(Ⱪisⱪiqə qüxəndürüx)
Muⱪəddəs Kitabning «Sərdarlar» ⱪismida hatiriləngən külpətlik künlər – «Rut» tiki wəⱪələrning arⱪa kɵrünüxidur. Sərdarlar Isra’illar üstidin ⱨɵkümranliⱪ yürgüzgən qaƣlar – Isra’illar Kən’an zeminiƣa jaylaxⱪandin tartip taki padixaⱨliⱪni ⱪuruxⱪiqə bolƣan waⱪitni yəni təhminən miladiyidin burunⱪi 13-əsirdin 11-əsirgiqə bolƣan waⱪitni ɵz iqigə alidu. Sərdarlar – Huda təripidin təyinləngən adəmlər bolup, ular əyni qaƣda ɵz həlⱪini yetəkləp, ularni ⱪoxna əllərning bozək ⱪilixidin ⱪutulduratti. Tinq waⱪitlarda bolsa, ular həlⱪ arisida sot ⱪilatti.
«Sərdarlar»da Hudaning həlⱪining ⱪayta-ⱪayta Pərwərdigardin yüz ɵrügəndə uqriƣan bala-ⱪazaliri yezilƣan. Dəl buning əksiqə, muⱪəddəs kitabning «Rut» degən ⱪismida Pərwərdigarƣa ihlasmən birⱪanqə ⱪəⱨrimanlarning pəyda bolƣanliⱪi ⱨəmdə yat millətning bir əzasining Isra’il həlⱪi etiⱪad ⱪilip kəlgən Hudaƣa yüzlinixi bilən bəhtlik bolup, Hudaning sadiⱪ həlⱪining bir əzasiƣa aylanƣanliⱪi yezilƣandur.
Kitabimizdiki bax xəhs rut Mo’abliⱪ bolup, u bir Isra’ilƣa nikaⱨlinidu. Eri ɵlüp kətkəndin keyin, ⱪeynanisiƣa qongⱪur wapadarliⱪini kɵrsitip, uning bilən birgə Isra’iliyəgə baridu. Xundaⱪla Isra’illar etiⱪad ⱪilip kəlgən Hudani ⱪobul ⱪilidu.
Ahirida aldinⱪi erining Isra’il tuƣⱪanliridin birigə nikaⱨlinidu. Uning əwladidin Isra’ilning uluƣ padixaⱨi Dawut kelip qiⱪidu.
Tezis:
1. Əlimələk a’ilisining Mo’ab eligə berixi (1-bab 1-ayəttin 5-ayətkiqə)
2. Na’omi bilən Rutning Bəytləⱨəmgə ⱪaytip kelixi (1-bab 6-ayəttin 22-ayətkiqə)
3. Rutning Bo’azning etizida baxaⱪ terixi (2-bab)/p>
4. Rutning hamanƣa berip, Bo’az bilən kɵrüxüxi (3-bab)
5. Bo’azning Rutni nikaⱨiƣa elixi (4-bab 1-ayəttin 12-ayətkiqə)
6. Padixaⱨ Dawut Bo’az bilən Rutning əwladidur (4-bab 13-ayəttin 22-ayətkiqə)