ئۇيغۇرچە مۇقەددەس كىتاب جەمئىيىتى

كورىنتلىقلارغا يېزىلغان ئىككىنچى خەت

1

¹خۇدانىڭ ئىرادىسى بىلەن ئەيسا مەسىھنىڭ ئەلچىسى بولۇشقا چاقىرىلغان مەنكى پاۋلۇس ۋە قېرىندىشىمىز تىموتىيدىن كورىنت شەھىرىدىكى خۇداغا مەنسۇپ بولغان ئېتىقادچىلار جامائىتىگە، جۈملىدىن يۇنان ئۆلكىسىنىڭ ھەرقايسى جايلىرىدىكى خۇدانىڭ بارلىق مۇقەددەس خەلقىگە سالام. ²خۇدائاتىمىز ۋە رەببىمىز ئەيسا مەسىھ سىلەرگە مېھىر-شەپقەت ۋە ئامانلىق ئاتا قىلغاي!

خۇدا تەسەللىنىڭ مەنبەسىدۇر

³رەببىمىز ئەيسا مەسىھنىڭ ئاتىسى، يەنى بارلىق تەسەللىنىڭ مەنبەسى بولغان رەھىمدىل ئاتىمىز خۇداغا مەدھىيەلەر بولغاي! ⁴ھەرقانداق مۈشكۈللۈككە ئۇچرىساق، خۇدا بىزگە تەسەللى بېرىپ كەلدى. شۇڭا بىزمۇ خۇدادىن ئالغان تەسەللى بىلەن مۈشكۈل ئەھۋالدا قالغانلارغا تەسەللى بېرەلەيمىز. ⁵بىز ئەيسا مەسىھ ئۈچۈن قانچىلىك كۆپ ئازاب چەكسەك، خۇدا بىزگە مەسىھ ئارقىلىق شۇنچىلىك كۆپ تەسەللى بېرىدۇ. ⁶بىزنىڭ ئازاب-ئوقۇبەت چېكىشىمىز سىلەرنىڭ قۇتقۇزۇلۇشۇڭلار ۋە تەسەللى تېپىشىڭلار ئۈچۈندۇر. بىزنىڭ تەسەللى تېپىشىمىز سىلەرنىڭمۇ تەسەللى تېپىشىڭلار ئۈچۈندۇر. سىلەر بىز بېشىمىزدىن ئۆتكۈزگەندەك ئازاب-ئوقۇبەتكە دۇچ كەلگەندە، بۇ تەسەللى ئارقىلىق ئازاب-ئوقۇبەتكە بەرداشلىق بېرەلەيسىلەر. ⁷شۇڭا سىلەرنىڭ بەرداشلىق بېرەلەيدىغانلىقىڭلارغا ئىشەنچىمىز كامىلدۇر. چۈنكى بىز بىلىمىزكى، ئەگەر سىلەر بىز چەككەن ئازاب-ئوقۇبەتنى چەكسەڭلار، بىز ئېرىشكەن تەسەللىگىمۇ ئېرىشەلەيسىلەر.

⁸قېرىنداشلار، بىزنىڭ ئاسىيا ئۆلكىسىدە چەككەن ئازاب-ئوقۇبەتلىرىمىزدىن سىلەرنىمۇ خەۋەردار قىلىشنى توغرا تاپتۇق. ئۇ ۋاقىتلاردا چىدىغۇسىز ئېغىر بېسىم ئاستىدا ئىدۇق، ھەتتا ھاياتىمىزدىنمۇ ئۈمىد ئۈزگەنىدۇق. ⁹كۆڭلىمىزدە بىز چوقۇم ئۆلىمىز دەپ ئويلىغانىدۇق. بۇ ۋاقىتتا بىز بۇ ئىشلاردىن ئۆزىمىزگە ئەمەس، ئۆلۈكلەرنى تىرىلدۈرىدىغان خۇداغىلا تايىنىشىمىز لازىملىقىنى تونۇپ يەتتۇق. ¹⁰خۇدا بىزنى بۇرۇن چوڭ بىر ئۆلۈم خەۋپىدىن قۇتۇلدۇرغانىدى، بۇنىڭدىن كېيىنمۇ قۇتۇلدۇرىدۇ. بىزنىڭ ئۈمىدىمىز بىزنى كەلگۈسىدە يەنە قۇتۇلدۇرىدىغان خۇداغا باغلانغاندۇر. ¹¹دۇئالىرىڭلار ئارقىلىق بىزگە ياردەم قىلىڭلار. شۇنداق قىلساڭلار، بىزنىڭ ئامانلىقىمىز ئۈچۈن قىلىنغان نۇرغۇن دۇئالارغا خۇدا مېھرىبانلىق بىلەن جاۋاب بەرسە، نۇرغۇن كىشىلەر شۈكۈر ئېيتىدۇ.

پاۋلۇسنىڭ زىيارەت پىلانىنى ئۆزگەرتىشى

¹²ۋىجدانىمىز گۇۋاھكى، بىز بۇ دۇنيادىكى مۇناسىۋەتتە، بولۇپمۇ سىلەر بىلەن بولغان مۇناسىۋەتتە خۇدا ئاتا قىلغان ئاق كۆڭۈللۈك ۋە سەمىمىيلىك بىلەن ئىش تۇتتۇق. بۇ دۇنيانىڭ دانالىقىغا ئەمەس، بەلكى خۇدانىڭ مېھىر-شەپقىتىگە تايىنىپ، ھەرىكەت قىلدۇق. بىزنىڭ ئۆزىمىزدىن پەخىرلىنىشىمىز مۇشۇ سەۋەبتىندۇر. ¹³بىزنىڭ سىلەرگە يازغانلىرىمىزدا ھېچقانداق يوشۇرۇن مەنە ياكى سىلەر چۈشىنەلمىگۈدەك يەر يوقتۇر. مەن شۇنى ئارزۇ قىلىمەنكى، ¹⁴ھازىر سىلەر بىزنى تولۇق چۈشەنمىسەڭلارمۇ، كەلگۈسىدە تولۇق چۈشىنىسىلەر. شۇنداق بولغاندا، خۇددى بىز سىلەردىن پەخىرلەنگەندەك، سىلەرمۇ رەببىمىز ئەيسا قايتىپ كەلگەن كۈنى بىزدىن پەخىرلىنىسىلەر.

^15‏-16مەن بۇلارغا ئىشەنگەنلىكىم ئۈچۈن، سىلەرگە قوش بەخت ئېلىپ كېلىشنى ئويلاپ، ماكېدونىيە ئۆلكىسىگە بېرىشتا ئالدى بىلەن سىلەرگە يولۇقۇپ ئۆتۈشنى، قايتىشىمدا يەنە بىر يولۇقۇپ، سىلەرنىڭ مېنى يەھۇدىيە ئۆلكىسىگە يولغا سېلىپ قويۇشۇڭلارنى نىيەت قىلغانىدىم. ¹⁷سىلەر مېنىڭ پىلانلىرىمنى نېمىشقا ئۆزگەرتكەنلىكىمنى سوراۋاتقان بولۇشۇڭلار مۇمكىن. سىلەر مېنى پىلانلىرىنى يەڭگىلتەكلىك بىلەن تۈزىدىغان، «ياق، ياق» دېمەكچى بولسىمۇ، «ھەئە، ھەئە» دەيدىغان ئادەتتىكى ئادەملەرگە ئوخشايدۇ دەپ ئويلامسىلەر؟ ¹⁸سىلەرگە ئېيتقان سۆزلىرىم خۇددى خۇدا ئىشەنچلىك بولغاندەك ئىشەنچلىكتۇر. سۆزلىرىم ھەرگىزمۇ بىردەم «ھەئە»، بىردەم «ياق» دېگەندەك ئۆزگىرىپ تۇرمايدۇ. ¹⁹مەن، سىلاس ۋە تىموتىي سىلەرگە خۇش خەۋىرىنى يەتكۈزگەن خۇدانىڭ ئوغلى ئەيسا مەسىھ بىر دەم «ھەئە»، بىر دەم «ياق» دەيدىغانلاردىن ئەمەستۇر. ئۇ دائىم «ھەئە»دۇر. ²⁰خۇدانىڭ پۈتۈن ۋەدىلىرى ئەيسا مەسىھ ئارقىلىق «ھەئە»گە ئېرىشتى. شۇنىڭ ئۈچۈن بىزمۇ ئەيسا مەسىھ ئارقىلىق «ئامىن» دەپ، خۇدانى ئۇلۇغلايمىز. ²¹سىلەر بىلەن بىزنى ئەيسا مەسىھكە باغلاپ، ئېتىقادتا مۇستەھكەم قىلغۇچى خۇدادۇر. ئۇ بىزنى ئۆزى ئۈچۈن تاللىدى. ²²خۇدا قەلبىمىزگە مۇقەددەس روھنى سېلىش ئارقىلىق بىزگە ئىگىدارچىلىق مۆھرىنى باستى. خۇدانىڭ مۇقەددەس روھنى قەلبىمىزگە سالغىنى بىزگە بەرگەن ۋەدىلىرىنىڭ تولۇق ئەمەلگە ئاشىدىغانلىقىنىڭ كاپالىتى بولدى. ²³خۇدا ماڭا گۇۋاھچى بولسۇنكى، كورىنت شەھىرىگە قايتا بارمىغانلىقىمنىڭ سەۋەبى سىلەرگە يۈز خاتىرە قىلماي قېلىشىمدىن ساقلىنىش ئۈچۈندۇر. ²⁴بىز سىلەرنىڭ ئېتىقادىڭلارنى باشقۇرماقچى ئەمەسمىز. چۈنكى بىز شۇنى بىلىمىزكى، سىلەر خۇداغا تايىنىپ، ئېتىقادىڭلاردا مۇستەھكەم تۇرۇۋاتىسىلەر. بىز پەقەت سىلەرنىڭ خۇشال بولۇشۇڭلار ئۈچۈن سىلەر بىلەن بىرگە خىزمەت قىلماقچىمىز.

2

¹شۇڭا مەن يېنىڭلارغا بارماسلىقنى قارار قىلغانىدىم. چۈنكى ئۆتكەنكىدەك سىلەرنىڭ كۆڭلۈڭلارنى يېرىم قىلىشنى خالىمىدىم. ²سىلەرنىڭ كۆڭلۈڭلارنى يېرىم قىلسام، مېنى خۇش قىلالايدىغان ئادەملەرنىڭ كۆڭلىنى يېرىم قىلغان بولمامدىمەن؟ ئۇنداقتا، كىم مېنى خۇش قىلىدۇ؟ ³شۇنىڭ ئۈچۈن يېنىڭلارغا بېرىشنىڭ ئورنىغا خەت يازغانىدىم. مەقسىتىم، يېنىڭلارغا بارغان ۋاقتىمدا مېنى خۇشال قىلىدىغان سىلەرنىڭ كۆڭلۈمنى يېرىم قىلماسلىقىڭلار ئۈچۈن ئىدى. مەن ئىشىنىمەنكى، مېنىڭ خۇشاللىقىم سىلەرنىڭمۇ خۇشاللىقىڭلاردۇر. ⁴ئۇ خەتنى سىلەرنىڭ كۆڭلۈڭلارنى يېرىم قىلىش ئۈچۈن ئەمەس، بەلكى مېنىڭ سىلەرگە بولغان چوڭقۇر مۇھەببىتىمنى چۈشىنىشىڭلار ئۈچۈن قاتتىق ئازابلانغان ھالدا كۆز ياشلىرىمنى تۆكۈپ تۇرۇپ يازغانىدىم.

گۇناھكارنى قوبۇل قىلىش

⁵ئاراڭلاردىكى بىرسى پاراكەندىچىلىك پەيدا قىلغانلىقى ئۈچۈن، مېنىڭلا كۆڭلۈم يېرىم بولۇپلا قالماستىن، بەلكى پۈتۈن جامائىتىڭلارنىڭ كۆڭلى يېرىم بولدى دېسەم، كۆپتۈرۈۋەتكەنلىك بولمايدۇ. ⁶كۆپىنچىڭلارنىڭ ئۇنىڭغا قارشى تۇرغىنىڭلار ئۇنىڭغا بېرىلگەن يېتەرلىك جازادۇر. ⁷ئەمدى ئۇنى كەچۈرۈڭلار ۋە ئۇنىڭغا تەسەللى بېرىڭلار. بولمىسا، ئۇ ھەددىدىن زىيادە ئازابلىنىدۇ. ⁸شۇنىڭ ئۈچۈن ئۇنى چوقۇم ياخشى كۆرىدىغىنىڭلارنى ئۇنىڭغا بىلدۈرۈشۈڭلارنى سورايمەن. ⁹ئالدىنقى خېتىمنى يېزىشىمدىكى سەۋەب سىلەرنىڭ ھەرقانداق ئىشتا مېنىڭ سۆزۈمنى ئاڭلايدىغان ياكى ئاڭلىمايدىغانلىقىڭلارنى سىناش ئۈچۈن ئىدى. ¹⁰سىلەر كىمنى كەچۈرسەڭلار، مەنمۇ ئۇنى كەچۈرىمەن. مەن كىمنى كەچۈرسەم، ئۇنى ئەيسا مەسىھ ئالدىدا سىلەر ئۈچۈن كەچۈردۈم. ¹¹بۇنىڭدىكى مەقسەت، شەيتان تەرىپىدىن ئازدۇرۇلۇپ كەتمەسلىكىمىز ئۈچۈندۇر. چۈنكى بىز شەيتاننىڭ ھىيلە-مىكىرلىرىنى ياخشى بىلىمىز.

يېڭى ئەھدىنىڭ خىزمەتكارى

¹²ئەيسا مەسىھ توغرىسىدىكى خۇش خەۋەرنى يەتكۈزۈش مەقسىتىدە تروئاس شەھىرىگە بارغىنىمدا، رەببىمىز ئۈچۈن خىزمەت قىلىشقا پۇرسەت بېرىلگەن بولسىمۇ، ¹³لېكىن سىلەرنىڭ خەۋىرىڭلارنى ئېلىپ كەلمەكچى بولغان قېرىندىشىم تىتۇس ئۇ يەرگە يېتىپ كەلمىگەنلىكى ئۈچۈن، كۆڭلۈم تەشۋىشكە چۈشۈپ، ئۇ يەردىكىلەر بىلەن خوشلىشىپلا، ماكېدونىيە ئۆلكىسىگە ئۇنى ئىزدەپ كەتتىم.

¹⁴بىزنى ھەمىشە ئەيسا مەسىھ ئارقىلىق ئۆزىنىڭ زەپەر قوشۇنىدا يېتەكلەيدىغان خۇداغا شۈكۈر! خۇدا ئۆزى ھەققىدىكى بىلىمنىڭ خۇش پۇراقلىرىنى بىز ئارقىلىق ھەممە يەرگە تارقاتماقتا. ¹⁵مانا بىز ئەيسا مەسىھنىڭ خۇداغا ئاتىغان قۇتقۇزۇلىدىغانلارغىمۇ ۋە ھالاك بولىدىغانلارغىمۇ چېچىلىدىغان خۇش پۇراقلىرىدۇرمىز. ¹⁶بۇ پۇراق ھالاك بولىدىغانلار ئۈچۈن ئۆلۈم پۇرىقى، قۇتقۇزۇلىدىغانلار ئۈچۈن ھاياتلىق پۇرىقىدۇر. بۇنداق زور ۋەزىپىنىڭ ھۆددىسىدىن كىم چىقالايدۇ؟ ¹⁷ئەلۋەتتە، بىز خۇدانىڭ سۆزىنى پايدىنى كۆزلەپ ساتىدىغانلاردىن ئەمەسمىز. بىز ئەيسا مەسىھكە مەنسۇپتۇرمىز. بىزنى خۇدا ئەۋەتكەن بولغاچقا، خۇش خەۋەرنى خۇدانىڭ ئالدىدا سەمىمىيلىك بىلەن يەتكۈزۈۋاتىمىز.

3

يېڭى ئەھدىنىڭ خىزمەتكارلىرى

¹ئەجەبا، بىز ئۆزىمىزنى قايتىدىن ماختاشقا باشلىدۇقمۇ؟ بىز باشقىلارغا ئوخشاش سىلەرگە تونۇشتۇرۇش خېتى ئېلىپ بېرىشىمىز كېرەكمۇ؟ بىز سىلەردىن شۇنداق تونۇشتۇرۇش خېتى تەلەپ قىلدۇقمۇ؟ ئەلۋەتتە تەلەپ قىلمىدۇق! ²سىلەر ھەممە ئادەمگە مەلۇم بولغان ۋە ھەممە ئادەم ئوقۇيالايدىغان قەلبىمىزگە يېزىلغان تونۇشتۇرۇش خېتىدۇرسىلەر. ³سىلەر ئەيسا مەسىھ تەرىپىدىن يېزىلغان ھەم بىز يەتكۈزىدىغان خەتتۇرسىلەر. سىلەر سىياھ بىلەن ئەمەس، بەلكى مەڭگۈ ھايات خۇدانىڭ روھى بىلەن ۋە تاش تاختىلارغا ئەمەس، بەلكى ئىنسانلارنىڭ قەلبىگە يېزىلدىڭلار.

⁴ئەيسا مەسىھ سەۋەبلىك خۇدانىڭ ئالدىدا يۈرىكىمىز توق بولغانلىقى ئۈچۈن، مۇشۇنداق ئېيتالايىمىز. ⁵بىز ھەممە ئىشنى ئۆزىمىزنىڭ ئىقتىدارى بىلەن قىلالايمىز دېمەكچى ئەمەسمەن. چۈنكى بىزنى ئىقتىدارلىق قىلغان خۇدادۇر. ⁶ئۇ بىزنى يېڭى ئەھدىنىڭ خىزمەتكارلىرى قىلىش ئۈچۈن ئىقتىدارلىق قىلدى. بۇ ئەھدە يېزىق بىلەن خاتىرىلەنگەن تەۋرات قانۇنىغا ئەمەس، بەلكى مۇقەددەس روھقا ئاساسلانغاندۇر. چۈنكى يېزىق بىلەن خاتىرىلەنگەن تەۋرات قانۇنى ئۆلۈم ئېلىپ كېلىدۇ، لېكىن مۇقەددەس روھ ھاياتلىق ئاتا قىلىدۇ. ⁷تەۋرات قانۇنى تاش تاختىلارغا ھەرپلەر بىلەن ئويۇلغان بولۇپ، خۇدانىڭ پارلاق نۇرى ئىچىدە چۈشۈرۈلدى. مۇسانىڭ يۈزىدىكى ۋاقىتلىق پارلاق نۇر شۇنچىلىك كۈچلۈك ئىدىكى، ئىسرائىل خەلقى ئۇنىڭغا قارىيالمايتتى. ئۆلۈمگە ئېلىپ بارىدىغان تەۋرات قانۇنى شۇنچىلىك شان-شەرەپلىك بولسا، ⁸مۇقەددەس روھنىڭ ئېلىپ كېلىدىغىنى تېخىمۇ شان-شەرەپلىك بولمامدۇ!؟ ⁹يەنى ئىنسانغا جازا ئېلىپ كېلىدىغان تەۋرات قانۇنى ئۇلۇغ بولغان يەردە، ئىنساننى ھەققانىي قىلىدىغان يېڭى ئەھدە تېخىمۇ ئۇلۇغ بولمامدۇ!؟ ¹⁰ئەمەلىيەتتە، بۇرۇنقى ئۇلۇغۋارلىق ھازىرقى ئۇلۇغۋارلىقنىڭ ئالدىدا ھېچنېمىگە ئەرزىمەيدۇ. ¹¹ۋاقىتلىق بولغىنى ئۇلۇغ بولغان يەردە، مەڭگۈلۈك بولغىنى تېخىمۇ ئۇلۇغ بولمامدۇ!؟

¹²بىزدە شۇنداق بىر ئۈمىد بولغاچقا، خوش خەۋەرنى يۈرەكلىك ھالدا يەتكۈزۈۋاتىمىز. ¹³بىز مۇسا پەيغەمبەرگە ئوخشىمايمىز. چۈنكى ئۇ يۈزىدىكى نۇرنىڭ ۋاقىتلىق بولغانلىقىنى ئىسرائىللارنىڭ كۆرۈپ قالماسلىقى ئۈچۈن يۈزىگە چۈمپەردە تارتىۋالغانىدى. ¹⁴ئۇ ۋاقىتتا ئىسرائىللار تېخىچە بىخۇد ئىدى. تاكى بۈگۈنگىچە ئۇلار كونا ئەھدىنى، يەنى تەۋراتنى ئوقۇسا، ئەقلىنى يەنە شۇ چۈمپەردە يېپىۋالىدۇ. بۇ چۈمپەردە پەقەت ئەيسا مەسىھ ئارقىلىقلا ئېلىۋېتىلىدۇ. ¹⁵شۇنداق، بۈگۈنكى كۈندىمۇ ئۇلار مۇسا پەيغەمبەرگە چۈشۈرۈلگەن تەۋراتنى ئوقۇغاندا، يەنىلا شۇ چۈمپەردە ئۇلارنىڭ ئەقلىنى يېپىۋالماقتا. ¹⁶بىراق ئۇلار قاچان رەبكە يۈزلەنسە، شۇ چاغدا چۈمپەردە ئېلىپ تاشلىنىدۇ. ¹⁷بۇ يەردىكى «رەب» دېگىنىم مۇقەددەس روھنى كۆزدە تۇتقىنىمدۇر. رەبنىڭ روھى قەيەردە بولسا، شۇ يەردە ھۆرلۈك بولىدۇ. ¹⁸بىزلەردىكى چۈمپەردىلەر ئېلىۋېتىلگەچكە، رەببىمىزنىڭ ئۇلۇغلۇقىنى كۆرۈۋاتىمىز. شۇنىڭ بىلەن بىز رەببىمىزگە ئوخشاش ئۆزگىرىپ، بارا-بارا ئۇنىڭ ئۇلۇغلۇقىنى تېخىمۇ نامايان قىلىمىز. بۇ ئۆزگىرىشلەرنىڭ ھەممىسى رەببىمىزنىڭ روھى ئارقىلىق يۈز بەرمەكتە.

4

قۇدرەتلىك خۇدا ۋە ئاجىز ئىنسان

¹خۇدا بىزگە رەھىم-شەپقەت قىلىپ، بۇ خىزمەتنى بەرگەنلىكى ئۈچۈن، جاسارىتىمىزنى يوقاتمايمىز. ²بىز ئۇياتلىق ۋە خۇپىيانە ئىشلارنى قىلىشتىن يىراق تۇرىمىز، ھىيلە-مىكىر ئىشلەتمەيمىز، خۇدانىڭ سۆزىنى بۇرمىلىمايمىز. ئەكسىچە، ھەقىقەتنى ئۆز پېتى يەتكۈزىمىز. شۇنداق قىلىپ، بىز ئۆزىمىزنى خۇدانىڭ ئالدىدا ھەممە كىشىگە بىلدۈرىمىز. ئۇلارنىڭمۇ ۋىجدانى بىزنىڭ قانداق ئادەم ئىكەنلىكىمىزگە گۇۋاھ بولىدۇ. ³بىز يەتكۈزۈۋاتقان خۇش خەۋەرنىڭ مەنىسى يوشۇرۇن دېيىلسە، ئۇ ھالاك بولىدىغانلار ئۈچۈنلا يوشۇرۇندۇر. ⁴چۈنكى بۇ دۇنيانىڭ ھۆكۈمرانى بولغان شەيتان خۇدانىڭ ئوبرازى بولغان ئەيسا مەسىھنىڭ ئۇلۇغلۇقىنى بىلدۈرىدىغان خۇش خەۋەرنىڭ نۇرى ئېتىقادسىزلارنىڭ دىلىنى يورۇتمىسۇن دەپ، ئۇلارنىڭ ئەقىل كۆزىنى كور قىلىپ قويدى. ⁵بىز قەيەرگە بارساق، ئۆزىمىز ھەققىدە ئەمەس، بەلكى رەببىمىز ئەيسا مەسىھ ھەققىدە سۆزلەيمىز. ئۆزىمىزگە كەلسەك، بىز ئەيسا مەسىھ ئۈچۈن سىلەرنىڭ خىزمىتىڭلارنى قىلىمىز. ⁶چۈنكى دۇنيا يارالغاندا «نۇر قاراڭغۇلۇقنى يورۇتسۇن» دەپ ئەمر قىلغان خۇدا بىزنىڭ قەلبىمىزنى يورۇتتى ۋە ئۆزىنىڭ ئۇلۇغلۇقىنى تونۇپ يېتىشىمىز ئۈچۈن ئەيسا مەسىھ ئارقىلىق نۇرىنى نامايان قىلدى. ⁷خۇدانىڭ بىزگە ئاتا قىلغىنى خۇش خەۋەرنىڭ نۇرىدىن ئىبارەت بىباھا خەزىنىدۇر. بىز گويا بۇ خەزىنە قاچىلانغان ساپال ئىدىشتۇرمىز. مانا بۇنىڭدىن كىشىلەر بىزدىكى ئۇلۇغ قۇدرەتنىڭ بىزگە ئەمەس، بەلكى خۇداغا مەنسۇپ ئىكەنلىكىنى بىلەلەيدۇ. ⁸بىز ھەر تەرەپتىن قىيىن ئەھۋالدا قالدۇق، ئەمما يەكسان بولمىدۇق. تەمتىرەپ قالدۇق، ئەمما ئۈمىدسىزلەنمىدۇق. ⁹قوغلاندۇق، ئەمما خۇدا تەرىپىدىن تاشلىۋېتىلمىدۇق. يىقىتىلدۇق، ئەمما ھالاك بولمىدۇق. ¹⁰ئەيسانىڭ ھاياتى بىزدە ئېنىق نامايان بولسۇن دەپ، ھەمىشە بىز ئۇنىڭ ئۆلۈمىنى ئۆزىمىز بىلەن بىرگە ئېلىپ يۈردۇق. ¹¹شۇنداق، ئەيسا مەسىھكە ئەگەشكەنلىكىمىز سەۋەبىدىن ھەمىشە ئۆلۈمگە دۇچار بولماقتىمىز. نەتىجىدە، كىشىلەر بىزنىڭ ئۆتكۈنچى ھاياتىمىزدىن ئەيسا مەسىھنىڭ ھاياتىنىڭ نامايان بولغانلىقىنى كۆرۈۋالالايدۇ. ¹²دېمەك، بىزنىڭ ئۆلۈمگە دۇچار بولغانلىقىمىز سىلەرگە مەڭگۈلۈك ھايات ئاتا قىلماقتا. ¹³بىز يەنىلا خۇش خەۋەر تارقىتىۋاتىمىز، چۈنكى مۇقەددەس يازمىلاردا يېزىلغان «ئېتىقاد قىلدىم، شۇ ۋەجىدىن سۆزلىدىم» دېگۈچىدە بار بولغان ئېتىقاد بىزدىمۇ باردۇر. ¹⁴چۈنكى رەببىمىز ئەيسانى ئۆلۈمدىن تىرىلدۈرگەن خۇدانىڭ بىزنىمۇ تىرىلدۈرىدىغانلىقىنى ۋە سىلەر بىلەن بىرگە ئۆزىنىڭ ھۇزۇرىغا كەلتۈرىدىغانلىقىنى بىلىمىز. ¹⁵بىز تارتىۋاتقان جاپا-مۇشەققەتلەرنىڭ ھەممىسى سىلەر ئۈچۈندۇر. بۇ ئارقىلىق خۇدانىڭ مېھىر-شەپقىتى تېخىمۇ كۆپ كىشىلەرگە يەتكۈزۈلىدۇ. شۇنداق بولغاندا، تېخىمۇ كۆپ كىشىلەر خۇداغا تەشەككۈر ئېيتىدۇ ۋە خۇدانى تېخىمۇ ئۇلۇغلايدۇ. ¹⁶شۇڭا جاسارىتىمىزنى يوقاتمىدۇق. جىسمانىي جەھەتتىن بارغانسېرى ئاجىزلاپ كېتىۋاتقان بولساقمۇ، لېكىن روھىي جەھەتتىن كۈندىن-كۈنگە يېڭىلانماقتىمىز. ¹⁷بىز ئۇچراۋاتقان بۇ ئەرزىمەس ۋاقىتلىق ئازاب-ئوقۇبەتلەر بىزگە تەڭداشسىز ۋە مەڭگۈلۈك شان-شەرەپ ئېلىپ كېلىدۇ. ¹⁸شۇڭا كۆزىمىز كۆرۈنىدىغاندا ئەمەس، بەلكى كۆرۈنمەيدىغاندىدۇر. چۈنكى كۆرۈنىدىغىنى ئۆتكۈنچىدۇر، لېكىن كۆرۈنمەيدىغىنى مەڭگۈلۈكتۇر.

5

ئەرشتىكى ماكانىمىز

¹بىز بىلىمىزكى، تېنىمىز يەر يۈزىدىكى چېدىرغا ئوخشايدۇ. ئەگەر ئۇ ۋەيران بولسا، خۇدا تەرىپىدىن ئاسماندىكى مەڭگۈلۈك بىر تۇرالغۇغا ئىگە بولىمىز. ئۇ ئىنساننىڭ قولى بىلەن ياسالمىغاندۇر. ²بىز ھازىر ياشاۋاتقان چېدىرىمىزدىن ھەسرەتلىنىپ، ئەرشتىكى چېدىرغا ئىگە بولۇشقا ئىنتىزار بولماقتىمىز. ³چۈنكى ئەرشتىكى چېدىرغا ئىگە بولساق، روھىمىز ماكانسىز قالمايدۇ. ⁴ھازىرقى تېنىمىزدە ياشاۋاتقان بىزلەر ئېغىر يۈكلەر ئاستىدا ھەسرەت چەكمەكتىمىز. لېكىن بىز ھازىرقى تېنىمىزدىن ئايرىلىپ، ئۆلۈشنى ئەمەس، بەلكى چىرىمەس تەنگە ئىگە بولۇشنى ۋە ئۆتكۈنچى ھاياتىمىزنىڭ ئورنىغا مەڭگۈلۈك ھاياتقا ئىگە بولۇشنى ئارزۇ قىلىمىز. ⁵بىزنى بىز ئىنتىزار بولغان ھاياتقا تەييارلىغۇچى خۇدادۇر. ئۇ بۇ ھاياتقا ئېرىشىشىمىزنىڭ كاپالىتى سۈپىتىدە بىزگە مۇقەددەس روھنى ئاتا قىلدى. ⁶شۇڭا بىز ھەمىشە جاسارەتلىكمىز. لېكىن بىز بۇ تەندە ياشىغان ۋاقتىمىزدا پەرۋەردىگارنىڭ ماكانىدا ياشىيالمايدىغانلىقىمىزنى بىلىمىز. ⁷بىز كۆرگەنلىرىمىز بويىچە ئەمەس، بەلكى ئېتىقادىمىز بويىچە ياشايمىز. ⁸بىز ھەقىقەتەن جاسارەتلىكمىز. ھازىرقى تېنىمىزدىن ۋاز كېچىپ، رەببىمىزنىڭ ماكانىدا بولۇشقا ئىنتىلىمىز. ⁹قىسقىسى، مەيلى بۇ تەندە ياشايلى ياكى بۇ تەندىن ۋاز كېچەيلى، نىشانىمىز يەنىلا رەببىمىزنى خۇرسەن قىلىشتۇر. ¹⁰چۈنكى ھەممىمىز ھازىرقى تېنىمىزدە ياشىغان ۋاقتىمىزدىكى ياخشى-يامان ئەمەللىرىمىزگە ئاساسەن قۇتقۇزغۇچى مەسىھنىڭ سوراق تەختى ئالدىدا چوقۇم ھېساب بېرىمىز ۋە جاۋابقا ئېرىشىمىز.

ئەيسا مەسىھ ئارقىلىق خۇدا بىلەن يارىشىش

¹¹بىزنىڭ رەببىمىزگە بولغان مەسئۇلىيىتىمىزنىڭ ئېغىر ئىكەنلىكىنى بىلىمىز. شۇنىڭ ئۈچۈن ئىنسانلارنى خۇش خەۋەر ھەققىدە قايىل قىلىشقا تىرىشىمىز. بىزنىڭ قانداق ئادەم ئىكەنلىكىمىز خۇداغا ئاياندۇر. مەن ۋىجدانىڭلارنىڭ بىزنىڭ قانداق ئادەم ئىكەنلىكىمىزنى تونۇپ يېتىشىنى ئۈمىد قىلىمەن. ¹²بىز سىلەرگە ئۆزىمىزنى قايتا ماختىماقچى ئەمەسمىز، لېكىن سىلەرنىڭ بىزدىن پەخىرلىنىشىڭلارنى ئۈمىد قىلىمىز. شۇنداق قىلساڭلار، پەزىلىتى بىلەن ئەمەس، بەلكى تاشقى قىياپىتى بىلەن ماختىنىدىغانلارغا جاۋاب بېرەلەيسىلەر. ¹³بىز ساراڭ كۆرۈنگەن بولساق، كېرەك يوق، بۇ خۇدانىڭ خىزمىتى ئۈچۈندۇر. ئەقلىمىز جايىدا كۆرۈنگەن بولسا، بوپتۇ، بۇ سىلەرنىڭ مەنپەئەتىڭلار ئۈچۈندۇر. ¹⁴بىزنى شۇنداق قىلىشقا ئىلھاملاندۇرۇۋاتقىنى ئەيسا مەسىھنىڭ مۇھەببىتىدۇر. چۈنكى بىر ئادەمنىڭ، يەنى ئەيسا مەسىھنىڭ ھەممەيلەن ئۈچۈن ئۆلگەنلىكىنى تونۇپ يەتتۇق. شۇڭا ھەممىمىزنىڭ ئۇنىڭ ئۆلۈمىگە ئورتاق ئىكەنلىكىمىزنى بىلىمىز. ¹⁵ئەيسا مەسىھ پۈتكۈل ئىنسانلار ئۈچۈن ئۆلدى. ئەمدى ئۇ ئاتا قىلغان يېڭى ھاياتقا ئېرىشكەنلەر ئۆزلىرى ئۈچۈن ئەمەس، بەلكى ئۇلارنى دەپ ئۆلگەن ۋە ئۆلۈمدىن تىرىلگەن ئەيسا مەسىھ ئۈچۈن ياشىشى كېرەك.

¹⁶شۇنىڭ ئۈچۈن بىز بۇنىڭدىن كېيىن ھېچكىمگە بۇ دۇنيانىڭ كۆزقارىشى بىلەن قارىمايمىز. گەرچە بىز بۇرۇن ئەيسا مەسىھكە بۇ دۇنيانىڭ كۆزقارىشى بىلەن قارىغان بولساقمۇ، ئەمدى ئۇ كۆزقاراش بىلەن قارىمايمىز. ¹⁷بىر كىشى ئەيسا مەسىھكە مەنسۇپ بولسا، ئۇ يېڭىدىن يارالغان ئادەم بولىدۇ. ئۇنىڭ كونا ھاياتى ئاخىرلىشىپ، يېڭى ھاياتى باشلانغان بولىدۇ. ¹⁸بۇلارنىڭ ھەممىسى خۇدانىڭ ھەدىيەسىدۇر. خۇدا ئەيسا مەسىھ ئارقىلىق بىزنىڭ ئۆزى بىلەن يارىشىشىمىزغا يول ئاچتى. شۇنداقلا، خۇدا بىزگە ياراشتۇرۇش ۋەزىپىسىنى تاپشۇردى. ¹⁹دېمەك، خۇدا ئىنسانلارنىڭ گۇناھلىرىدىن ھېساب ئالماي، ئۇلارنىڭ ئەيسا مەسىھ ئارقىلىق ئۆزى بىلەن يارىشىشىغا يول ئاچتى. خۇدا كىشىلەرنىڭ ئۆزى بىلەن يارىشالايدىغانلىقى ھەققىدىكى خۇش خەۋەرنى تارقىتىش ۋەزىپىسىنى بىزگە ئامانەت قىلدى. ²⁰شۇڭا ئەيسا مەسىھنىڭ ۋەكىللىرى بولغان بىز ئەيسا مەسىھكە ۋاكالىتەن سىلەرگە خۇدانىڭ مۇراجىئىتىنى جاكارلايمىزكى، خۇدا بىلەن يارىشىڭلار! ²¹خۇدا بىزنىڭ ئەيسا مەسىھ ئارقىلىق ھەققانىي ئادەم دەپ ھېسابلىنىشىمىز ئۈچۈن گۇناھسىز مەسىھنى گۇناھىمىزنىڭ قۇربانى قىلدى.

6

¹خۇدا بىلەن ھەمكارلاشقۇچى بولغان بىزلەر سىلەرگە شۇنى نەسىھەت قىلىمىزكى، خۇدانىڭ سىلەرگە قىلغان مېھىر-شەپقىتىنى بىكارغا كەتكۈزمەڭلار. ²چۈنكى خۇدا مۇنداق دەيدۇ:

«ۋاقىت-سائىتى كەلگەندە، ساڭا قۇلاق سالىمەن،

نىجاتلىق كۈنى كەلگەندە، ساڭا ياردەم قىلىمەن.»

سىلەرگە ئېيتىپ قويايكى، خۇدانىڭ «ۋاقىت-سائىتى» ھازىردۇر، خۇدانىڭ نىجاتلىق كۈنى بۈگۈندۇر.

³بىز خىزمىتىمىزگە داغ چۈشۈرمەسلىكىمىز ئۈچۈن ھەرقانداق ئىشتا باشقىلارغا توسالغۇ بولمىدۇق، ⁴بەلكى ھەممە ئىشتا خۇدانىڭ خىزمەتكارلىرى ئىكەنلىكىمىزنى كۆرسىتىپ، ھەر خىل مۈشكۈلات، ئاۋارىچىلىك ۋە جاپا-مۇشەققەتلەرگە بەرداشلىق بەردۇق. ⁵تاياق يېدۇق، زىنداندا ياتتۇق، توپىلاڭچىلارنىڭ پاراكەندىچىلىكلىرىگە دۇچ كەلدۇق، ھالىمىزدىن كەتكۈدەك ئىشلىدۇق، ئۇيقۇسىز قالدۇق ۋە ئاچ قالدۇق. ⁶لېكىن پاكلىقىمىز، ئەقىل-پاراسىتىمىز، سەۋر-تاقىتىمىز، مېھرىبانلىقىمىز، سەمىمىي مۇھەببىتىمىز ۋە مۇقەددەس روھتىن كەلگەن كۈچ-قۇدرىتىمىز بىلەن ئۆزىمىزنىڭ خۇدانىڭ خىزمەتكارلىرى ئىكەنلىكىمىزنى كۆرسەتتۇق، ⁷خۇدانىڭ ھەقىقىتىنى يەتكۈزدۇق ۋە خۇدانىڭ قۇدرىتىنىڭ بىزگە يار ئىكەنلىكىنى نامايان قىلدۇق. ھەققانىيلىقنى ئۆزىمىزگە قورال قىلىپ، تۈرلۈك ھۇجۇملارغا زەربە بەردۇق ۋە ئۆزىمىزنى قوغدىدۇق. ⁸ھۆرمەتكە سازاۋەر بولدۇق، ھاقارەتكە ئۇچرىدۇق، ئەيىبلەندۇق، ماختاشقىمۇ مۇيەسسەر بولدۇق. كىشىلەر بىزنى ئالدامچى دېدى، بىراق بىز دۇرۇس كىشىلەرمىز. ⁹ئادەملەر بىزنى تونۇيدۇ، لېكىن ئېتىراپ قىلمايدۇ. ئۆلۈم گىردابىغا باردۇق، لېكىن يەنىلا ھاياتمىز. تاياق يېدۇق، ئەمما ئۆلمىدۇق. ¹⁰ئازابلاندۇق، لېكىن ھەمىشە شاد-خۇرام ياشىدۇق. نامراتمىز، لېكىن نۇرغۇن كىشىلەرنى روھىي بايلىققا ئىگە قىلدۇق. ھېچنېمىمىز يوق، لېكىن ھەممىگە ئىگىمىز.

¹¹ئەي كورىنتلىقلار، سىلەرگە ئوچۇق-ئاشكارا سۆزلىدۇق، سىلەرگە باغرىمىزنى كەڭ ئاچتۇق. ¹²سىلەردىن مۇھەببىتىمىزنى ئايىمىدۇق، لېكىن سىلەر بىزدىن مۇھەببىتىڭلارنى ئايىدىڭلار. ¹³مەن سىلەرگە ئۆز پەرزەنتلىرىمگە ئېيتقاندەك ئېيتايكى، سىلەرمۇ كەڭ قورساق بولۇپ، بىزگە باغرىڭلارنى ئېچىڭلار.

ئېتىقادسىزلارنىڭ تەسىرىدىن ساقلىنىش

¹⁴ئېتىقادسىزلار بىلەن بىر بويۇنتۇرۇققا كىرمەڭلار. چۈنكى ھەق بىلەن ناھەقنىڭ ئوتتۇرىسىدا قانداقمۇ ئورتاقلىق بولسۇن!؟ يورۇقلۇق بىلەن قاراڭغۇلۇق قانداقمۇ چىقىشالىسۇن!؟ ¹⁵مەسىھ بىلەن شەيتان قانداقمۇ كېلىشەلىسۇن!؟ ئېتىقادچىلار بىلەن ئېتىقادسىزلارنىڭ نېمە ئورتاقلىقى بولسۇن!؟ ¹⁶خۇدانىڭ ئىبادەتخانىسىدا قانداقمۇ بۇتلار بولسۇن!؟ بىز مەڭگۈ ھايات خۇدانىڭ ئىبادەتخانىسىدۇرمىز. چۈنكى خۇدا مۇنداق دېگەن:

«ئۇلارنىڭ ئارىسىدا ياشايمەن،

ئۇلارنىڭ ئارىسىدا يۈرىمەن.

ئۇلارنىڭ خۇداسى بولىمەن،

ئۇلارمۇ مېنىڭ خەلقىم بولىدۇ.»

¹⁷شۇنىڭ ئۈچۈن پەرۋەردىگار مۇنداق دەيدۇ:

«ئېتىقادسىزلارنىڭ ئارىسىدىن چىقىپ كېتىڭلار.

ناپاك نەرسىلەرگە تېگىپ كەتمەڭلار.

شۇندىلا مەن سىلەرنى قوبۇل قىلىمەن.»

¹⁸«ھەممىگە قادىر پەرۋەردىگار يەنە:

‹سىلەرگە ئاتا بولىمەن.

سىلەرمۇ مېنىڭ ئوغۇل-قىزلىرىم بولىسىلەر› دەيدۇ.»

7

¹قەدىرلىك قېرىنداشلار، بۇ ۋەدىلەرگە ئېرىشكەنىكەنمىز، تەننى ۋە روھنى بۇلغايدىغان ھەرقانداق نەرسىلەردىن يىراق تۇرۇپ، ئۆزىمىزنى پاك تۇتايلى. خۇدادىن ئەيمەنگەن ھالدا ئۆزىمىزنىڭ خۇداغا تولۇق ئاتالغان ئىكەنلىكىمىزنى كۆرسىتەيلى.

پاۋلۇسنىڭ كورىنتلىقلارغا بولغان ئىشەنچى

²قەلبىڭلاردىن بىزگە ئورۇن بېرىڭلار. بىز ھېچكىمگە ھەقسىزلىق قىلمىدۇق، ھېچكىمنى ئازدۇرمىدۇق، ھېچقاچان ئۆزىمىزنىڭ مەنپەئەتىگە چوغ تارتمىدۇق. ³مەن بۇ سۆزلەرنى قىلىش ئارقىلىق سىلەرنى تەنقىدلىمەكچى ئەمەسمەن. بۇرۇن ئېيتقىنىمدەك، قەلبىمىزدىن شۇنداق ئورۇن ئالدىڭلاركى، بىز سىلەر بىلەن ھايات-ماماتتا بىرگە بولىمىز. ⁴سىلەرگە ئىشەنچىم كامىل ھەم سىلەردىن پەخىرلىنىمەن. ئېغىر جاپا-مۇشەققەتلەردە قالغىنىمدا، سىلەردىن تەسەللى تېپىپ، چەكسىز خۇشاللىققا چۆمگەنىدىم.

⁵ماكېدونىيە ئۆلكىسىگە بارغاندىن كېيىن، خىلمۇخىل قىيىنچىلىقلارغا دۇچ كېلىپ، كۆڭلىمىز ئەمىن تاپمىدى. سىرتتا جېدەل-ماجىرا، ئىچىمىزدە قورقۇنچ بولدى. ⁶لېكىن روھى چۈشكۈنلۈكلەرگە تەسەللى بولىدىغان تىتۇسنى خۇدا يېنىمىزغا ئەۋەتىپ، تەسەللى بەردى. ⁷بىز پەقەت ئۇنىڭ كېلىشى بىلەنلا ئەمەس، بەلكى ئۇنىڭ سىلەردىن ئالغان تەسەللىسى بىلەنمۇ تەسەللى تاپتۇق. ئۇ سىلەرنىڭ ماڭا بولغان سېغىنىشىڭلارنى، ئۆتكۈزگەن سەۋەنلىكىڭلارغا قىلغان پۇشايمىنىڭلارنى ۋە ماڭا بولغان قىزغىنلىقىڭلارنى ئېيتقىنىدا، تېخىمۇ خۇشاللاندىم.

⁸ئىلگىرىكى خېتىمنىڭ سىلەرگە بىر مەزگىل غەم-قايغۇ ئېلىپ كەلگەنلىكىدىن خەۋەر تاپقىنىمدا، پۇشايمان قىلغان بولساممۇ، لېكىن ھازىر پۇشايمان قىلمايمەن. ⁹مەن ھازىر سىلەرگە غەم-قايغۇ ئېلىپ كەلگەنلىكىمدىن ئەمەس، بەلكى غەم-قايغۇنىڭ سىلەرنى توۋا قىلىشقا ئېلىپ بارغانلىقىدىن خۇشالمەن. چۈنكى بۇ خىل غەم-قايغۇ خۇدانىڭ ئىرادىسى بويىچە بولدى. سىلەر بۇ غەم-قايغۇدىن ھېچقانداق زىيان تارتمىدىڭلار. ¹⁰چۈنكى ئىنساننى توۋا قىلدۇرىدىغان غەم-قايغۇ خۇدانى خۇرسەن قىلىپ، نىجاتلىق ئېلىپ كېلىدۇ. كىشىلەر بۇ خىل توۋا قىلىشتىن پۇشايمان قىلمايدۇ، ئەمما ئادەملەرنى توۋا قىلدۇرالمايدىغان ئىنسانىي غەم-قايغۇ ئۆلۈمگە ئېلىپ بارىدۇ. ¹¹خۇدانى خۇرسەن قىلىدىغان ئاشۇ غەم-قايغۇلارنىڭ سىلەردە قانداق ياخشى مېۋە بەرگەنلىكىنى ئويلاڭلار. سىلەر خاتالىقىڭلارنى ئېتىراپ قىلىپ، ئەستايىدىللىق بىلەن تۈزەتتىڭلار. ئاراڭلاردىكى گۇناھكارنىڭ قىلمىشىدىن غەزەپلەندىڭلار، ھەمدە بۇ قىلمىش داۋاملاشسا خۇدانىڭ جازاسىنىڭ ئۆزۈڭلارغا كېلىشىدىن قورقتۇڭلار. مەن بىلەن كۆرۈشۈشكە ئىنتىزار بولدۇڭلار. مېنىڭ ئەلچىلىك ھوقۇقۇمنى ھۆرمەتلەپ، ماڭا قىزغىن بولدۇڭلار. گۇناھكارنى جازالاش ئارقىلىق ئادالەتپەرۋەرلىكىڭلارنى كۆرسەتتىڭلار. بۇ ئارقىلىق ئۆزۈڭلارنىڭ ھەر جەھەتتە گۇناھسىز ئىكەنلىكىڭلارنى ئىسپاتلىدىڭلار.

¹²ئۆتكەن قېتىملىق خەتنى يېزىشىمدىكى ئاساسلىق مەقسەت، كىمنىڭ ئازار بەرگەنلىكىنى ۋە كىمنىڭ ئازار يېگەنلىكىنى ئېنىقلاش ئۈچۈن ئەمەس، بەلكى سىلەرنىڭ خۇدانىڭ ئالدىدا بىز ئۈچۈن نەقەدەر قىزغىن ئىكەنلىكىڭلارنى ئۆزۈڭلارغا بىلدۈرۈش ئۈچۈندۇر. ¹³بىز سىلەرنىڭ شۇ قىزغىنلىقىڭلاردىن تەسەللى تاپتۇق. شۇنىڭ بىلەن بىر ۋاقىتتا، تىتۇسنىڭ خۇشاللىقىنى كۆرۈپ، خۇشاللىقىمىز تېخىمۇ ئاشتى. چۈنكى سىلەر ئۇنىڭ روھىنى كۆتۈردۈڭلار. ¹⁴سىلەرنى ئۇنىڭغا ماختاپ بەرگەنىدىم، سىلەرمۇ مېنى يەرگە قارىتىپ قويمىدىڭلار. خۇددى سىلەرگە ئۆگەتكەنلىرىمنىڭ ھەممىسى راست بولغىنىدەك، سىلەرنى تىتۇسقا ماختاپ بەرگەنلىرىمنىڭمۇ راست ئىكەنلىكى ئەمەلىيىتىڭلاردا ئىسپاتلاندى. ¹⁵شۇڭا تىتۇس ھەممىڭلارنىڭ ئۇنىڭغا قانداق ئىتائەتمەن بولغانلىقىڭلارنى، ئۇنى شۇنچە چوڭ كۆرۈپ، ھۆرمەت بىلەن كۈتۈۋالغانلىقىڭلارنى ئەسلىگىنىدە، ئۇنىڭ سىلەرگە بولغان مۇھەببىتى تېخىمۇ ئاشماقتا. ¹⁶سىلەرگە ھەر جەھەتتىن ئىشەنچ قىلالىغانلىقىم ئۈچۈن خۇشالمەن.

8

سېخىيلىق بىلەن ئىئانە قىلىشقا ئىلھاملاندۇرۇش

¹قېرىنداشلار، سىلەرگە خۇدانىڭ ماكېدونىيە ئۆلكىسىدىكى ئېتىقادچىلار جامائەتلىرىدە كۆرسەتكەن مېھىر-شەپقىتى توغرىسىدا ئېيتماقچىمىز. ²ئۇلار بېشىدىن ئۆتكۈزگەن مۈشكۈل كۈلپەتلەر ئارقىلىق قاتتىق سىنالدى. شۇنداقتىمۇ، ئۇلارنىڭ خۇشاللىقى تولۇپ تېشىپ، ئۆزلىرىنىڭ ئىنتايىن كەمبەغەللىكىگە قارىماي، قولى ئوچۇقلۇق بىلەن مەردلىك قىلدى. ³ئۇلارنىڭ كۈچىنىڭ يېتىشىچە ئۆزلۈكىدىن ئىئانە قىلغانلىقىغا، ھەتتا ئۆزىگە قالمىسىمۇ، ئىئانە قىلغانلىقىغا گۇۋاھلىق بېرىمەن. ⁴ئۇلار يەھۇدىيە ئۆلكىسىدىكى ئېتىقادچىلارغا قىلىنىدىغان ياردەمگە ئۆزلىرىنىڭمۇ ھەسسە قوشۇشىنى بىزدىن ئۆتۈنۈپ سوراشتى. ⁵بۇ بىزنىڭ ئۇلاردىن كۈتكىنىمىزدىن ھەقىقەتەن كۆپ ئېشىپ كەتتى. ئۇلار ئالدى بىلەن ئۆزلىرىنى رەببىمىزگە ئاتىدى، ئاندىن خۇدانىڭ ئىرادىسى بويىچە بىزگە ئاتىدى. ⁶تىتۇس خېلى بۇرۇن سىلەرنىڭ بۇ مەردلەرچە ئىئانە قىلىش ئىشىنى باشلىشىڭلارغا ياردەم قىلغانلىقى ئۈچۈن، ئۇنىڭدىن بۇ ئىشنىڭ ئاخىرىنى چىقىرىشىڭلارغا ياردەم بېرىشنى ئۆتۈندۇق. ⁷سىلەر ھەممە ئىشتا، يەنى ئېتىقادتا، نوتۇقتا، بىلىمدە، قىزغىنلىقتا ۋە بىز سىلەرگە ئۆگەتكەن مېھىر-مۇھەببەتتە ئالدىدا تۇرغىنىڭلاردەك، بۇ قېتىملىق ئىئانە قىلىشتىمۇ ئالدىدا تۇرۇڭلار. ⁸بۇ سۆزلىرىمنى سىلەرگە بۇيرۇق تەرىقىسىدە ئېيتقىنىم يوق. مەن باشقىلارنىڭ قىزغىنلىقى بىلەن سىلەرنىڭ مېھىر-مۇھەببىتىڭلارنىڭ قانچىلىك سەمىمىي ئىكەنلىكىنى سىناپ كۆرمەكچىمەن. ⁹رەببىمىز ئەيسا مەسىھنىڭ نەقەدەر مېھىر-شەپقەتلىك ئىكەنلىكىنى بىلىسىلەر. گەرچە ئۇ باي بولسىمۇ، سىلەر ئۈچۈن نامرات بولدى. مەقسىتى، ئۆزى نامرات بولۇش ئارقىلىق سىلەرنى روھىي جەھەتتىن باي قىلىش ئىدى.

¹⁰مەن سىلەرگە پايدىلىق بولغان بىر تەكلىپنى بېرەي. سىلەر ئۆتكەن يىلى پەقەت ئىئانە توپلاشنى ئوتتۇرىغا قويۇپلا قالماي، بەلكى ئۇنى ئۆز ئىختىيارىڭلار بىلەن ئەمەلگە ئاشۇرۇشتىمۇ ھەممىنىڭ ئالدىدا بولدۇڭلار. ¹¹ئەمدى بۇ خىزمەتنىڭ ئايىغىنى چىقىرىڭلار. سىلەر بۇ ئىشنى دەسلەپتە پىلانلىغان ۋاقتىڭلاردىكىدەك قىزغىنلىق بىلەن تاماملاڭلار، ھەمدە ئۆزۈڭلارنىڭ ئىقتىسادى يار بەرگەن شارائىت ئاستىدا ياردەم قولۇڭلارنى سۇنۇڭلار. ¹²بىر كىشى ئۆزى رازى بولۇپ، چامىسىنىڭ يېتىشىچە ئىئانە قىلسا، بۇ ئىش خۇدانى خۇرسەن قىلىدۇ. خۇدا بىركىمدىن ئۆزىدە يوقنى بېرىشنى تەلەپ قىلمايدۇ.

¹³باشقىلارنىڭ يۈكىنى يېنىكلىتىش ئۈچۈن ئۆزۈڭلارنى قىيناڭلار دېگىنىم يوق. ئەكسىچە، ئىككىلا تەرەپ باراۋەر بولسۇن دەيمەن. ¹⁴سىلەردە ئارتۇق بولغىنى ھازىر ئۇلارنىڭ كەم يېرىنى تولدۇرغىنىدەك، ئۇلاردا ئارتۇق بولغىنى كۈنلەرنىڭ بىرىدە سىلەرنىڭمۇ كەم يېرىڭلارنى تولدۇرىدۇ. مانا شۇنداق بولغاندا، باراۋەرلىك بولغان بولىدۇ. ¹⁵بۇ مۇقەددەس يازمىلاردا يېزىلغىنىغا ئوخشايدۇ:

«كۆپرەك يىغىۋالغانلارنىڭ ئېشىپ قالمىدى،

ئاز يىغىۋالغانلارنىڭمۇ يەتمەي قالمىدى.»

تىتۇس ۋە ئۇنىڭ خىزمەتداشلىرى

¹⁶مېنىڭ سىلەرگە بولغان قىزغىنلىقىمدەك قىزغىنلىقنى تىتۇسنىڭ قەلبىگە سالغان خۇداغا شۈكۈر! ¹⁷تىتۇسنىڭ يېنىڭلارغا بارماقچى بولغىنى پەقەت بىزنىڭ تەلىپىمىز بىلەنلا ئەمەس، بەلكى ئۇنىڭ ئۆز ئىختىيارى ۋە سىلەرگە بولغان قىزغىنلىقى بىلەن بولدى. ¹⁸بىز بىر قېرىندىشىمىزنى ئۇنىڭغا قوشۇپ قويماقچىمىز. ئۇ قېرىندىشىمىز خۇش خەۋەرنى يەتكۈزۈش يولىدا پۈتۈن ئېتىقادچىلار جامائەتلىرىنىڭ ماختىشىغا سازاۋەر بولغاندۇر. ¹⁹يەنە كېلىپ، ئۇ توپلانغان ئىئانىلارنى يېرۇسالېمغا بىز بىلەن بىرگە ئاپىرىش ئۈچۈن ئېتىقادچىلار جامائەتلىرى تەرىپىدىن تاللانغاندۇر. بىزنىڭ مەقسىتىمىز ئىئانە توپلاش ئارقىلىق رەببىمىزنى ئۇلۇغلاش ۋە ياردەمگە تەييار ئىكەنلىكىمىزنى كۆرسىتىشتۇر. ²⁰باشقىلارنىڭ قۇسۇر تېپىشىنىڭ ئالدىنى ئېلىش ئۈچۈن مەردلەرچە بېرىلگەن بۇ ئىئانىلارنى ئېلىپ بېرىشتا ئۇ قېرىندىشىمىزنى ئۆزىمىز بىلەن بىرگە ئېلىپ بېرىشنى لايىق تاپتۇق. ²¹بىز پەقەت رەببىمىزنىڭلا نەزىرىدە ئەمەس، بەلكى ئىنسانلارنىڭمۇ نەزىرىدە توغرا دەپ قارالغان ئىشلارنى قىلىشقا دىققەت قىلىپ كېلىۋاتىمىز.

²²بىز كۆپ ئىشلاردا كۆپ قېتىم سىنالغان ۋە باشقىلارغا ياردەم بېرىشتە قىزغىن دەپ قارالغان يەنە بىر قېرىندىشىمىزنىمۇ ئۇلار بىلەن بىرگە ئەۋەتمەكچىمىز. ئۇ سىلەرنىڭ بۇ ئىئانە ئىشىنى بىر باشقا ئېلىپ چىقالايدىغانلىقىڭلارغا ئىشەندى. بۇ ئىشەنچ ئۇنىڭ سىلەرگە ياردەم بېرىشتىكى قىزغىنلىقىنى ھەسسىلەپ ئاشۇردى. ²³تىتۇسقا كەلسەك، ئۇ مېنىڭ ھەمراھىم ۋە ئاراڭلاردا قىلىۋاتقان ئىشلىرىمدا خىزمەتدىشىمدۇر. باشقا ئىككى قېرىندىشىمىز بولسا جامائەتلەرنىڭ ۋەكىللىرى بولۇپ، ئۇلار ئەيسا مەسىھكە شان-شەرەپ كەلتۈرگۈچىلەردىندۇر. ²⁴شۇڭا سىلەر ھەرقايسى جامائەتلەر ئالدىدا ئۇلارغا مۇھەببىتىڭلارنى كۆرسىتىڭلار. شۇنىڭ بىلەن ئېتىقادچىلار جامائەتلىرى بىزنىڭ سىلەردىن ماختىنىشىمىزنىڭ ئورۇنلۇق ئىكەنلىكىنى بىلىدۇ.

9

سېخىي بولۇشقا ئۈندەش

¹ئېتىقادچىلار ئۈچۈن توپلىنىدىغان بۇ ئىئانە توغرۇلۇق سىلەرگە خەت يېزىۋېرىشىمنىڭ ھاجىتى يوق. ²چۈنكى ياردەم بېرىشكە قىزغىن ئىكەنلىكىڭلارنى بىلىمەن. مەن ماكېدونىيەدىكى ئېتىقادچىلارنىڭ ئالدىدا سىلەرنىڭ ئۆتكەن يىلدىن بېرى ئىئانە توپلاشقا تەييار ئىكەنلىكىڭلاردىن ماختىنىپ كەلدىم. سىلەرنىڭ قىزغىنلىقىڭلار ماكېدونىيەدىكى ئېتىقادچىلارنىڭ كۆپچىلىكىنىڭ ئىئانە توپلاش قىزغىنلىقىنى قوزغاتتى. ³سىلەر بىلەن ماختىنىشىمنىڭ قۇرۇق گەپ بولۇپ قالماسلىقى ئۈچۈن سىلەرنىڭ مېنىڭ ئېيتقىنىم بويىچە تەييارلىق قىلىپ قويۇشۇڭلار ئۈچۈن بۇ ئۈچ قېرىندىشىمىزنى يېنىڭلارغا ئەۋەتمەكچىمەن. ⁴ناۋادا ماكېدونىيەدىكى بەزى قېرىنداشلار مەن بىلەن بىرگە يېنىڭلارغا بېرىپ، سىلەرنىڭ تەييارلىق قىلمىغانلىقىڭلارنى كۆرسە، بىزنىڭ سىلەرگە بولغان كۈچلۈك ئىشەنچىمىز ۋەجىدىن خىجالەتچىلىكتە قېلىشىمىز ئېنىق، سىلەرنىڭ خىجالەتچىلىكتە قېلىشىڭلارنى دېمەيلى قويايلى. ⁵شۇ سەۋەبتىن سىلەرنىڭ بېرىشكە ۋەدە قىلغان ئىئانەڭلارنى ئالدىنئالا تەييار قىلىشىڭلار ئۈچۈن بۇ قېرىنداشلارنىڭ يېنىڭلارغا بىزدىن ئاۋۋال بېرىشىنى لايىق كۆردۈم. شۇنداق بولغاندا، ئىئانەڭلارنىڭ تەييارلانغانلىقىنى، ھەمدە ئىئانىنىڭ مەجبۇرىي ئەمەس، بەلكى ئىختىيارى يوسۇندا يىغىلغانلىقىنى كۆرۈۋالغىلى بولىدۇ. ⁶ئېسىڭلاردا بولسۇنكى، ئاز تېرىغان ئاز ئالىدۇ، كۆپ تېرىغان كۆپ ئالىدۇ. ⁷ھەركىم ئۆز كۆڭلىدە نىيەت قىلغىنى بويىچە بەرسۇن. ھېچكىم قىينىلىپ قالمىسۇن ياكى مەجبۇرلانمىسۇن. چۈنكى خۇدا خۇشاللىق بىلەن ئىئانە قىلغۇچىنى ياخشى كۆرىدۇ. ⁸خۇدا سىلەرگە لازىملىق بولغان نەرسىلەرنى سېخىيلىق بىلەن ئاتا قىلىدۇ. شۇڭا سىلەرنىڭ ھەر جەھەتتىكى ئېھتىياجىڭلار ھەر دائىم قانغان بولىدۇ. سىلەرمۇ باشقىلارغا سېخىيلىق بىلەن خەير ساخاۋەت قىلالايسىلەر. ⁹بۇ مۇقەددەس يازمىلاردا يېزىلغىنىغا ئوخشايدۇ:

«سېخىيدۇر ئۇلار، يوقسۇللارغا بېرەر سەدىقە،

مەڭگۈ ئۇنتۇلماس ھەققانىيلىقى ئۇلارنىڭ.»

¹⁰دېھقانغا تېرىغىلى ئۇرۇق، يېگىلى ئوزۇق ئاتا قىلغان خۇدا سىلەرنىڭ ھاجەتمەنلەرگە تېخىمۇ مەردلىك بىلەن بېرەلىشىڭلار ئۈچۈن سىلەردە بارنى كۆپەيتىدۇ. ¹¹سىلەرنىڭ ھەمىشە مەردلىك بىلەن باشقىلارغا ياردەم قىلىشىڭلار ئۈچۈن خۇدا مال-دۇنيايىڭلارنى ھەر جەھەتتىن بەرىكەتلىك قىلىدۇ. بىز سىلەرنىڭ ئىئانەڭلارنى ئېھتىياجلىق بولغانلارغا بەرگىنىمىزدە، ئۇلار خۇداغا رەھمەت ئېيتىدۇ. ¹²سىلەرنىڭ قىلغان بۇ ياردىمىڭلار يېرۇسالېمدىكى ئېتىقادچىلارنىڭ ئېھتىياجىنى قاندۇرۇپلا قالماي، يەنە ئۇلارنىڭ خۇداغا بولغان مىننەتدارلىقىنى تېخىمۇ ئاشۇرىدۇ. ¹³سىلەرنىڭ بۇ قېتىمقى ئىئانەڭلار ئېتىقادىڭلارنىڭ ھەقىقىي ئىكەنلىكىنىڭ ئىسپاتىدۇر. كىشىلەر سىلەرنىڭ ئۆزۈڭلار ئېتىراپ قىلغان ئەيسا مەسىھ ھەققىدىكى خۇش خەۋەرگە سادىق بولغانلىقىڭلار، شۇنداقلا مال-مۈلكۈڭلارنى كۆپچىلىك بىلەن مەردلەرچە ئورتاقلاشقانلىقىڭلار ئۈچۈن، خۇدانى ئۇلۇغلايدۇ. ¹⁴ئۇلار خۇدا سىلەرگە ئاتا قىلغان پەۋقۇلئاددە مېھىر-شەپقەت سەۋەبىدىن سىلەرگە ئىشتىياق باغلاپ، سىلەرگە دۇئا قىلىدۇ. ¹⁵خۇدانىڭ تىل بىلەن تەسۋىرلىگىلى بولمايدىغان ئىلتىپاتى ئۈچۈن خۇداغا شۈكۈر!

10

پاۋلۇسنىڭ ئەلچىلىك ھوقۇقىنى ئاقلىشى

¹سىلەر بىلەن بىرگە بولغاندا مۇئامىلىسى يۇمشاق، لېكىن بىرگە بولمىغاندا قاتتىق قول دەپ قارالغان مەنكى پاۋلۇس ئەيسا مەسىھنىڭ مۇلايىملىقى ۋە رەھىمدىللىكى بىلەن سىلەردىن شۇنى ئۆتۈنۈمەنكى، ²يېنىڭلارغا بارغىنىمدا، بىزنى بۇ دۇنيانىڭ ئارزۇ-ھەۋەسلىرى بويىچە ياشايدىغانلار دەپ قارايدىغان بەزى كىشىلەرگە قىلماقچى بولغان قاتتىق مۇئامىلىنى سىلەرگىمۇ قىلىشىمىزغا مەجبۇر قىلماڭلار. ³گەرچە بۇ دۇنيادا ياشىساقمۇ، لېكىن بۇ دۇنياغا خاس قوراللار بىلەن ئۇرۇش قىلمايمىز. ⁴چۈنكى ئۇرۇش قوراللىرىمىز بۇ دۇنياغا خاس قوراللار ئەمەس، بەلكى خۇدانىڭ كۈچ-قۇدرىتىگە ئىگە بولغان ۋە شەيتاننىڭ مۇستەھكەم قەلئەلىرىنى گۇمران قىلالايدىغان قوراللاردۇر. ⁵بىز بۇ قوراللار بىلەن بىمەنە سەپسەتىلەرنى ۋە خۇدانى تونۇشقا توسقۇنلۇق قىلىدىغان ھەر خىل ھاكاۋۇرلۇقلارنى بىتچىت قىلىمىز، ھەمدە كىشىلەرنىڭ ئوي-پىكىرلىرىنى ئەسىر قىلىپ، ئەيسا مەسىھكە بېقىندۇرىمىز. ⁶سىلەر ئەيسا مەسىھكە تولۇق ئىتائەت قىلغاندىن كېيىن، ئاراڭلاردىكى ھەر خىل ئىتائەتسىزلىك قىلغۇچىلارنى جازالاشقا تەييارمىز.

⁷سىلەر پەقەت سىرتقى كۆرۈنۈشكىلا قارايدىكەنسىلەر. ئەگەر بىرى ئۆزىنى ئەيسا مەسىھكە ۋەكىللىك قىلىمەن دەپ قاراپ، مېنى ئىنكار قىلسا، يەنە ياخشىراق ئويلىنىپ كۆرۈپ، مېنىڭمۇ ئەيسا مەسىھكە ۋەكىللىك قىلىدىغانلىقىمنى ئېتىراپ قىلسۇن. ⁸رەببىمىز تەرىپىدىن ماڭا بېرىلگەن ئەلچىلىك ھوقۇقى سىلەرنى نابۇت قىلىش ئۈچۈن ئەمەس، بەلكى سىلەرنى روھىي جەھەتتە يېتىلدۈرۈش ئۈچۈن بېرىلگەندۇر. شۇڭا بۇ ھوقۇق بىلەن زىيادە ماختانساممۇ، ھەرگىز خىجالەت بولمايمەن.

⁹سىلەر خەتلىرىمنى بىزنى قورقۇتۇش ئۈچۈن يازدى، دەپ ئويلاپ قالماڭلار. ¹⁰دەرۋەقە، بەزىلەر: «پاۋلۇسنىڭ خەتلىرى قاتتىق ھەم كۈچلۈك، بىراق ئۆزىنى كۆرسىڭىز ئىقتىدارسىز، سۆزلىرى تۇتۇرۇقسىز» دېيىشىدۇ. ¹¹بۇ كىشىلەر شۇنى بىلسۇنكى، يىراقتىن سىلەرگە يازغان خەتلىرىمدە نېمە قىلىمەن دېگەن بولسام، يېنىڭلارغا بارغاندىمۇ شۇنى قىلىمەن.

¹²ئۆزىنى قالتىس چاغلايدىغان كىشىلەر بىلەن ئۆزىمىزنى بىر قاتاردا قويمايمىز ۋە ئۆزىمىزنى ئۇلار بىلەن قەتئىي سېلىشتۇرمايمىز. ئۇلار ئۆزلىرىنى ئۆزلىرىنىڭ ئۆلچىمى بىلەن ئۆلچەيدۇ، ئۆزلىرىنى ئۆزلىرى بىلەن سېلىشتۇرىدۇ. مانا بۇ ئۇلارنىڭ ئەقىلسىزلىقىدۇر. ¹³لېكىن بىز ئۆزىمىزدە بولمىغان ھوقۇقلار بىلەن ماختىنىپ يۈرگىنىمىز يوق. ماختانساقمۇ، خۇدانىڭ بىزگە بەرگەن خىزمىتى دائىرىسىدە ماختىنىۋاتىمىز. بۇ خىزمەت سىلەرگە خۇش خەۋەر يەتكۈزۈشنىمۇ ئۆز ئىچىگە ئالغاندۇر. ¹⁴ئەگەر بىز خۇش خەۋەرنى سىلەرگە تۇنجى يەتكۈزگەنلەردىن بولمىغان بولساقىدۇق، ھوقۇقلىرىمىزدىن ماختىنىشىمىز بىزنىڭ ئۆز خىزمەت دائىرىمىزنىڭ سىرتىغا چىقىپ كەتكەنلىك دەپ ھېسابلانغان بولاتتى. لېكىن ئەيسا مەسىھ توغرىسىدىكى خۇش خەۋەرنى يىراقتىكى سىلەرگە دەسلەپ يەتكۈزگەن بىز بولدۇق. ¹⁵قىسقىسى، ئۆزىمىزنىڭ خىزمەت دائىرىمىزدىن چىقىپ، باشقىلارنىڭ خىزمىتى بىلەن ماختانغىنىمىز يوق. بىز پەقەت ئېتىقادىڭلارنىڭ تېخىمۇ كۈچىيىپ، ئاراڭلاردا قىلغان خىزمىتىمىزنىڭ تېخىمۇ كېڭىيىشىنى ئۈمىد قىلىمىز. ¹⁶شۇنداق بولغاندا، بىز سىلەردىنمۇ يىراق بولغان، تېخى خوش خەۋەر يەتكۈزۈلمىگەن جايلارغا بېرىپ، خوش خەۋەر يەتكۈزەلەيمىز. تەييارغا ھەييار بولۇپ، باشقىلارنىڭ قىلغان خىزمىتى بىلەن ماختىنىش بىزگە ياتتۇر. ¹⁷مۇقەددەس يازمىلاردا يېزىلغىنىدەك، «ماختىنىدىغانلار رەببىمىز بىلەن ماختانسۇن.» ¹⁸چۈنكى ئۆز-ئۆزىنى ماختايدىغانلار ئەمەس، بەلكى رەببىمىزنىڭ ماختىشىغا مۇيەسسەر بولغان كىشى ھەقىقىي ماختاشقا ئەرزىيدۇ.

11

ساختا ئەلچىلەر

ئەخمەقلىق قىلىپ، بىرئاز ماختىنىپ قويسام، ئېغىر ئالمىغايسىلەر، سەۋرچان بولغايسىلەر! ²مەن سىلەرنى قىزغىنىمەن. بۇ خۇداغا بولغان مېھىر-مۇھەببىتىمدىن كەلگەندۇر. مەن گويا بىر پاك قىزنى ياتلىق قىلماقچى بولغاندەك، سىلەرنىمۇ «يېگانە ئەر»گە، يەنى ئەيسا مەسىھكە ياتلىق قىلماقچىمەن. ³بىراق سىلەرمۇ ھاۋائانا ھىيلىگەر يىلانغا ئىشىنىپ ئازغاندەك ئېزىپ، ئەيسا مەسىھكە بولغان سەمىمىي ۋە پاك قەلبىڭلارنىڭ بۇلغىنىشىدىن ئەنسىرەيمەن. ⁴چۈنكى سىلەر ئەيسا مەسىھ توغرىسىدا مەن يەتكۈزگەن خۇش خەۋەرگە ئوخشىمايدىغان باشقا بىر تەلىمنى بەرگەنلەرگە يول قويدۇڭلار. سىلەر قوبۇل قىلغان مۇقەددەس روھتىن باشقا بىر روھ ۋە سىلەر قوبۇل قىلغان خۇش خەۋەردىن باشقا بىر خوش خەۋەر ھەققىدە بېرىلگەن تەلىملەرنىمۇ قوبۇل قىلدىڭلار. ⁵ھالبۇكى، مەن ئۆزۈمنى ھېچقانداق بىر ئىشتا سىلەر قالتىس دەپ قارىغان ئاشۇ ئاتالمىش ئەلچىلەردىن تۆۋەن دەپ قارىمايمەن! ⁶ناتىق بولمىساممۇ، لېكىن بىلىمىم بار. قىلىۋاتقان ھەربىر خىزمىتىم بۇنى ھەر جەھەتتىن ئوچۇق ئىسپاتلاپ تۇرۇپتۇ.

⁷مېنىڭ سىلەرنى چوڭ كۆرۈپ، ئۆزۈمنى تۆۋەن تۇتۇپ، خۇدانىڭ خۇش خەۋىرىنى سىلەرگە ھەق ئالماي يەتكۈزگىنىم گۇناھ بولدىمۇ؟^{* 8}مەن سىلەرگە خىزمەت قىلىش ئۈچۈن باشقا جامائەتلەردىن بۇلىغاندەك ھەق ئالدىم. ⁹سىلەر بىلەن بىرگە بولغان ۋاقىتلىرىمدا، ئېھتىياجىم بولسىمۇ، ھېچقايسىڭلارغا ئېغىرىمنى سالمىدىم. چۈنكى ماكېدونىيە ئۆلكىسىدىن كەلگەن قېرىنداشلار كەم-كۈتىمنى تولۇقلاپ بەردى. ھېچقانداق ئىشتا سىلەرگە يۈك بولمىدىم، بۇنىڭدىن كېيىنمۇ يۈك بولمايمەن. ¹⁰پۈتۈن يۇناندا ھېچقانداق ئادەم مېنىڭ بۇ ھەققىدىكى ماختىنىشىمنى توسۇپ قالالمايدۇ. چۈنكى مەن بۇ سۆزنى قەلبىمدىكى ئەيسا مەسىھنىڭ ھەقىقىتىگە ئاساسەن دەۋاتىمەن. ¹¹نېمە ئۈچۈن سىلەردىن ھەق ئالمىدىم؟ سىلەرنى سۆيمىگەنلىكىم ئۈچۈنمۇ؟ ياق، خۇداغا ئايانكى، سىلەرنى سۆيىمەن! ¹²ئاتالمىش ئەلچىلەرنىڭ: «بىزنىڭ قىلىۋاتقىنىمىز بىلەن ئۇلارنىڭ قىلىۋاتقىنىدا ھېچقانداق پەرق يوق» دەپ ماختىنىشىغا پۇرسەت بەرمەسلىك ئۈچۈن، سىلەردىن ھەق ئالماي قىلىۋاتقان خالىس ئىشلىرىمنى داۋاملاشتۇرىمەن. ¹³چۈنكى بۇلار ساختا ئەلچىلەر، ھىيلىگەر ئادەملەر بولۇپ، ئۆزلىرىنى ئەيسا مەسىھنىڭ ئەلچىلىرى دەپ پەردازلايدۇ. ¹⁴ئەمەلىيەتتە، بۇ ھەيران قالارلىق ئىش ئەمەس، چۈنكى شەيتانمۇ ئۆزىنى يورۇقلۇق پەرىشتىسى دەپ پەردازلايدۇ. ¹⁵شۇڭا شەيتاننىڭ بۇ چاكارلىرىمۇ ئۆزلىرىنى ئادالەتنىڭ خىزمەتكارلىرى دەپ پەردازلىۋالسا، ئەجەبلىنەرلىك ئەمەس. ئۇلارنىڭ ئاقىۋىتى ئۆزلىرىنىڭ ئەمەللىرىگە لايىق بولىدۇ.

پاۋلۇسنىڭ تارتقان ئازاب-ئوقۇبەتلىرى

¹⁶يەنە شۇنى ئېيتىمەنكى، ھېچقايسىڭلار مېنى ئەخمەق دەپ قارىماڭلار. ئەگەر ئەخمەق دەپ قارىساڭلار، بىر ئەخمەقنى قوبۇل قىلغانچىلىك بولسىمۇ مېنى قوبۇل قىلىڭلار. شۇنىڭ بىلەن مەنمۇ بىرئاز ماختىنىۋالاي. ¹⁷بۇ سۆزلىرىم رەببىمىز مەندىن تەلەپ قىلغان سۆزلەر ئەمەس. مېنىڭ بۇنداق ماختىنىشىم پەقەتلا بىر ئەخمەقنىڭ يۈرەكلىك پو ئاتقانلىقىدۇر، خالاس. ¹⁸نۇرغۇن كىشىلەر بۇ دۇنيادىكى ئىشلىرى بىلەن ماختىنىپ كېتىدىكەن، مەنمۇ ماختىنىپ باقاي. ¹⁹چۈنكى سىلەر ئۆزۈڭلارنى شۇنچە ئەقىللىق چاغلايسىلەر-يۇ، بۇ ساختا ئەلچىلەرنىڭ ئەخمىقانە تەلىملىرىگە يول قويىسىلەر! ²⁰ئۇلارنىڭ سىلەرنى قۇل ئورنىدا كۆرۈشىگە، ھەققىڭلارنى يېيىشىگە، سىلەردىن نەپ ئېلىشىغا، سىلەرگە چوڭچىلىق قىلىشىغا ۋە يۈزۈڭلارغا ئۇرۇشىغا يول قويىسىلەر. ²¹بىز سىلەرگە شۇنداق مۇئامىلە قىلىشتا «ئاجىز»لىق قىلغانلىقىمىزدىن خىجىلمىز. لېكىن ئۇلاردىن بىرلىرى بىرەر ئىشتىن ماختىنىشقا جۈرئەت قىلسا (دۆتلەرچە سۆزلەپ قوياي)، مەنمۇ شۇ ئىشتىن ماختىنىشقا جۈرئەت قىلالايمەن. ²²ئۇلار سېپى ئۆزىدىن ئىبرانىيمۇ؟ مەنمۇ ئىبرانىي. ئۇلار ئىسرائىللارمۇ؟ مەنمۇ ئىسرائىل. ئۇلار ئەجدادىمىز ئىبراھىمنىڭ ئەۋلادىدىنمۇ؟ مەنمۇ ئۇنىڭ ئەۋلادىدىن. ²³ئۇلار ئەيسا مەسىھنىڭ خىزمەتكارلىرىمۇ؟ ئەقىلدىن ئازغانلاردەك ئېيتسام، مەن ئۇلاردىن تېخىمۇ يۇقىرى تۇرىدىغان بىر خىزمەتكارى. مەن تېخىمۇ جاپالىق ئىشلىدىم، زىنداندا ئۇلاردىن كۆپ ياتتىم. كۈرمىڭ قېتىم قامچا يېدىم، قايتا-قايتا ئۆلۈم خەۋپلىرىگە دۇچ كەلدىم. ²⁴يەھۇدىيلارنىڭ ئوتتۇز توققۇز قامچا جازاسىغا بەش قېتىم تارتىلدىم. ²⁵ئۈچ قېتىم رىم ھۆكۈمرانلىرىدىن تاياق يېدىم، بىر قېتىم چالما-كېسەك قىلىندىم. دېڭىزدا ئۈچ قېتىم ھادىسىگە ئۇچراپ، بىر كېچە-كۈندۈزنى كېمىسىز ئۆتكۈزدۈم. ²⁶كۆپ قېتىم ئۇزۇن سەپەرلەردە بولدۇم، دەريالاردا خەتەرلەرگە ئۇچرىدىم. قاراقچىلارنىڭ، ئۆز خەلقىمنىڭ ۋە يەھۇدىي ئەمەسلەرنىڭ ئارىسىدا خەۋپلىك كۈنلەرنى باشتىن كەچۈردۈم. شەھەرلەردە، چۆللەردە ۋە دېڭىزلاردا خېيىم-خەتەرلەرگە دۇچ كەلدىم، ساختا قېرىنداشلارنىڭ ئارىسىدىمۇ خېيىم-خەتەرلەرگە يولۇقتۇم. ²⁷خىزمىتىمنى تىرىشىپ-تىرمىشىپ ئىشلىدىم. تالاي كېچىلەرنى ئۇيقۇسىز ئۆتكۈزدۈم، ئاچلىق ۋە ئۇسسۇزلۇقنىڭ تەمىنى تېتىدىم. يەيدىغانغا تاماق، سوغۇقتا كىيىدىغانغا كىيىم تاپالماي، ئاچ-يالىڭاچ قالدىم. ²⁸بۇلاردىن باشقا، ھەر كۈنى پۈتۈن ئېتىقادچىلار جامائەتلىرىنىڭ غېمىنى يېدىم. ²⁹مەن ئاجىزلارغا ھېسداشلىق قىلمىدىممۇ؟! شەيتاننىڭ تۇزىقىغا چۈشۈپ، ئېزىپ كەتكەنلەر ئۈچۈن ئۆرتەنمىدىممۇ؟! ³⁰ئەگەر ماختىنىشقا توغرا كەلسە، ئاجىزلىقىم بىلەن ماختىنىمەن. ³¹مېنىڭ يالغان ئېيتمىغانلىقىمنى رەببىمىز ئەيسانىڭ ئاتىسى بولغان مەڭگۈ مەدھىيەلەشكە ئەرزىيدىغان خۇدا بىلىدۇ. ³²پادىشاھ ئارېتاسنىڭ قول ئاستىدىكى دەمەشقنىڭ ۋالىيسى مېنى تۇتۇش ئۈچۈن پۈتۈن شەھەرنى قاتتىق قامال قىلغانىدى. ³³لېكىن مەن سېپىلدىكى بىر كاماردىن سېۋەت بىلەن پەسكە چۈشۈپ، ئۇنىڭدىن قۇتۇلدۇم.

12

پاۋلۇسقا كەلگەن ۋەھىي

¹ماختىنىشنىڭ پايدىسى بولمىسىمۇ، ماختانمىسام بولمايدۇ. ئەمدى رەببىمىزدىن كەلگەن غايىبانە ئالامەتلەر ۋە ۋەھىيلەر ئۈستىدە توختىلاي. ²ئەيسا مەسىھكە مەنسۇپ بولغان بىر ئادەمنى^* تونۇيمەن. ئۇ ئون تۆت يىل ئىلگىرى ئەرشئەلاغا كۆتۈرۈلدى. ئۇ كۆتۈرۈلگەندە، تېنى كۆتۈرۈلدىمۇ ياكى روھى كۆتۈرۈلدىمۇ بىلمەيمەن، بۇنى خۇدا ئۆزى بىلىدۇ. ³ئىشقىلىپ، بۇ ئادەمنىڭ جەننەتكە كىرىپ چىققانلىقىنى بىلىمەن. تېنى كۆتۈرۈلدىمۇ ياكى روھى كۆتۈرۈلدىمۇ بىلمەيمەن، بۇنى خۇدا ئۆزى بىلىدۇ. ⁴ئۇ جەننەتتە تىل بىلەن ئىپادىلىگىلى بولمايدىغان، ئىنسانلارغا ئېيتىش مەنئى قىلىنغان ئاجايىپ ئىشلارنى ئاڭلىدى. ⁵شۇنداق بىر ئادەم بىلەن ماختىنىمەن، ئۆزۈم ھەققىدە بولسا ئاجىزلىقلىرىمنى ئېتىراپ قىلماقتىن باشقا بىرەر ئىش بىلەن ماختىنالمايمەن. ⁶ئەمەلىيەتتە، مەن ماختانساممۇ ئەخمەق ھېسابلانمايمەن، چۈنكى مەن راست گەپ قىلىمەن. لېكىن كىشىلەر مېنى كۆرگىنىدىن ياكى ئاڭلىغىنىدىن ئۈستۈن ئويلاپ قالمىسۇن دەپ، ماختىنىشتىن نېرى تۇرىمەن.

⁷خۇدادىن ماڭا كەلگەن ۋەھىيلەرنىڭ ئاجايىپ-غارايىپلىقى بىلەن كۆرەڭلەپ كەتمەسلىكىم ئۈچۈن، تېنىمگە تىكەن سانجىلغاندەك بىر ئازاب يېپىشىپ، مېنى خۇددى شەيتاننىڭ يالاقچىسىنىڭ قىيناشلىرىدەك قىينىدى. بۇ مېنىڭ كۆرەڭلەپ كەتمەسلىكىم ئۈچۈن ئىدى. ⁸ئازابتىن قۇتۇلۇش ئۈچۈن رەببىمىزگە ئۈچ قېتىم يېلىنىپ دۇئا قىلدىم. ⁹لېكىن ئۇ ماڭا: «مېھىر-شەپقىتىم ساڭا يېتەرلىكتۇر، مېنىڭ كۈچ-قۇدرىتىم سېنىڭ ئاجىزلىقلىرىڭدا تولۇق نامايان بولىدۇ» دېدى. شۇڭا ھاياتىمدا ئەيسا مەسىھنىڭ قۇدرىتى نامايان بولسۇن دەپ، ئاجىزلىقلىرىمدىن ماختىنىشتىن خۇرسەن بولىمەن. ¹⁰ئەيسا مەسىھ ئۈچۈن ئاجىزلىقلارنى، ھاقارەتلەرنى، ئازاب-ئوقۇبەتلەرنى، زىيانكەشلىكلەرنى ۋە قىيىنچىلىقلارنى خۇشاللىق دەپ بىلىمەن. چۈنكى قاچان ئاجىز بولسام، شۇ چاغدا كۈچلۈك بولىمەن.

پاۋلۇسنىڭ كورىنتتىكى جامائەتكە كۆڭۈل بۆلۈشى

¹¹ئەخمەققە ئوخشاپ قالدىم، مېنىڭ بۇنداق بولۇشۇمغا سىلەر سەۋەبچى. مەن ئەسلىدە سىلەرنىڭ ماختىشىڭلارغا ئېرىشىشىم كېرەك ئىدى. چۈنكى ھېچنېمىگە ئەرزىمىسەممۇ، سىلەر قالتىس دەپ قارىغان ئاشۇ ئەلچىلەردىن قىلچە قېلىشمايمەن. ¹²مەن ئاراڭلاردا بولغان چاغلىرىمدا ئەلچىلىكىمنى ئىسپاتلاش ئۈچۈن سەۋرچانلىق بىلەن مۆجىزە ۋە كارامەت كۆرسەتتىم ۋە قۇدرەتلىك ئىشلارنى قىلدىم. ¹³باشقا ئېتىقادچىلار جامائىتى ئارىسىدا قىلغان، بىراق سىلەرنىڭ ئاراڭلاردا قىلمىغان بىردىنبىر «خاتالىقىم» سىلەرنىڭ ئىقتىسادىي ياردىمىڭلارنى قوبۇل قىلمىغانلىقىمدۇر. بۇ «ئادالەتسىزلىك»ىمنى ئەپۇ قىلغايسىلەر!

¹⁴ھازىر مەن يېنىڭلارغا ئۈچىنچى قېتىم بېرىشقا تەييارمەن. سىلەرگە ھېچقانداق ئېغىرىمنى سالغۇم يوق. چۈنكى ماڭا كېرىكى سىلەرنىڭ بايلىقىڭلار ئەمەس، بەلكى ئۆزۈڭلاردۇرسىلەر. پەرزەنتلەر ئاتا-ئانىلار ئۈچۈن ئەمەس، بەلكى ئاتا-ئانىلار پەرزەنتلەر ئۈچۈن مال-مۈلۈك يىغىشى كېرەك. ¹⁵سىلەر ئۈچۈن مەن بارلىقىمنى سەرپ قىلىشقا، ھەتتا جېنىمنى پىدا قىلىشقىمۇ رازىمەن. ئەجەبا، مەن سىلەرنى قانچە كۆپ سۆيسەم، سىلەرنىڭ مۇھەببىتىڭلارغا شۇنچە ئاز ئېرىشەمدىمەن؟

¹⁶بولدىلا، قىسقىسى مەن سىلەرگە يۈك بولغان ئەمەسمەن. بىراق بەزىلەر مېنى ھىيلىگەرلىك قىلىپ، يالغان سۆزلەپ، سىلەردىن نەپ ئۈندۈرۈۋېلىۋاتىدۇ، دېيىشىپ يۈرىدۇ. ¹⁷ئەجەبا، مەن سىلەرگە ئەۋەتكەن ئادەملەرنىڭ بىرەرسى ئارقىلىق سىلەردىن نەپ ئالدىممۇ؟ ¹⁸تىتۇسنى سىلەرنىڭ يېنىڭلارغا بېرىشقا ئۈندىدىم ۋە ئۇنى يەنە بىر قېرىندىشىمىز بىلەن بىرگە يېنىڭلارغا ئەۋەتتىم. تىتۇسنىڭ سىلەردىن نەپ ئالغان يېرى بارمۇ؟ ئۇ مەن بىلەن بىر يولدا بىر نىيەتتە خىزمەت قىلىۋاتىدىغۇ! ¹⁹ياكى سىلەر بۇرۇندىن بىزنى: «ئۇلار ئالدىمىزدا ئۆزلىرىنى ئاقلاپ كېلىۋاتىدۇ» دەپ ئويلامسىلەر؟ بىز ئۇنداق قىلمىدۇق. بىز پەقەت ئەيسا مەسىھكە مەنسۇپ بولغان كىشىلەر سۈپىتىدە خۇدا ئالدىدا سۆزلەۋاتىمىز. قەدىرلىك قېرىنداشلار، بىز قىلىۋاتقان ھەممە ئىش سىلەرنىڭ ئېتىقادتا پىشىپ يېتىلىشىڭلار ئۈچۈندۇر. ²⁰يېنىڭلارغا بارغىنىمدا، سىلەرنىڭ كۈتكەن يېرىمدىن چىقماي قېلىشىڭلاردىن، شۇنىڭ بىلەن مېنىڭ سىلەرگە بولغان مۇئامىلەمنىڭمۇ سىلەرنىڭ كۈتكەن يېرىڭلاردىن چىقماي قېلىشىدىن ئەنسىرەيمەن. سىلەردە جېدەلخورلۇق، ھەسەتخورلۇق، غەزەپ، شەخسىيەتچىلىك، تۆھمەتخورلۇق، غەيۋەتخورلۇق، تەكەببۇرلۇق ۋە پاراكەندىچىلىكلەرنىڭ بولۇشىدىن ئەنسىرەيمەن. ²¹بۇ قېتىم سىلەرنىڭ يېنىڭلارغا بارغىنىمدا، خۇدايىمنىڭ مېنى ئالدىڭلاردا خىجالەت قىلىشىدىن، شۇنداقلا ناپاك، ئەخلاقسىز ۋە شەھۋانىي ئىشلارنى قىلغان ۋە بۈگۈنگە قەدەر توۋا قىلمىغان نۇرغۇن گۇناھكارلار ئۈچۈن قايغۇغا سېلىشىدىن قورقىمەن.

13

ئاخىرقى ئاگاھلاندۇرۇش ۋە سالاملار

¹بۇ قېتىم يېنىڭلارغا بارسام، بۇ ئۈچىنچى قېتىم بېرىشىم بولىدۇ. ھەرقانداق ئىش مۇقەددەس يازمىلاردا يېزىلغاندەك، ئىككى ياكى ئۈچ ئادەمنىڭ گۇۋاھلىقى بىلەن بىر تەرەپ قىلىنىدۇ. ²يېنىڭلارغا ئىككىنچى قېتىم بارغىنىمدا، بۇرۇن گۇناھ سادىر قىلغانلارنى ئاگاھلاندۇرغانىدىم. ئەمدى يەنە ئاگاھلاندۇرۇمەنكى، بۇ قېتىم بارغىنىمدا، بارلىق گۇناھ سادىر قىلغۇچىلارغا كەڭچىلىك قىلمايمەن. ³شۇ چاغدا سىلەر ئەيسا مەسىھنىڭ مەن ئارقىلىق سۆزلەيدىغانلىقىنى ئىسپاتلايدىغان دەلىللەرگە ئېرىشىسىلەر. چۈنكى ئەيسا مەسىھ ئالدىڭلاردا ئاجىز ئەمەس، بەلكى ئىنتايىن قۇدرەتلىكتۇر. ⁴گەرچە ئۇ بۇرۇن ئاجىزلىقى بىلەن كرېستكە مىخلانغان بولسىمۇ، لېكىن ئۇ ھازىر خۇدانىڭ قۇدرىتى بىلەن ياشىماقتا. ئۇنىڭغا باغلىنىپ، بىزمۇ ئاجىزلىدۇق. ئەمما بىز يېنىڭلارغا بارغان ۋاقتىمىزدا، سىلەر بىزنىڭمۇ مەسىھكە ئوخشاش خۇدانىڭ قۇدرىتى بىلەن ياشاۋاتقانلىقىمىزنى كۆرىسىلەر.

⁵ئېتىقادىڭلاردا تۇرۇۋاتامسىلەر؟ قېنى، ئېتىقادىڭلارنى سىناپ بېقىڭلار، ئۆز-ئۆزۈڭلارنى تەكشۈرۈپ كۆرۈڭلار. ئەيسا مەسىھنىڭ ئاراڭلاردا ئىكەنلىكىنى بىلمەمسىلەر؟ بىلمىسەڭلار، بۇ سىلەرنىڭ سىناقتىن ئۆتەلمىگىنىڭلار بولمامدۇ؟! ⁶مېنىڭ ئەلچىلىك سىنىقىدىن ئۆتكەنلىكىمنى بىلىپ قېلىشىڭلارنى ئۈمىد قىلىمەن. ⁷سىلەرنىڭ ھېچقانداق يامان ئىش قىلماسلىقىڭلار ئۈچۈن خۇداغا دۇئا قىلىمەن. مېنىڭ بۇنداق قىلىشىم، مېنىڭ ئەلچىلىك سىنىقىدىن ئۆتتى دەپ قارىلىشىم ئۈچۈن ئەمەستۇر. مەن سىناقتىن ئۆتمىدى دەپ قارالساممۇ مەيلى. مۇھىمى سىلەرنىڭ توغرا ئىش قىلىشىڭلاردۇر. ⁸بىز ھەقىقەتكە قارشى ئىش قىلمايمىز، بەلكى ھەقىقەت بويىچە ئىش قىلىمىز.

⁹ئېتىقادىڭلار كۈچىيىپ، ئالدىڭلاردا ئاجىز كۆرۈنسەم مەيلى، يەنىلا خۇشالدۇرمەن. بىز سىلەرنىڭ ھەممە ئىشتا تولۇق يېتىلىشىڭلار ئۈچۈن دۇئا قىلىمىز. ¹⁰يېنىڭلارغا بېرىشتىن بۇرۇن بۇ خەتنى يېزىشىمدىكى مەقسىتىم، يېنىڭلارغا بارغىنىمدا سىلەرگە قاتتىق مۇئامىلە قىلىپ سالماسلىقىم ئۈچۈندۇر. چۈنكى رەببىمىز بۇ ھوقۇقنى ماڭا ئېتىقادىڭلارنى بەربات قىلىش ئۈچۈن ئەمەس، بەلكى ئېتىقادىڭلارنى مۇستەھكەملەش ئۈچۈن بەرگەندۇر.

¹¹قېرىنداشلار، ئەڭ ئاخىردا شۇنى دەيمەنكى، خۇشال-خۇرام ياشاڭلار، ئېتىقادىڭلارنىڭ مۇكەممەل بولۇشىغا ئىنتىلىڭلار، بىر-بىرىڭلارنى رىغبەتلەندۈرۈڭلار، بىر نىيەت، بىر مەقسەتتە بولۇڭلار، ئىناق ئۆتۈڭلار. مېھىر-مۇھەببەت ۋە ئامانلىقنىڭ مەنبەسى بولغان خۇدا سىلەرگە يار بولغاي! ¹²بىر-بىرىڭلار بىلەن قىزغىن سالاملىشىڭلار. ¹³خۇدانىڭ بارلىق مۇقەددەس خەلقىدىن سىلەرگە سالام.

¹⁴رەببىمىز ئەيسا مەسىھنىڭ مېھىر-شەپقىتى، خۇدانىڭ مېھىر-مۇھەببىتى ۋە مۇقەددەس روھ سىلەرگە يار بولغاي!