ئۇيغۇرچە مۇقەددەس كىتاب جەمئىيىتى

Filimungha yëzilghan xet

1

¹Eysa Mesihke xizmet qilish yolida mehbus bolghan menki Pawlus we men arqiliq qërindishimiz Timotiydin qedirlik xizmetdishimiz bolghan sen Filimungha ²we singlimiz Afiyagha, biz bilen bille küresh qilghan Arkipusqa we öyüngde jem bolidighan ëtiqadchilar jama’etchilikige salam! ³Xuda’atimiz we Rebbimiz Eysa Mesih silerge mëhir-shepqet we amanliq ata qilghay!

Filimunning mëhir-muhebbiti we ëtiqadi

⁴Qedirlik Filimun, du’alirimda hemishe sëni yad ëtip, Xudagha shükür ëytimen. ⁵Chünki, men sëning Rebbimiz Eysagha bolghan ëtiqading we barliq ëtiqadchilargha bolghan mëhir-muhebbiting toghrisida her da’im anglap turuwatimen. ⁶Ëtiqading seweblik Xuda sanga teqdim qilghanlarni bashqilar bilen merdlerche ortaqlishishing üchün du’a qilimen. Shundaq qilsang, bizning Eysa Mesihke mensup bolghanliqimizdin bizge bërilgen bextlerning neqeder mol ikenlikini tëximu chongqur chüshineleysen. ⁷Qërindishim, sëning ëtiqadchilargha bolghan mëhir-muhebbiting manga zor xushalliq we righbet ëlip keldi. Chünki, sen ëtiqadchilarning rohini kötürdüng.

Filimunning quli Onësimus heqqide iltimas

⁸Shunga, men Eysa Mesihning elchisi bolushum bilen eslide sëning qilishqa tëgishlik ishni bëjirishingni yüreklik halda buyruyalisammu, ⁹lëkin, yenila sëning mëhir-muhebbitingge köre iltimas qilishni talliwaldim. Bu iltimasni mushu yashqa kirip qalghan hem Eysa Mesihke xizmet qilish yolida hazir mehbus boluwatqan menki Pawlustin dep bilgin. ¹⁰Sendin qulung Onësimus heqqide iltimas qilimen. U zindandiki waqtimda men arqiliq ëtiqadchi bolghanliqtin, öz oghlumdek bolup qalghan. ¹¹U burun sanga paydisiz bolsimu, emma hazir sangimu, mangimu paydiliqtur.^*12Men hazir uni, yeni janjigirimni sëning yëninggha qayturimen. ¹³Xush xewerni yetküzgenlikim üchün mehbus bolup zindanda yëtiwatqan mushu waqtimda, uni sëning ornungda xizmitimde bolush üchün yënimda ëlip qalghum bar idi. ¹⁴Biraq, sëning raziliqingni almighachqa, bundaq qilishni xalimidim. Sëning manga mejburiy emes, belki razimenlik bilen yaxshiliq qilishingni ümid qildim. ¹⁵Xudaning qulung Onësimusning waqtinche sëning yëningdin qëchishigha yol qoyghanliqi, belkim këyin sëning uni menggü ëlip qëlishing üchündur. ¹⁶Emdi sen uni qul qatarida emes, belki quldin köp üstün – söyümlük bir ëtiqadchi qërindishing qatarida körersen. U men üchün intayin qedirliktur. Sen üchün tëximu shundaq bolushi kërek. Chünki, sëning hazir uning bilen qul-xojayinliq munasiwiting bolupla qalmay, Rebbimizge ëtiqad qilish jehette qërindashliq munasiwitingmu bardur.

¹⁷Shuning üchün, eger sen mëni Rebbimizning xizmitide sepdash dep qarisang, uni mëni qobul qilghandek qobul qil. ¹⁸Eger burun u sanga birer yolsizliq qilghan bolsa yaki pulliringni oghrilighan bolsa, uni mëning hësabimgha yaz. ¹⁹Menki Pawlus bu sözlerni öz qolum bilen yëziwatimen: hësabatni özüm qayturimen. Lëkin, xush xewer arqiliq ërishken menggülük hayating üchün manga qerzdar ikenlikingni tilgha ëlishimning hajiti bolmisa kërek. ²⁰Shunga, ey qërindishim, Rebbimiz üchün iltimasimni qobul qilghin. Ikkilimiz Eysa Mesihke mensup bolghanliqimiz üchün, rohimni kötür. ²¹Sözümni anglaydighanliqinggha we sorighanlirimdin artuq orunlaydighanliqinggha chongqur ishinip, bu xetni yazdim. ²²Yene bir ish, manga turalghu jay teyyarlap qoyghin. Chünki, du’aliringlar arqiliq zindandin azad bolup, yëninglargha qaytip baridighanliqimgha ishinimen.

Axirqi salam

²³Eysa Mesihke xizmet qilghanliqi üchün, men bilen bille mehbus bolghan Ëpafira, ²⁴xizmetdashlirim Markus, Aristarxus, Dëmas we Luqalardin sanga salam.

²⁵Rebbimiz Eysa Mesihning mëhir-shepqiti silerge yar bolghay!