ئۇيغۇرچە مۇقەددەس كىتاب جەمئىيىتى

ۋەھىيلەر

1

¹بۇ يازمىدا ئەيسا مەسىھنىڭ ۋەھىيسى بايان قىلىنغاندۇر. خۇدا يېقىن كەلگۈسىدە يۈز بېرىشى مۇقەررەر بولغان ۋەقەلەرنى ئۆز خىزمەتكارلىرىغا بىلدۈرۈش ئۈچۈن ئەيسا مەسىھكە بۇ ۋەھىينى چۈشۈردى. مەسىھ بۇنى ئۆز پەرىشتىسى ئارقىلىق خىزمەتكارى يۇھانناغا ئايان قىلدى. ²يۇھاننا خۇدانىڭ سۆزى ۋە ئەيسا مەسىھنىڭ بەرگەن گۇۋاھلىقى ھەققىدە نېمىلەرنى كۆرگەن بولسا، شۇلارنىڭ ھەممىسىگە گۇۋاھلىق بەردى. ³بۇ ۋەھىيلەرنى باشقىلارغا ئوقۇپ بەرگەنلەر ۋە ئۇنى ئاڭلاپ ئەمەل قىلغانلار نەقەدەر بەختلىك-ھە! چۈنكى بۇ ئىشلارنىڭ ئەمەلگە ئاشىدىغان ۋاقتى يېقىندۇر.

يۇھاننانىڭ يەتتە ئېتىقادچىلار جامائىتىگە سالام يوللىشى

^4‏-5مەنكى يۇھاننادىن ئاسىيا ئۆلكىسىدىكى يەتتە ئېتىقادچىلار جامائىتىگە سالام! ئەزەلدىمۇ، ھازىرمۇ بار بولغان ۋە كەلگۈسىدىمۇ بار بولىدىغان خۇدا ھەم ئۇنىڭ تەختىنىڭ ئالدىدىكى يەتتە روھ،^* شۇنداقلا ئىشەنچلىك گۇۋاھچى بولغان، ئۆلۈمدىن تۇنجى تىرىلگەن، دۇنيا پادىشاھلىرىنىڭ ھۆكۈمرانى بولغان ئەيسا مەسىھ سىلەرگە مېھىر-شەپقەت ۋە ئامانلىق ئاتا قىلغاي.

ئەيسا مەسىھ بىزنى سۆيدى، ئۆزىنىڭ قېنى بىلەن بىزنى گۇناھلىرىمىزدىن ئازاد قىلدى. ⁶ئۇ بىزنى بىر پادىشاھلىققا ئۇيۇشتۇردى ۋە بىزنى ئۆزىنىڭ ئاتىسى بولغان خۇدانىڭ خىزمىتىنى قىلىدىغان روھانىي قىلدى. بارلىق شان-شەرەپ ۋە كۈچ-قۇدرەت ئۇنىڭغا ئەبەدىلئەبەد مەنسۇپ بولغاي، ئامىن!

⁷مانا، ئۇ بۇلۇتلار ئىچىدە كەلمەكتە. ھەممە كۆزلەر، ھەتتا ئۇنىڭغا نەيزە تىققۇچىلارنىڭ كۆزلىرىمۇ ئۇنى كۆرىدۇ. يەر يۈزىدىكى پۈتكۈل خەلقلەر ئۇنىڭ ئۈچۈن ھازا تۇتىدۇ. بۇ ئىش جەزمەن بولىدۇ، ئامىن!

⁸پەرۋەردىگار خۇدا مۇنداق دەيدۇ: «باشلىنىش ۋە ئاخىرلىشىش ئۆزۈمدۇرمەن. ئەزەلدىمۇ، ھازىرمۇ بار بولغان ۋە كەلگۈسىدىمۇ بار بولىدىغان خۇدادۇرمەن، شۇنداقلا ھەممىگە قادىردۇرمەن.»

تىرىلگەن مەسىھنىڭ يۇھانناغا كۆرۈنۈشى

⁹مەن قېرىندىشىڭلار يۇھاننامەن. بىز ئەيسا مەسىھكە مەنسۇپ بولغانلىقىمىز ئۈچۈن، ئۇنىڭ ئازاب-ئوقۇبەتلىرىگە، خۇدانىڭ پادىشاھلىقىغا ۋە ئەيسا مەسىھنىڭ چىداملىقىغا ئورتاقمىز. خۇدانىڭ سۆزىنى ۋە ئەيسا مەسىھنىڭ قىلغان گۇۋاھلىقىنى تارقاتقانلىقىم ئۈچۈن، پاتموس ئارىلىدا مەھبۇس بولۇپ تۇردۇم. ¹⁰رەبنىڭ كۈنىدە^* مۇقەددەس روھ مېنى ئۆز ئىلكىگە ئالدى. مەن كەينىمدىن كاناي ئاۋازىغا ئوخشاپ كېتىدىغان ئۈنلۈك بىر ئاۋازنى ئاڭلىدىم. ¹¹بۇ ئاۋاز: «كۆرگەنلىرىڭنى ئورام يازمىسىغا پۈتۈپ، ئۇنى يەتتە ئېتىقادچىلار جامائىتىگە، يەنى ئەفەس، ئىزمىر، پەرگاما، تىياتىرا، ساردىس، فىلادېلفىيە ۋە لائودىكىيا شەھەرلىرىگە ئەۋەت» دېدى.

¹²ماڭا سۆزلىگۈچىنى كۆرۈش ئۈچۈن كەينىمگە قارىدىم. كۆزۈمگە يەتتە ئالتۇن چىراغدان كۆرۈندى. ¹³چىراغدانلارنىڭ ئوتتۇرىسىدا ئۇچىسىدىكى تونى ئوشۇقىغىچە چۈشۈپ تۇرغان، كۆكسىگە ئالتۇن كەمەر تاقالغان ئىنسانئوغلىغا ئوخشايدىغان بىرى تۇراتتى. ¹⁴ئۇنىڭ چېچى ئاق يۇڭ ۋە قاردەك ئاپئاق ئىدى. كۆزلىرى گويا يالقۇنلاپ تۇرغان ئوتتەك ئىدى. ¹⁵پۇتلىرى ئوچاقتا تاۋلانغان پارقىراق تۇچقا ئوخشايتتى، ئاۋازى شارقىراپ ئېقىۋاتقان سۇنىڭ شاۋقۇنىدەك ئىدى. ¹⁶ئۇ ئوڭ قولىدا يەتتە دانە يۇلتۇز تۇتقان بولۇپ، ئاغزىدىن ئىككى بىسلىق ئۆتكۈر بىر قىلىچ چىقىپ تۇراتتى. چىرايى خۇددى چىڭقى چۈش ۋاقتىدىكى قۇياشتەك پارلاق ئىدى.

¹⁷ئۇنى كۆرگىنىمدە، ئايىغىغا ئۆلۈكتەك يىقىلدىم. ئۇ ئوڭ قولىنى ماڭا قويۇپ مۇنداق دېدى:

_ قورقما، تۇنجىسى ۋە ئاخىرقىسىمۇ مەن بولىمەن. ¹⁸مەن ھاياتتۇرمەن. مەن ئۆلگەنىدىم، لېكىن ئەمدى مەڭگۈ ياشايمەن. ئۆلۈم ۋە ئۆلۈكلەر ماكانىنىڭ ئاچقۇچى مېنىڭ قولۇمدا. ¹⁹شۇنىڭ ئۈچۈن كۆرگەنلىرىڭنى، يەنى ھازىر بولۇۋاتقان ۋە كەلگۈسىدە بولىدىغان ئىشلارنى يېزىپ قالدۇر. ²⁰يەتتە ئالتۇن چىراغدان ۋە سەن ئوڭ قولۇمدا كۆرگەن يەتتە يۇلتۇزنىڭ سىرىغا كەلسەك، يەتتە يۇلتۇز يەتتە ئېتىقادچىلار جامائىتىنىڭ پەرىشتىلىرى. يەتتە چىراغدان بولسا يەتتە جامائەتتۇر.

2

ئەفەستىكى ئېتىقادچىلار جامائىتىگە يېزىلغان خەت

¹_ ئەفەستىكى ئېتىقادچىلار جامائىتىنىڭ پەرىشتىسىگە^* خەت يېزىپ، مۇنداق دېگىن:

«ئوڭ قولىدا يەتتە يۇلتۇزنى تۇتۇپ، يەتتە ئالتۇن چىراغداننىڭ ئوتتۇرىسىدا ماڭغۇچى مۇنداق دەيدۇ: ²‹سېنىڭ قىلغان ئىشلىرىڭنى، تىرىشچانلىقىڭنى، چىداملىقىڭنى بىلىمەن. رەزىل ئادەملەرنىڭ قىلمىشلىرىغا چىداپ تۇرالمايدىغانلىقىڭنى، ئەلچى بولمىسىمۇ ئۆزلىرىنى ئەلچى، دەپ ئاتىۋالغانلارنى سىناپ، ساختىلىقىنى بىلىۋالغانلىقىڭنىمۇ بىلىمەن. ³شۇنداق، سەن سەۋر قىلدىڭ، ماڭا ئېتىقاد قىلغانلىقىڭ سەۋەبلىك دۇچار بولغان جاپا-مۇشەققەتكە بەرداشلىق بەردىڭ ۋە ھارمىدىڭ. ⁴لېكىن ساڭا بىر ئېتىرازىم بار، ئۇ بولسىمۇ سېنىڭ مېھىر-مۇھەببىتىڭ بۇرۇنقىدىن سۇسلاشتى. ⁵شۇنىڭ ئۈچۈن قانداق ھالغا چۈشۈپ قالغانلىقىڭغا نەزەر سال! توۋا قىل ۋە بۇرۇن قىلغان ئىشلىرىڭنى ئەسلىگە كەلتۈر. ئەگەر توۋا قىلمىساڭ، مەن كېلىپ چىراغدىنىڭنى ئورنىدىن ئېلىپ كېتىمەن. ⁶بىراق سېنىڭ بىر ئارتۇقچىلىقىڭ باركى، سەنمۇ ماڭا ئوخشاش نىكولاس^* تەرەپدارلىرىنىڭ قىلمىشلىرىدىن نەپرەتلىنىسەن.

⁷كىمنىڭ ئاڭلايدىغان قۇلىقى بولسا، مۇقەددەس روھنىڭ جامائەتلەرگە دېگەنلىرىنى ئاڭلىسۇن. غەلىبە قىلغۇچىلارغا خۇدانىڭ جەننىتىدىكى ھاياتلىق دەرىخىنىڭ مېۋىلىرىنى يېيىش ھوقۇقىنى بېرىمەن.›»

ئىزمىردىكى ئېتىقادچىلار جامائىتىگە يېزىلغان خەت

⁸_ ئىزمىردىكى ئېتىقادچىلار جامائىتىنىڭ پەرىشتىسىگە خەت يېزىپ، مۇنداق دېگىن:

«تۇنجىسى ۋە ئاخىرقىسى، ئۆلگەن ۋە قايتا تىرىلگەن زات مۇنداق دەيدۇ: ⁹‹سېنىڭ ئازاب-ئوقۇبەتلىرىڭنى ۋە نامراتلىقىڭنى بىلىمەن، لېكىن ئەمەلىيەتتە سەن باي. ئۆزلىرىنى يەھۇدىي دەۋالغانلارنىڭ تۆھمەتلىرىنى بىلىمەن. ئەمەلىيەتتە، ئۇلار يەھۇدىي ئەمەس، بەلكى شەيتاننىڭ گۇرۇھىدىكىلەردۇر. ¹⁰كەلگۈسىدە چېكىدىغان ئازاب-ئوقۇبەتلەردىن قورقما. بىلىپ قويغىنكى، شەيتان ئاراڭلاردىن بەزىلەرنى يېقىندا زىندانغا تاشلايدۇ. سىلەر سىنىلىسىلەر ۋە ئون كۈنگىچە قىينىلىسىلەر. سەن تاكى ئۆلگۈچە ماڭا سادىق بول. شۇ چاغدا مەن ساڭا ھاياتلىق تاجىنى كىيدۈرىمەن.

¹¹كىمنىڭ ئاڭلايدىغان قۇلىقى بولسا، مۇقەددەس روھنىڭ جامائەتلەرگە دېگەنلىرىنى ئاڭلىسۇن. غەلىبە قىلغۇچىلار ئىككىنچى ئۆلۈمنىڭ زىيىنىغا ھەرگىز ئۇچرىمايدۇ.›»

پەرگامادىكى ئېتىقادچىلار جامائىتىگە يېزىلغان خەت

¹²_ پەرگامادىكى ئېتىقادچىلار جامائىتىنىڭ پەرىشتىسىگە خەت يېزىپ، مۇنداق دېگىن:

«ئىككى بىسلىق ئۆتكۈر قىلىچى بار بولغۇچى مۇنداق دەيدۇ: ¹³‹سېنىڭ شەيتاننىڭ تەختى ئورۇنلاشقان يەردە تۇرىدىغانلىقىڭنى بىلىمەن. شۇنداقتىمۇ، سەن مېنىڭ نامىمغا سادىق بولۇپ كەلدىڭ. ھەتتا ئاراڭلاردىكى ئىشەنچلىك گۇۋاھچىم ئانتىپا مۇشۇ شەيتاننىڭ ماكانىدا قەتل قىلىنغان كۈنلەردىمۇ ماڭا ئېتىقاد قىلغانلىقىڭنى ئىنكار قىلمىدىڭ. ¹⁴لېكىن ساڭا بىر ئېتىرازىم بار، ئۇ بولسىمۇ ئاراڭلاردا بىلئامنىڭ تەلىمىگە ئەگەشكەنلەر بولماقتا. بىلئام بالاق دېگەن ئادەمگە ئىسرائىللارنى قانداق ئازدۇرۇش يولىنى ئۆگەتتى. بالاق ئىسرائىللارنى بۇتقا ئاتاپ نەزىر قىلىنغان گۆشنى يېيىشكە ۋە جىنسىي ئەخلاقسىزلىق قىلىشقا ئازدۇردى. ¹⁵شۇنداقلا، ئاراڭلاردا نىكولاس تەرەپدارلىرىنىڭ تەلىمىگە ئەگەشكەنلەرمۇ بار. ¹⁶شۇنىڭ ئۈچۈن توۋا قىل. توۋا قىلمىساڭ، يېنىڭغا دەرھال بېرىپ، ئاغزىمدىكى قىلىچىم بىلەن ساڭا زەربە بېرىمەن.

¹⁷كىمنىڭ ئاڭلايدىغان قۇلىقى بولسا، مۇقەددەس روھنىڭ جامائەتلەرگە دېگەنلىرىنى ئاڭلىسۇن. غەلىبە قىلغۇچىلارغا يوشۇرۇن ساقلاپ قويغان ماننادىن بېرىمەن. ئۇلارغا يەنە بىردىن ئاق تاش بېرىمەن. بۇ تاشلارنىڭ ئۈستىگە بۇ تاشلارنى قوبۇل قىلغۇچىلاردىن باشقا ھېچكىم بىلمەيدىغان بىر ئىسىم يېزىلغاندۇر.›»

تىياتىرادىكى ئېتىقادچىلار جامائىتىگە يېزىلغان خەت

¹⁸_ تىياتىرادىكى ئېتىقادچىلار جامائىتىنىڭ پەرىشتىسىگە خەت يېزىپ، مۇنداق دېگىن:

«خۇدانىڭ كۆزلىرى يالقۇنلىغان ئوتقا ۋە پۇتلىرى پارقىراق تۇچقا ئوخشايدىغان ئوغلى مۇنداق دەيدۇ: ¹⁹‹سېنىڭ قىلغان ئىشلىرىڭنى، مېھىر-مۇھەببىتىڭنى، ئېتىقادىڭنى، ئەجرىڭنى ۋە چىداملىقىڭنى بىلىمەن. ھازىرقى قىلىۋاتقان ئىشلىرىڭنىڭ بۇرۇن قىلغان ئىشلىرىڭدىن ئېشىپ چۈشكەنلىكىنىمۇ بىلىمەن. ²⁰لېكىن ساڭا بىر ئېتىرازىم بار، ئۇ بولسىمۇ ئۆزىنى پەيغەمبەر دەپ تونۇشتۇرغان ئىزەبەل ئىسىملىك خوتۇنغا يول قويۇۋاتىسەن. بۇ خوتۇن خەلقىمگە تەلىم بېرىپ، ئۇلارنى جىنسىي ئەخلاقسىزلىق قىلىشقا ۋە بۇتقا ئاتاپ نەزىر قىلىنغان گۆشنى يېيىشكە ئازدۇرماقتا. ²¹مەن ئۇنىڭ توۋا قىلىشى ئۈچۈن پۇرسەت بەرگەنىدىم، لېكىن ئۇ جىنسىي ئەخلاقسىزلىقىغا توۋا قىلىشنى خالىمىدى. ²²ئەمدى ئۇنى ئېغىر كېسەل قىلىمەن، ئۇ تۆشۈكىدە يېتىپ قالىدۇ. ئۇنىڭ بىلەن زىنا قىلغانلار قىلمىشلىرىغا توۋا قىلمىسا، ئۇلارنىمۇ ئېغىر ئازابقا مۇپتىلا قىلىمەن. ²³ئۇنىڭ پەرزەنتلىرىنى ئەجەللىك كېسەل بىلەن ھالاك قىلىمەن. شۇنداق قىلىپ، پۈتكۈل ئېتىقادچىلار جامائىتىگە ئۇلارنىڭ ئوي-پىكرى ۋە قەلبىنى ياخشى بىلگۈچىنىڭ ئۆزۈم ئىكەنلىكىمنى بىلدۈرىمەن، ھەمدە ھەربىرىڭلارنىڭ قىلغان ئىشلىرىڭلارغا يارىشا ياندۇرىمەن.

^24‏-25لېكىن تىياتىرادىكى بۇ تەلىمنى قوبۇل قىلمىغان ۋە شەيتاننىڭ ئاتالمىش چوڭقۇر سىرلىرىنى ئۆگەنمىگەن سىلەرگە شۇنى ئېيتىمەنكى، ئۆزۈڭلاردا بار بولغاننى مەن كەلگۈچە چىڭ ساقلاڭلار. سىلەرگە بۇنىڭدىن باشقا تەلەپ قويمايمەن. ²⁶غەلىبە قىلغۇچىلارغا، يەنى ئەمرلىرىمگە ئاخىرغىچە ئەمەل قىلغانلارغا پۈتكۈل خەلقلەرگە ھاكىم بولۇش ھوقۇقىنى بېرىمەن. ²⁷ئۇلار قارشىلاشقانلارنى تۆمۈر كالتەك بىلەن ۋەيران قىلىدۇ، ساپال قاچىنى چاققاندەك پارە-پارە قىلىدۇ. ²⁸غەلىبە قىلغۇچىلارغا يەنە تاڭ يۇلتۇزىنى ئاتا قىلىمەن. ²⁹كىمنىڭ ئاڭلايدىغان قۇلىقى بولسا، مۇقەددەس روھنىڭ جامائەتلەرگە دېگەنلىرىنى ئاڭلىسۇن!›»

3

ساردىستىكى ئېتىقادچىلار جامائىتىگە يېزىلغان خەت

¹_ ساردىستىكى ئېتىقادچىلار جامائىتىنىڭ پەرىشتىسىگە خەت يېزىپ، مۇنداق دېگىن:

«خۇدانىڭ يەتتە روھىغا ۋە يەتتە يۇلتۇزغا ئىگە بولغۇچى مۇنداق دەيدۇ: ‹سېنىڭ قىلغان ئىشلىرىڭنى بىلىمەن. سېنى تىرىك دېيىشىدۇ، ئەمەلىيەتتە ئۆلۈكسەن. ²شۇڭا ئۇيقۇڭنى ئېچىپ، يوقاپ كېتىش ئالدىدا تۇرغان كىچىككىنە ئېتىقادىڭنى كۈچەيت. چۈنكى قىلغان ئىشلىرىڭنىڭ خۇدايىمنىڭ ھۇزۇرىدا تېخى تولۇق ئەمەسلىكىنى بىلدىم. ³شۇنىڭ ئۈچۈن ئاڭلىغان ۋە قوبۇل قىلغان تەلىملەرنى ئېسىڭدە چىڭ تۇت، ئۇلارغا ئەمەل قىل ۋە گۇناھلىرىڭغا توۋا قىل. ئەگەر ئويغانمىساڭ، مېنىڭ كېلىدىغان ۋاقىت-سائىتىمنى ھەرگىز بىلەلمەيسەن. چۈنكى مېنىڭ كېلىشىم خۇددى ئوغرىنىڭ كۈتۈلمىگەن ۋاقىتتا كەلگىنىدەك تۇيۇقسىز بولىدۇ.

⁴لېكىن ئاراڭلاردا ئۆزلىرىگە داغ تەگكۈزمىگەن يەنە بىرنەچچەيلەن بار. ئۇلار ئاق تون كىيىپ، مەن بىلەن بىرگە يۈرىدۇ، چۈنكى ئۇلار بۇنىڭغا لايىقتۇر. ⁵غەلىبە قىلغۇچىلار مانا مۇشۇنداق ئاق تون كىيىدۇ. ئۇلارنىڭ نامىنى ھاياتلىق دەپتىرىدىن ھەرگىز ئۆچۈرمەيمەن. ئۇلارنىڭ نامىنى ئاتام خۇدانىڭ ۋە ئۇنىڭ پەرىشتىلىرىنىڭ ئالدىدا ئوچۇق ئېتىراپ قىلىمەن. ⁶كىمنىڭ ئاڭلايدىغان قۇلىقى بولسا، مۇقەددەس روھنىڭ جامائەتلەرگە دېگەنلىرىنى ئاڭلىسۇن!›»

فىلادېلفىيەدىكى ئېتىقادچىلار جامائىتىگە يېزىلغان خەت

⁷_ فىلادېلفىيەدىكى ئېتىقادچىلار جامائىتىنىڭ پەرىشتىسىگە خەت يېزىپ، مۇنداق دېگىن:

«مۇقەددەس، ئىشەنچلىك ۋە قولىدا داۋۇتنىڭ ئاچقۇچى^* بولغان، يەنى ئىشىكنى ئاچسا ھېچكىم ياپالمايدىغان، ياپسا ھېچكىم ئاچالمايدىغان زات مۇنداق دەيدۇ: ⁸‹سېنىڭ قىلغان ئىشلىرىڭنى بىلىمەن. قارا، مەن ئالدىڭدا ھېچكىم ياپالمايدىغان بىر ئىشىكنى ئېچىپ قويدۇم. مەن سېنىڭ كۈچۈڭنىڭ ئاز ئىكەنلىكىنى بىلىمەن. شۇنداقتىمۇ يولۇمنى تۇتتۇڭ ھەم نامىمنى ئىنكار قىلمىدىڭ. ⁹قاراپ تۇر، ئۆزلىرىنى يەھۇدىي دەۋالغان، ئەمەلىيەتتە يەھۇدىي ئەمەس ئالدامچى شەيتان گۇرۇھىدىكىلەرنى شۇنداق ئاقىۋەتكە قالدۇرىمەنكى، ئۇلار كېلىپ سېنىڭ ئايىغىڭغا يىقىلىدۇ ۋە مېنىڭ سېنى ياخشى كۆرىدىغانلىقىمنى كۆرىدۇ. ¹⁰بەرداشلىق بېرىش ھەققىدىكى ئەمرىمگە ئەمەل قىلغانلىقىڭ ئۈچۈن، بۇ دۇنيادىكى ئىنسانلارنى سىناش مەقسىتىدە پۈتۈن يەر يۈزىگە بالايىئاپەت چۈشۈرگەن ۋاقتىمدا سېنى ئۇنىڭدىن قوغداپ قالىمەن. ¹¹پات يېقىندا كېلىمەن. تاجىڭنى باشقىلارنىڭ تارتىۋالماسلىقى ئۈچۈن ئۆزۈڭدە بار بولغاننى چىڭ ساقلا. ¹²غەلىبە قىلغۇچىلارنى خۇدانىڭ ئىبادەتخانىسىغا تۈۋرۈك قىلىمەن. بۇنداق ئادەم ئۇ يەردىن ئەسلا كەتمەيدۇ. ئۇنىڭ ۋۇجۇدىغا خۇدايىمنىڭ نامىنى، خۇدايىمنىڭ شەھىرىنىڭ نامىنى، يەنى ئەرشتىن، يەنى خۇدانىڭ يېنىدىن چۈشىدىغان يېڭى يېرۇسالېمنىڭ نامىنى ۋە مېنىڭ يېڭى نامىمنى يازىمەن. ¹³كىمنىڭ ئاڭلايدىغان قۇلىقى بولسا، مۇقەددەس روھنىڭ جامائەتلەرگە دېگەنلىرىنى ئاڭلىسۇن!›»

لائودىكىيادىكى ئېتىقادچىلار جامائىتىگە يېزىلغان خەت

¹⁴_ لائودىكىيادىكى ئېتىقادچىلار جامائىتىنىڭ پەرىشتىسىگە خەت يېزىپ، مۇنداق دېگىن:

«ئامىن دەپ ئاتالغۇچى،^* يەنى سەمىمىي ۋە ئىشەنچلىك گۇۋاھچى ۋە خۇدا ياراتقان مەۋجۇداتلارنىڭ مەنبەسى بولغۇچى مۇنداق دەيدۇ: ¹⁵‹سېنىڭ قىلغان ئىشلىرىڭنى بىلىمەن. سەن ئېتىقادتا سوغۇقمۇ ئەمەس، قىزىقمۇ ئەمەس. يا سوغۇق، يا قىزىق بولساڭچۇ كاشكى. ¹⁶سەن يا سوغۇق يا قىزغىن ئەمەس، بەلكى ئىلمان سۇدەك بولغانلىقىڭ ئۈچۈن، سېنى تۈكۈرۈۋېتىمەن. ¹⁷سەن بايمەن، باياشات ياشاۋاتىمەن، ھېچ نەرسىگە ھاجەتمەن ئەمەسمەن دەيسەن. لېكىن بىچارە، چارىسىز، نامرات، كور ۋە يالىڭاچ ئىكەنلىكىڭنى بىلمەيسەن. ¹⁸شۇڭا بېيىشىڭ ئۈچۈن ئوتتا تاۋلانغان ئالتۇننى، ئۇياتلىق يېرىڭنى يېپىشىڭ ئۈچۈن كىيىدىغان ئاق كىيىمنى، كۆرۈشۈڭ ئۈچۈن كۆزلىرىڭگە سۈرتىدىغان مەلھەملەرنى مەندىن سېتىۋېلىشىڭنى تەۋسىيە قىلىمەن. ¹⁹مەن ئۆزۈم ياخشى كۆرىدىغان كىشىلەرنىڭ ھەممىسىنىڭ ئەيىبىنى كۆرسىتىپ بېرىپ، ئۇلارنى تەربىيەلەيمەن. شۇنىڭ ئۈچۈن قىزغىن بولۇپ، گۇناھلىرىڭغا توۋا قىل. ²⁰قارا، مەن ھازىر ئىشىك ئالدىدا تۇرۇپ، ئىشىكنى قېقىۋاتىمەن. ئەگەر بىرى ئاۋازىمنى ئاڭلاپ ئىشىكنى ئاچسا، ئۇنىڭ يېنىغا كىرىمەن. مەن ئۇنىڭ بىلەن، ئۇمۇ مەن بىلەن بىرگە غىزالىنىدۇ. ²¹مەن غەلىبە قىلغان ۋاقتىمدا ئاتامنىڭ تەختىدە ئۇنىڭ بىلەن بىرگە ئولتۇردۇم. شۇنىڭ ئۈچۈن مەنمۇ غەلىبە قىلغۇچىلارغا تەختىمدە مەن بىلەن بىرگە ئولتۇرۇش ھوقۇقىنى بېرىمەن. ²²كىمنىڭ ئاڭلايدىغان قۇلىقى بولسا، مۇقەددەس روھنىڭ جامائەتلەرگە دېگەنلىرىنى ئاڭلىسۇن!›»

4

ئەرشتىكى ئىبادەت

¹ئاندىن مەن ئاسماندا ئوچۇق بىر ئىشىكنى كۆردۈم. مەن بۇرۇن ئاڭلىغان كاناي ئاۋازىغا ئوخشاپ كېتىدىغان ئاۋاز: «بۇ ياققا چىق، ساڭا بۇنىڭدىن كېيىن يۈز بېرىشى مۇقەررەر بولغان ۋەقەلەرنى كۆرسىتەي» دېدى. ²مۇقەددەس روھ مېنى دەرھال ئۆز ئىلكىگە ئالدى. مەن ئەرشتە بىر تەختنى ۋە ئۇنىڭدا ئولتۇرغان بىرىنى كۆردۈم. ³تەختتە ئولتۇرغۇچىنىڭ قىياپىتى قىزىل ھېقىققا ۋە قىزىل كۋارتسقا ئوخشايتتى. زۇمرەت تاشنى ئەسلىتىدىغان ھەسەن-ھۈسەن تەختنىڭ ئەتراپىدا چاقناپ تۇراتتى. ⁴تەختنىڭ ئەتراپىدا يەنە يىگىرمە تۆت تەخت بار ئىدى. تەختلەردە باشلىرىغا ئالتۇن تاج كىيگەن، ئاق تونغا ئورانغان يىگىرمە تۆت يېتەكچى ئولتۇراتتى. ⁵تەختتىن چاقماقلار چېقىلاتتى ۋە گۈلدۈرمامىنىڭ گۈلدۈر-قاراسلىرى ئاڭلىناتتى. تەختنىڭ ئالدىدا يالقۇنلاپ يېنىپ تۇرغان يەتتە مەشئەل بار ئىدى. بۇلار خۇدانىڭ يەتتە روھى ئىدى. ⁶تەختنىڭ ئالدىدا يەنە خۇددى خىرۇستالدەك پارقىراپ تۇرىدىغان، ئەينەكتەك سۈزۈك دېڭىزغا ئوخشايدىغان بىر نەرسە بار ئىدى. تەختنىڭ تۆت تەرىپىدە تۆت تىرىك مەخلۇق تۇراتتى، ئۇلارنىڭ ئالدى ۋە كەينىنى نۇرغۇن كۆزلەر قاپلىغانىدى. ⁷بىرىنچى مەخلۇق شىرغا، ئىككىنچى مەخلۇق بۇقىغا ئوخشايتتى. ئۈچىنچى مەخلۇقنىڭ يۈزى ئادەمنىڭ يۈزىگە ئوخشايتتى. تۆتىنچى مەخلۇق ئۇچۇۋاتقان بۈركۈتكە ئوخشايتتى. ⁸بۇ مەخلۇقلارنىڭ ھەربىرىنىڭ ئالتىدىن قانىتى بار ئىدى. ئۇلارنىڭ پۈتۈن بەدىنى، ھەتتا قاناتلىرىنىڭ ئاستىمۇ كۆزلەر بىلەن تولغانىدى. ئۇلار كېچە-كۈندۈز تىنماي مۇنداق دېيىشەتتى:

«مۇقەددەس، مۇقەددەس، مۇقەددەستۇر،

ئەزەلدىمۇ، ھازىرمۇ بار بولغان ۋە كەلگۈسىدىمۇ بار بولىدىغان ھەم

ھەممىگە قادىر پەرۋەردىگار خۇدا!»

⁹تىرىك مەخلۇقلار تەختتە ئولتۇرغان مەڭگۈ ھايات بولغۇچىنى ئۇلۇغلاپ، ئۇنىڭغا ھۆرمەت ۋە تەشەككۈر ئىزھار قىلغىنىدا، ¹⁰يىگىرمە تۆت يېتەكچى تەختتە ئولتۇرغان مەڭگۈ ياشىغۇچىنىڭ ئايىغىغا باش قويۇپ سەجدە قىلاتتى. تاجلىرىنى تەختنىڭ ئالدىغا قويۇشۇپ، مۇنداق دېيىشەتتى:

¹¹«پەرۋەردىگارىمىز ۋە خۇدايىمىز،

سەن شان-شەرەپ، ھۆرمەت ۋە كۈچ-قۇدرەتكە لايىقسەن.

چۈنكى ھەممىنى سەن ياراتتىڭ.

ھەممە شەيئى خاھىشىڭ بىلەن يارىتىلدى ۋە ۋۇجۇدقا كەلدى.»

5

قوزىنىڭ ئورام يازمىنى قولىغا ئېلىشى

¹ئاندىن تەختتە ئولتۇرغۇچىنىڭ ئوڭ قولىدا ھەر ئىككى يۈزىگە خەت يېزىلغان ۋە يەتتە مۆھۈر بىلەن پېچەتلەنگەن بىر ئورام يازمىنى كۆردۈم. ²«ئورام يازما ۋە پېچەتلەرنى ئېچىشقا كىم لايىقتۇر؟» دەپ، يۇقىرى ئاۋاز بىلەن توۋلاۋاتقان كۈچلۈك بىر پەرىشتىنىمۇ كۆردۈم. ³لېكىن نە ئەرشتە، نە يەر يۈزىدە، نە يەر ئاستىدا ئورام يازمىنى ئېچىپ ئوقۇيالايدىغان بىرەرسى چىقمىدى. ⁴ئورام يازمىنى ئېچىش ۋە ئوقۇشقا لايىق بىرەرسى چىقمىغاچقا قاتتىق يىغلاشقا باشلىدىم. ⁵شۇنىڭ بىلەن يېتەكچىلەردىن بىرى ماڭا:

_ يىغلىما! قارا، يەھۇدا قەبىلىسىدىن كەلگەن شىر، يەنى داۋۇتنىڭ ئەۋلادى غەلىبە قىلدى. ئۇ ئورام يازمىنى ۋە ئۇنىڭ يەتتە پېچىتىنى ئېچىشقا قادىردۇر، _ دېدى.

⁶ئاندىن بىر قوزىنىڭ يېتەكچىلەر قورشاپ تۇرغان تەخت بىلەن تىرىك مەخلۇقلارنىڭ ئارىلىقىدا تۇرغانلىقىنى كۆردۈم. قارىماققا ئۇ بۇرۇن ئۆلتۈرۈلگەندەك قىلاتتى. قوزىنىڭ يەتتە مۈڭگۈزى ۋە يەتتە كۆزى بار بولۇپ، بۇ كۆزلەر خۇدانىڭ پۈتكۈل دۇنىياغا ئەۋەتكەن يەتتە روھى ئىدى. ⁷قوزا بېرىپ، تەختتە ئولتۇرغۇچىنىڭ ئوڭ قولىدىن ئورام يازمىنى ئالدى. ⁸يازمىنى ئالغاندا، تۆت تىرىك مەخلۇق ۋە يىگىرمە تۆت يېتەكچى ئۇنىڭ ئايىغىغا باش قويدى. ئۇلارنىڭ ھەربىرىنىڭ قولىدا چىلتار^* ۋە ئىسرىق بىلەن تولغان ئالتۇن تاۋاق بار ئىدى. بۇ ئىسرىق خۇدانىڭ مۇقەددەس خەلقىنىڭ دۇئالىرى ئىدى. ⁹ئۇلار يېڭى بىر قوشاق ئېيتىشتى:

«ئورام يازمىنى ئېلىشقا

ۋە پېچەتلەرنى ئېچىشقا لايىقسەن.

چۈنكى ئۆلتۈرۈلدۈڭ

ۋە ھەر قەبىلىدىن، ھەر تىلدىن،

ھەر خەلقتىن، ھەر ئەلدىن بولغان ئىنسانلارنى

ئۆز قېنىڭ بەدىلىگە خۇداغا مەنسۇپ قىلدىڭ.

¹⁰ئۇلارنى بىر پادىشاھلىق قىلىپ ئۇيۇشتۇرۇپ،

خۇدايىمىزنىڭ خىزمىتىدىكى روھانىي قىلدىڭ.

ئۇلار يەر يۈزىدە ھۆكۈم سۈرگۈسى.»

¹¹ئاندىن تەختنىڭ، تىرىك مەخلۇقلارنىڭ ۋە يېتەكچىلەرنىڭ ئەتراپىدىكى مىڭلىغان، ئون مىڭلىغان پەرىشتىلەرنى كۆردۈم ۋە ئۇلارنىڭ ئاۋازلىرىنى ئاڭلىدىم. ¹²ئۇلار يۇقىرى ئاۋاز بىلەن مۇنداق دېيىشەتتى:

«ئۆلتۈرۈلگەن قوزا

ھوقۇق، بايلىق، دانالىق، قۇدرەت،

ھۆرمەت، شان-شەرەپ ۋە مەدھىيەگە لايىقتۇر.»

¹³مەن يەنە ئاڭلىدىمكى، ئەرش، يەر يۈزى، يەر ئاستى، دېڭىزلار ۋە كائىناتتىكى بارلىق جانلىقلار:

«مەدھىيە، ھۆرمەت، شان-شەرەپ ۋە ھوقۇق

تەختتە ئولتۇرغۇچىغا ۋە قوزىغا ئەبەدىلئەبەد مەنسۇپ بولغاي!» دېيىشەتتى.

¹⁴تۆت تىرىك مەخلۇق «ئامىن!» دەپ جاۋاب قايتۇرۇشاتتى، يېتەكچىلەر يەرگە باش قويۇپ، تەختتە ئولتۇرغۇچىغا ۋە قوزىغا سەجدە قىلىشاتتى.

6

قوزىنىڭ ئالتە پېچەتنى ئېچىشى

¹ئاندىن قوزىنىڭ يەتتە پېچەتنىڭ بىرىنچىسىنى ئاچقانلىقىنى كۆردۈم. شۇ چاغدا تۆت تىرىك مەخلۇقتىن بىرىنىڭ گۈلدۈرمامىدەك ئاۋاز بىلەن: «كەل!» دېگىنىنى ئاڭلىدىم. ²قارىۋىدىم، بىر ئاق ئاتنى كۆردۈم. ئاتقا مىنگۈچىنىڭ قولىدا بىر ساداق بار ئىدى. ئۇنىڭغا بىر تاج بېرىلدى. ئۇ جەڭگە ئاتلاندى، غەلىبە ئۈستىگە غەلىبە قىلدى.

³قوزا ئىككىنچى پېچەتنى ئاچقاندا، ئىككىنچى مەخلۇقنىڭ: «كەل!» دېگىنىنى ئاڭلىدىم. ⁴ئۇ چاغدا يەنە بىر ئات ئوتتۇرىغا چىقتى، ئۇنىڭ رەڭگى قىپقىزىل ئىدى. ئاتقا مىنگۈچىگە تىنچلىقنى يەر يۈزىدىن ئېلىپ كېتىش ۋە ئىنسانلارنى ئۆزئارا قىرغىنچىلىققا سېلىش ھوقۇقى بېرىلدى. ئۇنىڭغا يەنە چوڭ بىر قىلىچ بېرىلدى.

⁵قوزا ئۈچىنچى پېچەتنى ئاچقاندا، ئۈچىنچى مەخلۇقنىڭ: «كەل!» دېگىنىنى ئاڭلىدىم. قارىۋىدىم، بىر قارا ئاتنى كۆردۈم. ئاتقا مىنگۈچىنىڭ قولىدا بىر تارازا بار ئىدى. ⁶تۆت تىرىك مەخلۇقنىڭ ئارىسىدىن: «بىر كۈنلۈك ئىش ھەققى ئۈچۈن پەقەت بىر تاۋاق بۇغداي ياكى بولمىسا ئۈچ تاۋاق ئارپىلا بېرىلىدۇ. زەيتۇن دەرىخى بىلەن ئۈزۈم تېلىغا تەگمە!» دېگەندەك بىر ئاۋازنىڭ چىققانلىقىنى ئاڭلىدىم.

⁷قوزا تۆتىنچى پېچەتنى ئاچقاندا، تۆتىنچى مەخلۇقنىڭ: «كەل!» دېگەن ئاۋازىنى ئاڭلىدىم. ⁸قارىۋىدىم، بىر بوز ئاتنى كۆردۈم. ئاتقا مىنگۈچىنىڭ ئىسمى «ئۆلۈم» ئىدى. ئۇنىڭ كەينىدىن ئۆلۈكلەر ماكانى ئەگىشىپ كېلىۋاتاتتى. بۇلارغا يەر يۈزىدىكى ئىنسانلارنىڭ تۆتتىن بىرىنى ئۇرۇش، ئاچارچىلىق، ۋابا ۋە يىرتقۇچ ھايۋانلار ئارقىلىق ھالاك قىلىش ھوقۇقى بېرىلدى.

⁹قوزا بەشىنچى پېچەتنى ئاچقاندا، خۇدانىڭ سۆزىنى يەتكۈزگەنلىكى ۋە گۇۋاھلىق بەرگەنلىكى ئۈچۈن ئۆلتۈرۈلگەنلەرنىڭ جانلىرىنى قۇربانلىق سۇپىسىنىڭ تېگىدە كۆردۈم. ¹⁰ئۇلار يۇقىرى ئاۋاز بىلەن چۇقان سېلىشىپ: «مۇقەددەس ۋە ئىشەنچلىك ئىگىمىز، يەر يۈزىدە ياشاۋاتقان ئىنسانلارنى قاچان سوراق قىلىپ، ئۇلاردىن قېنىمىزنىڭ ئىنتىقامىنى قاچان ئېلىپ بېرىسەن؟» دەپ سورىشاتتى. ¹¹ئۇلارنىڭ ھەربىرىگە بىردىن ئاق تون بېرىلگەن بولۇپ، خۇداغا خىزمەت قىلغان ۋە ئۆزلىرىگە ئوخشاش ئۆلتۈرۈلىدىغان ئېتىقادچى قېرىنداشلىرىنىڭ سانىنىڭ توشمىغانلىقى ۋە ئۇلارنىڭ يەنە ئازغىنا ۋاقىت كۈتۈشى كېرەكلىكى تەلەپ قىلىنغانىدى.

¹²ئاندىن قوزىنىڭ ئالتىنچى پېچەتنى ئاچقانلىقىنى كۆردۈم. بۇ ۋاقىتتا زېمىن قاتتىق تەۋرەپ، قۇياش قارىيىپ، بىر بارچە قارا رەختكە، ئاي قىزىرىپ، قانغا ئوخشاپ قالدى. ¹³ئەنجۈر دەرىخى قاتتىق بوراندا سىلكىنىپ، توڭ ئەنجۈرلەر يەرگە تۆكۈلگەندەك، ئاسماندىكى يۇلتۇزلارمۇ يەر يۈزىگە تۆكۈلدى. ¹⁴ئاسمان خۇددى ئورام يازمىدەك ئورىلىپ غايىب بولدى، پۈتكۈل تاغلار ۋە ئاراللار ئورنىدىن يۆتكەلدى. ¹⁵دۇنيانىڭ پادىشاھلىرى، ھۆكۈمرانلىرى، سەردارلىرى، بايلىرى، ھوقۇقدارلىرى، قۇللىرى ۋە ھۆرلىرىنىڭ ھەممىسى ئۆڭكۈرلەرگە ۋە تاغلارنىڭ كامارلىرىغا يوشۇرۇندى. ¹⁶ئۇلار تاغ-داۋانلارغا مۇنداق دەپ يالۋۇردى: «ئۈستىمىزگە غۇلاڭلار! بىزنى تەختتە ئولتۇرغۇچىنىڭ نەزىرىدىن ۋە قوزىنىڭ غەزىپىدىن ساقلاپ قېلىڭلار! ¹⁷چۈنكى ئۇلارنىڭ غەزىپى تۇتقان دەھشەتلىك كۈن كەلدى. ئۇنىڭغا كىممۇ بەرداشلىق بېرەلىسۇن؟»

7

مۆھۈرلەنگەن 144,000 كىشى

¹ئۇنىڭدىن كېيىن يەر يۈزىنىڭ تۆت بۇلۇڭىدا تۇرغان تۆت پەرىشتىنى كۆردۈم. ئۇلار يەر يۈزىنىڭ تۆت تەرىپىدىن كېلىدىغان بوراننىڭ، دېڭىز ۋە دەل-دەرەخلەرگە تەگمەسلىكى ئۈچۈن ئۇلارنى تىزگىنلەپ تۇراتتى. ²مەڭگۈ ھايات خۇدانىڭ مۆھرىنى ئېلىپ كۈنچىقىشتىن كەلگەن باشقا بىر پەرىشتىنىمۇ كۆردۈم. ئۇ يەر يۈزى ۋە دېڭىزلارنى ۋەيران قىلىش ھوقۇقى بېرىلگەن ئاشۇ تۆت پەرىشتىگە يۇقىرى ئاۋاز بىلەن: ³«بىز خۇدانىڭ خىزمەتكارلىرىنىڭ پېشانىسىگە مۆھۈر باسقۇچە، يەر يۈزى، دېڭىز ۋە دەل-دەرەخلەرنى بۇزۇپ تاشلىماڭلار» دەپ ۋارقىرىدى. ⁴ئاندىن مەن مۆھۈرلەنگەنلەرنىڭ سانىنى ئاڭلىدىم. ئىسرائىللارنىڭ پۈتۈن قەبىلىلىرىدىن 144,000 كىشى مۆھۈرلەنگەنىدى:

⁵يەھۇدا قەبىلىسىدىن 12,000 كىشى،

رۇبېن قەبىلىسىدىن 12,000 كىشى،

گاد قەبىلىسىدىن 12,000 كىشى،

⁶ئاشېر قەبىلىسىدىن 12,000 كىشى،

نافتالى قەبىلىسىدىن 12,000 كىشى،

ماناسسە قەبىلىسىدىن 12,000 كىشى،

⁷شىمون قەبىلىسىدىن 12,000 كىشى،

لاۋىي قەبىلىسىدىن 12,000 كىشى،

ئىسساكار قەبىلىسىدىن 12,000 كىشى،

⁸زەبۇلۇن قەبىلىسىدىن 12,000 كىشى،

يۈسۈپ قەبىلىسىدىن 12,000 كىشى،

بىنيامىن قەبىلىسىدىن 12,000 كىشى.

ئاق كىيىملىك كىشىلەر

⁹ئاندىن ھەر ئەل، ھەر قەبىلە، ھەر خەلقتىن بولغان ۋە ھەر خىل تىللاردا سۆزلىشىدىغان ساناپ تۈگەتكۈسىز زور بىر توپ كىشىلەرنىڭ تەختنىڭ ۋە قوزىنىڭ ئالدىدا تۇرغانلىقىنى كۆردۈم. ئۇلارنىڭ ھەممىسى ئاق تون كىيگەن بولۇپ، قوللىرىدا خورما شاخلىرى تۇتقانىدى. ¹⁰ئۇلار: «نىجاتلىق تەختتە ئولتۇرغان خۇدايىمىزدىن ۋە قوزىدىن كېلىدۇ» دەپ قاتتىق ۋارقىرىشاتتى. ¹¹پۈتۈن پەرىشتىلەر تەختنىڭ، يېتەكچىلەرنىڭ ۋە تۆت تىرىك مەخلۇقنىڭ ئەتراپىغا ئولىشىۋالغانىدى. ئۇلار تەختنىڭ ئالدىدا يەرگە باش قويۇپ، خۇداغا سەجدە قىلىپ مۇنداق دېيىشەتتى:

¹²«ئامىن!

مەدھىيە، شان-شەرەپ،

دانالىق، مىننەتدارلىق،

ھۆرمەت ۋە قۇدرەت

خۇدايىمىزغا ئەبەدىلئەبەد مەنسۇپ بولغاي.

ئامىن!»

¹³شۇ چاغدا يېتەكچىلەردىن بىرى مەندىن:

_ ئاق تون كىيگەن بۇ كىشىلەر كىم بولىدۇ، قەيەردىن كەلدى؟ _ دەپ سورىدى.

¹⁴_ تەقسىر، مەن بىلمەيمەن، بۇ ئۆزلىرىگە مەلۇمدۇر، _ دېدىم. ئۇ ماڭا:

_ بۇلار دەھشەتلىك بالايىئاپەتنى بېشىدىن ئۆتكۈزۈپ كەلگەنلەردۇر. ئۇلار تونلىرىنى قوزىنىڭ قېنىدا يۇيۇپ، ئاقارتقان. ¹⁵شۇنىڭ ئۈچۈن ئۇلار خۇدانىڭ تەختىنىڭ ئالدىدا تۇرىدۇ. ئۇلار خۇدانىڭ ئىبادەتخانىسىدا كېچە-كۈندۈز خۇدانىڭ خىزمىتىدە بولىدۇ. تەختتە ئولتۇرغۇچى خۇدا ئۇلارغا سايىۋەندۇر. ¹⁶ئۇلار ئەمدى ئاچ قالمايدۇ، ئۇسسىمايدۇ، ئۇلار قاتتىق ئاپتاپتا قالمايدۇ ۋە ئۇلارغا ئىسسىق ئۆتمەيدۇ. ¹⁷چۈنكى ئۇلارنى تەختنىڭ ئالدىدا تۇرغان قوزا باقىدۇ ۋە ھاياتلىق سۈيى ئېقىپ تۇرىدىغان بۇلاقلارغا ئېلىپ بارىدۇ. خۇدا ئۇلارنىڭ كۆزلىرىدىكى ھەربىر تامچە ياشنى سۈرتىدۇ، _ دېدى.

8

قوزىنىڭ يەتتىنچى پېچەتنى ئېچىشى

¹قوزا يەتتىنچى پېچەتنى ئاچقاندا، ئەرشتە يېرىم سائەتچە جىمجىتلىق ھۆكۈم سۈردى. ²ئاندىن خۇدانىڭ ئالدىدا تۇرغان يەتتە پەرىشتىنى كۆردۈم. ئۇلارغا يەتتە كاناي بېرىلدى.

³ئالتۇن ئىسرىقدان تۇتقان يەنە بىر پەرىشتە كېلىپ، قۇربانلىق سۇپىسىنىڭ ئالدىدا تۇردى. ئۇنىڭغا خۇدانىڭ بارلىق مۇقەددەس خەلقىنىڭ دۇئالىرى بىلەن بىرگە ناھايىتى كۆپ ئىسرىقلار بېرىلدى. ئۇ پەرىشتە بۇلارنى تەختنىڭ ئالدىدىكى ئالتۇن قۇربانلىق سۇپىسىدا ئاتىدى. ⁴ئىسرىقتىن چىققان تۈتۈنلەر بىلەن مۇقەددەس خەلقنىڭ دۇئالىرى خۇدانىڭ ئالدىدا پەرىشتىنىڭ قولىدىن كۆتۈرۈلدى. ⁵ئاندىن پەرىشتە ئىسرىقداننى قولىغا ئېلىپ، ئۇنى قۇربانلىق سۇپىسىدىكى ئوت بىلەن تولدۇرۇپ، يەر يۈزىگە ئاتتى. ئۇ چاغدا گۈلدۈرمامىنىڭ گۈلدۈر-قاراسلىرى ئاڭلاندى. چاقماقلار چېقىپ، يەر-زېمىن تەۋرەندى.

پەرىشتىلەرنىڭ كاناي چېلىشى

⁶ئاندىن كېيىن قوللىرىغا بىردىن كاناي تۇتقان يەتتە پەرىشتە كانايلىرىنى چېلىشقا ھازىرلاندى.

⁷بىرىنچى پەرىشتە كانىيىنى چالغاندا، قان ئارىلاشقان مۆلدۈر ۋە ئوت ياغدى. زېمىننىڭ ئۈچتىن بىرى، دەل-دەرەخلەرنىڭ ئۈچتىن بىرى ۋە پۈتكۈل يېشىل ئوت-چۆپلەر كۆيۈپ كەتتى.

⁸ئىككىنچى پەرىشتە كانىيىنى چالغاندا، گويا لاۋۇلداپ كۆيۈۋاتقان چوڭ بىر تاغدەك غايەت زور بىر جىسىم دېڭىزغا تاشلاندى. دېڭىزنىڭ ئۈچتىن بىرى قانغا ئايلاندى. ⁹دېڭىزدىكى جانلىقلارنىڭ ئۈچتىن بىرى ئۆلدى ۋە كېمىلەرنىڭ ئۈچتىن بىرى ۋەيران بولدى.

¹⁰ئۈچىنچى پەرىشتە كانىيىنى چالغاندا، ئاسماندىن مەشئەلدەك يالقۇنلاپ يېنىۋاتقان چوڭ بىر يۇلتۇز دەريالارنىڭ ئۈچتىن بىرىنىڭ ۋە بارلىق بۇلاقلارنىڭ ئۈستىگە چۈشتى. ¹¹بۇ يۇلتۇزنىڭ ئىسمى «قېرتاق» بولۇپ، سۇلارنىڭ ئۈچتىن بىرىنى قېرتاق قىلدى. شۇڭا بۇ سۇنى ئىچكەن كىشىلەرنىڭ نۇرغۇنلىرى زەھەرلىنىپ، ئۆلۈپ كەتتى.

¹²تۆتىنچى پەرىشتە كانىيىنى چالغاندا، قۇياشنىڭ، ئاينىڭ ۋە يۇلتۇزلارنىڭ ئۈچتىن بىرى زەربىگە ئۇچرىدى. نەتىجىدە، قۇياش، ئاي ۋە يۇلتۇزلارنىڭ يورۇقلۇقىنىڭ ئۈچتىن بىرى قاراڭغۇلۇققا ئايلاندى. كۈندۈزنىڭ ئۈچتىن بىرىمۇ قاراڭغۇلۇققا ئايلاندى، كېچىنىڭ ئۈچتىن بىرىدە يورۇقلۇق يوقالدى.

¹³يەنە قارىۋىدىم، ئاسماننىڭ قەرىدە ئۇچۇپ كېتىۋاتقان بىر بۈركۈتنىڭ: «باشقا ئۈچ پەرىشتە چالىدىغان كاناي چېلىنغاندا، يەر يۈزىدە ياشايدىغانلارنىڭ ھالىغا ۋاي، ھالىغا ۋاي، ھالىغا ۋاي!» دەپ ۋارقىرىۋاتقانلىقىنى ئاڭلىدىم.

9

¹بەشىنچى پەرىشتە كانىيىنى چالغاندا، ئاسماندىن يەرگە چۈشۈپ كەتكەن بىر يۇلتۇزنى كۆردۈم. تېگى يوق ھاڭغا^* بارىدىغان لەخمىنىڭ ئاچقۇچى ئۇنىڭغا بېرىلدى. ²ئۇ تېگى يوق ھاڭنى ئاچقاندا، ھاڭدىن تۈتۈن خۇددى يوغان ئوچاقتىن ئېتىلىپ چىققاندەك چىقتى. ھاڭدىن چىققان تۈتۈن سەۋەبىدىن قۇياش ۋە ئاسماننى قاراڭغۇلۇق قاپلىدى. ³تۈتۈننىڭ ئىچىدىن يەر يۈزىگە چېكەتكە ياغدى. چېكەتكىلەرگە چاياندەك چېقىش كۈچى بېرىلگەنىدى. ⁴چېكەتكىلەرگە يەر يۈزىدىكى ئوت-چۆپلەرگە، دەل-دەرەخلەرگە ۋە باشقا ئۆسۈملۈكلەرگە زىيان يەتكۈزۈش ئەمەس، بەلكى پەقەت پېشانىسىدە خۇدانىڭ مۆھرى بولمىغان ئىنسانلارغىلا زىيان يەتكۈزۈش بۇيرۇلغانىدى. ⁵ئۇلارغا بۇ ئىنسانلارنى ئۆلتۈرۈش ئەمەس، بەلكى پەقەت بەش ئاي مۇددەتلىك قىيىن-قىستاققا ئېلىش بۇيرۇقىلا بېرىلگەنىدى. بۇ قىيىن-قىستاق ئادەمنى چايان چاققان ۋاقىتتىكى قاتتىق ئاغرىق ئازابىغا ئوخشايتتى. ⁶ئۇ كۈنلەردە ئىنسانلار ئۆلۈمنى ئىزدەيدۇ، لېكىن تاپالمايدۇ، ئۆلۈمنى سېغىنىدۇ، لېكىن ئۆلۈم ئۇلاردىن قاچىدۇ.

⁷چېكەتكىلەرنىڭ قىياپىتى خۇددى جەڭگە ھازىرلانغان ئاتلارغا ئوخشايتتى. باشلىرىدا ئالتۇن تاجغا ئوخشايدىغان بىر نەرسە بار ئىدى. چىرايى ئادەمنىڭكىگە ئوخشايتتى. ⁸چاچلىرى ئاياللارنىڭ چېچىغا، چىشلىرى شىرنىڭ چىشىغا ئوخشايتتى. ⁹كۆكرەكلىرى تۆمۈر ساۋۇتلارغا ئوخشايتتى. قاناتلىرىنىڭ ئاۋازى جەڭگە ئاتلانغان نۇرغۇن ئات-ھارۋىلارنىڭ ئاۋازىغا ئوخشايتتى. ¹⁰خۇددى چايانلاردەك چاقىدىغان قۇيرۇقلىرى بار ئىدى. قۇيرۇقلىرىدىكى زەھەرلىك نەشتىرىدە ئادەمنى بەش ئاي ئازابقا سالغۇدەك كۈچ بار ئىدى. ¹¹ئۇلارنى باشقۇرىدىغان پادىشاھ تېگى يوق ھاڭنىڭ پەرىشتىسى ئىدى. بۇ پەرىشتىنىڭ ئىبرانىيچە ئىسمى ئابادون، گرېكچە ئىسمى ئاپولىيون ئىدى [مەنىسى «ھالاك قىلغۇچى»].

¹²بىرىنچى بالايىئاپەت ئۆتۈپ كەتتى. ئەمدى بۇنىڭدىن كېيىن يەنە ئىككى بالايىئاپەت كېلىدۇ.

¹³ئالتىنچى پەرىشتە كانىيىنى چالغاندا، خۇدانىڭ ئالدىدىكى ئالتۇن قۇربانلىق سۇپىسىنىڭ بۆرتۈپ چىققان تۆت بۇرجىكىدىن كەلگەن بىر ئاۋازنى ئاڭلىدىم. ¹⁴بۇ ئاۋاز ئالتىنچى پەرىشتىگە: «ئۇلۇغ فىرات دەرياسىنىڭ يېنىدا باغلاقلىق تۇرغان تۆت پەرىشتىنى بوشات» دېدى. ¹⁵دەل شۇ يىل، شۇ ئاي، شۇ كۈن ۋە شۇ سائەت ئۈچۈن ھازىرلاپ قويۇلغان بۇ تۆت پەرىشتە ئىنسانلارنىڭ ئۈچتىن بىرىنى ھالاك قىلىش ئۈچۈن باغلاقتىن بوشىتىلدى. ¹⁶ئۇلارنىڭ ئاتلىق لەشكەرلىرىنىڭ سانىنىڭ ئىككى يۈز مىليون، دەپ جاكارلانغانلىقىنى ئاڭلىدىم.

¹⁷غايىبانە ئالامەتتە كۆزۈمگە كۆرۈنگەن ئات ۋە ئاتلىقلار مۇنداق ئىدى: ئاتلىقلارنىڭ كۆكرەك قالقانلىرى چوغدەك قىزىل، كۆك ياقۇتتەك كۆك ۋە گۈڭگۈرتتەك سېرىق ئىدى. ئاتلارنىڭ باشلىرى شىرنىڭ بېشىغا ئوخشايتتى. ئېغىزلىرىدىن ئوت، تۈتۈن ۋە گۈڭگۈرت پۈركۈلەتتى. ¹⁸ئىنسانلارنىڭ ئۈچتىن بىرى ئۇلارنىڭ ئاغزىدىن پۈركۈلگەن ئوت، تۈتۈن ۋە گۈڭگۈرت قاتارلىق ئۈچ ئاپەتتىن ئۆلدى. ¹⁹ئاتلارنىڭ كۈچى ئېغىزلىرىدا ۋە قۇيرۇقلىرىدا ئىدى. قۇيرۇقلىرىنىڭ يىلانغا ئوخشاش بېشى بولۇپ، ئادەمنى زەخىملەندۈرەلەيتتى.

²⁰قالغان ئىنسانلار، يەنى بۇ بالايىئاپەتلەردىن ئامان قالغۇچىلار ئۆز قىلمىشلىرىغا توۋا قىلمىدى. ئۇلار جىنلارغا چوقۇنۇشتىن ۋە كۆرەلمەس، ئاڭلىيالماس ۋە ماڭالماس ئالتۇن، كۈمۈش، تۇچ ۋە ياغاچ بۇتلارغا چوقۇنۇشتىن ۋاز كەچمىدى. ²¹ئۇلار قاتىللىق، سېھىرگەرلىك، جىنسىي ئەخلاقسىزلىق ۋە ئوغرىلىقلىرىغىمۇ توۋا قىلمىدى.

10

پەرىشتە ۋە كىچىك ئورام يازما

¹ئۇنىڭدىن كېيىن يەنە بىر كۈچلۈك پەرىشتىنىڭ ئەرشتىن چۈشۈۋاتقانلىقىنى كۆردۈم. ئۇ بىر پارچە بۇلۇتنى يېپىنغان بولۇپ، بېشىنىڭ ئۈستىدە بىر ھەسەن-ھۈسەن بار ئىدى. يۈزى قۇياشقا، پۇتلىرى بولسا ئوت تۈۋرۈكىگە ئوخشايتتى. ²قولىدا بىر كىچىك ئوچۇق يازما بار ئىدى. ئۇ ئوڭ پۇتىنى دېڭىز ئۈستىگە، سول پۇتىنى قۇرۇقلۇققا قويۇپ تۇرۇپ، ³خۇددى شىرغا ئوخشاش قاتتىق ھۆركىرىدى. ئۇ ھۆركىرىگەندە، يەتتە گۈلدۈرماما ئۆزىنىڭ گۈلدۈر-قاراسلىرى بىلەن جاۋاب قايتۇردى. ⁴يەتتە گۈلدۈرماما جاۋاب قايتۇرغاندا، ئۇلارنىڭ سۆزلىرىنى خاتىرىلىۋالماقچى بولۇپ تۇراتتىم. بىراق ئاسماندىن: «يەتتە گۈلدۈرمامىنىڭ ئېيتقانلىرىنى خاتىرىلىمە. ئۇلارنى مەخپىي تۇت» دېگەن بىر ئاۋاز ئاڭلاندى.

⁵مەن كۆرگەن پەرىشتە دېڭىز ۋە قۇرۇقلۇقنىڭ ئۈستىدە تۇرۇپ، ئوڭ قولىنى ئاسمانغا كۆتۈرۈپ، ⁶ئاسمان، يەر، دېڭىز ۋە ئۇلاردىكى مەۋجۇداتلارنى ياراتقۇچىنىڭ، يەنى ئەبەدىلئەبەد ياشىغۇچىنىڭ نامى بىلەن قەسەم قىلىپ: «ئەمدى كېچىكتۈرۈلمەيدۇ، ⁷ئەكسىچە، يەتتىنچى پەرىشتە كانىيىنى چالغاندا، خۇدا ئۆز خىزمەتكارلىرى بولغان پەيغەمبەرلەرگە جاكارلىغان سىر ئەمەلگە ئاشىدۇ» دېدى.

⁸مەن ئاسماندىن ئاڭلىغان ئاۋاز ماڭا يەنە: «سەن بېرىپ، دېڭىز ھەم قۇرۇقلۇقنىڭ ئۈستىدە تۇرغان پەرىشتىنىڭ قولىدىكى ئوچۇق ئورام يازمىنى ئال» دېدى.

⁹مەن بېرىپ، پەرىشتىدىن كىچىك ئورام يازمىنى ماڭا بېرىشىنى سورىدىم. ئۇ ماڭا:

_ بۇ ئورام يازمىنى ئال، يە! ئۇ ھەسەلدەك تاتلىق تېتىيدۇ، بىراق مەيدەڭنى ئېچىشتۇرىدۇ، _ دېدى.

¹⁰كىچىك ئورام يازمىنى پەرىشتىنىڭ قولىدىن ئېلىپ يېدىم، ئۇ ھەسەلدەك تاتلىق تېتىدى. لېكىن يۇتقىنىمدا مەيدەم ئېچىشتى. ¹¹كېيىن پەرىشتە ماڭا:

_ سەن خۇدانىڭ نۇرغۇنلىغان خەلقلەر، ئەللەر، ھەر خىل تىللاردا سۆزلىشىدىغان كىشىلەر ۋە پادىشاھلار توغرىسىدىكى ۋەھىيلىرىنى يەنە بىر قېتىم جاكارلىغىن، _ دېدى.

11

ئىككى گۇۋاھچى

¹ماڭا ئۆلچىگۈچ ئورنىدا ئىشلىتىشكە قومۇش بېرىلدى ۋە بىر ئاۋاز ماڭا مۇنداق دېدى: «سەن بېرىپ، خۇدانىڭ ئىبادەتخانىسى ۋە قۇربانلىق سۇپىسىنى ئۆلچە، ئۇ يەردە ئىبادەت قىلىۋاتقانلارنى سانا. ²ئىبادەتخانىنىڭ تاشقىرىقى ھويلىسىنى ئۆلچىمە، چۈنكى ئۇ يەر يەھۇدىي ئەمەسلەرگە بېرىلدى. ئۇلار مۇقەددەس شەھەرنى 42 ئاي دەپسەندە قىلىدۇ. ³مەن ئىككى گۇۋاھچىمغا قۇدرەت بېرىمەن. ئۇلار ماتەملىك كىيىم كىيىپ، خۇدانىڭ ۋەھىيسىنى بېكىتىلگەن ئەنە شۇ 1260 كۈن ئىچىدە يەتكۈزىدۇ.»

⁴دۇنيانىڭ ئىگىسى ئالدىدا تۇرغان ئىككى تۈپ زەيتۇن دەرىخى ۋە ئىككى چىراغدان مانا شۇ گۇۋاھچىلاردۇر. ⁵بىرەرسى ئۇلارنى زەخىملەندۈرمەكچى بولسا، ئۇلار ئېغىزلىرىدىن ئوت پۈركۈپ، ئۇنى كۆيدۈرۈپ تاشلايدۇ. ئۇلارنى زەخىملەندۈرمەكچى بولغانلار مانا شۇنداق ئۆلتۈرۈلىدۇ. ⁶ئۇلار خۇدانىڭ ۋەھىيسىنى جاكارلايدىغان كۈنلەردە يامغۇر ياغماسلىقى ئۈچۈن، ئاسماننى يېپىۋېتىش قۇدرىتىگە ئىگە. ئۇلار سۇلارنى قانغا ئايلاندۇرۇش ۋە يەر يۈزىگە خالىغان ۋاقىتتا ھەر خىل بالايىئاپەتلەر بىلەن زەربە بېرىش قۇدرىتىگىمۇ ئىگىدۇر.

⁷گۇۋاھلىق بېرىش ۋەزىپىلىرى ئاياغلاشقاندا، تېگى يوق ھاڭدىن چىقىدىغان دىۋە ئۇلار بىلەن ئېلىشىدۇ ۋە ئۇلارنى يېڭىپ ئۆلتۈرىدۇ. ⁸جەسەتلىرى كاتتا شەھەرنىڭ غول يولىغا تاشلىنىدۇ. بۇ شەھەر سودوم ياكى مىسىر دېگەن سىمۋوللۇق نام بىلەن ئاتالغان بولۇپ، ئۇلارنىڭ رەببىمۇ ئۇ يەردە كرېستكە مىخلانغانىدى. ⁹ھەر خەلقتىن، ھەر قەبىلىدىن ۋە ھەر خىل تىلدا سۆزلىشىدىغان ئەللەردىن كىشىلەر كېلىشىپ، ئۇلارنىڭ جەسەتلىرىگە ئۈچ يېرىم كۈن تىكىلىپ قارايدۇ ۋە جەسەتلەرنىڭ يەرلىككە قويۇلۇشىغا رۇخسەت قىلمايدۇ. ¹⁰يەر يۈزىدە ياشايدىغانلار ئۇلارنىڭ بۇ ئەھۋالىدىن خۇشاللىققا چۆمۈپ، ھېيت-بايرام ئۆتكۈزىدۇ ۋە بىر-بىرىگە ھەدىيەلەر ئەۋەتىشىدۇ. چۈنكى بۇ ئىككى پەيغەمبەرنىڭ سۆزى بۇرۇن ئىنسانلارنىڭ ۋىجدانلىرىغا تىكەندەك سانجىلىپ، ئۇلارنى ئازابلىغانىدى.

¹¹ئۈچ يېرىم كۈندىن كېيىن ئىككى پەيغەمبەرنىڭ تېنىگە خۇدادىن كەلگەن ھاياتلىق نەپىسى كىردى ۋە ئۇلار ئورنىدىن تۇردى. ئۇلارنى كۆرگەنلەر ئىنتايىن ئالاقزادە بولۇپ كېتىشتى. ¹²ئىككى پەيغەمبەر ئەرشتىن كەلگەن يۇقىرى بىر ئاۋازنىڭ: «بۇ ياققا چىق!» دېگەنلىكىنى ئاڭلىدى ۋە رەقىبلىرىنىڭ كۆز ئالدىدا بىر بۇلۇت ئىچىدە ئاسمانغا كۆتۈرۈلدى. ¹³دەل شۇ چاغدا زېمىن شىددەتلىك تەۋرەندى، شەھەرنىڭ ئوندىن بىرى گۇمران بولۇپ، يەتتە مىڭ كىشى ھالاك بولدى. قالغانلىرى ئىنتايىن قورقۇشۇپ، ئەرشتىكى خۇدانى ئۇلۇغلاشتى.

¹⁴ئىككىنچى بالايىئاپەت ئۆتۈپ كەتتى. ئەمدى ئۈچىنچى بالايىئاپەت كېلىشكە ئاز قالدى.

يەتتىنچى پەرىشتىنىڭ كاناي چېلىشى

¹⁵ئۇنىڭدىن كېيىن يەتتىنچى پەرىشتە كانىيىنى چالدى. ئەرشتىن كەلگەن يۇقىرى ئاۋازلار مۇنداق دەيتتى:

«دۇنيانىڭ پادىشاھلىقى پەرۋەردىگارىمىزغا ۋە ئۇ تەيىنلىگەن مەسىھكە مەنسۇپ بولدى. پەرۋەردىگار ئەبەدىلئەبەد ھۆكۈم سۈرگۈسى.»

¹⁶خۇدانىڭ ھۇزۇرىدا ئۆز تەختلىرىدە ئولتۇرغان يىگىرمە تۆت يېتەكچى يەرگە باش قويۇپ، خۇداغا سەجدە قىلىپ مۇنداق دېيىشتى:

¹⁷«ئەزەلدىمۇ ۋە ھازىرمۇ بار بولغان

ھەممىگە قادىر پەرۋەردىگار خۇدا

شۈكۈرلەر بولسۇن ساڭا.

چۈنكى ئۇلۇغ قۇدرىتىڭ بىلەن

ھۆكۈمۈڭنى يۈرگۈزۈشكە باشلىدىڭ.

¹⁸خەلقلەر غەزەپلەنگەنىدى.

ئەمدى سېنىڭ غەزىپىڭ يېتىپ كەلدى!

ئەمدى ئۆلۈكلەرنى سوراق قىلىش ۋاقتى كەلدى.

نامىڭنى چوڭقۇر ھۆرمەتلىگەن خىزمەتكارلىرىڭ،

يەنى پەيغەمبەرلەر

ۋە سېنىڭ مۇقەددەس خەلقىڭ

چوڭ ياكى كىچىك بولسۇن،

ئۇلارنى ئىنئامغا ئىگە قىلىش

ۋە يەر يۈزىنى گۇمران قىلغانلارنى ھالاك قىلىش ۋاقتى يېتىپ كەلدى.»

¹⁹ئاندىن خۇدانىڭ ئەرشتىكى ئىبادەتخانىسى ئېچىلدى ۋە ئەھدە ساندۇقى ئۇ يەردە كۆرۈندى. شۇ ئان چاقماقلار چېقىپ، گۈلدۈرمامىنىڭ گۈلدۈر-قاراسلىرى ئاڭلاندى. زېمىن تەۋرىنىپ، دەھشەتلىك مۆلدۈر ياغدى.

12

ئايال ۋە ئەجدىھا

¹ئاندىن ئەرشتە ئاجايىپ زور بىر كارامەت، يەنى قۇياشنى يېپىنچاقلىغان بىر ئايال كۆرۈندى. ئۇنىڭ پۇتلىرىنىڭ ئاستىدا ئاي، بېشىدا ئون ئىككى يۇلتۇزلۇق تاج بار ئىدى. ²بۇ ئايالنىڭ ئاي-كۈنى توشۇپ قالغان بولۇپ، تولغاق ئىچىدە داد-پەرياد قىلاتتى. ³ئاندىن ئەرشتە يەنە بىر كارامەت، يەنى يەتتە باشلىق، ئون مۈڭگۈزلۈك چوڭ بىر قىزىل ئەجدىھا كۆرۈندى. ئۇنىڭ يەتتە بېشىدا يەتتە تاج بار ئىدى. ⁴ئۇ ئاسماندىكى يۇلتۇزلارنىڭ ئۈچتىن بىرىنى قۇيرۇقى بىلەن سۈپۈرۈپ، يەر يۈزىگە چۈشۈرۈۋەتتى. ئاندىن ئۇ تۇغۇت ئۈستىدىكى ئايالنىڭ ئالدىدا تۇردى. چۈنكى ئۇ ئايال يەڭگىگەن ھامان ئۇنىڭ بالىسىنى يالمىۋەتمەكچى ئىدى. ⁵ئايال بىر ئوغۇل، يەنى پۈتۈن ئەللەرنى تۆمۈر كالتەك بىلەن باشقۇرىدىغان بىر بالا تۇغدى. بالا تەختتە ئولتۇرغان خۇدانىڭ ئالدىغا دەرھال ئېلىپ بېرىلدى. ⁶ئايال بولسا چۆلگە قېچىپ كەتتى. ئۇ يەردە خۇدا ئۇنىڭ ئۈچۈن تەييارلاپ قويغان بىر جاي بار ئىدى. ئۇ شۇ يەردە 1260 كۈن بېقىلاتتى.

⁷ئۇنىڭدىن كېيىن ئەرشتە جەڭ بولدى. باش پەرىشتە مىكائىل ۋە ئۇنىڭ پەرىشتىلىرى ئەجدىھاغا قارشى جەڭ قىلدى. ئەجدىھامۇ ئۆزىنىڭ پەرىشتىلىرى بىلەن ئۇلارغا ئېتىلدى، ⁸لېكىن ئېلىشالمىدى. شۇنىڭ بىلەن ئۇلار ئەرشتىكى ئورنىدىن مەھرۇم قالدى. ⁹چوڭ ئەجدىھا، يەنى ئىبلىس ياكى شەيتان دەپ ئاتالغان ۋە پۈتۈن دۇنيانى ئازدۇرغان ھېلىقى قەدىمىي يىلان ئۆز پەرىشتىلىرى بىلەن بىرگە يەر يۈزىگە تاشلاندى.

¹⁰شۇنىڭدىن كېيىن ئەرشتە يۇقىرى بىر ئاۋازنىڭ مۇنداق دېگەنلىكىنى ئاڭلىدىم:

«خۇدايىمىزنىڭ نىجاتلىقى، قۇدرىتى، پادىشاھلىقى ۋە ئۇ تەيىنلىگەن مەسىھنىڭ ھوقۇقى نامايان بولدى.

چۈنكى خۇدايىمىزنىڭ ئالدىدا قېرىنداشلىرىمىزنى كېچە-كۈندۈز ئەيىبلىگۈچى ئەرشتىن تاشلىۋېتىلدى.

¹¹قېرىنداشلىرىمىز قوزىنىڭ قېنى ۋە ئۇنىڭ قىلغان گۇۋاھلىقى بىلەن ئەجدىھانى يەڭدى.

ئۇلار ھەتتا ئۆلۈم خەۋپى بولغاندىمۇ ئۆز جانلىرىنى ئايىمىدى.

¹²شۇنىڭ ئۈچۈن ئەي ئەرش ۋە ئەرشتە ياشىغۇچىلار، خۇشال بولۇڭلار!

لېكىن ئەي يەر ۋە دېڭىزلار، ھالىڭلارغا ۋاي!

چۈنكى ئىبلىس ئۈستۈڭلارغا تاشلاندى.

ئۇ ئۆزىنىڭ ۋاقتىنىڭ ئاز قالغانلىقىنى بىلىپ، غەزەپكە تولدى.»

¹³ئەجدىھا ئۆزىنىڭ يەر يۈزىگە تاشلانغانلىقىنى كۆرۈپ، ئوغۇل بالىنى تۇغقان ئايالنى قوغلاشقا باشلىدى. ¹⁴ئايالنىڭ ئەجدىھادىن قېچىپ قۇتۇلۇشى ئۈچۈن ئۇنىڭغا يوغان بىر بۈركۈتنىڭ ئىككى قانىتى بېرىلدى. ئۇ بۇ قاناتلار بىلەن چۆلدىكى ئىككى مەزگىل ۋە يەنە يېرىم مەزگىل^* بېقىلىدىغان يەرگە ئۇچۇپ بارالايتتى. ¹⁵ئەجدىھا ئايالنى سەل ئېقىتىپ كەتسۇن دەپ، ئاغزىنى ئاچتى-دە، ئايالنىڭ كەينىدىن دەريادەك سۇ پۈركىدى. ¹⁶لېكىن زېمىن ئايالغا ياردەم قىلىپ، ئاغزىنى ئېچىپ، ئەجدىھانىڭ ئاغزىدىن ئېتىلىپ چىققان دەريانى يۇتۇۋەتتى. ¹⁷شۇنىڭ بىلەن ئەجدىھا ئايالغا قاتتىق غەزەپلىنىپ، ئۇنىڭ باشقا پەرزەنتلىرى، يەنى خۇدانىڭ ئەمرلىرىنى ئىجرا قىلىپ، ئەيسا مەسىھ ھەققىدىكى گۇۋاھلىقىدا چىڭ تۇرغانلار بىلەن جەڭ قىلغىلى كەتتى.

¹⁸ئەجدىھا دېڭىز بويىدا تۇراتتى.

13

دېڭىزدىن چىققان دىۋە

¹ئاندىن ئون مۈڭگۈزلۈك، يەتتە باشلىق بىر دىۋىنىڭ دېڭىزدىن چىقىۋاتقانلىقىنى كۆردۈم. ئۇنىڭ ھەربىر مۈڭگۈزىدە بىردىن تاج بار ئىدى، ھەربىر بېشىدا خۇداغا قارشى كۇپۇر ئىبارىلەر بار ئىدى. ²مەن كۆرگەن بۇ دىۋە يىلپىزغا ئوخشايتتى. پۇتلىرى ئېيىقنىڭ پۇتلىرىغا، ئاغزى شىرنىڭ ئاغزىغا ئوخشايتتى. ئەجدىھا دىۋىگە ئۆزىنىڭ قۇدرىتى، تەختى ۋە زور ھوقۇقىنى بەردى. ³دىۋىنىڭ باشلىرىدىن بىرىدە ئەجەللىك يارا بار بولغان بولۇپ، بۇ ئەجەللىك يارا ھازىر ساقايغاندەك قىلاتتى. پۈتۈن دۇنيا ھەيرانلىق ئىچىدە دىۋىگە ئەگەشتى. ⁴ئۇلار دىۋىگە بۇنداق ھوقۇق بەرگەن ئەجدىھاغا چوقۇنۇشتى. ئۇلار يەنە دىۋىگىمۇ چوقۇنۇپ: «دىۋىگە تەڭ كېلەلەيدىغانلار بارمۇ؟ ئۇنىڭ بىلەن كىممۇ ئېلىشالىسۇن؟» دېيىشتى.

⁵دىۋىگە تەكەببۇرلۇق ۋە كۇپۇرلۇق قىلىدىغان ئېغىز، ھەمدە 42 ئايلىق ھوقۇق بېرىلدى. ⁶ئۇ خۇداغا، خۇدانىڭ نامىغا ۋە ئۇنىڭ دەرگاھىغا ۋە ئۇ يەردە ياشايدىغانلارغا كۇپۇرلۇق قىلىش ئۈچۈن ئاغزىنى ئاچتى. ⁷ئۇنىڭ خۇدانىڭ مۇقەددەس خەلقىگە قارشى جەڭ قىلىپ، ئۇلارنى يېڭىشىگە يول قويۇلدى. ئۇنىڭغا ھەر قەبىلە، ھەر خەلق ۋە ھەر خىل تىلدا سۆزلىشىدىغان ئەللەرگە ھۆكۈمرانلىق قىلىش ھوقۇقى بېرىلدى. ⁸ئۇنىڭغا يەر يۈزىدە ياشايدىغانلارنىڭ ھەممىسى، يەنى ئۆلتۈرۈلگەن قوزىنىڭ ھاياتلىق دەپتىرىگە دۇنيا يارىتىلغاندىن بۇيان نامى يېزىلغانلاردىن باشقىلىرىنىڭ ھەممىسى چوقۇنىدۇ.

⁹تۆۋەندىكى سۆزلەرنى قۇلىقىڭلاردا چىڭ تۇتۇڭلار:

¹⁰«خۇدانىڭ: ‹تۇتقۇن بولىدۇ› دېگىنى چوقۇم تۇتقۇن بولىدۇ.

خۇدانىڭ: ‹قىلىچلىنىدۇ› دېگىنى چوقۇم قىلىچلىنىدۇ.»

شۇنىڭ ئۈچۈن خۇدانىڭ مۇقەددەس خەلقى چىداملىق بولۇشى ۋە ئېتىقادىدا چىڭ تۇرۇشى لازىم.

يەردىن چىققان دىۋە

¹¹ئۇنىڭدىن كېيىن يەردىن چىققان يەنە بىر دىۋىنى كۆردۈم. ئۇنىڭ قوزىنىڭكىدەك كىچىك ئىككى مۈڭگۈزى بار ئىدى، لېكىن ئۇ سۆزلىگەندە ئاۋازى ئەجدىھانىڭكىگە ئوخشايتتى. ¹²ئۇ بىرىنچى دىۋىگە ۋاكالىتەن پۈتۈن ھوقۇقنى يۈرگۈزۈپ، يەر يۈزىنى ۋە ئۇنىڭدا ياشايدىغانلارنى ئەجەللىك يارىسى ساقايغان بىرىنچى دىۋىگە چوقۇنۇشقا مەجبۇرلايتتى. ¹³ئۇ چوڭ كارامەتلەرنى كۆرسىتەتتى، ھەتتا كىشىلەرنىڭ كۆز ئالدىدا ئاسماندىن يەر يۈزىگە ئوت ياغدۇراتتى. ¹⁴ئۇ بىرىنچى دىۋىگە ۋاكالىتەن بېرىلگەن كارامەت كۆرسىتىش ھوقۇقى بىلەن يەر يۈزىدە ياشايدىغانلارنى ئازدۇردى. ئۇلارغا قىلىچ بىلەن چېپىلغان، لېكىن ئامان قالغان بىرىنچى دىۋىنىڭ ھۆرمىتى ئۈچۈن بىر بۇت تىكلەشنى بۇيرۇدى. ¹⁵يەردىن چىققان دىۋىگە دېڭىزدىن چىققان دىۋىنىڭ بۇتىغا ھاياتلىق نەپىسى بېرىپ، ئۇنى سۆزلىيەلەيدىغان قىلىش ۋە ئۇنىڭغا چوقۇنمىغانلارنىڭ ھەممىسىنى ئۆلتۈرۈش قۇدرىتى بېرىلدى. ¹⁶ئۇ چوڭ ۋە كىچىكلەرنىڭ، باي ۋە كەمبەغەللەرنىڭ، ھۆر ۋە قۇللارنىڭ ھەممىسىنى ئوڭ قولىغا ياكى پېشانىسىگە بىر بەلگە سالدۇرۇشقا مەجبۇرلىدى. ¹⁷دىۋىنىڭ بەلگىسى، يەنى قولى ياكى پېشانىسىدە دىۋىنىڭ نامى ياكى ئۇنىڭ نامىغا ۋەكىللىك قىلىدىغان رەقەم بولمىغانلار بىر نەرسە سېتىۋالالمايتتى ياكى ساتالمايتتى.

¹⁸بۇ يەردە بىر ھېكمەت بار. ئەقىل-پاراسىتى بارلىكى كىشىلەر دىۋىنىڭ رەقىمىنى ھېسابلاپ چىقالايدۇ، چۈنكى بۇ رەقەم بىر ئادەمگە ۋەكىللىك قىلىدۇ. ئۇنىڭ رەقىمى 666دۇر.

14

قۇتقۇزۇۋېلىنغانلارنىڭ قوشىقى

¹ئاندىن قوزىنىڭ سىئون تېغى ئۈستىدە تۇرغانلىقىنى كۆردۈم. ئۇنىڭ يېنىدا پېشانىسىگە قوزىنىڭ ۋە ئۇنىڭ ئاتىسىنىڭ ئىسمى يېزىلغان 144,000 كىشى بار ئىدى. ²ئاسماندىن خۇددى شارقىراپ ئېقىۋاتقان سۇلارنىڭ ۋە گۈلدۈرمامىنىڭ قاتتىق گۈلدۈرلىشىدەك بىر ئاۋازنى ئاڭلىدىم. مەن ئاڭلىغان ئاۋاز يەنە چىلتارچىلار ئورۇندىغان نەغمىگىمۇ ئوخشايتتى. ³ھېلىقى 144,000 كىشى تەختنىڭ، تۆت تىرىك مەخلۇقنىڭ ۋە يېتەكچىلەرنىڭ ئالدىدا يېڭى بىر مۇناجات ئېيتىشتى. بۇ ناخشىنى بۇ دۇنيادىن قۇتقۇزۇۋېلىنغانلاردىن باشقا ھېچكىم ئۆگىنىشكە قادىر ئەمەس. ⁴ئۇلار خۇددى زىنا قىلىپ باقمىغان كىشىلەردەك پاك بولۇپ، قوزا نەگە بارسا، ئۇلارمۇ ئۇنىڭغا ئەگىشىپ شۇ يەرگە بارىدۇ. ئۇلار ئىنسانلار ئارىسىدىن قۇتقۇزۇۋېلىنغانلار بولۇپ، خۇددى تۇنجى ئېلىنغان ھوسۇل خۇداغا ئاتالغىنىدەك، ئۇلار خۇداغا ۋە قوزىغا ئاتالغانلاردۇر. ⁵ئۇلارنىڭ ئاغزىدىن يالغان سۆز چىقمايدۇ. ئۇلار ئەيىبسىزدۇر.

ئۈچ پەرىشتە ئېلىپ كەلگەن خەۋەرلەر

⁶شۇنىڭدىن كېيىن ئاسماننىڭ قەرىدە ئۇچۇپ كېلىۋاتقان باشقا بىر پەرىشتىنى كۆردۈم. بۇ پەرىشتە يەر يۈزىدە ياشايدىغانلارغا، يەنى ھەر خەلق، ھەر قەبىلە ۋە ھەر خىل تىلدا سۆزلىشىدىغان ئەللەرگە يەتكۈزىدىغان مەڭگۈلۈك خۇش خەۋەرنى ئېلىپ كېلىۋاتقانىدى. ⁷ئۇ يۇقىرى ئاۋاز بىلەن: «خۇدادىن قورقۇڭلار، ئۇنى ئۇلۇغلاڭلار! چۈنكى ئۇنىڭ ئىنسانلارنى سوراق قىلىدىغان ۋاقتى يېتىپ كەلدى. ئاسماننى، زېمىننى، دېڭىزنى ۋە بۇلاقلارنى ياراتقۇچىغا سەجدە قىلىڭلار!» دەيتتى.

⁸ئۇنىڭ كەينىدىن كەلگەن ئىككىنچى پەرىشتە مۇنداق دېدى: «گۇمران بولدى، كاتتا شەھەر بابىل گۇمران بولدى! چۈنكى ئۇ ئۆزىنىڭ قىلغان جىنسىي ئەخلاقسىزلىقىنىڭ كۈچلۈك شارابىنى پۈتكۈل خەلقلەرگە ئىچكۈزگەنىدى.»

⁹ئالدىنقى ئىككى پەرىشتىنىڭ كەينىدىن ئۈچىنچى پەرىشتە يۇقىرى ئاۋاز بىلەن مۇنداق دېدى: «كىمدىكىم دېڭىزدىن چىققان دىۋىگە ۋە ئۇنىڭ بۇتىغا چوقۇنسا، شۇنداقلا ئۇنىڭ بەلگىسىنى پېشانىسىگە ياكى قولىغا سالدۇرسا، ¹⁰ئۇ خۇدانىڭ غەزەپ شارابىدىن ئىچىدۇ. غەزەپ قەدىھىگە قۇيۇلغان بۇ شاراب ناھايىتى كۈچلۈكتۇر. بۇنداق ئادەملەر مۇقەددەس پەرىشتىلەر ۋە قوزىنىڭ ئالدىدا يېنىۋاتقان گۈڭگۈرت ئوتى ئىچىدە ئازاب چېكىدۇ. ¹¹ئۇنى قىينىغان ئوتنىڭ ئىس-تۈتەكلىرى مەڭگۈ پۇرقىراپ تۇرىدۇ. دىۋىگە ۋە ئۇنىڭ بۇتىغا چوقۇنۇپ، ئۇنىڭ ئىسمىنىڭ بەلگىسىنى سالدۇرغانلارغا كېچە-كۈندۈز ئاراملىق بولمايدۇ.» ¹²شۇنىڭ ئۈچۈن خۇدانىڭ ئەمرلىرىنى تۇتقان ۋە ئەيساغا سادىق بولغان مۇقەددەس خەلق چىداملىق بولۇشى لازىم.

¹³مەن يەنە ئاسماندىن مۇنداق بىر ئاۋازنى ئاڭلىدىم. ئۇ:

_ «بۇنىڭدىن كېيىن رەببىمىزگە مەنسۇپ بولۇپ ئۆلگەنلەر نەقەدەر بەختلىكتۇر!» دېگەن بۇ سۆزنى ياز، _ دېدى.

مۇقەددەس روھ:

_ دۇرۇس، ئۇلار ئۆزلىرىنىڭ خىزمەتلىرىدىن ئارام ئالىدۇ. ئۇلارنىڭ قىلغان ياخشى ئەمەللىرى ئۇلار بىلەن بىرگە بولىدۇ، _ دېدى.

زېمىندىكى ئورما

¹⁴ئۇنىڭدىن كېيىن بىر پارچە ئاق بۇلۇتنى كۆردۈم. بۇلۇتنىڭ ئۈستىدە بېشىغا ئالتۇن تاج كىيگەن، قولىدا ئۆتكۈر بىر ئورغاق تۇتقان، ئىنسانئوغلىغا ئوخشايدىغان بىرى ئولتۇراتتى. ¹⁵ئەرشتىكى ئىبادەتخانىدىن چىققان باشقا بىر پەرىشتە بۇلۇتنىڭ ئۈستىدە ئولتۇرغۇچىغا يۇقىرى ئاۋاز بىلەن: «ئورغىقىڭنى ئىشقا سال، چۈنكى ئورما ۋاقتى كەلدى، زېمىندىكى زىرائەتلەر پىشىپ يېتىلدى» دېدى. ¹⁶بۇلۇت ئۈستىدە ئولتۇرغۇچى زېمىنغا ئورغاق سالدى. يەردىكى زىرائەتلەر ئورۇلدى.

¹⁷ئەرشتىكى ئىبادەتخانىدىن يەنە بىر پەرىشتە چىقتى. ئۇنىڭمۇ ئۆتكۈر بىر ئورغىقى بار ئىدى. ¹⁸ئارقىدىنلا ئوتنى باشقۇرىدىغان يەنە بىر پەرىشتە قۇربانلىق سۇپىسى تەرەپتىن چىقىپ، ئۆتكۈر ئورغاق تۇتقان پەرىشتىگە يۇقىرى ئاۋاز بىلەن: «ئۆتكۈر ئورغىقىڭنى ئىشقا سېلىپ، يەر يۈزىدىكى ئۈزۈملەرنى يىغىۋال، چۈنكى ئۈزۈملەر پىشتى» دېدى. ¹⁹شۇنىڭ بىلەن پەرىشتە ئورغىقىنى ئىشقا سېلىپ، يەر يۈزىگە سالدى ۋە زېمىندىكى ئۈزۈملەرنى يىغىپ، خۇدانىڭ بۈيۈك ئۈزۈم ئېزىش كۆلچىكىگە تاشلىدى.^{* 20}شەھەرنىڭ سىرتىدىكى ئۈزۈم ئېزىش كۆلچىكىدە ئېزىلگەن ئۈزۈملەردىن قان ئاقتى. قان ئاتنىڭ ئېغىزلىقىغا كېلىدىغان ئېگىزلىكتە 300 كىلومېتىر يىراقلىققا ئېقىپ باردى.

15

پەرىشتىلەر ۋە كېيىنكى بالايىئاپەتلەر

¹ئاسماندا ھەيران قالارلىق يەنە بىر زور كارامەتنى، يەنى ئاخىرقى يەتتە خىل بالايىئاپەتنى ئېلىپ كېلىدىغان يەتتە پەرىشتىنى كۆردۈم. خۇدانىڭ غەزىپى بۇ بالايىئاپەتلەر بىلەن ئاخىرلىشاتتى.

²مەن يەنە ئوت يېنىۋاتقان خىرۇستال دېڭىزىدەك بىر كۆرۈنۈشنى كۆردۈم. ئۇنىڭ يېنىدا دىۋە ئۈستىدىن غەلىبە قىلغانلار، يەنى دىۋىگە ۋە ئۇنىڭ بۇتىغا چوقۇنمىغانلار ھەم ئۇنىڭ نامىغا ۋەكىللىك قىلىدىغان رەقەم بىلەن مۆھۈرلەنمىگەنلەر تۇراتتى. ئۇلارنىڭ قوللىرىدا خۇدا بەرگەن چىلتارلار بولۇپ، ³خۇدانىڭ خىزمەتكارى مۇسانىڭ مۇناجىتىنى ھەم قوزا ھەققىدىكى مۇناجاتنى ئېيتىشاتتى:

«ھەممىگە قادىر پەرۋەردىگار خۇدا،

قىلغانلىرىڭ ئۇلۇغ ۋە كارامەتتۇر.

ئى پۈتكۈل خەلقلەرنىڭ پادىشاھى،

يوللىرىڭ ئادالەتلىك ۋە ھەقتۇر.

⁴ئى پەرۋەردىگار، سەندىن قورقمايدىغان

ۋە نامىڭنى مەدھىيەلىمەيدىغان كىم بار؟

چۈنكى پەقەت سەنلا مۇقەددەستۇرسەن.

كېلىپ پۈتكۈل خەلقلەر،

ساڭا سەجدە قىلىدۇ.

چۈنكى ئاشكارا بولغاچ

قىلغانلىرىڭنىڭ ھەققانىيلىقى.»

⁵ئۇنىڭدىن كېيىن ئەرشتىكى ئىبادەتخانىنىڭ، يەنى ئەھدە چېدىرىنىڭ ئېچىلغانلىقىنى كۆردۈم. ⁶يەتتە خىل بالايىئاپەتنى ئۆز ئىلكىدە تۇتقان يەتتە پەرىشتە پاكىز ھەم پارقىراپ تۇرىدىغان زىغىر رەختتىن تون كىيگەن، كۆكسىگە ئالتۇن كەمەر باغلىغان ھالدا ئىبادەتخانىدىن چىقتى. ⁷تۆت تىرىك مەخلۇقنىڭ بىرى يەتتە پەرىشتىگە مەڭگۈ ياشايدىغان خۇدانىڭ غەزىپى تولغان يەتتە ئالتۇن چىنىنى بەردى. ⁸خۇدانىڭ شان-شەرىپى ۋە قۇدرىتىدىن ئىبادەتخانا تۈتۈنگە تولدى. يەتتە پەرىشتىنىڭ يەتتە بالايىئاپىتى ئاخىرلاشمىغۇچە، ھېچكىم ئىبادەتخانىغا كىرەلمىدى.

16

خۇدانىڭ غەزىپى بىلەن تولغان يەتتە چىنە

¹شۇنىڭدىن كېيىن ئىبادەتخانىدىن كۆتۈرۈلگەن يۇقىرى بىر ئاۋازنىڭ يەتتە پەرىشتىگە: «بېرىڭلار، يەتتە چىنىدىكى خۇدانىڭ غەزىپىنى يەر يۈزىگە تۆكۈڭلار!» دېگەنلىكىنى ئاڭلىدىم.

²بىرىنچى پەرىشتە بېرىپ چىنىدىكى خۇدانىڭ غەزىپىنى قۇرۇقلۇققا تۆكتى. شۇنىڭ بىلەن تېنىدە دىۋىنىڭ بەلگىسى بولغانلار ۋە ئۇنىڭ بۇتىغا چوقۇنىدىغانلارنىڭ بەدىنىنى يىرگىنچلىك يىرىڭلىق يارىلار قاپلاپ كەتتى.

³ئىككىنچى پەرىشتە چىنىدىكى خۇدانىڭ غەزىپىنى دېڭىزغا تۆكتى. دېڭىز ئۆلگەن ئادەمنىڭ قېنىغا ئايلاندى. شۇنىڭ بىلەن دېڭىزدىكى پۈتكۈل جانلىقلار ئۆلدى.

⁴ئۈچىنچى پەرىشتە چىنىدىكى خۇدانىڭ غەزىپىنى دەريا ۋە بۇلاقلارغا تۆكتى. ئۇلارنىڭ سۈيىمۇ قانغا ئايلاندى. ⁵ئاندىن سۇ پەرىشتىسىنىڭ مۇنداق دېگەنلىكىنى ئاڭلىدىم:

«ھازىر ۋە ئەزەلدىن بار بولغان مۇقەددەس خۇدا،

سەن بۇ ھۆكۈملەرنى چىقارغانلىقىڭ ئۈچۈن ئادىلدۇرسەن.

⁶يامان ئادەملەر سېنىڭ مۇقەددەس خەلقىڭنىڭ ۋە پەيغەمبەرلەرنىڭ قېنىنى تۆككەنلىكى ئۈچۈن،

سەن ئۇلارغا قان ئىچكۈزدۈڭ، ئۇلار مۇشۇ جازاغا لايىقتۇر.»

⁷يەنە قۇربانلىق سۇپىسىدىن كەلگەن بىر ئاۋازنىڭ:

«ئى ھەممىگە قادىر پەرۋەردىگار خۇدا، ھۆكۈملىرىڭ ھەق ۋە ئادىلدۇر» دېگەنلىكىنى ئاڭلىدىم.

⁸تۆتىنچى پەرىشتە چىنىدىكى خۇدانىڭ غەزىپىنى قۇياشنىڭ يۈزىگە تۆكتى. شۇنىڭ بىلەن قۇياش ئىنسانلارنى ئوتتەك قىزىقى بىلەن كۆيدۈرىدىغان بولدى. ⁹ئىنسانلار دەھشەتلىك ئىسسىقتا ئۆرتەندى. بىراق ئۇلار توۋا قىلىش ۋە بۇ بالايىئاپەتلەرنى كەلتۈرۈش قۇدرىتىگە ئىگە بولغان خۇداغا ھەمدۇسانالار ئوقۇشنىڭ ئورنىغا ئۇنى قارغاشتى.

¹⁰بەشىنچى پەرىشتە چىنىدىكى خۇدانىڭ غەزىپىنى دىۋىنىڭ تەختىگە تۆكتى. دىۋىنىڭ پادىشاھلىقىنى قاراڭغۇلۇق باستى. ئىنسانلار ئازابتىن تىللىرىنى چىشلىدى. ¹¹ئۇلار يارىلىرىنىڭ ئاغرىق ئازابىدىن ئەرشتىكى خۇدانى قارغاشتى. ئۇلار قىلمىشلىرىغا توۋا قىلىشنى خالىمىدى.

¹²ئالتىنچى پەرىشتە چىنىدىكى خۇدانىڭ غەزىپىنى ئۇلۇغ فىرات دەرياسىغا تۆكتى. شۇ ھامان دەريانىڭ سۈيى قۇرۇدى. شۇنىڭ بىلەن كۈنچىقىشتىن كېلىدىغان پادىشاھلارنىڭ يولى ئېچىلدى. ¹³شۇنىڭدىن كېيىن ئەجدىھانىڭ، دىۋىنىڭ ۋە ساختا پەيغەمبەرنىڭ ئېغىزلىرىدىن چىققان پاقىغا ئوخشايدىغان ئۈچ يامان روھنى كۆردۈم. ¹⁴بۇلار كارامەت كۆرسىتىدىغان جىنلارنىڭ روھلىرى بولۇپ، پۈتۈن دۇنيادىكى پادىشاھلارنى ھەممىگە قادىر خۇدانىڭ ئۇلۇغ كۈنىدە بولىدىغان جەڭگە توپلاشقا كېتىۋاتاتتى.

¹⁵ئەيسا مەسىھ مۇنداق دېدى: «دىققەتلىك بولۇڭلار، ئوغرى كەلگەندەك كۈتۈلمىگەن ۋاقىتتا كېلىمەن. يالىڭاچ قېلىپ، نومۇستا قالماسلىقى ئۈچۈن، كىيىملىرىنى يېنىغا قويۇپ، سەگەك ياتقانلار نەقەدەر بەختلىك-ھە!»

¹⁶ئۈچ يامان روھ پادىشاھلارنى ئىبرانىيچە «ئارماگېدون» دېيىلىدىغان يەرگە توپلىدى.

¹⁷يەتتىنچى پەرىشتە چىنىدىكى خۇدانىڭ غەزىپىنى ھاۋاغا تۆكتى. ئەرشتىكى ئىبادەتخانىنىڭ تەختىدىن كۆتۈرۈلگەن يۇقىرى بىر ئاۋاز: «ئىش تامام!» دېدى. ¹⁸شۇ ئەسنادا چاقماقلار چېقىلدى، گۈلدۈرمامىنىڭ گۈلدۈر-قاراسلىرى ئاڭلاندى. يەر-زېمىن شۇنچىلىك قاتتىق تەۋرىدىكى، ئىنسانلار يارىتىلغاندىن بېرى يەر-زېمىن بۇنداق قاتتىق تەۋرەپ باقمىغانىدى. ¹⁹كاتتا شەھەر بابىل ئۈچكە بۆلۈندى. ھەرقايسى ئەللەردىكى شەھەرلەرمۇ يەر بىلەن يەكسان بولدى. كاتتا شەھەر بابىلدىن ھېساب ئېلىنىش ئۈچۈن خۇدانىڭ قاتتىق غەزىپى تولغان قەدەھ ئۇنىڭغا بېرىلدى. ²⁰پۈتۈن ئاراللار غايىب بولدى، تاغلار يوقالدى. ²¹ئاسماندىن ئىنسانلارنىڭ ئۈستىگە ھەربىر دانىسى 45 كىلو كېلىدىغان مۆلدۈر ياغدى. بۇ مۆلدۈر ئاپىتى شۇنداق قورقۇنچلۇق بولدىكى، ئىنسانلار بۇ بالايىئاپەتنىڭ دەستىدىن خۇدانى قارغاشتى.

17

داڭلىق پاھىشە

¹يەتتە چىنىگە ئىگە بولغان يەتتە پەرىشتىنىڭ بىرى كېلىپ، ماڭا:

_ بۇ يەرگە كەل، نۇرغۇنلىغان ئېقىنلارنىڭ بويىدا ئولتۇرغان داڭقى چىققان پاھىشە ئايالنىڭ تارتىدىغان جازاسىنى ساڭا كۆرسىتىپ قوياي. ²دۇنيانىڭ پادىشاھلىرى ئۇنىڭ بىلەن زىنا قىلىشتى، يەر يۈزىدە ياشايدىغانلار ئۇنىڭ زىناسىنىڭ شارابىدىن مەست بولۇشتى، _ دېدى.

³ئۇنىڭدىن كېيىن پەرىشتە مېنى بىر چۆلگە ئېلىپ كەتتى. بۇ چاغدا مۇقەددەس روھ مېنى ئۆز ئىلكىگە ئالدى. ئۇ يەردە يەتتە باشلىق، ئون مۈڭگۈزلۈك، پۈتۈن بەدىنىنى كۇپۇر ئىسىملار قاپلىغان بىر توق قىزىل دىۋىنىڭ ئۈستىدە ئولتۇرغان بىر ئايالنى كۆردۈم. ⁴ئايال سۆسۈن ۋە توق قىزىل رەڭلىك كىيىم كىيگەن بولۇپ، ئالتۇن، گۆھەر ۋە ئۈنچە-مەرۋايىتلار بىلەن بېزەلگەنىدى. قولىدا يىرگىنچلىك نەرسىلەر ۋە ئۆز زىناسىنىڭ مەينەتچىلىكلىرى بىلەن تولغان بىر ئالتۇن قەدەھ بار ئىدى. ⁵پېشانىسىگە «كاتتا بابىل، يەنى پاھىشىلەرنىڭ ۋە دۇنيادىكى پۈتكۈل يىرگىنچلىكلەرنىڭ ئانىسى» دېگەن بىر سىرلىق ئىسىم يېزىلغانىدى. ⁶مەن ئايالنىڭ خۇدانىڭ مۇقەددەس خەلقىنىڭ، يەنى ئەيسا ھەققىدە گۇۋاھلىق بېرىپ قۇربان بولغانلارنىڭ قېنى بىلەن مەست بولغانلىقىنى كۆردۈم. ئۇنى كۆرۈپ ئىنتايىن ھەيران بولدۇم. ⁷پەرىشتە ماڭا مۇنداق دېدى:

_ نېمىگە ھەيران بولۇۋاتىسەن؟ ئايالنىڭ ۋە ئۇ مىنىپ تۇرغان يەتتە باشلىق، ئون مۈڭگۈزلۈك دىۋىنىڭ سىرىنى ساڭا ئېيتىپ بېرەي. ⁸سەن كۆرگەن دىۋە بىر زامانلاردا بار ئىدى، ھازىر يوق. ئۇ كېيىن تېگى يوق ھاڭدىن چىقىپ، ھالاكەتكە يۈزلىنىدۇ. يەر يۈزىدە ياشايدىغان، ئەمما دۇنيا يارىتىلغاندىن بۇيان نامى ھاياتلىق دەپتىرىگە پۈتۈلمىگەن كىشىلەر دىۋىنى كۆرۈپ ئىنتايىن ھەيران قالىدۇ. چۈنكى ئۇ بىر زامانلاردا بار ئىدى، ھازىر يوق، لېكىن يەنە پەيدا بولىدۇ.

⁹بۇنى چۈشىنىش ئۈچۈن ئەقىل-پاراسەت كېرەك. ئۇ ئايال ئولتۇرغان دىۋىنىڭ يەتتە بېشى يەتتە تاغقا، يەنى يەتتە پادىشاھقا ۋەكىللىك قىلىدۇ. ¹⁰يەتتە پادىشاھنىڭ بەشى بۇرۇن ئاغدۇرۇلغاندۇر، بىرى ھازىر بار، يەنە بىرى تېخى دۇنياغا كەلمىدى. ئۇ كەلگەندە ئازلا ۋاقىت پادىشاھ بولۇپ تۇرالايدۇ. ¹¹بۇرۇن بولغان، لېكىن ھازىر بولمىغان دىۋىنىڭ ئۆزى سەككىزىنچى پادىشاھتۇر. لېكىن ئۇ يەتتە پادىشاھ قاتارىدا ھالاكەتكە يۈزلىنىدۇ.

¹²سەن كۆرگەن دىۋىنىڭ ئون مۈڭگۈزى تېخى ھۆكۈم سۈرمىگەن ئون پادىشاھنى كۆرسىتىدۇ. لېكىن بۇلارغا دىۋە بىلەن بىرگە بىر سائەتلىك پادىشاھلىق ھوقۇقى بېرىلىدۇ. ¹³بۇ پادىشاھلار ئۆز قۇدرىتى ۋە ھوقۇقلىرىنى بىر نىيەت، بىر مەقسەتتە دىۋىگە بېرىشىدۇ. ¹⁴دىۋە ۋە پادىشاھلار بىرلىشىپ قوزىغا قارشى جەڭ قىلىدۇ. قوزا غەلىبە قىلىدۇ، چۈنكى قوزا رەبلەرنىڭ رەببى، پادىشاھلارنىڭ پادىشاھىدۇر. ئۇنىڭ بىلەن بىر سەپتە تۇرغانلار چاقىرىلغان، تاللانغان ۋە ئۇنىڭغا سادىق بولغانلاردۇر.

¹⁵پەرىشتە ماڭا يەنە مۇنداق دېدى:

_ سەن پاھىشە ئايالنىڭ ئېقىن بويىدا ئولتۇرغىنىنى كۆردۈڭ. سەن كۆرگەن ئۇ ئېقىن بولسا خەلقلەر، قوۋملار، ئەللەر ۋە ھەر خىل تىللاردا سۆزلىشىدىغان كىشىلەرنى كۆرسىتىدۇ. ¹⁶سەن كۆرگەن دىۋە ۋە ئون مۈڭگۈز بۇ پاھىشە ئايالدىن نەپرەتلىنىدۇ، ئۇنى تالان-تاراج قىلىپ يالىڭاچلاپ قويىدۇ، گۆشىنى يەيدۇ ۋە ئوتتا كۆيدۈرىدۇ. ¹⁷خۇدا ئاشۇ ئون پادىشاھنىڭ قەلبىنى ئەسىر قىلىپ، ئۆزىنىڭ مەقسەتلىرىنى ئەمەلگە ئاشۇرىدۇ. شۇنىڭ بىلەن بۇ پادىشاھلار خۇدانىڭ سۆزلىرى ئەمەلگە ئاشقۇچە ھۆكۈمرانلىق ھوقۇقىنى دىۋىگە ئۆتۈنۈپ بېرىشكە بىرلىككە كېلىدۇ. ¹⁸سەن كۆرگەن ئايال دۇنيانىڭ پادىشاھلىرى ئۈستىدىن ھۆكۈمرانلىق قىلىدىغان كاتتا شەھەر بابىلدۇر.

18

بابىلنىڭ گۇمران بولۇشى

¹ئۇنىڭدىن كېيىن چوڭ ھوقۇقلۇق يەنە بىر پەرىشتىنىڭ ئەرشتىن چۈشۈۋاتقانلىقىنى كۆردۈم. يەر يۈزى ئۇنىڭ پارلاق نۇرى بىلەن يورۇدى. ²پەرىشتە قاتتىق ئاۋاز بىلەن مۇنداق ۋارقىرىدى:

«گۇمران بولدى، كاتتا شەھەر بابىل گۇمران بولدى!

ئەمدى ئۇ جىنلارنىڭ ماكانى،

ھەر خىل يامان روھلارنىڭ ئۇۋىسى،

ھەر خىل ئىپلاس ۋە يىرگىنچلىك قۇشلارنىڭ چاڭگىسىدۇر.

³چۈنكى ئىچىشتى ھەرقايسى خەلقلەر

ئۇنىڭ جىنسىي ئەخلاقسىزلىقىنىڭ كۈچلۈك شارابىدىن.

زىنا قىلىشتى ئۇنىڭ بىلەن دۇنيانىڭ پادىشاھلىرى،

بېيىشتى دۇنيانىڭ سودىگەرلىرى

ئۇنىڭ زىيادە بايلىقىدىن.»

⁴ئاسماندىن يەنە بىر ئاۋازنى ئاڭلىدىم:

«ئەي خەلقىم، ئۇ يەردىن چىقىڭلار!

بولمىسا شېرىك بولىسىلەر ئۇ شەھەرنىڭ گۇناھلىرىغا،

ئۇچرايسىلەر ئۇنىڭ بېشىغا چۈشىدىغان بالايىئاپەتلەرگە.

⁵چۈنكى پەلەككە يەتتى ئۇنىڭ قاتمۇقات گۇناھلىرى،

خۇدانىڭ يادىغا يەتتى ئۇنىڭ رەزىل قىلمىشلىرى.

⁶ياندۇرۇڭلار مۇۋاپىق ئۇنىڭ سىلەرگە قىلغانلىرىغا،

قوشلاپ قايتۇرۇڭلار ئۇنىڭ قىلمىشلىرىغا.

سۇنۇڭلار ئىككى ھەسسە تولدۇرۇپ،

ئۇنىڭ شاراب بەرگەن قەدىھىنى.

⁷ئۇ ئەيش-ئىشرەت بىلەن ياشىغان بولسا قانداق،

بېرىڭلار ئۇنىڭغا ئازاب ۋە ئەلەمنى شۇنداق.

چۈنكى ئۇ ماختىنىپ دەيدۇ ئۆز كۆڭلىدە:

‹ئولتۇرىمەن خانىشتەك تەختتە،

تۇل ئەمەسمەن، تۇتماسمەن ئەسلا ماتەم!›

⁸بۇ ۋەجىدىن ئۇنىڭ بېشىغا كېلىدىغان بالايىئاپەت،

يەنى ئۆلۈم، ئاچارچىلىق ۋە ماتەم

كېلىدۇ بىر كۈن ئىچىدە ھەممىسى.

ئۆرتىلىدۇ ئۇ ئوت ئىچىدە.

چۈنكى سوراق قىلىدۇ ئۇنى

قۇدرەتلىك پەرۋەردىگار خۇدا!»

⁹ئۇنىڭ بىلەن زىنا قىلغان ۋە ئەيش-ئىشرەتتە ياشىغان دۇنيانىڭ پادىشاھلىرى ئۇنى كۆيدۈرگەن ئوتنىڭ ئىس-تۈتەكلىرىنى كۆرگەندە، ئۇنىڭ ھالىغا ئېچىنىپ يىغا-زار قىلىشىدۇ. ¹⁰ئۇنىڭ تارتىۋاتقان ئازابىدىن قورقۇپ، يىراقتا تۇرۇپ مۇنداق دەيدۇ:

«ئىسىت، ئىسىت، كاتتا شەھەر!

ئاھ بابىل، كۈچلۈك شەھەر!

تارتىلدىڭ جازاغا، بىر سائەت ئىچىدىلا!»

¹¹دۇنيادىكى سودىگەرلەرمۇ ئۇنىڭ ھالىغا ئېچىنىپ يىغا-زار قىلىشىدۇ. چۈنكى ئەمدى ئۇلارنىڭ ماللىرىنى، ¹²يەنى ئالتۇن، كۈمۈش، گۆھەر، ئۈنچە-مەرۋايىت، ئېسىل زىغىر رەخت، سۆسۈن تاۋار-دۇردۇن، يىپەك، توق قىزىل رەڭلىك گەزمال، ھەر تۈرلۈك خۇشبۇي ياغاچلار، پىل چىشى، ئەڭ ئېسىل ياغاچ، تۇچ، تۆمۈر ۋە مەرمەرلەردىن ئىشلەنگەن خىلمۇخىل بۇيۇملار، ¹³شۇنىڭدەك قوۋزاقدارچىن، دورا-دەرمەك، ئىسرىق، مۇرمەككى، مەستىكى رۇمى، شاراب، زەيتۇن يېغى، سۈپەتلىك ئۇن، بۇغداي، كالا، قوي، ئات، ھارۋا ۋە قۇللىرىنى، يەنى ئادەملىرىنى سېتىۋالىدىغان كىشى يوقتۇر. ¹⁴بۇ سودىگەرلەر بابىلغا:

«سەن مەستانە بولغان ئېسىل نەرسىلەر سەندىن كەتتى،

پۈتۈن ئېسىل مال-دۇنيالىرىڭ غايىب بولدى.

سەن ئۇلارنى ئەمدى تاپالماسسەن» دەيدۇ.

¹⁵بابىلدا بۇ ماللارنى سېتىپ بېيىغان سودىگەرلەر شەھەرنىڭ تارتىۋاتقان ئازاب-ئوقۇبەتلىرىدىن قورقۇپ، يىراقتا تۇرۇپ، ئۇنىڭ ھالىغا ئېچىنىپ يىغا-زار قىلىشىپ مۇنداق دەيدۇ:

¹⁶«ئىسىت، ئىسىت كاتتا شەھەر!

ئورالغانىدىڭ ئېسىل زىغىر رەختلەرگە، سۆسۈن ۋە توق قىزىل رەڭلىك گەزماللارغا،

كۆمۈلگەنىدىڭ ئالتۇن، گۆھەر ۋە ئۈنچە-مەرۋايىتلارغا!

¹⁷بەربات بولدۇڭ شۇنچە كاتتا بايلىقلار بىلەن بىر سائەت ئىچىدىلا.»

كېمە باشلىقلىرى، كېمىدىكى يولۇچىلار، كېمىچىلەر ۋە دېڭىزغا تايىنىپ جان باقىدىغانلار يىراقتا تۇرۇپ، ¹⁸ئۇنى كۆيدۈرگەن ئوتنىڭ ئىس-تۈتەكلىرىنى كۆرۈپ: «بۇ كاتتا شەھەرگە تەڭ كېلىدىغان يەنە بىر شەھەر بارمۇ؟» دەپ پەرياد قىلىشىدۇ. ¹⁹ئۇلار باشلىرىغا توپا تۆكۈشۈپ، ماتەم تۇتۇپ، ھەسرەت بىلەن ئۈن سېلىپ مۇنداق دەپ يىغلىشىدۇ:

«ئىسىت، ئىسىت، كاتتا شەھەر!

بېيىغانىدى ئۇنىڭ بايلىقىدىن كېمىسى بارلار دېڭىزدا،

ھالبۇكى ۋەيران بولدى شەھەر بىر سائەت ئىچىدىلا!»

²⁰«ئەي ئەرش، ئەي خۇدانىڭ مۇقەددەس خەلقى، ئەلچىلەر ۋە پەيغەمبەرلەر،

خۇش بولۇڭلار ئۇنىڭ بېشىغا كەلگەنلەردىن!

چۈنكى خۇدا جازالاپ ئۇنى،

ئېلىپ بەردى سىلەرنىڭ دەردىڭلارنى.»

²¹ئاندىن كۈچلۈك بىر پەرىشتە تۈگمەن تېشىغا ئوخشاش يوغان بىر تاشنى كۆتۈرۈپ، دېڭىزغا تاشلاپ مۇنداق دېدى:

«تاشلىنىدۇ مانا شۇنداق شىددەت بىلەن كاتتا شەھەر بابىل،

كۆرۈنمەيدۇ قايتا.

²²ئەمدى ئاڭلانمايدۇ سەندە

چىلتارچىنىڭ، ناخشىچىنىڭ، نەيچىنىڭ، كانايچىنىڭ ئاۋازى.

ئەمدى تېپىلمايدۇ سەندە ھېچقانداق قول ھۈنەرۋەن.

ئەمدى ئاڭلانمايدۇ سەندە ئاۋازى تۈگمەنچىنىڭ.

²³ئەمدى پارلىمايدۇ چىراغ يورۇقى سەندە،

ئاڭلانمايدۇ ئەمدى سەندە توي قىلغان قىز-يىگىتلەرنىڭ خۇشال ئاۋازلىرى.

دۇنيانىڭ ئەڭ مەرتىۋىلىك كىشىلىرى ئىدى سېنىڭ سودىگەرلىرىڭ،

سېنىڭ سېھىرىڭ بىلەن ئازدى پۈتۈن خەلقىئالەم.

²⁴تۆكۈلدى سەندە قانلىرى

پەيغەمبەرلەرنىڭ، خۇدانىڭ مۇقەددەس خەلقىنىڭ، يەر يۈزىدە قىرغىن بولغانلارنىڭ.»

19

ئەرشتىكى ھەمدۇسانالار

¹شۇنىڭدىن كېيىن ئەرشتىكى نۇرغۇن كىشىلەرنىڭ ۋارقىراشقىنىدەك بىر ئاۋازنى ئاڭلىدىم. ئۇلار:

«پەرۋەردىگارغا ھەمدۇسانالار بولسۇن!

نىجاتلىق، ئۇلۇغلۇق ۋە قۇدرەت خۇدايىمىزغا مەنسۇپتۇر.

²چۈنكى ئۇنىڭ ھۆكۈملىرى ھەق ۋە ئادىلدۇر.

ئۇ يەر يۈزىنى زىنا قىلىپ بۇلغىغان داڭلىق پاھىشىنى سوراققا تارتىپ،

ئۆز خىزمەتكارلىرىنىڭ قانلىق قىساسىنى ئالدى» دېيىشەتتى.

³ئۇلار يەنە:

«پەرۋەردىگارغا ھەمدۇسانالار بولسۇن!

پاھىشىنى كۆيدۈرگەن ئوتنىڭ ئىس-تۈتەكلىرى

مەڭگۈ پۇرقىرايدۇ!» دېيىشتى.

⁴يىگىرمە تۆت يېتەكچى ۋە تۆت تىرىك مەخلۇق يەرگە باش قويۇپ: «ئامىن، پەرۋەردىگارغا ھەمدۇسانالار بولسۇن» دەپ، تەختتە ئولتۇرغان خۇداغا سەجدە قىلىشتى.

⁵ئۇنىڭدىن كېيىن تەختتىن مۇنداق دېگەن بىر ئاۋاز كەلدى:

«ئەي خۇدانىڭ پۈتكۈل خىزمەتكارلىرى،

ئەي خۇدادىن ئەيمىنىدىغان ئۇنىڭ پۈتكۈل چوڭ كىچىك خىزمەتكارلىرى، ئۇنى مەدھىيەلەڭلار!»

قوزىنىڭ توي زىياپىتى

⁶ئاندىن نۇرغۇن كىشىلەرنىڭ ئاۋازىغا، سۇلارنىڭ شارقىرىشىغا ۋە گۈلدۈرمامىنىڭ قاتتىق گۈلدۈرلىشىگە ئوخشايدىغان بىر ئاۋازىنى ئاڭلىدىم. ئۇلار:

«پەرۋەردىگارغا ھەمدۇسانالار بولسۇن! ھەممىگە قادىر پەرۋەردىگارىمىز خۇدا ھۆكۈمراندۇر.

⁷شاد-خۇراملىق بىلەن تەنتەنە قىلايلى!

ئۇنى ئۇلۇغلاپ مەدھىيەلەيلى!

چۈنكى قوزىنىڭ توي كۈنى يېتىپ كەلدى،

قىز ئۆزىنى تەييار قىلدى.

⁸ئۇنىڭ كىيىشى ئۈچۈن يالتىراپ تۇرىدىغان ئېسىل زىغىر رەختتىن تىكىلگەن پاكىز تون بېرىلدى» دەپ ۋارقىراشتى.

(ئېسىل زىغىر رەخت خۇدانىڭ مۇقەددەس خەلقىنىڭ خەيرلىك ئىشلىرىغا ۋەكىللىك قىلىدۇ.)

⁹ئاندىن پەرىشتە ماڭا:

_ بۇ سۆزلەرنى خاتىرىلىۋال: «قوزىنىڭ توي زىياپىتىگە تەكلىپ قىلىنغانلار نەقەدەر بەختلىك-ھە!» _ دېدى. ئۇ ماڭا يەنە:

_ بۇلار خۇدانىڭ ھەقىقىي سۆزلىرىدۇر، _ دېدى.

¹⁰ئۇنىڭغا سەجدە قىلىش ئۈچۈن ئايىغىغا باش قويدۇم. لېكىن ئۇ:

_ ھەرگىز بۇنداق قىلما! مەنمۇ ساڭا ئوخشاش ۋە ئەيسا ھەققىدە گۇۋاھلىق بەرگەن قېرىنداشلىرىڭغا ئوخشاش خۇدانىڭ خىزمەتكارىمەن. خۇداغا سەجدە قىل! چۈنكى خۇدانىڭ ۋەھىيسىنىڭ ماھايىتى ئەيسا مەسىھ ھەققىدە گۇۋاھلىق بېرىشتىن ئىبارەتتۇر، _ دېدى.

ئاق ئاتقا مىنگۈچى

¹¹ئۇنىڭدىن كېيىن ئاسماننىڭ ئېچىلغانلىقىنى ۋە ئۇ يەردە بىر ئاق ئاتنىڭ تۇرغانلىقىنى كۆردۈم. ئاتنىڭ ئۈستىدە بىرسى بولۇپ، ئۇ «ئىشەنچلىك» ۋە «ھەق» دەپ ئاتىلاتتى. ئۇ ئادالەتكە تايىنىپ ھۆكۈم قىلاتتى ۋە جەڭ قىلاتتى. ¹²ئۇنىڭ كۆزلىرى يالقۇنلاپ تۇرغان ئوتقا ئوخشايتتى. ئۇنىڭ بېشىدا نۇرغۇن تاجى بار بولۇپ، بەدىنىگە ئۆزىدىن باشقا ھېچكىم بىلمەيدىغان بىر ئىسىم يېزىلغانىدى. ¹³ئۇ ئۇچىسىغا قانغا مىلەنگەن تون كىيگەن بولۇپ، ئاتاق ئىسمى «خۇدانىڭ كالامى» ئىدى. ¹⁴ئېسىل زىغىر رەختتىن تىكىلگەن پاك ۋە ئاپئاق تون كىيگەن ئەرشتىكى قوشۇنلار ئاق ئاتلارغا مىنىپ، ئۇنىڭ كەينىدىن ئەگىشىپ كېلىۋاتاتتى. ¹⁵ئۇنىڭ ئاغزىدىن ئۆتكۈر بىر قىلىچ چىقىپ تۇرغان بولۇپ، ئۇ بۇ قىلىچ بىلەن ھەرقايسى ئەللەرگە زەربە بېرىدۇ. ئۇ خەلقلەرنى تۆمۈر كالتەك بىلەن باشقۇرىدۇ. ئۇ خۇداغا قارشى تۇرغۇچىلارنى خۇددى ئۈزۈم ئېزىش كۆلچىكىدە ئۈزۈم ئەزگەندەك، ھەممىگە قادىر خۇدانىڭ ئوتلۇق غەزىپى بىلەن ئېزىدۇ. ¹⁶ئۇنىڭ تونىغا ۋە يوتىسىغا «پادىشاھلارنىڭ پادىشاھى ۋە رەبلەرنىڭ رەببى» دېگەن ئاتاق ئىسمى يېزىلغانىدى.

¹⁷ئاندىن قۇياشنىڭ ئىچىدە تۇرغان بىر پەرىشتىنى كۆردۈم. ئۇ ئاسماننىڭ قەرىدە ئۇچۇۋاتقان بارلىق قۇشلارغا يۇقىرى ئاۋاز بىلەن: «كېلىڭلار، خۇدانىڭ كاتتا زىياپىتىگە يىغىلىڭلار! ¹⁸پادىشاھلارنىڭ، سەردارلارنىڭ ۋە ھوقۇقدارلارنىڭ، شۇنداقلا ئاتلارنىڭ ۋە چەۋەندازلارنىڭ، قۇللارنىڭ ۋە ھۆرلەرنىڭ، كاتتىلارنىڭ ۋە ئەرزىمەسلەرنىڭ گۆشلىرىنى يەڭلار!» دېدى.

¹⁹ئۇنىڭدىن كېيىن دىۋىنىڭ، دۇنيادىكى پادىشاھلارنىڭ ۋە ئۇلارنىڭ لەشكەرلىرىنىڭ ئات مىنگۈچى ۋە ئۇنىڭ قوشۇنى بىلەن جەڭ قىلىش ئۈچۈن جەم بولغانلىقىنى كۆردۈم. ²⁰دىۋە ۋە ئۇنىڭغا ۋاكالىتەن مۆجىزىلەر كۆرسەتكەن ساختا پەيغەمبەر تۇتۇلدى. ساختا پەيغەمبەر مۆجىزىلىرى ئارقىلىق تېنىدە دىۋىنىڭ بەلگىسى بولغانلارنى، ھەمدە دىۋىنىڭ بۇتىغا چوقۇنىدىغانلارنى ئازدۇرۇپ يۈرگەنىدى. ئۇلارنىڭ ھەر ئىككىلىسى گۈڭگۈرت يېنىۋاتقان ئوت كۆلىگە تىرىك تاشلاندى. ²¹ئۇلارنىڭ لەشكەرلىرى ئاتقا مىنگۈچىنىڭ ئاغزىدىن چىققان قىلىچ بىلەن چېپىلدى. پۈتۈن ئۇچار قاناتلار بۇلارنىڭ گۆشىنى يەپ تويدى.

20

مىڭ يىل

¹ئۇنىڭدىن كېيىن قولىدا تېگى يوق ھاڭنىڭ ئاچقۇچىنى ۋە يوغان بىر كىشەننى تۇتقان بىر پەرىشتىنىڭ ئەرشتىن چۈشۈۋاتقانلىقىنى كۆردۈم. ²بۇ پەرىشتە ئەجدىھانى، يەنى ئىبلىس ياكى شەيتان دېيىلگەن ھېلىقى قەدىمىي يىلاننى تۇتۇپ، مىڭ يىللىق كىشەنلىدى. ³ھەرقايسى خەلقلەرنىڭ مىڭ يىل توشقۇچە قايتا ئازدۇرۇلماسلىقى ئۈچۈن ئۇنى تېگى يوق ھاڭغا تاشلىدى. ئاندىن ھاڭنىڭ ئاغزىنى يېپىپ پېچەتلىدى. مىڭ يىل توشقاندىن كېيىن، ئەجدىھا چوقۇم ۋاقىتلىق قويۇپ بېرىلىدۇ.

⁴ئاندىن تەختلەرنى ۋە ئۇلاردا ئولتۇرغانلارنى كۆردۈم. ئۇلارغا ھۆكۈم قىلىش ھوقۇقى بېرىلگەنىدى. ئۇنىڭدىن باشقا، ئەيسا ھەققىدە گۇۋاھلىق بەرگەنلىكى ۋە خۇدانىڭ سۆزىنى يەتكۈزگەنلىكى ئۈچۈن كاللىسى ئېلىنغانلارنىڭ جانلىرىنىمۇ كۆردۈم. ئۇلار دىۋىگە ۋە ئۇنىڭ بۇتىغا چوقۇنمىغانلار، شۇنداقلا دىۋىنىڭ بەلگىسى پېشانىسىگە ۋە قوللىرىغا ئۇرۇلمىغانلار ئىدى. ئۇلارنىڭ ھەممىسى تىرىلىپ، مەسىھ بىلەن بىرلىكتە مىڭ يىل ھۆكۈم سۈردى. ⁵بۇ دەسلەپكى تىرىلىش ئىدى. ئۆلۈكلەرنىڭ قالغانلىرى مىڭ يىل توشمىغۇچە تىرىلمەيتتى. ⁶دەسلەپكى تىرىلىشتىن بەھرىمەن بولغانلار خۇداغا ئاتالغانلاردۇر ھەم ئۇلار بەختلىكتۇر. ئىككىنچى ئۆلۈمنىڭ بۇلارنى ئىلكىگە ئېلىش ھوقۇقى يوقتۇر. ئۇلار خۇدانىڭ ۋە مەسىھنىڭ روھانىيلىرى بولىدۇ ۋە مەسىھ بىلەن بىرلىكتە مىڭ يىل ھۆكۈم سۈرىدۇ.

شەيتاننىڭ مەغلۇپ بولۇشى

⁷مىڭ يىل توشقاندا، شەيتان زىنداندىن قويۇپ بېرىلىدۇ. ⁸ئۇ يەر يۈزىنىڭ تۆت بۇلۇڭىدىكى خەلقلەرنى، يەنى گوگ بىلەن ماگوگنى^* ئازدۇرۇش ۋە ئۇلارنى جەڭ قىلدۇرۇش ئۈچۈن بىر يەرگە توپلايدۇ. توپلانغانلارنىڭ سانى دېڭىز ساھىلىدىكى قۇمدەك ساناقسىزدۇر. ⁹ئۇلار پۈتۈن يەر يۈزىنى كېزىپ، خۇدانىڭ مۇقەددەس خەلقىنىڭ بارگاھىنى، يەنى خۇدا سۆيىدىغان شەھەرنى قورشاۋغا ئالىدۇ. لېكىن ئاسماندىن ئوت يېغىپ، ئۇلارنى كۈل قىلىدۇ. ¹⁰ئۇلارنى ئازدۇرغان ئىبلىس ئوت ۋە گۈڭگۈرت كۆلىگە تاشلاندى. دىۋە بىلەن ساختا پەيغەمبەرمۇ شۇ كۆلگە تاشلانغانىدى. ئۇلار ئۇ يەردە كېچە-كۈندۈز مەڭگۈ ئازابلىنىدۇ.

ئاخىرقى ھۆكۈم

¹¹ئۇنىڭدىن كېيىن چوڭ بىر ئاق تەختنى ۋە ئۇنىڭدا ئولتۇرغۇچىنى كۆردۈم. ئاسمان بىلەن زېمىن ئۇنىڭ ئالدىدىن قېچىپ، غايىب بولدى. ¹²مەن يەنە ئۆلۈكلەرنى كۆردۈم. ئۇلار كاتتا ياكى ئەرزىمەس بولسۇن، ھەممىسى تەختنىڭ ئالدىدا تۇراتتى. تىزىم دەپتەرلىرى ئېچىلدى. «ھاياتلىق دەپتىرى» دېيىلگەن يەنە بىر دەپتەرمۇ ئېچىلدى. ئۆلۈكلەر تىزىم دەپتەرلىرىگە خاتىرىلەنگەن ئەمەللىرى بويىچە ھۆكۈم قىلىندى. ¹³دېڭىز ئۆزىنىڭ قوينىدىكى ئۆلۈكلەرنى، شۇنداقلا ئۆلۈم ۋە ئۆلۈكلەر ماكانىمۇ ئۆزلىرىنىڭ قوينىدىكى ئۆلۈكلەرنى تاپشۇرۇشتى. ھەركىم ئۆزلىرىنىڭ ئەمەللىرىگە قاراپ ھۆكۈم قىلىندى. ¹⁴ئاندىن ئۆلۈم ۋە ئۆلۈكلەر ماكانى ئوت كۆلىگە تاشلاندى. مانا بۇ ئوت دېڭىزى ئىككىنچى ئۆلۈمدۇر. ¹⁵نامى ھاياتلىق دەپتىرىدە يېزىلمىغانلارنىڭ ھەممىسى ئوت كۆلىگە تاشلاندى.

21

يېڭى ئاسمان ۋە يېڭى زېمىن

¹ئاندىن يېڭى ئاسمان ۋە يېڭى زېمىننى كۆردۈم، چۈنكى بۇرۇنقى ئاسمان ۋە زېمىن غايىب بولغانىدى. دېڭىزمۇ يوقالغانىدى. ²مۇقەددەس شەھەرنىڭ، يەنى يېڭى يېرۇسالېمنىڭ ئەرشتىن خۇددى ئۆز يىگىتى ئۈچۈن پەردازلانغان قىزدەك چۈشۈۋاتقانلىقىنى كۆردۈم. ³تەختتىن كۆتۈرۈلگەن يۇقىرى بىر ئاۋازنىڭ مۇنداق دېگەنلىكىنى ئاڭلىدىم:

«مانا، خۇدانىڭ ماكانى ئىنسانلارنىڭ ئارىسىدىدۇر،

خۇدا ئۇلارنىڭ ئارىسىدا ياشايدۇ، ئۇلار خۇدانىڭ خەلقى بولىدۇ.

خۇدا ئۆزىمۇ ئۇلارنىڭ ئارىسىدا تۇرۇپ، ئۇلارنىڭ خۇداسى بولىدۇ،

⁴ئۇ ئۇلارنىڭ كۆزلىرىدىكى ھەربىر تامچە ياشلىرىنى ئېرتىدۇ.

ئەمدى ئۆلۈم ئەسلا بولمايدۇ،

نە ماتەم، نە يىغا-زار، نە قايغۇ-ئەلەم بولمايدۇ،

چۈنكى بۇرۇنقى ئالەم ئۆتۈپ كەتتى.»

⁵بۇ چاغدا تەختتە ئولتۇرغۇچى مۇنداق دېدى: «قارا، مەن ھەممىنى يېڭىلاۋاتىمەن!» ئۇ ماڭا يەنە: «بۇلارنى خاتىرىلىۋال، چۈنكى بۇ سۆزلەر ئىشەنچلىك ۋە راستتۇر» دېدى. ⁶ئۇ يەنە مۇنداق دېدى: «ئەمەلگە ئاشتى. باشلىنىش ۋە ئاخىرلىشىش، مۇقەددىمە ۋە خاتىمە ئۆزۈمدۇرمەن. ئۇسسىغانلارغا ھاياتلىق سۈيىنىڭ بۇلىقىدىن ھەقسىز سۇ بېرىمەن. ⁷غەلىبە قىلغۇچىلار ھەممىگە ۋارىس بولىدۇ. مەن ئۇلارنىڭ خۇداسى بولىمەن. ئۇلارمۇ مېنىڭ پەرزەنتلىرىم بولىدۇ. ⁸لېكىن قورقۇنچاق، ئېتىقادسىز، ئىپلاس، قاتىل، ٪٪ زىناخور ٪ بۇزۇق ٪ جىنسىي ئەخلاقسىز٪٪ ، سېھىرگەر، بۇتپەرەس ۋە يالغانچىلارنىڭ تەقدىرى گۈڭگۈرت بىلەن يانغان ئوت كۆلىدە بولىدۇ. مانا بۇ ئىككىنچى ئۆلۈمدۇر.»

يېڭى يېرۇسالېم

⁹ئاخىرقى يەتتە بالايىئاپەت بىلەن تولغان يەتتە چىنىنى تۇتقان يەتتە پەرىشتىدىن بىرى كېلىپ، ماڭا:

_ كەل، قوزىغا ھەمراھ بولىدىغان قىزنى ساڭا كۆرسىتىپ قوياي، _ دېدى.

¹⁰مۇقەددەس روھ مېنى ئۆز ئىلكىگە ئالدى. ئاندىن پەرىشتە مېنى چوڭ ۋە ئېگىز بىر تاغقا ئېلىپ چىقتى. ئۇ يەردە ماڭا مۇقەددەس شەھەر يېرۇسالېمنىڭ ئەرشتىن چۈشۈۋاتقانلىقىنى كۆرسەتتى. ¹¹شەھەر خۇدانىڭ ئۇلۇغلۇقى بىلەن تولغان بولۇپ، ئۇنىڭ جۇلاسى ئېسىل گۆھەرنىڭ، قىزىل ھېقىقتەك يالتىرىغان خىرۇستالنىڭ جۇلاسىغا ئوخشايتتى. ¹²شەھەرنىڭ قېلىن ھەم ئېگىز سېپىلى ۋە ئون ئىككى دەرۋازىسى بار ئىدى. ھەربىر دەرۋازىنى بىردىن پەرىشتە باقاتتى. ھەربىر دەرۋازىنىڭ ئۈستىگە ئىسرائىللارنىڭ ئون ئىككى قەبىلىسىدىن بىرىنىڭ ئىسمى يېزىلغانىدى. ¹³شەرقتە ئۈچ دەرۋازا، غەربتە ئۈچ دەرۋازا، جەنۇبتا ئۈچ دەرۋازا ۋە شىمالدا ئۈچ دەرۋازا بار ئىدى. ¹⁴شەھەرنى قورشاپ تۇرغان سېپىلنىڭ ئون ئىككى ئۇل تېشى بار بولۇپ، ئۇلارنىڭ ئۈستىگە قوزىنىڭ ئون ئىككى ئەلچىسىنىڭ ئىسىملىرى يېزىلغانىدى.

¹⁵ماڭا گەپ قىلغان پەرىشتىنىڭ قولىدا شەھەرنى، شەھەرنىڭ دەرۋازىلىرىنى ۋە سېپىلىنى ئۆلچەيدىغان بىر ئالتۇن ئۆلچىگۈچ بار ئىدى. ¹⁶شەھەر تۆت چاسا بولۇپ، ئۇزۇنلۇقى بىلەن كەڭلىكى ئوخشاش ئىدى. پەرىشتە شەھەرنى ئالتۇن ئۆلچىگۈچ بىلەن ئۆلچىدى. ھەربىر تەرىپى 2200 كىلومېتىر كەلدى. شەھەرنىڭ ئۇزۇنلۇقى، كەڭلىكى ۋە ئېگىزلىكى بىر-بىرىگە ئوخشاش ئىدى. ¹⁷پەرىشتە سېپىلنىمۇ ئۆلچىدى. سېپىلنىڭ قېلىنلىقى ئۇ ئىشلەتكەن ئىنسانلارنىڭ ئۆلچىگۈچى بويىچە يەتمىش مېتىر كەلدى. ¹⁸سېپىل قىزىل ھېقىقتىن، شەھەر ساپ ئالتۇندىن بىنا قىلىنغان بولۇپ، ئەينەكتەك سۈزۈك ئىدى. ¹⁹شەھەر سېپىلىنىڭ ئۇلى ھەر خىل گۆھەرلەر بىلەن بېزەلگەنىدى. بىرىنچى ئۇل تاش قىزىل ھېقىق، ئىككىنچى ئۇل تاش كۆك ياقۇت، ئۈچىنچى ئۇل تاش ھېقىق، تۆتىنچى ئۇل تاش زۇمرەت، ²⁰بەشىنچى ئۇل تاش يوللۇق ھېقىق، ئالتىنچى ئۇل تاش قىزىل كۋارتس، يەتتىنچى ئۇل تاش سېرىق ياقۇت، سەككىزىنچى ئۇل تاش دېڭىزدەك كۆك ياقۇت، توققۇزىنچى ئۇل تاش توپاز، ئونىنچى ئۇل تاش يېشىل كۋارتس، ئون بىرىنچى ئۇل تاش سۆسۈن ياقۇت ۋە ئون ئىككىنچى ئۇل تاش سۆسۈن كۋارتس بىلەن بېزەلگەنىدى. ²¹ئون ئىككى دەرۋازا ئون ئىككى مەرۋايىت ئىدى، يەنى دەرۋازىلارنىڭ ھەربىرى بىردىن مەرۋايىتتىن ياسالغانىدى. شەھەرنىڭ غول يولى ساپ ئالتۇندىن بولۇپ، ئەينەكتەك سۈزۈك ئىدى.

²²شەھەردە ھېچقانداق ئىبادەتخانا كۆرمىدىم، چۈنكى ھەممىگە قادىر پەرۋەردىگار خۇدا ۋە قوزا شەھەرنىڭ ئىبادەتخانىسى ئىكەن. ²³شەھەرنىڭ يورۇتۇلۇشى ئۈچۈن قۇياش ياكى ئاي ھاجەتسىز ئىكەن، خۇدانىڭ پارلاق نۇرى يورۇتىدىكەن. قوزا ئۇنىڭ چىرىغى ئىكەن. ²⁴خەلقلەر شەھەردىكى يورۇقلۇقتا ياشايدىكەن. دۇنيانىڭ پادىشاھلىرى ئۆزلىرىنىڭ بايلىقلىرى بىلەن ئۇ يەرگە كېلىدىكەن. ²⁵شەھەرنىڭ دەرۋازىلىرى كۈن بويى ئوچۇق تۇرىدىكەن، ھەرگىز تاقالمايدىكەن، چۈنكى ئۇ يەردە كېچە بولمايدىكەن. ²⁶ھەرقايسى خەلقلەر ئۆزلىرىنىڭ قىممەتلىك بايلىقلىرىنى ئۇ يەرگە شانۇشەۋكەت بىلەن ئېلىپ كېلىدىكەن. ²⁷ئۇ يەرگە ھەرقانداق ناپاك نەرسىلەر ۋە يىرگىنچلىك ئىشلارنى قىلىدىغان يالغانچى كىشىلەر كىرەلمەيدىكەن. پەقەت نامى قوزىنىڭ ھاياتلىق دەپتىرىگە يېزىلغانلارلا كىرەلەيدىكەن.

22

¹ئۇنىڭدىن كېيىن پەرىشتە ماڭا خۇدانىڭ ۋە قوزىنىڭ تەختىدىن باشلانغان ۋە خىرۇستالدەك سۈزۈك ھاياتلىق سۈيى ئېقىۋاتقان دەريانى كۆرسەتتى. ²شەھەرنىڭ غول يولىنىڭ ئوتتۇرىسىدا ئېقىۋاتقان بۇ دەريانىڭ ئىككى تەرىپىدە ئون ئىككى قېتىم مېۋىگە كىرىدىغان، يەنى ھەر ئايدا مېۋە بېرىدىغان ھاياتلىق دەرىخى بولۇپ، دەرەخنىڭ يوپۇرماقلىرى پۈتكۈل خەلقلەرگە شىپا ئىدى. ³بۇنىڭدىن كېيىن بۇ شەھەردە خۇدانىڭ قارغىشىغا قالىدىغان ئىش بولمايدۇ. خۇدانىڭ ۋە قوزىنىڭ تەختى شەھەرنىڭ ئىچىدە بولىدۇ، خۇدانىڭ خىزمەتكارلىرى ئۇ يەردە ئىبادەت قىلىدۇ. ⁴ئۇلار خۇدانىڭ جامالىنى كۆرىدۇ، خۇدانىڭ نامى ئۇلارنىڭ پېشانىلىرىگە يېزىلىدۇ. ⁵بۇ شەھەردە ئەسلا كېچە بولمايدۇ، نە چىراغ نۇرىغا، نە قۇياش نۇرىغا ھاجىتى چۈشمەيدۇ. چۈنكى پەرۋەردىگار خۇدا ئۇلارنىڭ يورۇقلۇقى بولۇپ، ئۇلار ئەبەدىلئەبەد ھۆكۈم سۈرىدۇ. ⁶پەرىشتە ماڭا:

_ بۇ سۆزلەر ئىشەنچلىك ۋە راستتۇر. پەيغەمبەرلەرگە ئىلھام بەرگەن پەرۋەردىگار خۇدا پەرىشتىسىنى ئەۋەتتى. ئۇ يېقىن كەلگۈسىدە يۈز بېرىشى مۇقەررەر بولغان ۋەقەلەرنى ئۆز خىزمەتكارلىرىغا كۆرسىتىدۇ، _ دېدى.

ئەيسا مەسىھنىڭ قايتىپ كېلىشى

⁷ئەيسا مەسىھ ماڭا مۇنداق دېدى:

_ ماڭا قارا، مەن پات يېقىندا كېلىمەن! بۇ يازمىدىكى بېشارەتلىك سۆزلەرگە ئەمەل قىلغانلار نەقەدەر بەختلىك-ھە!

⁸بۇ ئىشلارنى ئاڭلىغۇچى ۋە كۆرگۈچى مەن يۇھاننامەن. بۇ ئىشلارنى ئاڭلىغىنىمدا ۋە كۆرگىنىمدە، بۇ ئىشلارنى ماڭا كۆرسەتكەن پەرىشتىگە سەجدە قىلىش ئۈچۈن ئۇنىڭ ئايىغىغا باش قويدۇم. ⁹لېكىن ئۇ ماڭا:

_ ھەرگىز ئۇنداق قىلما! مەن ساڭا، پەيغەمبەر قېرىنداشلىرىڭغا ھەم بۇ يازمىدىكى سۆزلەرگە ئەمەل قىلغانلارغا ئوخشاش خۇدانىڭ خىزمەتكارىمەن. خۇداغا سەجدە قىل! _ دېدى. ¹⁰ئۇ ماڭا يەنە:

_ بۇ يازمىدىكى بېشارەتلىك سۆزلەرنى مەخپىي تۇتما، چۈنكى بۇ ئىشلار يېقىندا ئەمەلگە ئاشىدۇ. ¹¹يامانلىق قىلغۇچىلار يامانلىقىنى قىلىۋەرسۇن، پەسكەشلەر پەسكەشلىكىنى قىلىۋەرسۇن، ھەققانىيلار ھەققانىيلىقىنى داۋاملاشتۇرۇۋەرسۇن، خۇداغا ئاتىلىپ پاك بولغانلار پاكلىقتا ياشاۋەرسۇن، _ دېدى.

¹²ئەيسا مەسىھ ماڭا يەنە مۇنداق دېدى:

_ ماڭا قارا، مەن پات يېقىندا كېلىمەن! ھەركىمنىڭ قىلغان ئەمەللىرىگە قاراپ، بېرىدىغىنىمنى ئۆزۈم بىلەن بىرگە ئېلىپ كېلىمەن. ¹³باشلىنىش ۋە ئاخىرلىشىش، تۇنجىسى ۋە ئاخىرقىسى، مۇقەددىمە ۋە خاتىمە ئۆزۈمدۇرمەن.

¹⁴پەرىشتە سۆزىنى داۋاملاشتۇرۇپ مۇنداق دېدى:

_ ھاياتلىق دەرىخىنىڭ مېۋىلىرىدىن بەھرىمەن بولۇش ۋە شەھەر دەرۋازىلىرىدىن كىرىش ھوقۇقىغا ئېرىشىش ئۈچۈن تونلىرىنى يۇيۇپ تازىلىغانلار نەقەدەر بەختلىك-ھە! ¹⁵پەسكەشلەر، سېھىرگەرلەر، جىنسىي ئەخلاقسىزلار، قاتىللار، بۇتپەرەسلەر، سۆزى ۋە ھەرىكىتىدە يالغانچىلىق قىلىشقا خۇشتارلار شەھەرنىڭ سىرتىدا قالىدۇ.

¹⁶_ مەنكى ئەيسا مەسىھ ئېتىقادچىلار جامائەتلىرىگە بۇ ئىشلار ھەققىدە گۇۋاھلىق بېرىش ئۈچۈن پەرىشتەمنى ئەۋەتتىم. داۋۇتنىڭ نوتىسى ھەم ئەۋلادى مەن بولىمەن. پارلاق تاڭ يۇلتۇزى مەن بولىمەن، _ دېدى ئەيسا مەسىھ.

¹⁷مۇقەددەس روھ ۋە تويى بولىدىغان قىز:^* «كەل!» دەيدۇ. ئاڭلىغانلارمۇ: «كەل!» دېسۇن. ئۇسسىغانلار كەلسۇن، كىم خالىسا، شۇ ھەقسىز ھاياتلىق سۈيىدىن ئىچسۇن!

خاتىمە

¹⁸مەنكى يۇھاننا بۇ يازمىدىكى بېشارەتلىك سۆزلەرنى ئاڭلىغانلارنى جىددىي ئاگاھلاندۇرىمەنكى، كىمدىكىم بۇ سۆزلەرگە بىر نەرسە قوشسا، خۇدا ئۇنىڭغا بۇ يازمىدا يېزىلغان بالايىئاپەتلەرنى بېرىدۇ. ¹⁹كىمدىكىم بۇ بېشارەتلىك يازمىدىكى بىرەر سۆزنى چىقىرىۋەتسە، خۇدا ئۇنىڭ بۇ يازمىدا يېزىلغان ھاياتلىق دەرىخىدىكى ۋە مۇقەددەس شەھەردىكى نېسىۋىسىنى ئېلىپ تاشلايدۇ.

²⁰مانا بۇ ئىشلارغا گۇۋاھلىق بەرگۈچى ئەيسا مەسىھ مۇنداق دەيدۇ:

_ شۇنداق، پات يېقىندا كېلىمەن!

_ ئامىن، كەل، يا رەببىم ئەيسا!

²¹رەببىمىز ئەيسانىڭ مېھىر-شەپقىتى خۇدانىڭ مۇقەددەس خەلقىگە يار بولغاي، ئامىن!