ئۇيغۇرچە مۇقەددەس كىتاب جەمئىيىتى

Ezra

1

Koresh padishahning Yehudiylarning öz yurtigha qaytishigha perman chüshürüshi

¹Përsiye padishahi Koresh textke olturghan 1-yili^* Perwerdigar Yeremiya peyghember arqiliq ëytqan sözlirini emelge ashurdi. Xuda Koresh padishahning diligha sëlip, bir perman chüshürgüzdi. Padishah uni qeghezge pütüp, padishahliqining hemme yërige tarqatti.

²“Bu Përsiye padishahining ëytqanliridur: ‘Perwerdigar, yeni ershi’eladiki Xuda pütün yer yüzidiki padishahliqlarni manga ata qildi. U mëni Yehudiyening Yërusalëm shehiride özige atap bir ibadetxana qurushqa teyinlidi. ³Perwerdigarning öz xelqi bolghan siler Isra’illar Yehudiyening Yërusalëm shehirige bërip, Perwerdigarning, yeni ejdadliringlar ëtiqad qilip kelgen Xudaning ibadetxanisini qayta bina qilinglar. Xuda Yërusalëmdidur, u silerge yar bolghay! ⁴Meyli qeyerde bolsun, sürgünler arisida Yërusalëmgha qaytmaqchi bolghanlar bolsa, ulargha qolum-qoshniliri yardem qilip, altun-kümüsh, mal-mülük we mal-waran bersun. Uningdin bashqa, Xudaning Yërusalëmdiki ibadetxanisigha xalis hediyelerni sunsun.’ ”

⁵Shuningdin këyin, Xuda dillirigha salghan ishni orundash üchün Yehuda we Binyamin qebililirining bashliqliri, rohaniylar we Lawiylar Yërusalëmgha bërip, Perwerdigarning ibadetxanisini qaytidin bina qilishqa teyyarlandi. ⁶Barliq qolum-qoshnilar ulargha yardem bërip, altun-kümüsh qachilar, mal-mülük, mal-waran we qimmetlik nersilerdin bashqa yene ibadetxana üchün xalis hediyilerni sundi. ⁷Koresh padishah ulargha sabiq padishah Nibukadnezer Yërusalëmdiki ibadetxanidin olja ëlip öz butxanisigha qoyghan qacha-quchilarni qayturup berdi. ⁸Përsiye padishahi Koresh xezine weziri Mitridatni bu qacha-quchilarni qayturup bërishke mes’ul qildi. Mitridat Yehudiyege qaytidighan sürgünlerning bashliqi Shëshbassargha ularni sanap ötküzüp berdi. ⁹Ularning tizimliki töwendikiche:

30 dane altun das

1000 dane kümüsh das

29 dane kümüsh eswablar

¹⁰30 dane altun qacha

410 dane kümüsh qacha

1000 dane bashqa xil qacha-qucha

¹¹Hemmisi bolup 5400 dane altun-kümüsh qacha-qucha boldi. Sürgünler Babildin Yërusalëmgha qaytip kelgende, Shëshbassar bu qacha-quchilarni birge ëlip keldi.

2

Qaytip kelgüchilerning tizimliki

¹Töwendikiler Babildiki esirdin qaytqan Yehudiy sürgünlirining tizimlikidur. Nibukadnezer padishah burun ularni esir qilip Babilgha palighanidi. Biraq hazir ular öz yurti Yehudiyening Yërusalëm we bashqa jaylirigha qaytip keldi. ²Zirubbabel, Yëshuwa, Nexemiya, Siraya, Ri’ëlaya, Mordikay, Bilshan, Mispar, Bigway, Rixum we Ba’analar ulargha yëtekchilik qilip qayturup keldi. Sürgündin qaytqan Isra’il erlirining sani töwendikiche:

³Par’osh jemetidin 2172 kishi

⁴Shifatya jemetidin 372 kishi

⁵Arax jemetidin 775 kishi

⁶Paxat-mo’ab jemetidin (Yëshuwa we Yo’abning ewladliri) 2812 kishi

⁷Ëlam jemetidin 1254 kishi

⁸Zattu jemetidin 945 kishi

⁹Zakkay jemetidin 760 kishi

¹⁰Bani jemetidin 642 kishi

¹¹Bëbay jemetidin 623 kishi

¹²Azgad jemetidin 1222 kishi

¹³Adoniqam jemetidin 666 kishi

¹⁴Bigway jemetidin 2056 kishi

¹⁵Adin jemetidin 454 kishi

¹⁶Atër jemetidin (Xizkiyaning ewladliri) 98 kishi

¹⁷Bëzay jemetidin 323 kishi

¹⁸Yora jemetidin 112 kishi

¹⁹Xashum jemetidin 223 kishi

²⁰Gibbar jemetidin 95 kish

²¹Beytlehemliklerdin 123 kishi

²²Nitofaliqlardin 56 kishi

²³Anatotluqlardin 128 kishi

²⁴Azmawetliklerdin 42 kishi

²⁵Qiryat-yi’arim, Kifira we Be’erotluqlardin 743 kishi

²⁶Ramah we Gebaliqlardin 621 kishi

²⁷Mikmasliqlardin 122 kishi

²⁸Beytel we Ayliqlardin 223 kishi

²⁹Niboluqlardin 52 kishi

³⁰Magbishliqlardin 156 kishi

³¹Ëlamliqlardin 1254 kishi

³²Xarimliqlardin 320 kishi

³³Lod, Xadid we Onoluqlardin 725 kishi

³⁴Ërixaliqlardin 345 kishi

³⁵Sina’aliqlardin 3630 kishi.

³⁶Rohaniylardin:

Yidaya jemetidin (Yëshuwaning ewladliri) 973 kishi

³⁷Immër jemetidin 1052 kishi

³⁸Pashxur jemetidin 1247 kishi

³⁹Xarim jemetidin 1017 kishi.

⁴⁰Lawiylardin:

Yëshuwa we Qadmi’ël jemetidin (Hodawya ewladliri) 74 kishi

⁴¹ibadetxana munajatchiliri: Asaf jemetige tewe 128 kishi

⁴²ibadetxana derwaziwenliri: Shallum, Atër, Talmon, Aqqub, Xatita we Shobay jemetlirige tewe 139 kishi.

⁴³Ibadetxana xizmetkarlirining jemetidin:

Zixa, Xasufa, Tabba’ot,

⁴⁴Qëros, Si’aha, Padon,

⁴⁵Libana, Xagaba, Aqqub,

⁴⁶Xagab, Shalmay, Xanan,

⁴⁷Giddël, Gaxar, Ri’aya,

⁴⁸Rizin, Niqoda, Gazzam,

⁴⁹Uzza, Pasëyax, Bësay,

⁵⁰Asnah, Mi’unim, Nifusim,

⁵¹Baqbuq, Xaqufa, Xarxur,

⁵²Bazlut, Mixida, Xarsha,

⁵³Barqos, Sisira, Temax,

⁵⁴Niziyax we Xatifalar.

⁵⁵Sulayman padishah xizmetkarlirining jemetidin:

Sotay, Hessoferet, Piruda,

⁵⁶Yalah, Darqon, Giddël,

⁵⁷Shifatya, Xattil, Pokeret-hazzibayim we amilar.

⁵⁸Ibadetxana xizmetkarliri we Sulayman padishah xizmetkarlirining ewladliridin qaytip kelgenlerning sani jem’iy 392 kishi.

⁵⁹Tëlmelax, Tëlxarsha, Kirub, Addan we Immër dëgen jaylardin kelgen bir top kishiler özlirining Isra’il ewladi ikenlikini ispatliyalmidi. ⁶⁰Bu kishiler Dilaya, Tobiya we Niqoda jemetliridin bolup, jem’iy 652 kishi idi.

⁶¹Xabayya, Haqqoz we Barzillay dëgen üch rohaniy jemetimu qaytip kelgen bolup, Barzillay Gil’adliq Barzillayning bir qizigha öylinip, uning familisini ishletkenidi. ⁶²Bu rohaniylar nesebnamiliridin jemet namlirini tapalmidi. Shunga ular napak hësablinip, rohaniylar qataridin orun alalmidi. ⁶³Yehudiylarning bashliqi ulargha “urim” we “tummim”ni^* ishlitip, Xudaning iradisini bileleydighan rohaniy kelgüche, Xudagha atalghan yëmekliklerning rohaniylargha tëgishlikini yëmeslikini buyrudi.

⁶⁴Yehudiyege qaytip kelgenlerning omumiy sani 42,360 kishi boldi. ⁶⁵Sanalmay qalghanlardin 7337 er-ayal xizmetkar, 200 er-ayal naxshichi we ⁶⁶ularning 736 at, 245 qëchir, ⁶⁷435 töge we 6720 ëshikimu bar idi.

⁶⁸Bu sürgünler Perwerdigarning Yërusalëmdiki ibadetxanisigha yëtip kelgende, bezi jemet bashliqliri ibadetxanini esli ornigha qaytidin bina qilishqa xalis hediyilerni teqdim qildi. ⁶⁹Ular imkaniyitining yëtishiche jem’iy 61,000 altun tengge, 3000 kilo kümüsh we 100 qur rohaniy tonini i’ane qildi.

⁷⁰Rohaniylar, Lawiylar, munajatchilar, ibadetxana derwaziwenliri, ibadetxana xizmetkarliri we bir qisim kishiler Yërusalëm etrapigha olturaqlashti. Qalghanlar bolsa öz yurtlirigha jaylashti.

3

Ibadetxana supisining qaytidin yasilishi

¹Küz peslining^* deslepki mezgilide Isra’illar öz yurtlirigha orunliship bolghandin këyin, ular bir niyet bir meqsette Yërusalëmgha jem boldi. ²Yozadaqning oghli Yëshuwa bilen uning xizmetdash rohaniyliri we Shi’altëlning oghli Zirubbabel bilen uning tughqanliri Isra’illar ëtiqad qilip kelgen Xudaning qurbanliq supisini yasashqa bashlidi. Ular uni Xudaning yëqin adimi Musa peyghemberge chüshürülgen Tewrat qanunidiki yolyuruqlargha bina’en köydürme qurbanliq qilish orni meqsitide saldi. ³Ular yerlik xelqtin qorqsimu, yenila qurbanliq supisini esli ornigha qaytidin qurup chiqti. Shuningdin këyin ular seherlik we kechlik köydürme qurbanliqlirini uningda qilishqa bashlidi.

⁴Ular Tewrat qanunigha bina’en kepe tikish hëyti qilip, her küni tëgishlik köydürme qurbanliqni qildi. ⁵Uningdin bashqa ular yene kündilik, yëngi ay we Perwerdigar bëkitken hëytlarda qilishqa tëgishlik köydürme qurbanliqlarni qilishqa bashlidi. Shuningdek ular Perwerdigargha xalis hediyilirini teqdim qildi. ⁶Rohaniylar kepe tikish hëytidin on besh kün burun Perwerdigargha atap köydürme qurbanliq qilishqa bashlidi. Bu ibadetxanining uli tëxi qoyulup bolmighan waqit idi.

Ibadetxanining qaytidin qurulushi

⁷Shuningdin këyin xelq tashchi we yaghachchilarni yallap, Tirliqlar we Sidonluqlarning këdir yaghachlirigha yëmek-ichmek we zeytun yëghini tëgishti. Bu yaghachlar dëngiz arqiliq Liwandin Jaffa shehirige ëlip këlindi. Bu ish përsiye padishahi Koreshning ruxsiti bilen boldi.

⁸Xelq sürgündin Yërusalëmgha qaytip kelgendin këyinki ikkinchi etiyazning otturilirida, Xudaning ibadetxanisining qurulushi bashlinip ketti. Bu xizmetke Shi’altëlning oghli Zirubbabel, Yozadaqning oghli Yëshuwa hem bashqa rohaniylar, Lawiylar we qaytip kelgenlerning hemmisi qatnashti. Lawiylarning yëgirme yashtin yuquriliri ibadetxanining qaytidin qurulush ishlirini nazaret qilishqa teyinlendi. ⁹Yëshuwa bilen uning oghulliri we er qërindashliri, Qadmi’ël we uning oghulliri (hemmisi Hodawyaning ewladliri) ibadetxanida ishlewatqan ishchilar üstidin nazaret qildi. Lawiylardin bolghan Xënadadning er jemetlirimu ulargha yardemleshti.

¹⁰Ular ibadetxanining ulini qoyup bolghanda, rohaniylar tonlirini kiyip, kanaylarni tutup, her qaysisi öz orunlirida turushti. Lawiylardin bolghan Asafning ewladliri janglarni tutup turushti. Ular Isra’iliyening sabiq padishahi Dawutning körsetkinidek Perwerdigarni medhiyelidi. ¹¹Ular medhiye we minnetdarliq bilen Perwerdigargha atap ëytishishlarni ötküzüp:

“Perwerdigar shapa’etliktur!

Isra’iliyege bolghan mëhir-muhebbiti menggülüktur!” dëyishti.

Andin barliq xelq ünlük warqirap Perwerdigargha medhiyiler oqushti. Chünki ibadetxanining uli qoyulup bolghanidi. ¹²Lëkin burunqi ibadetxanini öz közi bilen körgen nurghun yashanghan rohaniylar, Lawiylar we jemet bashliqliri hazirqi qoyulghan ulni körüp, azablinip ün sëlip yighliwetti. Bashqilar bolsa qiyqas chiqirip tentene qilishti. ¹³Bu sadalar pelekke yetkenliktin, hëchkim tentene sadasi bilen yigha-zar awazini perq ëtelmeytti. Awazlar yiraq jaylardin anglinip turatti.

4

Ibadetxanining qurulushigha tosqunluq qilinishi

¹Yehuda we Binyamin qebililirining reqibliri sürgündin qaytip kelgenlerning Perwerdigar, yeni Isra’illar ëtiqad qilip kelgen Xudagha atalghan ibadetxanini qaytidin bina qiliwatqanliqini anglidi. ²Shuning bilen ular Zirubbabel bilen jemet bashliqlirining aldigha bërip:

– Ibadetxanini qurush xizmitinglargha bizmu qatnishayli! Bizmu siler ëtiqad qilidighan Xudagha ibadet qilimiz. Assur padishahi Ësarxaddon bizni bu yerge ëlip kelgendin buyan, dawamliq Xudagha atap qurbanliq qilip këliwatimiz. – dëyishti.

³Zirubbabel, Yëshuwa we jemet bashliqliri ulargha:

– Siler Xudayimizgha atighan bu ibadetxanini bina qilishqa arilishalmaysiler! Përsiye padishahi Koreshning buyruqigha bina’en özimiz ejdadlirimiz ëtiqad qilip kelgen Xudagha, yeni Perwaerdigargha atap uni qurup chiqimiz! – dëdi.

⁴Shuning bilen yerlik xelq Yehudiylarni na’ümidte qoyushqa tiriship, ularni qorqutup qurulushqa dexli yetküzdi. ⁵Ular yene yerlik emeldarlargha para bërip, ulargha tosqunluq qildi. Bu ish Përsiye padishahliri Koreshtin taki Dari’osqiche dawamlashti.

Yehudiylargha bolghan këyinki tosqunluq

⁶Nurghun yillardin këyin^*, Axashwërosh padishah hakimiyet yürgüzüshke bashlighanda, Yehudiye we Yërusalëm xelqining reqibliri ular üstidin erz qilip mektup sundi.

⁷Yillar ötüp Artaxshasti padishah hakimiyet yürgüzüwatqanda, Bishlam, Mitridat, Tabi’al we bashqa emeldarlar Përsiye padishahigha mektup yazdi. Bu mektup Aramiy tilida yëzilghan bolup, padishahqa terjime qilip sunuldi.

⁸Rixum qomandan we Shimshay pütükchimu Yërusalëmning ehwali toghrisida Artaxshasti padishahqa mektup yazdi. ⁹Mektupni töwendiki ademler pütkenidi: Rixum qomandan, Shimshay pütükchi, ularning bashqa xizmetdash emeldarliri, sotchilar, yerlik emeldarlar, Parslar, Ereklikler, Babilliqlar we Ëlamdiki Suza shehiridin köchüp kelgenler, ¹⁰ulugh we shanliq Osnappar padishah teripidin yurtidin sürgün qilinip, Samariyening sheherliride we Firat deryasining gherbidiki bashqa jaylarda yashighan xelqler. ¹¹Mektupning mezmuni mundaq:

“Artaxshasti padishahqa, Firat deryasining gherbidiki xizmetkarliridin salam! ¹²Aliylirigha shuni melum qilimizki, aliyliri teripidin bu yaqqa këlip, Yërusalëmda turuwatqan Yehudiylar rezillikke we topilanggha tolghan u sheherni qaytidin qurmaqta. Ular sëpil ulini rëmont qilip, sëpillarni bina qilmaqta. ¹³I aliyliri! Bu sheher qurulup, sëpilliri yasilip bolsa, u kishiler her xil alwan-yasaqlarni tölimeydu-de, aliylirining xezinisige kiridighan kirim këmiyip këtidu. ¹⁴Biz silining tuzlirini yep kelgen puqralar, aliyliri namigha dagh keltürüshni hergiz xalimaymiz. Shu wejidin bu ishni özlirige melum qilduq. ¹⁵Aliylirining sabiq padishahlarning tezkirilirini izdinip bëqishini soraymiz. Shundaq bolghanda, bu sheherning topilanggha tolghanliqini, padishahlarni we ölkilerni parakende qilip kelgenlikini köreleydila. Bu sheherde qedimdin bëri qozghilang bolup kelgen, shunga sheher gumran qilinghan. ¹⁶Aliylirining semige shuni salimizki, eger bu sheher qaytidin bina qilinip sëpilliri pütse, aliyliri Firat deryasining gherbidiki ölkige igidarchiliq qilalmay qalidila.”

¹⁷Padishah jawaben mundaq dëdi:

“Rixum qomandan, Shimshay pütükchi we silerning Samariye hem Firat deryasining gherbidiki ölkide turghuchi bashqa xizmetdash emeldarliringlargha salam! ¹⁸Siler sunghan mektupni terjime qildurup oquttum. ¹⁹Tekshürüp körüshke emr qilghanidim. Derweqe, Yërusalëmning qedimdin buyan padishahlargha qarshiliqlarni qilip kelgenlikini bayqidim. U sheher topilang we qozghilanggha tolghaniken. ²⁰Qudretlik padishahlar u yerde yashighan we Firat deryasining gherbidiki pütün ölkini sorighan hem ulardin her xil alwan-yasaqlarni ëlip kelgeniken. ²¹Shunga siler buyruq chüshürüp taki men emr qilghuche, u sheherning qaytidin bina qilinishini tosunglar. ²²Ëghir ziyangha uchrimasliqim üchün, bu ishqa sel qarimanglar!”

²³Rixum, Shimshay pütükchi we ularning xizmetdashliri Artaxshasti padishahning jawab xëtini anglap, derhal Yërusalëmgha bërip qoral küchi bilen Yehudiylarni ish toxtitishqa mejbur qildi.

Ibadetxana qurulushining yene qaytidin bashlinishi

²⁴Xudaning Yërusalëmdiki ibadetxanisini qaytidin bina qilish qurulushi toxtap qalghanidi. Bu ehwal Përsiye padishahi Dari’os hakimiyitining 2-yilighiche dawamlashti.

5

¹U chaghda Hagay peyghember hem Iddoning oghli Zikiriya peyghember Isra’illar ëtiqad qilip kelgen hem ulargha yar bolghan Xudaning nami bilen Yehudiye we Yërusalëmda turidighan Yehudiylargha Xudaning wehiylirini yetküzüshke bashlighanidi. ²Shi’altëlning oghli Zirubbabel we Yozadaqning oghli Yëshuwa Yërusalëmdiki ibadetxanini bina qilishni yene qaytidin bashlidi. Ushbu ikki peyghember ular bilen bille bolup, yardemde boldi.

³Firat deryasining gherbidiki ölkining bashliqi Tattinay, Shitar-bozinay we bashqa xizmetdash emeldarlar shu waqitta Yërusalëmgha këlip ulardin:

– Silerge bu ibadetxanini bina qilishqa we tamlarni qopurushqa kim ruxset berdi? – dep soridi.

⁴Ular yene ibadetxana qurulushidikilerning isimlirini soridi. ⁵Lëkin Xudaning neziri Isra’illarning aqsaqallirida bolghanliqi üchün, pars emeldarliri Dari’os padishahqa mektup tutup jawab alghuche, ularning qurulush ishini tosmidi.

Tattinaylarning padishahqa tutqan mektupi

⁶Firat deryasining gherbidiki ölkining bashliqi Tattinay, Shitar-bozinay we xizmetdash emeldarlarning padishahqa tutqan mektupi mundaq idi:

⁷“dari’os padishah aliylirigha salam!

⁸Aliylirigha shuni melum qilimizki, biz Yehudiye rayonigha bërip, ulugh Xudaning ibadetxanisining qaytidin bina qiliniwatqanliqini körduq. Bu ibadetxana qoram tashlar bilen yasiliwëtiptu we tamlirining ichige chong limlar qoyuluptu. Bu qurulush nahayiti estayidilliq bilen ongushluq këtiwëtiptu. ⁹Biz aqsaqallardin ibadetxanini qaytidin bina qilish we tamlirini püttürüshke kim ruxset bergenlikini soriduq. ¹⁰Aliylirigha bu xizmetke yitekchilik qilghuchilarning kim ikenlikini melum qilish üchün ularning isimlirini soriduq. ¹¹Ular jawaben:

‘biz pütün alemning igisi bolghan Xudaning bendilirimiz. Biz hazir qaytidin bina qiliwatqan ibadetxanini nurghun yillar ilgiri Isra’iliyening bir küchlük padishahi qurup chiqqan. ¹²Ejdadlirimiz ershi’eladiki Xudaning ghezipini qozghap qoyghanliqtin, Xuda ularni Kaldanlarning padishahi, yeni Babilning sabiq padishahi Nibukadnezerning qoligha chüshürüp berdi. Padishah bu ibadetxanini weyran qilip, xelqni Babilgha sürgün qildi. ¹³Lëkin Babil padishahi Koreshning birinchi yili mezkur ibadetxanining qaytidin bina qilinish buyruqi chüshürüldi. ¹⁴Koresh padishah hetta Nibukadnezer padishah Yërusalëmdiki ibadetxanidin olja ëlip Babildiki butxanigha qoyghan altun-kümüshtin yasalghan qacha-quchilarni Shëshbassar isimlik bir kishige qayturup berdi. Koresh padishah uni Yehudiyege bashliq qilip teyinligenidi. ¹⁵Padishah uninggha bu qacha-quchilarni Yërusalëmdiki ibadetxanigha alghach këtishni hemde ibadetxanini esli ornigha qaytidin bina qilip chiqishni buyrudi. ¹⁶Shunga Shëshbassar qaytip këlip, Yërusalëmdiki ibadetxanining ulini ornatti. Qurulush shu chaghdin tartip hazirghiche dawamlashmaqta we tëxi pütmidi.’ dëdi.

¹⁷Shuning üchün aliyliri toghra körsile, Babilning orda tezkirisini izdinip baqqayla. Koresh padishahning Yërusalëmdiki mezkur ibadetxanini qaytidin bina qilish toghrisida buyruq chüshürgen-chüshürmigenlikini ëniqlap körgeyla. Andin bizge bu ishni qandaq bir terep qilish toghruluq yolyoruq bergeyla.”

6

Dari’os padishahning permani

¹Shuning bilen Dari’os padishah Babildiki arxipxanini tekshürüp chiqishni buyrudi. ²Midiya ölkisining Axmita shehiridiki ordidin bir qedimiy oralma qolyazma tëpildi. Uningda mundaq pütülgenidi:

“Yarliq:

³Koresh padishah textke olturghan birinchi yili Yërusalëmdiki ibadetxana toghruluq perman chüshürdi. Ibadetxana Yehudiylar qurbanliq sunidighan esli ornigha qaytidin qurup chiqilsun. Mezkur ibadetxanining ëgizliki yigirme yette mëtir, kengliki yigirme yette mëtir bolsun. ⁴Tamliri her üch qewet tashning üstige bir qewet yaghach qoyulup yasalsun. Pütün xirajiti orda xezinisidin ajritilsun. ⁵Nibukadnezer padishah Yërusalëmdiki ibadetxanidin Babilgha ëlip kelgen altun-kümüshtin yasalghan qacha-quchilar eslidiki ibadetxanigha qayturulup, ornigha qoyulsun.”

⁶Shunga, padishah Dari’os mundaq jawab qayturdi:

“Firat deryasining gherbidiki ölkining bashliqi Tattinay, Shitar-bozinay we bu ölkining xizmetdash emeldarlirigha: ‘siler ibadetxanigha yëqinlashmanglar. ⁷Ibadetxana qurulushigha arilashmanglar. Yehudiyening bashliqi bilen Yehudiylarning aqsaqalliri ibadetxanini esli ornigha qaytidin bina qilsun.

⁸Men silerning ulargha yardemde bolushunglarni buyruymen. Qurulush toxtap qalmasliqi üchün, ularning pütün xirajiti Firat deryasining gherbidiki ölkining orda xezinisige kiridighan alwan-yasaq kirimidin këchiktürmey ajritilsun. ⁹Siler Yërusalëmdiki rohaniylarning ershi’eladiki Xudagha köydürme qurbanliq sunushi üchün ulargha nëme kërek bolsa shuni, yeni torpaq, qochqar we paqlanlarni bëringlar hemde ular telep qilghan bughday, tuz, sharab we zeytun yaghliridin tartip hemmini her küni üzüldürmey teminlenglar. ¹⁰Shundaq bolghanda, ular ershi’eladiki Xudani xursen qilidighan qurbanliqlarni sunup, Xudaning manga we oghullirimgha bext ata qilishigha du’a qilalaydu.

¹¹Yene shundaq buyruymenki: kimki permanimgha özgertish kirgüzse, uning öyining bir limi sughurup ëlinip, u adem tiklengen limgha sanjip qoyulsun, öyi exlet döwisige aylansun. ¹²Eger birer padishah yaki puqra bu permangha özgertish kirgüzse, mezkur ibadetxanini weyran qiliwetmekchi bolsa, öz namini ulughlashqa Yërusalëmni tallighan Xuda uni ursun.

Mezkur permanni menki Dari’os jakarlidi, sözsiz ijra qilinsun!”

Ibadetxanining Xudagha bëghishlinishi

¹³Shuning bilen Firat deryasining gherbidiki ölkining bashliqi Tattinay, Shitar-bozinay we ularning xizmetdash emeldarliri, padishahning permanini sözsiz ijra qildi. ¹⁴Hagay peyghember we Iddoning oghli Zikiriya peyghemberning wehiy yetküzüshi bilen Yehudiylarning aqsaqalliri ibadetxana qurulushini ilgiri sürdi. Ular Isra’illar ëtiqad qilip kelgen Xudaning emrige bina’en Përsiye padishahliri Koresh, Dari’os we Artaxshastining permanliri boyiche ibadetxanini bina qilishni tamamlidi. ¹⁵Dari’os padishah hakimiyitining 6-yili adar ëyining 3-küni^* ibadetxanining qurulushi teltöküs tamam boldi.

¹⁶Isra’il xelqi, jümlidin rohaniylar, Lawiylar we qalghan sürgünler ibadetxanini Xudagha bëghishlash murasimini shad-xuramliq ichide ötküzdi. ¹⁷Ular bu murasimda 100 tuyaq torpaq, 200 tuyaq qochqar we 400 tuyaq paqlan qurbanliq qildi, yene 12 tëkini Isra’iliyening 12 qebilisi üchün gunah kechürülush qurbanliqi qildi. ¹⁸Musa peyghember arqiliq chüshürülgen Tewrattiki yazmilargha bina’en rohaniylar bilen Lawiylar öz jama’etchiliki boyiche Yërusalëmdiki ibadetxanida nöwetchilik bilen Xudaning xizmitini qilishqa teshkillendi.

Ötüp këtish hëytining ötküzülüshi

¹⁹1-ayning 14-küni^* sürgündin qaytip kelgenler ötüp këtish hëytini ötküzdi. ²⁰Pütün rohaniylar we Lawiylar özlirini paklidi. Ular paklinip, barliq sürgünler, xizmetdash rohaniylar we özliri üchün ötüp këtish hëytining mëlini boghuzlidi. ²¹Sürgündin qaytip kelgen Isra’illar we napak yolini tashlap Perwerdigar, yeni Isra’illar ëtiqad qilip kelgen Xudagha ibadet qilidighan shu yerdiki Yehudiy emeslermu bu qurbanliq bilen ghizalandi. ²²Andin ular pëtir nan hëytini shad-xuramliq ichide yette kün ötküzdi. Perwerdigar ularni shadliqqa chömdürgenidi, chünki u Assur padishahining dilini yumshitip, Isra’illar ëtiqad qilip kelgen Xudaning ibadetxanisini qaytidin bina qilishni qollatquzghanidi.

7

Ezraning Yërusalëmgha yëtip këlishi

¹Nurghun yillardin këyin Përsiye padishahi Artaxshasti mezgilide Ezra isimlik bir rohaniy ötken bolup, u Sirayaning oghli, Siraya Azaryaning oghli, Azarya Xilqiyaning oghli, ²Xilqiya Shallumning oghli, Shallum Zadoqning oghli, Zadoq Axitubning oghli, ³Axitub Amaryaning oghli, Amarya Azaryaning oghli, Azarya Mirayotning oghli, ⁴Mirayot Ziraxyaning oghli, Ziraxya Uzzining oghli, Uzzi Buqqining oghli, ⁵Buqqi Abishuwaning oghli, Abishuwa Pinixasning oghli, Pinixas El’azarning oghli, El’azar bolsa tunji bash rohaniy Harunning oghli idi. ⁶Babildin ayrilghan Tewrat ustazi Ezra, Perwerdigar, yeni Isra’illar ëtiqad qilip kelgen Xuda Musa peyghemberge chüshürgen Tewrat qanunida kamaletke yetkenidi. Ezra padishahtin nëmini telep qilsa, padishah shuni orundap bëretti, chünki Perwerdigar, yeni u ëtiqad qilip kelgen Xuda uninggha yar bolghanidi. ⁷Artaxshasti padishahning yettinchi yili Ezra bir top Isra’illarni Yërusalëmgha ëlip keldi. Bu kishiler arisida rohaniylar, Lawiylar, ibadetxana munajatchiliri, derwaziwenliri we xizmetkarliri bar idi.

^8-9Ular Artaxshasti padishahning 7-yili, 1-ayning 1-küni^* Babildin yolgha chiqti. Xuda Ezragha yar-yölek bolghanliqtin, ular 5-ayning 1-küni^* Yërusalëmgha yëtip keldi. ¹⁰Ezra Perwerdigarning Tewrat qanunini öginishke, ijra qilishqa we bu qanunning qa’ide-nizamlirini Isra’illargha ögitishke özini bëghishlighanidi.

Artaxshasti padishahning Ezragha yazghan mektupi

¹¹Artaxshasti padishah Isra’illargha chüshürgen Perwerdigarning emr-permanlirini pishshiq bilidighan Tewrat ustazi Ezra rohaniygha ushbu mektupni tutti.

¹²“Menki shahlarning shahi Artaxshastidin ershi’eladiki Xudaning qanunining ustazi Ezra rohaniygha salam!

¹³Padishahliqimda yashawatqan Isra’il xelqi jümlidin rohaniylar, Lawiylar we bashqilargha shuni buyruymenki, ular xalighanche özliri bilen bir qatarda Yërusalëmgha qaytip ketse bolidu. ¹⁴Men, jümlidin yette meslihetchim birlikte özlirini Yërusalëm we Yehudiyege qaytqan sürgünlerning silige hawale qilinghan Xudaning qanunigha emel qilish ehwalini igilep këlishke ewettim. ¹⁵Mëning we meslihetchilirimning öz raziliqimiz bilen teqdim qilghan altun-kümüshlirini Isra’illar ëtiqad qilip kelgen we Yërusalëmda bolghan Xudagha bëghishlighayla. ¹⁶Shuningdek, Babil ölkiside yighilghan altun-kümüshler we Isra’illar hem rohaniylar ëtiqad qilip kelgen Xudaning Yërusalëmdiki ibadetxanisigha sunulghan xalis hediyilerni alghach ketkeyla. ¹⁷Bulargha torpaq, qochqar, paqlanlarni, jümlidin ular bilen birge ashliq we sharablarni sëtiwëlip, siler ëtiqad qilip kelgen Xudaning Yërusalëmdiki ibadetxanisining qurbanliq supisida hediye qilghayla. ¹⁸Özliri we qërindashliri ëship qalghan altun-kümüshlerni siler ëtiqad qilip kelgen Xudaning iradisige asasen muwapiq jaygha ishletkeyla.

¹⁹Ibadetxanining xizmiti üchün özlirige bërilgen qacha-quchilarni Yërusalëm üstidin hökümranliq qilghan Xudagha bëghishlighayla. ²⁰Buningdin bashqa, ibadetxananglargha nëme lazim bolsa, orda xezinisidin ëlip ishletkeyla.

²¹Menki Artaxshasti padishah Firat deryasining gherbidiki ölkining barliq xezine emeldarlirigha buyruymenki, ershi’eladiki Xudaning qanunini pishshiq bilidighan Ezra rohaniyning barliq teleplirini tëzdin beja keltürünglar. ²²Siler 3400 kilo kümüsh, 300 taghar bughday, 2200 kilo sharab, 2200 kilo zeytun yëghighiche temin ëtinglar. Tuz cheksiz teminlensun. ²³Siler ershi’eladiki Xuda öz ibadetxanisi üchün chüshürgen emrlirining hemmisini toluq beja keltürünglar. Shundaq bolghanda, Xudaning ghezipi manga we oghullirimgha chüshmeydu. ²⁴Rohaniylar, Lawiylar, munajatchilar, derwaziwenler, xizmetkarlar we ibadetxanidiki herqandaq bashqa xizmetchilerdin alwan-yasaq ëlinmisun.

²⁵Ezra, Xuda örlirige ata qilghan eqil-paraset bilen Firat deryasining gherbidiki ölkide yashaydighan hem Xudaning qanunini bilidighan barliq ademlerni idare qilishqa emeldar we sotchilarni teyinligeyla. Qanundin sawati yoqlargha uningdin telim bergeyla. ²⁶Kimki Xudaning qanunigha yaki padishahliqning qanunigha boysunmisa, qattiq jazagha tartilsun, öltürülsun, sürgün qilinsun yaki mal-mülki Musadire qilinsun we yaki qamaqqa tashlansun.”

Ezraning Xudani medhiyelishi

²⁷Ezra mundaq dëdi:

“Perwerdigar, yeni ejdadlirimiz ëtiqad qilip kelgen Xuda medhiyilengey! U Yërusalëmdiki öz ibadetxanisini zinnetleshni padishahning diligha saldi. ²⁸Xuda manga menggülük mëhir-shepqet körsitip, mëni padishah, uning meslihetchiliri we barliq nopuzluq emeldarlirining qollishigha ige qildi. Perwerdigarim Xuda manga yar bolup, manga jasaret berdi. Shunga men Isra’illarning yurt bashlirini özüm bilen bille qaytishqa yighdim.”

8

Ezra bilen birge sürgündin qaytip kelgenler

¹Artaxshasti padishah hakimiyet tutqan mezgilde menki Ezra bilen bille Babildin Yërusalëmgha qaytip kelgen jemet bashliqlirining isimliki we ularning nesebnamisi töwendikiche:

^2-3Pinixas jemetidin Gërshom

Itamar jemetidin Daniyal

Dawut jemetidin Shëkanyaning ewladi Xattush

Par’osh jemetidin Zikiriya bilen Nesebnamisi ëniq bolghan 150 er

⁴Paxat-mo’ab jemetidin Ziraxyaning oghli Elyiho’ënay we 200 er

⁵Zattu jemetidin Yaxazi’ëlning oghli Shëkanya we 300 er

⁶Adin jemetidin Yonatanning oghli Ebid we 50 er

⁷Ëlam jemetidin Atalyaning oghli Yishaya we 70 er

⁸Shifatya jemetidin Mika’ilning oghli Zibadya we 80 er

⁹Yo’ab jemetidin Yixi’ëlning oghli Obadya we 218 er

¹⁰Bani jemetidin Yosifyaning oghli Shilomit we 160 er

¹¹Bëbay jemetidin Bëbayning oghli Zikiriya we 28 er

¹²Azgad jemetidin Haqqatan oghli Yoxanan we 110 er

¹³Waqchirek qaytip kelgen Adoniqam jemetidin Elifelet, Yi’u’ël, Shimaya we 60 er

¹⁴Bigway jemetidin Utay, Zakkur we 70 er.

Ezraning Yërusalëmgha bërishi

¹⁵Men barliq xelqni Ahawagha qarap aqidighan deryaning boyigha jem qildim we u yerde üch kün qarargah qurduq. Men rohaniylar we qalghan xelqni tekshürginimde, Lawiylarning yoqluqini bayqidim. ¹⁶Shunga yurt bashliridin Eli’ezer, Ari’ël, Shimaya, Elnatan, Yarib, Elnatan, Natan, Zikiriya we Mishullamlarni hem aqilane ustazlardin Yoyarib we Elnatanlarni chaqirip, ¹⁷ularni Kasifya dëgen jaydiki Lawiylarning bëshi Iddoning yënigha ewettim. Men ibadetxana xizmetkarliri Iddo we uning uruq-tughqanliridin, Yërusalëmdiki ibadetxanida Xudaning xizmitini qilishqa adem ewetip bërishni soridim. ¹⁸Xuda manga yar bolup, bizge Shërëbiya isimlik eqil-idrakliq bir kishini ewetti. U Maxli jemetidin bolghan Lawiylardin idi, uning ogholliri we er qërindashliridin bolup, jem’iy on sekkiz kishi keldi. ¹⁹Ular yene Mirari jemetidin Xashabya we Yishaya hem uning oghulliri we er qërindashliridin yigirme kishini ewetti. ²⁰Uningdin bashqa, yene 220 neper ibadetxana xizmetkari qëtilip keldi. Bu kishilerning ejdadlirini Dawut padishah we uning emeldarliri Lawiylargha yardem bërishke teyinligen bolup, ularning isimliri tizimlikte bir-birlep pütülgenidi.

²¹Ahawa deryasining boyida men jama’etke roza tutushni jakarlap, ularning Xudaning huzurida kemter bolup, Xudadin biz, balilirimiz we barliq mal-mülkimiz üchün bixeter seper tilidim. ²²Padishahtin seperde bizni düshmendin qoghdashqa piyade we atliq eskerlerni sorash men üchün bir nomus ish idi. Chünki men padishahqa: “Xudayimiz uninggha tayanghanlargha yar bolidu, lëkin uningdin yüz örügenlerge ghezeb yaghduridu” dëgenidim. ²³Shunga biz roza tutup, Xudaning bizni qoghdishigha du’a qilduq. Xuda du’ayimizni ijabet qildi.

²⁴Rohaniy bashliqlar arisidin Shërëbiya, Xashabya we ularning on tughqinini tallidim. ²⁵Andin padishah, uning meslihetchi hem emeldarliri we barliq Isra’illar ibadetxanigha teqdim qilghan altun-kümüsh we qacha-quchilarning ëghirliqini tartip ulargha tapshurdum. ²⁶Men tapshurghan nersiler töwendikiche:

22 tonna kümüsh

kümüsh qacha-quchilar (jemiy 3400 kilo)

3400 kilo altun

²⁷20 dane altun qacha (8 kilo 400 gram)

2 dane ësil, parqiraq tuch qacha (qimmiti altun bilen barawer)

²⁸Men ulargha:

– Siler we qacha-quchilar Perwerdigargha atalghan. Altun-kümüsh bolsa Perwerdigar, yeni ejdadliringlar ëtiqad qilip kelgen Xudagha bëghishlanghan xalis hediyidur. ²⁹Siler Yërusalëmdiki ibadetxanining ambarlirigha yëtip barghuche, ulargha yaxshi qaranglar. Siler rohaniy bashliqlar, Lawiylar we Isra’illarning jemet bashliqliri aldida ëghirliqini tartip ötküzüp bëringlar, – dëdim.

³⁰Shuning bilen rohaniylar hem Lawiylar bu altun-kümüsh we qacha-quchilarni Xudayimizning Yërusalëmdiki ibadetxanisigha ëlip bërish wezipisini tapshuruwaldi.

³¹Biz 1-ayning 12-küni^* Ahawa deryasidin Yërusalëmgha qarap yolgha chiqtuq. Sepirimizde Xudayimiz bizge yar bolup, bizni düshmen we qaraqchilarning hujumidin saqlidi. ³²Yërusalëmgha yëtip bërip, üch kün dem alduq. ³³Tötinchi küni ibadetxanigha bërip, altun-kümüsh we qacha-quchilarning ëghirliqini tartip, Uriyaning oghli Mirëmot rohaniygha tapshurup berduq. Mirëmot rohaniyning yënida Pinixasning oghli El’azar, Lawiylardin Yëshuwaning oghli Yozabad we Binnuyning oghli No’adyadinlar bar idi. ³⁴Hemme nersilerni sanap, tarazidin ötküzüp xatirige alduq.

³⁵Qaytip kelgen Isra’illarning hemmisi özliri ëtiqad qilip kelgen Xudagha atap köydürme qurbanliqlarni qildi. Ular barliq Isra’illar üchün 12 torpaq, toqsan 96 qochqar, 77 paqlan we gunah kechürülüsh qurbanliqi üchün 12 tëke qurbanliq qildi. Bu mallarning hemmisi qurbanliq üchün köydürülüp, Perwerdigargha sunuldi. ³⁶Ular yene padishah özlirige hawale qilghan mektupni Firat deryasining gherbidiki ölke bashliqliri bilen emeldarlargha yetküzüp berdi. Shuning bilen ular Isra’il xelqi we Xudagha bëghishlanghan ibadetxanigha yardemde boldi.

9

Isra’illarning yerlik xelqler bilen nikahlinish mesilisi

¹Bu ishlar ötüp, bezi Yehudiy emeldarlar manga këlip:

– Bezi Isra’illar, jümlidin ular arisdiki bezi rohaniylar we Lawiylarmu yerlik xelqlerdin, yeni Ken’anlar, Xitlar, Perizziler, Yibuslar, Ammonlar, Mo’ablar, Misirliqlar, Amorlardin we ularning yirginchlik ishliridin özlirini nëri tutmidi. ²Ular we ularning oghulliri yerlik xelqlerning qizliridin öylinip, Xudaning muqeddes irqini bulghidi. Bu sadaqetsiz ishta eng yamini emeldarlar bilen bashliqlar bashlamchi gunahkar! – dëdi.

³Men bu ishni anglighan haman, chapan-charamni yirtip, chach-saqallirimni yulup, chöchügen halda tang qëtip olturup qaldim. ⁴Tang qëtip olturup qëlishim taki kechlik qurbanliqni sunghuche boldi. Isra’illar ëtiqad qilip kelgen Xudaning sözide ching turidighan kishiler bashqa sürgünlerning sadaqetsizliklirini anglap, titrigen halda etrapimgha olishiwaldi.

⁵Kechlik qurbanliq sunidighan chaghda, men qayghu-hesret ichide chapan-charilirim yirtiq halda ornumdin turdum. Andin tizlinip turup qollirimni Perwerdigar Xudayimgha kötürüp ⁶du’a qildim:

“I Xuda, heqiqeten xijaletmen! Sëning aldingda uyalghinimdin yüzümni kötürelmeymen. Bizning gunahlirimiz asmangha taqashti, jinayetlirimiz chëkige yetti. ⁷Ejdadlirimiz zamanidin hazirghiche ëghir gunah ichide öttuq. Shu wejidin biz, padishahlirimiz we rohaniylirimiz yaqa-yurtluq padishahlarning qoligha chüshüp, qirghin, tutqun, talan-taraj qilinghan we xorlanghaniduq. Bügünki künde yenila shundaq bolmaqtimiz.

⁸Biraq hazir Perwerdigarimiz Xuda bizge qisqa waqit mëhir-shepqet qilip, az bir qismimizni sürgündin qutquzup, bu muqeddes makanda aman-ësen yashatti. U bizlerge ümid ata qilip, qulluqimizda bizge bir’az aramliq berdi. ⁹Biz qul iduq, biraq u bizni qulluqta tashlap qoymidi. U bizge Përsiye padishahlirining köz aldida menggülük mëhir-shepqet körsitip, yëngi hayatliq berdi, Xudayimizning ibadetxanisini qaytidin bina qildurdi hemde xarabiliklerni tüzetti. Bizlerni Yehudiye we Yërusalëmda qoghdap qaldi.

¹⁰I Xudayimiz! Biraq emdi biz buninggha nëme dëyeleymiz? Sëning emr-permanliringgha yene ita’et qilmiduq. ¹¹Xizmetkaring peyghemberler arqiliq qilghan emrliringge xilapliq qilduq. Ular bizge: “Siler bërip ige bolidighan yer, yerlik ahalining napak qilmishliri bilen bulghanghan. Ularning yirginchlik iplasliqliri u yerning hemme bulung-puchqaqlirigha tolghan. ¹²U kishiler bilen hergiz nikahlanmanglar we ularning amanliqi yaki ronaq tëpishini izdenmenglar. Shundaq qilsanglar, siler küchiyisiler, bu zëminning hosulliridin behrimen bolisiler hemde bu yerni ewladliringlargha menggü miras qaldurisiler.

¹³Bëshimizgha kelgen hemme ish bizning rezillik we sewenliklirimizdin boldi. Shundaqtimu, i Xudayimiz, bizge bergen jazaying yenila yenggil bolup, ayrimlirimizni yenila aman qaldurdung. ¹⁴Biz emdi qandaqmu sëning emrliringge xilapliq qilip, bu yirginchlik kishiler bilen nikahlinayli? Eger shundaq qilsaq, jezmen ghezipingni qozghap, birimiznimu qoymay halak qilmamsen? ¹⁵I Perwerdigar, Isra’illar ëtiqad qilip kelgen Xuda, sen heqqaniydursen! Ayrimlirimiz qutulghan bolsaqmu, emma bügünki künde az qalduq. Lëkin bizge baqsang, biz hemmimiz aldingda gunahkarmiz. Shu wejidin hëchkim sëning huzurungda bolalmaydu.”

10

Towa qilish

¹Ezra ibadetxana aldida yüzini yerge yëqip, yigha-zar bilen du’a qilip, gunahlar üchün towa qiliwatqinida, zor bir top Isra’illar, jümlidin er-ayal we balilar uning etrapigha oliship, hesretlik yighlashti. ²Ëlam jemetidin Yixi’ëlning oghli Shëkanya Ezragha:

– Biz yerliklerdin bolghan yat xelqlerdin xotun ëlip, Xudayimizgha sadaqetsizlik qilduq. Gerche shundaq bolsimu, Isra’iliyede yene ümid bar. ³Shunga biz bu xotunlar we ulardin bolghan balilardin waz këchimiz dep, Xudayimizgha qesem bërishimiz kërek. Biz sëning we Xudayimizning emrige boysunidighan kishilerning nesihetliri boyiche mëngip, buni Xudaning qanunigha bina’en orundaymiz. ⁴Ornungdin tur! Sen bu ishni bir terep qilishta hoquqluq, biz sëni qollaymiz. Sen jur’etchan bolup, bu ishni ishqa ashur! – dëdi.

⁵Shuning bilen Ezra ornidin turup, rohaniy bashliqlar, Lawiylar we qalghan barliq Isra’il xelqini bu teklip boyiche ish körüshke qesem qildurdi. Ular shu boyiche ish kördi. ⁶Andin Ezra ibadetxana aldidin ayrilip, Elyashibning oghli Yihoxananning hujrisigha kirdi. U u yerde qaytip kelgen sürgünlerning sadaqetsizliki üchün bir këche yëmey-ichmey hesret chekti.

⁷Këyin Yërusalëm we Yehudiyening bashqa jaylirigha sürgündin qaytip kelgen ademlerning hemmisining Yërusalëmgha jem bolushi toghrisida mundaq emr chüshürüldi: ⁸“Kimki üch kün ichide Yërusalëmgha yëtip kelmise, emeldar we aqsaqallarning buyruqi boyiche mal-mülki musadire qilinip, jama’etning ezasi bolalmaydu.”

⁹Üch kün ichide barliq Yehuda we Binyamin qebilisidikiler Yërusalëmgha jem boldi. 9-ayning 20-küni^*, barliq xelq ibadetxana aldidiki meydandin orun aldi. Qattiq yamghur we bu ishning jiddiyliki sewebidin hemme ademni titrek basti. ¹⁰Andin Ezra rohaniy ornidin turup, ulargha:

– Siler sadaqetsizlik qilip, yat xelqlerdin xotun ëlip, Isra’illarni tëximu ëghir gunahqa patquzdunglar. ¹¹Emdi siler Perwerdigar, yeni ejdadliringlar ëtiqad qilip kelgen Xudagha gunahinglar üchün towa qilip, uning iradisi boyiche ish körünglar. Zëminimizda turidighan yerlik xelqler we yattin alghan xotunliringlardin munasiwetni üzünglar! – dëdi.

¹²Jama’et yuqiri awazda jawaben mundaq dëdi:

– Toghra ëyttingiz, dëginingizni beja keltürimiz! ¹³Lëkin adem köp hem yamghur pesli, biz sirtta uzun turalmaymiz. Bu bir-ikki künde pütidighan ish emes. Chünki bu gunahqa patqan ademler nahayiti köp. ¹⁴Emeldarlirimiz bizge wekil bolsun. Yat xelqlerdin xotun alghan kishiler belgilengen waqitta öz shehirining aqsaqal we soraqchiliri bilen bille bu yerge kelsun. Shundaq qilghanda Xudayimizning bu ishqa bolghan ghezipi pesiyip qalar.

¹⁵Peqet Asa’ëlning oghli Yonatan bilen Tiqwahning oghli Yaxziya buninggha qarshi chiqti. Ularni Mishullam bilen Lawiylardin Shabbitay qollidi. ¹⁶Qalghanlar bu meslihetni qobul qildi. Shunga Ezra rohaniy her jemet bashliqliri arisidin kishilerni tallap, ularning isimlirini xatiriliwaldi. 10-ayning 1-küni^* bu kishiler jem bolup tekshürüshni bashlidi. ¹⁷Ular 1-ayning 1-küni^* yat xelqlerdin xotun alghanlarning hemmisini ëniqlap boldi.

Yat xelqlerdin xotun alghan kishiler

¹⁸Yat xelqlerdin xotun alghan rohaniylar jemetining isimliki töwendikiche:

Yozadaqning oghli Yëshuwa we uning qërindashlirining jemetidin: Ma’asëya, Eli’ezer, Yarib we Gidalya. ¹⁹Ular xotunlirini qoyup bërishke qesem qilip, gunahi üchün eyib qurbanliqi süpitide bir qochqarni hediye qildi.

²⁰Immër jemetidin Xanani we Zibadya

²¹Xarim jemetidin Ma’asëya, Ilyas, Shimaya, Yixi’ël we Uzziya

²²Pashxur jemetidin Elyo’ënay, Ma’asëya, Isma’il, Nitan’ël, Yozabad we El’asa

²³Lawiylardin Yozabad, Shim’i, Qëlaya (Qilita depmu atilidu), Pitaxya, Yehuda we Eli’ezer

²⁴ibadetxana munajatchiliridin Elyashib

ibadetxana derwaziwenliridin Shallum, Telem we Uri

²⁵Bashqa Isra’illardin:

Par’osh jemetidin Ramiya, Yiziya, Malkiya, Miyamin, El’azar, Malkiya we Binaya

²⁶Ëlam jemetidin Mattanya, Zikiriya, Yixi’ël, Abdi, Yirëmot we Ilyas

²⁷Zattu jemetidin Elyo’ënay, Elyashib, Mattanya, Yirëmot, Zabad we Aziza

²⁸Bëbay jemetidin Yihoxanan, Xananya, Zabbay, Atlay

²⁹Bani jemetidin Mishullam, Malluk, Adaya, Yashub, Shi’al, Yiramot

³⁰Paxat-mo’ab jemetidin Adna, Kilal, Binaya, Ma’asëya, Mattanya, Bizal’ël, Binnuy we Manasse

³¹Xarim jemetidin Eli’ezer, Yishshiya, Malkiya, Shimaya, Shimon, ³²Binyamin, Malluk we Shimarya

³³Xashum jemetidin Mattinay, Mattatta, Zabad, Elifelet, Yirëmay, Manasse we Shim’i

³⁴Bani jemetidin Ma’aday, Amram we U’ël, ³⁵Binaya, Bëdyah, Kiluhi, ³⁶Wanyah, Mirëmot, Elyashib, ³⁷Mattanya, Mattinay we Ya’asay

³⁸Binnuy jemetidin Shim’i, ³⁹Shelemya, Natan, Adaya, ⁴⁰Maknadba, Shashay, Sharay, ⁴¹Azarël, Shelemya, Shimarya, ⁴²Shallum, Amarya we Yüsüp

⁴³Nibo jemetidin Yi’i’ël, Mattitya, Zabad, Zibina, Yadday, Yo’ël we Binaya.

⁴⁴Mana bu kishilerning hemmisi yat xelqlerdin xotun alghan, beziliri bu xotunlardin balimu tapqan.