ئۇيغۇرچە مۇقەددەس كىتاب جەمئىيىتى

گالاتىيالىقلارغا يېزىلغان خەت

1

^1‏-2مەنكى پاۋلۇستىن ۋە مەن بىلەن بىرگە تۇرۇۋاتقان بارلىق قېرىنداشلاردىن گالاتىيا ئۆلكىسىدىكى ئېتىقادچىلار جامائەتلىرىگە سالام. مەن ئىنسانلار تەرىپىدىن تاللانغان ياكى خۇدانىڭ ئىنسانلارنى ۋاسىتە قىلىشى ئارقىلىق تاللانغان ئەلچى بولماستىن، بەلكى ئەيسا مەسىھ ۋە ئۇنى ئۆلۈمدىن تىرىلدۈرگەن خۇدائاتىمىز تەرىپىدىن تاللانغان ئەلچىدۇرمەن.

³خۇدائاتىمىز ۋە رەببىمىز ئەيسا مەسىھ سىلەرگە مېھىر-شەپقەت ۋە ئامانلىق ئاتا قىلغاي! ⁴ئەيسا مەسىھ خۇدائاتىمىزنىڭ ئىرادىسى بويىچە ئۆزىنى بىزنىڭ گۇناھلىرىمىز ئۈچۈن پىدا قىلدى. مەقسىتى، بىزنى بۇ رەزىل دۇنيادىن قۇتقۇزۇش ئىدى. ⁵بارلىق شان-شەرەپ خۇداغا ئەبەدىلئەبەد مەنسۇپ بولغاي، ئامىن!

دۇنيادا بىرلا خۇش خەۋەر بار

⁶ئەيسا مەسىھ ئارقىلىق سىلەرگە مېھىر-شەپقەت كۆرسىتىپ، سىلەرنى ئۆزىگە چاقىرغان خۇدادىن شۇنچە تېز ۋاز كېچىپ، باشقىچە بىر خىل «خۇش خەۋەر»گە ئەگىشىپ كېتىۋاتقانلىقىڭلارغا ھەيرانمەن. ⁷ئەمەلىيەتتە، باشقا خۇش خەۋەر يوق. لېكىن بەزى ئادەملەر سىلەرنى قايمۇقتۇرۇش ئۈچۈن ئەيسا مەسىھ ھەققىدىكى خۇش خەۋەرنى بۇرمىلايدۇ. ⁸مەيلى ئارىمىزدىكى بىرسى ياكى ئەرشتىن چۈشكەن پەرىشتە بولسۇن، بىز سىلەرگە يەتكۈزگەن خۇش خەۋەرگە ئوخشىمايدىغان باشقا بىر «خۇش خەۋەر»نى يەتكۈزسە، ئۇ قارغىشقا قالسۇن. ⁹بۇرۇن بىزنىڭ ئېيتقانلىرىمىزنى مەن يەنە تەكرارلايمەنكى، كىمدىكىم سىلەرگە سىلەر قوبۇل قىلغان خۇش خەۋەرگە ئوخشىمايدىغان باشقىچە بىر خىل «خۇش خەۋەر»نى يەتكۈزسە، ئۇ قارغىشقا قالسۇن!

¹⁰مېنىڭ بۇنداق دېيىشىم ئىنسانلارنى خۇرسەن قىلىش ئۈچۈنمۇ ياكى خۇدانىمۇ؟ ئەگەر مەن ئىنسانلارنى خۇرسەن قىلىشنى ئىستىگەن بولسام، ئەيسا مەسىھنىڭ سادىق خىزمەتكارى بولمىغان بولاتتىم.

پاۋلۇسنىڭ ئەلچى بولۇشقا چاقىرىلىشى

¹¹قېرىنداشلىرىم، شۇنى بىلىشىڭلار كېرەككى، مەن يەتكۈزگەن خۇش خەۋەر كىشىلەر تەرىپىدىن توقۇپ چىقىرىلغان ئەمەستۇر. ¹²مەن بۇ خۇش خەۋەرنى ئىنساندىن قوبۇل قىلغىنىم ياكى بىرەر كىشىدىن ئۆگەنگىنىم يوق. بۇ خۇش خەۋەرنى ئەيسا مەسىھ ماڭا ۋەھىي ئارقىلىق ئۆزى يەتكۈزگەن.

¹³سىلەر مېنىڭ ئىلگىرى يەھۇدىي دىنى بويىچە قانداق ھايات كەچۈرگەنلىكىمنى ئاڭلىغانىدىڭلار. مەن ئۇ چاغدا خۇداغا مەنسۇپ بولغان ئېتىقادچىلار جامائىتىگە ئەشەددىي زىيانكەشلىك قىلغان ۋە ئۇلارنى يوقىتىشقا تىرىشقانىدىم. ¹⁴يەھۇدىي دىنىنى بىلىش جەھەتتە تەڭتۇشلىرىمدىن خېلىلا ئالدىدا تۇراتتىم. ئەجدادلىرىمىزنىڭ ئەنئەنىلىرىنى پۈتۈن ۋۇجۇدۇم ۋە قىزغىنلىقىم بىلەن قوغدايتتىم. ¹⁵لېكىن خۇدا مېنى ئانامنىڭ قورسىقىدىكى ۋاقتىمدىلا تاللاپ، ئۆزىنىڭ مېھىر-شەپقىتى بىلەن چاقىردى. ¹⁶ئۇ مېنىڭ ئۆز ئوغلى ئەيسا مەسىھ توغرىسىدىكى خۇش خەۋەرنى يەھۇدىي ئەمەسلەرگە يەتكۈزۈشۈم ئۈچۈن، ئۇنى ماڭا ئاشكارىلىدى. شۇ چاغدا مەن ھېچكىمگە مەسلىھەت سالمىدىم، ¹⁷ھەمدە يېرۇسالېمدىكى مەندىن ئىلگىرى ئەلچى بولغانلارنىڭ يېنىغىمۇ بارمىدىم. ئەكسىچە، ئۇدۇل ئەرەب زېمىنلىرىغا قاراپ ئاتلاندىم. كېيىن دەمەشق شەھىرىگە قايتىپ كەلدىم.

¹⁸ئۈچ يىلدىن كېيىن ئەلچى پېترۇس بىلەن كۆرۈشۈش ئۈچۈن يېرۇسالېمغا باردىم ۋە ئۇنىڭ يېنىدا ئون بەش كۈن تۇردۇم. ¹⁹بۇ جەرياندا مەن باشقا ئەلچىلەر بىلەن كۆرۈشمىدىم، پەقەت رەببىمىز ئەيسانىڭ ئىنىسى ياقۇپ بىلەن كۆرۈشتۈم. ²⁰خۇدا گۇۋاھ بولسۇنكى، سىلەرگە يېزىۋاتقانلىرىم يالغان ئەمەس. ²¹كېيىن سۈرىيە ۋە كىلىكىيە ئۆلكىلىرىگە باردىم. ²²ئۇ چاغدا يەھۇدىيە ئۆلكىسىدىكى ئەيسا مەسىھكە مەنسۇپ بولغان ئېتىقادچىلار جامائەتلىرى مېنى تونۇمايتتى. ²³ئۇلار پەقەت باشقىلارنىڭ: «ئۇ بۇرۇن بىزگە زىيانكەشلىك قىلغان ئادەم ئىدى. ئەمدى ئۇ ئۆزى يوقىتىۋەتمەكچى بولغان تەلىمنى تارقىتىۋاتىدۇ» دېگەنلىكىنى ئاڭلىغانىدى. ²⁴شۇڭا ئۇلار مەندە بولغان بۇ ئۆزگىرىشلەر سەۋەبىدىن خۇدانى تېخىمۇ ئۇلۇغلىدى.

2

باشقا ئەلچىلەرنىڭ پاۋلۇسنى قارشى ئېلىشى

¹ئون تۆت يىلدىن كېيىن مەن بارنابا بىلەن بىرگە يەنە يېرۇسالېمغا باردىم. تىتۇسنىمۇ ئېلىۋالدىم. ²مەن ئۇ يەرگە خۇدادىن كەلگەن ۋەھىيگە بىنائەن بارغانىدىم. ئۇ يەردە مەن ئېتىقادچىلار جامائىتىنىڭ يېتەكچىلىرى بىلەن ئايرىم سۆزلىشىپ، ئۆزۈم يەھۇدىي ئەمەسلەر ئارىسىدا تارقىتىپ كېلىۋاتقان خۇش خەۋەرنىڭ مەزمۇنىنىڭ ئۇلارنىڭكى بىلەن ئوخشاش ئىكەنلىكىنى چۈشەندۈردۈم. بۇنداق قىلىشىم بۇرۇنقى ياكى كەلگۈسىدىكى خىزمەتلىرىمنىڭ بىكار بولۇپ كەتمەسلىكى ئۈچۈن ئىدى. ³نەتىجىدە، ئۇلار ئېيتقانلىرىمدىن رازى بولدى. ھەتتا مەن بىلەن بىرگە بارغان تىتۇس يەھۇدىي بولمىسىمۇ، ئۇلار ئۇنى خەتنە قىلدۇرۇشقا مەجبۇرلىمىدى. ⁴بىراق ئەيسا مەسىھكە ئېتىقاد قىلغۇچىلار قىياپىتىگە كىرىۋالغان بەزىلەر ئۇنىڭ خەتنە قىلدۇرۇلۇشىنى تەلەپ قىلدى. ئۇلار ئارىمىزغا سۇقۇنۇپ كىرىۋېلىپ، ئەيسا مەسىھ ئارقىلىق ئېرىشكەن ئەركىن ھاياتىمىزنى نازارەت قىلدى. ئۇلارنىڭ مەقسىتى بىزنى ئۆزلىرىنىڭ دىنىي قائىدە-يوسۇنلىرىغا قۇل قىلىش ئىدى. ⁵لېكىن بىز خۇش خەۋەرگە ئائىت ھەقىقەتنى ئاراڭلاردا ساقلاپ قېلىش ئۈچۈن ئۇلارغا قىلچە يول قويمىدۇق.

⁶ئېتىقادچىلار جامائىتىدىكى مۇھىم ئادەملەر (ئۇلارنىڭ مەرتىۋىسىنىڭ قانداق بولۇشى ماڭا مۇھىم ئەمەس، چۈنكى خۇدا ھەممە ئادەمگە تەڭ قارايدۇ) مەن يەتكۈزگەن خۇش خەۋەرگە يەنە مەزمۇن قوشۇش كېرەك دېمىدى. ⁷دەل ئەكسىچە، ئۇلار خۇددى خۇدا پېترۇسقا يەھۇدىيلارغا خۇش خەۋەر يەتكۈزۈش ۋەزىپىسىنى تاپشۇرغاندەك، ماڭىمۇ يەھۇدىي ئەمەسلەرگە خۇش خەۋەر يەتكۈزۈش ۋەزىپىسىنى تاپشۇرغانلىقىنى تونۇپ يەتتى. ⁸پېترۇسنىڭ يەھۇدىيلارغا ئەلچى بولۇشىغا كۈچ-قۇدرەت ئاتا قىلغان خۇدا مېنىڭمۇ يەھۇدىي ئەمەسلەرگە ئەلچى بولۇشۇمغا كۈچ-قۇدرەت ئاتا قىلدى. ⁹جامائەتنىڭ تۈۋرۈكى ھېسابلانغان ياقۇپ، پېترۇس ۋە يۇھاننالار بۇ ۋەزىپىنىڭ خۇدانىڭ ماڭا قىلغان ئىلتىپاتى ئىكەنلىكىنى تونۇپ يەتكىنىدە، ئۇلار مېنى ۋە بارنابانى قوبۇل قىلىپ، ھەمكارلىشىدىغانلىقىنى بىلدۈردى. شۇنىڭ بىلەن يەھۇدىي ئەمەسلەرگە بىز خۇش خەۋەر تارقىتىدىغان، يەھۇدىيلارغا ئۇلار خۇش خەۋەر تارقىتىدىغان بولۇپ كېلىشتۇق. ¹⁰ئۇلار پەقەت بىزدىن ئۆزلىرىنىڭ ئارىسىدىكى كەمبەغەل ئېتىقادچىلارنىڭ ھالىدىن خەۋەر ئېلىشنى ئۇنتۇپ قالماسلىقىمىزنى تەلەپ قىلدى. مەنمۇ ئەسلىدە دەل شۇنداق قىلىشقا تىرىشىپ كېلىۋاتاتتىم.

پاۋلۇسنىڭ ئانتاكيادا پېترۇسنى ئەيىبلىشى

¹¹بىراق كېيىن پېترۇس ئانتاكيا شەھىرىگە كەلگەندە، ئۇنىڭ ئۆتكۈزگەن خاتالىقى تۈپەيلىدىن مەن ئۇنى يۈزتۇرانە ئەيىبلىدىم. ¹²ياقۇپنىڭ قېشىدىن بەزى ئادەملەر كېلىشتىن بۇرۇن پېترۇس يەھۇدىي ئەمەس ئېتىقادچىلار بىلەن دائىم ھەمداستىخان بولۇپ تۇراتتى. لېكىن بۇ ئادەملەر كەلگەندىن كېيىن، پېترۇس يەھۇدىي ئەمەسلەردىن ئۆزىنى تارتىپ، ئۇلار بىلەن ھەمداستىخان بولمايدىغان بولدى. چۈنكى ئۇ يەھۇدىي ئەمەسلەرمۇ خەتنە قىلىنىشى كېرەك دەپ ئويلايدىغان بۇ يەھۇدىي قېرىنداشلارنىڭ ئەيىبلىشىدىن قورققانىدى. ¹³شۇنىڭ بىلەن باشقا يەھۇدىي ئېتىقادچىلارمۇ ئۇنىڭغا ئوخشاش ساختىپەزلىك قىلىشقا باشلىدى. ھەتتا بارنابامۇ تەسىرگە ئۇچراپ، ئۇلارنىڭ ساختىپەزلىكىگە شېرىك بولدى. ¹⁴مەن ئۇلارنىڭ خۇش خەۋەرنىڭ ھەقىقىي مەنىسى بويىچە ئىش قىلمىغانلىقىنى كۆرۈپ، ھەممەيلەننىڭ ئالدىدىلا پېترۇسقا: «سەن يەھۇدىي بولساڭمۇ، بىراق ھەزرىتى ئەيساغا ئېتىقاد قىلغاندىن بېرى يەھۇدىيلارنىڭ ئادەتلىرى بويىچە ياشىماي، بەلكى يەھۇدىي ئەمەسلەردەك ياشاپ كەلدىڭ. شۇنداق تۇرۇقلۇق، يەنە نېمىشقا يەھۇدىي ئەمەس ئېتىقادچىلاردىن يەھۇدىيلارنىڭ ئادەتلىرى بويىچە ياشاشنى تەلەپ قىلىسەن؟» دېدىم.

¹⁵بىز گۇناھكار دەپ قارالغان يەھۇدىي ئەمەسلەردىن ئەمەسمىز، ھەر ئىككىلىمىز تۇغۇلۇشىمىزدىنلا يەھۇدىيدۇرمىز. ¹⁶لېكىن بىز كىشىلەرنىڭ تەۋرات قانۇنىغا ئەمەل قىلىشى ئارقىلىق ئەمەس، بەلكى ئەيسا مەسىھكە ئېتىقاد قىلىشى ئارقىلىق ھەققانىي ئادەم دەپ ھېسابلىنىدىغانلىقىنى بىلىمىز. شۇ سەۋەبتىن بىزمۇ ئەيسا مەسىھكە ئېتىقاد قىلدۇق. ھېچكىم تەۋرات قانۇنىغا ئەمەل قىلىش ئارقىلىق ھەققانىي ئادەم دەپ ھېسابلانمايدۇ. ¹⁷بىز ئەيسا مەسىھكە ئېتىقاد قىلىش ئارقىلىق ئۆزىمىزنىڭمۇ يەھۇدىي ئەمەسلەرگە ئوخشاشلا گۇناھكار ئىكەنلىكىمىزنى تونۇپ يەتتۇق. ئۇنداقتا، ئەيسا مەسىھ بىزنى گۇناھ يولىغا باشلىدى دېسەك بولامدۇ؟ ياق، ھەرگىز بۇنداق دېگىلى بولمايدۇ! ¹⁸مېنى قۇتۇلدۇرالمايدىغان تەۋرات قانۇنىدىن ئۈمىدىمنى ئۈزگەن تۇرۇقلۇق يەنە ئۇنى تەكىتلىسەم، ئۇ چاغدا مەن ئۆزۈمنىڭ گۇناھكار ئىكەنلىكىمنى ئىسپاتلىغان بولمامدىمەن؟! ¹⁹مەن تەۋرات قانۇنىغا ئەمەل قىلمىغانلىقىم ئۈچۈن، قانۇنغا نىسبەتەن ئۆلدۈم. ھازىر مەن خۇدا ئۈچۈن ياشايمەن. مەن مەسىھ بىلەن بىرگە كرېستكە مىخلانغانىدىم. ²⁰ھازىر مېنىڭ تېنىمدە ياشاۋاتقىنى مەن ئەمەس، بەلكى ئەيسا مەسىھتۇر. مەن ھازىر مېنى سۆيگەن ۋە مەن ئۈچۈن ئۆزىنى پىدا قىلغان خۇدانىڭ ئوغلىغا بولغان ئېتىقادىم بىلەن ياشايمەن. ²¹مەن خۇدانىڭ ئىنسانلارغا كۆرسەتكەن مېھىر-شەپقىتىنى ئەھمىيەتسىز دەپ قارايدىغانلاردىن ئەمەسمەن. ئەگەر بىر ئادەم تەۋرات قانۇنىغا ئەمەل قىلغانلىقى ئۈچۈن ھەققانىي ئادەم دەپ ھېسابلىنىدىغان بولسا، ئۇ چاغدا ئەيسا مەسىھنىڭ كرېستكە مىخلىنىشى ئەھمىيەتسىز بولاتتى.

3

تەۋرات قانۇنى ۋە ئېتىقاد

¹ئەي نادان گالاتىيالىقلار! سىلەر قانداقلارچە ئېزىپ، باشقىلارنىڭ دامىغا چۈشۈپ كەتتىڭلار؟ ئەيسا مەسىھنىڭ كرېستكە مىخلانغانلىقى خۇددى كۆز ئالدىڭلاردا يۈز بەرگەن ۋەقەدەك ئېنىق تەسۋىرلەنگەنىدىغۇ! ²سىلەردىن شۇنى سورىماقچىمەنكى، مۇقەددەس روھ سىلەرگە تەۋرات قانۇنىغا ئەمەل قىلغانلىقىڭلار ئۈچۈن ئاتا قىلىندىمۇ ياكى خۇش خەۋەرنى ئاڭلاپ ئېتىقاد قىلغانلىقىڭلار ئۈچۈنمۇ؟ ³سىلەر شۇنچە نادانمۇ؟ مۇقەددەس روھ ھاياتىڭلاردا باشلىغان ئىشنى سىلەر ئۆزۈڭلارنىڭ كۈچىگىلا تايىنىپ تاماملىماقچى بولۇۋاتامسىلەر؟ ⁴ئۇنداقتا، سىلەرنىڭ ئېتىقاد يولىدا تارتقان ئازاب-ئوقۇبەتلىرىڭلارنىڭ ھەممىسى بىكار كەتمەمدۇ؟ ⁵خۇدانىڭ سىلەرگە مۇقەددەس روھنى ئاتا قىلىشى ۋە ئاراڭلاردا مۆجىزىلەرنى يارىتىشى سىلەرنىڭ تەۋرات قانۇنىغا ئەمەل قىلغانلىقىڭلاردىن ئەمەس، بەلكى سىلەرنىڭ خۇش خەۋەرنى ئاڭلاپ، ئەيسا مەسىھكە ئېتىقاد قىلغانلىقىڭلاردىندۇر.

⁶مۇقەددەس يازمىلاردا: «ئىبراھىم خۇداغا ئىشەندى، شۇڭا خۇدا ئۇنى ھەققانىي ئادەم دەپ ھېسابلىدى» دېيىلگەندۇر. ⁷شۇنىڭ ئۈچۈن شۇنى بىلىشىڭلار كېرەككى، پەقەت خۇداغا ئېتىقاد قىلغۇچىلارلا ئىبراھىمنىڭ ھەقىقىي ئەۋلادلىرىدۇر. ⁸مۇقەددەس يازمىلاردا خۇدانىڭ يەھۇدىي ئەمەسلەرنىڭ ئۆزىگە ئېتىقاد قىلغانلىقى ئۈچۈن ئۇلارنى ھەققانىي ئادەم دەپ ھېسابلىغانلىقى ئالدىن ئېيتىلغاندۇر. مۇقەددەس يازمىلاردا خۇدا ئىبراھىمغا بۇ خۇش خەۋەر توغرۇلۇق ئالدىن ئۇچۇر بېرىپ، مۇنداق دېگەن: «مەن سەن ئارقىلىق ھەممە خەلقلەرگە بەخت ئاتا قىلىمەن». ⁹شۇنىڭ ئۈچۈن ئەيسا مەسىھكە ئېتىقاد قىلغانلار خۇداغا ئېتىقاد قىلغان ئىبراھىمغا ئوخشاش بەخت تاپىدۇ.

¹⁰تەۋرات قانۇنىغا ئەمەل قىلىش ئارقىلىق ھەققانىي ئادەم ھېسابلانماقچى بولغانلار قارغىشقا قالىدۇ، چۈنكى تەۋرات قانۇنىغا ھېچكىم تولۇق ئەمەل قىلالمايدۇ. مۇقەددەس يازمىلاردا مۇنداق دەپ يېزىلغان: «تەۋرات قانۇنىنىڭ ھەممە ئەمرلەرگە تولۇق ئەمەل قىلمىغان كىشى قارغىشقا قالىدۇ.» ¹¹دېمەك، ھېچكىم تەۋرات قانۇنىغا تايىنىپ، خۇدانىڭ ئالدىدا ھەققانىي ئادەم ھېسابلىنالمايدۇ، بۇ نۇقتا ناھايىتى ئېنىقتۇر. چۈنكى مۇقەددەس يازمىلاردا: «ھەققانىيلار ئېتىقادى بىلەن ياشايدۇ» دەپ يېزىلغاندۇر. ¹²تەۋرات قانۇنى كىشىلەرنىڭ ئېتىقادىنى ئەمەس، بەلكى ئەمەللىرىنى ئاساس قىلىدۇ. مۇقەددەس يازمىلاردا: «تەۋرات قانۇنىغا تولۇق ئەمەل قىلغۇچىلار ھاياتلىققا ئېرىشىدۇ» دەپ يېزىلغاندۇر. ¹³ھالبۇكى، ئەيسا مەسىھ بىزنى تەۋرات قانۇنىغا تولۇق ئەمەل قىلالمىغانلىقىمىزدىن پەيدا بولغان قارغىشنى ئۆزىنىڭ ئۈستىگە ئېلىپ، بىزنى بۇ قارغىشتىن قۇتۇلدۇرۇپ قالدى. بۇ ھەققىدە مۇقەددەس يازمىلاردا: «ياغاچقا ئېسىلغان ئادەم خۇدانىڭ قارغىشىغا قالغان ئادەمدۇر» دەپ يېزىلغاندۇر. ¹⁴شۇنداق قىلىپ، يەھۇدىي ئەمەسلەرمۇ ئەيسا مەسىھنىڭ كرېستكە مىخلىنىشى ئارقىلىق ئىبراھىمغا ۋەدە قىلىنغان بەختتىن تەڭ بەھرىمەن بولالايدۇ. شۇنداقلا، ئۇلار بىز بىلەن بىرگە خۇدا ۋەدە قىلغان مۇقەددەس روھنى ئېتىقادى بىلەن قوبۇل قىلالايدۇ.

تەۋرات قانۇنى ۋە خۇدانىڭ ۋەدىسى

^15‏-16قېرىنداشلار، كۈندىلىك تۇرمۇشتىن بىر مىسال ئالاي. ئىككى تەرەپ ئوتتۇرىسىدا ئىمزالانغان ئەھدىنامىنى ھېچكىم يوققا چىقىرالمايدۇ ياكى ئۇنىڭغا بىرەر نەرسىمۇ قوشالمايدۇ. خۇددى شۇنىڭغا ئوخشاش، خۇدا ئىبراھىم ۋە ئۇنىڭ ئەۋلادى بىلەن تۈزگەن ئەھدىنىمۇ ھېچكىم ئۆزگەرتەلمەيدۇ. خۇدانىڭ ئىبراھىمغا بەرگەن ۋەدىسىدىكى «سېنىڭ ئەۋلادىڭغا» دېگەن سۆز نۇرغۇن كىشىنى ئەمەس، يالغۇز بىرسىنى، يەنى ئەيسا مەسىھنى كۆرسىتىدۇ. ¹⁷شۇنى دېمەكچىمەنكى، خۇدانىڭ ئىبراھىم بىلەن تۈزگەن ئەھدىسىنى 430 يىلدىن كېيىن چۈشكەن تەۋرات قانۇنىمۇ ئەمەلدىن قالدۇرالمايدۇ. دېمەك، تەۋرات قانۇنى خۇدانىڭ ۋەدىسىنى بىكار قىلالمايدۇ. ¹⁸ئەگەر مىراسقا قانۇنغا ئەمەل قىلىش ئارقىلىق ئېرىشكىلى بولسا، ئۇنداقتا بۇ مىراسنىڭ خۇدانىڭ ۋەدىسى بىلەن مۇناسىۋىتى بولمايدۇ. بىراق خۇدا بۇ مىراسنى ئىبراھىمغا ئۆز ۋەدىسىگە بىنائەن ئاتا قىلغاندۇر. ¹⁹ئۇنداقتا، خۇدانىڭ تەۋرات قانۇنىنى چۈشۈرۈشىدىكى مەقسىتى نېمە؟ خۇدانىڭ مەقسىتى ئۆزى ئەۋەتىشكە ۋەدە قىلغان ئىبراھىمنىڭ ئەۋلادى، يەنى ئەيسا مەسىھنى ئەۋەتكۈچە ئىنسانلارغا گۇناھنىڭ نېمە ئىكەنلىكىنى كۆرسىتىپ بېرىشتۇر. تەۋرات قانۇنى پەرىشتىلەر ئارقىلىق مۇسا پەيغەمبەرگە، مۇسا پەيغەمبەر ئارقىلىق كىشىلەرگە يەتكۈزۈلدى. ²⁰ئىككى ئادەمنىڭ ئەھدە تۈزۈشى ئۈچۈن بىر ۋاسىتىچى بولۇش كېرەك. ئەمما خۇدا ئىبراھىمغا ۋەدە بەرگەندە، ئۆزى يالغۇز ئىدى.

²¹تەۋرات قانۇنى خۇدانىڭ ۋەدىسىگە زىتمۇ؟ ياق، ھەرگىز ئۇنداق ئەمەس! ئەگەر مەڭگۈلۈك ھايات ئاتا قىلىشقا قادىر قانۇن بېرىلگەن بولسا ئىدى، ئۇنداقتا قانۇنغا ئەمەل قىلىش ئارقىلىق ھەققانىي ئادەم ھېسابلانغىلى بولاتتى. ²²ھالبۇكى، خۇدا مۇقەددەس يازمىلاردا پۈتكۈل ئىنسانلارنىڭ گۇناھنىڭ ئىلكىدە ياشايدىغانلىقىنى كۆرسەتتى. شۇنىڭ ئۈچۈن ۋەدە پەقەت ئەيسا مەسىھكە ئېتىقاد قىلىش ئارقىلىقلا ئەمەلگە ئاشىدۇ ۋە ئېتىقاد قىلغانلارغا نېسىپ بولىدۇ.

²³بىز بۇ ئېتىقاد يولى ئاشكارا بولغۇچە، قانۇننىڭ نازارىتى ئاستىدىكى تۇتقۇنلار ئىدۇق ۋە شۇ ئېتىقاد يولىنىڭ ئايان بولۇشىنى كۈتۈۋاتقانىدۇق. ²⁴ئەمما تەۋرات قانۇنى بىزگە ھامىي بولۇپ، بىزنى ئەيسا مەسىھكە ئېتىقاد قىلىشقا يېتەكلىدى. بىز ئەيسا مەسىھكە ئېتىقاد قىلغانلىقىمىز ئۈچۈن، ئەمدى بىز ھەققانىي ئادەم دەپ ھېسابلىنىمىز. ²⁵ھازىر بىز بۇنداق ھامىيلىق قىلغۇچىنىڭ نازارىتىدە ئەمەسمىز. چۈنكى بۇ ئېتىقادنىڭ يولى ئاشكارا بولدى.

خۇدانىڭ پەرزەنتلىرى

²⁶ئەيسا مەسىھكە ئېتىقاد قىلىش ئارقىلىق ھەممىڭلار خۇدانىڭ پەرزەنتلىرى بولدۇڭلار. ²⁷چۈنكى سىلەر چۆمۈلدۈرۈلۈشنى قوبۇل قىلىپ ئەيسا مەسىھكە باغلانغىنىڭلاردا، ئۇنىڭ تەبىئىتىنى ئۆزۈڭلارغا ئۆزلەشتۈردۈڭلار. ²⁸مەيلى يەھۇدىي ياكى يەھۇدىي ئەمەس بولۇڭلار، قۇل ياكى ھۆر بولۇڭلار، ئەر ياكى ئايال بولۇڭلار، ھەممىڭلار ئەيسا مەسىھكە مەنسۇپ بولغانلىقىڭلار ئۈچۈن، خۇدانىڭ نەزىرىدە باراۋەر بولدۇڭلار. ²⁹دېمەك، ئەيسا مەسىھكە مەنسۇپ بولغانىكەنسىلەر، سىلەرمۇ ئىبراھىمنىڭ ئەۋلادى بولىسىلەر ۋە ئىبراھىمغا ۋەدە قىلىنغان بەخت-سائادەتتىن بەھرىمەن بولالايسىلەر.

4

¹گەرچە بىر مىراسخور پۈتۈن مال-مۈلۈكنىڭ ئىگىسى بولسىمۇ، لېكىن ئۇ قۇرامىغا يېتىشتىن ئىلگىرى مىراسخولۇق ھوقۇقى جەھەتتە ئۆيىدىكى قۇلدىن پەرقلەنمەيدۇ. ²ئۇ ئاتىسى بەلگىلىگەن مىراسقا ۋارىسلىق قىلىش يېشىغا توشمىغۇچە ئۇ يەنىلا ھامىيلىق قىلغۇچى ۋە غوجىدارنىڭ باشقۇرۇشىدا بولىدۇ. ³بىزمۇ گۆدەك ۋاقتىمىزدا، يەنى ئەيسا مەسىھكە ئېتىقاد قىلىشتىن بۇرۇن بۇ دۇنيادىكى ئارتۇقچە قائىدە-يوسۇنلارغا^* قۇل بولغانىدۇق. ⁴لېكىن خۇدا ئۆزى بەلگىلىگەن ۋاقىت يېتىپ كەلگەندە، ئۆز ئوغلىنى بۇ دۇنياغا ئەۋەتتى. ئۇ بىر ئايالدىن تۇغۇلۇپ، تەۋرات قانۇنىغا بويسۇنۇپ ياشىدى. ⁵خۇدانىڭ ئۆز ئوغلىنى بۇ دۇنياغا ئەۋەتىشىدىكى مەقسىتى تەۋرات قانۇنىغا قۇل بولغان بىزلەرنى ھۆرلۈككە چىقىرىپ، ئۆزىنىڭ پەرزەنتى قىلىشتۇر. ⁶سىلەر خۇدانىڭ پەرزەنتلىرى بولغانلىقىڭلار ئۈچۈن، خۇدا ئۆز ئوغلىنىڭ روھىنى قەلبىڭلارغا سالدى. بۇ روھ سىلەرنى خۇدانى «ئى سۆيۈملۈك ئاتا» دەپ چاقىرتىدۇ. ⁷شۇنىڭ ئۈچۈن ئەمدى سىلەر قۇل ئەمەس، بەلكى خۇدانىڭ پەرزەنتلىرىدۇرسىلەر. خۇدانىڭ پەرزەنتلىرى بولغانىكەنسىلەر، خۇدانىڭ ۋەدە قىلغانلىرىغا ۋارىس بولىسىلەر.

پاۋلۇسنىڭ گالاتىيالىقلاردىن ئەندىشە قىلىشى

⁸بۇرۇن خۇدانى تونۇمايدىغان ۋاقتىڭلاردا يالغان ئىلاھلارغا چوقۇنۇپ، ئۇلارنىڭ قۇلى بولغانىدىڭلار. ⁹ئەمدى ھەقىقىي خۇدانى تونۇدۇڭلار. تېخىمۇ ئېنىقراق قىلىپ ئېيتقاندا، خۇدا تەرىپىدىن تونۇلدۇڭلار. شۇنداق ئىكەن، يەنە نېمە ئۈچۈن بۇ دۇنيادىكى تەسىرى يوق، كېرەكسىز قائىدە-يوسۇنلارنىڭ قۇللۇقىغا يېڭىباشتىن قايتماقچى بولىسىلەر؟ ¹⁰سىلەر يەنىلا مەلۇم كۈن، مەلۇم ئاي، مەلۇم پەسىل ۋە مەلۇم يىللارنى خاتىرىلەۋاتىسىلەر. ¹¹مەن ئىلگىرى سىلەرگە سىڭدۈرگەن ئەجرىمنىڭ بىكار كېتىشىدىن ئەنسىرەۋاتىمەن.

¹²قېرىنداشلار، گەرچە مەن يەھۇدىي بولساممۇ، ئەمدى سىلەر يەھۇدىي ئەمەسلەردەك تەۋرات قانۇنىنىڭ تۇتقۇنى بولمايمەن. سىلەردىن شۇنى ئۆتۈنۈپ سورايمەنكى، سىلەرمۇ تەۋرات قانۇنىنىڭ تۇتقۇنى بولماڭلار.

سىلەر ماڭا ھېچ ئازار بەرمىدىڭلار. ¹³سىلەرگە مەلۇمكى، كېسەل سەۋەبىدىن گالاتىيادا دەم ئېلىۋاتقان ۋاقتىمدا، بۇ خۇش خەۋەرنى سىلەرگە بىرىنچى قېتىم يەتكۈزگەنىدىم. ¹⁴ئۇ چاغدا كېسىلىم سىلەر ئۈچۈن بىر ئاۋارىچىلىك بولسىمۇ، لېكىن سىلەر مېنى كەمسىتمىدىڭلار، رەت قىلمىدىڭلار. ئەكسىچە، مېنى خۇدا ئەۋەتكەن بىر پەرىشتىنى، ھەتتا ئەيسا مەسىھنى كۈتكەندەك كۈتۈۋالدىڭلار. ¹⁵ئۇ چاغدىكى خۇشاللىقىڭلار ئەمدى نەگە كەتتى؟! جەزم قىلىپ ئېيتالايمەنكى، ئۇ چاغدا سىلەر مۇمكىن بولسا، ماڭا كۆزلىرىڭلارنى ئويۇپ بېرىشكىمۇ رازى ئىدىڭلار. ¹⁶ئەمدىلىكتە، سىلەرگە ھەقىقەتنى سۆزلىگەنلىكىم ئۈچۈن، دۈشمىنىڭلارغا ئايلىنىپ قالدىممۇ؟

¹⁷مەن ئېيتىپ ئۆتكەن ھېلىقى ئادەملەر سىلەرنى ئۆزىگە قارىتىۋېلىشقا تىرىشماقتا، لېكىن ئۇلارنىڭ نىيىتى توغرا ئەمەس. ئۇلار سىلەرنى بىزدىن ئايرىپ، ئۆزلىرىگە قېتىۋالماقچى. ¹⁸ئەگەر ئۇلارنىڭ سىلەرگە ياخشىلىق قىلىش نىيىتى بولسا مەيلى. لېكىن ئۇلار ياخشىلىقنى مەن يېنىڭلاردا بولغاندىلا قىلماستىن، بەلكى ھەر دائىم قىلسۇن. ¹⁹بالىلىرىم، ئەيسا مەسىھنىڭ تەبىئىتى سىلەردە گەۋدىلەنگۈچە، سىلەر ئۈچۈن يەنە بىر قېتىم تولغاق ئازابىنى تارتىمەن. ²⁰مېنىڭ ھازىرلا يېنىڭلارغا بېرىپ، سىلەرگە مۇلايىملىق بىلەن نەسىھەت قىلغۇم كېلىۋاتىدۇ. چۈنكى سىلەرنىڭ بۇ ئەھۋالىڭلارنى ئاڭلاپ، قانداق قىلىشنى راستتىنلا بىلمەيۋاتىمەن!

ھەجەر بىلەن سارەنىڭ مىسالى

²¹تەۋرات قانۇنى بويىچە ياشاشنى خالايدىغان سىلەردىن شۇنى سوراپ باقاي، سىلەر تەۋراتتا نېمە دېيىلگەنلىكىنى بىلمەمسىلەر؟ ²²تەۋراتتا ئىبراھىمنىڭ ئىككى ئوغلى بارلىقى خاتىرىلەنگەن. ئۇلارنىڭ بىرى دېدىكى ھەجەردىن، يەنە بىرى ئايالى سارەدىن تۇغۇلغان. ²³دېدەكتىن تۇغۇلغان ئوغۇل تەبىئىي قانۇنىيەت بويىچە تۇغۇلغان، ئايالى سارەدىن تۇغۇلغان ئوغۇل بولسا خۇدانىڭ ۋەدىسى بويىچە دۇنياغا كەلگەن.^{* 24}بۇ يەردە مۇنداق بىر ئوخشىتىش بار. بۇ ئىككى ئايال خۇدانىڭ ئىنسانلار بىلەن تۈزگەن ئىككى ئەھدىسىنىڭ ۋەكىلىدۇر. تەۋرات قانۇنى دەل سىناي تېغىدا چۈشۈرۈلگەن بولۇپ، بۇ قانۇن يەھۇدىيلارنى ئۆزىنىڭ قۇلى قىلىدۇ. ھەجەرنىڭ ئۆزى قۇل بولۇپ، بالىلىرىمۇ قۇل بولىدۇ. شۇڭا ئۇ سىناي تېغىغا ۋەكىللىك قىلىدۇ. ²⁵ئەرەب زېمىنلىرىدىكى سىناي تېغىغا سىمۋول قىلىنغان ھەجەرنى بۈگۈنكى يېرۇسالېمغىمۇ ئوخشىتىشقا بولىدۇ. چۈنكى ئۇ شەھەر ئۆز خەلقى بىلەن ھازىرمۇ تەۋرات قانۇنىنىڭ قۇللۇقىدا تۇرماقتا. ²⁶ئىبراھىمنىڭ ئايالى سارە ئەركىن ئايال بولغاچقا، ئەرشتىكى يېرۇسالېمغا ۋەكىللىك قىلىدۇ. شۇڭا ئەرشتىكى يېرۇسالېمنى بىزنىڭ ئانىمىز دېيىشكە بولىدۇ. ²⁷چۈنكى مۇقەددەس يازمىلاردا مۇنداق يېزىلغان:

«ئەي بالا تۇغمىغان پەرزەنتسىز ئايال، تەنتەنە قىلغىن!

ئەي تولغاق ئازابىنى كۆرمىگەن ئايال، شادلىق ناخشاڭنى ياڭراتقىن!

چۈنكى تاشلاپ كېتىلگەن ئايالنىڭ بالىلىرى

ئېرى بار ئايالنىڭ بالىلىرىدىن كۆپ بولىدۇ.»

²⁸قېرىنداشلار، سىلەر خۇدانىڭ پەرزەنتلىرى بولدۇڭلار. چۈنكى خۇددى ئىسھاق خۇدانىڭ ۋەدىسى بويىچە سارەدىن تۇغۇلغاندەك، سىلەرمۇ خۇدانىڭ ۋەدىسى بويىچە تۇغۇلدۇڭلار. ²⁹ئۇ چاغدا تەبىئىي قانۇنىيەت بويىچە تۇغۇلغان ئىسمائىل مۇقەددەس روھنىڭ قۇدرىتى بىلەن تۇغۇلغان ئىسھاققا قانداق زىيانكەشلىك قىلغان بولسا، ھازىر تەۋرات قانۇنىغا قۇل بولغانلار ئەيسا مەسىھكە ئېتىقاد قىلغۇچى بىزلەرگە شۇنداق زىيانكەشلىك قىلىۋاتىدۇ. ³⁰لېكىن مۇقەددەس يازمىلاردا نېمە دەپ يېزىلغان؟ ئۇنىڭدا: «سەن بۇ دېدەك ئايالنى ئوغلى بىلەن قوشۇپ ھەيدىۋەت! چۈنكى بۇ دېدەكنىڭ ئوغلى ھەرگىز ئەركىن ئايالىڭدىن تۇغۇلغان ئوغلۇڭ بىلەن ئورتاق مىراسخور بولۇپ قالمىسۇن» دەپ يېزىلغان. ³¹دېمەك، قېرىنداشلار، بىز دېدەك ئايالنىڭ ئەمەس، بەلكى ئەركىن ئايالنىڭ پەرزەنتلىرىمىز.

5

ئەيسا مەسىھكە ئېتىقاد قىلغۇچىلارنىڭ ئەركىنلىكى

¹ئەيسا مەسىھ بىزنى ئەركىن ياشىسۇن دەپ ئازاد قىلدى. شۇنىڭ ئۈچۈن قەددىڭلارنى رۇسلاڭلار، تەۋراتتىكى قائىدە-يوسۇنلار سىلەرگە يەنە بويۇنتۇرۇق بولمىسۇن.

²مەنكى پاۋلۇس شۇنى ئېيتىپ قويايكى، ئەگەر سىلەر ھەققانىيلىقنى ئىزدەپ تۇرۇپ، يەنىلا خەتنىنى قوبۇل قىلساڭلار، ئۇ چاغدا ئەيسا مەسىھنىڭ قۇربان بولۇشىنىڭ نېمە پايدىسى بولسۇن! ³مەن خەتنىنى قوبۇل قىلماقچى بولغانلارنى يەنە بىر قېتىم ئاگاھلاندۇرىمەنكى، ئەگەر سىلەر خەتنىنى قوبۇل قىلساڭلار، تەۋراتتىكى پۈتۈن قائىدە-يوسۇنلارغا تولۇق بويسۇنۇشۇڭلار كېرەك. ⁴سىلەر بۇ قائىدە-يوسۇنلارغا بويسۇنۇپ ھەققانىي ئادەم دەپ ھېسابلىنىشقا تىرىشساڭلار، ئۇ چاغدا سىلەر ئەيسا مەسىھتىن ئايرىلىپ قالىسىلەر. شۇنداقلا، خۇدانىڭ مېھىر-شەپقىتىنى رەت قىلغان بولىسىلەر. ⁵لېكىن بىز مۇقەددەس روھقا تايىنىپ، ئېتىقاد ئارقىلىق خۇدانىڭ بىزگە ۋەدە قىلغان بەخت-سائادەتلىرىنى ئىنتىزارلىق بىلەن كۈتمەكتىمىز. ⁶بىز ئەيسا مەسىھكە مەنسۇپ بولغانلىقىمىز ئۈچۈن، خەتنە قىلىش ياكى قىلماسلىق بىز ئۈچۈن مۇھىم ئەمەس، پەقەت مېھىر-مۇھەببەت ئارقىلىق ئىپادىلەنگەن ئېتىقادنىلا مۇھىم دەپ قارايمىز.

⁷سىلەر ئېتىقاد يولىدا ئالدىڭلارغا قاراپ كېتىۋاتقانىدىڭلار، بىراق كىم سىلەرنىڭ ھەقىقەتكە ئىتائەت قىلىشىڭلارغا توسالغۇ بولدى؟ ⁸ئۇ ئەلۋەتتە سىلەرنى ئۆزىگە چاقىرغان خۇدا ئەمەس! ⁹كىچىككىنە ئېچىتقۇمۇ پۈتۈن خېمىرنى ئېچىتىدۇ. ¹⁰خۇداغا بولغان ئىشەنچىم بىلەن شۇنى ئېيتىمەنكى، سىلەرمۇ بۇ ئىش ھەققىدە ماڭا ئوخشاش ئويلايسىلەر. سىلەرنى قۇترىتىۋاتقان كىم بولۇشىدىن قەتئىينەزەر، ئۇ چوقۇم خۇدانىڭ جازاسىغا ئۇچرايدۇ.

¹¹قېرىنداشلار، ئەگەر مەن خەتنە قىلىشتا داۋاملىق چىڭ تۇرغان بولسام، ئۇنداقتا مەن بۈگۈنكى كۈندە يەنە نېمە ئۈچۈن يەھۇدىيلارنىڭ زىيانكەشلىكىگە ئۇچرايمەن؟ ئەگەر مەن قۇتقۇزۇلۇش پەقەت ئەيسا مەسىھنىڭ كرېستتىكى قۇربانلىقىدىنلا كېلىدۇ دېمىگەن بولسام، ھەچكىمنىڭ غەزىپىمۇ قوزغالمىغان بولاتتى. ¹²سىلەرنى قۇتراتقان بۇ ئادەملەر ئۆزلىرىنى ئاختا قىلىۋەتسۇن!

¹³قېرىنداشلار، سىلەر ئەركىن بولۇشقا چاقىرىلدىڭلار. لېكىن بۇ ئەركىنلىك گۇناھكار تەبىئىتىڭلارنىڭ ئارزۇلىرىنى قاندۇرۇشقا باھانە بولۇپ قالمىسۇن. ئەكسىچە، ئەركىنلىكىڭلارنى بىر-بىرىڭلارغا مېھىر-مۇھەببەت بىلەن خىزمەت قىلىشنىڭ پۇرسىتى دەپ بىلىڭلار. ¹⁴چۈنكى پۈتۈن تەۋرات قانۇنى «باشقىلارنى ئۆزۈڭلارنى سۆيگەندەك سۆيۈڭلار» دېگەن ئەمرگە يىغىنچاقلانغاندۇر. ¹⁵لېكىن پەخەس بولۇڭلاركى، بىر-بىرىڭلارنى چىشلەپ تارتىپ يۈرمەڭلار، بولمىسا ئۆزۈڭلارنى ۋەيران قىلىسىلەر.

مۇقەددەس روھ ۋە ئىنساننىڭ گۇناھكار تەبىئىتى

¹⁶شۇنى دېمەكچىمەنكى، مۇقەددەس روھنىڭ يېتەكچىلىكىدە ياشاڭلار. شۇ چاغدا گۇناھكار تەبىئىتىڭلارنىڭ ئارزۇ-ھەۋەسلىرىگە يول قويمايسىلەر. ¹⁷چۈنكى ئىنساننىڭ گۇناھكار تەبىئىتىنىڭ ئىستەكلىرى بىلەن مۇقەددەس روھنىڭ ئىستەكلىرى بىر-بىرىگە قارىمۇقارشىدۇر. بۇ قارىمۇقارشىلىق توقۇنۇش پەيدا قىلىپ، ئۆزۈڭلار ئارزۇ قىلغان ئىشلارنى قىلالمايسىلەر. ¹⁸لېكىن سىلەر مۇقەددەس روھنىڭ يېتەكچىلىكىدە بولساڭلار، تەۋرات قانۇنىنىڭ ئىلكىدە بولمايسىلەر.

¹⁹ئىنساننىڭ گۇناھكار تەبىئىتىگە باش ئېگىش جىنسىي ئەخلاقسىزلىق، ناپاكلىق، شەھۋانىيلىق، ²⁰بۇتپەرەسلىك، سېھىرگەرلىك، ئۆچمەنلىك، ئۇرۇشقاقلىق، قىزغانچۇقلۇق، غەزەپلىنىش، شەخسىيەتچىلىك، بۆلگۈنچىلىك، گۇرۇھۋازلىق، ²¹ھەسەتخورلۇق، شارابخورلۇق، ئەيش-ئىشرەت قاتارلىق گۇناھلارنى كەلتۈرۈپ چىقىرىدۇ. بۇرۇنقىدەك يەنە بىر قېتىم ئاگاھلاندۇرىمەنكى، بۇ ئىشلارنى قىلغۇچىلارغا خۇدانىڭ پادىشاھلىقىدا ئورۇن يوق.

²²ۋاھالەنكى، مۇقەددەس روھنىڭ يېتەكچىلىكىدە ياشاشنىڭ بېرىدىغان مېۋىلىرى مېھىر-مۇھەببەت، خۇشال-خۇراملىق، تىنچ-ئامانلىق، سەۋر-تاقەت، مېھرىبانلىق، ياخشىلىق، سادىقلىق، ²³مۇلايىملىق ۋە ئۆزىنى تۇتۇۋېلىشلاردىن ئىبارەتتۇر. بۇلار ھېچقانداق قانۇنغا زىت ئەمەستۇر. ²⁴ئەيسا مەسىھكە مەنسۇپ بولغانلار ئۆزلىرىنىڭ گۇناھكار تەبىئىتى ۋە ئۇ پەيدا قىلىدىغان بارلىق يامان ھەۋەسلىرىنى كرېستكە مىخلىغان بولىدۇ. ²⁵مۇقەددەس روھ بىزنىڭ يېڭى ھاياتىمىزنىڭ مەنبەسى بولغانىكەن، ئۇنىڭ يېتەكچىلىكىدە ماڭايلى. ²⁶تەكەببۇرلۇق قىلمايلى، بىر-بىرىمىزنى رەنجىتمەيلى، بىر-بىرىمىزگە ھەسەت قىلمايلى.

6

بىر-بىرىڭلارغا ياردەم قىلىڭلار

¹قېرىنداشلار، ئەگەر ئاراڭلاردا بىرىنىڭ گۇناھ سادىر قىلىۋاتقانلىقى بايقالسا، ئېتىقادتا پىشىپ يېتىلگەن سىلەر ئۇنى مۇلايىملىق بىلەن توغرا يولغا قايتۇرۇپ كېلىڭلار. شۇنىڭ بىلەن بىر ۋاقىتتا ئۆزۈڭلارنىڭمۇ ئېزىپ كەتمەسلىكىڭلارغا دىققەت قىلىڭلار. ²بىر-بىرىڭلارنىڭ ئېغىرچىلىقىنى كۆتۈرۈڭلار. شۇنداق قىلساڭلار، ئەيسا مەسىھنىڭ قانۇنىغا ئەمەل قىلغان بولىسىلەر. ³ئەگەر كىمدىكىم ئۆزىنى قالتىس چاغلاپ، باشقىلارغا ياردەم بەرمىسە، بۇنداق ئادەم ئەمەلىيەتتە قالتىس ئەمەستۇر. بۇنداق ئادەم ئۆزىنى ئۆزى ئالدايدۇ. ⁴ھەركىم ئۆزىنىڭ ئەمەلىيىتىگە قاراپ باقسۇن. پەخىرلىنىشكە تېگىشلىك بولسا، پەخىرلەنسۇن، لېكىن ئۆزىنى باشقىلار بىلەن سېلىشتۇرمىسۇن. ⁵ھەربىر ئادەم ئۆزىنىڭ ئىشىغا ئۆزى مەسئۇل بولسۇن.

⁶خۇدانىڭ سۆزىدىن تەلىم ئېلىۋاتقان كىشى ئۆزىگە تەلىم بەرگۈچىنى ئۆزىدە بار بولغان ياخشى نەرسىلىرىدىن بەھرىمەن قىلسۇن.

⁷ئۆز-ئۆزۈڭلارنى ئالدىماڭلار، ئۆز-ئۆزۈڭلارنى ئالدىغان بىلەن خۇدانى ئالدىيالمايسىلەر. كىم نېمە تېرىسا، شۇنى ئالىدۇ. ⁸ئۆزىنىڭ گۇناھكار تەبىئىتىنىڭ ئارزۇ-ھەۋەسلىرىنى قاندۇرۇش ئۈچۈن ئۇرۇق چاچقان كىشىنىڭ ئۇنىڭدىن ئالىدىغان ھوسۇلى ھالاكەت بولىدۇ. مۇقەددەس روھنى خۇرسەن قىلىش ئۈچۈن ئۇرۇق چاچقان كىشىنىڭ ئۇنىڭدىن ئالىدىغان ھوسۇلى مەڭگۈلۈك ھايات بولىدۇ. ⁹شۇڭا ياخشى ئىشلارنى قىلىشتىن بوشاشمايلى. شۇنداق قىلساق، ۋاقتى كەلگەندە، ئۇنىڭدىن ئالىدىغان ھوسۇلىمىز مول بولىدۇ. ¹⁰شۇنىڭ ئۈچۈن پۇرسەت بولسىلا، باشقىلارغا، بولۇپمۇ ئېتىقادچى قېرىنداشلىرىمىزغا ياخشىلىق قىلايلى.

ئاگاھلاندۇرۇش ۋە ئاخىرقى سالام

¹¹قاراڭلار، تۆۋەندىكى بۇ قۇرلارنى ئۆز قولۇمدا ئالاھىدە چوڭ خەتلەر بىلەن يېزىۋاتىمەن. ¹²سىلەرنى خەتنە قىلدۇرۇشقا زورلايدىغانلار يەھۇدىيلارغا ياخشىچاق بولۇشنى ئويلايدىغانلاردۇر. چۈنكى ئۇلار قۇتقۇزۇلۇش پەقەت ئەيسا مەسىھنىڭ كرېستتە قۇربان بولۇشىدىن كېلىدۇ دېسە، ئۇلار يەھۇدىيلارنىڭ زىيانكەشلىكىگە ئۇچرايدۇ. ¹³ئەمەلىيەتتە، بۇنداق كىشىلەرنىڭ ئۆزلىرىمۇ تەۋرات قانۇنىغا تولۇق ئەمەل قىلمايدۇ. بىراق ئۇلار سىلەرنىڭ خەتنىنى قوبۇل قىلغانلىقىڭلاردىن ماختىنىش ئۈچۈن خەتنە قىلدۇرۇشۇڭلارنى تەلەپ قىلىدۇ. ¹⁴ئۆزۈمنى ئېلىپ ئېيتسام، مەن ھېچقانداق نەرسىدىن ماختانمايمەن، پەقەت رەببىمىز ئەيسا مەسىھنىڭ كرېستتە قۇربان بولۇشىدىن ماختىنىمەن. ماڭا نىسبەتەن ئېيتقاندا، دۇنيا كرېستكە مىخلاندى، دۇنياغا نىسبەتەن ئېيتقاندا، مەن كرېستكە مىخلاندىم. ¹⁵خۇدانىڭ نەزىرىدە خەتنە قىلىش ياكى قىلماسلىق مۇھىم ئەمەس، مۇھىمى ئەيسا مەسىھ ئارقىلىق يېڭى ئادەم بولۇشتۇر. ¹⁶بۇنداق كۆزقاراش بىلەن ياشايدىغانلارغا، يەنى خۇدانىڭ ھەقىقىي خەلقىگە ئامانلىق ۋە رەھىم-شەپقەت يار بولغاي!

¹⁷بۇنىڭدىن كېيىن يۇقىرىدا دېيىلگەن ئىشلار بىلەن ھېچكىم مېنى ئاۋارە قىلمىسۇن! چۈنكى بەدىنىمدە ئەيسا مەسىھ ئۈچۈن تارتقان ئازاب-ئوقۇبەتلىرىمنىڭ ئىزناسى باردۇر.

¹⁸قېرىنداشلار، رەببىمىز ئەيسا مەسىھنىڭ مېھىر-شەپقىتى سىلەرگە يار بولغاي، ئامىن!