqetke shundaq qarshi chiqidu. Bu azdurghuchilarning qelbi chirip ketken, ëtiqadi saxta bolup, ular Xuda teripidin ret qilinghan kishilerdur. ⁹Ularning qilmishliri uzungha dawamlishalmaydu. Chünki, Yanni bilen Yambirining eqilsizliqi pash bolghandek, bularning eqilsizliqimu xalayiq aldida choqum pash bolidu.

Pawlusning wesiyetliri

^10-11Lëkin, sen mëning telimim, yürüsh-turushum, hayatliq nishanim, ëtiqadim, sewr-taqitim, mëhir-muhebbitim, chidamliqim hemde uchrighan ziyankeshlikim we tartqan azab-oqubetlirimge diqqet-ëtibaringni qaritip kelding. Bolupmu Antakya, Konya we Listra sheherliride uchrighan ziyankeshliklerge qandaq berdashliq bergenlikimdin hemde Rebbimizning mëni bu ishlarning hemmisidin qutquzghanliqidin toluq xewiring bar. ¹²Eysa Mesihke mensup bolghan, Xudagha ixlasmenlik bilen hayat kechürüshke irade baghlighanlarning hemmisi ziyankeshlikke uchraydu. ¹³Rezil we saxtipez kishilerning ehwali burunqidinmu yamanliship, bashqilarni aldash bilen bille özlirimu aldinip këtidu. ¹⁴Lëkin, sen hazirghiche öginip kelgen we chongqur ishengen heqiqette dawamliq ching tur. Chünki, bu heqiqetni ishenchlik kishilerdin ögengenlikingni bilisen. ¹⁵Sen baliliq chaghliringdin tartipla muqeddes yazmilarni ögending. Bu yazmilar sanga Eysa Mesihke bolghan ëtiqad arqiliq qutquzulushqa ëlip baridighan eqil-parasetni teqdim qildi. ¹⁶Pütün muqeddes yazmilar Xudaning körsetmisi boyiche yëzilghan bolup, u, heqiqet toghrisida telim bërish, xataliqlarni körsitip bërish, sewenliklerni tüzitish we kishilerni heqqaniyliqqa yëtekleshke paydiliqtur. ¹⁷U, Xudagha mensup bolghan kishilerni toluq qorallandurup, ularni herqandaq yaxshi ishlarni qilishqa teyyar turghuzalaydu.

4

¹Men tirikler bilen ölgenlerni soraq qilidighan hemde öz padishahliqini qurush üchün qayta këlidighan Eysa Mesihning, shundaqla Xudaning aldida sanga shundaq buyruq qilimenki, ²Purset bolsun-bolmisun, her waqit Xudaning sözini yetküzgin. Sen zor sewr-taqet we yaxshi telim bërish bilen kishilerning xataliqlirini tüzetküz hemde ularni agahlandurghin we righbetlendürgin. ³Chünki, shundaq bir zaman këliduki, u chaghda insanlar Xuda toghrisidiki toghra telimlerni anglashni xalimaydu. Belki, ular qulaqlirigha xush yaqidighan sözlerni anglash üchün, öz heweslirige uyghun këlidighan telim bergüchilerni izdeydu. ⁴Heq sözlerni ret qilip, bimene epsanilerge qulaq salidu. ⁵Lëkin, sen herqandaq ehwalda özüngni segek tut. Azab-oqubet tartishqa teyyar tur. Her waqit xush xewer yetküzüsh xizmitide bolup, Xuda sanga tapshurghan wezipini ada qil. ⁶Emdi özümge kelsem, hayatim Xudagha qurbanliq ornida teqdim qilinish aldida turidu. Mëning bu dunyadin ayrilidighinimgha az qaldi. ⁷Men Xuda yolida axirghiche küresh qildim, yeni yügürüsh musabiqisining pütün menzilini bësip boldum, ëtiqadimda ching turup keldim. ⁸Hazir heqqaniyliq taji mëni kütüp turidu. Uni adil soraq qilidighan Rebbimiz qayta kelgende, manga kiydüridu. Shundaqla, uni yalghuz mangila emes, uning qayta këlishini intizarliq bilen kütüp turghanlarning hemmisige kiydüridu.

Axirqi sözler

⁹Yënimgha tëzdin yëtip këlishke tirish. ¹⁰Chünki, qërindishimiz Kiriski Galatiya ölkisige, Titus Dalmatiya ölkisige ketti. Dëmas bolsa bu dunyaning ishlirigha bërilip ketkenliki üchün, mëni tashlap, Salonika shehirige ketti. ¹¹Yënimda yalghuz Luqa qaldi. Markusni özüng bilen bille ëlip kel. U xizmetlirimde manga yardemchi bolidu. ¹²Tikikusni Efes shehirige ewetiwettim. ¹³Këlishingde Tro’as shehiride bolghan waqtimda Karpusning yënida qaldurup qoyghan tonum bilen kitablarni, bolupmu oram tëre yazmilarni bille alghach kelgin. ¹⁴Misker Iskender manga köp ziyankeshlik qildi. Rebbimiz choqum uninggha qilmishlirigha layiq jaza yanduridu. ¹⁵Senmu uningdin hoshyar bol. Chünki, u biz yetküzgen xush xewerge küchining bariche qarshi chiqti. ¹⁶Birinchi qëtim sotlanghinimda, manga yardem qilidighanlar chiqmidi, eksiche hemmisi mëni tashlap ketti. Xuda ularni kechürüm qilghay. ¹⁷Lëkin, Xuda men bilen bille bolup, manga xush xewerni toluq jakarlashqa medet berdi. Netijide, u yerdiki hemme Yehudiy emesler bu xush xewerni anglidi. Buning bilen, Xuda mëni bu qëtimqi sottin, yeni yolwasning aghzidin qutquzup chiqti. ¹⁸Rebbimiz mëni her xil yamanliqlardin qutquzup, ershtiki öz padishahliqigha bixeter yetküzgey. Barliq shan-sherep Xudagha ebedil’ebed mensup bolghay, amin!

Axirqi salam

¹⁹Mendin Priskila bilen ëri Akwilagha we Onësiforning a’ilisidikilerge salam ëyt. ²⁰Ërast Korint shehiride qaldi. Trofim kësel bolup qalghanliqtin, uni Milët shehiride qaldurup qoydum. ²¹Qish kirip kelgüche, bu yerge këlishke tirishqin. Ëwul, Pud, Lin, Klawdiya we barliq qërindashlardin sanga salam. ²²Rebbimiz siler bilen bille bolghay. Xudaning mëhir-shepqiti silerge yar bolsun!