ئۇيغۇرچە مۇقەددەس كىتاب جەمئىيىتى

كورىنتلىقلارغا يېزىلغان بىرىنچى خەت

1

^1‏-2خۇدانىڭ ئىرادىسى بىلەن ئەيسا مەسىھنىڭ ئەلچىسى بولۇشقا چاقىرىلغان مەنكى پاۋلۇس ۋە قېرىندىشىمىز سوستېنىستىن كورىنت شەھىرىدىكى خۇداغا مەنسۇپ بولغان ئېتىقادچىلار جامائىتىگە سالام. ئەيسا مەسىھكە ئىبادەت قىلىۋاتقان ھەرقايسى جايدىكى كىشىلەرگە ئوخشاش، سىلەرمۇ ئەيسا مەسىھ ئارقىلىق خۇدا تەرىپىدىن پاكلىنىپ، خۇدانىڭ مۇقەددەس خەلقى بولۇشقا چاقىرىلدىڭلار. ئەيسا مەسىھ بىزنىڭ رەببىمىزدۇر ھەم ئۇلارنىڭمۇ رەببىدۇر. ³خۇدائاتىمىز ۋە رەببىمىز ئەيسا مەسىھ سىلەرگە مېھىر-شەپقەت ۋە ئامانلىق ئاتا قىلغاي!

خۇدانىڭ كۆرسەتكەن ئىلتىپاتى

⁴سىلەر ئەيسا مەسىھكە مەنسۇپ بولغانلىقىڭلار ئۈچۈن، خۇدا سىلەرگە مېھىر-شەپقەت ئاتا قىلدى. شۇ سەۋەبتىن مەن سىلەر ئۈچۈن دائىم خۇداغا شۈكۈر ئېيتىمەن. ⁵چۈنكى خۇدا ئەيسا مەسىھ ئارقىلىق سىلەرگە كۆپ ئىلتىپات كۆرسىتىپ، سىلەرنى ئۆزى ھەققىدە مول بىلىمگە ۋە بۇ بىلىمنى باشقىلارغا يەتكۈزىدىغان سۆز قابىلىيىتىگە ئىگە قىلدى. ⁶شۇنداق قىلىپ، مەن سىلەرگە يەتكۈزگەن ئەيسا مەسىھ توغرىسىدىكى خۇش خەۋەرنىڭ ھەقىقىي ئىكەنلىكى ئىسپاتلاندى. ⁷سىلەر رەببىمىز ئەيسا مەسىھنىڭ قايتىپ كېلىشىنى ئىنتىزارلىق بىلەن كۈتۈۋاتقان مۇشۇ كۈنلەردە مۇقەددەس روھ ئاتا قىلغان ھېچقانداق ھەدىيەدىن كەم قالمىدىڭلار. ⁸ئەيسا مەسىھ قايتىپ كەلگەن كۈندە سىلەرنىڭ ئەيىبسىز بولۇشۇڭلار ئۈچۈن خۇدا ئېتىقادىڭلارنى ئۇ كۈن كەلگۈچە مۇستەھكەملەيدۇ. ⁹سىلەرنى ئوغلى، يەنى رەببىمىز ئەيسا مەسىھ بىلەن مۇناسىۋەتتە بولۇشقا چاقىرغان خۇدا ئىشەنچلىكتۇر.

ئېتىقادچىلار جامائىتىدىكى بۆلۈنۈش

¹⁰قېرىنداشلار، ھەممىڭلارنى رەببىمىز ئەيسا مەسىھنىڭ نامى بىلەن ئىتتىپاقلىشىشقا، بۆلۈنمەسلىككە، بىر نىيەت، بىر مەقسەتتە بولۇشقا ئۈندەيمەن. ¹¹قېرىنداشلىرىم، كلوۋىنىڭ ئائىلىسىدىكىلەردىن ئاڭلىشىمچە، ئېتىقادچىلار جامائىتىڭلاردا تالاش-تارتىشلار بار ئىكەن. ¹²دېمەكچى بولغىنىم، ئاڭلىسام بەزىلىرىڭلار «مەن پاۋلۇس تەرەپدارى»، بەزىلىرىڭلار «مەن ئاپوللوس تەرەپدارى»، بەزىلىرىڭلار «مەن پېترۇس تەرەپدارى»، يەنە بەزىلىرىڭلار «مەن ئەيسا مەسىھ تەرەپدارى» دەپ يۈرۈپسىلەر. ¹³ئەجەبا، ئەيسا مەسىھنى پارچىلاش مۇمكىنمۇ؟ سىلەر ئۈچۈن كرېستكە مىخلانغان ئادەم مەنمىدىم؟ سىلەر مېنىڭ نامىم بىلەن چۆمۈلدۈرۈلگەنمىدىڭلار؟ ¹⁴مەن ئاراڭلاردىن كرىسپۇس بىلەن گايۇستىن باشقا ھېچقايسىڭلارنى چۆمۈلدۈرمىگەنلىكىم ئۈچۈن، خۇداغا شۈكۈر ئېيتىمەن. ¹⁵شۇنىڭ ئۈچۈن ھېچكىم پاۋلۇسنىڭ نامى بىلەن چۆمۈلدۈرۈلدۈم، دېيەلمەيدۇ. ¹⁶دۇرۇس، يەنە ئىستىپاناسنىڭ ئائىلىسىدىكىلەرنىمۇ چۆمۈلدۈردۈم. بۇلاردىن باشقىلارنى چۆمۈلدۈرگەن ياكى چۆمۈلدۈرمىگەنلىكىمنى ئەسلىيەلمەيمەن. ¹⁷ئەيسا مەسىھ مېنى كىشىلەرنى چۆمۈلدۈرۈشكە ئەمەس، بەلكى خۇش خەۋەرنى يەتكۈزۈشكە ئەۋەتتى. مەن بۇ ۋەزىپىنى ئورۇنلاشتا ھېكمەتلىك سۆزلەرنى ئىشلىتىپ، ناتىقلىق قىلمىدىم. ئەگەر مەن بۇنداق قىلسام، ئەيسا مەسىھنىڭ كرېستتىكى قۇربانلىقى توغرىسىدىكى خۇش خەۋەرنىڭ كۈچ-قۇدرىتى يوقالغان بولاتتى.

قۇتقۇزۇلۇش خۇدانىڭ شەپقىتىدىن كېلىدۇ

¹⁸ئەيسا مەسىھنىڭ كرېستتىكى قۇربانلىقى توغرىسىدىكى خۇش خەۋەر مەڭگۈلۈك ئۆلۈمگە يۈز تۇتقانلارغا ئەخمىقانىلىكتەك تۇيۇلىدۇ. لېكىن ئۇ قۇتقۇزۇلىدىغان بىزلەر ئۈچۈن خۇدانىڭ كۈچ-قۇدرىتىنى نامايان قىلىدۇ. ¹⁹مۇقەددەس يازمىلاردا مۇنداق يېزىلغان:

«ئۆزلىرىنى دانىشمەن سانايدىغانلارنىڭ دانالىقىنى يوققا چىقىرىمەن،

ئۆزلىرىنى ئەقىللىق چاغلايدىغانلارنىڭ ئەقلىنى بىكار قىلىمەن.»

²⁰ئۇنداقتا، قېنى ئىنسان تەرىپىدىن دانا سانالغانلار؟ قېنى ئۆزىنى ئەقىللىق سانايدىغان ئۆلىمالار؟ قېنى بۇ زاماندىكى پەيلاسوپلار؟ خۇدا بۇ دۇنيادىكى دانالىقنىڭ ئەمەلىيەتتە ئەخمىقانىلىك ئىكەنلىكىنى كۆرسىتىپ بەرگەن ئەمەسمۇ؟ ²¹چۈنكى خۇدا ئۆزىنىڭ دانالىقى بىلەن شۇنى قارار قىلغانىكەنكى، ئىنسانلار ئۆزىنىڭ ئەقىل-پاراسىتىگە تايىنىپ، خۇدانى ھەرگىز تونۇيالمايدۇ. لېكىن خۇدا «ئەخمىقانىلىك» دەپ قارالغان بۇ خۇش خەۋەر ئارقىلىق ئۆزىگە ئېتىقاد قىلغانلارنى قۇتقۇزۇشنى ئىرادە قىلغاندۇر. ²²يەھۇدىيلار مۆجىزە تەلەپ قىلىدۇ، گرېكلار دانالىقنىڭ كويىدا يۈرىدۇ. ²³لېكىن بىز يەتكۈزۈۋاتقان خۇش خەۋەر ئەيسا مەسىھنىڭ كرېستكە مىخلىنىپ قۇربان بولۇشى ھەققىدىدۇر. بۇ خۇش خەۋەر ئەيسا مەسىھكە ئېتىقاد قىلمايدىغان يەھۇدىيلار ئۈچۈن پۇتلىشىپ يىقىلىدىغان تاش، ئەيسا مەسىھكە ئېتىقاد قىلمايدىغان گرېكلار ئۈچۈن ئەخمەقلىقتۇر. ²⁴ھالبۇكى، ئەيسا مەسىھنىڭ كرېستكە مىخلىنىپ ئۆلۈشى خۇدا تەرىپىدىن چاقىرىلغان يەھۇدىي ياكى يەھۇدىي ئەمەسلەر ئۈچۈن خۇدانىڭ كۈچ-قۇدرىتى ۋە دانالىقىنى نامايان قىلىدۇ. ²⁵خۇدانىڭ «نادانلىقى» ئىنسانلارنىڭ دانالىقىدىن ئۈستۈندۇر، خۇدانىڭ «ئاجىزلىقى» ئىنسانلارنىڭ كۈچ-قۇدرىتىدىن قۇدرەتلىكتۇر.

²⁶قېرىنداشلار، خۇدا تەرىپىدىن چاقىرىلغان ۋاقىتتىكى ئەھۋالىڭلارنى ئەسلەپ كۆرۈڭلار. ئۇ چاغدا سىلەرگە بۇ دۇنيانىڭ ئۆلچىمى بويىچە باھا بەرگەندە، كۆپچىلىكىڭلار دانالاردىن، تەسىرى بار كىشىلەردىن ياكى ئاقسۆڭەكلەردىن ئەمەس ئىدىڭلار. ²⁷خۇدا ئىنسانلارنىڭ ئەخمەق دەپ قارىغان ئىشلىرىنى تاللاپ، دانا دەپ قارالغان كىشىلەرنى ئۇياتقا قالدۇردى. شۇنداقلا، ئىنسانلارنىڭ ئەرزىمەس دەپ قارىغان ئىشلىرىنى تاللاپ، مۇھىم دەپ قارالغان كىشىلەرنى ئۇياتقا قالدۇردى. ²⁸خۇدا بۇ دۇنيادىكى ئىنسانلار تەرىپىدىن مۇھىم دەپ قارالغان ئىشلارنىڭ ئۆزىنىڭ نەزىرىدە ھېچ نەرسە ئەمەسلىكىنى كۆرسىتىش ئۈچۈن بۇ دۇنيادا ئەھمىيەتسىز، قەدىرسىز دەپ قارالغان ۋە كۆزگە ئىلىنمايدىغان ئىشلارنى تاللىدى. ²⁹بۇنىڭدىكى مەقسەت، خۇدانىڭ ئالدىدا ھېچقانداق ئادەمنىڭ ماختىنالماسلىقى ئۈچۈندۇر. ³⁰سىلەر خۇدانىڭ ئىرادىسى بويىچە ئەيسا مەسىھكە مەنسۇپ بولدۇڭلار. خۇدا ئەيسا مەسىھنى بىزنىڭ دانالىقىمىزنىڭ مەنبەسى قىلدى. بىز ئەيسا مەسىھ ئارقىلىق خۇدا ئالدىدا ھەققانىي ئادەم دەپ ھېسابلاندۇق. ئۇ بىزنى پاكلاپ، گۇناھنىڭ قۇللۇقىدىن ئازاد قىلدى. ³¹شۇنىڭ ئۈچۈن مۇقەددەس يازمىلاردا: «ماختىنىدىغانلار رەببىمىز بىلەن ماختانسۇن» دەپ يېزىلغان.

2

ئەيسا مەسىھنىڭ قۇربانلىقى ھەققىدىكى تەلىم

¹قېرىنداشلار، مەن يېنىڭلارغا بېرىپ، خۇدانىڭ سۆزلىرىنى سىلەرگە جاكارلىغىنىمدا، ناتىقلىق ياكى دانالىق قىلمىدىم. ²چۈنكى ئاراڭلاردىكى ۋاقتىمدا پەقەت ئەيسا مەسىھ ۋە ئۇنىڭ كرېستكە مىخلانغانلىقى ھەققىدە سۆزلەشتىن باشقا بىر نەرسە دېمەسلىككە قارار قىلغانىدىم. ³سىلەرنىڭ يېنىڭلارغا بارغىنىمدا، ئاجىزلىقىمدىن بۇ ۋەزىپىنى قانداق ئورۇنلارمەن دەپ قورقۇپ كەتكەنىدىم، ھەتتا تىترەپمۇ كەتكەنىدىم. ⁴مەن سىلەرگە خۇش خەۋەر يەتكۈزۈپ، تەلىم بەرگىنىمدە، سىلەرنى قايىل قىلىش ئۈچۈن ھېكمەتلىك سۆزلەرگە ئەمەس، بەلكى مۇقەددەس روھ نامايان قىلغان كۈچ-قۇدرەتكە تاياندىم. ⁵بۇنداق قىلىشتىكى مەقسىتىم، ئېتىقادىڭلار ئىنسانلارنىڭ دانالىقىغا ئەمەس، بەلكى خۇدانىڭ كۈچ-قۇدرىتىگە تايانسۇن دېگەندىن ئىبارەت ئىدى.

خۇدانىڭ دانالىقى

⁶ئەلۋەتتە، ئېتىقادتا پىشىپ يېتىلگەنلەرنىڭ ئارىسىدا دانالىق ھەققىدە خەۋەر يەتكۈزۈۋاتىمىز. ئەمما بىزنىڭ دانالىقىمىز بۇ زاماندىكى كىشىلەر ياكى بۇ زاماندا زاۋاللىققا يۈز تۇتقان ھوقۇقدارلارغا خاس بولغان دانالىق ئەمەس، ⁷بەلكى خۇدانىڭ ئىنسانلارغا بۇرۇن ئاشكارىلىمىغان دانالىقىدۇر. خۇدا بىزنىڭ بۇ دانالىق ئارقىلىق ئەرشتە شان-شەرەپكە ئېرىشىشىمىز ئۈچۈن دۇنيا يارىتىلىشتىن ئىلگىرى بۇ دانالىقنى بىزگە ئىرادە قىلدى. ⁸بۇ دانالىقنى بۇ زاماننىڭ ھوقۇقدارلىرى چۈشىنىپ يەتمىدى. چۈشىنىپ يەتكەن بولسا ئىدى، ئۇلۇغلۇقنىڭ ئىگىسى بولغان رەببىمىزنى كرېستكە مىخلاتمىغان بولاتتى. ⁹ھالبۇكى، يازمىلاردا مۇنداق يېزىلغاندۇر:

«خۇدانى سۆيگەنلەرگە خۇدانىڭ تەييارلىغانلىرى ھېچقانداق كۆز كۆرۈپ باقمىغان،

ھېچقانداق قۇلاق ئاڭلاپ باقمىغان، ھېچقانداق ئادەم ئويلاپ باقمىغان نەرسىلەردۇر.»

¹⁰لېكىن خۇدا بۇ سىرلارنى بىزگە مۇقەددەس روھى ئارقىلىق ئاشكارىلىدى. چۈنكى خۇدانىڭ مۇقەددەس روھى ھەممە ئىشنى، ھەتتا خۇدانىڭ چوڭقۇر ئوي-پىكىرلىرىنىمۇ بىلىدۇ. ¹¹بىر ئادەمنىڭ قەلبىدىكى ئويلىرىنى شۇ ئادەمدىن باشقا ھېچكىم بىلەلمىگىنىدەك، خۇدانىڭ قەلبىدىكى ئويلىرىنىمۇ خۇدانىڭ روھىدىن باشقا ھېچكىم بىلەلمەيدۇ. ¹²بىز بولساق بۇ دۇنيانىڭ دانالىقىنى ئەمەس، بەلكى خۇدانىڭ مۇقەددەس روھىنى قوبۇل قىلدۇق. شۇڭا بىز خۇدانىڭ بىزگە سېخىيلىق بىلەن ئاتا قىلغان مېھىر-شەپقىتىنى چۈشىنەلەيمىز.

¹³بۇ مېھىر-شەپقەت توغرىسىدا سۆزلىگىنىمىزدە، دۇنيادىكى دانالاردىن ئۆگەنگەن سۆزلەرنى ئەمەس، بەلكى مۇقەددەس روھ ئارقىلىق ئۆگەنگەن سۆزلەرنى ئىشلىتىمىز. بىز بۇ سۆزلەر بىلەن خۇدادىن كەلگەن ھەقىقەتلەرنى چۈشەندۈرىمىز. ¹⁴لېكىن قەلبىدە خۇدانىڭ روھى بولمىغان كىشىلەر خۇدانىڭ روھى ئاتا قىلغان بۇ ھەقىقەتلەرنى قوبۇل قىلالمايدۇ، شۇنداقلا بۇ ئىشلار ئۇلارغا بىمەنە تۇيۇلىدۇ. ئۇلار بۇ ئىشلارنى چۈشىنەلمەيدۇ. چۈنكى بۇ ئىشلارنى پەقەت خۇدانىڭ روھىنىڭ ياردىمى ئارقىلىقلا چۈشەنگىلى بولىدۇ. ¹⁵قەلبىدە خۇدانىڭ روھى بولغان ئادەم ھەممە ئىشقا باھا بېرەلەيدۇ. لېكىن قەلبىدە خۇدانىڭ روھى بولمىغانلار ئۇ ئادەمگە باھا بېرەلمەيدۇ. ¹⁶مۇقەددەس يازمىلاردا مۇنداق يېزىلغان:

«كىم پەرۋەردىگارنىڭ ئوي-پىكرىنى بىلەلىسۇن؟

كىم ئۇنىڭغا يول كۆرسىتەلىسۇن؟»

لېكىن ئەيسا مەسىھ قانداق ئويلىسا، بىزمۇ شۇنداق ئويلايمىز.

3

خۇدا يولىدىكى خىزمەتداشلار

¹قېرىنداشلار، مەن ئاراڭلاردا بولغان چېغىمدا، سىلەرگە مۇقەددەس روھنىڭ يېتەكچىلىكىدە ياشاۋاتقانلارغا تەلىم بەرگەندەك تەلىم بېرەلمىدىم. ئەكسىچە، سىلەرگە گۇناھكار تەبىئىتى بويىچە ياشاۋاتقانلارغا ياكى ئېتىقاد جەھەتتە خۇددى بوۋاقلارغا ئوخشاش ئادەملەرگە تەلىم بەرگەندەك تەلىم بېرىشكە مەجبۇر بولدۇم. ²مەن سىلەرگە چوڭلارنىڭ ئوزۇقىغا ئوخشاش ئەمەس، بەلكى بوۋاقلارنىڭ ئىچىدىغان سۈتىگە ئوخشاش تەلىم بەردىم. چۈنكى سىلەر يىرىك يېمەكلىكنى يېيەلمەيتتىڭلار، ھازىرمۇ يېيەلمەيۋاتىسىلەر. ³چۈنكى سىلەر تېخىچە گۇناھكار تەبىئىتىڭلار بويىچە ياشاۋاتىسىلەر. ئاراڭلاردىكى ھەسەتخورلۇق ۋە جېدەل-ماجىرالارنىڭ بولۇشى بۇنىڭ ئىسپاتى ئەمەسمۇ؟ بۇ يەنە سىلەرنىڭ ئەيسا مەسىھكە مەنسۇپ بولمىغان كىشىلەردەك ياشاۋاتقىنىڭلارنى كۆرسەتمەمدۇ؟ ⁴بىرىڭلار: «مەن پاۋلۇس تەرەپدارى»، يەنە بىرىڭلار: «مەن ئاپوللوس تەرەپدارى» دېسەڭلار، ئەيسا مەسىھكە ئېتىقاد قىلمىغان كىشىلەردىن نېمە پەرقىڭلار بولسۇن؟

⁵ئاپوللوس ياكى مەنكى پاۋلۇس سىلەرنىڭ بۆلۈنۈشۈڭلارغا سەۋەب بولغۇدەك مۇھىم كىشىلەردىن ئەمەسمىز. بىز پەقەت سىلەرنى رەببىمىزگە ئېتىقاد قىلىشقا باشلايدىغان خىزمەتكارلارمىز. رەببىمىز ھەربىرىمىزگە بىردىن ۋەزىپە بەرگەن. ⁶مەن سىلەرگە خۇش خەۋەر يەتكۈزۈپ، ئېتىقاد ئۇرۇقىنى تېرىدىم، ئاپوللوس سىلەرگە تەلىم بېرىش ئارقىلىق ئۇنى سۇغاردى. بىراق ئۇرۇقنى ئۆستۈرگۈچى يەنىلا خۇدادۇر. ⁷دېمەك، مۇھىمى تېرىغۇچى ياكى سۇغارغۇچى ئەمەس، بەلكى ئۇنى ئۆستۈرگۈچىدۇر. چۈنكى پەقەت خۇدالا سىلەرنى ئېتىقاد جەھەتتە پىشىپ يېتىلدۈرەلەيدۇ. ⁸تېرىغۇچى بىلەن سۇغارغۇچىنىڭ ئىشى ئۆزئارا ماسلاشقان بولۇپ، ئىككىسىنىڭ مەقسىتى بىردۇر ۋە ھەر ئىككىسى قىلغان ئەجرىگە يارىشا خۇدانىڭ ئىنئامىغا ئېرىشىدۇ. ⁹بىز ئىككىمىز خۇدا ئۈچۈن ئىشلەيدىغان خىزمەتداشلارمىز. سىلەر بولساڭلار بىز ئىشلەۋاتقان ۋە خۇداغا مەنسۇپ بولغان ئېتىزغا ئوخشايسىلەر.

شۇنداقلا، سىلەر يەنە بىز ئارقىلىق سېلىنىۋاتقان خۇدانىڭ ئىمارىتىگە ئوخشايسىلەر. ¹⁰مەن خۇدا ماڭا ئاتا قىلغان مېھىر-شەپقەت بىلەن خۇش خەۋەر يەتكۈزۈش ئارقىلىق بۇ ئىمارەتنىڭ ئۇلىنى خۇددى بىر ئۇستا قۇرۇلۇشچىدەك قويدۇم. باشقىلار سىلەرگە تەلىم بېرىش ئارقىلىق بۇ ئۇلنىڭ ئۈستىگە ئىمارەت سېلىۋاتىدۇ. بىراق ھەركىم بۇ ئىمارەتنىڭ توغرا سېلىنىشىغا دىققەت قىلسۇن. ¹¹چۈنكى ھېچكىم قويۇلۇپ بولغان ئۇلدىن باشقا ھېچقانداق ئۇل قويالمايدۇ. بۇ ئۇل ئەيسا مەسىھتۇر. ¹²بىر كىشى توغرا تەلىم بەرسە، ئۇ خۇددى ئۇل ئۈستىگە ئالتۇن، كۈمۈش ياكى گۆھەرلەرنى قويغاندەك ئىش بولىدۇ. لېكىن بىر كىشى نامۇۋاپىق تەلىم بەرسە، ئۇ خۇددى ئۇل ئۈستىگە ياغاچ، سامان ياكى قومۇشتىن ئىبارەت ئاسان كۆيۈپ كېتىدىغان نەرسىلەرنى قويغاندەك ئىش بولىدۇ. ¹³قىيامەت كۈنى ھەركىمنىڭ قىلغان ئەجرىنىڭ قانداقلىقى ئاشكارا بولىدۇ. ئۇ كۈنى ھەممە ئادەمنىڭ قىلغان ئەجرىنىڭ قىممىتى ئوتتا سىنىلىدۇ. ¹⁴ئەگەر بىر كىشىنىڭ ئۇل ئۈستىگە قويغان نەرسىلىرى ئوتقا بەرداشلىق بېرەلىسە، ئۇ كىشى خۇدادىن ئىنئام ئالىدۇ. ¹⁵ئەگەر ئۇل ئۈستىگە قويغان نەرسىلىرى كۆيۈپ كەتسە، ئۇ ئىنئامدىن مەھرۇم قالىدۇ. لېكىن ئۇ ئەيسا مەسىھكە مەنسۇپ بولغانلىقى ئۈچۈن قۇتقۇزۇلىدۇ. ھالبۇكى، ئۇ خۇددى ئوت ئىچىدىن قۇتۇلۇپ چىققان ئادەمگە ئوخشايدۇ.

¹⁶ئەجەبا، سىلەر ئۆزۈڭلارنىڭ خۇدانىڭ ئىبادەتخانىسى ئىكەنلىكىڭلارنى ۋە خۇدانىڭ روھىنىڭ سىلەرنىڭ ئاراڭلاردا ئىكەنلىكىڭلارنى بىلمەمسىلەر؟ ¹⁷ئەگەر بىر كىشى خۇدانىڭ ئىبادەتخانىسىنى خاراب قىلسا، خۇدامۇ ئۇنى خاراب قىلىدۇ. چۈنكى خۇدانىڭ ئىبادەتخانىسى مۇقەددەستۇر. سىلەر دەل شۇ ئىبادەتخانىدۇرسىلەر.

¹⁸سىلەر ئۆزۈڭلارنى ئالدىماڭلار. ئەگەر ئاراڭلاردىن بىرەرسى بۇ دۇنيادىكىلەرنىڭ ئۆلچىمى بويىچە ئۆزىنى دانا دەپ ھېسابلىسا، ئۇنداقتا ئۇ بۇ دانالىقىدىن ۋاز كەچسۇن. ئۇ دانالىقىدىن ۋاز كەچكەندىن كېيىن بۇ دۇنيادىكىلەرنىڭ نەزىرىدە «نادان» دەپ قارالسىمۇ، لېكىن خۇدانىڭ نەزىرىدە دانا ھېسابلىنىدۇ. ¹⁹چۈنكى بۇ دۇنيادىكى دانالىق خۇدانىڭ نەزىرىدە نادانلىقتۇر. مۇقەددەس يازمىلاردا: «ئۆزلىرىنى دانا ھېسابلايدىغانلارنى ئۆزلىرىنىڭ ھىيلىسى بىلەن بابلايدۇ» دەپ يېزىلغاندۇر. ²⁰مۇقەددەس يازمىلارنىڭ يەنە بىر يېرىدە: «خۇدا دانالارنىڭ ئوي-پىكرىنىڭ بىھۇدە خىيال ئىكەنلىكىنى بىلىدۇ» دەپ يېزىلغان. ^21‏-22شۇنىڭ ئۈچۈن ھېچكىم: «مەن بۇ كىشى ياكى ئۇ كىشىنىڭ تەرەپدارى» دەپ ماختانمىسۇن. چۈنكى مەيلى پاۋلۇس، ئاپوللوس ياكى پېترۇسلار بولسۇن، ھەممىمىز خۇدا تەرىپىدىن ئەۋەتىلگەن ۋە سىلەر ئۈچۈن ئىشلەۋاتقان كىشىلەردۇرمىز. بۇ دۇنيا، ھايات-ماماتلىق، ھازىر ياكى كەلگۈسى بولسۇن، ھەممىسى سىلەرگە مەنسۇپتۇر. ²³سىلەر بولساڭلار ئەيسا مەسىھكە، ئەيسا مەسىھ بولسا خۇداغا مەنسۇپتۇر.

4

ئەيسا مەسىھنىڭ ئەلچىلىرى

¹شۇنداق ئىكەن، سىلەر بىزنى پەقەت ئەيسا مەسىھنىڭ خىزمەتكارلىرى دەپ قاراڭلار. خۇدا ئۆزىنىڭ بۇرۇن ئاشكارىلىمىغان ھەقىقەتلىرىنى سىلەرگە چۈشەندۈرۈش ۋەزىپىسىنى بىزگە تاپشۇرغاندۇر. ²بىرەر ۋەزىپىنى ئىجرا قىلغۇچىلاردىن تەلەپ قىلىنىدىغىنى ئىشەنچلىك بولۇشتۇر. ³سىلەر قانداق باھا بەرسەڭلار ۋە باشقىلار ماڭا قانداق باھا بەرسە مەيلى. ئىشقىلىپ، ماڭا بېرىلگەن باھا ماڭا نىسبەتەن ئەرزىمەس بىر ئىشتۇر، ھەتتا ئۆزۈممۇ ئۆزۈمگە باھا بەرمەيمەن. ⁴گەرچە مەن خىزمىتىمدە خاتالىق يوق دەپ قارىساممۇ، لېكىن بۇ پىكرىم ئۆزۈمنى ئاقلىيالمايدۇ. خىزمىتىمنى باھالىغۇچى پەقەت رەببىمدۇر. ⁵شۇنىڭ ئۈچۈن رەببىمىز قايتىپ كەلمىگۈچە، باشقىلارنىڭ خىزمىتىگە باھا بەرمەڭلار. چۈنكى ئۇ قايتىپ كەلگەندە، كىشىلەرنىڭ قاراڭغۇلۇققا يوشۇرۇنغان بارلىق ئىشلىرىنى يورۇقلۇققا چىقىرىدۇ ۋە ئىنسانلارنىڭ قەلبىدىكى مەقسەتلىرىنى ئاشكارىلايدۇ. ئۇ چاغدا ھەركىم خۇدا تەرىپىدىن ئۆزىگە تېگىشلىك ماختاشقا سازاۋەر بولىدۇ.

⁶قېرىنداشلار، سىلەرنىڭ مەنپەئەتىڭلار ئۈچۈن بۇ ئىشلارغا ئۆزۈمنى ۋە ئاپوللوسنى مىسال قىلدىم. سىلەر مۇقەددەس يازمىلاردا يېزىلغانلارغا بىنائەن ياشاشنى بىزدىن ئۆگىنىڭلار. بىرىمىزنى يەنە بىرىمىزدىن ئۈستۈن باھالاپ ماختاشنىڭ ئالدىنى ئېلىڭلار. ⁷نېمىشقا سىلەر ئۆزۈڭلارنى باشقىلاردىن ئۈستۈن دەپ قارايسىلەر؟ ئەجەبا، سىلەردە بار بولغان بارلىق ئىلتىپاتلار خۇدا تەرىپىدىن بېرىلمىگەنمۇ؟ ئۇنداقتا، سىلەر نېمىشقا بۇ ئىلتىپاتلارغا خۇددى ئۆزۈڭلارغا تايىنىپ ئېرىشكەندەك ماختىنىسىلەر؟

⁸سىلەر ئاللىقاچان تويۇندۇڭلار، باي بولدۇڭلار. سىلەر بىزسىزمۇ ئۆزۈڭلارنى پادىشاھتەك ھېس قىلىسىلەر. مەن ھەقىقەتەنمۇ سىلەرنىڭ خۇدانىڭ پادىشاھلىقىدا ھۆكۈم سۈرۈشۈڭلارنى ئۈمىد قىلىمەن. چۈنكى راستتىنلا شۇنداق بولغان بولساڭلار، بىزمۇ سىلەر بىلەن بىرگە ھۆكۈم سۈرگەن بولاتتۇق! ⁹لېكىن مېنىڭچە، خۇدا بىز ئەلچىلەرنى ئەڭ تۆۋەن ئورۇنغا قويدى. چۈنكى بىز خۇددى ئۆلۈمگە ھۆكۈم قىلىنىپ، سازايى قىلىنغان مەھبۇسلاردەك، پۈتكۈل كائىنات، يەنى پەرىشتىلەر ۋە ئىنسانلار ئالدىدا مازاققا قالدۇق. ¹⁰بىز ئەيسا مەسىھكە مەنسۇپ بولغانلىقىمىز ئۈچۈن نادان، سىلەر ئەقىللىق، بىز ئاجىز، سىلەر كۈچلۈك، سىلەر ھۆرمەتكە سازاۋەر، بىز ھۆرمەتسىز ئىكەنمىزدە! ¹¹بىز تا ھازىرغىچە پات-پاتلا ئاچ-يالىڭاچ قېلىپ، ئۇرۇلۇپ-سوقۇلۇپ، سەرسان-سەرگەردان بولۇپ ياشاۋاتىمىز. ¹²بىز ئىككى بىلىكىمىزگە تايىنىپ، ئىشلەپ جان بېقىۋاتىمىز. بىزگە تىل-ئاھانەت قىلغانلارغا بەخت تىلەۋاتىمىز، زىيانكەشلىككە ئۇچرىساق، بەرداشلىق بېرىۋاتىمىز. ¹³تۆھمەتكە قالساق، مېھرىبانلىق بىلەن جاۋاب بېرىۋاتىمىز. بىز تا ھازىرغىچە دۇنيانىڭ ئەخلىتى، ئىنسانلارنىڭ سۈپۈرۈندىسى دەپ قارىلىۋاتىمىز.

¹⁴بۇ سۆزلەرنى يېزىشتىكى مەقسىتىم، سىلەرنى خىجىل قىلىش ئەمەس، بەلكى سىلەرنى سۆيۈملۈك پەرزەنتلىرىم دەپ قاراپ، نەسىھەت قىلىشتۇر. ¹⁵ئەيسا مەسىھكە باغلانغان يېڭى ھاياتىڭلاردا سىلەرگە تەلىم بەرگۈچىلەر كۆپ بولسىمۇ، لېكىن ئاتاڭلار پەقەت مەن بىرلا. چۈنكى سىلەر مەن يەتكۈزگەن خۇش خەۋەرنى قوبۇل قىلغاندا، مەن سىلەرنىڭ ئېتىقاد جەھەتتىكى ئاتاڭلار بولدۇم. ¹⁶شۇنىڭ ئۈچۈن سىلەرنىڭ مېنى ئۈلگە قىلىشىڭلارنى ئۆتۈنىمەن. ¹⁷دەل شۇ مەقسەت بىلەن ئېتىقاد يولىدا ئۆز ئوغلۇمدەك قەدىرلىك ۋە ئىشەنچلىك بولغان تىموتىينى يېنىڭلارغا ئەۋەتىمەن. ئۇ سىلەرگە مېنىڭ ئەيسا مەسىھكە مەنسۇپ بولغان يېڭى ھاياتىمنى قانداق ياشىغانلىقىمنى ئەسلىتىدۇ. يېڭى ھاياتىمنى قانداق ياشىغان بولسام، ھەرقايسى جايلاردىكى جامائەتكىمۇ شۇنداق ياشاشنى ئۆگەتتىم.

¹⁸ئاراڭلاردا بەزىلەر مېنى يېنىمىزغا كەلمەيدۇ دەپ ئويلاپ، تەكەببۇرلۇق قىلىۋاتىدۇ. ¹⁹لېكىن خۇدا بۇيرۇسا، يېقىندا چوقۇم يېنىڭلارغا بارىمەن. ئۇ چاغدا مەن بۇ ھاكاۋۇرلارنىڭ نېمىنى سۆزلەيدىغانلىقىنى ئەمەس، بەلكى ئۇلاردا مۇقەددەس روھنىڭ كۈچ-قۇدرىتىنىڭ بار ياكى يوقلۇقىنى بىلىپ باقىمەن. ²⁰چۈنكى خۇدانىڭ پادىشاھلىقى سۆز ئارقىلىقلا ئەمەس، بەلكى مۇقەددەس روھنىڭ كۈچ-قۇدرىتى ئارقىلىق ئايان بولىدۇ. ²¹سىلەرگە تاياق ئېلىپ بارايمۇ ياكى مېھىر-مۇھەببەت ۋە مۇلايىملىقمۇ؟ قايسىسىنى خالايسىلەر؟

5

ئېتىقادچىلار جامائىتىدىكى ئەخلاق مەسىلىسى

¹مەن ھەقىقەتەن ئاراڭلاردا جىنسىي ئەخلاقسىزلىقنىڭ بار ئىكەنلىكىنى ئاڭلىدىم. بۇ خىل ئەخلاقسىزلىق ھەتتا بۇتپەرەسلەرنىڭ ئىچىدىمۇ ئۇچرىمايدۇ. بىرى ئۆگەي ئانىسى بىلەن داۋاملىق بىر ئورۇندا يېتىپتۇ! ²شۇنداق تۇرۇقلۇق، سىلەر يەنە ماختىنىپ يۈرۈپسىلەر. ئەسلىدە سىلەر بۇ ئىشقا قاتتىق ئازابلىنىپ، بۇنداق قىلغۇچىنى ئاراڭلاردىن قوغلاپ چىقىرىشىڭلار كېرەك ئىدىغۇ؟ ³مەن سىلەردىن يىراقتا بولساممۇ، قەلبىم سىلەر بىلەن بىرگىدۇر. خۇددى مەن ئاراڭلاردا تۇرغاندەك، بۇ گۇناھنى سادىر قىلغۇچىنى رەببىمىز ئەيسانىڭ نامى بىلەن كۆڭلۈمدە سوراققا تارتتىم. ⁴شۇڭا سىلەر رەببىمىز ئەيسانىڭ نامى بىلەن بىر يەرگە جەم بولغاندا، مېنىمۇ سىلەر بىلەن بىرگە دەپ قاراپ، رەببىمىز ئەيسانىڭ كۈچ-قۇدرىتى بىلەن ⁵ئۇ ئادەمنىڭ گۇناھكار تەبىئىتىنىڭ بەربات بولۇشى ئۈچۈن ئۇنى ئېتىقادچىلار جامائىتىدىن قوغلاپ چىقىرىپ، شەيتاننىڭ ئىلكىگە تاپشۇرۇڭلار. ئۇنىڭ روھى رەببىمىز ئەيسا قايتىپ كەلگەن كۈنى قۇتقۇزۇلسۇن.

⁶سىلەرنىڭ ماختىنىشىڭلار توغرا ئەمەس. «كىچىككىنە ئېچىتقۇ پۈتۈن خېمىرنى ئېچىتالايدۇ» دېگەن سۆزنى ياخشى بىلىسىلەرغۇ؟ ⁷ئاراڭلاردىن كونا ئېچىتقۇنى چىقىرىۋېتىڭلار، شۇنداق قىلساڭلار، ئېچىتقۇسىز يېڭى خېمىر بولالايسىلەر. ئەمەلىيەتتە، سىلەر ئېچىتقۇسىز يېڭى خېمىر ئىدىڭلار. چۈنكى ئۆتۈپ كېتىش ھېيتىنىڭ قۇربانلىقى بولغان ئەيسا مەسىھ گۇناھلىرىمىز ئۈچۈن قۇربان بولدى. ⁸شۇنىڭ ئۈچۈن خۇددى ئۆتۈپ كېتىش ھېيتى پېتىر نان بىلەن تەبرىكلەنگەندەك، بىزمۇ ھاياتىمىزدىكى يامانلىق ۋە ئۆچمەنلىكتىن ئىبارەت كونا ئېچىتقۇنى چىقىرىپ تاشلاپ، سەمىمىيلىك ۋە راستچىللىق بىلەن شاد-خۇرام ياشايلى.

⁹ئالدىنقى خېتىمدە سىلەرگە شەھۋانىي ھەۋەسلەرگە بېرىلگەن ئەخلاقسىز ئادەملەر بىلەن ئالاقە قىلماسلىق توغرىسىدا يازغانىدىم. ¹⁰لېكىن مەن ئەيسا مەسىھكە ئېتىقاد قىلمايدىغانلار ئارىسىدىكى شەھۋانىي ھەۋەسلەرگە بېرىلگەن ئەخلاقسىزلار، ئاچكۆزلەر، ئالدامچىلار ياكى بۇتپەرەسلەر بىلەن ئالاقە قىلماڭلار، دېمەكچى ئەمەسمەن. ئەگەر شۇنداق دېگەن بولسام، بۇ دۇنيادا ياشىشىڭلار مۇمكىن ئەمەس ئىدى. ¹¹لېكىن ھازىر مەن ئۆزىنى ئېتىقادچى دەپ ئاتىۋالغان، ئەمەلىيەتتە شەھۋانىي، ئاچكۆز، بۇتپەرەس، تۆھمەتخور، شارابخور ياكى ۋە ئالدامچى كىشىلەر بىلەن ئالاقە قىلماسلىقىڭلار، ھەتتا ئۇلار بىلەن ھەمداستىخانمۇ بولماسلىقىڭلار ھەققىدە يېزىۋاتىمەن. ^12‏-13چۈنكى بىزنىڭ ئېتىقادچىلار جامائىتىنىڭ ئەزاسى بولمىغانلارنى سوراق قىلىشقا قانداق ھوقۇقىمىز بولسۇن؟ ئۇلارنى خۇدا ئۆزى سوراق قىلىدۇ. لېكىن ئېتىقادچىلار جامائىتىنىڭ ئەزالىرىنى سوراق قىلىشقا بىزنىڭ ھوقۇقىمىز بار. شۇڭا مۇقەددەس يازمىلاردا يېزىلغىنىدەك، «يامانلىق قىلغۇچىنى ئاراڭلاردىن قوغلاپ چىقىرىڭلار.»

6

ئېتىقادچىلار ئارىسىدىكى دەۋالار

¹ئاراڭلاردىكى دەۋانى ئېتىقادچىلارنىڭ بىر تەرەپ قىلىشىغا تاپشۇرماي، خۇدانى تونۇمايدىغان سوراقچىغا ئەرز قىلىپ بارغىنىڭلار نېمىسى؟ ²ئەيسا مەسىھ قايتىپ كەلگەندىن كېيىن، بۇ دۇنيانى سوراق قىلىدىغانلارنىڭ خۇدانىڭ مۇقەددەس خەلقى ئىكەنلىكىنى بىلمەمسىلەر؟ سىلەر دۇنيانى سوراق قىلىدىغانلاردىن ئىكەنسىلەر، ئۇنداقتا بۇنداق كىچىك دەۋالارنى بىر تەرەپ قىلىشقا يارىمامسىلەر؟ ³بىز ئېتىقادچىلار كەلگۈسىدە پەرىشتىلەرنى سوراق قىلىمىزغۇ؟! شۇنداق ئىكەن، ئاراڭلاردىكى ئۇششاق-چۈششەك ئىشلارنى بىر تەرەپ قىلالمامسىلەر؟ ⁴ئاراڭلاردا دەۋالار يۈز بەرسە، نېمىشقا ئۇنى ھەل قىلىش ئۈچۈن ئەيسا مەسىھنى تونۇمايدىغان، ئېتىقادچىلار جامائىتى بىلەن ئوخشىمايدىغان كۆزقاراشتا بولغان سوراقچىلارغا بارىسىلەر؟ ⁵بۇ نېمىدېگەن شەرمەندىچىلىك! ئېتىقادچىلار ئارىسىدا بۇ دەۋالارنى ھەل قىلغۇدەك پاراسەتلىك بىرەر كىشى يوقمۇ؟ ⁶سىلەر قېرىنداش تۇرۇپ، بىر-بىرىڭلار بىلەن دەۋالىشىۋاتىسىلەر، يەنە كېلىپ ئېتىقادسىزلار ئالدىدا دەۋالىشىۋاتىسىلەر!

⁷ئەمەلىيەتتە، بىر-بىرىڭلار بىلەن دەۋالىشىش سىلەر ئۈچۈن چوڭ مەغلۇبىيەتتۇر. ئۆزئارا بەزىبىر ناھەقچىلىككە ئۇچرىساڭلار ياكى ئاز-تولا ئالدانساڭلار نېمە بوپتۇ؟ ⁸ئەمەلىيەتتە، سىلەر باشقىلار تەرىپىدىن ناھەقچىلىككە ئۇچرىماي، ئەكسىچە ئۆزئارا ناھەقچىلىك قىلىۋاتىسىلەر ۋە باشقىلارنى ئالداۋاتىسىلەر، ھەتتا قېرىنداشلىرىڭلارغىمۇ شۇنداق قىلىۋاتىسىلەر! ⁹يامانلىق قىلغۇچىلارنىڭ خۇدانىڭ پادىشاھلىقىغا كىرەلمەيدىغانلىقىنى بىلمەمسىلەر؟ سىلەر ئۆز-ئۆزۈڭلارنى ئالدىماڭلار! جىنسىي ئەخلاقسىزلىق قىلغۇچىلارغا، بۇتپەرەسلەرگە، زىناخورلارغا، ئەر بىلەن ئەر جىنسىي مۇناسىۋەت قىلغۇچىلارغا، ¹⁰ئوغرىلارغا، ئاچكۆزلەرگە، شارابخورلارغا، تۆھمەتخورلارغا ۋە ئالدامچىلارغا خۇدانىڭ پادىشاھلىقىدا ئورۇن يوق. ¹¹بەزىلىرىڭلار بۇرۇن شۇنداقلاردىن ئىدىڭلار. لېكىن رەببىمىز ئەيسا مەسىھنىڭ كۈچ-قۇدرىتى ۋە خۇدانىڭ روھى ئارقىلىق گۇناھىڭلار يۇيۇلۇپ، خۇداغا ئاتالدىڭلار ۋە خۇدا تەرىپىدىن ھەققانىي ئادەم دەپ ھېسابلاندىڭلار.

تېنىڭلارنى خۇدانى ئۇلۇغلاشقا ئاتاڭلار

¹²بەزىلەر ئېتىقادىمىزدىكى ئەركىنلىكنى چۈشەنمەي: «ھەرقانداق ئىشنى قىلسام بولىدۇ» دېيىشى مۇمكىن. لېكىن ھەممە ئىش پايدىلىق ئەمەس. ئۇلار يەنە: «ھەرقانداق ئىشنى قىلسام بولىدۇ» دەيدۇ، لېكىن مەن دەيمەنكى، ھېچبىر ئىشنىڭ ئۈستۈمدىن ھۆكۈمرانلىق قىلىشىنى خالىمايمەن. ¹³بەزىلەر: «تاماق قورساق ئۈچۈن، قورساق تاماق ئۈچۈندۇر» دەيدۇ. لېكىن ھەر ئىككىلىسى خۇدا تەرىپىدىن يوقىتىلىدۇ. تېنىمىز جىنسىي ئەخلاقسىزلىق ئۈچۈن بولماستىن، بەلكى رەببىمىز ئۈچۈندۇر. رەببىمىز تېنىمىزنىڭ ئېھتىياجىنى قاندۇرىدۇ. ¹⁴خۇدا ئۆز قۇدرىتى بىلەن رەببىمىزنى تىرىلدۈرگىنىدەك، بىزنىمۇ تىرىلدۈرىدۇ. ¹⁵بىزنىڭ تېنىمىزنىڭ ئەيسا مەسىھنىڭ تېنىنىڭ ئەزالىرى ئىكەنلىكىنى بىلمەمسىلەر؟ ئۇنداقتا، ئاراڭلاردىكى بىرى ئەيسا مەسىھنىڭ تېنىنىڭ ئەزاسى بولغان ئۆز تېنىنى بىر پاھىشەنىڭ تېنى بىلەن بىرلەشتۈرسە بولامدۇ؟ ھەرگىز بولمايدۇ! ¹⁶پاھىشە بىلەن بىرگە بولغان كىشىنىڭ پاھىشە بىلەن بىر تەن بولىدىغانلىقىنى بىلمەمسىلەر؟ چۈنكى مۇقەددەس يازمىلاردا ئەر-ئايال توغرۇلۇق: «ئىككىسى بىر تەن بولىدۇ» دېيىلگەن. ¹⁷ۋاھالەنكى، رەببىمىز بىلەن بىرلەشكەن كىشى رەببىمىز بىلەن روھىي جەھەتتە بىرلىشىدۇ.

¹⁸شۇنىڭ ئۈچۈن جىنسىي ئەخلاقسىزلىقتىن يىراق تۇرۇڭلار. ئىنسانلار سادىر قىلغان باشقا گۇناھلارنىڭ ھەممىسى تەننىڭ سىرتىدا بولىدۇ. لېكىن جىنسىي ئەخلاقسىزلىق قىلغۇچى ئۆز تېنىگە قارشى گۇناھ قىلغان بولىدۇ. ¹⁹تېنىڭلارنىڭ مۇقەددەس روھنىڭ ئىبادەتخانىسى ئىكەنلىكىنى بىلمەمسىلەر؟ بۇ روھ خۇدادىن كەلگەن بولۇپ، سىلەردە ياشايدۇ. سىلەر ئۆزۈڭلارغا مەنسۇپ ئەمەسسىلەر. ²⁰چۈنكى خۇدا سىلەرنى ئەيسا مەسىھنىڭ قىممەتلىك قېنى بىلەن ئۆزىگە مەنسۇپ قىلدى. شۇنىڭ ئۈچۈن تېنىڭلارنى خۇدانى ئۇلۇغلاشقا ئاتاڭلار.

7

نىكاھ مەسىلىسى

¹ئەمدى سىلەر خېتىڭلاردا ئوتتۇرىغا قويغان مەسىلىلەرگە كېلەيلى. سىلەر «ئەرلەرنىڭ ئۆز ئاياللىرىغا يېقىنلاشماسلىقى ياخشىمۇ؟» دەپ سوراپسىلەر. ²مېنىڭ جاۋابىم شۇكى، ئاراڭلاردا يۈز بەرگەن جىنسىي ئەخلاقسىزلىقتىن ساقلىنىش ئۈچۈن ھەربىر جۈپ ئەر-ئايال ئۆز ھەمراھلىرى بىلەن بىر ئورۇندا ياتسۇن. ³ئەر ئايالىغا نىسبەتەن ئەرلىك مەجبۇرىيىتىنى ئادا قىلىشى، ئايالمۇ ئېرىگە نىسبەتەن ئاياللىق مەجبۇرىيىتىنى ئادا قىلىشى كېرەك. ⁴ئايالنىڭ تېنى پەقەت ئۆزىگىلا ئەمەس، بەلكى ئېرىگىمۇ تەئەللۇقتۇر. شۇنىڭغا ئوخشاش، ئەرنىڭ تېنىمۇ ئايالىغىمۇ تەئەللۇقتۇر. ⁵ئەر-ئايال بىر-بىرىنىڭ جىنسىي تەلىپىنى رەت قىلماسلىقى كېرەك. پەقەت پۈتۈن زېھنىڭلار بىلەن دۇئا قىلىش مەقسىتىدە ئۆزۈڭلارنىڭ رازىلىقى بىلەن ۋاقىتلىق بىرگە ياتماسلىققا كېلىشكەندىن باشقا ۋاقىتلاردا بىر-بىرىڭلاردىن ئايرىلىپ ياتماڭلار. بولمىسا، شەيتان سىلەرنىڭ ئۆزۈڭلارنى تۇتۇۋالالماسلىقىڭلاردىن پايدىلىنىپ، سىلەرنى ئازدۇرۇپ كېتىشى مۇمكىن. ⁶مېنىڭ بۇ سۆزلىرىم پەقەت بىر تەكلىپ، بۇيرۇق ئەمەس. ⁷ئەلۋەتتە، ھەممىڭلارنىڭ ماڭا ئوخشاش توي قىلماسلىقىڭلارنى ئۈمىد قىلىمەن. لېكىن بۇ ئىشتا ھەممە ئادەم ئوخشاش ئەمەس. چۈنكى خۇدا بەزىلەرگە توي قىلىشنى ئىلتىپات قىلغان بولسا، يەنە بەزىلەرگە توي قىلماي ئۆتۈشنى ئىلتىپات قىلغان.

⁸ئەمدى توي قىلمىغان ۋە ئېرى ئۆلۈپ كەتكەن تۇل ئاياللارغا كەلسەك، سىلەرگە شۇنى ئېيتىپ قويايكى، سىلەرنىڭ ماڭا ئوخشاش توي قىلماي ياشىغىنىڭلار ياخشىدۇر. ⁹لېكىن ئۆزۈڭلارنى تۇتۇۋالالمىساڭلار، نىكاھلىنىڭلار. چۈنكى شەھۋەت ئوتىدا كۆيگەندىن كۆرە، نىكاھلىق بولغان ياخشىدۇر.

¹⁰نىكاھلىق بولغان ئېتىقادچىلارغا كەلسەك، ئۇلارغا شۇنى بۇيرۇيمەنكى، ئايال ئېرىدىن ئاجراشمىسۇن. بۇ مېنىڭلا ئەمەس، بەلكى رەببىمىزنىڭمۇ بۇيرۇقىدۇر. ¹¹ئاجراشقان بولسا، قايتا توي قىلمىسۇن ياكى ئۆزىنىڭ ئېرى بىلەن يارىشىۋالسۇن. ئەرمۇ ئايالىنى قويۇۋەتمىسۇن.

¹²ئەمدى سىلەرگە دەيدىغانلىرىم رەببىمىزنىڭ ئەمەس، مېنىڭ سۆزلىرىمدۇر. ئەگەر توي قىلغاندىن كېيىن ئەر ئەيسا مەسىھكە ئېتىقاد قىلىپ، ئايالى ئېتىقاد قىلمىغان بولسا، لېكىن ئايال داۋاملىق بىرگە ياشاشقا رازى بولسا، ئېرى ئۇنى قويۇۋەتمىسۇن. ¹³ئەگەر توي قىلغاندىن كېيىن ئايال ئەيسا مەسىھكە ئېتىقاد قىلىپ، ئېرى ئېتىقاد قىلمىسا لېكىن ئەر داۋاملىق بىرگە ياشاشقا رازى بولسا، ئۇ چاغدا ئايالى ئۇنىڭدىن ئاجراشمىسۇن. ¹⁴چۈنكى ئەيسا مەسىھكە ئېتىقاد قىلمىغان ھەمراھى ئۇنىڭ ئېتىقادچى ئايالى ياكى ئېرى ئارقىلىق خۇدا تەرىپىدىن قوبۇل قىلىنىدۇ ۋە ئۇلارنىڭ نىكاھى خۇدانىڭ نەزىرىدە يەنىلا پاكتۇر. ئەگەر خۇدا قوبۇل قىلمىغان بولسا، ئۇلارنىڭ پەرزەنتلىرى ناپاك بولاتتى، ھازىر ئۇلار پاكتۇر. ¹⁵بىراق ئېتىقاد قىلمىغان تەرەپ ئايرىلىمەن دېسە، ئايرىلسۇن. ئېتىقادچى ئەر بولسۇن ياكى ئايال بولسۇن، بۇنداق ئەھۋالدا ئۆزلىرىنىڭ نىكاھىنى زورلاپ داۋاملاشتۇرۇشىنىڭ ھاجىتى يوق. ۋاھالەنكى، خۇدا سىلەرنى ھەمراھىڭلار بىلەن ئىناق ياشاشقا چاقىرغان. ¹⁶ئەي ئېتىقادچى ئايال، بەلكىم ئېرىڭ سەن ئارقىلىق ئەيسا مەسىھكە ئېتىقاد قىلىپ، قۇتقۇزۇلۇشى مۇمكىن. ئەي ئېتىقادچى ئەر، بەلكىم ئايالىڭ سەن ئارقىلىق ئەيسا مەسىھكە ئېتىقاد قىلىپ، قۇتقۇزۇلۇشى مۇمكىن.

ئېتىقاد يولىغا چاقىرىلغان ۋاقىتتىكى سالاھىيەت مەسىلىسى

¹⁷خۇدا ھەركىمنى ئۆزىگە ئېتىقاد قىلىشقا چاقىرغاندا، ھەركىم رەببىنىڭ ئۆزى ئۈچۈن بەلگىلىگەن ئەھۋالغا ئۇيغۇن ھالدا ياشىسۇن. بۇنى ھەممە ئېتىقادچىلار جامائىتىگە بۇيرۇيمەن. ¹⁸مەسىلەن، بىر كىشى خۇدا تەرىپىدىن ئۆزىگە ئېتىقاد قىلىشقا چاقىرىلىشتىن بۇرۇن خەتنە قىلدۇرغان بولسا، خەتنى ئىزىنى يوقىتىشقا ئۇرۇنمىسۇن. خەتنە قىلىنمىغان بولسا، خەتنە قىلدۇرمىسۇن. ¹⁹ئېتىقادچىنىڭ خەتنە قىلىنغان ياكى قىلىنمىغانلىقى مۇھىم ئەمەس، ئەڭ مۇھىمى ئۇنىڭ خۇدانىڭ ئەمرلىرىگە ئەمەل قىلىشىدۇر. ²⁰ھەركىم خۇدا تەرىپىدىن ئۆزىگە ئېتىقاد قىلىشقا چاقىرىلغاندا قانداق ئەھۋالدا ياشاۋاتقان بولسا، شۇ ئەھۋالدا ياشاۋەرسۇن. ²¹قۇل ۋاقتىڭدا خۇدا تەرىپىدىن ئۆزىگە ئېتىقاد قىلىشقا چاقىرىلغان بولساڭ، ئۆزۈڭنىڭ قۇل بولغانلىقىڭدىن قايغۇرما. لېكىن پۇرسەت بولسا، ھۆر بولۇشنى قولدىن بەرمە. ²²خۇدا تەرىپىدىن ئۆزىگە ئېتىقاد قىلىشقا چاقىرىلغان كىشى قۇل بولسا، ئۇ رەببىمىز ئەيساغا مەنسۇپ بولغاندىن كېيىن، روھىي جەھەتتە ھۆر ئادەمگە ئايلىنىدۇ. شۇنىڭدەك، خۇدا تەرىپىدىن ئۆزىگە ئېتىقاد قىلىشقا چاقىرىلغان كىشى ھۆر ئادەم بولسا، ئۇ ئەيسا مەسىھكە ئىتائەت قىلغانلىقى ئۈچۈن، ئەيسا مەسىھنىڭ قۇلىغا ئايلىنىدۇ. ²³خۇدا سىلەرنى ئەيسا مەسىھنىڭ قىممەتلىك قېنى ئارقىلىق ھۆرلۈككە چىقاردى. شۇڭا ئۆزۈڭلارنى ئىنسانلارنىڭ ھەر خىل ئوي-پىكىرلىرىگە قۇل قىلماڭلار. ²⁴قېرىنداشلار، ھەركىم خۇدا تەرىپىدىن ئۆزىگە ئېتىقاد قىلىشقا چاقىرىلغاندا قانداق ئەھۋالدا ياشىغان بولسا، خۇداغا باغلانغان يېڭى ھاياتىدىمۇ شۇنداق ئەھۋالدا ياشىسۇن.

نىكاھلىنىش ۋە نىكاھلانماسلىق مەسىلىسى

²⁵خېتىڭلاردىكى بويىغا يەتكەن قىزلار مەسىلىسىگە كەلسەك، رەببىمىزدىن ئۇلار توغرىسىدا بىرەر ئەمر ئالمىدىم. شۇنداقتىمۇ، ئۆز پىكىرلىرىمنى ئوتتۇرىغا قويماقچىمەن. مېنىڭ سۆزلىرىم ئىشەنچلىكتۇر، چۈنكى مەن رەببىمىزنىڭ مېھىر-شەپقىتىگە ئېرىشكەنمەن. ²⁶بۈگۈنكى قىيىنچىلىقلارغا قارىغاندا، مەن شۇنداق قارايمەنكى، ھەركىم ئەيسا مەسىھكە ئېتىقاد قىلغان چاغدىكى ئەھۋالىدا ياشىغىنى ياخشى. ²⁷ئۆيلەنگەن بولساڭ، ئايالىڭ بىلەن ئاجرىشىشنى ئويلىما. ئۆيلەنمىگەن بولساڭ، ئۆيلىنىمەن دېمە. ²⁸لېكىن ئۆيلەنسەڭمۇ گۇناھ قىلغان بولمايسەن. بويىغا يەتكەن قىزلارمۇ ئەرگە تەگسە، گۇناھ قىلغان بولمايدۇ. بىراق نىكاھلىق بولغانلارنىڭ كۈندىلىك تۇرمۇشتا خىلمۇخىل قىيىنچىلىقلىرى بولىدۇ. مەن سىلەرنىڭ بۇ قىيىنچىلىقلاردىن ساقلىنىشىڭلارنى ئۈمىد قىلىمەن.

²⁹قېرىنداشلار، كۆزقارىشىم شۇكى، ئاخىر زامانغا ئاز قالدى. بۇنىڭدىن كېيىن ئۆيلەنگەن ئەرلەر ئۆيلەنمىگەندەك، ³⁰ماتەم تۇتقانلار ماتەم تۇتمىغاندەك، خۇشال بولغانلار خۇشال بولمىغاندەك، سېتىۋالغانلار ھېچنېمە سېتىۋالمىغاندەك ياشىسۇن. ³¹بۇ دۇنيانىڭ بايلىقلىرىدىن بەھرىمەن بولۇۋاتقانلارمۇ بايلىققا بېرىلىپ كەتمىسۇن. چۈنكى بۇ دۇنيا ئۆتكۈنچىدۇر.

³²غەمسىز بولۇشۇڭلارنى ئۈمىد قىلىمەن. ئۆيلەنمىگەن ئەر رەببىمىزنى خۇرسەن قىلىش ئۈچۈن رەببىمىزنىڭ ئىشلىرىنىڭ غېمىنى قىلىدۇ. ³³لېكىن ئۆيلەنگەن ئەر ئايالىنى خۇرسەن قىلىش ئۈچۈن بۇ دۇنيانىڭ ئىشلىرىنىڭ غېمىنى قىلىدۇ. ³⁴شۇنىڭ بىلەن ئۇنىڭ كۆڭلى ئىككىگە بۆلۈنۈپ كېتىدۇ. ئەرسىز ئايال ياكى نىكاھلىق بولمىغان قىز جىسمانىي ۋە روھىي جەھەتتە ئۆزىنى خۇداغا ئاتاپ، رەببىمىزنىڭ ئىشلىرىنىڭ غېمىنى قىلىدۇ. لېكىن نىكاھلانغان ئايال ئېرىنى خۇرسەن قىلىش ئۈچۈن بۇ دۇنيانىڭ ئىشلىرىنىڭ غېمىنى قىلىدۇ.

³⁵بۇ سۆزلەرنى سىلەرنىڭ پۇت-قولۇڭلارنى چۈشەپ قويۇش ئۈچۈن ئەمەس، بەلكى سىلەرگە پايدىسى بولسۇن ۋە كۆڭلىنى ئىككىگە بۆلمەي، ئۆزلىرىنى رەببىمىزگە ئاتاپ، ئۇنىڭ ئۈچۈن ياشىسۇن، دەپ ئېيتىۋاتىمەن. ³⁶ئەگەر بىر كىشى ۋەدىلەشكەن قىز بىلەن توي قىلماي، ئارتۇقچە ساقلىتىپ قويغانلىقتىن بۇ قىزغا يۈز كېلەلمەيدىغانلىقىنى ھېس قىلسا، ئۇنداقتا ئۇ كىشى ئۇ قىزنى ئەمرىگە ئالسۇن. بۇنداق قىلىش گۇناھ قىلغانلىق بولمايدۇ. ³⁷بىراق بۇ كىشى بېسىم ئاستىدا ئەمەس، ئۆز ئىرادىسى بىلەن ۋەدىلەشكەن بۇ قىزنى ئەمرىگە ئالماسلىققا قارار قىلسا، ھەمدە شەھۋىتىنى بېسىۋالالىسا، ياخشى قىلغان بولىدۇ. ³⁸قىسقىسى، توي قىلىش ياخشى، توي قىلماسلىق تېخىمۇ ياخشى.

³⁹ئېرى ھايات چاغدا ئايال ئېرىگە نىكاھ بىلەن باغلانغان بولىدۇ. لېكىن ئېرى ئۆلۈپ كەتسە، خالىغان كىشى بىلەن نىكاھلانسا بولىدۇ. لېكىن ئۇ كىشى ئېتىقادچى بولۇشى كېرەك. ⁴⁰بىراق ئايال توي قىلماي ياشىسا، تېخىمۇ بەختلىكتۇر. بۇ مېنىڭ كۆزقارىشىم. لېكىن مەن ئويلايمەنكى، بۇ كۆزقارىشىمغا خۇدانىڭ روھى يېتەكچىلىك قىلدى.

8

قېرىندىشى ئۈچۈن ئۆز خاھىشىدىن ۋاز كېچىش

¹ئەمدى خېتىڭلاردىكى بۇتقا ئاتاپ نەزىر قىلىنغان گۆشنى^* يېيىش ياكى يېمەسلىك مەسىلىسىگە كېلەيلى. سىلەر ھەممىمىزنىڭ بۇ مەسىلە ھەققىدە بىلىمىمىز بار دەپ قارايسىلەر. بىراق بىلىم ئادەمنى تەكەببۇرلاشتۇرۇۋېتىشى مۇمكىن. لېكىن مېھىر-مۇھەببەت ئادەمنىڭ ئېتىقادىنى تېخىمۇ مۇستەھكەملەيدۇ. ²ئۆزىنى بىلەرمەن چاغلايدىغان كىشى ئەمەلىيەتتە بىلىشكە تېگىشلىك بىلىملەرنى بىلمەيدۇ. ³لېكىن خۇدانى سۆيگەن كىشىنى خۇدا تونۇيدۇ.

⁴خوش، ئەمدى بۇتقا ئاتاپ نەزىر قىلىنغان گۆش مەسىلىسىگە كەلسەك، بىزگە مەلۇمكى، كۆپ ئادەملەر چوقۇنۇۋاتقان بۇتلار خۇدا ئەمەستۇر. يېگانە خۇدادىن باشقا ئىلاھ يوقتۇر. ⁵گەرچە بەزىلەر دۇنيادا نۇرغۇن ئىلاھلار بار، ئۇلار زېمىن ۋە ئاسماندا ياشايدۇ دەپ قارىغان ھەمدە ئۇلارنى ئۆزىنىڭ خۇداسى ۋە رەببى دەپ ئېتىراپ قىلغان بولسىمۇ، ⁶بىراق بىز ئۈچۈن پەقەتلا يېگانە خۇدا، يەنى ئەرشتىكى خۇدائاتىمىزلا باردۇر. ئۇ پۈتكۈل مەۋجۇداتنىڭ ياراتقۇچىسىدۇر، بىز ئۇنىڭ ئۈچۈن ياشايمىز. بىز ئۈچۈن يېگانە بىر رەب باردۇر، ئۇ بولسىمۇ رەببىمىز ئەيسا مەسىھتۇر. پۈتكۈل مەۋجۇدات ئۇ ئارقىلىق مەۋجۇتتۇر. بىزمۇ ئۇ ئارقىلىق ياشايمىز. ⁷لېكىن ھەممە ئېتىقادچىلار بۇنى تونۇپ يەتمىدى. ئۇلارنىڭ بەزىلىرى ئېتىقادچى بولۇشتىن بۇرۇن بۇتپەرەسلىك ئادەتلىرىگە كۆنۈپ قالغاچقا، ئۇلار بۇتقا ئاتاپ نەزىر قىلىنغان گۆشنى يېيىشنى بۇتقا چوقۇنۇش بىلەن باراۋەر دەپ قارايدۇ. شۇڭا ئۇلار بۇ گۆشنى يېيىشكە جۈرئەت قىلالمايدۇ. ئەگەر ئۇلار بۇ گۆشنى يەپ سالسا، ئۆزلىرىنى بۇلغانغاندەك ھېس قىلىپ، ۋىجدانى ئازابلىنىدۇ. ⁸ئەمەلىيەتتە، ھەرقانداق يېمەكلىكنى يېيىش ياكى يېمەسلىك بىلەن ئۆزىمىزنى خۇداغا يېقىنلاشتۇرالمايمىز. ئۇنى يېسەك، خۇداغا يېقىنلىشىپ قالمايمىز، يېمىسەك خۇدادىن يىراقلىشىپمۇ كەتمەيمىز. ⁹لېكىن ئېھتىيات قىلىڭلار، سىلەرنىڭ مەلۇم يېمەكلىكنى يېيىش ياكى يېمەسلىك ئەركىنلىكىڭلار بۇنى تونۇپ يەتمىگەن ئېتىقادچى قېرىنداشلىرىڭلارغا پۇتلىكاشاڭ بولۇپ قالمىسۇن. ¹⁰بۇنى تونۇپ يەتمىگەن بىر ئېتىقادچى تونۇپ يەتكەن سىلەرنىڭ بۇتخانىدا ئۆتكۈزۈلۈۋاتقان زىياپەتتە گۆش يەۋاتقانلىقىڭلارنى كۆرسە، بۇتقا سۇنۇلغان قۇربانلىقنىڭ گۆشىنى يېيىشكە جاسارەتلەنمەسمۇ؟ ¹¹ئاقىۋەتتە، بۇنداق بىلىمنى تونۇپ يەتمىگەن بۇ قېرىندىشىمىزنىڭ ئېتىقادى سىلەرنىڭ بىلىمىڭلار تۈپەيلىدىن ۋەيران بولۇشى مۇمكىن. ھالبۇكى، ئەيسا مەسىھ ئۇنىڭ ئۈچۈنمۇ قۇربان بولغاندۇر. ¹²سىلەر قېرىندىشىڭلارنى ئۆزلىرى خاتا دەپ قارىغان ئىشلارنى قىلىشقا دەۋەت قىلساڭلار، قېرىندىشىڭلارنىڭ ئالدىدا گۇناھ ئۆتكۈزۈپ، ئۇلارنىڭ ۋىجدانىنى جاراھەتلەيسىلەر، شۇنداقلا ئەيسا مەسىھ ئالدىدىمۇ گۇناھ قىلغان بولىسىلەر. ¹³ئەگەر يېگەن گۆشىمىز سەۋەبىدىن ئېتىقادچى قېرىندىشىمىزنىڭ ئېتىقادى بۇزۇلسا، ئۇنداقتا بىز بۇ گۆشنى قەتئىي يېمەيلى.

9

پاۋلۇسنىڭ ئۆزىنىڭ ئەلچى ئىكەنلىكىنى ئىسپاتلىشى

¹مېنىڭ ئەركىنلىكىم يوقمۇ؟ مەن خۇدانىڭ ئەلچىسى ئەمەسمۇ؟ مەن رەببىمىز ئەيسانى ئۆز كۆزۈم بىلەن كۆرگەن ئەمەسمۇ؟ سىلەرنىڭ ئېتىقادىڭلار مېنىڭ رەببىمىز ئۈچۈن قىلغان خىزمىتىمنىڭ نەتىجىسى ئەمەسمۇ؟ ²گەرچە باشقىلار مېنى ئەلچى دەپ ھېسابلىمىسىمۇ، لېكىن مەن سىلەر ئۈچۈن ھەقىقەتەن ئەيسا مەسىھنىڭ ئەلچىسىدۇرمەن. چۈنكى سىلەرنىڭ مەندىن خۇش خەۋەرنى ئاڭلاپ، رەببىمىزگە ئېتىقاد قىلغىنىڭلار مېنىڭ ئەلچى ئىكەنلىكىمنىڭ ئىسپاتىدۇر.

³مېنىڭ ئەلچى ئىكەنلىكىمدىن گۇمانلىنىدىغانلارغا مۇنداق سوئال قويىمەن: ⁴بىز ئەلچىلەرنىڭ ئېتىقادچىلار تەرىپىدىن يېمەك-ئىچمەك ياردىمىگە ئېرىشىش ھوقۇقىمىز يوقمۇ؟ ⁵بىزنىڭ رەببىمىز ئەيسانىڭ ئۆز ئىنىلىرى ۋە پېترۇس، ھەمدە باشقا ئەلچىلەردەك سەپەرلەردە ئېتىقادچى ئاياللىرىمىزنى بىرگە ئېلىپ يۈرۈش ھەققىمىز يوقمۇ؟ ⁶ئەجەبا، پەقەت بارنابا بىلەن مەنلا ئېتىقادچىلار تەرىپىدىن ياردەمگە ئېرىشمەي، ئۆز ئەمگىكىمىز بىلەن كۈن كەچۈرۈشىمىز كېرەكمۇ؟ ⁷كىم ئۆز چىقىمىنى ئۆزى قىلىپ، لەشكەر بولىدۇ؟ كىم ئۈزۈمزارلىق بەرپا قىلىپ، ئۇنىڭ مېۋىسىنى يېمەيدۇ؟ كىم مال بېقىپ، ئۇنىڭ سۈتىنى ئىچمەيدۇ؟ ⁸مېنىڭ بۇنداق دېيىشىم، ئەجەبا، ئىنساننىڭ كۆز قارىشىمۇ؟ تەۋرات قانۇنىدىمۇ مۇشۇنداق دېيىلمىگەنمۇ؟ ^9‏-10مۇسا پەيغەمبەرگە چۈشۈرۈلگەن تەۋرات قانۇنىدا: «خامان تېپىۋاتقان ئۆكۈزنىڭ ئاغزىنى بوغماڭلار» دەپ يېزىلغان. بۇ يەردە خۇدا پەقەت ئۆكۈزلەر ئۈچۈن ئېيتقانمۇ ياكى بىز ئۈچۈنمۇ ئېيتقانمۇ؟ شۈبھىسىزكى، بۇ سۆز بىز ئۈچۈنمۇ ئېيتىلغاندۇر. چۈنكى يەر ئاغدۇرغۇچىمۇ ۋە خامان تەپكۈچىمۇ ئۆزىگە تېگىشلىك ئۈلۈشىنى ئېلىش ئۈمىدى بىلەن ئىشلەيدۇ. ¹¹شۇڭا سىلەرگە خۇش خەۋەر يەتكۈزۈش ئارقىلىق روھىي ئۇرۇق چېچىپ، سىلەردىن ماددىي ھوسۇل ئېلىش ھەددىدىن ئېشىپ كەتكەنلىك بولامدۇ؟ ¹²باشقا تەلىم بەرگۈچىلەرنىڭ سىلەردىن ياردەمگە ئېرىشىش ھوقۇقى بولغان يەردە، بىزنىڭ ياردەمگە ئېرىشىش ھوقۇقىمىز تېخىمۇ بولمامدۇ؟

لېكىن بىز بۇ ھوقۇقىمىزدىن پايدىلانمىدۇق. ئەكسىچە، ئەيسا مەسىھ توغرىسىدىكى خۇش خەۋەرنىڭ تارقىلىشىغا توسالغۇ بولۇپ قالماسلىقىمىز ئۈچۈن ھەرقانداق ئىشقا بەرداشلىق بېرىپ كەلدۇق. ¹³يېرۇسالېمدىكى مەركىزىي ئىبادەتخانىدا ئىشلەيدىغانلارنىڭ كىشىلەرنىڭ ئىبادەتخانىغا ئېلىپ كەلگەنلىرىدىن بەھرىمەن بولىدىغانلىقىنى ۋە قۇربانلىق سۇپىسىدا ۋەزىپىدە بولغانلارنىڭمۇ قىلىنغان قۇربانلىقلاردا ئۈلۈشى بارلىقىنى بىلمەمسىلەر؟ ¹⁴رەببىمىزمۇ خۇش خەۋەر تارقىتىدىغانلارنىڭ تۇرمۇشى خۇش خەۋەر قوبۇل قىلغانلار تەرىپىدىن قامدالسۇن، دەپ بۇيرۇغانىدى.

¹⁵لېكىن مەن بۇ ھوقۇقلىرىمدىن پايدىلانمىدىم. ھازىرمۇ مەن بۇ خەتنى بۇ ھوقۇقۇمدىن پايدىلىناي، دەپ يېزىۋاتقىنىم يوق. مەن ئۆلۈشكە رازىمەنكى، ئۆزۈمدىن پەخىرلىنىشنىڭ قۇرۇق سۆزگە ئايلىنىپ قېلىشىغا يول قويمايمەن. ¹⁶خۇش خەۋەر تارقاتتىم دەپ، ماختىنالمايمەن. چۈنكى خۇش خەۋەرنى تارقىتىش مېنىڭ بۇرچۇمدۇر. ئۇنى تارقاتمىسام بولمايدۇ! ¹⁷ئەگەر خۇش خەۋەرنى ئۆز ئىختىيارىم بىلەن تارقاتقان بولسام، مۇكاپاتقا لايىق بولاتتىم. لېكىن بۇ ۋەزىپىنى خۇدا ماڭا تاپشۇرغانلىقى ئۈچۈن، بۇ ۋەزىپىنى ئورۇنداش مېنىڭ بۇرچۇمدۇر. ¹⁸ئۇنداقتا، مېنىڭ ئىگە بولىدىغان مۇكاپاتىم نېمە؟ خۇش خەۋەر تارقاتقاندا، ھەق ئېلىشقا تېگىشلىك ھوقۇقۇمدىن پايدىلانماي، خۇش خەۋەرنى ھەقسىز تارقىتىش مېنىڭ ئىگە بولىدىغان مۇكاپاتىمدۇر.

¹⁹مەن ئادەملەرنىڭ ھەر خىل تەلەپلىرىدىن ئەركىنمەن. لېكىن تېخىمۇ كۆپ ئادەمنىڭ ئەيسا مەسىھكە ئېتىقاد قىلىشى ئۈچۈن كۆپچىلىككە قۇلدەك خىزمەت قىلىۋاتىمەن. ²⁰يەھۇدىيلارنىڭ ئەيسا مەسىھكە ئېتىقاد قىلىشى ئۈچۈن يەھۇدىيلار ئارىسىدا بولغىنىمدا يەھۇدىيلاردەك ياشاۋاتىمەن. تەۋرات قانۇنىنىڭ ئىلكىدىن ئازاد بولغان بولساممۇ، تەۋرات قانۇنىنىڭ ئىلكىدە ياشايدىغانلارنىڭ ئەيسا مەسىھكە ئېتىقاد قىلىشى ئۈچۈن ئۇلاردەك ياشاۋاتىمەن. ²¹تەۋرات قانۇنى بىلەن مۇناسىۋىتى يوق يەھۇدىي ئەمەسلەر ئارىسىدا بولغىنىمدا، تېخىمۇ كۆپ كىشىلەرنىڭ قۇتقۇزۇلۇشى ئۈچۈن ئۇلارغا ئوخشاش ياشاۋاتىمەن. لېكىن مەن خۇدانىڭ قانۇنىدىن چەتنەپ كەتمىدىم، يەنىلا ئەيسا مەسىھنىڭ قانۇنىغا ئىتائەت قىلىپ ياشاۋاتىمەن. ²²ۋىجدانى ئاسانلا ئازابلىنىدىغان ئېتىقادچىلارنىڭ ئارىسىدا ئۇلارغا ئوخشاش ياشاۋاتىمەن. بۇنداق قىلىشىمدىكى مەقسىتىم، ئۇلارنىڭ ئېتىقادىنى مۇستەھكەملەشتۇر. تېخىمۇ كۆپ كىشىلەرنىڭ قۇتقۇزۇلۇشى ئۈچۈن قانداق كىشىلەرنىڭ ئارىسىدا ياشىسام، شۇ كىشىلەرنىڭ ئادەتلىرى بويىچە ياشايمەن. ²³مەن تېخىمۇ كۆپ كىشىلەرنىڭ خۇش خەۋەرنى قوبۇل قىلىپ، ئۇنىڭدىن كېلىدىغان بەختتىن مەن بىلەن تەڭ بەھرىمەن بولۇشى ئۈچۈن بۇ ئىشلارنى قىلىۋاتىمەن.

²⁴يۈگۈرۈش مۇسابىقىسىگە چۈشكەنلەرنىڭ ھەممىسى يۈگۈرگەن بولسىمۇ، مۇكاپاتنى يالغۇز بىرلا كىشىنىڭ ئالىدىغانلىقىنى بىلىسىلەر. شۇڭا سىلەرمۇ مۇكاپات ئېلىش ئۈچۈن يۈگۈرۈڭلار. ²⁵مۇسابىقىگە چۈشكەن ھەربىر تەنھەرىكەتچى چىرىيدىغان تاجغا ئىگە بولۇش ئۈچۈن قاتتىق مەشىق قىلىدۇ. بىز بولساق مەڭگۈ چىرىمەيدىغان تاجغا ئىگە بولۇش ئۈچۈن مەشىق قىلىمىز. ²⁶شۇنىڭ ئۈچۈن مەن نىشانسىز يۈگۈرۈۋاتقان كىشىدەك يۈگۈرۈۋاتقىنىم يوق. شۇنداقلا، خۇددى بوكسچىغا ئوخشاش ئاتقان مۇشتۇمنى بوش كەتكۈزۈۋاتقىنىم يوق. ²⁷خۇش خەۋەرنى يەتكۈزۈپ بولغاندىن كېيىن، خۇدانىڭ ئالدىدا مۇكاپاتقا ئېرىشىشكە لاياقەتسىز بولۇپ قالماسلىقىم ئۈچۈن ئۆزۈمنى قاتتىق تىزگىنلەپ، تېنىمنى ئېتىقاد يولىدا ياشاشقا كۆندۈرۈۋاتىمەن.

10

بۇتپەرەسلىكتىن ھوشيار بولۇش

¹قېرىنداشلار، ئەجدادلىرىمىزنىڭ مىسىردىن چىققان چاغدا چۆل-باياۋاندا بېشىدىن ئۆتكۈزگەن كەچۈرمىشلىرىنى تولۇق چۈشىنىشىڭلارنى ئۈمىد قىلىمەن. ئۇ چاغدا پۈتۈن خەلق بۇلۇتنىڭ يېتەكلىشى ئاستىدا قىزىل دېڭىزدىن مېڭىپ ئۆتكەنىدى. ²ئۇلار مۇسا پەيغەمبەرگە باغلىنىش ئۈچۈن بۇلۇتتا ۋە دېڭىزدا چۆمۈلدۈرۈلدى. ³ئۇلارنىڭ ھەممىسى مۆجىزىلىك يېمەكلىكنى يېگەن ⁴ۋە مۆجىزىلىك سۇنى ئىچكەنىدى. بۇ سۇ ئۇلارغا ھەمراھ بولغان «روھىي قورام تاش»تىن ئېتىلىپ چىققانىدى. بۇ قورام تاش دەل ئەيسا مەسىھ ئىدى. ⁵شۇنداقتىمۇ، خۇدا ئۇلارنىڭ كۆپىنچىسىدىن خۇرسەن بولمىدى. شۇڭا ئۇلارنىڭ جەسەتلىرى چۆل-باياۋاندا قالدى.

⁶ئەجدادلىرىمىزدەك يامان ئىشلارغا بېرىلمەسلىكىمىز ئۈچۈن بۇ ۋەقەلەردىن ئىبرەت ئالايلى. ⁷سىلەر ئۇلارنىڭ بەزىلىرىدەك بۇتقا چوقۇنىدىغانلاردىن بولماڭلار. ئۇلارنىڭ بۇتپەرەسلىكى ھەققىدە مۇقەددەس يازمىلاردا: «ئۇلار ئولتۇرۇپ، خالىغانچە يەپ-ئىچىشىپ، كەيپ-ساپا قىلىشتى»^* دەپ يېزىلغاندۇر. ⁸بىز ئۇلارنىڭ بەزىلىرىدەك جىنسىي ئەخلاقسىزلىق قىلمايلى. ئۇلار شۇنداق ئەخلاقسىزلىق قىلغانلىقى ئۈچۈن، بىر كۈندە 23 مىڭى ھالاك بولغانىدى. ⁹بىز ئۇلارنىڭ بەزىلىرىدەك رەببىمىزنى سىنىمايلى. ئۇ چاغدا رەببىمىزنى سىنىغانلارنى زەھەرلىك يىلانلار چېقىپ ئۆلتۈرگەنىدى. ¹⁰بىز ئۇلارنىڭ بەزىلىرىدەك خۇدادىن ئاغرىنمايلى. ئۇ چاغدا خۇدادىن ئاغرىنغانلار جان ئالغۇچى پەرىشتە تەرىپىدىن ئۆلتۈرۈلگەنىدى. ¹¹ئۇلارنىڭ بېشىدىن ئۆتكۈزگەن بۇ ۋەقەلەرنىڭ خاتىرىلەپ قالدۇرۇلۇشى ئاخىر زاماندا ياشاۋاتقان بىزلەر ئۈچۈن ئىبرەتلىك بىر ئاگاھلاندۇرۇشتۇر. ¹²شۇنىڭ ئۈچۈن ئېتىقادىمدا چىڭ تۇرۇۋاتىمەن دەپ ئويلايدىغانلار يىقىلىپ چۈشۈشتىن پەخەس بولسۇن. ¹³سىلەر دۇچ كەلگەن سىناقلارغا باشقا ئادەملەرمۇ ئوخشاش دۇچ كەلگەندۇر. خۇدا ئىشەنچلىكتۇر! ئۇ سىلەرنى بەرداشلىق بېرىش چېكىڭلاردىن ھالقىغان سىناقلارغا دۇچار قىلمايدۇ. سىلەر سىناققا دۇچ كەلگەندە بەرداشلىق بېرەلىشىڭلار ئۈچۈن خۇدا سىلەرگە چىقىش يولى ئېچىپ بېرىدۇ.

¹⁴شۇ سەۋەبتىن، قەدىرلىك قېرىنداشلىرىم، بۇتپەرەسلىكتىن ساقلىنىڭلار. ¹⁵سىلەرنى ئەقىل-ھوشى جايىدا كىشىلەر دەپ قاراپ، بۇنى ئېيتىۋاتىمەن. ئېيتقانلىرىمغا ئۆزۈڭلار باھا بېرىڭلار. ¹⁶بىز رەببىمىزنى خاتىرىلەش ئۈچۈن بىر داستىخاندا جەم بولۇپ، خۇداغا شۈكۈر ئېيتىپ، پىيالىدىكى شارابنى ئىچكەندە، ئەيسا مەسىھنىڭ قېنىغا شېرىك بولىمىز. بىر ناننى بۆلۈشۈپ يېگەندە، ئۇنىڭ بىز ئۈچۈن قۇربان بولغان تېنىغا شېرىك بولىمىز. ¹⁷بىز ئېتىقادچىلار كۆپ بولساقمۇ، لېكىن ھەممىمىز بىر تەندۇرمىز، چۈنكى ھەممىمىز بىر ناننى بۆلۈشۈپ يېدۇق.

¹⁸ئىسرائىللارغا قاراڭلار، ئۇلارنىڭ يېرۇسالېمدىكى مەركىزىي ئىبادەتخانىدا خۇداغا ئاتاپ قىلىنغان قۇربانلىقنىڭ گۆشىنى يېيىشى ئىبادەتتۇر. ¹⁹مېنىڭ بۇنداق دېگەنلىكىم «بۇتقا ئاتاپ قىلىنغان قۇربانلىقنىڭ ئەھمىيىتى بار» ياكى «بۇت ھەقىقىي خۇدا» دېگەنلىكمۇ؟ ²⁰ياق، ھەرگىز ئۇنداق ئەمەس! دېمەكچى بولغىنىم شۇكى، بۇتپەرەسلەر قۇربانلىقلىرىنى خۇداغا ئەمەس، جىنلارغا ئاتايدۇ. سىلەرنىڭ جىنلار بىلەن شېرىك بولۇشۇڭلارنى خالىمايمەن. ²¹سىلەر رەببىمىزنىڭ پىيالىسىدىن ھەم جىنلارنىڭ پىيالىسىدىن ئىچسەڭلار، شۇنداقلا رەببىمىزنىڭ داستىخىنىغا ھەم جىنلارنىڭ داستىخىنىغا داخىل بولساڭلار بولمايدۇ. ²²سىلەر رەببىمىزنىڭ غەزىپىنى قوزغىماقچىمۇ؟ سىلەر رەببىمىزدىن كۈچلۈكمۇ؟

ئېتىقادچىلارنىڭ ئەركىنلىكى

²³بەزىلەر ئېتىقادىمىزدىكى ئەركىنلىكنى چۈشەنمەي: «ھەرقانداق ئىشنى قىلسام بولىدۇ» دېيىشى مۇمكىن. لېكىن ھەممە ئىش پايدىلىق بولىۋەرمەيدۇ. بەزىلەر: «ھەرقانداق ئىشنى قىلسام بولىدۇ» دەيدۇ. لېكىن بۇ قېرىنداشلىرىنىڭ ئېتىقاد جەھەتتە كۈچلۈك بولۇپ يېتىلىشىگە ياردەم بېرەلمەيدۇ. ²⁴ھەركىم پەقەت ئۆز مەنپەئەتىنىلا ئەمەس، بەلكى باشقىلارنىڭمۇ مەنپەئەتىنى ئويلىشى كېرەك.

²⁵گۆش دۇكىنىدا سېتىلغان گۆشلەرنى بۇتقا ئاتاپ قۇربانلىق قىلىنغانمۇ ياكى قىلىنمىغانمۇ دەپ سۈرۈشتۈرۈپ، ۋىجدانىڭلارنى ئازابلاپ يۈرمەي، يەۋېرىڭلار. ²⁶چۈنكى مۇقەددەس يازمىلاردا مۇنداق يېزىلغاندۇر: «پەرۋەردىگارغا تەۋەدۇر دۇنيا ۋە ئۇنىڭدىكى بارلىق مەۋجۇدات.» ²⁷ئەگەر ئەيسا مەسىھكە ئېتىقاد قىلمىغان بىر كىشىنىڭ زىياپەت تەكلىپىنى قوبۇل قىلساڭلار، ئالدىڭلارغا قويۇلغان نەرسىلەرنى بۇتقا ئاتاپ قۇربانلىق قىلىنغانمۇ ياكى قىلىنمىغانمۇ دەپ سۈرۈشتۈرۈپ، ۋىجدانىڭلارنى ئازابلاپ يۈرمەي يەۋېرىڭلار. ²⁸لېكىن باشقا بىرى سىلەرگە: «بۇ بۇتقا قۇربانلىق قىلىنغان گۆش» دېسە، ئۇ كىشىنىڭ ۋىجدانىنى ئازابلىماسلىق ئۈچۈن ئۇ گۆشنى يېمەڭلار. ²⁹بۇ يەردە سىلەرنىڭ ۋىجدانىڭلارنى ئەمەس، بەلكى ئۇ كىشىنىڭ ۋىجدانىنى دېمەكچىمەن.

ئۇنداقتا، نېمە ئۈچۈن باشقىلارنىڭ ۋىجدانى مېنىڭ ئەركىنلىكىمنى چەكلەيدۇ؟ ³⁰ئەگەر مەن خۇداغا شۈكۈر ئېيتىپ بۇنداق زىياپەتكە قاتناشسام، يەنە نېمە ئۈچۈن يېمەكلىك سەۋەبىدىن ئەيىبلىنىمەن؟ ³¹دېمەك، مەيلى نېمە يەپ، نېمە ئىچىڭلار، مەيلى قانداق ئىش قىلىڭلار، ھەممىنى خۇدانىڭ شەرىپى ئۈچۈن قىلىڭلار. ³²مەيلى يەھۇدىي ياكى يەھۇدىي ئەمەس، ياكى خۇداغا مەنسۇپ جامائەتتىكى ئېتىقادچىلار بولسۇن، ئۇلارنى پۇتلىماڭلار. ³³ئۆزۈممۇ سىلەرگە دېگەنلىرىم بويىچە ئىش قىلىمەن. مەن ھەرقايسى جەھەتتىن ھەممە ئادەمنى خۇرسەن قىلىشقا تىرىشىمەن. چۈنكى مەن ئۆز مەنپەئەتىمنى ئەمەس، بەلكى كۆپچىلىكنىڭ قۇتقۇزۇلۇشى ئۈچۈن ئۇلارنىڭ مەنپەئەتىنى كۆزلەيمەن.

11

¹مەن ئەيسا مەسىھنى ئۆزۈمگە ئۈلگە قىلغىنىمدەك، سىلەرمۇ مېنى ئۆزۈڭلارغا ئۈلگە قىلىڭلار.

ئىبادەت قائىدىلىرى

²دائىم مېنى ئەسلەپ تۇرغىنىڭلار ۋە مەن سىلەرگە يەتكۈزگەن تەلىملەرگە ئەمەل قىلغىنىڭلار ئۈچۈن سىلەرنى ماختايمەن. ³لېكىن شۇنىمۇ بىلىشىڭلارنى ئۈمىد قىلىمەنكى، ئەيسا مەسىھ ئەرلەرنىڭ بېشى، ئەرلەر ئاياللارنىڭ بېشى، خۇدا ئەيسا مەسىھنىڭ بېشىدۇر. ⁴شۇڭا بىر ئەر ئىبادەت قىلغاندا بېشىغا بىرنېمە كىيىپ دۇئا قىلسا ياكى خۇدانىڭ ۋەھىيسىنى يەتكۈزسە، ئۇ ئۆز بېشى بولغان ئەيسا مەسىھكە ھۆرمەتسىزلىك قىلغان بولىدۇ. ⁵بىر ئايال بېشىغا بىر نەرسە ئارتماي دۇئا قىلسا ياكى خۇدانىڭ ۋەھىيسىنى يەتكۈزسە، ئۇمۇ ئۆز بېشىغا ھۆرمەتسىزلىك قىلغان بولىدۇ. بۇنداق ئاياللار بىلەن چېچى چۈشۈرۈۋېتىلگەن ئاياللارنىڭ ھېچبىر پەرقى يوقتۇر. ⁶ئەگەر ئاياللار بېشىغا بىر نەرسە ئارتىشنى خالىمىسا، ئۇنداقتا ئۇلار چېچىنى كەستۈرۈۋەتسۇن. چۈنكى ئاياللارنىڭ چېچىنىڭ كېسىلىشى ياكى چۈشۈرۈلۈشى نومۇسلۇق ئىشتۇر. شۇڭا ئۇلار ئىبادەتكە قاتناشقاندا، بېشىغا بىرنېمە ئارتسۇن. ⁷لېكىن ئەرلەر ئىبادەت قىلغاندا، بېشىغا بىر نەرسە كىيمىسۇن. چۈنكى ئەرلەر خۇدانىڭ ئوبرازىدا يارىتىلغان بولۇپ، خۇدانىڭ شان-شەرىپىنى ئەكس ئەتتۈرىدۇ. ئاياللار بولسا ئەرلەرنىڭ شان-شەرىپىنى ئەكس ئەتتۈرىدۇ. ⁸چۈنكى ئىنسان يارىتىلغان چاغدا، ئەر ئايالدىن ئەمەس، بەلكى ئايال ئەردىن يارىتىلغاندۇر. ⁹شۇنداقلا، ئەر ئايال ئۈچۈن ئەمەس، بەلكى ئايال ئەر ئۈچۈن يارىتىلغاندۇر. ¹⁰شۇڭا ئاياللار پەرىشتىلەر ئۈچۈن بېشىنى يېپىش مەسىلىسىدە توغرا قارار چىقارسۇن. ¹¹ھالبۇكى، رەببىمىزگە باغلانغان يېڭى ھاياتتا ئاياللار ئەرلەردىن، ئەرلەرمۇ ئاياللاردىن ئايرىلالمايدۇ. ¹²چۈنكى ئايال ئەردىن يارىتىلغان بولسىمۇ، لېكىن ئەر ئايالدىن تۇغۇلىدۇ. يىغىپ ئېيتقاندا، پۈتكۈل مەۋجۇدات خۇدا تەرىپىدىن يارىتىلغاندۇر.

¹³ئېيتىڭلارچۇ، ئاياللارنىڭ بېشىغا بىر نەرسە ئارتماي تۇرۇپ، خۇداغا دۇئا قىلىشى توغرىمۇ؟ ¹⁴سىلەرنىڭ ئەرلەرنىڭ ئۇزۇن چاچ قويۇشىنىڭ نومۇسلۇق ئىش ئىكەنلىكىنى بىلىشىڭلار تەبئىي بىر ئىشقۇ؟ ¹⁵لېكىن ئاياللارنىڭ ئۇزۇن چاچ قويۇشى ئۇلارنىڭ شەرىپىدۇر. چۈنكى ئۇزۇن چاچ ئۇلارنىڭ بېشىنى يېپىپ تۇرىدۇ. ¹⁶بۇ سۆزلەرگە قارشى چىققۇچىلارغا مەن شۇنداق دەيمەنكى، بۇ بىز ۋە خۇداغا مەنسۇپ بولغان ھەرقايسى جامائەت ئەزەلدىن ئەمەل قىلىپ كېلىۋاتقان قائىدىدۇر.

رەببىمىزنى خاتىرىلەش ئۈچۈن سېلىنغان داستىخان

¹⁷تۆۋەندىكى ئىشلارغا كەلسەك، مەن بۇ توغرىسىدا سىلەرنى ماختىيالمايمەن. چۈنكى سىلەرنىڭ جەم بولۇشۇڭلارنىڭ پايدىسىدىن زىيىنى كۆپ بولۇۋاتىدۇ. ¹⁸بىرىنچىدىن، سىلەر ئىبادەت ئۈچۈن جەم بولغىنىڭلاردا، ئاراڭلاردا گۇرۇھلارغا بۆلۈنۈشلەر بولغانلىقىنى ئاڭلىدىم. بۇ گەپكە قىسمەن ئىشەندىم. ¹⁹ئاراڭلاردا بۆلۈنۈشلەرنىڭ پەيدا بولۇشىدىن ساقلانغىلى بولمايدۇ. لېكىن مۇشۇنداق بۆلۈنۈش بولغاندا، زادى كىمنىڭ خۇدانى خۇرسەن قىلىدىغانلىقىنى بىلىۋالغىلى بولىدۇ. ²⁰سىلەر رەببىمىزنى خاتىرىلەش ئۈچۈن سېلىنغان داستىخاندا جەم بولىمىز دەيدىكەنسىلەر، لېكىن رەببىمىز ئۈچۈن جەم بولمايدىكەنسىلەر. ²¹چۈنكى سىلەر بىر-بىرىڭلارنى ساقلىماي، ئۆزۈڭلار ئېلىپ كەلگەن تاماقنى ئۆزۈڭلار يەۋېرىدىكەنسىلەر. بەزىلەر قانغۇچە يەپ-ئىچىپ مەست بولىدىكەن، يەنە بەزىلەر ئاچ قالىدىكەن. ²²ئەگەر يەپ-ئىچمەكچى بولساڭلار، ئۆزۈڭلارنىڭ ئۆيلىرى بار ئەمەسمۇ؟ ياكى سىلەر بۇ يەرگە خۇداغا مەنسۇپ بولغان ئېتىقادچىلار جامائىتىنى كەمسىتىش ۋە يەيدىغان نەرسىسى يوقلارنى خىجىل قىلىش ئۈچۈن جەم بولدۇڭلارمۇ؟ سىلەرگە نېمە دېسەم بولار؟ سىلەرنى ماختايمۇ؟ ياق، بۇ ئىشتا سىلەرنى ھەرگىز ماختىيالمايمەن!

²³رەببىمىزنىڭ داستىخىنى توغرۇلۇق مەن سىلەرگە يەتكۈزگەن تەلىملەرنى رەببىمىزدىن ئالغانمەن. رەببىمىز ئەيسا ساتقۇن تەرىپىدىن تۇتۇپ بېرىلگەن كېچە، قولىغا بىر نان ئېلىپ، ²⁴خۇداغا شۈكۈر ئېيتىپ، ناننى ئوشتۇپ: «بۇ مېنىڭ سىلەر ئۈچۈن پىدا بولىدىغان تېنىمدۇر. مېنى ئەسلەپ تۇرۇش ئۈچۈن بۇ ناندىن يەڭلار» دېدى. ²⁵خۇددى شۇنىڭدەك، تاماقتىن كېيىن ئۇ يەنە بىر پىيالە شارابنى قولىغا ئېلىپ: «بۇ پىيالىدىكى شاراب مېنىڭ قېنىم ئارقىلىق تۈزۈلىدىغان يېڭى ئەھدىنىڭ بەلگىسىدۇر. ھەر قېتىم بۇ شارابتىن ئىچكىنىڭلاردا مېنى ئېسىڭلارغا ئېلىڭلار» دېدى. ²⁶شۇنىڭ ئۈچۈن تاكى رەببىمىز قايتىپ كەلگۈچە، ھەر قېتىم بۇ ناندىن يېگىنىڭلاردا ۋە ھەر قېتىم بۇ پىيالىدىكى شارابتىن ئىچكىنىڭلاردا، رەببىمىزنىڭ قۇربان بولغانلىقىنى ئېتىراپ قىلغان بولىسىلەر.

²⁷ئەگەر كىمدىكىم رەببىمىزنىڭ داستىخىنىغا داخىل بولۇپ، ھۆرمەتسىز ھالدا ناندىن يەپ، پىيالىدىكى شارابتىن ئىچسە، ئۇ رەببىمىزنىڭ بىز ئۈچۈن قۇربان قىلغان تېنى ۋە ئاققۇزغان قېنىغا يۈز كېلەلمەيدىغان گۇناھ قىلغان بولىدۇ. ²⁸شۇڭا ھەركىم ئاۋۋال ئۆز-ئۆزىنى تەكشۈرۈپ كۆرسۇن، ئاندىن ناندىن يەپ، پىيالىدىكى شارابتىن ئىچسۇن. ²⁹ئېتىقادچىلار رەببىمىزنىڭ داستىخىنىغا داخىل بولغاندا، ئۆزلىرىنىڭ ئەيسا مەسىھنىڭ تېنى ئىكەنلىكىگە پەرۋا قىلمىسا، ئۇلار ئۆزلىرىنى خۇدانىڭ جازاسىغا مەھكۇم قىلىدۇ.^{* 30}شۇڭا بىرمۇنچىڭلار جىسمانىي جەھەتتىن ئاجىزلاپ، ئاغرىپ قالدىڭلار، ھەتتا بەزىلەر ئۆلۈپ كەتتى. ³¹ئەگەر ئۆز-ئۆزىمىزنى تەكشۈرگەن بولساقىدۇق، بۇنداق جازالارغا ئۇچرىمىغان بولاتتۇق. ³²لېكىن گۇناھقا تولغان بۇ دۇنيانىڭ ئادەملىرى بىلەن بىرلىكتە جازالانماسلىقىمىز ئۈچۈن رەببىمىز بىزنى مۇشۇنداق جازالاپ تەربىيەلەۋاتىدۇ.

³³شۇڭا قېرىنداشلار، رەببىمىزنى خاتىرىلەش مەقسىتىدە سېلىنغان داستىخانغا داخىل بولۇش ئۈچۈن بىر يەرگە جەم بولغىنىڭلاردا، ھەممەيلەن تولۇق كەلگۈچە بىر-بىرىڭلارنى ساقلاڭلار. ³⁴بۇنداق يىغىلىش سىلەرنىڭ خۇدانىڭ جازاسىغا ئۇچرىشىڭلارغا سەۋەب بولۇپ قالماسلىقى ئۈچۈن قورسىقى ئاچلار قورسىقىنى ئۆيىدە تويغۇزۇپ كەلسۇن. باشقا مەسىلىلەرگە كەلسەك، يېنىڭلارغا بارغىنىمدا سۆزلىشىمىز.

12

مۇقەددەس روھ ئاتا قىلغان ھەدىيەلەر

¹قېرىنداشلار، مۇقەددەس روھ ئاتا قىلغان ھەدىيەلەر توغرىسىدا سىلەرنىڭ خەۋەرسىز قېلىشىڭلارنى خالىمايمەن. ²سىلەرگە مەلۇمكى، سىلەر ئەيسا مەسىھكە ئېتىقاد قىلىشتىن ئىلگىرى ئېزىپ، جانسىز بۇتلارغا چوقۇنغانىدىڭلار. ³شۇڭا يەنە ئېزىپ كەتمەسلىكىڭلار ئۈچۈن شۇنى بىلىشىڭلار كېرەككى، خۇدانىڭ روھىنىڭ ئىلھامى بىلەن سۆزلىگەن ھەرقانداق كىشى: «ئەيساغا لەنەت بولسۇن!» دېمەيدۇ. مۇقەددەس روھنىڭ ئىلھامىسىز ھېچكىم: «ئەيسا مەسىھ مېنىڭ رەببىمدۇر» دېيەلمەيدۇ.

⁴مۇقەددەس روھ ئاتا قىلغان ھەدىيەلەر خىلمۇخىلدۇر، لېكىن بۇ ھەدىيەلەرنى ئاتا قىلغۇچى مۇقەددەس روھ بىردۇر. ⁵رەببىمىز ئۈچۈن قىلىنىدىغان خىزمەتلەر خىلمۇخىلدۇر، لېكىن بىز خىزمىتىنى قىلىدىغان رەببىمىز بىردۇر. ⁶قىلىنىدىغان خىزمەتلەرنىڭ يوللىرىمۇ خىلمۇخىلدۇر، لېكىن ھەربىر ئىنسانغا بۇ خىزمەتلەرنى قىلىش قابىلىيىتىنى بەرگەن خۇدا بىردۇر. ⁷مۇقەددەس روھ پۈتۈن جامائەتنىڭ مەنپەئەتى ئۈچۈن ھەربىرىمىزگە ئالاھىدە قابىلىيەت بېرىدۇ. ⁸مۇقەددەس روھ بىرىگە ئاقىلانە مەسلىھەت بېرىش قابىلىيىتىنى بەرسە، يەنە بىرىگە خۇدادىن كەلگەن ئالاھىدە بىلىمنى بېرىدۇ. ⁹بىرىگە خۇداغا بولغان ئالاھىدە ئىشەنچنى بەرسە، يەنە بىرىگە كېسەللەرنى ساقايتىش قۇدرىتىنى بېرىدۇ. ¹⁰بىرىگە مۆجىزىلەر يارىتىش قابىلىيىتىنى بەرسە، يەنە بىرىگە خۇدانىڭ ۋەھىيسىنى يەتكۈزۈش قابىلىيىتىنى بېرىدۇ. بىرىگە بىرسىنىڭ يەتكۈزگەن سۆزلىرىنىڭ مۇقەددەس روھتىن كەلگەن ياكى كەلمىگەنلىكىنى پەرقلەندۈرۈش قابىلىيىتىنى بەرسە، يەنە بىرىگە ئۆزىگە نامەلۇم بولغان تىللاردا سۆزلەش قابىلىيىتىنى ۋە يەنە بىرىگە بۇ تىللاردا دېيىلگەن سۆزلەرنى چۈشەندۈرۈش قابىلىيىتىنى بېرىدۇ. ¹¹بۇ قابىلىيەتلەرنى ئاتا قىلغۇچى بىردىنبىر مۇقەددەس روھتۇر. مۇقەددەس روھ ئۆز ئىرادىسى بويىچە بۇ قابىلىيەتلەرنى ھەربىر كىشىگە ئايرىم-ئايرىم تەقسىم قىلىپ بېرىدۇ.

ئېتىقادچىلار جامائىتى ئەيسا مەسىھنىڭ تېنىدۇر

¹²گەرچە بىزنىڭ تېنىمىزدىكى ئەزالار كۆپ بولسىمۇ، ئۇلار ئۆزئارا قوشۇلۇپ بىرلا تەننى تەشكىل قىلىدۇ. شۇنىڭدەك، ئەيسا مەسىھنىڭ تېنى، يەنى ئېتىقادچىلار جامائىتى نۇرغۇن ئېتىقادچىلاردىن تەشكىل تاپقان بولسىمۇ، ئۇلارمۇ بىر تەندۇر. ¹³چۈنكى يەھۇدىي ياكى يەھۇدىي ئەمەس بولسۇن، قۇل ياكى ھۆر بولسۇن، ھەممىمىز ئوخشاش مۇقەددەس روھقا چۆمۈلۈپ، بىر تەننىڭ تەركىبىي قىسمىغا ئايلاندۇق ۋە مۇقەددەس روھتىن بەھرىمەن بولدۇق.

¹⁴تەن بىرلا ئەزادىن ئەمەس، بەلكى نۇرغۇن ئەزالاردىن تەشكىل تاپىدۇ. ¹⁵پۇت: «قول بولمىغانلىقىم ئۈچۈن تەنگە مەنسۇپ ئەمەسمەن» دېسىمۇ، ئۇ يەنىلا تەننىڭ بىر قىسمىدۇر. ¹⁶قۇلاق: «كۆز بولمىغانلىقىم ئۈچۈن تەنگە مەنسۇپ ئەمەسمەن» دېسىمۇ، ئۇمۇ يەنىلا تەننىڭ بىر قىسمىدۇر. ¹⁷ئەگەر پۈتۈن تەن كۆز بولسا، قايسى يېرى بىلەن ئاڭلايدۇ؟ پۈتۈن تەن قۇلاق بولسا، ئۇ پۇراقنى قايسى يېرى بىلەن سېزىدۇ؟ ¹⁸ھالبۇكى، خۇدا تېنىمىزدىكى ھەربىر ئەزانى ئۆزىنىڭ خالىغىنى بويىچە ئورۇنلاشتۇرغاندۇر. ¹⁹ئەگەر ھەممىسى ئوخشاش بىر ئەزا بولغان بولسا، ئۇنى قانداقمۇ تەن دېگىلى بولسۇن؟ ²⁰دېمەك، ئەزا كۆپ بولسىمۇ، لېكىن ئۇلار بىرلا تەندۇر.

²¹شۇڭا كۆز قولغا: «ساڭا ئېھتىياجىم يوق» دېيەلمەيدۇ. ياكى باش پۇتقا: «ساڭا ئېھتىياجىم يوق!» دېيەلمەيدۇ. ²²دەل ئەكسىچە، تەننىڭ ئاجىز دەپ ھېسابلانغان ئەزالىرىمۇ كەم بولسا بولمايدۇ. ²³تەننىڭ كۆرۈمسىز دەپ قارالغان ئەزالىرىغا تېخىمۇ كۆپرەك ئەھمىيەت بېرىمىز. ئۇياتلىق دەپ قارالغان ئەزالىرىمىزنى تېخىمۇ دىققەت-ئېتىبار بىلەن ياپىمىز. ²⁴ئۇياتلىق بولمىغان ئەزالىرىمىزنى يوشۇرۇشنىڭ ھاجىتى يوقتۇر. خۇدا تېنىمىزدىكى قەدىرسىز ھېسابلانغان ئەزالارنىڭ تېخىمۇ قەدىرلىنىشى ئۈچۈن شۇنداق ئورۇنلاشتۇرغاندۇر. ²⁵بۇنىڭدىكى مەقسەت، تەننىڭ بۆلۈنمەسلىكى، ئەكسىچە ئەزالارنىڭ بىر-بىرىگە ئوخشاش ئېتىبار بېرىلىشى ئۈچۈندۇر. ²⁶ئەگەر بىر ئەزاغا دەرد كەلسە، پۈتكۈل ئەزالار تەڭ دەرد تارتىدۇ، بىر ئەزا قەدىرلەنسە، پۈتكۈل ئەزالار تەڭ خۇشال بولىدۇ.

²⁷دېمەك، ھەممىڭلار ئەيسا مەسىھنىڭ تېنىنى تەشكىل قىلغان ئوخشىمىغان ئايرىم-ئايرىم ئەزاسىسىلەر. ²⁸شۇڭا خۇدا ئېتىقادچىلار جامائىتىدە بىرىنچى بولۇپ ئەلچىلەرنى، ئىككىنچى بولۇپ خۇدانىڭ ۋەھىيسىنى يەتكۈزگۈچىلەرنى، ئۈچىنچى بولۇپ خۇدا توغرىسىدا تەلىم بەرگۈچىلەرنى، ئۇنىڭدىن كېيىن مۆجىزە كۆرسەتكۈچىلەرنى، كېسەللەرنى ساقايتىش قابىلىيىتىگە ئىگە بولغانلارنى، باشقىلارغا ياردەم بەرگۈچىلەرنى، باشقۇرۇش قابىلىيىتى بولغانلارنى ھەمدە ئۆزلىرىگە نامەلۇم بولغان تىللاردا سۆزلىيەلەيدىغانلارنى تەيىنلىدى. ²⁹ئېتىقادچىلارنىڭ ھەممىسى ئەلچىمۇ؟ ھەممىسى خۇدانىڭ ۋەھىيسىنى يەتكۈزگۈچىمۇ؟ ھەممىسى تەلىم بەرگۈچىمۇ؟ ھەممىسى مۆجىزە كۆرسىتەلەمدۇ؟ ³⁰ھەممىسى كېسەللەرنى ساقايتىش قابىلىيىتىگە ئىگىمۇ؟ ھەممىسى ئۆزلىرىگە نامەلۇم بولغان تىللاردا سۆزلىيەلەمدۇ؟ ھەممىسى بۇ تىللاردا دېيىلگەن سۆزلەرنى چۈشەندۈرەلەمدۇ؟ ياق، ئەلۋەتتە ئۇنداق ئەمەس. ³¹سىلەر كۆپچىلىك ئۈچۈن ئەڭ پايدىلىق بولغان قابىلىيەتلەرگە ئېرىشىشكە ئىنتىلىڭلار. لېكىن سىلەرنىڭ بۇ قابىلىيەتلەرنى ياخشى ئىشلىتىشىڭلار ئۈچۈن سىلەرگە ھەممىدىن ياخشى بىر يولنى كۆرسىتەي.

13

مېھىر-مۇھەببەت ھەممىدىن ئۇلۇغدۇر

¹گەرچە مەن يەر يۈزىدىكى ھەرقانداق تىلدا، ھەتتا پەرىشتىلەرنىڭ تىللىرىدا سۆزلىيەلىسەممۇ، لېكىن باشقىلارغا مېھىر-مۇھەببىتىم بولمىسا، مەن قۇلاققا خۇش ياقمايدىغان داقا-دۇمباق ياكى يېقىمسىز قوڭغۇراققا ئوخشاپ قالىمەن. ²گەرچە خۇدانىڭ ۋەھىيسىنى يەتكۈزۈش قابىلىيىتىم بولسىمۇ، دۇنيانىڭ پۈتكۈل سىرلىرىنى بىلسەممۇ، خۇدادىن كەلگەن ئالاھىدە بىلىملەرگە ئىگە بولساممۇ ۋە تاغلارنى ئورنىدىن قوزغاتقۇدەك چەكسىز ئىشەنچىم بولسىمۇ، لېكىن باشقىلارغا مېھىر-مۇھەببىتىم بولمىسا، ھېچنېمىگە ئەرزىمەيدىغان ئادەم بولۇپ قالىمەن. ³گەرچە پۈتۈن مېلىمنى سەدىقە قىلىپ بېرىۋەتسەممۇ، ھەتتا شەرەپكە ئىگە بولۇش ئۈچۈن قىيىن-قىستاقلارغا قېلىشقا رازى بولساممۇ، لېكىن باشقىلارغا مېھىر-مۇھەببىتىم بولمىسا، قىلغانلىرىمنىڭ ھېچقانداق پايدىسى بولمايدۇ.

⁴مېھىر-مۇھەببەت سەۋرچان ۋە كۆيۈمچاندۇر. مېھىر-مۇھەببەت ھەسەتخورلۇق قىلمايدۇ، ماختانچاقلىق ۋە تەكەببۇرلۇقمۇ قىلمايدۇ. ⁵مېھىر-مۇھەببەت ئەدەپسىزلىك قىلمايدۇ، شەخسىي مەنپەئەتنى كۆزلىمەيدۇ، ئاسان ئاچچىقلانمايدۇ ۋە ئاداۋەت ساقلىمايدۇ. ⁶مېھىر-مۇھەببەت ناھەقچىلىكتىن خۇرسەن بولمايدۇ، ئەكسىچە ھەقىقەتتىن خۇشال بولىدۇ. ⁷مېھىر-مۇھەببەت ھەممىگە بەرداشلىق بېرىدۇ، ھەممىگە ئىشەنچ بىلەن قارايدۇ، ھەممە ئىشتا ئۈمىدۋار ۋە چىداملىق بولىدۇ.

⁸مېھىر-مۇھەببەت مەڭگۈ داۋاملىشىدۇ. لېكىن خۇدانىڭ ۋەھىيسىنى يەتكۈزىدىغان قابىلىيەت ھامان ئاخىرلىشىدۇ. مۇقەددەس روھنىڭ كۈچى بىلەن ئۆزىگە نامەلۇم بولغان تىلدا سۆزلەش ھامان توختايدۇ، خۇدادىن كەلگەن ئالاھىدە بىلىملەرمۇ ئاخىرلىشىدۇ. ⁹چۈنكى بۇ ئالاھىدە بىلىملەر چەكلىكتۇر. شۇنداقلا، خۇدانىڭ ۋەھىيسىنى يەتكۈزۈش قابىلىيىتىمىزمۇ چەكلىكتۇر. ¹⁰لېكىن مۇكەممەللىك يېتىپ كەلگەندە، چەكلىك قابىلىيەتلەرنىڭ ھاجىتى قالمايدۇ. ¹¹بۇ خۇددى بالىلىق ۋاقتىمىزدا بالىلارچە سۆزلەپ، بالىلارچە ئويلاپ، بالىلارچە پىكىر قىلىپ، چوڭ بولغىنىمىزدا بۇ خىل بالىلىقىمىزنى تاشلىغىنىمىزغا ئوخشاشتۇر. ¹²بىز ھازىر ئەينەكتىكى ئەكسنى كۆرىمىز. لېكىن مۇكەممەللىك يېتىپ كەلگەندە، يۈزمۇيۈز كۆرۈشىمىز. ھازىر مېنىڭ بىلىدىغىنىم چەكلىكتۇر. لېكىن ئۇ ۋاقىت يېتىپ كەلگەندە، خۇدا مېنى تولۇق بىلگەندەك، مەنمۇ ھەممىنى تولۇق بىلىدىغان بولىمەن. ¹³مانا ھازىر ئېتىقاد، ئۈمىد ۋە مېھىر-مۇھەببەت مەۋجۇتتۇر. بۇ ئۈچىنىڭ ئىچىدە مېھىر-مۇھەببەت ئەڭ ئۇلۇغىدۇر.

14

مۇقەددەس روھ ئاتا قىلغان ھەدىيەلەردىن پايدىلىنىش

¹شۇڭا مېھىر-مۇھەببەتلىك بولۇشقا تىرىشىڭلار، ھەمدە مۇقەددەس روھ ئاتا قىلغان ھەدىيەلەرگە، بولۇپمۇ خۇدانىڭ ۋەھىيسىنى يەتكۈزۈش قابىلىيىتىگە ئىگە بولۇشقا قىزغىنلىق بىلەن ئىنتىلىڭلار. ²بىر كىشى مۇقەددەس روھنىڭ كۈچى بىلەن ئۆزىگە نامەلۇم بولغان تىلدا سۆزلىسە، ئۇ باشقىلارغا ئەمەس، بەلكى خۇداغا سۆزلەيدۇ. چۈنكى ئۇنىڭ سۆزىنى ھېچكىم چۈشىنەلمەيدۇ. ئۇ مۇقەددەس روھنىڭ كۈچى بىلەن تۈرلۈك سىرلىق ئىشلارنى سۆزلەيدۇ. ³خۇدانىڭ ۋەھىيسىنى يەتكۈزگۈچىلەر بولسا باشقىلارنىڭ ئېتىقادتا ئۆسۈپ يېتىلىشى، ئىلھاملىنىشى ۋە تەسەللى تېپىشى ئۈچۈن سۆزلەيدۇ. ⁴نامەلۇم تىلدا سۆزلىگۈچى ئېتىقادتا ئۆز-ئۆزىنى يېتىلدۈرىدۇ. لېكىن خۇدانىڭ ۋەھىيسىنى يەتكۈزگۈچى پۈتۈن ئېتىقادچىلار جامائىتىنىڭ ئېتىقادتا يېتىلىشىگە ياردەم بېرىدۇ. ⁵ھەممىڭلارنىڭ مۇقەددەس روھنىڭ كۈچى بىلەن ئۆزۈڭلارغا نامەلۇم بولغان تىللاردا سۆزلىشىڭلارنى ئۈمىد قىلىمەن. لېكىن سىلەرنىڭ خۇدانىڭ ۋەھىيسىنى يەتكۈزۈشۈڭلارنى تېخىمۇ ئۈمىد قىلىمەن. چۈنكى نامەلۇم بولغان تىللاردا سۆزلەنگەن سۆزلەرنى چۈشەندۈرۈپ، ئېتىقادچىلار جامائىتىنىڭ ئېتىقادىنى يېتىلدۈرۈشىگە ياردەم بېرىدىغان بىرەرسى بولمىسا، ئۇ چاغدا نامەلۇم تىللاردا سۆزلەشتىن، خۇدانىڭ ۋەھىيسىنى يەتكۈزۈش قابىلىيىتى كۆپ ئەۋزەل بولىدۇ.

⁶ئەمدى قېرىنداشلار، ئەگەر مەن يېنىڭلارغا بېرىپ، ئۆز تىلىڭلاردا سىلەرگە خۇدا تەرىپىدىن ئاشكارىلانغان ھەقىقەتنى، خۇدادىن كەلگەن ئالاھىدە بىلىم، ۋەھىي ياكى بىرەر تەلىمنى يەتكۈزمەي، مۇقەددەس روھنىڭ كۈچى بىلەن پەقەت نامەلۇم تىلدا سۆزلىسەم، سىلەرگە نېمە پايدام بولسۇن؟ ⁷شۇنىڭدەك، ئاۋاز چىقىرالايدىغان جانسىز نەرسىلەر، مەسىلەن نەي ياكى چىلتارمۇ ئېنىق ئاھاڭ چىقارمىسا، ھېچكىم ئۇنىڭ مۇزىكا ئىكەنلىكىنى ياكى ئەمەسلىكىنى بىلەلمەيدىغۇ؟ ⁸جەڭ كانىيىمۇ بەلگىلىك بىرەر ئاھاڭدا چېلىنمىسا، ھېچكىم جەڭگە ھازىرلانمايدىغۇ؟ ⁹شۇنىڭدەك، سىلەرمۇ چۈشىنىشلىك تىلدا سۆزلىمىسەڭلار، نېمە دېمەكچى بولغىنىڭلارنى كىم چۈشىنەلەيدۇ؟ ئۇ چاغدا ھاۋاغا گەپ قىلغاندەك بولىسىلەر. ¹⁰شۈبھىسىزكى، دۇنيادا خىلمۇخىل تىللار بار ھەم ئۇلارنىڭ ھېچقايسىسى چۈشىنىكسىز ئەمەس. ¹¹بىراق مەلۇم بىر ئادەمنىڭ تىلىنى چۈشەنمىسەم، ئۇ ماڭا يات تۇيۇلىدۇ، مەنمۇ ئۇنىڭغا يات تۇيۇلىمەن. ¹²سىلەر مۇقەددەس روھ ئاتا قىلغان قابىلىيەتلەرگە ئىگە بولۇشقا قىزغىنلىق بىلەن ئىنتىلگەنىكەنسىلەر، ئۇنداقتا سىلەر ئېتىقادچىلار جامائىتىنىڭ ئېتىقادىنىڭ يېتىلىشىگە ياردەم بېرىدىغان قابىلىيەتلەرنى يېتىلدۈرۈشكە تېخىمۇ كۆپ ئىنتىلىڭلار.

¹³شۇڭا ئۆزىگە نامەلۇم بولغان تىلدا سۆزلىيەلەيدىغان كىشى ئۆزىنىڭ سۆزلىگەنلىرىنى چۈشەندۈرۈش قابىلىيىتىگە ئىگە بولۇش ئۈچۈن دۇئا قىلسۇن. ¹⁴چۈنكى بىر كىشى ئۇنداق تىلدا دۇئا قىلسا، ئۇنىڭ روھى مۇقەددەس روھ ئارقىلىق خۇداغا دۇئا قىلغان بولىدۇ. لېكىن ئۇ ئۆز ئەقىل-ئىدراكى بىلەن بۇ دۇئانى چۈشىنەلمەيدۇ. ¹⁵ئۇنداقتا، ئۇ قانداق قىلىشى كېرەك؟ ئۇ بەزىدە مۇقەددەس روھ ئارقىلىق نامەلۇم بولغان تىلدا سۆزلەش بىلەن، يەنە بەزىدە ئەقىل-ئىدراكى بىلەن دۇئا قىلسۇن. شۇنداقلا، ئۇ بەزىدە مۇقەددەس روھ ئارقىلىق، بەزىدە ئۆزىنىڭ ئەقىل-ئىدراكى ئارقىلىق خۇداغا مەدھىيە ناخشىلىرىنى ئېيتسۇن. ¹⁶ئەگەر مۇقەددەس روھ ئارقىلىق ئۆزۈڭگە نامەلۇم بولغان تىلدىلا خۇداغا شۈكۈر ئېيتساڭ، جامائەت سېنىڭ نېمە دەۋاتقانلىقىڭنى چۈشەنمەيدۇ. ئۇنداقتا، ئۇلار ئېيتقان شۈكۈر دۇئالىرىڭغا قانداقمۇ ئامىن دېيەلىسۇن؟ ¹⁷شۇڭا سەن ھەرقانچە ياخشى شۈكۈر دۇئاسى قىلساڭمۇ، لېكىن بۇ دۇئالار ھېچكىمنىڭ ئېتىقادىنىڭ يېتىلىشىگە ياردەم بېرەلمەيدۇ. ¹⁸مەن شەخسەن ئۆزۈم بۇنداق نامەلۇم تىلدا ھەممىڭلاردىن كۆپ سۆزلەيدىغانلىقىم ئۈچۈن خۇداغا شۈكۈر ئېيتىمەن. ¹⁹لېكىن ئېتىقادچىلار جامائىتىدە باشقىلارنىڭ تەلىم ئېلىشى ئۈچۈن نامەلۇم تىلدا ئون مىڭ ئېغىز سۆزلىگىنىمدىن كۆرە، ھەممە ئادەم چۈشىنىدىغان تىلدا بەش ئېغىز سۆزلىگىنىم ياخشىدۇر.

²⁰قېرىنداشلار، يامانلىق قىلىشنى بىلمەيدىغان سەبىي بالىلاردەك بولۇڭلار. لېكىن ئوي-پىكرىڭلار كىچىك بالىلاردەك ئەمەس، بەلكى چوڭلاردەك بولسۇن. ²¹مۇقەددەس يازمىلاردا خۇدا مۇنداق دېگەن:

«غەيرىي تىللاردا سۆزلەيدىغانلارنىڭ،

يەنى يات خەلقلەرنىڭ ئېغىزى ئارقىلىق سۆزلەيمەن خەلقىمگە.

بىراق ئۇلار يەنىلا ئىتائەت قىلماس ماڭا.»

²²بۇ ئايەتتىن قارىغاندا، نامەلۇم تىلدا سۆزلەش خۇداغا ئېتىقاد قىلىدىغانلار ئۈچۈن ئەمەس، بەلكى قىلمايدىغانلار ئۈچۈن بىر ئالامەتتۇر. خۇدانىڭ ۋەھىيسىنى يەتكۈزۈش خۇداغا ئېتىقاد قىلمايدىغانلار ئۈچۈن ئەمەس، بەلكى خۇداغا ئېتىقاد قىلىدىغانلار ئۈچۈن بىر ئالامەتتۇر، يەنى خۇدانىڭ ئۇلارغا يار ئىكەنلىكىنىڭ بىر بەلگىسىدۇر. ²³ئەگەر پۈتۈن ئېتىقادچىلار جامائىتى جەم بولۇپ، ھەممە ئادەم ئۆز ئالدىغا نامەلۇم تىلدا سۆزلەۋەرسە، بۇنداق نامەلۇم تىلدا سۆزلەشتىن خەۋىرى بولمىغانلار ياكى ئەيسا مەسىھكە ئېتىقاد قىلمايدىغانلار ئارىلىرىغا كىرىپ قالسا: «ئۇلار ساراڭ بولۇپ قاپتۇ!» دېيىشمەمدۇ؟ ²⁴لېكىن ئېتىقادچىلار جامائىتى ئوخشاش بىر تىلدا خۇدانىڭ ۋەھىيسىنى يەتكۈزۈۋاتقاندا خۇداغا ئېتىقاد قىلمايدىغان ياكى ئەھۋالدىن خەۋىرى بولمىغان بىرى ئارىلىرىغا كىرىپ قالسا، ئۇ ئۇلارنىڭ ئېيتقان سۆزلىرىدىن ئۆزىنىڭ گۇناھكار ئىكەنلىكىنى چۈشىنىپ، ۋىجدانى ئازابلىنىدۇ ²⁵ۋە ئىچىدىكى يوشۇرۇن ئوي-پىكىرلىرى ئۆزىگە ئاشكارا بولىدۇ. شۇنىڭ بىلەن ئۇ يەرگە باش قويۇپ خۇداغا سەجدە قىلىپ: «خۇدا ھەقىقەتەن ئۇلارغا يار ئىكەن» دەپ ئېتىراپ قىلىدۇ.

ئېتىقادچىلار جامائىتى ئەمەل قىلىشقا تېگىشلىك قائىدىلەر

²⁶قېرىنداشلار، مەن خۇلاسە قىلاي، سىلەر خۇداغا ئىبادەت قىلىش ئۈچۈن بىر يەرگە جەم بولغىنىڭلاردا، بەزىلىرىڭلار مەدھىيە ناخشىلىرىنى ئېيتىسىلەر، بەزىلىرىڭلار تەلىم بېرىسىلەر، بەزىلىرىڭلار خۇدانىڭ ۋەھىيسىنى يەتكۈزىسىلەر، بەزىلىرىڭلار ئۆزۈڭلارغا نامەلۇم بولغان تىلدا سۆزلەيسىلەر، باشقىلار بولسا بۇ تىلنى چۈشەندۈرىدۇ. لېكىن ھەممە ئىشلار جامائەتنىڭ ئېتىقادىنى يېتىلدۈرۈش ئۈچۈن بولسۇن. ²⁷ئەگەر ئۆزىگە نامەلۇم بولغان تىلدا سۆزلىمەكچى بولغانلار بولسا، ئەڭ كۆپ بولغاندا ئىككى ياكى ئۈچ كىشى نۆۋەت بىلەن سۆزلىسۇن. باشقا بىرى دېيىلگەن بۇ سۆزلەرنى چۈشەندۈرسۇن. ²⁸يىغىلىشىڭلاردا بۇنى چۈشەندۈرەلەيدىغان كىشى بولمىسا، ئۇلار جامائەتكە بۇنداق تىلدا سۆزلىمەي، ئۆز-ئۆزىگە ۋە خۇداغا سۆزلىسۇن. ²⁹خۇدانىڭ ۋەھىيسىنىمۇ ئىككى ياكى ئۈچ كىشى يەتكۈزسۇن، باشقىلار ئۇلارنىڭ يەتكۈزگەنلىرىنىڭ خۇدادىن كەلگەن ياكى كەلمىگەنلىكىنى پەرقلەندۈرسۇن. ³⁰يىغىلغان جامائەتنىڭ بىرىگە خۇدادىن بىر ۋەھىي كەلسە، سۆزلەۋاتقان كىشى جىم بولۇپ، نۆۋەتنى ئۇنىڭغا بەرسۇن. ³¹خۇدانىڭ ۋەھىيسىنى يەتكۈزگۈچىلەر ۋەھىينى نۆۋەت بىلەن يەتكۈزسە بولىدۇ. شۇنداق بولغاندا، ھەممىڭلار تەلىم ۋە ئىلھام ئالالايسىلەر. ³²كىشىلەر خۇدانىڭ ۋەھىيسىنى يەتكۈزگەندە، ئۆزىنى تۇتۇۋېلىش قابىلىيىتىگە ئىگەدۇر. ³³جەم بولۇپ ئىبادەت قىلغىنىڭلاردا، قالايمىقانچىلىق بولمىسۇن. چۈنكى خۇدا قالايمىقانچىلىق پەيدا قىلغۇچى ئەمەس، بەلكى تىنچلىق ئاتا قىلغۇچىدۇر. مەن بىلىدىغان ھەرقايسى ئېتىقادچىلار جامائىتى ئەنە شۇنداقتۇر.

³⁴ئاياللار جامائەتنىڭ يىغىلىشلىرىدا قالايمىقان سۆزلەشمىسۇن، شۈك ئولتۇرسۇن. چۈنكى ئۇلارنىڭ سۆزلىشى رۇخسەت قىلىنمىغان. ئۇلار تەۋرات قانۇنىدا بەلگىلەنگەندەك ئىتائەتچان بولسۇن. ³⁵ئۇلار بىلمەكچى بولغان بىرەر نەرسە بولسا، ئۆيدە ئۆز ئەرلىرىدىن سورىسۇن. چۈنكى يىغىلىشتا تەرتىپنى بۇزۇپ سۆزلەش ئاياللارغا ياراشمايدۇ.

³⁶سىلەر خۇدا توغرىسىدىكى تەلىمنىڭ مەنبەسى بىزدۇرمىز ياكى بۇ تەلىم يالغۇز بىزگىلا يېتىپ كەلگەن دەپ ئويلامسىلەر؟ بۇنداق ئويلىشىڭلار دۇرۇس ئەمەس! ³⁷ئەگەر سىلەردىن بىرىڭلار ئۆزۈڭلارنى خۇدانىڭ ۋەھىيسىنى يەتكۈزگۈچى ياكى ئېتىقاد جەھەتتە يېتىلگەن دەپ قارىساڭلار، ئۇنداقتا مېنىڭ سىلەرگە يازغانلىرىمنىڭ رەببىمىزنىڭ ئەمرى ئىكەنلىكىنى ئېتىراپ قىلىڭلار. ³⁸ئەگەر سىلەر بۇ ئەمرگە ئەھمىيەت بەرمىسەڭلار، سىلەرمۇ ئەھمىيەتكە ئېلىنمايسىلەر.

³⁹شۇنىڭ ئۈچۈن قېرىنداشلىرىم، خۇدانىڭ ۋەھىيسىنى يەتكۈزۈشكە قىزغىنلىق بىلەن ئىنتىلىڭلار. مۇقەددەس روھنىڭ كۈچى بىلەن نامەلۇم بولغان تىلدا سۆزلەشنىمۇ چەكلىمەڭلار. ⁴⁰لېكىن ھەممە ئىشلار تەرتىپلىك ۋە قائىدىلىك بولسۇن.

15

ئەيسا مەسىھنىڭ تىرىلىشى

¹قېرىنداشلار، ئىلگىرى مەن سىلەرگە يەتكۈزگەن، سىلەرمۇ قوبۇل قىلىپ ئېتىقادىڭلارنىڭ ئاساسى قىلغان خۇش خەۋەرنى ئېسىڭلارغا سالماقچىمەن. ²مەن سىلەرگە يەتكۈزگەن خۇش خەۋەردە چىڭ تۇرساڭلار، قۇتقۇزۇلىسىلەر. ئۇنداق بولمىغاندا، بىھۇدە ئېتىقاد قىلغان بولىسىلەر.

^3‏-4مەن قوبۇل قىلغان ۋە سىلەرگە يەتكۈزگەن ئەڭ مۇھىم سۆزلەر مۇقەددەس يازمىلاردا يېزىلغان ئەيسا مەسىھنىڭ گۇناھلىرىمىزنىڭ كەچۈرۈلۈشى ئۈچۈن قۇربان بولۇشى ۋە ئۇ دەپنە قىلىنىپ، ئۈچىنچى كۈنى ئۆلۈمدىن تىرىلىشى ھەققىدىدۇر. ⁵ئەيسا مەسىھ ئۆلۈمدىن تىرىلىپ، ئاۋۋال پېترۇسقا، ئاندىن كېيىن ئون ئىككى ئەلچىنىڭ ئىچىدىكى باشقىلارغىمۇ كۆرۈندى. ⁶كېيىن بىرلا ۋاقىتتا بەش يۈزدىن ئارتۇق ئېتىقادچى قېرىنداشلارغا كۆرۈندى. ھازىر بۇ قېرىنداشلارنىڭ بەزىلىرى ئالەمدىن ئۆتكەن بولسىمۇ، كۆپچىلىكى تېخى ھايات. ^7‏-8ئەيسا مەسىھ كېيىن ئىنىسى ياقۇپقا، ئۇنىڭدىن كېيىن ھەممە ئەلچىلەرگە، ئەڭ ئاخىرىدا خۇددى ۋاقىتسىز تۇغۇلغان بوۋاققا ئوخشايدىغان ماڭىمۇ كۆرۈندى. ⁹مەن ئەلچىلەر ئارىسىدىكى ئەڭ ئەرزىمەس ئەلچىمەن، ھەمدە خۇدانىڭ جامائىتىگە زىيانكەشلىك قىلغانلىقىم ئۈچۈن، ئەلچى دەپ ئاتىلىشقىمۇ لايىق ئەمەسمەن. ¹⁰لېكىن ھازىر مېنىڭ ئەلچى بولۇشۇم خۇدانىڭ ماڭا كۆرسەتكەن مېھىر-شەپقىتىدىن بولدى. خۇدانىڭ ماڭا كۆرسەتكەن مېھىر-شەپقىتى بىكارغا كەتمىدى. چۈنكى خۇدانىڭ خىزمىتى ئۈچۈن ئەلچىلەرنىڭ ھەممىسىدىن كۆپ ئەجىر سىڭدۈردۈم. ئەمەلىيەتتە، مەن ئۆزۈمنىڭ قابىلىيىتى بىلەن ئەمەس، بەلكى ماڭا مېھىر-شەپقەت كۆرسەتكەن خۇدانىڭ بەرگەن قابىلىيىتى بىلەن ئىشلىدىم. ¹¹دېمەك، مەيلى مەن ياكى باشقا ئەلچىلەر بولسۇن، ھەممىمىزنىڭ يەتكۈزگەنلىرى ئوخشاش بولۇپ، ئۇ دەل سىلەر ئىشىنىپ قوبۇل قىلغان خۇش خەۋەردۇر.

ئۆلۈپ كەتكەن ئېتىقادچىلارنىڭ تىرىلىشى

¹²ئەيسا مەسىھنىڭ ئۆلۈمدىن تىرىلگەنلىكى سىلەرگە يەتكۈزۈلگەن تۇرۇقلۇق، يەنە نېمە ئۈچۈن ئاراڭلاردا بەزىلەر «ئۆلگەنلەر قايتا تىرىلمەيدۇ» دەيدۇ؟ ¹³ئەگەر ئۆلگەنلەر قايتا تىرىلىدىغان ئىش بولمىسا، ئەيسا مەسىھنىڭ تىرىلىشىمۇ مۇمكىن بولمىغان بولاتتى. ¹⁴ئەيسا مەسىھ تىرىلمىگەن بولسا، بىزنىڭ يەتكۈزگەن تەلىملىرىمىز ۋە سىلەرنىڭ قىلغان ئېتىقادىڭلارمۇ بىھۇدە بولاتتى. ¹⁵ھەتتا بىزنىڭ خۇدا توغرىسىدىكى گۇۋاھلىقىمىزمۇ يالغان بولاتتى. چۈنكى بىز خۇدانىڭ ئەيسا مەسىھنى ئۆلۈمدىن تىرىلدۈرگەنلىكىگە گۇۋاھلىق بەردۇق. ئەگەر ھەقىقەتەن ئۆلۈمدىن تىرىلىش بولمىسا، خۇدامۇ ئەيسا مەسىھنى ئۆلۈمدىن تىرىلدۈرمىگەن بولاتتى. ¹⁶ئەگەر ئۆلگەنلەر قايتا تىرىلىدىغان ئىش بولمىسا، ئەيسا مەسىھنىڭمۇ تىرىلىشى مۇمكىن ئەمەس ئىدى. ¹⁷ئەيسا مەسىھ تىرىلمىگەن بولسا، ئېتىقادىڭلار ئەھمىيەتسىز بولاتتى ۋە گۇناھلىرىڭلارمۇ تېخىچە كەچۈرۈلمىگەن بولاتتى. ¹⁸ئۇ چاغدا ئەيسا مەسىھكە ئېتىقاد قىلىپ تۈگەپ كەتكەن قېرىنداشلارمۇ دوزاخقا چۈشكەن بولاتتى. ¹⁹ئەگەر بىز پەقەت بۈگۈنكى ھايات ئۈچۈنلا ئەيسا مەسىھكە ئۈمىد باغلىغان بولساق، ئۇ چاغدا بىز بۇ دۇنيادىكى ئەڭ بىچارە كىشىلەردىن بولۇپ قالىمىز.

²⁰ئەمەلىيەتتە، ئەيسا مەسىھ ھەقىقەتەن ئۆلۈمدىن تىرىلدى. ئۇنىڭ تىرىلىشى ئۆلگەنلەرنىڭ قايتا تىرىلىدىغانلىقىدىن ئېلىنغان تۇنجى ھوسۇلدۇر. ²¹چۈنكى ئۆلۈم بىر ئادەم، يەنى ئادەمئاتا ئارقىلىق دۇنيادا پەيدا بولغىنىدەك، ئۆلۈمدىن تىرىلىشمۇ بىر ئادەم، يەنى ئەيسا مەسىھ ئارقىلىق پەيدا بولدى. ²²پۈتكۈل ئىنسان ئادەمئاتىنىڭ ئەۋلادى بولغانلىقى ئۈچۈن، ئۇنىڭغا ئوخشاش ئۆلۈمگە مەھكۇم قىلىندى. لېكىن ئەيسا مەسىھكە مەنسۇپ بولغان بىزلەر ئەيسا مەسىھكە ئوخشاش ئۆلۈمدىن تىرىلىمىز. ²³بىراق ھەربىر ئادەمنىڭ ئۆز نۆۋىتى بار. تۇنجى ھوسۇل ئەيسا مەسىھتۇر. كېيىن ئەيسا مەسىھ قايتىپ كەلگەندە، ئۇنىڭغا مەنسۇپ بولغانلار تىرىلىدۇ. ²⁴ئاندىن قىيامەت كۈنى كېلىدۇ. شۇ چاغدا ئەيسا مەسىھ پانىي ۋە باقىي دۇنيادىكى بارلىق ھۆكۈمرانلار، ھوقۇقدارلار ۋە باشقا كۈچلەرنى يوقىتىپ، پادىشاھلىقىنى ئاتىمىز خۇداغا تاپشۇرۇپ بېرىدۇ. ²⁵ئەيسا مەسىھ پۈتكۈل دۈشمەنلىرىنى مەغلۇپ قىلىپ، ئۇلارنى ئۆزىگە تىز پۈكتۈرگۈچە ھۆكۈم سۈرىدۇ. ²⁶يوقىتىلىدىغان ئەڭ ئاخىرقى دۈشمەن ئۆلۈمدۇر. ²⁷مۇقەددەس يازمىلاردا: «خۇدا ئۇنىڭغا ھەممىنى تىز پۈكتۈردى» دېيىلىدۇ. بۇ يەردە ئېيتىلغان «ھەممىنى» دېگەن سۆزنىڭ خۇدانى ئۆز ئىچىگە ئالمايدىغانلىقى ئېنىقتۇر. چۈنكى خۇدا پۈتكۈل مەۋجۇداتنى ئەيسا مەسىھكە تىز پۈكتۈردى. ²⁸پۈتكۈل مەۋجۇدات ئەيسا مەسىھكە تىز پۈككەندە، خۇدانىڭ ئوغلى، يەنى ئەيسا مەسىھمۇ پۈتكۈل مەۋجۇداتنى ئۆزىگە تىز پۈكتۈرۈپ بەرگەن خۇداغا تىز پۈكىدۇ. ئۇ چاغدا خۇدا ھەممىنىڭ ئىچىدە بولىدۇ ۋە ھەممىدىن ئۈستۈن بولىدۇ.

²⁹ئۆلگەنلەر قايتا تىرىلىدىغان ئىش بولمىسا، بەزىلەرنىڭ ئۆلگەنلەر ئۈچۈن چۆمۈلدۈرۈلۈشىنى قانداق چۈشىنىش كېرەك؟ ناۋادا ئۆلگەنلەر تىرىلمىسە، ئۇنداقتا بەزىلەر نېمە ئۈچۈن ئۆلگەنلەر ئۈچۈن چۆمۈلدۈرۈلىدۇ؟ ³⁰بىز نېمە ئۈچۈن ئۆزىمىزنى ھەر دائىم خەتەرگە ئاتىمىز؟ ³¹مېنىڭ ھەر كۈنى ئۆلۈمگە دۇچ كېلىۋاتقىنىم راست! قېرىنداشلار، بۇ رەببىمىز ئەيسا مەسىھنىڭ سىلەر ئۈچۈن قىلغان ئىشلىرىدىن پەخىرلەنگىنىمگە ئوخشاش راستتۇر. ³²مەن ئەفەس شەھىرىدە يىرتقۇچ ھايۋانلارغا ئوخشايدىغان ئاشۇ رەقىبلەر بىلەن ئېلىشتىم. ئۆلۈمدىن تىرىلىش بولمىسا، مېنىڭ ئۇ رەقىبلەر بىلەن ئېلىشقىنىمنىڭ نېمە پايدىسى بولاتتى؟ ئەگەر ئۆلگەنلەر تىرىلمىسە، ئۇنداقتا «يەيلى، ئىچەيلى، ئەتە بەرىبىر ئۆلىمىز» دېگەن سۆز يوللۇق بولاتتى!

³³بۇنداق سۆزلەرگە ئالدانماڭلار، «يامان بىلەن دوست بولساڭ، يالىسى يۇقار.» ³⁴ئەقىل-ھوشۇڭلارنى تېپىپ، گۇناھ قىلىشتىن ھەزەر ئەيلەڭلار. بەزىلىرىڭلار خۇدانى تېخىچە تونۇمايسىلەر. بۇ سۆزنى سىلەرنى خىجىل بولسۇن دەپ ئېيتىۋاتىمەن.

تىرىلگەندىن كېيىنكى تەن

³⁵لېكىن بەزىلەر: «ئۆلگەنلەر قانداق تىرىلىدۇ؟ ئەگەر ئۆلگەن ئادەم تىرىلسە، ئۇنىڭ تېنى قانداق بولىدۇ؟» دەپ سورىشى مۇمكىن. ³⁶نېمىدېگەن ئەخمىقانە سوئال! ئۆلگەنلەرنىڭ تىرىلىشى خۇددى ئۇرۇقنىڭ توپىغا تاشلىنىپ، چىرىپ، ئاندىن قايتا بىخ سۈرۈپ چىققىنىغا ئوخشايدۇ. ³⁷بۇغداي بولامدۇ ياكى باشقا بىر ئۆسۈملۈك بولامدۇ، يەرگە تېرىيدىغىنىڭ ئۆسۈپ چىققان ئۆسۈملۈك ئەمەس، بەلكى ئۇنىڭ ئۇرۇقىدۇر. ³⁸خۇدا ھەربىر ئۇرۇققا ئۆزىنىڭ خاھىشى بويىچە ئۆز نەسلىگە خاس تەن بېرىدۇ. ³⁹ھەربىر ئۇرۇقنىڭ تېنى ئوخشاش بولمىغاندەك، ھەممە جانلىقلارنىڭ تېنىمۇ بىر-بىرىگە ئوخشىمايدۇ. ئىنسانلارنىڭ، ھايۋانلارنىڭ، قۇشلارنىڭ ۋە بېلىقلارنىڭ تېنى بىر-بىرىگە ئوخشىمايدۇ. ⁴⁰ئاسماندىمۇ، يەردىمۇ نەرسىلەر بار. ئەمما ئاسماندىكى نەرسىلەرنىڭ گۈزەللىكى باشقا، يەردىكى نەرسىلەرنىڭ گۈزەللىكى باشقىدۇر. ⁴¹قۇياشنىڭ گۈزەللىكى، ئاينىڭ گۈزەللىكى ۋە يۇلتۇزلارنىڭ گۈزەللىكلىرىمۇ باشقىدۇر. گۈزەللىكتە يۇلتۇزمۇ يۇلتۇزدىن پەرقلىنىدۇ.

⁴²ئىنساننىڭ ئۆلۈپ تىرىلىشىمۇ شۇنىڭغا ئوخشايدۇ. كۆمۈلگەن تېنىمىز چىرىپ كېتىدۇ، لېكىن تىرىلگەن تېنىمىز مەڭگۈ چىرىمەيدۇ. ⁴³تېنىمىز شەرەپسىز ھالدا كۆمۈلىدۇ، شەرەپ بىلەن تىرىلىدۇ. ئاجىز ھالدا كۆمۈلىدۇ، قۇدرەت بىلەن تىرىلىدۇ. ⁴⁴جىسمانىي تەن ھالىتىدە كۆمۈلىدۇ، لېكىن روھىي تەن ھالىتىدە تىرىلىدۇ. بۇ دۇنياغا خاس جىسمانىي تېنىمىز بولغىنىدەك، ئۇ دۇنياغا خاس روھىي تېنىمىزمۇ بولىدۇ. ⁴⁵بۇ دۇنياغا خاس تەن توغرۇلۇق مۇقەددەس يازمىلاردا: «تۇنجى ئادەم، يەنى ئادەمئاتا ھاياتلىققا ئېرىشتى» دەپ يېزىلغان. ئاخىرقى ئادەمئاتا، يەنى ئەيسا مەسىھ بىزگە مەڭگۈلۈك ھايات ئاتا قىلدى. ⁴⁶ئەڭ ئاۋۋال پەيدا بولغان تەن ئۇ دۇنياغا خاس تەن ئەمەس، بەلكى بۇ دۇنياغا خاس تەندۇر. كېيىن پەيدا بولغان تەن بولسا ئۇ دۇنياغا خاس روھىي تەندۇر. ⁴⁷دەسلەپكى ئىنسان يەردىن، يەنى توپىدىن يارىتىلدى. كېيىنكى ئىنسان، يەنى ئەيسا مەسىھ ئەرشتىن كەلدى. ⁴⁸بۇ دۇنيادا ياشاۋاتقان ئىنسانلار توپىدىن يارىتىلغان ئادەمئاتىغا ئوخشايدۇ. مەڭگۈلۈك ھاياتقا ئېرىشىدىغانلار ئەرشتىن كەلگەن ئەيسا مەسىھكە ئوخشايدۇ. ⁴⁹بىزلەر توپىدىن يارىتىلغان ئادەمئاتىغا قانداق ئوخشىغان بولساق، كەلگۈسىدە ئەرشتىن كەلگەن ئەيسا مەسىھكىمۇ شۇنداق ئوخشايمىز.

⁵⁰قېرىنداشلار، شۇنى دېمەكچىمەنكى، بىزنىڭ گۆش ۋە قاندىن تۆرەلگەن تېنىمىز خۇدانىڭ پادىشاھلىقىغا كىرەلمەيدۇ. بىزنىڭ ئۆلىدىغان تېنىمىز مەڭگۈ ياشىيالمايدۇ. ⁵¹ئەمدى خۇدا ماڭا ئاشكارىلىغان سىرنى سىلەرگە ئېيتاي، بىز ھەممىمىزلا ئۆلمەيمىز، بىراق ھەممىمىز پۈتۈنلەي ئۆزگىرىمىز. ⁵²بۇ ئىش ئەڭ ئاخىرقى كاناي چېلىنغاندا، كۆزنى يۇمۇپ ئاچقۇچە تېزلا يۈز بېرىدۇ. كاناينىڭ چېلىنىشى بىلەنلا ئۆلگەن ئېتىقادچىلار چىرىمەس تەن بىلەن تىرىلىدۇ، بىزلەرمۇ ئۆزگىرىمىز. ⁵³چۈنكى چىرىيدىغان تېنىمىز چىرىمەيدىغان تەنگە، ئۆلىدىغان تېنىمىز ئۆلمەيدىغان تەنگە ئايلىنىدۇ. ⁵⁴ئۆلىدىغان ۋە چىرىيدىغان تېنىمىز ئۆلمەيدىغان ۋە چىرىمەيدىغان تەنگە ئايلانغاندا، مۇقەددەس يازمىلاردىكى ئالدىن ئېيتىلغان بۇ سۆزلەر ئەمەلگە ئاشىدۇ:

«ئۆلۈم يېڭىلىپ، يوق بولدى!»

⁵⁵«ئەي ئۆلۈم، غەلىبەڭ يوق ئەمدى!

ئەي ئۆلۈم، نەشتىرىڭ يوق ئەمدى!»

⁵⁶ئۆلۈمنىڭ نەشتىرى گۇناھتۇر. گۇناھنىڭ كۈچى بىزنىڭ تەۋرات قانۇنىغا ئەمەل قىلمىغانلىقىمىزدىن پەيدا بولىدۇ. ⁵⁷لېكىن خۇداغا شۈكۈر! چۈنكى خۇدا رەببىمىز ئەيسا مەسىھ ئارقىلىق بىزنى ئۆلۈم ۋە گۇناھ ئۈستىدىن غەلىبىگە ئېرىشتۈردى.

⁵⁸شۇنىڭ ئۈچۈن قەدىرلىك قېرىنداشلىرىم، ئېتىقادىڭلاردا تەۋرەنمەي، چىڭ تۇرۇڭلار. رەببىمىزگە ئەستايىدىللىق بىلەن خىزمەت قىلىڭلار. رەببىمىز ئۈچۈن قىلغان خىزمىتىڭلارنىڭ ھەرگىز بىھۇدە كەتمەيدىغانلىقىنى بىلىڭلار.

16

يېرۇسالېمدىكى ئېتىقادچىلارغا ئىئانە بېرىش توغرىسىدا

¹خېتىڭلاردا يېزىلغان يېرۇسالېمدىكى ئېتىقادچىلارغا بېرىلىدىغان ئىئانە ئىشىغا كەلسەك، گالاتىيا ئۆلكىسىدىكى جامائەتكە تاپىلىغانلىرىمنى سىلەرمۇ ئورۇنداڭلار. ²ھەر يەكشەنبە كۈنى ھەممىڭلار ھەپتىلىك تاپاۋىتىڭلارغا قاراپ، ئۇنىڭ مەلۇم بىر قىسمىنى ئىئانە قىلىڭلار. شۇنداق قىلساڭلار، يېنىڭلارغا بارغىنىمدا پۇل توپلاشقا ئېھتىياجلىق بولمايمەن. ³مەن يېنىڭلارغا بارغىنىمدا، كىملەرنى ئىئانىنى ئېلىپ بېرىشقا تاللىغان بولساڭلار، شۇلارنى تونۇشتۇرۇش خېتىم بىلەن بىرگە يېرۇسالېمدىكى جامائەتنىڭ يېتەكچىلىرىگە ئەۋەتىمەن. ⁴ئەگەر ئۆزۈمنىڭ بېرىشىغا توغرا كەلسە، ئۇلار بىلەن بىرگە بارىمەن.

پاۋلۇسنىڭ پىلانلىرى

⁵مەن ماكېدونىيە ئۆلكىسىدىن ئۆتمەكچىمەن. ماكېدونىيە زىيارىتىدىن كېيىن يېنىڭلارغا بارىمەن. ⁶بەلكىم يېنىڭلاردا بىر مەزگىل تۇرۇشۇم ۋە ھەتتا قىشنى سىلەر بىلەن بىرگە ئۆتكۈزۈشۈم مۇمكىن. شۇنداق بولغاندا، مەن نەگىلا بارماقچى بولسام، سىلەر مېنى يولغا سېلىپ قويالايسىلەر. ⁷بۇ قېتىم سىلەرنى سەپەر ئۈستىدىلا كۆرۈپ ئۆتۈپ كېتىشنى خالىمايمەن. خۇدا بۇيرۇسا، سىلەر بىلەن بىر مەزگىل بىرگە بولىمەن.

⁸لېكىن ئورما ھېيتىغىچە ئەفەس شەھىرىدە داۋاملىق تۇرىمەن. ⁹چۈنكى بۇ يەردە خۇش خەۋەر يەتكۈزۈش ئۈچۈن ئىشىك ماڭا كەڭ ئوچۇقتۇر. كۆپ كىشىلەر خۇش خەۋەرنى قوبۇل قىلىۋاتىدۇ، لېكىن قارشى تۇرۇۋاتقانلارمۇ كۆپ بولۇۋاتىدۇ.

¹⁰تىموتىي يېنىڭلارغا بېرىپ، سىلەر بىلەن بىرگە تۇرغاندا، ئۇنىڭغا كۆڭۈل بۆلۈڭلار، ئۇ ئاراڭلاردا خاتىرجەم يۈرسۇن. چۈنكى ئۇمۇ ماڭا ئوخشاش رەببىمىز ئۈچۈن خىزمەت قىلىۋاتىدۇ. ¹¹ھېچكىم ئۇنى تۆۋەن كۆرمىسۇن. ھەممىڭلار ئۇنىڭغا ياردەم بېرىپ، ئۇنى ساق-سالامەت يېنىمغا يولغا سېلىپ قويۇڭلار. چۈنكى ئۇنىڭ باشقا قېرىنداشلار بىلەن بىرگە كېلىشىنى كۈتۈۋاتىمەن.

¹²قېرىندىشىمىز ئاپوللوسقا كەلسەك، ئۇنى قېرىنداشلار بىلەن بىرگە سىلەرنىڭ يېنىڭلارغا بېرىشقا كۆپ دەۋەت قىلدىم. لېكىن ئۇنىڭ ھازىر ھېچ بارغۇسى يوق. كېيىن پۇرسەت پىشىپ يېتىلگەندە بارىدۇ.

ئاخىرقى سۆزلەر

¹³قېرىنداشلار، ئېتىقاد يولىدا ھوشيار بولۇڭلار، ئېتىقادىڭلاردا چىڭ تۇرۇڭلار، مەردانە ۋە قەيسەر بولۇڭلار. ¹⁴ھەممە ئىشنى مېھىر-مۇھەببەت بىلەن قىلىڭلار.

^15‏-16يۇنان ئۆلكىسىدىكى ئەڭ بۇرۇن ئېتىقادچى بولغان ئىستىپاناس ۋە ئۇنىڭ ئائىلىسىدىكىلەرنىڭ ئۆزلىرىنى ئېتىقادچىلارنىڭ خىزمىتىگە چىن دىلى بىلەن ئاتىغانلىقىنى بىلىسىلەر. قېرىنداشلار، سىلەردىن ئۆتۈنىمەنكى، بۇنداق كىشىلەرنىڭ ۋە ئۇلار بىلەن بىرلىكتە رەببىمىزگە خىزمەت قىلىۋاتقانلارنىڭ سۆزلىرىگە كىرىڭلار.

¹⁷يېنىڭلاردىن ئىستىپاناس، فورتۇناتۇس ۋە ئاخايكۇسنىڭ بۇ يەرگە مېنى يوقلاپ كەلگەنلىكىگە ناھايىتى خۇش بولدۇم. سىلەر مەن بىلەن بىرگە بولالمىغىنىڭلار ئۈچۈن، ئۇلار سىلەرنىڭ ئورنۇڭلاردا ماڭا ياردەم قىلدى. ¹⁸ئۇلار سىلەرنى روھلاندۇرغاندەك، مېنىمۇ روھلاندۇردى. بۇنداق كىشىلەرنى قەدىرلەڭلار.

¹⁹بۇ يەردىكى، يەنى ئاسىيا ئۆلكىسىدىكى ھەرقايسى جامائەتلەردىن سىلەرگە سالام. ئاكۋىلا بىلەن ئايالى پرىسكىلا ۋە ئۇلارنىڭ ئۆيدە جەم بولىدىغان جامائەت سىلەرگە رەببىمىزنىڭ نامى بىلەن سەمىمىي سالام يوللىدى. ²⁰بۇ يەردىكى بارلىق قېرىنداشلار سىلەرگە سالام ئېيتتى. بىر-بىرىڭلار بىلەن قىزغىن سالاملىشىڭلار.

²¹مەنكى پاۋلۇس بۇ خەتنىڭ ئاخىرقى سۆزلىرىنى ئۆز قولۇم بىلەن يازدىم.

²²رەببىمىزنى سۆيمىگەنلەرگە لەنەت بولسۇن. ئى رەببىمىز، سېنىڭ كېلىشىڭنى ئارزۇ قىلىمىز!

²³رەببىمىز ئەيسانىڭ مېھىر-شەپقىتى سىلەرگە يار بولغاي. ²⁴مەن ئەيسا مەسىھكە مەنسۇپ بولغان سىلەرنى چىن دىلىمدىن سۆيىمەن، ئامىن!